ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠷᠳᠡᠮᠲᠡᠨ ᠰᠤᠲᠤᠪᠢᠯᠢᠭ᠌ ᠢ ᠰᠤᠷᠪᠤᠯᠵᠢᠯᠠᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/10/21
            ᠡᠷᠳᠡᠮᠲᠡᠨ ᠰᠤᠲᠤᠪᠢᠯᠢᠭ᠌ ᠢ ᠰᠤᠷᠪᠤᠯᠵᠢᠯᠠᠭᠰᠠᠨ          ᠬᠦᠨᠳᠦᠲᠦ ᠰᠤᠨᠤᠰᠤᠭᠴᠢᠳ ᠡ᠂ ᠡᠨᠡ ᠵᠤᠨ ᠤ ᠳᠡᠯᠭᠡᠷ ᠰᠠᠶᠢᠬᠠᠨ ᠤᠯᠠᠷᠢᠯ ᠳᠤ ᠪᠢ ᠬᠦᠬᠡᠬᠤᠲᠠ ᠪᠠᠷ ᠬᠦᠷᠬᠦ ᠳᠡᠭᠡᠨ᠂ ᠨᠡᠷᠡᠲᠦ ᠨᠠᠶᠢᠷᠠᠭᠤᠯᠤᠭᠴᠢ᠂ ᠤᠷᠴᠢᠭᠤᠯᠤᠭᠴᠢ᠂ ᠰᠢᠯᠦᠭᠴᠢ᠂ ᠤᠳᠤ ᠨᠠᠰᠤᠨ ᠰᠡᠭᠦᠳᠡᠷ ᠨᠢ ᠨᠠᠶᠠ ᠬᠦᠷᠦᠭᠰᠡᠨ ᠠᠬᠠᠮᠠᠳ ᠡᠷᠳᠡᠮᠲᠡᠨ ᠰᠤᠲᠤᠪᠢᠯᠢᠭ᠌ ᠪᠠᠭᠰᠢ ᠶᠢᠨ ᠭᠡᠷ ᠲᠤ ᠬᠦᠷᠴᠦ ᠰᠤᠷᠪᠤᠯᠵᠢᠯᠠᠭᠰᠠᠨ ᠪᠢᠯᠡ᠃ ︽ᠤᠲᠤᠨ ᠮᠡᠴᠢᠳ︾ ᠫᠷᠦᠭᠷᠡᠮ ᠤᠨ ᠡᠨᠡ ᠤᠳᠠᠭᠠᠨ ᠤ ᠳ᠋ᠤᠭᠠᠷ ᠲᠤ ᠲᠡᠭᠦᠨ ᠲᠠᠢ ᠶᠠᠷᠢᠯᠴᠠᠭᠰᠠᠨ ᠶᠠᠷᠢᠯᠴᠠᠭ᠎ᠠ ᠶᠢ ᠬᠤᠶᠠᠷ ᠬᠡᠰᠡᠭ ᠬᠤᠪᠢᠶᠠᠵᠤ ᠰᠤᠨᠤᠰᠬᠠᠬᠤ ᠪᠠᠷ ᠪᠡᠯᠡᠳᠭᠡᠯ᠎ᠡ᠃        ᠲᠠᠨᠢᠯ ᠪᠠᠶᠢᠭᠰᠠᠨ ᠨᠠᠰᠤᠲᠠᠨ ᠪᠠᠭᠤᠷᠠᠯ ᠪᠠᠭᠰᠢ ᠮᠢᠨᠢ ᠪᠠᠶᠠᠷᠲᠠᠢ ᠴᠤᠭᠲᠠᠢ ᠢᠨᠢᠶᠡᠭᠰᠡᠭᠡᠷ ᠮᠡᠨᠳᠦ ᠰᠠᠶᠢᠨ ᠢ ᠠᠰᠠᠭᠤᠵᠤ᠂ ᠰᠤᠷᠪᠤᠯᠵᠢᠯᠠᠭ᠎ᠠ ᠶᠢ ᠤᠷᠮᠠᠲᠠᠢ ᠬᠦᠯᠢᠶᠡᠭᠰᠡᠨ ᠪᠠᠶᠢᠪᠠ᠃ ᠡᠷᠳᠡᠮᠲᠡᠨ‌‍ᠰᠤᠲᠤᠪᠢᠯᠢᠭ᠌ ᠭᠤᠸᠠᠢ ᠮᠢᠨᠤ ᠬᠦᠰᠡᠭᠰᠡᠨ ᠶᠤᠰᠤ ᠪᠠᠷ ᠠᠵᠢᠯ ᠠᠮᠢᠳᠤᠷᠠᠯ᠂ ᠵᠤᠬᠢᠶᠠᠯ ᠪᠦᠲᠦᠭᠡᠯ ᠪᠠ ᠵᠠᠷᠢᠮ ᠰᠤᠳᠤᠯᠭᠠᠨ ᠤ ᠴᠢᠭᠯᠡᠯ ᠤᠨ ᠲᠤᠬᠠᠢ ᠪᠤᠳᠤᠯᠭᠠᠰᠢᠷᠠᠯ ᠵᠡᠷᠭᠡ ᠶᠢ ᠴᠢᠯᠦᠭᠡᠲᠡᠢ ᠳᠡᠯᠭᠡᠨ ᠶᠠᠷᠢᠵᠤ ᠪᠠᠶᠢᠯ᠎ᠠ᠃ ᠳᠠᠷᠠᠭ᠎ᠠ ᠶᠢᠨ ᠶᠠᠷᠢᠯᠴᠠᠭ᠎ᠠ ᠳᠤ ᠪᠠᠭᠰᠢ ᠶᠢ ︽ᠰᠤᠳᠤ᠋︾ ᠭᠡᠵᠦ ᠰᠤᠷᠪᠤᠯᠵᠢᠯᠠᠭᠴᠢ ᠶᠢ ︽ᠰᠤᠷ᠊︾ ᠭᠡᠵᠤ ᠳᠦᠭᠦᠮᠴᠢᠯᠡᠪᠡ᠃       ᠰᠤᠳᠤ᠋᠄ ᠮᠢᠨᠤ ᠪᠡᠶ᠎ᠡ1946 ᠤᠨ ᠳᠤ ᠬᠤᠪᠢᠰᠬᠠᠯ ᠳᠤ ᠤᠷᠤᠭᠠᠳ ᠬᠤᠰᠢᠭᠤᠨ ︵ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤ︶ ᠳᠠᠭᠠᠨ ᠬᠤᠶᠠᠷ ᠵᠢᠯ ᠤᠯᠠᠨ ᠲᠦᠮᠡᠨ ᠤ ᠠᠵᠢᠯ ᠬᠢᠵᠦ᠂ ᠳᠠᠷᠠᠭ᠎ᠠ ᠨᠢ ᠦᠪᠦᠷ ᠮᠤᠩᠭᠤᠯ ᠤᠨ ᠠᠦ᠋ᠲ᠋ᠤᠨᠤᠮᠢᠲ᠋ᠤ᠋ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠵᠤ ᠰᠤᠷᠤᠯᠴᠠᠭᠠᠳ ᠮᠦᠨ ᠲᠡᠨᠳᠡ ᠪᠠᠨ ᠪᠠᠭᠰᠢᠯᠠᠵᠤ ᠪᠠᠶᠢᠪᠠ᠃ ᠲᠤᠰ ᠰᠤᠷᠭᠠᠭᠤᠯᠢ ᠨᠢ ᠬᠤᠵᠢᠮ ᠤᠯᠠᠭᠠᠨᠬᠠᠳᠠ ᠶᠢᠨ ᠮᠤᠩᠭᠤᠯ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠪᠤᠯᠤᠭᠰᠠᠨ ᠳᠤ ᠪᠢ ᠵᠠᠯᠭᠠᠭᠠᠳ ᠪᠠᠭᠰᠢᠯᠠᠭᠠᠳ ᠲᠡᠨᠳᠡ ᠨᠡᠶᠢᠲᠡ ᠶᠢᠰᠦᠨ ᠵᠢᠯ ᠪᠤᠯᠵᠠᠢ᠃1956 ᠤᠨ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠳᠤ ᠢᠷᠡᠭᠡᠳ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠡᠯᠡ ᠪᠢᠴᠢᠭ ᠨᠠᠶᠢᠷᠠᠭᠤᠯᠬᠤ ᠠᠵᠢᠯ ᠢ ᠬᠢᠭᠡᠳ ᠬᠡᠳᠤᠨ ᠵᠢᠯ ᠬᠢᠵᠦ᠂1960 ᠤᠨ ᠳᠤ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠳᠤ ᠢᠷᠡᠵᠦ᠂ ᠲᠡᠭᠡᠭᠡᠳ1988 ᠤᠨ ᠳᠤ ᠵᠢᠩᠬᠢᠨᠢ ᠪᠠᠷ ᠨᠠᠰᠤᠨ ᠤ ᠠᠮᠠᠷᠠᠯᠲᠠ ᠪᠠᠨ ᠠᠪᠴᠠᠢ᠃ ᠡᠨᠡ ᠬᠤᠭᠤᠷᠤᠨᠳᠦ ᠠᠷᠪᠠᠨ ᠵᠢᠯ ᠤᠨ ᠰᠠᠮᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠭᠡᠷ ᠲᠡᠭᠡᠨ ᠵᠦᠭᠡᠷ ᠰᠠᠭᠤᠵᠠᠢ᠃ ᠵᠦᠭᠡᠷ ᠰᠠᠭᠤᠬᠤ ᠳᠠᠭᠠᠨ ᠪᠠᠰᠠ ᠪᠠᠭ᠎ᠠ ᠰᠠᠭ᠎ᠠ ᠶᠠᠭᠤᠮ᠎ᠠ ᠰᠤᠷᠤᠯ᠎ᠠ᠃ ᠪᠢ ᠪᠠᠭ᠎ᠠ ᠳᠠᠭᠠᠨ ᠡᠮ ᠡᠮᠨᠡᠯᠭᠡ ᠶᠢᠨ ᠨᠤᠮ ᠰᠤᠷᠤᠭᠰᠠᠨ ᠶᠤᠮ᠃ ᠵᠦᠭᠡᠷ ᠰᠠᠭᠤᠬᠤ ᠦᠶ᠎ᠡ ᠳᠡᠭᠡᠨ ᠲᠡᠭᠦᠨ ᠢ ᠪᠠᠨ ᠰᠡᠯᠪᠢᠵᠦ᠂ ᠭᠤᠷᠪᠠᠨ ᠳᠡᠪᠲᠡᠷ ᠨᠤᠮ ᠭᠠᠷᠭᠠᠭᠰᠠᠨ᠂ ᠲᠡᠭᠦᠨ ᠤ ᠨᠢᠭᠡ ᠨᠢ ︽ᠡᠮᠲᠦ ᠠᠮᠢᠲᠠᠨ︾ ᠭᠡᠳᠡᠭ ᠨᠤᠮ᠂ ᠲᠦᠪ ᠤᠨ ᠱᠠᠩᠨᠠᠯ ᠤᠯᠤᠭᠰᠠᠨ ᠶᠤᠮ᠃      ᠰᠤᠷ᠊᠄ ᠲᠦᠷᠦ ᠶᠢᠨ ᠱᠠᠩᠨᠠᠯ ᠭᠡᠰᠡᠨ ᠦᠭᠡ︖      ᠰᠤᠳᠤ᠋᠄ ᠲᠡᠶᠢᠮᠦ᠃ ᠲᠧᠭᠨᠢᠭ ᠮᠡᠷᠭᠡᠵᠢᠯ ᠤᠨ ᠱᠠᠩᠨᠠᠯ᠃ ᠵᠦᠭᠡᠷ ᠰᠠᠭᠤᠵᠤ ᠪᠠᠶᠢᠬᠤ ᠦᠶ᠎ᠡ ᠳᠡᠭᠡᠨ ᠭᠠᠳᠠᠭᠠᠳᠤ ᠬᠡᠯᠡ ᠪᠠᠭ᠎ᠠ ᠰᠤᠷᠤᠯ᠎ᠠ᠃ ᠮᠢᠨᠦ ᠨᠢᠭᠡ ᠨᠠᠰᠤ ᠪᠠᠷ ᠢᠶᠠᠨ ᠬᠢᠭᠰᠡᠨ ᠠᠵᠢᠯ ᠪᠤᠯ ᠬᠡᠯᠡ ᠪᠢᠴᠢᠭ ᠤᠨ ᠠᠵᠢᠯ ᠶᠤᠮ᠃ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠳᠤ ᠰᠤᠷᠬᠤ ᠪᠢᠴᠢᠭ ᠨᠠᠶᠢᠷᠠᠭᠤᠯᠬᠤ ᠲᠠᠰᠤᠭ ᠤᠨ ᠳᠡᠳ᠋ ᠡᠷᠬᠢᠯᠡᠭᠴᠢ ᠪᠠᠶᠢᠭᠰᠠᠨ ᠢᠶᠠᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠬᠤᠷᠢᠶᠠᠨ ᠳᠤ ᠢᠷᠡᠭᠡᠳ ᠰᠤᠷᠬᠤ ᠪᠢᠴᠢᠭ ᠨᠠᠶᠢᠷᠠᠭᠤᠯᠬᠤ ᠲᠠᠰᠤᠭ ᠤᠨ ᠡᠷᠬᠢᠯᠡᠭᠴᠢ ᠪᠤᠯᠵᠤ᠂ ᠰᠡᠭᠦᠯ ᠳᠤ ᠨᠢ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ ᠶᠡᠷᠦᠩᠬᠡᠢ ᠨᠠᠶᠢᠷᠠᠭᠤᠯᠤᠭᠴᠢ ᠪᠤᠯᠵᠠᠢ᠃ ᠶᠡᠷᠦ ᠨᠢ ᠡᠶᠢᠮᠦ ᠨᠢᠭᠡ ᠠᠵᠢᠯ ᠠᠴᠠ ᠰᠠᠯᠤᠭᠰᠠᠨ ᠦᠭᠡᠢ᠃ ᠠᠵᠢᠯ ᠤᠨ ᠴᠢᠯᠦᠭᠡ ᠪᠠᠷ ᠡᠨᠡ ᠲᠡᠷᠡ ᠶᠢ ᠪᠢᠴᠢᠵᠦ ᠤᠷᠤᠯᠳᠠᠳᠠᠭ᠃ ᠤᠯᠠᠭᠠᠨᠬᠠᠳᠠ ᠳᠤ ᠪᠠᠶᠢᠬᠤ ᠦᠶ᠎ᠡ ᠠᠴᠠ ᠰᠤᠨᠢᠨ ᠰᠡᠳᠬᠦᠯ ᠳᠡᠭᠡᠷ᠎ᠡ ᠤᠯᠠᠨ ᠶᠠᠭᠤᠮ᠎ᠠ ᠪᠢᠴᠢᠳᠡᠭ ᠪᠦᠭᠡᠳ ᠰᠤᠨᠢᠨ ᠰᠡᠳᠬᠦᠯ ᠤᠨ ᠬᠢᠨᠢ ᠴᠦ ᠨᠠᠮ᠎ᠠ ᠶᠢ ᠰᠠᠶᠢᠬᠠᠨ ᠪᠢᠴᠢᠭᠡᠷᠡᠢ ᠭᠡᠳ ᠵᠤᠷᠢᠭᠵᠢᠭᠤᠯᠵᠤ ᠪᠠᠶᠢᠳᠠᠭ᠃      ᠰᠤᠷ᠊᠄ ᠲᠠᠨ ᠤ ᠪᠦᠲᠦᠭᠡᠯ ᠤᠯᠠᠨ ᠲᠠᠯ᠎ᠠ ᠶᠢ ᠬᠠᠮᠤᠷᠤᠭᠰᠠᠨ ᠪᠠᠶᠢᠳᠠᠭ᠂ ᠲᠡᠭᠡᠪᠡᠯ ᠢᠨᠵᠠᠨᠠᠰᠢ ᠶᠢᠨ ᠰᠤᠳᠤᠯᠭ᠎ᠠ ᠶᠢ ᠲᠠᠶᠢᠯᠠᠭᠴᠢ ᠡᠷᠳᠡᠮᠲᠡᠨ ᠡᠷᠳᠡᠨᠢᠲᠤᠭᠲᠠᠬᠤ ᠲᠠᠢ ᠬᠠᠮᠲᠦ ᠬᠠᠮᠤᠭ ᠤᠨ ᠲᠦᠷᠦᠭᠦᠨ ᠳᠤ ᠡᠬᠢᠯᠡᠭᠦᠯᠦᠭᠰᠡᠨ ᠰᠢᠭ ᠰᠠᠨᠠᠭᠳᠠᠵᠤ ᠪᠠᠶᠢᠨ᠎ᠠ᠂ ᠲᠡᠶᠢᠮᠦ ᠤᠤ︖      ᠰᠤᠳᠤ᠋᠄ ᠢᠨᠵᠠᠨᠠᠰᠢ ᠶᠢ ᠪᠢ ᠤᠯᠠᠭᠠᠨᠬᠠᠳᠠ ᠳᠤ ᠪᠠᠶᠢᠬᠤ ᠠᠴᠠ ᠠᠪᠤᠭᠠᠳ᠂ ᠭᠠᠵᠠᠷ ᠰᠢᠷᠤᠢ ᠶᠢᠨ ᠦᠭᠡᠷᠴᠢᠯᠡᠯᠲᠡ ᠶᠢᠨ ᠦᠶ᠎ᠡ ᠠᠴᠠ ᠰᠤᠷᠤᠭᠯᠠᠵᠤ ᠢᠷᠡᠵᠡᠢ᠃ ᠭᠡᠷ ᠲᠤ ᠨᠢ ᠴᠢᠯᠦᠭᠡᠯᠡᠬᠦ ᠶᠢᠨ ᠡᠮᠦᠨ᠎ᠡ ᠠᠷᠢᠬᠢ ᠨᠡᠷᠡᠵᠦ ᠪᠠᠶᠢᠭᠰᠠᠨ᠂ ᠪᠦᠷ ᠶᠠᠳᠠᠭᠤᠷᠠᠭᠠᠳ ᠬᠡᠤᠬᠡᠳ ᠨᠢ ᠪᠠᠰᠠ ᠳᠤᠷᠤᠶᠢᠲᠠᠭᠠᠳ᠂ ᠳᠡᠮᠡᠢ ᠦᠭᠡᠳᠡ ᠦᠭᠡᠢ ᠪᠠᠶᠢᠯ᠎ᠠ ᠭᠡᠵᠦ ᠬᠦᠮᠦᠰ ᠠᠴᠠ1947—1948 ᠤᠨ ᠤ ᠦᠶ᠎ᠡ ᠪᠠᠷ ᠰᠤᠨᠤᠰᠤᠭᠰᠠᠨ᠃ ᠭᠡᠪᠡᠴᠦ ᠪᠢ ᠮᠠᠷᠲᠠᠭᠰᠠᠨ ᠦᠭᠡᠢ᠂ ᠰᠡᠭᠦᠯ ᠳᠤ ᠨᠢ ᠰᠤᠷᠠᠭᠯᠠᠵᠤ ᠪᠠᠶᠢᠭᠰᠠᠨ᠂ ᠲᠡᠷᠡ ᠦᠶ᠎ᠡ ᠳᠤ ᠬᠠᠷᠢᠨ ᠭᠡᠷ ᠢᠶᠠᠷ ᠨᠢ ᠬᠦᠷᠴᠦ ᠪᠠᠶᠢᠭᠰᠠᠨ ᠦᠭᠡᠢ᠃1956 ᠤᠨ ᠳᠤ ᠬᠦᠬᠡᠬᠤᠲᠠ ᠳᠤ ᠢᠷᠡᠭᠡᠳ᠂ ᠨᠠᠰᠤ ᠪᠠᠷᠠᠭᠰᠠᠨ ᠡᠷᠳᠡᠨᠢᠲᠤᠭᠲᠠᠬᠤ ᠳᠠᠷᠤᠭ᠎ᠠ ᠶᠢ ᠳᠠᠭᠠᠭᠠᠳ ᠭᠡᠷ  ᠲᠤ ᠨᠢ ᠬᠡᠳᠤᠨ ᠤᠳᠠᠭ᠎ᠠ ᠬᠦᠷᠦᠭᠰᠡᠨ ᠶᠤᠮ᠃      ᠰᠤᠷ᠊᠄ ᠲᠠᠨ ᠤ ᠪᠢᠴᠢᠭᠰᠡᠨ ᠢᠨᠵᠠᠨᠠᠰᠢ ᠶᠢᠨ ᠪᠤᠯᠠᠰᠢᠨ ᠳᠡᠭᠡᠷ᠎ᠡ ᠭᠡᠰᠡᠨ ᠨᠢᠭᠡ ᠰᠢᠯᠦᠭ ᠪᠠᠶᠢᠭᠰᠠᠨ᠂ ᠪᠢᠳᠡ ᠰᠤᠷᠤᠭᠴᠢ ᠪᠠᠶᠢᠬᠤ ᠳᠠᠭᠠᠨ ᠪᠠᠭ᠋ᠠᠷᠬᠠᠨ ᠤᠩᠰᠢᠳᠠᠭ ᠪᠠᠶᠢᠯ᠎ᠠ᠃      ᠰᠤᠳᠤ᠋᠄ ᠪᠢ ᠢᠨᠵᠠᠨᠠᠰᠢ ᠶᠢᠨ ᠤᠭ ᠤᠨ ᠨᠤᠲᠤᠭ ᠢᠶᠠᠷ ᠰᠤᠷᠪᠤᠯᠵᠢᠯᠠᠨ ᠶᠠᠪᠤᠬᠤ ᠳᠠᠭᠠᠨ ᠡᠳᠦᠷ ᠤᠨ ᠲᠡᠮᠳᠡᠭᠯᠡᠯ ᠤᠨ ᠬᠡᠯᠪᠡᠷᠢ ᠪᠠᠷ ᠦᠵᠡᠭᠰᠡᠨ ᠰᠤᠨᠤᠰᠤᠭᠰᠠᠨ ᠶᠠᠷᠢᠯᠴᠠᠭᠰᠠᠨ ᠪᠠᠶᠢᠳᠠᠯ ᠢᠶᠠᠨ ᠲᠡᠮᠳᠡᠭᠯᠡᠵᠦ ᠠᠪᠤᠭᠠᠳ ᠬᠢᠲᠠᠳ ᠢᠶᠠᠷ ᠨᠢᠭᠡ ᠳᠡᠪᠲᠡᠷ ᠨᠤᠮ ᠬᠡᠪᠯᠡᠭᠦᠯᠦᠭᠰᠡᠨ ᠪᠢᠯᠡ᠃ ᠬᠡᠵᠢᠶ᠎ᠡ ᠬᠤᠶᠢᠨ᠎ᠠ1985 ᠤᠨ ᠠᠴᠠ ᠬᠤᠶᠢᠰᠢ ᠬᠡᠳᠤᠨ ᠵᠢᠯ ᠳᠤ ᠢᠨᠵᠠᠨᠠᠰᠢ ᠶᠢᠨ ᠨᠤᠲᠤᠭ ᠢᠶᠠᠷ ᠬᠦᠷᠴᠦ᠂ ᠳᠤᠷᠠᠰᠬᠠᠯ ᠤᠨ ᠲᠠᠩᠬᠢᠮ ᠪᠠᠶᠢᠭᠤᠯᠬᠤ ᠶᠤᠰᠤᠯᠠᠯ ᠪᠠ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠬᠤᠷᠠᠯ ᠳᠤ ᠤᠷᠤᠯᠴᠠᠵᠤ ᠪᠠᠶᠢᠪᠠ᠃ ᠪᠡᠭᠡᠵᠢᠩ ᠠᠴᠠ ᠮᠠᠯᠴᠢᠨᠬᠦᠦ ᠨᠠᠷ ᠪᠠ ᠦᠨᠳᠦᠰᠦᠲᠡᠨ  ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠦᠪᠯᠡᠯ ᠤᠨ ᠬᠦᠮᠦᠰ ᠪᠠᠰᠠ ᠬᠦᠷᠦᠯᠴᠡᠨ ᠤᠴᠢᠭᠰᠠᠨ ᠪᠠᠶᠢᠯ᠎ᠠ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠢ ᠲᠠᠬᠢᠵᠦ ᠤᠴᠢᠭᠰᠠᠨ ᠦᠭᠡᠢ᠂ ᠮᠠᠨ ᠤ ᠡᠷᠳᠡᠨᠢᠲᠤᠭᠲᠠᠬᠤ ᠳᠠᠷᠤᠭ᠎ᠠ ᠶᠢᠨ ᠪᠡᠶ᠎ᠡ ᠪᠠᠰᠠ ᠮᠠᠭᠤ᠃ ᠲᠡᠭᠦᠨ ᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠬᠤ ᠦᠶ᠎ᠡ ᠳᠤ ᠮᠠᠨ ᠤ ᠠᠳᠡ ᠢᠨᠵᠠᠨᠠᠰᠢ ᠶᠢᠨ ᠰᠤᠳᠤᠯᠭᠠᠨ ᠤ ᠡᠪᠯᠡᠯ ᠭᠡᠵᠦ ᠪᠠᠶᠢᠭᠰᠠᠨ᠃ ᠡ᠊ ᠳᠠᠷᠤᠭ᠎ᠠ ᠪᠡᠶ᠎ᠡ ᠮᠠᠭᠤᠲᠠᠭᠰᠠᠨ ᠤ ᠬᠤᠶᠢᠨ᠎ᠠ᠂ ᠡᠨᠡ ᠡᠪᠯᠡᠯ ᠤᠨ ᠠᠵᠢᠯ ᠢ ᠬᠢᠬᠦ ᠪᠠᠨ ᠪᠠᠶᠢᠴᠢᠬᠠᠶ᠎ᠠ᠂ ᠲᠠᠷᠬᠠᠴᠢᠬᠠᠶ᠎ᠠ᠂ ᠯᠢᠶᠤᠤᠨᠢᠩ ᠤᠨ ᠤᠷᠤᠨ ᠨᠤᠲᠤᠭ ᠤᠨ ᠤᠯᠤᠰ ᠤᠳ ᠦᠪᠡᠷ ᠢᠶᠠᠨ ᠮᠡᠳᠡᠭ ᠡ᠂ ᠪᠢᠳᠡ ᠬᠢᠵᠦ ᠲᠡᠶᠢᠯᠬᠦ ᠦᠭᠡᠢ ᠪᠤᠯᠵᠠᠢ᠂ ᠵᠤᠭᠤᠰ ᠮᠦᠩᠭᠦ ᠪᠠᠶᠢᠬᠤ ᠦᠭᠡᠢ᠂ ᠤᠴᠢᠵᠦ ᠪᠠᠰᠠ ᠲᠡᠶᠢᠯᠬᠦ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠡᠭᠡᠭᠡᠳ ᠤᠳᠠᠭᠰᠠᠨ ᠦᠭᠡᠢ᠂ ᠡᠨᠡ ᠡᠪᠯᠡᠯ ᠲᠠᠷᠬᠠᠵᠠᠢ᠃      ᠰᠤᠷ᠊᠄ ᠦᠨᠡᠨ ᠳᠡᠭᠡᠨ ᠡᠨᠡ ᠠᠵᠢᠯ ᠶᠡᠭᠡ ᠨᠡᠬᠡᠬᠡᠯᠲᠡ ᠲᠠᠢ ᠡᠭᠦᠳᠦᠯᠲᠡ ᠲᠠᠢ ᠠᠵᠢᠯ ᠪᠠᠶᠢᠵᠠᠢ᠃      ᠰᠤᠳᠤ᠋᠄ ᠡᠨᠡ ᠲᠤᠬᠠᠢ ᠴᠤᠤᠶᠠᠩ ᠵᠡᠷᠭᠡ ᠬᠤᠲᠠ ᠶᠢᠨ ᠳᠠᠷᠤᠭ᠎ᠠ ᠨᠠᠷ ᠤᠷᠤᠯᠴᠠᠭᠠᠳ ᠬᠢᠵᠦ ᠪᠠᠶᠢᠯ᠎ᠠ᠃ ᠦᠨᠦᠬᠡᠨ ᠪᠠᠰᠠ ᠬᠤᠷᠠᠯ  ᠴᠤᠭᠯᠠᠭ᠎ᠠ ᠬᠢᠬᠦ ᠶᠤᠮ ᠭᠡᠵᠦ ᠴᠢᠮᠡᠭᠡ ᠭᠠᠷᠴᠤ ᠪᠠᠶᠢᠭᠰᠠᠨ᠃ ᠭᠡᠪᠡᠴᠤ ᠪᠢᠳᠡᠨ ᠳᠤ ᠰᠤᠨᠤᠰᠬᠠᠭᠰᠠᠨ ᠦᠭᠡᠢ ᠪᠢᠳᠡ ᠮᠡᠳᠡᠬᠦ ᠴᠦ ᠦᠭᠡᠢ᠃        ᠰᠤᠷ᠊᠄ ᠢᠨᠵᠠᠨᠠᠰᠢ ᠪᠤᠯ ᠮᠠᠨ ᠤ ᠦᠨᠳᠦᠰᠦᠲᠡᠨ ᠤ ᠲᠡᠤᠬᠡᠨ ᠳᠠᠬᠢ ᠨᠡᠷᠡᠲᠦ ᠵᠤᠬᠢᠶᠠᠯᠴᠢ ᠪᠠᠶᠢᠭᠰᠠᠨ᠂ ᠲᠡᠭᠦᠨ ᠢ ᠵᠢᠩᠬᠢᠨᠢ ᠢᠯᠡᠷᠡᠭᠦᠯᠦᠭᠰᠡᠨ ᠨᠡᠶᠢᠲᠡ ᠤᠯᠠᠨ ᠳᠤ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠨᠢ ᠲᠠ ᠪᠤᠯᠤᠨ ᠡᠷᠳᠡᠨᠢᠲᠤᠭᠲᠠᠬᠤ ᠭᠤᠸᠠᠢ ᠶᠢᠨ ᠡᠬᠢᠯᠡᠭᠦᠯᠵᠦ ᠬᠢᠭᠰᠡᠨ ᠶᠠᠪᠤᠳᠠᠯ ᠡ ᠭᠡᠵᠦ ᠪᠢ ᠬᠤᠪᠢ ᠳᠠᠭᠠᠨ ᠪᠤᠳᠤᠳᠠᠭ᠃ ᠲᠠᠭᠠᠷᠠᠨ᠎ᠠ ᠤᠤ ᠦᠭᠡᠢ ᠤᠤ︖      ᠰᠤᠳᠤ᠋᠄ ᠲᠡᠶᠢᠮᠦ ᠲᠡᠶᠢᠮᠦ᠃      ᠰᠤᠷ᠊᠄ ᠢᠨᠵᠠᠨᠠᠰᠢ ᠶᠢᠨ ︽ᠨᠢᠭᠡᠨ ᠳᠠᠪᠬᠤᠷ ᠠᠰᠠᠷ︾᠂ ︽ᠤᠯᠠᠭᠠᠨ᠎ᠠ ᠤᠬᠢᠯᠠᠬᠤ ᠲᠠᠩᠬᠢᠮ︾ ᠬᠤᠶᠠᠷ ᠨᠤᠮ ᠢ ᠲᠠ ᠨᠠᠷ ᠭᠠᠷᠳᠠᠨ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠶᠢᠬ᠎ᠠ᠂ ᠪᠠᠰᠠ ᠳᠠᠬᠢᠨ ᠷᠤᠮᠠᠨ ︽ᠬᠦᠬᠡ ᠰᠤᠳᠤᠷ︾ ᠪᠤᠢ᠃      ᠰᠤᠳᠤ᠋᠄  ︽ᠬᠦᠬᠡ ᠰᠤᠳᠤᠷ︾ ᠭᠤᠷᠪᠠᠨ ᠳᠡᠪᠲᠡᠷ ᠪᠢᠰᠢ ᠤᠤ ᠳ᠋ᠠ᠂ ᠡᠨᠡ ᠪᠤᠯ ᠳᠤᠮᠳᠠ ᠳᠤᠮᠳᠠ ᠳᠡᠪᠲᠡᠷ ᠤᠨ ᠨᠦᠬᠦᠪᠦᠷᠢ᠂ ᠨᠢᠭᠡᠳᠦᠭᠡᠷ ᠳᠡᠪᠲᠡᠷ ᠤᠨ ᠨᠦᠬᠦᠪᠦᠷᠢ ᠦᠨᠦ ᠤᠯᠳᠠᠭᠰᠠᠨ ᠦᠭᠡᠢ᠃ ᠭᠤᠷᠪᠠᠳᠤᠭᠠᠷ ᠢ ᠨᠢ ᠲᠡᠷᠡ ︵ᠢᠨᠵᠠᠨᠠᠰᠢ︶ ᠳᠠᠭᠤᠰᠬᠠᠵᠤ ᠠᠮᠵᠢᠭᠰᠠᠨ ᠦᠭᠡᠢ᠃ ᠡᠨᠡ ᠨᠤᠮ ᠪᠤᠯ ᠡᠷᠳᠡᠨᠢᠲᠤᠭᠲᠠᠬᠤ ᠳᠠᠷᠤᠭ᠎ᠠ ᠬᠦᠮᠦᠨ ᠠᠴᠠ ᠤᠯᠤᠭᠰᠠᠨ ᠬᠦᠬᠡ ᠲᠤᠷᠭᠠᠨ ᠭᠠᠳᠠᠷ ᠲᠠᠢ ᠭᠠᠷ ᠪᠢᠴᠢᠮᠡᠯ ᠳᠡᠪᠲᠡᠷ ᠪᠠᠶᠢᠪᠠ᠃ ᠪᠢᠳᠡ ᠲᠡᠭᠦᠨ ᠢ ᠦᠨᠳᠦᠰᠦᠯᠡᠨ ᠵᠠᠰᠠᠭᠠᠳ ᠮᠠᠨ ᠤ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ ᠠᠴᠠ ᠬᠡᠪᠯᠡᠵᠦ ᠭᠠᠷᠭᠠᠭᠰᠠᠨ ᠶᠤᠮ᠃ ᠢᠨᠵᠠᠨᠠᠰᠢ ᠶᠢᠨ ᠶᠠᠪᠤᠳᠠᠯ ᠢᠩᠬᠢᠭᠡᠳ ᠳᠠᠭᠤᠰᠴᠠᠢ᠂ ᠮᠠᠨ ᠤ ᠭᠠᠷ ᠢᠶᠠᠷ ᠬᠢᠭᠰᠡᠨ ᠶᠠᠭᠤᠮ᠎ᠠ ᠦᠭᠡᠷ᠎ᠡ ᠪᠠᠶᠢᠬᠤ ᠦᠭᠡᠢ᠂ ᠮᠠᠲ᠋ᠧᠷᠢᠶᠠᠯ ᠪᠠᠰᠠ ᠤᠯᠳᠠᠬᠤ ᠦᠭᠡᠢ᠃ ᠤᠳᠤ ᠰᠤᠨᠤᠰᠬᠤ ᠳᠤ ᠯᠢᠶᠤᠤᠨᠢᠩ ᠳᠤ ᠬᠦᠰᠢᠶ᠎ᠡ ᠪᠤᠰᠬᠠᠵᠤ᠂ ᠴᠢᠨᠳᠠᠷ ᠢ ᠨᠢ ᠳᠡᠪᠰᠢᠭᠦᠯᠵᠦ ᠪᠸᠢᠢᠫᠢᠶᠤᠤ ᠬᠤᠲᠠ ᠳᠤ ᠠᠪᠴᠢᠵᠠᠢ᠃ ᠪᠸᠢᠢᠫᠢᠶᠤᠤ ᠶᠢᠨ ᠨᠢᠭᠡᠨ ᠮᠤᠩᠭᠤᠯ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢ ᠢᠨᠵᠠᠨᠠᠰᠢ ᠶᠢᠨ ᠨᠡᠷᠡᠮᠵᠢᠲᠤ ᠰᠤᠷᠭᠠᠭᠤᠯᠢ ᠪᠤᠯᠭᠠᠵᠤ᠂ ᠲᠡᠨᠳᠡᠬᠢ ᠮᠤᠩᠭᠤᠯ ᠬᠡᠤᠬᠡᠳ ᠲᠤ ᠮᠤᠩᠭᠤᠯ ᠪᠢᠴᠢᠭ ᠵᠢᠭᠠᠵᠤ ᠪᠠᠶᠢᠭ᠎ᠠ ᠶᠤᠮ ᠪᠠᠶᠢᠨ᠎ᠠ᠃      1988ᠤᠨ ᠳᠤ ᠪᠢ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠯ᠎ᠠ᠃ ᠢᠩᠬᠢᠭᠡᠳ ᠭᠤᠷᠪᠠᠨ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠨᠢᠭᠡᠨ ᠳᠡᠪᠲᠡᠷ ᠱᠠᠰᠢᠨ ᠤ ᠲᠤᠯᠢ ᠨᠠᠶᠢᠷᠠᠭᠤᠯᠵᠦ ᠬᠡᠪᠯᠡᠭᠦᠯᠦᠭᠰᠡᠨ᠂ ᠦᠩᠭᠡᠷᠡᠭᠰᠡᠨ ᠳᠤ ᠮᠠᠨ ᠤ ᠬᠢᠨ ᠳᠤ ᠪᠠᠶᠢᠭ᠎ᠠ ᠦᠭᠡᠢ ᠨᠤᠮ ᠪᠤᠯᠬᠤᠷ ᠤᠩᠰᠢᠭᠴᠢᠳ ᠤᠨ ᠰᠤᠨᠢᠷᠬᠠᠯ ᠢ ᠲᠡᠲᠠᠵᠤ᠂ ᠬᠤᠶᠠᠷ ᠮᠢᠩᠭᠠᠨ ᠳᠡᠪᠲᠡᠷ ᠬᠡᠪᠯᠡᠭᠰᠡᠨ ᠢ ᠤᠳᠠᠯ ᠦᠭᠡᠢ ᠠᠪᠴᠤ ᠳᠠᠭᠤᠰᠴᠠᠢ᠃ ᠡᠭᠦᠨ ᠳᠤ ᠶᠠᠫᠤᠨ᠂ ᠠᠮᠧᠷᠢᠺᠠ᠂ ᠮᠤᠩᠭᠤᠯ ᠵᠡᠷᠭᠡ ᠤᠯᠤᠰ ᠤᠨ ᠤᠩᠰᠢᠭᠴᠢᠳ ᠰᠤᠨᠢᠷᠬᠠᠯ ᠲᠦᠷᠦᠨ ᠠᠪᠠᠴᠢᠭᠰᠠᠨ ᠪᠠᠶᠢᠯ᠎ᠠ᠃ ᠡᠨᠡ ᠲᠤᠯᠢ ᠶᠢ ᠨᠠᠶᠢᠷᠠᠭᠤᠯᠬᠤ ᠳᠤ ᠪᠢ ᠭᠤᠮᠪᠤᠮ ᠵᠡᠷᠭᠡ ᠭᠠᠵᠠᠷ ᠢᠶᠠᠷ ᠬᠡᠳᠦᠨᠲᠡ ᠤᠴᠢᠵᠤ ᠤᠯᠠᠨ ᠠᠷᠪᠢᠨ ᠨᠠᠰᠤᠲᠠᠢ ᠯᠠᠮ ᠨᠠᠷ ᠢ ᠰᠤᠷᠪᠤᠯᠵᠢᠯᠠᠨ ᠠᠰᠠᠭᠤᠵᠤ ᠪᠠᠶᠢᠭᠰᠠᠨ ᠶᠤᠮ᠃      ᠪᠢ ᠤᠳᠤ ᠪᠠᠰᠠ ᠨᠢᠭᠡᠨ ᠮᠤᠩᠭᠤᠯ ᠠᠩᠭ᠍ᠯᠢ ᠬᠢᠲᠠᠳ ᠭᠤᠷᠪᠠᠨ ᠬᠡᠯᠡᠨ ᠤ ᠲᠤᠯᠢ ᠨᠠᠶᠢᠷᠠᠭᠤᠯᠵᠤ ᠪᠤᠢ᠃ ᠠᠮᠧᠷᠢᠺᠠ ᠶᠢᠨ ᠬᠠᠩᠬᠢᠨ ᠭᠤᠮᠪᠤᠵᠠᠪ ᠤᠨ ᠬᠢᠭᠰᠡᠨ ᠲᠡᠷᠡ ᠲᠤᠯᠢ ᠪᠤᠯ ᠪᠤᠯ ᠵᠦᠪᠬᠡᠨ ᠮᠤᠩᠭᠤᠯ ᠠᠩᠭ᠍ᠯᠢ ᠬᠤᠶᠠᠷ ᠬᠡᠯᠡᠨ ᠤ ᠲᠤᠯᠢ᠂ ᠬᠢᠲᠡᠳ ᠦᠭᠡ ᠪᠠᠶᠢᠬᠤ ᠦᠭᠡᠢ᠂ ᠰᠤᠩᠭᠤᠭᠰᠠᠨ ᠦᠭᠡ ᠨᠢ ᠠᠷᠪᠢᠨ ᠪᠢᠰᠢ᠃ ᠮᠤᠩᠭᠤᠯ ᠤᠯᠤᠰ ᠤᠨ ᠬᠢᠭᠰᠡᠨ ᠮᠤᠩᠭᠤᠯ ᠠᠩᠭ᠍ᠯᠢ ᠶᠠᠫᠤᠨ ᠬᠤᠷᠪᠠᠨ ᠬᠡᠯᠡᠨ ᠤ ᠤᠷᠴᠢᠭᠤᠯᠭ᠎ᠠ ᠶᠢᠨ ᠲᠤᠯᠢ ᠳᠤ ᠮᠤᠩᠭᠤᠯ ᠦᠭᠡ ᠪᠠᠨ ᠪᠠᠶᠠᠯᠢᠭ ᠰᠠᠶᠢᠬᠠᠨ ᠢᠯᠡᠳᠭᠡᠭᠰᠡᠨ ᠪᠤᠯᠪᠠᠴᠤ ᠦᠭᠡ ᠨᠢ ᠴᠤᠬᠡᠨ ᠪᠠᠶᠢᠪᠠ᠃ ᠮᠢᠨᠤ ᠡᠨᠡ ᠲᠤᠯᠢ ᠳᠤ ᠮᠤᠩᠭᠤᠯ ᠬᠡᠯᠡᠨ ᠤ ᠪᠠᠶᠢᠩᠭᠤ ᠬᠡᠷᠡᠭᠯᠡᠭᠳᠡᠳᠡᠭ ᠦᠭᠡ ᠶᠢ ᠤᠯᠠᠨ ᠰᠤᠩᠭᠤᠭᠰᠠᠨ ᠪᠦᠭᠡᠳ ᠡᠩ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠨᠡᠷ᠎ᠡ ᠲᠤᠮᠢᠶ᠎ᠠ ᠶᠢ ᠠᠷᠪᠢᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠶᠤᠮ᠃ ᠪᠠᠰᠠ ᠨᠢᠭᠡ ᠤᠨᠴᠠᠯᠢᠭ ᠨᠢ ᠮᠤᠩᠭᠤᠯ ᠬᠡᠯᠡᠨ ᠤ ᠵᠦᠢᠷ ᠰᠡᠴᠡᠨ ᠦᠭᠡ ᠶᠢ ᠮᠢᠨᠤ ᠮᠡᠳᠡᠳᠡᠭ ᠬᠢᠷᠢ ᠪᠠᠷ ᠪᠠᠭᠳᠠᠭᠠᠭᠰᠠᠨ᠂ ᠡᠨᠡ ᠪᠤᠯ ᠵᠦᠭᠡᠷ ᠶᠤᠮ᠃ ᠬᠢᠲᠠᠳ ᠢᠶᠠᠷ ᠳᠦᠢᠴᠡᠬᠦ ᠪᠦᠭᠡᠳ ᠤᠳᠬ᠎ᠠ ᠤᠶᠢᠷ᠎ᠠ ᠦᠭᠡ ᠶᠢ ᠪᠠᠭᠲᠠᠭᠠᠬᠤ ᠶᠢ ᠬᠢᠴᠢᠶᠡᠪᠡ᠂ ᠵᠢᠰᠢᠶᠡᠯᠡᠪᠡᠯ᠂ ︽ᠤᠷᠤᠨ ᠦᠭᠡᠢ ᠭᠠᠵᠠᠷ ᠤᠪᠤᠭ᠎ᠠ ᠪᠤᠰᠬᠠᠬᠤ︾ ᠭᠡᠳᠡᠭ ᠢ ᠤᠳᠬ᠎ᠠ ᠤᠶᠢᠷᠠᠯᠴᠠᠭ᠎ᠠ ︽ᠡᠤ ᠵᠦᠩ ᠱᠧᠩ ᠶᠢᠤ︾ ︵无中生有︶ ᠭᠡᠳᠡᠭ ᠳᠦᠢᠴᠡᠬᠦ ᠦᠭᠡ ᠪᠠᠷ ᠢᠯᠡᠳᠭᠡᠬᠦ ᠳᠤ ᠪᠤᠯᠤᠨ᠎ᠠ᠂ ᠬᠢᠲᠠᠳ ᠮᠤᠩᠭᠤᠯ ᠦᠭᠡ ᠶᠢᠨ ᠳᠦᠢᠴᠡᠬᠦ ᠵᠦᠢᠯ ᠴᠤᠬᠡᠨ ᠦᠭᠡᠢ ᠪᠠᠶᠢᠳᠠᠭ᠂ ᠭᠡᠪᠡᠴᠤ ᠤᠯᠠᠩᠬᠢ ᠨᠢ ᠶᠠᠪ ᠴᠠᠪ ᠨᠡᠶᠢᠴᠡᠬᠦ ᠪᠢᠰᠢ᠃ ᠬᠠᠷᠢᠨ ᠡᠨᠡ ᠲᠤᠯᠢ ᠳᠤ ᠠᠩᠭ᠍ᠯᠢ ᠤᠷᠴᠢᠭᠤᠯᠭ᠎ᠠ ᠵᠤᠬᠢᠴᠠᠭᠤᠯᠬᠤ ᠳᠤ ᠪᠡᠷᠬᠡᠲᠠᠢ ᠪᠠᠶᠢᠪᠠ᠂ ᠢᠩᠬᠢᠭᠡᠳ ᠪᠢ ᠦᠪᠦᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ ᠠᠮᠧᠷᠢᠺᠠ ᠶᠢᠨ ᠨᠢᠭᠡᠨ ᠰᠤᠷᠤᠭᠴᠢ ᠪᠠᠷ ᠬᠠᠪᠰᠤᠷᠤᠭᠤᠯᠤᠭᠰᠠᠨ᠂ ᠲᠡᠷᠡ ᠮᠤᠩᠭᠤᠯ ᠦᠭᠡᠨ ᠳᠤ ᠵᠦᠭᠡᠷ ᠶᠤᠮ᠃ ᠭᠡᠪᠡᠴᠤ ᠡᠵᠢ ᠨᠢ ᠡᠪᠡᠳᠴᠢᠨᠲᠠᠢ ᠪᠤᠯᠤᠯ᠎ᠠ ᠭᠡᠳ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠭᠰᠠᠨ᠂ ᠲᠡᠭᠡᠬᠦ ᠳᠡᠭᠡᠨ ᠵᠦᠢᠷ ᠰᠡᠴᠡᠨ ᠦᠭᠡ ᠶᠢᠨ ᠲᠡᠶᠢᠮᠦ ᠤᠯᠠᠨ ᠺᠠᠷᠲ ᠢ ᠠᠪᠤᠭᠠᠳ ᠬᠠᠷᠢᠭᠰᠠᠨ ᠪᠠᠶᠢᠪᠠ᠂ ᠨᠠᠳᠠ ᠳᠤ ᠵᠠᠬᠢᠳᠠᠯ ᠢᠷᠡᠭᠦᠯᠦᠭᠡ ᠦᠭᠡᠢ᠂ ᠰᠤᠷᠭᠠᠭᠤᠯᠢ ᠳᠠᠭᠠᠨ ᠵᠠᠬᠢᠳᠠᠯ ᠢᠯᠡᠭᠡᠵᠦ ᠦᠨᠦ ᠺᠠᠷᠲ ᠤᠳ ᠢᠶᠠᠨ ᠵᠠᠪ ᠴᠢᠯᠦᠭᠡᠨ ᠳᠡᠭᠡᠨ ᠦᠵᠡᠵᠦ ᠪᠠᠶᠢᠨ᠎ᠠ ᠰᠢᠤ ᠭᠡᠵᠦ ᠬᠡᠯᠡᠭᠰᠡᠨ ᠭᠡᠨ᠎ᠡ᠃ ᠡᠨᠡ ᠶᠠᠪᠤᠳᠠᠯ ᠶᠡᠭᠡ ᠶᠠᠷᠰᠢᠭ ᠪᠤᠯᠵᠤ᠂ ᠠᠵᠢᠯ ᠢ ᠮᠢᠨᠢ ᠰᠠᠭᠠᠲᠠᠭᠠᠯ᠎ᠠ᠃ ᠡᠨᠡ ᠲᠤᠯᠢ ᠳᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ᠂ ᠠᠵᠦ ᠠᠬᠤᠢ ᠶᠢᠨ ᠨᠡᠷ᠎ᠡ ᠲᠤᠮᠢᠶ᠎ᠠ ᠶᠢ ᠥᠷᠭᠡᠨ ᠢᠶᠠᠷ ᠰᠤᠩᠭᠤᠵᠤ ᠤᠷᠤᠭᠤᠯᠤᠭᠰᠠᠨ ᠶᠤᠮ᠃ ᠮᠢᠨᠤ ᠡᠨᠡ ᠬᠡᠪᠯᠡᠭᠳᠡᠬᠦ ᠳᠤ ᠬᠦᠷᠪᠡᠯ ᠪᠤᠯᠤᠮᠵᠢ ᠶᠢᠨ ᠶᠤᠮ᠂ ᠮᠤᠩᠭᠤᠯ ᠢᠶᠠᠷ ᠪᠠᠰᠠ ᠡᠶᠢᠮᠦ ᠨᠤᠮ ᠭᠠᠷᠴᠤ ᠪᠠᠶᠢᠨ᠎ᠠ ᠭᠡᠵᠦ ᠳᠡᠯᠡᠬᠡᠢ ᠳᠤ ᠦᠵᠡᠭᠦᠯᠬᠦ ᠦᠭᠡᠢ ᠤᠤ ᠳ᠋ᠠ᠃      ᠠᠩᠭ᠍ᠯᠢ ᠮᠤᠩᠭᠤᠯ ᠬᠡᠯᠡᠨ ᠤ ᠲᠤᠯᠢ ᠬᠡᠪᠯᠡᠭᠳᠡᠭᠰᠡᠨ ᠲᠡᠤᠬᠡ ᠶᠢᠨ ᠪᠠᠶᠢᠳᠠᠯ ᠤᠨ ᠲᠤᠬᠠᠢ ᠰᠤᠳᠤᠪᠢᠯᠢᠭ᠌ ᠪᠠᠭᠰᠢ ᠬᠡᠯᠡᠬᠦ ᠳᠡᠭᠡᠨ᠂ ᠠᠷᠪᠠ ᠬᠤᠷᠢᠨ ᠵᠢᠯ ᠤᠨ ᠡᠮᠦᠨ᠎ᠡ ᠳ᠋ᠠᠨᠮᠠᠷᠺ ᠤᠯᠤᠰ ᠲᠤ ᠨᠢᠭᠡ ᠲᠤᠯᠢ ᠭᠠᠷᠴᠤ ᠪᠠᠶᠢᠭᠰᠠᠨ᠂ ᠰᠸᠢᠳ᠋ᠸᠠ ᠳᠤ ᠴᠦ ᠨᠢᠭᠡ ᠲᠤᠯᠢ ᠬᠡᠪᠯᠡᠭᠳᠡᠭᠰᠡᠨ ᠪᠠᠶᠢᠵᠠᠢ᠂ ᠡᠨᠡ ᠨᠤᠮ ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ ᠠᠴᠠ ᠡᠮᠦᠨ᠎ᠡ ᠮᠠᠨ  ᠤ ᠠᠳᠡ ᠪᠠᠶᠢᠭᠰᠠᠨ᠂ ᠬᠡᠯᠡᠯᠭᠡᠨ ᠦᠭᠡᠢ ᠦᠭᠡ ᠴᠦᠬᠡᠨ ᠲᠠᠢ᠂ ᠮᠤᠩᠭᠤᠯ ᠢ ᠠᠩᠭ᠍ᠯᠢ ᠪᠠᠷ ᠤᠷᠴᠢᠭᠤᠯᠤᠭᠰᠠᠨ᠂ ᠴᠤᠬᠤᠮ ᠶᠠᠮᠠᠷ ᠬᠦᠮᠦᠨ ᠬᠢᠵᠦ ᠭᠠᠷᠭᠠᠭᠰᠠᠨ ᠢ ᠮᠡᠳᠡᠬᠦ ᠦᠭᠡᠢ᠂ ᠤᠳᠤ ᠤᠯᠳᠠᠬᠤ ᠪᠠᠨ ᠪᠤᠯᠢᠵᠠᠢ᠃ ᠢᠩᠬᠢᠪᠡᠯ ᠠᠮᠧᠷᠢᠺᠠ ᠠᠴᠠ ᠪᠠᠰᠠ ᠨᠢᠭᠡ ᠵᠢᠭᠠᠬᠠᠨ ᠲᠤᠯᠢ ᠬᠡᠦᠯᠵᠦ ᠤᠯᠠᠭᠠᠨ ᠳᠡᠪᠲᠡᠷ ᠭᠠᠷᠴᠠᠢ᠃ ᠳᠠᠬᠢᠪᠠᠯ ᠮᠤᠩᠭᠤᠯ ᠤᠯᠤᠰ ᠤᠨ ᠶᠠᠫᠤᠨ ᠬᠦᠮᠦᠨ ᠲᠠᠢ ᠬᠤᠷᠰᠢᠵᠦ ᠪᠠᠶᠢᠭᠠᠳ ᠭᠠᠷᠭᠠᠭᠰᠠᠨ ᠲᠤᠯᠢ ᠪᠠᠶᠢᠨ᠎ᠠ᠂ ᠮᠤᠩᠭᠤᠯ ᠦᠭᠡ ᠴᠦᠬᠡᠨ᠂ ᠢᠯᠠᠩᠭᠤᠶ᠎ᠠ ᠰᠢᠨ᠎ᠡ ᠰᠢᠨ᠎ᠡ ᠨᠡᠷ᠎ᠡ ᠲᠤᠮᠢᠶ᠎ᠠ᠂ ᠤᠯᠤᠰ ᠲᠦᠷᠦ ᠶᠢᠨ ᠨᠡᠷ᠎ᠡ ᠲᠤᠮᠢᠶ᠎ᠠ᠂ ᠪᠠᠶᠢᠭᠠᠯᠢ ᠶᠢᠨ ᠨᠡᠷ᠎ᠡ ᠲᠤᠮᠢᠶ᠎ᠠ ᠪᠠᠷᠤᠭ ᠪᠠᠶᠢᠬᠤ ᠦᠭᠡᠢ ᠭᠡᠮᠡᠷ᠃ ᠭᠡᠪᠡᠴᠤ ᠮᠤᠩᠭᠤᠯ ᠦᠭᠡ ᠨᠢ ᠰᠠᠶᠢᠨ᠂ ᠦᠭᠡ ᠶᠢ ᠡᠪ ᠬᠠᠪᠤ ᠲᠠᠢ ᠬᠡᠷᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃      ᠮᠢᠨᠤ ᠬᠢᠭᠰᠡᠨ ᠲᠤᠯᠢ ᠳᠤ ᠡᠨᠡ ᠲᠠᠯ᠎ᠠ ᠪᠠᠷ ᠮᠠᠲ᠋ᠧᠷᠢᠶᠠᠯ ᠤᠯᠠᠨ ᠴᠤᠭᠯᠠᠭᠤᠯᠵᠤ ᠺᠠᠷᠲ ᠬᠢᠭᠡᠳ ᠠᠩᠭ᠍ᠯᠢ ᠦᠰᠦᠭ ᠤᠨ ᠮᠠᠰᠢᠨ᠎ᠠ ᠪᠠᠷ ᠪᠢᠴᠢᠭᠰᠡᠨ ᠪᠦᠭᠡᠳ ᠦᠨᠦ ᠰᠤᠷᠤᠭᠴᠢ ᠠᠩᠭ᠍ᠯᠢ ᠶᠢ ᠨᠢ ᠵᠠᠰᠠᠵᠤ ᠦᠭᠭᠦᠭᠰᠡᠨ ᠶᠤᠮ᠃ ᠡᠭᠦᠨ ᠳᠤ ᠭᠤᠤᠯᠳᠠᠭᠤ ᠵᠦᠢᠷ ᠰᠡᠴᠡᠨ ᠦᠭᠡ ᠶᠢ ᠰᠤᠩᠭᠤᠭᠰᠠᠨ ᠢᠶᠠᠨ ᠲᠡᠭᠦᠨ ᠢ ᠠᠩᠭ᠍ᠯᠢ ᠪᠠᠷ ᠡᠪᠯᠡᠭᠦᠯᠦᠭᠡᠳ ᠦᠭᠭᠦᠭᠡᠴᠢ ᠭᠡᠰᠡᠨ ᠶᠤᠮ᠃ ᠲᠡᠷᠡ ᠰᠤᠷᠤᠭᠴᠢ ᠠᠪᠴᠤ ᠶᠠᠪᠤᠭᠠᠳ ᠵᠢᠯ ᠢᠯᠡᠭᠦᠦ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠲᠡᠭᠦᠨ ᠤ ᠪᠠᠭᠰᠢ ᠳᠠᠭᠠᠨ ᠢᠯᠡᠭᠡᠭᠰᠡᠨ ᠢᠮᠧᠯ ᠳᠤ᠂ ᠺᠠᠷᠲ ᠢᠶᠠᠨ ᠭᠡᠭᠡᠭᠰᠡᠨ ᠦᠭᠡᠢ ᠭᠡᠨ᠎ᠡ᠃ ᠡᠨᠡ ᠨᠠᠳᠠ ᠳᠤ ᠶᠠᠷᠰᠢᠭ ᠭᠡᠵᠤ ᠪᠤᠯᠤᠯ᠎ᠠ᠃ ᠬᠠᠪᠰᠤᠷᠬᠤ ᠬᠦᠮᠦᠨ ᠲᠠᠢ᠂ ᠨᠡᠶᠢᠭᠡᠮ ᠤᠨ ᠬᠦᠴᠦ ᠲᠠᠢ ᠪᠤᠯ ᠬᠢᠵᠦ ᠪᠤᠯᠤᠨ᠎ᠠ ᠰᠢᠤ᠃ ᠡᠨᠡ ᠲᠠᠯ᠎ᠠ ᠪᠠᠷ ᠪᠡᠶ᠎ᠡ ᠪᠠᠨ ᠭᠤᠯᠤᠭᠠᠳ ᠪᠤᠯᠬᠤ ᠦᠭᠡᠢ᠂ ᠬᠡᠳᠦ ᠦᠨᠳᠦᠷ ᠦᠨᠡᠯᠡᠭᠡᠳ ᠤᠨ ᠪᠤᠯᠬᠤ ᠦᠭᠡᠢ᠃      ᠰᠤᠷ᠊᠄ ᠲᠠ ᠪᠤᠯ ᠮᠠᠨ ᠤ ᠦᠨᠳᠦᠰᠦᠲᠡᠨ ᠳᠤ ᠪᠤᠳᠠ ᠪᠡᠶ᠎ᠡ ᠪᠠᠷ ᠢᠶᠠᠨ ᠨᠠᠨᠳᠢᠨ ᠬᠦᠷᠦᠩᠭᠡ ᠪᠤᠯᠬᠤ ᠡᠷᠳᠡᠮᠲᠡᠨ ᠰᠢᠤ᠃      ᠰᠤᠳᠤ᠋᠄  ︵ᠢᠨᠢᠶᠡᠭᠰᠡᠭᠡᠷ︶ ᠶᠠᠮᠠᠷᠪᠠ ᠶᠠᠭᠤᠮ᠎ᠠ ᠶᠢ ᠤᠷᠤᠯᠳᠤᠬᠤ ᠳᠤ ᠪᠢ ᠪᠤᠯ ᠤᠷᠢᠳ ᠢᠶᠠᠷ ᠨᠢᠭᠡ ᠬᠤᠶᠠᠷ ᠰᠠᠷ᠎ᠠ ᠳᠠᠷᠢᠬᠢᠨ ᠳᠠᠭᠠᠨ ᠪᠤᠳᠤᠵᠤ ᠲᠤᠩᠭᠠᠨ᠎ᠠ᠂ ᠶᠠᠭᠠᠬᠢᠵᠤ ᠬᠢᠬᠦ᠂ ᠠᠯᠢ ᠲᠠᠯ᠎ᠠ ᠠᠴᠠ ᠨᠢ ᠭᠠᠷᠳᠠᠬᠤ᠂ ᠠᠰᠠᠭᠤᠳᠠᠯ ᠭᠠᠷᠪᠠᠯ ᠶᠠᠭᠠᠬᠢᠵᠦ ᠯᠠᠪᠯᠠᠬᠤ ᠶᠢ ᠪᠤᠳᠤᠳᠠᠭ᠂ ᠡᠭᠦᠨ ᠢ ᠬᠢᠭᠡᠳ ᠨᠢᠭᠡ ᠶᠠᠭᠤᠮ᠎ᠠ ᠶᠢ ᠤᠬᠠᠵᠤ ᠮᠡᠳᠡᠵᠦ ᠠᠪᠴᠠᠢ᠃ ᠱᠠᠰᠢᠨ ᠢᠶᠠᠷ ᠬᠡᠯᠡᠬᠦ ᠳᠤ᠂ ᠮᠠᠨ ᠤ ᠮᠤᠩᠭᠤᠯ ᠬᠦᠮᠦᠨ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠢ ᠰᠢᠲᠦᠭᠡᠳ᠂ ᠪᠦᠳᠦᠭᠡᠯ ᠢ ᠨᠢ ᠠᠪᠴᠢᠷᠠᠵᠤ ᠤᠷᠴᠢᠭᠤᠯᠵᠤ᠂ ᠪᠠᠭ᠎ᠠ ᠰᠠᠭ᠎ᠠ ᠰᠤᠷᠤᠭᠰᠠᠨ ᠠᠴᠠ  ᠪᠢᠰᠢ᠂ ᠬᠦᠭᠵᠢᠭᠦᠯᠦᠭᠰᠡᠨ ᠶᠠᠭᠤᠮ᠎ᠠ ᠪᠠᠶᠢᠬᠤ ᠦᠭᠡᠢ᠃ ᠵᠠᠯᠠᠭᠤᠴᠤᠳ ᠮᠤᠩᠭᠤᠯ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠪᠢᠴᠢᠨ᠎ᠡ ᠭᠡᠳᠡᠭ᠃ ᠲᠡᠭᠡᠬᠦ ᠳᠤ ᠨᠢ ᠪᠢ ᠮᠠᠨ ᠤ ᠬᠢᠨ ᠤ ᠮᠤᠩᠭᠤᠯ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠭᠡᠵᠦ ᠲᠤᠰ ᠢᠶᠠᠷ ᠢᠶᠠᠨ ᠶᠠᠭᠤᠮ᠎ᠠ ᠪᠢᠴᠢᠬᠦ ᠳᠤ ᠬᠦᠴᠢᠷᠲᠠᠢ ᠭᠡᠪᠡ᠃ ᠬᠠᠮᠤᠭ ᠤᠨ ᠶᠡᠭᠡ ᠨᠢ ᠤᠷᠴᠢᠭᠤᠯᠬᠤ᠂ ᠭᠠᠨᠵᠤᠤᠷ ᠳ᠋ᠠᠨᠵᠤᠤᠷ ᠢ ᠮᠤᠩᠭᠤᠯ ᠢᠶᠠᠷ ᠤᠷᠴᠢᠭᠤᠯᠵᠠᠢ᠂ ᠠᠮᠤᠷ ᠤᠤ ᠳ᠋ᠠ︖ ᠭᠡᠲᠡᠯ᠎ᠡ ᠡᠭᠦᠨ ᠤ ᠳᠡᠭᠡᠷ᠎ᠡ ᠤᠨᠤᠯ ᠭᠡᠵᠦ ᠡᠭᠦᠳᠦᠭᠰᠡᠨ ᠦᠭᠡᠢ᠃ ᠭᠡᠲᠡᠯ᠎ᠡ ᠬᠢᠲᠠᠳ ᠬᠦᠮᠦᠨ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠢ ᠠᠪᠠᠴᠢᠭᠠᠳ ᠴᠠᠭᠠᠰᠢ ᠬᠦᠭᠵᠢᠭᠦᠯᠵᠦ᠂ ᠲᠢᠶᠠᠨ ᠤ ᠪᠢᠰᠢᠯᠭᠠᠯ ᠭᠡᠵᠦ ᠵᠤᠬᠢᠶᠠᠭᠰᠠᠨ᠂ ᠴᠠᠭᠠᠰᠢ ᠶᠠᠫᠤᠨᠴᠤᠳ ᠠᠪᠠᠴᠢᠭᠠᠳ ᠳᠡᠭᠡᠷ᠎ᠡ ᠨᠢ ᠪᠠᠰᠠ ᠨᠡᠮᠡᠭᠰᠡᠨ ᠪᠠᠶᠢᠳᠠᠭ᠂ ᠵᠡᠭᠦᠨ ᠡᠮᠦᠨ᠎ᠡ ᠠᠽᠢᠶ᠎ᠠ ᠴᠦ ᠡᠶᠢᠮᠦ ᠪᠠᠶᠢᠯ᠎ᠠ᠃ ᠡᠭᠦᠨ ᠢ ᠪᠤᠯ ᠬᠢᠲᠠᠳ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠭᠡᠵᠦ ᠬᠡᠯᠡᠨ᠎ᠡ ᠰᠢᠤ᠃ ᠮᠤᠩᠭᠤᠯ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠭᠡᠵᠦ ᠠᠰ ᠢᠶᠠᠷ ᠢᠶᠠᠨ ᠪᠠᠶᠢᠬᠤ ᠦᠭᠡᠢ᠃ ᠪᠢ ᠱᠠᠰᠢᠨ ᠤ ᠲᠤᠯᠢ ᠬᠢᠬᠦ ᠭᠡᠳ ᠨᠠᠰᠤᠲᠠᠢ ᠯᠠᠮ᠎ᠠ ᠨᠠᠷ ᠢ  ᠠᠷᠪᠢᠨ ᠡᠷᠢᠵᠦ ᠰᠤᠷᠪᠤᠯᠵᠢᠯᠠᠵᠤ ᠶᠠᠪᠤᠭᠰᠠᠨ᠂ ᠠᠢ᠂ ᠪᠤᠯᠬᠤ ᠦᠭᠡᠢ᠂ ᠮᠡᠳᠡᠯᠭᠡ ᠨᠢ ᠬᠤᠮᠰᠠ᠂ ᠨᠢᠭᠡᠲᠦᠯ ᠦᠭᠡᠢ᠂ ᠠᠰ ᠢᠶᠠᠷ ᠢᠶᠠᠨ ᠭᠠᠷᠭᠠᠭᠰᠠᠨ ᠪᠦᠳᠦᠭᠦᠨ ᠨᠤᠮ ᠵᠤᠬᠢᠶᠠᠯ ᠦᠭᠡᠢ ᠶᠤᠮ ᠴᠢᠨᠢ᠃ ᠨᠢᠭᠡ ᠨᠢ ᠨᠢᠭᠡ ᠶᠢ ᠬᠡᠯᠡᠨ᠎ᠡ᠃ ᠭᠡᠪᠡᠴᠦ ᠬᠢᠲᠠᠳ ᠪᠤᠯ ᠪᠦᠬᠦ ᠤᠯᠤᠰ ᠲᠠᠭᠠᠨ ᠳᠦᠷᠪᠡᠨ ᠰᠤᠳᠤᠯᠭᠠᠨ ᠤ ᠲᠦᠪ ᠲᠠᠢ᠂ ᠪᠦᠷ ᠨᠢᠭᠡᠲᠦᠭᠰᠡᠨ᠃ ᠮᠠᠨ  ᠤ ᠮᠤᠩᠭᠤᠯᠴᠤᠳ ᠴᠢᠨᠢ ᠶᠠᠭ ᠢᠨᠵᠠᠨᠠᠰᠢ ᠶᠢᠨ ᠬᠡᠯᠡᠭᠰᠡᠨ ᠠᠳᠠᠯᠢ᠂ ᠡᠶᠢᠮᠦ ᠪᠢᠯᠡ ᠤᠤ ᠲᠡᠶᠢᠮᠦ ᠪᠢᠯᠡ ᠤᠤ ᠭᠡᠳ ᠬᠡᠨ ᠠᠯᠢᠨ ᠢᠶᠠᠨ ᠲᠤᠭᠤᠬᠤ ᠦᠭᠡᠢ᠂ ᠦᠪᠡᠷ ᠢᠶᠠᠨ ᠬᠡᠯᠡᠮᠡᠷ ᠵᠦᠪ ᠶᠠᠭᠤᠮ᠎ᠠ ᠪᠠᠰᠠ ᠪᠠᠶᠢᠬᠤ ᠦᠭᠡᠢ᠃ ᠪᠤᠯᠬᠤ ᠦᠭᠡᠢ ᠯᠠ ᠳ᠋ᠠ᠃ ᠦᠪᠡᠷ ᠤᠨ ᠦᠰᠦᠭ ᠪᠢᠴᠢᠭ ᠢᠶᠠᠷ ᠪᠢᠴᠢᠭᠰᠡᠨ ᠶᠠᠭᠤᠮ᠎ᠠ ᠪᠠᠶᠢᠬᠤ ᠦᠭᠡᠢ᠂ ᠲᠦᠪᠡᠳ ᠢᠶᠠᠷ ᠪᠢᠴᠢᠭᠡᠳ ᠦᠯᠡᠳᠡᠭᠡᠨ᠎ᠡ ᠭᠡᠵᠦ ᠬᠡᠳᠦᠢ ᠯᠠ ᠶᠠᠭᠤᠮ᠎ᠠ ᠪᠠᠶᠢᠨ᠎ᠠ ᠳ᠋ᠠ᠃ ᠨᠠᠭᠠᠰᠢ ᠬᠡᠯᠡᠪᠡᠯ ᠬᠡᠯᠡ ᠪᠢᠴᠢᠭ ᠴᠦ ᠶᠠᠭᠤᠮ᠎ᠠ ᠪᠠᠶᠢᠨ᠎ᠠ᠃ ᠮᠤᠩᠭᠤᠯ ᠲᠡᠤᠬᠡ ᠶᠢᠨ ᠲᠤᠯᠢ ᠭᠡᠵᠦ ᠭᠠᠷᠴᠠᠢ᠂ ᠠᠭᠤᠯᠭ᠎ᠠ ᠶᠢ ᠨᠢ ᠪᠢ ᠦᠵᠡᠭᠡ ᠦᠭᠡᠢ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠰᠢᠷ᠎ᠠ ᠲᠤᠯᠢ — ︽ᠬᠢᠲᠠᠳ ᠮᠤᠩᠭᠤᠯ ᠲᠤᠯᠢ︾ ᠪᠠᠨ ᠪᠠᠶᠠᠯᠢᠭᠵᠢᠭᠤᠯᠵᠤ ᠬᠡᠪᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠢᠩᠬᠢᠪᠡᠯ ᠪᠠᠰᠠ ᠬᠢᠲᠠᠳ ᠮᠤᠩᠭᠤᠯ ᠲᠤᠯᠢ᠂ ᠮᠤᠩᠭᠤᠯ ᠬᠢᠲᠠᠳ ᠲᠤᠯᠢ ᠭᠡᠵᠦ ᠭᠠᠷᠴᠠᠢ᠃ ᠪᠡᠭᠡᠵᠢᠩ ᠳᠤ ᠭᠠᠷᠭᠠᠭᠰᠠᠨ ᠡᠨᠡ ᠲᠤᠯᠢ ᠶᠢᠨ ᠭᠠᠳᠠᠷ ᠢ ᠨᠢ ᠪᠢ ᠦᠵᠡᠭᠰᠡᠨ᠂ ᠦᠨᠦᠳᠦᠷ ᠨᠤᠨ ᠭᠠᠷᠭᠠᠬᠤ ᠳᠤ ᠬᠦᠴᠢᠷ ᠪᠤᠯᠵᠠᠢ᠃      ᠪᠢ ᠬᠡᠷᠡᠭ ᠲᠠᠢ ᠶᠠᠭᠤᠮ᠎ᠠ ᠠᠷᠪᠢᠨ ᠬᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠨᠠᠰᠤ ᠪᠠᠷᠠᠭᠰᠠᠨ ᠷᠢᠨᠴᠢᠨᠺᠠᠸᠠ ᠪᠤᠯ ᠶᠤᠰᠤᠲᠠᠢ ᠰᠤᠳᠤᠯᠭᠠᠨ ᠬᠢᠭᠰᠡᠨ ᠡᠷᠳᠡᠮ ᠲᠠᠢ ᠬᠦᠮᠦᠨ᠃ ᠡᠨᠡ ᠬᠦᠮᠦᠨ ᠤᠯᠤᠨ ᠶᠠᠭᠤᠮ᠎ᠠ ᠳᠤ ᠭᠠᠷ ᠲᠦᠷᠦᠳᠡᠭ ᠦᠭᠡᠢ᠂ ᠮᠤᠩᠭᠤᠯ ᠲᠡᠤᠬᠡ ᠬᠡᠯᠡ ᠪᠢᠴᠢᠭ ᠡᠨᠡ ᠲᠠᠯ᠎ᠠ ᠪᠠᠷ ᠤᠯᠠᠨ ᠶᠠᠭᠤᠮ᠎ᠠ ᠬᠢᠭᠰᠡᠨ ᠰᠢᠤ᠃ ᠮᠢᠨᠦ ᠡᠨᠡ ᠴᠢᠨᠢ ᠤᠯᠠᠨ ᠶᠠᠭᠤᠮ᠎ᠠ ᠬᠢᠭᠰᠡᠨ ᠪᠤᠯᠪᠠᠴᠤ ᠶᠠᠭᠤ ᠶᠠᠭᠤ ᠳᠠᠭᠠᠨ ᠬᠦᠷᠬᠦ ᠦᠭᠡᠢ᠃  ᠰᠤᠷ᠊᠄ ᠷᠢᠨᠴᠢᠨᠺᠠᠸᠠ ᠭᠤᠸᠠᠢ ᠶᠢᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠮᠤᠩᠭᠤᠯ ᠬᠡᠯᠡᠨ ᠤ ᠳᠤᠷᠠᠰᠬᠠᠯᠲᠤ ᠪᠢᠴᠢᠭ ᠤᠳ ᠤᠨ ᠲᠤᠯᠢᠴᠠᠯᠠᠭᠰᠠᠨ ᠲᠡᠭᠦᠪᠦᠷᠢ ᠲᠠᠨᠢᠯᠴᠠᠭᠤᠯᠭ᠎ᠠ︾ ᠭᠡᠳᠡᠭ ᠨᠤᠮ ᠪᠠᠶᠢᠭᠰᠠᠨ᠂ ᠡᠳᠦᠷ ᠤᠨ ᠰᠤᠨᠢᠨ ᠳᠤ ᠬᠡᠰᠡᠭ ᠪᠤᠰᠠᠭ ᠢᠶᠠᠷ ᠨᠡᠶᠢᠲᠡᠯᠡᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠬᠤᠵᠢᠮ ᠨᠢ ᠨᠡᠶᠢᠯᠡᠭᠦᠯᠦᠭᠡᠳ ᠨᠤᠮ ᠪᠤᠯᠭᠠᠵᠤ ᠭᠠᠷᠭᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠶᠢᠨ᠎ᠠ᠃      ᠰᠤᠳᠤ᠋᠄ ᠮᠠᠨ ᠤ ᠬᠦᠮᠦᠨ ᠨᠠᠰᠤ ᠪᠠᠷᠠᠭᠰᠠᠨ᠂ ᠨᠢᠳᠤᠨᠤᠨ ᠤᠷᠵᠢᠨᠤᠨ᠂ ᠬᠠᠶᠢᠷᠠᠨ ᠬᠦᠮᠦᠨ᠂ ᠡᠷᠳᠡᠮ ᠲᠠᠢ ᠬᠦᠮᠦᠨ᠃      ᠰᠤᠷ᠊᠄ ᠲᠠ ᠨᠠᠷ ᠴᠢᠨᠢ ᠤᠯᠠᠨ ᠲᠠᠯ᠎ᠠ ᠶᠢᠨ ᠪᠦᠲᠦᠭᠡᠯ ᠲᠠᠢ᠂ ᠪᠢᠳᠡᠨ ᠳᠡᠭᠡᠨ ᠤᠷᠤᠢ ᠶᠢᠨ ᠰᠢᠲᠤᠭᠡᠨ ᠪᠤᠯᠬᠤ ᠬᠦᠮᠦᠰ ᠰᠢᠤ᠃ ᠨᠠᠰᠤᠲᠠᠢ ᠡᠷᠳᠡᠮᠲᠡᠢ᠂ ᠲᠦᠷᠦ ᠳᠡᠭᠡᠨ ᠵᠢᠳᠬᠦᠯ ᠲᠠᠢ ᠲᠦᠮᠡᠨ ᠳᠡᠭᠡᠨ ᠬᠦᠷᠢᠶᠡᠯᠡᠯ ᠲᠠᠢ ᠬᠦᠮᠦᠰ ᠡ ᠃  ᠰᠤᠳᠤ᠋᠄ ᠬᠡᠰᠢᠭᠲᠦᠭ᠌ᠲᠠᠬᠤ ᠭᠡᠳᠡᠭ ᠪᠠ︖ ᠦᠨᠳᠦᠰᠦᠲᠡᠨ ᠤ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠪᠠᠭᠰᠢ᠂ ᠲᠡᠷᠡ ᠬᠦᠮᠦᠨ ᠨᠡᠯᠢᠶᠡᠳ ᠶᠠᠭᠤᠮ᠎ᠠ ᠬᠢᠵᠦ ᠪᠠᠶᠢᠨ᠎ᠠ᠂ ᠬᠡᠰᠢᠭᠲᠡᠨ ᠤ ᠬᠦᠮᠦᠨ᠃ ᠬᠡᠰᠢᠭᠲᠡᠨ ᠤ ᠬᠤᠰᠢᠭᠤᠨ ᠳᠠᠭᠠᠨ ᠭᠠᠷᠭᠠᠭᠰᠠᠨ ᠮᠤᠩᠭᠤᠯ ᠰᠡᠳᠬᠦᠯ ᠶᠠᠪᠤᠵᠤ ᠪᠠᠶᠢᠨ᠎ᠠ᠂ ᠪᠢ ᠷᠠᠰᠢᠶᠠᠨ ᠢᠶᠠᠷ ᠬᠦᠷᠬᠦ ᠳᠡᠭᠡᠨ ᠦᠵᠡᠭᠰᠡᠨ᠂ ᠬᠡᠯᠡ ᠰᠠᠶᠢᠲᠠᠢ᠃ ᠬᠡᠰᠢᠭᠲᠡᠨ ᠤ ᠰᠦ ᠰᠠᠭᠠᠯᠢ ᠰᠠᠶᠢᠨ᠂ ᠬᠤᠪᠢᠯᠠᠢ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠬᠠᠭᠠᠨ ᠤ ᠴᠠᠭᠠᠨ ᠢᠳᠡᠭᠡ ᠬᠦᠷᠭᠡᠵᠦ ᠦᠭᠴᠦ ᠪᠠᠶᠢᠯ᠎ᠠ ᠭᠡᠵᠡᠢ᠃ ᠤᠳᠤ ᠶᠡᠭᠡ ᠬᠦᠭᠵᠢᠵᠦ ᠪᠠᠶᠢᠨ᠎ᠠ᠂ ᠨᠢᠭᠡ ᠦᠶ᠎ᠡ ᠮᠤᠩᠭᠤᠯ ᠪᠢᠴᠢᠭ ᠬᠦᠭᠵᠢᠯ᠎ᠡ᠂ ᠤᠳᠤ ᠺᠤᠮᠫᠢᠦ᠋ᠲ᠋ᠧᠷ ᠢᠶᠠᠷ ᠪᠢᠴᠢᠵᠦ ᠪᠠᠶᠢᠨ᠎ᠠ᠂ ᠮᠠᠨ ᠤ ᠪᠠᠶᠢᠭᠤᠯᠭ᠎ᠠ ᠳᠤ ᠬᠡᠳᠤᠨ ᠦᠬᠢᠳ ᠠᠪᠴᠢᠷᠠᠭᠰᠠᠨ ᠲᠡᠳᠡ ᠪᠦᠷ ᠰᠠᠶᠢᠨ᠂ ᠵᠡᠭᠦᠨ ᠭᠠᠵᠠᠷ ᠤᠨ ᠮᠤᠩᠭᠤᠯ᠃ ᠦᠭᠦᠪᠡᠷ ᠦᠵᠡᠪᠡᠯ ᠳᠠᠪᠠᠭᠤ ᠰᠠᠶᠢᠨ ᠰᠤᠷᠴᠤ ᠪᠠᠶᠢᠨ᠎ᠠ᠃ ᠬᠤᠵᠢᠮ ᠶᠠᠭᠠᠬᠢᠳᠠᠭ ᠢ ᠮᠡᠳᠡᠬᠦ ᠦᠭᠡᠢ᠃  ᠤᠳᠤ ᠰᠢᠨ᠎ᠡ ᠴᠠᠭ ᠰᠢᠨ᠎ᠡ ᠰᠤᠶᠤᠯ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠤᠳᠤ ᠬᠢᠲᠠᠳ ᠬᠡᠯᠡ ᠪᠢᠴᠢᠭ ᠮᠡᠳᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠠᠩᠭ᠍ᠯᠢ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠪᠤᠯ ᠠᠯᠪᠠ ᠶᠢᠨ ᠠᠵᠢᠯ ᠬᠢᠬᠦ ᠳᠤ ᠪᠡᠷᠬᠡ ᠭᠡᠵᠦ ᠲᠡᠷᠡ ᠡᠳᠦᠷ ᠬᠦᠮᠦᠰ ᠢᠨᠢᠶᠡᠳᠦᠮ ᠪᠠᠶᠢᠯᠭᠠᠨ ᠶᠠᠷᠢᠵᠤ ᠪᠠᠶᠢᠯ᠎ᠠ᠃ ᠳᠡᠯᠡᠬᠡᠢ ᠶᠢᠨ ᠰᠤᠶᠤᠯ ᠭᠡᠭᠴᠢ ᠢᠩᠬᠢᠭᠡᠳ ᠢᠷᠡᠴᠢᠬᠡᠵᠡᠢ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠳᠤᠲᠤᠨ᠎ᠠ ᠲᠠᠨ ᠤ ᠮᠠᠨ ᠤ ᠭᠡᠵᠦ ᠢᠯᠭᠠᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠤᠯᠵᠠᠢ᠃ ᠰᠢᠨ᠎ᠡ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠲᠡᠨᠳᠡ ᠠᠴᠠ ᠢᠷᠡᠨ᠎ᠡ᠂ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ᠂ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠵᠤ ᠪᠤᠯᠬᠤ ᠦᠭᠡᠢ᠃      ᠰᠤᠷ᠊᠄ ᠪᠠᠭᠰᠢ ᠶᠢᠨ ᠭᠡᠷ ᠵᠠᠭᠤᠷ᠎ᠠ ᠶᠢ ᠠᠵᠢᠭᠯᠠᠬᠤ ᠳᠤ ᠡᠯᠧᠺᠲᠷᠤᠨ ᠬᠦᠭᠵᠢᠮ᠂ ᠺᠤᠮᠫᠢᠦᠲ᠋ᠧᠷ ᠮᠡᠲᠦ ᠶᠢᠨ ᠰᠢᠨ᠎ᠡ ᠴᠠᠭ ᠤᠨ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠬᠠᠷᠠᠭᠳᠠᠵᠤ ᠪᠠᠶᠢᠨ᠎ᠠ᠂ ᠬᠤᠭᠤᠷ ᠬᠦᠭᠵᠢᠮ ᠳᠠᠷᠤᠳᠠᠭ ᠤᠤ᠂ ᠺᠤᠮᠫᠢᠦᠲ᠋ᠧᠷ ᠬᠡᠷᠡᠭᠯᠡᠳᠡᠭ ᠤᠤ︖      ᠰᠤᠳᠤ᠋᠄ ᠬᠤᠭᠤᠷ ᠬᠦᠭᠵᠢᠮ ᠤᠷᠤᠯᠳᠤᠬᠤ ᠳᠤᠷᠠᠲᠠᠢ᠂ ᠺᠤᠮᠫᠢᠦᠲ᠋ᠧᠷ ᠢ ᠲᠤᠯᠢ ᠨᠠᠶᠢᠷᠠᠭᠤᠯᠬᠤ ᠳᠠᠭᠠᠨ ᠬᠡᠷᠡᠭᠯᠡᠵᠦ ᠪᠠᠶᠢᠨ᠎ᠠ᠃      ᠰᠤᠳᠤᠪᠢᠯᠢᠭ᠌ ᠪᠠᠭᠰᠢ1945 ᠤᠨ ᠠᠴᠠ ᠡᠬᠢᠯᠡᠵᠦ ᠠᠵᠢᠯ ᠤᠨ ᠴᠢᠯᠦᠭᠡ ᠪᠠᠷ ᠢᠶᠠᠨ ᠰᠢᠯᠦᠭ ᠵᠤᠬᠢᠶᠠᠯ ᠪᠢᠴᠢᠭᠰᠡᠨ ᠠᠴᠠ ᠭᠠᠳᠠᠨ᠎ᠠ ᠬᠢᠲᠠᠳ ᠮᠤᠩᠭᠤᠯ ᠢᠶᠠᠷ ᠨᠠᠶᠢᠷᠠᠭᠤᠯᠬᠤ ᠠᠵᠢᠯ ᠬᠢᠭᠰᠡᠭᠡᠷ ᠢᠷᠡᠪᠡ᠃ ᠲᠡᠷᠡ ᠤᠷᠢᠳ ᠬᠤᠵᠢᠳ ︽ᠰᠤᠳᠤᠪᠢᠯᠢᠭ᠌ ᠤᠨ ᠵᠤᠬᠢᠶᠠᠯ ᠤᠨ ᠲᠡᠭᠦᠪᠦᠷᠢ︾᠂ ︽ᠵᠤᠨ ᠤ ᠦᠳᠡᠰᠢ︾ ᠵᠡᠷᠭᠡ ᠬᠤᠰᠤᠨ ᠵᠤᠬᠢᠶᠠᠯ ᠤᠨ ᠲᠡᠭᠦᠪᠦᠷᠢ ᠪᠠ ︽ᠢᠨᠵᠠᠨᠠᠰᠢ ᠶᠢᠨ ᠨᠤᠲᠤᠭ ᠢᠶᠠᠷ ᠠᠶᠠᠯᠠᠭᠰᠠᠨ ᠲᠡᠮᠳᠡᠭᠯᠡᠯ︾᠂ ︽ᠬᠡᠤᠬᠡᠳ ᠤᠨ ᠰᠢᠯᠦᠭ ᠤᠳ︾᠂ ︽ᠡᠮᠲᠦ ᠠᠮᠢᠲᠠᠨ︾ ᠵᠡᠷᠭᠡ ᠨᠤᠮ ᠤᠳ ᠬᠡᠪᠯᠡᠭᠦᠯᠪᠡ᠃ ᠡᠭᠦᠨ ᠳᠤ ︽ᠡᠮᠲᠦ ᠠᠮᠢᠲᠠᠨ︾ ᠭᠡᠬᠦ ᠨᠤᠮ ᠨᠢ1983 ᠤᠨ ᠳᠤ ᠪᠦᠬᠦ ᠤᠯᠤᠰ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠰᠢᠯᠢᠳᠡᠭ ᠨᠤᠮ ᠤᠨ ᠬᠤᠶᠠᠳᠤᠭᠠᠷ ᠲᠡᠰ ᠤᠨ ᠱᠠᠩᠨᠠᠯ ᠬᠦᠷᠲᠡᠪᠡ᠃ ᠪᠠᠰᠠ ︽ᠲᠠᠩ ᠤᠯᠤᠰ ᠤᠨ ᠰᠢᠯᠦᠭ ᠭᠤᠷᠪᠠᠨ ᠵᠠᠭᠤᠨ ᠪᠠᠳᠠᠭ︾᠂ ︽ᠰᠦᠩ ᠤᠯᠤᠰ ᠤᠨ ᠳᠠᠭᠤᠯᠠᠯ ᠵᠠᠭᠤᠨ ᠪᠠᠳᠠᠭ︾ ᠵᠡᠷᠭᠡ ᠠᠷᠪᠠ ᠭᠤᠷᠤᠢ ᠨᠤᠮ ᠢ ᠮᠤᠩᠭᠤᠯ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠤᠨ ᠬᠡᠪᠯᠡᠭᠦᠯᠵᠦ᠂ ︽ᠤᠯᠠᠭᠠᠨ᠎ᠠ ᠤᠬᠢᠯᠠᠬᠤ ᠲᠠᠩᠬᠢᠮ︾ ᠢ ᠪᠠᠰᠠ ᠪᠤᠰᠤᠳ ᠲᠠᠢ ᠬᠤᠷᠰᠢᠵᠤ ᠬᠢᠲᠠᠳ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠵᠤ ᠬᠡᠪᠯᠡᠭᠦᠯᠵᠠᠢ᠃ ᠢᠨᠵᠠᠨᠠᠰᠢ ᠶᠢᠨ ᠲᠤᠬᠠᠢ ᠰᠤᠳᠤᠯᠭᠠᠨ ᠤ ᠦᠭᠦᠯᠡᠯ ᠪᠤᠯᠤᠨ ᠪᠤᠰᠤᠳ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠦᠭᠦᠯᠡᠯ ᠭᠤᠴᠢ ᠰᠢᠬᠠᠮ ᠨᠡᠶᠢᠲᠡᠯᠡᠭᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃ ᠲᠡᠷᠡ ᠴᠦᠬᠦᠷᠡᠰᠢ ᠦᠭᠡᠢ ᠴᠠᠷᠮᠠᠶᠢᠯᠭ᠎ᠠ ᠪᠠᠷ ᠢᠶᠠᠨ ᠲᠦᠪᠡᠳ᠂ ᠬᠢᠲᠠᠳ᠂ ᠶᠠᠫᠤᠨ᠂ ᠤᠷᠤᠰ᠂ ᠠᠩᠭ᠍ᠯᠢ ᠵᠡᠷᠭᠡ ᠬᠡᠯᠡ ᠶᠢ ᠰᠤᠷᠴᠤ ᠡᠵᠡᠮᠰᠢᠭᠰᠡᠨ ᠪᠠᠶᠢᠯ᠎ᠠ᠃      ᠰᠤᠷᠪᠤᠯᠵᠢᠯᠠᠭᠴᠢ᠄ ᠡᠨᠡ ᠤᠳᠠᠭ᠎ᠠ ᠲᠦᠪ ᠷᠠᠳᠢᠤ᠋ ᠶᠢᠨ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠦᠯᠢᠶᠡᠭᠰᠡᠨ ᠳᠤ ᠴᠢᠨᠢ ᠪᠠᠶᠠᠷᠯᠠᠵᠤ ᠪᠠᠶᠢᠨ᠎ᠠ᠃ ᠲᠠᠨ ᠤ ᠨᠤᠮ ᠤᠨ ᠦᠢᠯᠡ ᠪᠠᠳᠠᠷᠠᠨ ᠳᠡᠯᠭᠡᠷᠡᠵᠦ᠂ ᠵᠠᠯᠠᠭᠤ ᠬᠤᠶᠢᠴᠢ ᠦᠶ᠎ᠡ ᠴᠦ ᠬᠢᠨ ᠳᠡᠭᠡᠨ ᠤᠶᠤᠨ ᠤᠬᠠᠭᠠᠨ ᠤ ᠤᠬᠢᠨ ᠰᠠᠶᠢᠨ ᠰᠢᠮ᠎ᠡ ᠲᠡᠵᠢᠭᠡᠯ ᠬᠦᠷᠲᠡᠭᠡᠬᠦ ᠶᠢ ᠬᠦᠰᠡᠵᠦ ᠪᠠᠶᠢᠨ᠎ᠠ᠂ ᠪᠠᠰᠠ ᠲᠠᠨ ᠤ ᠭᠡᠷ ᠬᠤᠲᠠᠯᠠ ᠪᠠᠷ ᠢᠶᠠᠨ ᠡᠷᠡᠭᠦᠯ ᠡᠩᠬᠡ ᠠᠵᠠ ᠵᠢᠷᠭᠠᠯ ᠲᠠᠢ᠂ ᠤᠷᠲᠦ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭᠠᠬᠤ ᠶᠢ ᠵᠦᠭᠨᠡᠶ᠎ᠡ᠃       ᠰᠤᠳᠤᠪᠢᠯᠢᠭ᠌᠄ ᠪᠠᠶᠠᠷᠯᠠᠯ᠎ᠠ᠃       ᠬᠦᠨᠳᠦᠲᠦ ᠰᠤᠨᠤᠰᠤᠭᠴᠢᠳ ᠡ᠂ ᠲᠦᠪ ᠷᠠᠳᠢᠤ᠋ ᠶᠢᠨ ᠮᠤᠩᠭᠤᠯ ᠬᠡᠯᠡᠨ ᠤ ᠨᠡᠪᠲᠡᠷᠡᠭᠦᠯᠭᠡ ᠶᠢᠨ ︽ᠤᠳᠤᠨ ᠮᠡᠴᠢᠳ︾ ᠲᠤᠰᠬᠠᠢ ᠫᠠᠷᠤᠭ᠍ᠷᠠᠮ ᠡᠭᠦᠪᠡᠷ ᠤᠨᠳᠦᠷᠯᠡᠵᠦ ᠪᠠᠶᠢᠨ᠎ᠠ᠂ ᠲᠠ ᠪᠦᠬᠦᠨ ᠤ ᠬᠦᠯᠢᠶᠡᠨ ᠠᠪᠴᠤ ᠰᠤᠨᠤᠰᠤᠭᠰᠠᠨ ᠳᠤ ᠪᠠᠶᠠᠷᠯᠠᠯ᠎ᠠ᠂ ᠪᠠᠶᠠᠷᠲᠠᠢ᠃    
  
ᠢᠷᠡᠯᠲᠡ᠄ ᠷᠢᠨᠴᠢᠨ ᠤ ︽ᠤᠰᠤᠨ ᠲᠦᠷᠤᠬᠦᠤ ᠬᠠᠨ ᠤ ᠪᠠᠷ᠎ᠠ︾ ᠠᠴᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号