ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠢᠳᠠᠨᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/11
            ᠬᠢᠳᠠᠨᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ       ᠦᠩᠭᠡᠷᠡᠭᠰᠡᠨ ᠳᠤ ᠡᠷᠳᠡᠮᠳᠡᠳ ᠬᠢᠳᠠᠨᠴᠤᠳ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ ᠢ ᠲᠤᠷᠠᠳᠤᠬᠰᠠᠭᠠᠷ ᠮᠢᠬ᠎ᠠ᠂ ᠰᠦ ᠴᠠᠭ᠎ᠠ ᠮᠡᠳᠤ ᠶᠢᠨ ᠤᠯᠠᠭᠠᠨ᠂ ᠴᠠᠭᠠᠨ ᠢᠳᠡᠬᠡᠨ ᠢ ᠯᠠ ᠲᠤᠷᠠᠳᠣᠳᠠᠭ᠃ ᠬᠡᠷᠡᠭ ᠲᠡᠭᠡᠷ᠎ᠠ ᠪᠠᠨ ᠲᠡᠶᠢᠮᠤ ᠪᠢᠰᠢ ᠬᠢᠳᠠᠨᠴᠤᠳ ᠮᠢᠬ᠎ᠠ᠂ ᠰᠦ ᠴᠠᠭ᠎ᠠ ᠪᠠᠷ ᠭᠤᠤᠯ ᠬᠤᠭᠤᠯᠡ ᠬᠦᠨᠡᠰᠦ ᠪᠠᠨ ᠪᠤᠯᠭᠠᠳᠠᠭ ᠢᠶᠠᠷ ᠪᠠᠷᠠᠬᠤ ᠦᠬᠡᠢ ᠮᠤᠩᠭᠤᠯ ᠠᠮᠤ᠂ ᠰᠢᠯᠤᠬᠡᠢ᠂ ᠰᠠᠭᠠᠭ ᠲᠠᠷᠢᠵᠤ ᠬᠤᠭᠤᠯᠡ ᠬᠦᠨᠡᠰᠦ ᠪᠤᠯᠭᠠᠵᠤ ᠪᠠᠶᠢᠬᠰᠡᠨ ᠪᠦᠬᠡᠳ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ ᠨᠤᠭᠤᠭ᠎ᠠ ᠶᠢ ᠲᠡᠬᠦᠵᠤ ᠢᠳᠡᠵᠤ ᠪᠠᠶᠢᠵᠡᠢ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠢᠳᠠᠨᠴᠤᠳ ᠤᠨ ᠨᠣᠳᠤᠭ ᠤᠨ ᠤᠨᠠᠭᠠᠨ ᠪᠠᠶᠢᠭᠠᠯᠢ ᠡᠪᠳᠡᠭᠳᠡᠭᠡ ᠦᠬᠡᠢ᠂ ᠤᠢ ᠮᠤᠳᠤ ᠡᠪᠡᠰᠦ ᠪᠡᠯᠴᠢᠬᠡᠷ ᠰᠠᠬᠤᠯᠢᠭ ᠵᠤᠵᠠᠭᠠᠨ ᠪᠠᠶᠢᠬᠰᠡᠨ ᠠᠴᠠ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ ᠨᠤᠭᠤᠭ᠎ᠠ ᠶᠢᠨ ᠢᠷᠡᠯᠳᠠ ᠲᠠᠷᠢᠮᠠᠯ ᠨᠤᠭᠤᠭ᠎ᠠ ᠰᠢᠭ᠋ ᠡᠯᠪᠡᠭ ᠲᠡᠯᠪᠡᠭ ᠪᠠᠶᠢᠬᠰᠡᠨ ᠶᠤᠮ᠃ ᠡᠬᠦᠨ ᠠᠴᠠ ᠪᠢᠳᠠ ᠬᠢᠳᠠᠨᠴᠤᠳ ‍ᠤᠨ‌ᠤᠯᠠᠮᠵᠢᠯᠠᠯᠳᠣ ᠢᠳᠡᠬᠡᠨ᠂ ᠠᠮᠤ ᠪᠤᠳᠠᠭ᠎ᠠ᠂ ᠵᠢᠮᠢᠰ ᠨᠤᠭᠤᠭ᠎ᠠ ᠪᠦᠷ  ᠪᠠᠶᠢᠵᠡᠢ ᠭᠡᠰᠡᠨ ᠢ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ᠡᠳᠡᠬᠡᠷ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠪᠦᠳᠤᠴᠨ ᠢ ᠰᠠᠶᠢᠬᠠᠨ ᠠᠵᠢᠭᠯᠠᠵᠤ ᠦᠵᠡᠪᠠᠯ ᠴᠢᠯᠤᠬᠡᠯᠡᠭᠳᠡᠬᠦ ᠠᠴᠠ ᠡᠮᠤᠨᠡᠬᠢ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠪᠦᠳᠤᠴᠨ ᠲᠠᠢ ᠶᠡᠭᠡ ᠠᠳᠠᠯᠢᠪᠳᠤᠷ ᠪᠠᠶᠢᠳᠠᠭ᠃ᠬᠢᠳᠠᠨᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ ᠳᠤ ᠤᠯᠠᠭᠠᠨ ᠢᠳᠡᠬᠡᠨ ᠭᠤᠤᠯᠯᠳᠠᠭ᠃ ᠡᠨᠡ ᠲᠤᠬᠠᠢ ︽ᠯᠢᠶᠣᠤ ᠤᠯᠤᠰ ᠤᠨ ᠰᠤᠳᠤᠷ︾ ᠲᠤ ︽ᠶᠡᠭᠡ ᠭᠤᠪᠢ ᠶᠢᠨ ᠵᠠᠪᠰᠠᠷ ᠬᠠᠬᠢᠷ ᠬᠦᠢᠳᠡᠨ ᠰᠠᠯᠬᠢ ᠰᠢᠭᠤᠷᠭ᠎ᠠ ᠶᠡᠭᠡ᠂ ᠮᠠᠯ ᠲᠡᠵᠢᠭᠡᠪᠤᠷᠢ ᠠᠩ ᠬᠦᠷᠤᠬᠡ ᠵᠢᠭᠠᠰᠤᠨ ᠢᠶᠠᠷ  ᠬᠤᠭᠤᠯᠡ ᠬᠦᠨᠡᠰᠦ ᠪᠤᠯᠭᠠᠮᠤᠢ᠂ ᠡᠬᠦᠨ ᠠᠴᠠ ᠦᠵᠡᠪᠠᠯ ᠬᠢᠳᠠᠨᠴᠤᠳ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠢᠶᠠᠨ ᠮᠢᠬ᠎ᠠ ᠠᠴᠠ ᠭᠠᠳᠠᠨ᠎ᠠ ᠠᠭᠤᠯᠠᠨ ᠭᠡᠭᠡᠷ᠎ᠠ ᠶᠢᠨ ᠠᠩ ᠬᠦᠷᠤᠬᠡ᠂ ᠤᠰᠤ ᠮᠦᠷᠡᠨ ᠤ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠶᠢ ᠴᠦ ᠢᠳᠡᠵᠤ ᠪᠠᠶᠢᠵᠡᠢ᠃ ᠬᠢᠳᠠᠨᠴᠤᠳ ᠢ ᠦᠨᠳᠤᠰᠤᠨ  ᠳᠡᠭᠡᠨ ᠤᠢ ᠰᠢᠭᠤᠢ ᠶᠢᠨ ᠦᠨᠳᠤᠰᠤᠳᠠᠨ ᠭᠡᠵᠤ ᠬᠡᠯᠡᠵᠤ ᠪᠤᠯᠬᠤ ᠶᠤᠮ᠃ ᠲᠡᠳᠡᠨᠤᠰ ᠤᠨ ᠤᠨᠠᠭᠠᠨ ᠨᠣᠳᠤᠭ ᠤᠨ ᠦᠪᠤᠷ ᠭᠡᠰᠡᠭ ᠢ ︽ᠠᠳᠠᠨᠢ ᠶᠢᠨ ᠬᠠᠷ᠎ᠠ ᠮᠤᠳᠤ︾ ᠭᠡᠭᠴᠢ ᠮᠢᠩᠭᠠᠨ ᠭᠠᠵᠠᠷ ᠤᠨ ᠨᠠᠷᠠᠰᠤᠨ ᠤᠢ ᠨᠡᠶᠢᠳᠡᠮ ᠪᠦᠷᠬᠦᠵᠤ  ᠪᠠᠶᠢᠳᠠᠭ᠃ ᠬᠤᠶᠢᠳᠤ ᠲᠠᠯ᠎ᠠ ᠪᠠᠷ ᠨᠢ ᠬᠢᠩᠭᠠᠨ‌‍ᠲ᠋ᠠᠪᠠᠭ᠎ᠠ ᠶᠢᠨ ᠪᠠᠷᠠᠭᠤᠨ ᠡᠮᠤᠨᠡᠳᠤ ᠬᠡᠰᠡᠭ ᠤᠨ ᠤᠯᠠᠭᠠᠨ ᠳᠠᠪᠠᠭ᠎ᠠ ᠶᠢᠨ ᠪᠠᠯᠠᠷ ᠤᠢ᠂ ᠰᠠᠶᠢᠬᠠᠨ ᠬᠠᠨ ᠠᠭᠤᠯᠠ ᠶᠢᠨ ᠪᠠᠯᠠᠷ ᠣᠢ᠂ ᠬᠤᠩᠭᠤ ᠶᠢᠨ ᠳᠠᠪᠠᠭ᠎ᠠ ᠶᠢᠨ ᠪᠠᠯᠠᠷ  ᠣᠢ ᠨᠦᠮᠤᠷᠢ ᠬᠠᠯᠬᠠᠭ᠎ᠠ ᠪᠤᠯᠵᠤ ᠪᠠᠶᠢᠳᠠᠭ᠃ ᠡᠨᠡ ᠠᠷᠤ ᠦᠪᠤᠷ ᠤᠨ ᠪᠠᠯᠠᠷ ᠤᠢ ᠳᠤᠨᠢ ᠨᠠᠮᠤᠷ ᠪᠤᠯᠤᠬᠰᠠᠭᠠᠷ ᠴᠠᠷᠠᠰᠤ ᠪᠤᠯᠤᠨ ᠪᠤᠳᠠᠯᠢᠭ ᠮᠤᠳᠤᠨ ᠤ ᠰᠢᠳ ᠭᠠᠷᠰᠤ ᠡᠪᠤᠳᠦᠭ ᠴᠢᠨᠡᠭᠡ ᠤᠨᠠᠳᠠᠭ᠃ ᠡᠨᠡ ᠨᠢ ᠵᠡᠷᠯᠢᠭ ᠭᠠᠭ᠋ᠠᠢ ᠳᠤ ᠬᠤᠭᠤᠯᠡ ᠬᠦᠨᠡᠰᠦ ᠬᠦᠢᠴᠡᠳ ᠬᠠᠩᠭᠠᠳᠠᠭ ᠠᠴᠠ ᠠᠳᠡ ᠵᠡᠷᠯᠢᠭ ᠭᠠᠭ᠋ᠠᠢ  ᠰᠦᠷᠤᠭ᠍ᠯᠡᠨ ᠶᠠᠪᠤᠳᠠᠭ᠃ ᠵᠢᠴᠢ ᠤᠢ ᠪᠢᠳᠡᠬᠦᠷᠡᠵᠤ ᠤᠷᠭᠤᠬᠰᠡᠨ ᠠᠴᠠ ᠪᠤᠭᠤ ᠰᠤᠭᠤ᠂ ᠵᠦᠷ ᠭᠤᠷ ᠤᠨ ᠦᠷᠡᠵᠢᠵᠤ ᠲᠦᠯᠵᠢᠬᠦ ᠳᠤ ᠲᠤᠬᠢᠷᠠᠮᠵᠢᠳᠠᠢ ᠨᠦᠬᠦᠴᠡᠯ ᠬᠠᠩᠭᠠᠨ ᠦᠭᠴᠢ᠃ ᠡᠨᠡ ᠭᠠᠭ᠋ᠠᠢ ᠪᠤᠭᠤ ᠨᠢ ᠪᠠᠯᠠᠷ ᠡᠷᠳᠡᠨ ᠤ ᠬᠦᠮᠤᠨ ᠲᠦᠷᠤᠯᠬᠢᠳᠡᠨ ᠤ ᠰᠦᠷᠦᠭᠯᠡᠵᠤ ᠠᠮᠢᠳᠤᠷᠠᠵᠤ ᠪᠠᠶᠢᠬᠰᠡᠨ ᠦᠶ᠎ᠡ ᠠᠴᠠ ᠭᠤᠤᠯ ᠠᠩᠨᠠᠳᠠᠭ ᠠᠩ ᠬᠦᠷᠤᠭᠡᠰᠤ ᠪᠠᠶᠢᠬᠰᠡᠨ ᠪᠦᠬᠡᠳ ᠬᠢᠳᠠᠨᠴᠤᠳ ᠤᠨ ᠦᠶ᠎ᠡ ᠳᠤ ᠴᠢᠬᠤᠯᠡ ᠤᠯᠠᠭᠠᠨ ᠢᠳᠡᠬᠡᠨ ᠤ ᠢᠷᠡᠯᠳᠠ ᠪᠤᠯᠵᠤ ᠪᠠᠶᠢᠬᠰᠡᠨ ᠶᠤᠮ᠃ ᠬᠢᠳᠠᠨᠴᠤᠳ ᠳᠡᠭᠡᠳᠣᠰ ᠤᠨ ᠲᠠᠬᠢᠯᠭ᠎ᠠ ᠳᠡᠭᠡᠷ᠎ᠠ ᠪᠠᠨ ᠲᠤᠶ᠋ᠢᠩ ᠲᠦᠯᠡᠰᠢ ᠡᠷᠬᠦᠭᠡᠳ ︽ᠡᠪᠤᠯ ᠤᠨ ᠴᠠᠭ ᠨᠡᠷᠡᠯᠡᠨ ᠵᠤᠭᠤᠬᠯᠠᠵᠤ᠂ ᠵᠤᠨ ᠤ ᠴᠠᠭ ᠰᠡᠬᠦᠳᠡᠷᠯᠡᠨ ᠵᠤᠭᠤᠬᠯᠠᠵᠤ᠂ ᠨᠠᠮᠠᠶᠢ ᠠᠩ ᠬᠦᠷᠤᠬᠡ ᠬᠢᠬᠦ ᠳᠤ ᠭᠠᠭ᠋ᠠᠢ ᠪᠤᠭᠤ ᠦᠯᠠᠮᠵᠢ ᠰᠤᠶᠤᠷᠬᠠᠰᠤᠭᠠᠢ︾ ᠬᠡᠵᠤ ᠰᠢᠪᠰᠢᠳᠡᠭ ᠨᠢ ᠶᠠᠭ ᠡᠨᠡ ᠪᠠᠶᠢᠳᠠᠯ ᠢ ᠲᠤᠰᠬᠠᠵᠤ ᠪᠠᠶᠢᠬᠤ ᠶᠤᠮ᠃ ᠲᠡᠤᠬᠡ ᠶᠢᠨ ᠬᠦᠭᠵᠢᠯ ᠤᠨ ᠬᠤᠪᠢ ᠠᠴᠠ ᠠᠪᠴᠤ ᠦᠵᠡᠪᠠᠯ ᠠᠩ ᠬᠦᠷᠤᠭᠡᠰᠤᠨ ᠤ ᠮᠢᠬ᠎ᠠ ᠪᠤᠯ ᠬᠢᠳᠠᠨᠴᠤᠳ ᠤᠨ ᠤᠯᠠᠭᠠᠨ ᠢᠳᠡᠬᠡᠨ ᠤ ᠴᠢᠬᠤᠯᠡ ᠨᠢᠭᠡᠨ ᠢᠷᠡᠯᠳᠠ ᠪᠤᠯᠤᠨ᠎ᠠ᠃ ᠲᠠᠷᠠᠭᠠᠯᠠᠪᠠᠯ ᠵᠢᠬᠦᠷᠳᠡᠨ ᠪᠠ ᠵᠢᠭᠠᠰᠤᠨ ᠤ ᠮᠢᠬ᠎ᠠ ᠤᠷᠤᠨ᠎ᠠ᠃ ᠬᠢᠳᠠᠨᠴᠤᠳ  ᠤᠨ ᠤᠨᠠᠭᠠᠨ ᠨᠣᠳᠤᠭ ᠰᠢᠷᠠᠮᠦᠷᠡᠨ᠂ ᠯᠤᠤᠬ᠎ᠠ ᠶᠢᠨ ᠭᠤᠤᠯ ᠤᠨ ᠴᠢᠳᠬᠤᠯ ᠪᠤᠯᠤᠬᠰᠡᠨ ᠦᠢ ᠤᠯᠠᠨ ᠭᠤᠤᠯ ᠭᠤᠷᠤᠬ᠎ᠠ ᠰᠦᠯᠵᠢᠯᠳᠤᠨ ᠲᠤᠤᠷᠯᠠᠵᠤ᠂ ᠨᠠᠭᠤᠷ ᠪᠦᠷᠢᠳᠤ ᠨᠢᠳᠤᠯᠡᠨ ᠲᠦᠬᠡᠬᠡᠵᠤ ᠪᠠᠶᠢᠳᠠᠭ᠃ ᠡᠨᠡ ᠭᠤᠤᠯ ᠮᠦᠷᠡᠨ ᠨᠠᠭᠤᠷ ᠪᠦᠷᠢᠳᠤ ᠳᠤᠨᠢ᠂ ᠮᠦᠷᠬᠦ᠂ ᠴᠠᠭᠠᠯᠵᠢ᠂ ᠨᠤᠬᠠᠢ ᠵᠢᠭᠠᠰᠤ᠂ ᠱᠠᠪᠠᠢ ᠦᠯᠠᠮᠵᠢ ᠤᠯᠠᠨ ᠢᠶᠠᠷ ᠢᠷᠠᠭᠠᠯᠠᠵᠤ ᠬᠢᠳᠠᠨᠴᠤᠳ ᠤᠨ ᠤᠯᠠᠭᠠᠨ ᠢᠳᠡᠬᠡᠨ ᠤ ᠪᠠᠰᠠ ᠨᠢᠭᠡᠨ ᠢᠷᠡᠯᠡᠳᠠ ᠪᠤᠯᠵᠤ ᠪᠠᠶᠢᠵᠡᠢ᠃ ᠬᠢᠳᠠᠳ ᠰᠤᠷᠪᠤᠯᠵᠢᠰ ᠲᠤ ᠬᠢᠳᠠᠨᠴᠤᠳ ᠤᠨ ᠮᠦᠰᠤ ᠴᠤᠭᠤᠯᠵᠤ ᠵᠢᠭᠠᠰᠤ ᠪᠠᠷᠢᠳᠠᠭ ᠲᠤᠬᠠᠢ ᠲᠡᠮᠳᠡᠭᠯᠡᠯ ᠪᠤᠢ᠃ ᠡᠪᠤᠯ ᠭᠤᠤᠯ ᠪᠤᠶᠤ ᠨᠠᠭᠤᠷ ᠪᠦᠷᠢᠳᠤ ᠵᠤᠵᠠᠭᠠᠨ  ᠬᠦᠯᠳᠡᠭᠰᠡᠨ ᠤ ᠲᠠᠷᠠᠭ᠎ᠠ ᠮᠦᠰᠤᠨ ᠲᠡᠬᠡᠷ᠎ᠠ ᠨᠢ ᠬᠡᠳᠤᠨ ᠨᠦᠭᠡ ᠡᠷᠤᠵᠤ᠂ ᠡᠬᠦᠨ ᠤ ᠲᠤᠳᠤᠷᠠᠬᠢ ᠨᠢᠭᠡ ᠶᠢ ᠨᠢ ᠨᠡᠪᠳᠠ ᠡᠷᠤᠵᠤ᠂ ᠬᠠᠵᠠᠭᠤ ᠪᠠᠷ ᠬᠢ  ᠭᠡᠳᠤ ᠶᠢᠨ ᠮᠦᠰᠤ ᠶᠢ ᠨᠡᠪᠳᠡᠯᠡᠬᠦ ᠦᠬᠡᠢ ᠪᠠᠷ ᠨᠢᠮᠭᠡᠭᠡᠨ ᠦᠯᠡᠳᠡᠬᠡᠵᠤ ᠵᠢᠭᠠᠰᠤ ᠠᠵᠢᠬᠠᠯᠠᠬᠤ ᠪᠠᠷ ᠪᠡᠯᠡᠳᠤᠳᠡᠭ᠃ ᠵᠢᠴᠢ ᠡᠨᠡ ᠨᠦᠭᠡᠨ ᠤ ᠪᠠᠨ ᠲᠡᠭᠡᠷ᠎ᠠ ᠢᠰᠡᠭᠡᠢ ᠭᠡᠷ ᠢᠶᠠᠨ ᠪᠤᠰᠬᠠᠵᠤ ᠰᠦᠨᠢ ᠬᠠᠷᠠᠩᠭᠤᠢ ᠪᠤᠯᠬᠤ ᠦᠶ᠎ᠡ ᠪᠠᠷ ᠡᠬᠦᠳᠠ ᠶᠢ ᠨᠢ ᠶᠠᠪ ᠲᠠᠷᠤᠵᠤ᠂ ᠭᠡᠷ᠎ᠠ ᠭᠠᠯ  ᠡᠷᠬᠦᠨ ᠡᠷᠤᠭ᠍ᠰᠡᠨ ᠨᠦᠭᠡᠨ ᠤ ᠭᠡᠰᠡᠭ ᠲᠤ ᠭᠡᠷᠡᠯᠳᠤᠬᠦᠯᠬᠦ ᠳᠤ ᠭᠤᠤᠯ ᠤᠨ ᠵᠢᠭᠠᠰᠤ ᠢᠷᠠᠭᠠᠯᠠᠨ ᠢᠷᠡᠳᠡᠭ᠃ ᠡᠨᠡ ᠦᠶ᠎ᠡ ᠳᠤ ᠨᠢᠮᠭᠡᠯᠡᠭᠰᠡᠨ ᠨᠦᠭᠡ ᠪᠠᠷ ᠢᠶᠠᠨ ᠵᠢᠭᠠᠰᠤᠨ ᠤ ᠪᠠᠶᠢᠳᠠᠯ ᠢ ᠠᠵᠢᠵᠤ ᠴᠤᠭᠤᠯᠤᠬᠰᠡᠨ ᠨᠦᠬᠡ ᠪᠠᠷ ᠢᠶᠠᠨ ︽ᠰᠢᠵᠢᠮ ᠲᠠᠢ ᠬᠦᠭᠢ ᠬᠠᠶᠠᠪᠠᠯ ᠬᠦᠬᠢ ᠳᠤ ᠤᠷᠤᠬᠤ ᠦᠬᠡᠢ ᠭᠡᠰᠡᠨ ᠶᠠᠪᠤᠳᠠᠯ ᠪᠠᠶᠢᠬᠤ ᠦᠬᠡᠢ᠃ ᠵᠢᠭᠠᠰᠤ ᠬᠦᠬᠢ   ᠳᠤ ᠤᠷᠤᠪᠠᠯ ᠲᠠᠷᠤᠢ ᠰᠢᠵᠢᠮ ᠢᠶᠠᠨ ᠪᠠᠭ᠎ᠠ ᠪᠠᠭ᠎ᠠ ᠪᠠᠷ ᠲᠠᠯᠪᠢᠵᠤ ᠵᠢᠭᠠᠰᠤ ᠶᠢ ᠠᠶ᠎ᠠ ᠪᠠᠷ ᠨᠢ ᠶᠠᠪᠤᠭᠤᠯᠵᠤ᠂ ᠵᠢᠭᠠᠰᠤ  ᠶᠠᠳᠠᠷᠠᠬᠰᠡᠨ ᠤ ᠲᠠᠷᠠᠭ᠎ᠠ ᠲᠠᠳᠠᠵᠤ ᠭᠠᠷᠭᠠᠳᠠᠭ︾᠃ ᠬᠡᠷᠪᠠ ᠬᠠᠭᠠᠨ ᠵᠢᠭᠠᠰᠤ ᠬᠦᠬᠢᠳᠡᠪᠠᠯ ᠲᠦᠷᠤᠬᠦᠤ ᠬᠦᠬᠢᠳᠡᠭᠰᠡᠨ ᠵᠢᠭᠠᠰᠤ ᠪᠠᠨ ᠪᠡᠯᠬᠡᠰᠢᠶᠡᠵᠤ ᠲᠦᠷᠤᠬᠦᠤ ᠵᠢᠭᠠᠰᠤᠨ ᠤ ᠬᠤᠷᠢᠮ ᠲᠠᠯᠪᠢᠳᠠᠭ᠃     ᠬᠢᠳᠠᠨᠴᠤᠳ ᠤᠨ  ᠬᠠᠭᠠᠳ ᠠᠴᠠ ᠬᠠᠷᠠᠴᠤᠰ ᠬᠦᠷᠳᠡᠯ᠎ᠠ ᠬᠠᠪᠤᠷ ᠭᠠᠯᠠᠭᠤ ᠢᠷᠡᠬᠦ ᠦᠶ᠎ᠡ ᠪᠤᠶᠤ ᠨᠠᠮᠤᠷ ᠭᠠᠯᠭᠠᠤ ᠨᠡᠬᠦᠳᠡᠯᠯᠡᠬᠦ ᠦᠶ᠎ᠡ ᠪᠠᠷ ᠭᠠᠯᠠᠭᠤ ᠠᠩᠨᠠᠳᠠᠭ᠃ ᠬᠠᠪᠤᠷ ᠭᠠᠯᠠᠭᠤ ᠢᠷᠡᠬᠦ ᠳᠤ ᠭᠠᠯᠠᠭᠤ ᠠᠩᠨᠠᠬᠤ ᠨᠢ ᠬᠢᠳᠠᠨᠴᠤᠳ ᠤᠨ ᠬᠠᠪᠤᠷᠵᠢᠶᠠᠨ ᠤ ᠠᠮᠢᠳᠤᠷᠠᠯ ᠤᠨ ᠨᠢᠭᠡᠨ ᠴᠢᠬᠤᠯᠠ ᠠᠭᠤᠯᠭ᠎ᠠ ᠪᠤᠯᠤᠨ᠎ᠠ᠃ ᠭᠠᠯᠠᠭᠤ ᠶᠢ ᠨᠢᠭᠡ ᠳᠤ ᠱᠤᠩᠬᠤᠷ ᠰᠢᠪᠠᠭᠤ ᠠᠪᠴᠤ ᠶᠠᠪᠤᠳᠠᠭ᠃ ᠬᠠᠭᠠᠳ  ᠢᠵᠠᠭᠤᠷᠳᠠᠳ ᠬᠠᠪᠤᠷ ᠤᠨ ᠨᠡᠬᠦᠨ ᠪᠠᠭᠤᠬᠤ ᠳᠤ ᠭᠠᠷᠬᠤ ᠳᠠᠭᠠᠨ ᠵᠠᠪᠠᠯ ᠲᠤᠰᠬᠠᠢ ᠰᠢᠪᠠᠭᠤᠴᠢᠨ ᠢᠶᠠᠷ ᠲᠡᠵᠢᠭᠡᠯᠭᠡᠭᠰᠡᠨ ᠱᠤᠩᠬᠤᠷ ᠰᠢᠪᠠᠭᠤ ᠠᠪᠴᠤ ᠶᠠᠪᠤᠳᠠᠭ᠃ ᠨᠠᠭᠤᠷ ᠪᠦᠰᠡᠯᠡᠭᠰᠡᠨ ᠬᠦᠮᠤᠰ ᠰᠤᠶᠢᠷᠡᠵᠤ ᠶᠠᠪᠤᠳᠠᠭ ᠬᠠᠪᠳᠠᠭᠠᠢ ᠭᠡᠩᠭᠡᠷᠭᠡ  ᠪᠠᠨ ᠲᠡᠯᠡᠳᠴᠤ  ᠭᠠᠯᠠᠭᠤ ᠦᠷᠬᠦᠭᠡᠨ ᠵᠡᠬᠦᠨ ᠪᠠᠷᠠᠭᠤᠨ ᠭᠠᠷ ᠤᠨ ᠬᠦᠮᠤᠰ ᠬᠠᠭᠠᠨ ᠤ ᠶᠠᠪᠤᠳᠠᠭ ᠠᠪᠠ ᠶᠢᠨ ᠭᠤᠤᠯ ᠵᠦᠭ ᠭᠠᠯᠠᠭᠤ ᠶᠢ ᠬᠠᠰᠢᠵᠤ ᠦᠭᠬᠦᠨ᠂ ᠭᠠᠯᠠᠭᠤ ᠶᠢ ᠰᠡᠷᠡᠭᠡᠳᠡᠨ ᠠᠪᠳᠠᠭ᠃ ᠬᠠᠭᠠᠨ ᠪᠠᠰᠠ ᠲᠦᠷᠤᠬᠦᠤ ᠭᠠᠯᠠᠭᠤᠨ ᠤ ᠨᠠᠶᠢᠷ ᠬᠡᠵᠤ ᠭᠠᠯᠠᠭᠤ ᠶᠢᠨ ᠬᠤᠷᠢᠮ ᠲᠠᠯᠪᠢᠳᠠᠭ ᠭᠡᠨ᠎ᠠ᠃ ᠵᠢᠴᠢ ᠪᠠᠰᠠ ᠭᠠᠯᠠᠭᠤ ᠶᠢ  ᠬᠠᠷᠪᠤᠵᠤ ᠴᠦ ᠠᠩᠨᠠᠳᠠᠭ ᠪᠠᠶᠢᠨ᠎ᠠ᠃ ᠰᠤᠷᠪᠤᠯᠵᠢᠰ ᠲᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ ᠬᠢᠳᠠᠨ ᠬᠠᠭᠠᠳ ᠤᠨ ᠬᠠᠪᠤᠷᠵᠢᠶᠠᠨ ᠤ ᠭᠠᠯᠠᠭᠤ ᠠᠩᠨᠠᠳᠠᠭ ᠭᠠᠵᠠᠷ ᠨᠢ  ᠣᠳᠣ ᠶᠢᠨ ᠴᠠᠩᠴᠦ᠋ᠨ ᠬᠤᠳᠠ ᠶᠢᠨ ᠤᠶᠢᠷᠠᠯᠴᠠᠬᠢ ᠭᠤᠷᠯᠤᠰ ᠡᠮᠤᠨ᠎ᠠ ᠬᠤᠰᠢᠭᠤᠨ ᠤ ᠲᠠᠭᠤ ᠶᠢᠨ ᠬᠤᠳᠠ ᠤᠷᠴᠢᠮ᠂ ᠨᠠᠢᠮᠠᠨ ᠤᠩᠨᠢᠭᠤᠳ ᠬᠤᠶᠠᠷ ᠬᠤᠰᠢᠭᠤᠨ ᠤ ᠵᠠᠭᠠᠭ ᠰᠢᠷᠠᠮᠦ᠋ᠷᠡᠨ ᠯᠤᠤᠬ᠎ᠠ ᠶᠢᠨ ᠭᠤᠤᠯ ᠤᠨ ᠪᠠᠯᠴᠢᠷ᠂ ᠤᠩᠨᠢᠭᠤᠳ ᠬᠤᠰᠢᠭᠤᠨ ᠤ ᠰᠢᠨ᠎ᠠ ᠰᠦᠮ᠎ᠠ ᠰᠤᠮᠤ ᠤᠷᠴᠢᠮ ᠢᠶᠠᠷ ᠪᠠᠶᠢᠬᠰᠡᠨ ᠶᠤᠮ ᠬᠡᠨ᠎ᠠ᠃    ᠬᠢᠳᠠᠨᠴᠤᠳ ᠤᠨ ᠳᠡᠭᠡᠳᠤᠰ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢ ᠭᠡᠷᠰᠢᠬᠦᠯᠤᠨ ᠲᠠᠰᠠᠠᠬᠬᠰᠡᠨ ᠤ ᠲᠠᠷᠠᠭ᠎ᠠ ᠠᠩ ᠤᠨ ᠮᠢᠬ᠎ᠠ ᠢᠳᠡᠬᠦ ᠶᠢᠨ ᠵᠠᠷᠬᠡ ᠪᠠᠷ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠮᠢᠬ᠎ᠠ ᠶᠢ ᠴᠦ ᠢᠳᠡᠬᠦ ᠪᠤᠯᠤᠬᠰᠡᠨ ᠪᠠᠶᠢᠨ᠎ᠠ᠃ ᠡᠬᠦᠨ ᠠᠴᠠ ᠤᠯᠠᠭᠠᠨ ᠢᠳᠡᠬᠡᠨ ᠤ ᠢᠷᠡᠯᠳᠠ ᠶᠢᠨ ᠬᠡᠪᠴᠢᠶ᠎ᠡ ᠦᠷᠬᠡᠳᠴᠡᠢ᠃ ᠮᠢᠬ᠎ᠠ ᠶᠢ  ᠭᠤᠤᠯᠳᠠᠭᠤ ᠨᠢᠭᠡ ᠳᠤ ᠰᠢᠷᠠᠵᠤ ᠢᠳᠡᠳᠡᠭ᠃    ᠵᠢᠴᠢ ᠮᠢᠬ᠎ᠠ ᠶᠢ ᠪᠠᠰᠠ ᠴᠢᠨᠠᠵᠤ ᠢᠳᠡᠳᠡᠭ᠃ ᠬᠢᠳᠠᠨᠴᠤᠳ ᠤᠨ ᠮᠢᠬ᠎ᠠ ᠴᠢᠨᠠᠵᠤ ᠪᠠᠶᠢᠭ᠎ᠠ ᠵᠢᠷᠤᠭ ᠪᠠᠭᠠᠷᠢᠨ ᠵᠡᠬᠦᠨ ᠬᠤᠰᠢᠭᠤᠨ ᠤ ᠪᠠᠶᠠᠬᠠᠤᠪᠤᠭ᠎ᠠ ᠶᠢᠨ ᠯᠢᠶᠣᠤ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠤᠩᠭᠤᠨ ᠤ ᠬᠠᠨ᠎ᠠ ᠵᠢᠷᠤᠭ ᠲᠤ ᠢᠯᠡᠷᠡᠵᠡᠢ᠃ ᠲᠤᠰ ᠵᠢᠷᠤᠭ ᠲᠤ ᠨᠢᠭᠡ ᠡᠷᠡᠭᠳᠡᠢ ᠰᠦᠬᠦᠳᠴᠤ ᠰᠠᠭᠤᠭᠠᠳ ᠭᠠᠷ ᠲᠠᠭᠠᠨ ᠲᠠᠮᠤᠷ  ᠰᠡᠷᠡᠭᠡ ᠪᠠᠷᠢᠵᠤ ᠦᠨᠳᠤᠷ ᠲᠦᠷᠪᠡᠨ ᠬᠦᠯ ᠲᠠᠢ ᠲᠤᠮᠤ  ᠲᠤᠭᠤᠭᠠᠨ ᠳᠤ ᠪᠤᠴᠠᠯᠵᠤ ᠪᠠᠶᠢᠭ᠎ᠠ ᠮᠢᠬ᠎ᠠ ᠶᠢ ᠡᠷᠬᠢᠬᠦᠯᠵᠤ ᠪᠠᠶᠢᠬᠤ ᠪᠠᠷ ᠵᠢᠷᠤᠬᠰᠡᠨ ᠪᠠᠶᠢᠪᠠ᠃ ᠨᠦᠬᠦᠭᠡ ᠨᠢ ᠠᠤᠬᠠᠨ ᠬᠤᠰᠢᠭᠤᠨ ᠤ  ᠶᠠᠩ ᠱᠠᠨ ᠤ ᠯᠢᠶᠤᠤ ᠤᠯᠤᠰ ᠤᠨ ᠤᠩᠭᠤᠨ ᠤ ︽ᠮᠢᠬ᠎ᠠ ᠴᠢᠨᠠᠵᠤ ᠪᠠᠶᠢᠭ᠎ᠠ ᠵᠢᠷᠤᠭ︾ ᠪᠤᠯᠤᠨ᠎ᠠ᠃ ᠲᠤᠰ ᠵᠢᠷᠤᠭ ᠲᠤ ᠨᠢᠭᠡ ᠲᠠᠪᠤᠨ ᠲᠤᠯᠭᠠᠭᠤᠷᠢ ᠲᠠᠢ  ᠪᠦᠰ ᠮᠠᠶᠢᠬᠠᠨ ᠤ ᠲᠤᠤᠷ᠎ᠠ ᠲᠦᠷᠪᠡᠨ ᠬᠦᠯ ᠲᠠᠢ ᠨᠢᠭᠡ ᠲᠤᠮᠤ  ᠲᠤᠭᠤᠭ᠎ᠠ ᠭᠤᠷᠪᠠᠨ ᠪᠠᠭ᠎ᠠ ᠲᠣᠭᠤᠭ᠎ᠠ ᠲᠤᠯᠵᠤ᠂ ᠲᠣᠮᠣ ᠲᠣᠭᠤᠭᠠᠨ ᠳᠤᠨᠢ ᠭᠤᠷᠪᠡᠨ ᠬᠤᠨᠢᠨ ᠮᠦᠴᠢ ᠴᠢᠨᠠᠵᠤ ᠪᠠᠶᠢᠭ᠎ᠠ ᠪᠦᠬᠡᠳ ᠨᠢᠭᠡ ᠬᠢᠳᠠᠨ ᠡᠷ᠎ᠡ ᠠᠮᠠᠨ ᠳᠠᠭᠠᠨ ᠬᠢᠳᠤᠭ᠎ᠠ ᠵᠢᠭᠤᠨ  ᠬᠠᠨᠴᠤᠢ ᠪᠠᠨ ᠰᠢᠮᠠᠯᠠᠨ ᠮᠢᠬ᠎ᠠ ᠲᠠᠢ ᠤᠷᠤᠯᠳᠤᠬᠤ ᠪᠠᠷ ᠪᠠᠵᠠᠭᠠᠵᠤ᠂ ᠨᠦᠬᠦᠭᠡ ᠨᠢᠭᠡ ᠬᠢᠳᠠᠨ ᠵᠠᠯᠠᠭᠤ ᠲᠤᠭᠤᠭᠠᠨ ᠤ ᠡᠮᠤᠨ᠎ᠠ ᠤᠴᠤᠶᠢᠨ ᠰᠠᠭᠤᠵᠤ ᠬᠠᠭᠤᠷᠠᠢ ᠮᠤᠳᠤᠨ ᠲᠦᠯᠡᠭᠡ ᠡᠪᠤᠳᠤᠭ᠍ᠯᠡᠨ ᠬᠤᠭᠤᠯᠵᠤ ᠪᠠᠶᠢᠬᠤ ᠪᠠᠷ ᠵᠢᠷᠤᠵᠡᠢ᠃ ᠬᠢᠳᠠᠨᠴᠤᠳ ᠮᠢᠬ᠎ᠠ ᠶᠢ ᠪᠠᠰᠠ ᠪᠤᠷᠴᠠᠯᠠᠨ ᠬᠠᠳᠠᠭᠠᠵᠤ ᠨᠦᠭᠡᠴᠢᠯᠡᠨ ᠬᠠᠳᠠᠭᠠᠯᠠᠵᠤ ᠢᠳᠡᠳᠡᠭ᠃ ᠵᠢᠱᠢᠶᠡᠯᠡᠪᠠᠯ᠄ ᠤᠮᠠᠷᠠᠳᠤ ᠰᠦᠩ ᠤᠯᠤᠰ ᠲᠤ ᠬᠦᠷᠭᠡᠵᠤ ᠪᠠᠶᠢᠬᠰᠡᠨ ᠪᠡᠯᠡᠭ ᠤᠨ ᠲᠤᠳᠤᠷ᠎ᠠ ︽ᠦᠬᠡᠷ᠂ ᠬᠤᠨᠢ᠂ ᠵᠡᠷᠯᠢᠭ ᠭᠠᠭ᠋ᠠᠢ᠂ ᠵᠢᠭᠠᠰᠤ᠂  ᠪᠤᠭᠤ ᠶᠢᠨ ᠬᠠᠳᠠᠭᠠᠰᠡᠨ ᠮᠢᠬ᠎ᠠ︾ ᠪᠠᠶᠢᠭ᠎ᠠ ᠨᠢ ᠡᠬᠦᠨ ᠢ ᠭᠡᠷᠴᠢᠯᠡᠵᠤ ᠪᠤᠢ᠃ ᠡᠬᠦᠨ ᠢ ᠤᠤᠯ ᠰᠤᠷᠪᠤᠯᠵᠢᠰ ᠲᠤ ︽牛、羊、野猪、鱼、鹿、腊二十（箱）︾ ᠭᠡᠵᠤ ᠪᠢᠴᠢᠵᠤ ᠪᠤᠢ᠃ ︽腊︾ ᠭᠡᠳᠡᠭ ᠦᠭᠡ ᠶᠢ ᠬᠤᠯᠪᠤᠬᠳᠠᠯ ᠪᠦᠬᠦᠢ ᠬᠢᠳᠠᠳ ᠮᠠᠲ᠋ᠧᠷᠢᠶᠠᠯ ᠠᠴᠠ ᠯᠠᠪᠯᠠᠬᠤ ᠳᠤ ︽ᠬᠦᠭᠡᠭᠡ ᠰᠠᠷ᠎ᠠ ᠪᠤᠶᠤ ᠡᠪᠤᠯ ᠲᠠᠷᠤᠵᠤ ᠡᠳ᠋ᠰᠢᠬᠦᠯᠤᠭ᠍ᠰᠡᠨ ᠮᠢᠬᠠᠨ ᠤ ᠵᠤᠶᠢᠯ︾ ᠭᠡᠵᠤ ᠲᠠᠶᠢᠯᠪᠤᠷᠢᠯᠠᠵᠤ ᠪᠤᠢ᠃ ᠡᠬᠦᠨ ᠠᠴᠠ ᠦᠵᠡᠪᠠᠯ ᠬᠢᠳᠠᠨᠴᠤᠳ ᠤᠨ ᠤᠯᠠᠭᠠᠨ ᠢᠳᠡᠬᠡᠨ ᠡᠳ᠋ᠰᠢᠬᠦᠯᠬᠦ ᠮᠡᠷᠭᠡᠵᠢᠯ ᠣᠳᠣ ᠶᠢᠨ ᠮᠤᠩᠭᠤᠯᠴᠤᠳ ᠤᠨ ᠪᠤᠯᠪᠠᠰᠤᠨ ᠤ ᠬᠡᠮᠵᠢᠶ᠎ᠡ ᠳᠤ ᠬᠦᠷᠤᠭ᠍ᠰᠡᠨ ᠢ ᠬᠠᠷᠠᠭᠤᠯᠵᠤ ᠪᠤᠢ᠃ ᠲᠡᠳᠡ᠂ ᠮᠢᠬ᠎ᠠ ᠶᠢ ᠰᠢᠷᠠᠵᠤ ᠢᠳᠡᠬᠦ᠂ ᠴᠢᠨᠠᠵᠤ ᠢᠳᠡᠬᠦ᠂ ᠬᠠᠳᠠᠭᠠᠬᠤ ᠪᠤᠶᠤ ᠲᠠᠷᠤᠵᠤ ᠡᠳ᠋ᠰᠢᠬᠦᠯᠵᠤ ᠪᠦᠷ ᠴᠢᠳᠠᠬᠤ ᠪᠤᠯᠵᠠᠢ᠃ ᠡᠪᠤᠯ ᠮᠢᠬ᠎ᠠ  ᠪᠤᠷᠴᠠᠯᠠᠵᠤ ᠬᠠᠳᠠᠭᠠᠬᠤ ᠪᠤᠯ ᠮᠤᠩᠭᠤᠯᠴᠤᠳ ᠤᠨ ᠲᠤᠮᠳᠠ  ᠨᠡᠶᠢᠳᠡᠮ ᠲᠡᠯᠭᠡᠷᠡᠭᠰᠡᠨ ᠮᠡᠷᠬᠡᠵᠢᠯ ᠪᠤᠯᠤᠨ᠎ᠠ᠃ ᠡᠪᠤᠯ ᠤᠨ ᠣᠷᠢ ᠦᠵᠡᠬᠦᠯᠵᠤ ᠠᠭᠠᠵᠢᠮ ᠢᠶᠠᠷ ᠬᠠᠳᠠᠬᠰᠡᠨ ᠮᠢᠬ᠎ᠠ ᠱᠦᠯᠤ ᠪᠠᠨ ᠬᠠᠳᠠᠭᠠᠯᠠᠵᠤ᠂ ᠬᠠᠪᠤᠷ᠂ ᠵᠤᠨ ᠴᠢᠨᠠᠵᠤ ᠢᠳᠡᠬᠦ ᠳᠤ ᠱᠦᠯᠤ ᠨᠢ ᠶᠠᠭ ᠰᠢᠨ᠎ᠠ ᠮᠢᠬᠠᠨ ᠤ ᠱᠦᠯᠤ ᠰᠢᠭ ᠪᠠᠶᠢᠳᠠᠭ᠃ ᠡᠬᠦᠨ ᠤ ᠳᠡᠭᠡᠷ᠎ᠠ ᠰᠠᠪᠠ ᠬᠦᠪ ᠲᠤ ᠲᠠᠷᠤᠵᠤ ᠡᠳ᠋ᠰᠢᠬᠦᠯᠬᠦ ᠮᠡᠷᠭᠡᠵᠢᠯ ᠢ ᠤᠯᠠᠭᠠᠨ ᠢᠳᠡᠬᠡᠨ ᠢ ᠡᠳ᠋ᠰᠢᠬᠦᠯᠬᠦ ᠪᠤᠯᠪᠠᠰᠤᠨ ᠤ ᠬᠡᠮᠵᠢᠶ᠎ᠡ ᠨᠡᠯᠢᠶᠡᠳ ᠳᠡᠭᠡᠷ᠎ᠠ ᠬᠡᠮᠵᠢᠶᠡᠨ ᠳᠤ ᠬᠦᠷᠤᠭ᠍ᠰᠡᠨ ᠢ ᠬᠠᠷᠠᠭᠤᠯᠵᠤ ᠪᠤᠢ᠃ ᠵᠢᠴᠢ ᠪᠠᠰᠠ ︽ᠯᠢᠶᠣᠤ ᠤᠯᠤᠰ ᠤᠨ ᠰᠤᠳᠤᠷ︾ ᠲᠤ ᠬᠢᠳᠠᠨᠴᠤᠳ ᠢ ︽ᠪᠤᠭᠤ ᠶᠢᠨ ᠬᠡᠯᠡ ᠶᠢᠨ ᠵᠢᠶᠠᠩ︾ ᠬᠢᠵᠤ  ᠢᠳᠡᠳᠡᠭ ᠭᠡᠵᠤ ᠲᠡᠮᠳᠡᠭᠯᠡᠵᠦ ᠪᠤᠢ ᠡᠨᠡ ᠨᠢ ᠮᠦᠨ ᠤᠯᠠᠭᠠᠨ ᠢᠳᠡᠬᠡᠨ ᠢ ᠡᠳ᠋ᠰᠢᠬᠦᠯᠬᠦ ᠲᠠᠯ᠎ᠠ ᠶᠢᠨ ᠪᠠᠰᠠ ᠨᠢᠭᠡ ᠵᠤᠶᠢᠯ ᠤᠨ ᠮᠡᠷᠭᠡᠵᠢᠯ ᠪᠤᠯᠤᠨ᠎ᠠ᠃    ᠵᠠᠷᠢᠮ ᠡᠷᠳᠡᠮᠳᠡᠳ ᠬᠢᠳᠠᠨᠴᠤᠳ ᠲᠦᠬᠦᠬᠡᠢ ᠲᠠᠤᠯᠠᠢ ᠶᠢᠨ ᠡᠯᠢᠭᠡ ᠶᠢᠨ ᠵᠢᠶᠠᠩ ᠲᠠᠢ ᠬᠤᠯᠢᠵᠤ ᠢᠳᠡᠬᠦ ᠶᠢ ᠤᠯᠠᠭᠠᠨ ᠢᠳᠡᠬᠡᠨ ᠢ ᠲᠦᠬᠦᠬᠡᠢ ᠪᠠᠷ ᠢᠳᠡᠳᠡᠭ ᠵᠠᠩᠰᠢᠯ ᠤᠨ ᠤᠯᠠ  ᠮᠦᠷ ᠭᠡᠵᠤ ᠦᠵᠡᠵᠤ ᠪᠤᠢ᠃ ᠡᠬᠦᠨ ᠢ ᠠᠪᠤᠨ ᠦᠵᠡᠪᠠᠯ ᠵᠦᠢ ᠳᠤ ᠨᠡᠶᠢᠴᠡᠬᠦ‍ ᠰᠢᠭ᠂  ᠭᠡᠳᠡᠯ᠎ᠡ ᠨᠠᠷᠢᠪᠴᠢᠯᠠᠨ ᠰᠢᠨᠵᠡᠪᠠᠯ ᠬᠢᠳᠠᠨᠴᠤᠳ  ᠤᠨ ᠤᠯᠠᠭᠠᠨ ᠢᠳᠡᠬᠡᠨ ᠤ ᠰᠤᠶᠤᠯ ᠤᠨ ᠲᠤᠤᠷ᠎ᠠ ᠲᠦᠪᠰᠢᠨ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠪᠤᠰᠤ ᠬᠠᠷᠢᠨ ᠲᠡᠭᠡᠷ᠎ᠠ ᠲᠦᠪᠰᠢᠨ ᠢ ᠬᠠᠷᠠᠭᠤᠯᠵᠤ ᠪᠤᠢ᠃ ᠬᠦᠮᠤᠨ ᠲᠦᠷᠤᠯᠬᠢᠳᠡᠨ ᠤ ᠮᠢᠬ᠎ᠠ ᠶᠢ ᠪᠤᠯᠭᠤᠵᠤ ᠢᠳᠡᠬᠦ ᠲᠡᠤᠬᠡ ᠬᠠᠭᠤᠴᠢᠨ ᠴᠢᠯᠠᠭᠤᠨ ᠵᠠᠪᠰᠡᠭ ‍ᠤᠨ‌ᠦᠶ᠎ᠡ ᠳᠤ ᠪᠡᠶᠡᠯᠡᠭᠳᠡᠭᠰᠡᠨ ᠪᠠᠶᠢᠳᠠᠭ᠃ ᠬᠠᠭᠤᠴᠢ ᠪᠠᠷ ᠬᠡᠯᠡᠪᠠᠯ ᠬᠡᠳᠤᠨ ᠠᠷᠪᠡᠨ ᠲᠦᠮᠡᠨ ᠵᠢᠯ ᠤᠨ ᠡᠮᠤᠨ᠎ᠠ ᠠᠴᠠ ᠭᠠᠯ ᠬᠡᠷᠡᠭᠯᠡᠵᠤ ᠡᠬᠢᠯᠡᠵᠡᠢ᠃ ᠦᠭᠡᠷ᠎ᠡ ᠪᠠᠷ ᠬᠡᠯᠡᠪᠠᠯ ᠬᠡᠳᠤᠨ ᠠᠷᠪᠡᠨ ᠲᠦᠮᠡᠨ ᠵᠢᠯ ᠤᠨ ᠡᠮᠤᠨ᠎ᠠ ᠠᠴᠠ ᠮᠢᠬ᠎ᠠ ᠶᠢ ᠰᠢᠷᠠᠵᠤ ᠪᠤᠯᠭᠤᠵᠤ ᠢᠳᠡᠬᠦ ᠪᠤᠯᠤᠬᠰᠡᠨ ᠪᠠᠶᠢᠨ᠎ᠠ᠃ ᠡᠨᠡ ᠨᠢ ᠬᠢᠳᠠᠨᠴᠤᠳ ᠤᠨ ᠦᠶ᠎ᠡ ᠪᠤᠯᠬᠤ ᠳᠤ ᠨᠠᠶᠢᠳᠠᠮᠴᠢᠯᠠᠨ ᠲᠡᠯᠭᠡᠷᠡᠭᠰᠡᠨ ᠮᠡᠷᠭᠡᠵᠢᠯ ᠪᠤᠯᠬᠤ ᠳ᠋ᠠᠭᠠᠨ‌‍ᠲᠭᠠᠷᠠᠨ᠎ᠠ᠃ ᠳᠡᠭᠡᠷ᠎ᠠ ᠨᠤᠳᠠᠯᠠᠬᠰᠡᠨ ᠵᠤᠶᠢᠯᠡᠰ ᠴᠦ ᠡᠬᠦᠨ ᠢ ᠲᠠᠪᠬᠤᠷ ᠬᠡᠷᠡᠴᠢᠯᠠᠵᠤ ᠪᠤᠢ᠃  ᠲᠠᠤᠯᠠᠢ  ᠶᠢᠨ ᠡᠯᠢᠭᠡ ᠶᠢ ᠲᠦᠬᠦᠬᠡᠢ ᠪᠠᠷ ᠢᠳᠡᠬᠦ ᠨᠢ ᠶᠠᠮᠠᠷ ᠪᠠᠯᠠᠷᠯᠢᠭ ᠠᠴᠠ ᠪᠤᠯᠤᠬᠰᠡᠨ ᠪᠤᠰᠤ ᠬᠠᠷᠢᠨ ᠰᠢᠮ᠎ᠡ ᠳᠡᠵᠢᠭᠡᠯ ᠤᠨ ᠲᠤᠬᠢᠷᠢᠭᠤᠯᠤᠯᠳᠠ ᠬᠢᠭᠰᠡᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠵᠤᠶᠢᠯ ᠮᠦᠨ᠃ ᠲᠦᠬᠦᠬᠡᠢ ᠡᠯᠢᠭᠡᠨ ᠳᠤ ᠨᠢᠳᠤᠨ ᠤ ᠬᠠᠷᠠᠭ᠎ᠠ ᠶᠢ ᠲᠡᠵᠢᠭᠡᠬᠦ ᠸᠢᠲ᠋ᠠᠮᠢᠨ ᠤ ᠵᠤᠶᠢᠯ ᠦᠯᠡᠮᠵᠢ ᠠᠭᠤᠯᠤᠬᠳᠠᠵᠤ ᠪᠠᠶᠢᠳᠠᠭ᠃ ᠣᠳᠣ ᠪᠤᠯᠳᠠᠯ᠎ᠠ ᠮᠤᠩᠭᠤᠯ᠂ ᠲᠠᠭᠤᠷ᠂ ᠡᠸ᠋ᠩᠬᠢ᠂ ᠤᠷᠴᠤᠨ ᠵᠡᠷᠬᠡ ᠦᠨᠳᠤᠰᠤᠳᠠᠨ ᠤ ᠮᠠᠯᠴᠢᠨ ᠠᠩᠴᠢᠳ ᠰᠠᠶ᠋ᠢ ᠤᠨᠠᠭᠠᠬᠰᠡᠨ ᠠᠩ ᠪᠤᠶᠤ ᠰᠠᠶ᠋ᠢ ᠭᠠᠷᠭᠠᠬᠰᠡᠨ ᠮᠠᠯ ᠤᠨ ᠡᠯᠢᠭᠡ ᠶᠢ ᠲᠦᠬᠦᠭᠡᠢ ᠪᠠᠷ ᠨᠢ ᠬᠠᠯᠠᠭᠤᠨ ᠳᠡᠭᠡᠷ᠎ᠡ ᠨᠢ ᠢᠳᠡᠬᠦ ᠵᠠᠩᠰᠢᠯ ᠪᠤᠢ᠃ ᠲᠡᠷᠡ ᠨᠢ ᠪᠦᠷ ᠨᠢᠳᠤᠨ ᠤ ᠬᠠᠷᠠᠭ᠎ᠠ ᠲᠡᠵᠢᠭᠡᠬᠦ ᠵᠤᠷᠢᠯᠭ᠎ᠠ ᠲᠠᠢ ᠪᠠᠶᠢᠳᠠᠭ᠃ ᠠᠩᠴᠢᠨ ᠮᠠᠯᠴᠢᠨ ᠬᠦᠮᠣᠰ ᠲᠤ ᠨᠢᠳᠤᠨ ᠤ ᠰᠠᠶᠢᠨ ᠬᠠᠷᠠᠭ᠎ᠠ ᠨᠢ ᠤᠶᠢᠯᠡᠳᠪᠤᠷᠢᠯᠡᠯ ᠤᠨ  ᠬᠢᠨᠢ ᠦᠷ᠎ᠡ ᠠᠰᠢᠭ ᠢ ᠨᠡᠮᠡᠭᠳᠡᠬᠦᠯᠬᠦ ᠳᠤ ᠰᠢᠭᠤᠳ ᠬᠤᠯᠪᠤᠬᠳᠠᠳᠠᠭ᠃ ᠡᠶᠢᠮᠤ ᠠᠴᠠ ᠬᠠᠯᠠᠭᠤᠨ ᠲᠦᠬᠦᠬᠡᠢ ᠡᠯᠢᠭᠡ ᠢᠳᠡᠬᠦ ᠵᠠᠩᠰᠢᠯ ᠨᠡᠬᠦᠳᠡᠯᠴᠢᠳ ᠤᠨ ᠲᠤᠮᠳᠠ ᠦᠷᠬᠡᠨ ᠲᠡᠯᠭᠡᠷᠡᠵᠤ ᠤᠳᠠᠭᠠᠨ ᠤᠯᠠᠮᠵᠢᠯᠠᠬᠳᠠᠰᠡᠨ ᠪᠠᠶᠢᠨ᠎ᠠ᠃ ᠬᠡᠳᠡᠯ᠎ᠠ ᠬᠢᠳᠠᠨᠴᠤᠳ ᠤᠨ ᠲᠠᠤᠯᠠᠢ ᠶᠢᠨ ᠲᠦᠬᠦᠬᠡᠢ ᠡᠯᠢᠭᠡ ᠶᠢ ᠪᠤᠭᠤ ᠶᠢᠨ ᠬᠡᠯᠡ ᠶᠢᠨ ᠵᠢᠶᠠᠩ ᠢᠶᠠᠷ  ᠠᠮᠳᠠ ᠤᠷᠤᠭᠤᠯᠵᠤ ᠢᠳᠡᠳᠡᠭ ᠨᠢ ᠰᠢᠮ᠎ᠡ ᠳᠡᠵᠢᠭᠡᠯ  ᠤᠨ ᠱᠠᠭᠠᠷᠳᠠᠯᠭ᠎ᠠ ᠶᠢᠨ  ᠬᠤᠪᠢ ᠳᠤ ᠡᠨᠡ ᠠᠭᠤᠯᠭ᠎ᠠ ᠪᠠᠭᠳᠠᠵᠤ ᠪᠤᠢ᠃ ᠵᠢᠴᠢ ᠪᠠᠰᠠ  ᠬᠤᠭᠤᠯᠠ ᠤᠮᠳᠠ ᠪᠠᠵᠠᠭᠠᠬᠤ ᠰᠤᠶᠤᠯ ᠪᠤᠯᠪᠠᠰᠤᠨ  ᠤ ᠬᠤᠪᠢ ᠠᠴᠠ ᠠᠵᠢᠪᠠᠯ ᠤᠯᠠᠭᠠᠨ ᠢᠳᠡᠬᠡᠨ ᠢ ᠠᠮᠳᠠ ᠤᠷᠤᠭᠤᠯᠬᠤ ᠨᠢᠭᠡ ᠵᠤᠶᠢᠯ ᠤᠨ ᠮᠡᠷᠭᠡᠵᠢᠯ ᠪᠤᠯᠬᠤ ᠶᠤᠮ᠃ ᠶᠠᠫᠤᠨᠴᠤᠳ ᠤᠨ ᠵᠢᠭᠠᠰᠤᠨ ᠢ ᠲᠦᠬᠦᠬᠡᠢ ᠮᠢᠬ᠎ᠠ ᠶᠢ ᠵᠢᠶᠠᠩ ᠢᠶᠠᠷ ᠠᠮᠳᠠ  ᠤᠷᠤᠭᠤᠯᠵᠤ ᠢᠳᠡᠬᠦ᠂ ᠮᠠᠨ ᠤ ᠤᠯᠤᠰ ᠤᠨ ᠬᠢᠳᠠᠳ ᠦᠨᠳᠤᠰᠤᠳᠠᠨ ᠤ ᠵᠢᠭᠠᠰᠤᠨ ᠤ ᠲᠦᠬᠦᠬᠡᠢ ᠮᠢᠬ᠎ᠠ ᠶᠢ ᠵᠢᠶᠠᠩ ᠢᠶᠠᠷ ᠠᠮᠳᠠ ᠤᠷᠤᠭᠤᠯᠵᠤ ᠢᠳᠡᠳᠡᠭ ᠨᠢ ᠴᠦᠮ ᠡᠬᠦᠨ   ᠯᠦᠭᠡ ᠠᠳᠠᠯᠢ ᠪᠠᠶᠢᠳᠠᠭ᠃     ᠬᠢᠳᠠᠨᠴᠤᠳ ᠮᠠᠯ ᠠᠵᠤ ᠠᠬᠤᠢ ᠡᠵᠡᠩᠨᠡᠭᠡᠳ ᠣᠨ ᠣᠳᠠᠵᠡᠢ᠃ ᠲᠠᠪᠤᠳᠤᠭᠠᠷ  ᠵᠠᠭᠤᠨ ᠤ ᠦᠶ᠎ᠡ ᠳᠤ ᠠᠩᠬ᠎ᠠ ᠪᠡᠶ᠎ᠡ ᠪᠠᠨ  ᠳᠠᠭᠠᠭᠠᠵᠤ ᠲᠡᠤᠬᠡᠨ ᠳᠤ ᠲᠡᠮᠳᠡᠭᠯᠡᠭᠳᠡᠬᠦ ᠦᠶ᠎ᠡ ᠳᠤ ᠨᠢᠭᠡᠨᠳᠠ  ᠪᠤᠯᠪᠠᠰᠤᠷᠠᠬᠰᠡᠨ ᠨᠡᠬᠦᠳᠡᠯ  ᠮᠠᠯ ᠠᠵᠤ ᠠᠬᠤᠢ ᠲᠠᠢ ᠪᠤᠯᠴᠢᠬᠠᠬᠰᠡᠨ ᠪᠠᠶᠢᠨ᠎ᠠ᠃ ᠲᠡᠬᠦᠨᠴᠢᠯᠡᠨ ᠮᠠᠯ ᠠᠵᠤ ᠠᠬᠤᠢ ᠨᠢ ᠪᠤᠯᠵᠤ ᠪᠠᠶᠢᠬᠰᠡᠨ ᠪᠦᠬᠡᠳ ᠬᠡᠳᠤᠨ  ᠮᠢᠩᠭ᠎ᠠ ᠪᠠᠷ ᠲᠡᠷᠬᠡ ᠪᠠᠨ ᠴᠦᠷᠬᠡᠯᠡᠵᠤ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠵᠤ ᠪᠠᠶᠢᠪᠠ᠃ ᠵᠢᠴᠢ ᠪᠠᠰᠠ ᠳᠠᠪᠠᠭᠠᠴᠨ ᠸᠧᠢ ᠶᠢᠨ ᠲᠦᠷᠤ ᠳᠤ ᠰᠠᠶᠢᠨ ᠠᠬᠳᠠ ᠶᠢᠨ ᠠᠯᠪᠠ  ᠪᠠᠷᠢᠵᠤ ᠪᠠᠶᠢᠪᠠ᠃ ᠲᠡᠳᠡᠨᠤᠰ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ ᠳᠤ ᠤᠯᠠᠭᠠᠨ ᠢᠳᠡᠬᠡᠨ ᠠᠴᠠ ᠭᠠᠳᠠᠨ᠎ᠠ ᠴᠠᠭᠠᠨ ᠢᠳᠡᠭᠡᠨ ᠴᠢᠬᠤᠯᠡ ᠪᠠᠶᠢᠷᠢ ᠶᠢ ᠡᠵᠡᠯᠡᠳᠡᠭ᠃ ᠭᠡᠳᠡᠯ᠎ᠠ ᠰᠤᠷᠪᠤᠯᠵᠢᠰ ᠲᠤ ᠡᠨᠡ ᠲᠤᠬᠠᠢ ᠨᠠᠷᠢᠨ ᠲᠡᠮᠳᠡᠭᠯᠡᠯ ᠪᠠᠶᠢᠬᠤ ᠦᠬᠡᠢ᠃ ᠵᠦᠪᠭᠡᠨ ︽ᠬᠦᠮᠤᠰ ᠢᠨᠤ ᠬᠤᠷᠤᠳ ᠠᠶᠢᠷᠠᠭ ᠢᠶᠠᠷ ᠳᠡᠵᠢᠭᠡᠯ ᠪᠤᠯᠭᠠᠮᠤᠢ︾ ᠭᠡᠰᠡᠨ ᠲᠤᠪᠴᠢᠬᠠᠨ ᠲᠡᠮᠳᠡᠭᠯᠡᠯ ᠬᠠᠷᠠᠬᠳᠠᠨ᠎ᠠ᠃ ᠵᠢᠴᠢ ᠬᠠᠭᠤᠴᠢ ᠰᠤᠳᠤᠯᠤᠯ ᠤᠨ ᠮᠠᠯᠳᠠᠯᠭ᠎ᠠ᠂ ᠤᠩᠭᠤᠨ ᠤ ᠬᠠᠨ᠎ᠠ ᠶᠢᠨ ᠵᠢᠷᠤᠭ ᠳᠤ ᠴᠡᠭᠡ ᠶᠢᠨ ᠪᠤᠳᠤᠩ ᠠᠴᠠ ᠪᠤᠰᠤ ᠬᠠᠷᠠᠬᠳᠠᠬᠰᠡᠨ ᠶᠠᠭᠤᠮ᠎ᠠ ᠪᠠᠶᠢᠬᠤ ᠦᠬᠡᠢ᠃ ︽ᠠᠶᠢᠷᠠᠭ︾ ᠢ ᠬᠢᠳᠠᠳ ᠢᠶᠠᠷ ︽湩酪︾ ᠭᠡᠵᠤ ᠳᠡᠮᠳᠡᠭᠯᠡᠵᠤ ᠪᠤᠢ᠃ ᠲᠡᠬᠦᠨ ᠢ ᠤᠤᠬᠠᠴᠢᠯᠠᠨ ᠮᠤᠩᠭᠤᠯᠴᠢᠯᠠᠪᠠᠯ ︽ᠰᠦ ᠶᠢᠨ ᠡᠭᠡᠳᠡᠭ︾ ᠭᠡᠰᠡᠨ ᠦᠬᠡ ᠪᠤᠯᠤᠨ᠎ᠠ᠃ ᠰᠦ ᠶᠢᠨ ᠡᠭᠡᠳᠡᠭ ᠲᠤ ᠤᠯᠠᠨ ᠵᠤᠶᠢᠯ ᠪᠤᠢ᠃ ᠲᠤᠬᠠᠶᠢᠯᠠᠪᠠᠯ᠄  ᠡᠭᠡᠳᠡᠭᠰᠡᠨ ᠰᠦ  ᠂ ᠲᠠᠷᠠᠭ᠂ ᠠᠶᠢᠷᠠᠭ᠂  ᠬᠤᠭᠤᠷᠮᠠᠭ᠂ ᠴᠠᠭ᠎ᠠ᠂ ᠴᠡᠭᠡ ᠭᠡᠬᠦ ᠮᠡᠳᠤ᠃ ᠲᠠᠷᠢᠶᠠᠯᠠᠬᠤ ᠦᠨᠳᠤᠰᠤᠳᠠᠨ ᠢᠩᠬᠢᠵᠤ ᠨᠠᠷᠢᠨ ᠢᠯᠭᠠᠳᠠᠭ ᠦᠬᠡᠢ ᠨᠡᠶᠢᠳᠠ ᠳᠤᠨᠢ ᠰᠦ ᠶᠢᠨ ᠡᠭᠡᠳᠡᠭ ᠬᠡᠵᠤ ᠲᠤᠶᠢᠮᠤᠴᠢᠯᠡᠨ ᠭᠡᠯᠡᠳᠡᠭ᠃ ᠪᠤᠳᠤᠬᠤ ᠳᠤ ᠬᠢᠳᠠᠨᠴᠤᠳ ᠡᠳᠡᠭᠡᠷ ᠤᠨ ᠲᠤᠳᠤᠷᠠᠬᠢ ᠨᠡᠯᠢᠶᠡᠳ ᠬᠡᠳᠤᠨ ᠵᠤᠶᠢᠯ ᠢ ᠡᠳ᠋ᠰᠢᠬᠦᠯᠵᠤ ᠡᠳ᠋ᠯᠡᠬᠦ ᠪᠤᠯᠤᠬᠰᠡᠨ ᠪᠠᠶᠢᠬᠤ ᠡ︕ ᠤᠴᠢᠷ ᠨᠢ ᠬᠤᠭᠤᠯᠠ ᠬᠦᠨᠡᠰᠤᠨ ᠤ ᠢᠷᠡᠯᠳᠠ ᠳᠤᠨᠢ ᠤᠯᠠᠭᠠᠨ ᠢᠳᠡᠬᠡᠨ ᠢ ᠭᠠᠷᠭᠠᠪᠠᠯ ᠴᠠᠭᠠᠨ ᠢᠳᠡᠬᠡᠨ ᠪᠤᠯᠬᠤ ᠳᠤ  ᠤᠷᠤᠰᠢᠨ᠎ᠠ᠃ ᠨᠡᠩ ᠴᠦ ᠬᠤᠷᠤᠳ ᠢᠳᠡᠵᠤ ᠪᠠᠶᠢᠬᠰᠡᠨ ᠢᠶᠠᠷ ᠦᠵᠡᠬᠦ ᠳᠤ ᠡᠳᠡᠬᠡᠷ ᠵᠤᠶᠢᠯᠡᠰ ᠪᠠᠶᠢᠵᠤ ᠪᠠᠶᠢᠬᠰᠡᠨ ᠢ  ᠨᠤᠳᠠᠯᠠᠵᠤ ᠪᠤᠢ᠃ ︽酪︾ ᠭᠡᠳᠡᠭ ᠦᠰᠦᠭ ᠢ ᠬᠢᠳᠠᠳ ᠬᠡᠯᠡᠨ ᠤ  ᠲᠤᠯᠢ ᠨᠤᠭᠤᠳ ᠲᠤ ᠦᠬᠡᠷ᠂  ᠬᠤᠨᠢ᠂ ᠠᠳᠤᠭᠤᠨ ᠤ ᠰᠦᠨ ᠢᠶᠠᠷ ᠬᠢᠭᠰᠡᠨ ᠬᠦᠰᠢᠭᠡᠵᠤ ᠨᠢᠬᠳᠠᠷᠠᠭᠤᠯᠤᠬᠰᠡᠨ ᠢᠳᠡᠬᠡᠨ︾ ᠭᠡᠵᠤ ᠬᠡᠯᠡᠵᠦ ᠪᠤᠢ᠃ ᠡᠶᠢᠮᠤ ᠬᠦᠰᠢᠭᠡᠵᠤ ᠨᠢᠬᠳᠠᠷᠠᠭᠤᠯᠤᠬᠰᠡᠨ ᠵᠤᠶᠢᠯᠡᠰ ᠴᠠᠭᠠᠨ ᠢᠳᠡᠬᠡᠨ ᠤ ᠲᠤᠳᠤᠷ᠎ᠠ ᠤᠯᠠᠨ ᠵᠤᠶᠢᠯ ᠪᠤᠢ᠃ ᠲᠤᠬᠠᠶᠢᠯᠠᠪᠠᠯ᠄ ᠬᠤᠷᠤᠳ᠂ ᠪᠢᠰᠢᠯᠠᠭ᠂ ᠡᠭᠡᠯᠵᠢᠭ᠂ ᠠᠭᠠᠷᠤᠯ᠂ ᠰᠢᠬᠦᠷᠮᠡᠭ   ᠁ ᠬᠡᠬᠦ ᠮᠡᠳᠤ᠃ ᠬᠢᠳᠠᠳ ᠰᠤᠷᠪᠤᠯᠵᠢᠰ ᠤᠨ ᠡᠨᠡ  ᠬᠦ ᠬᠠᠪᠳᠠᠭᠠᠶᠢᠷᠠᠭᠤᠯᠤᠨ ᠲᠡᠮᠳᠡᠭᠯᠡᠭᠰᠡᠨ ᠵᠤᠶᠢᠯ ᠠᠴᠠ ᠡᠳᠡᠭᠡᠷ ᠨᠠᠷᠢᠨ ᠵᠤᠶᠢᠯᠡᠰ ᠢ ᠤᠯᠵᠤ ᠬᠠᠷᠠᠬᠤ ᠦᠬᠡᠢ᠂ ᠬᠠᠭᠤᠴᠢ ᠰᠤᠳᠤᠯᠤᠯ ᠤᠨ ᠲᠠᠯ᠎ᠠ ᠪᠠᠷ ᠴᠤ ᠡᠶᠢᠮᠤ ᠮᠡᠳᠡᠭᠡ ᠰᠦᠪᠡᠭᠴᠢ ᠬᠠᠷᠠᠬᠳᠠᠬᠰᠡᠨ ᠦᠬᠡᠢ᠃ ᠪᠤᠳᠤᠬᠤ ᠳᠤ ᠡᠳᠡᠭᠡᠷ ᠤᠨ ᠲᠤᠳᠤᠷᠠᠬᠢ ᠨᠡᠯᠢᠶᠡᠳ ᠵᠤᠶᠢᠯᠡᠰ ᠢ ᠡᠳᠡᠯᠠᠵᠤ ᠪᠠᠶᠢᠬᠰᠡᠨ ᠪᠠᠶᠢᠬᠤ ᠡ᠃    ᠡᠬᠦᠨ ᠤ ᠵᠡᠷᠬᠡ ᠪᠠᠷ ᠬᠢᠳᠠᠨᠴᠤᠳ ᠴᠦ ᠠᠮᠤ ᠲᠠᠷᠢᠶ᠎ᠠ ᠲᠠᠷᠢᠵᠤ ᠬᠤᠭᠤᠯᠠ ᠬᠦᠨᠡᠰᠤ ᠪᠤᠯᠭᠠᠵᠤ ᠪᠠᠶᠢᠵᠡᠢ᠃ ᠬᠠᠭᠤᠴᠢ ᠰᠤᠳᠤᠯᠤᠯ ᠤᠨ ᠤᠯᠳᠠᠪᠤᠷᠢ ᠪᠠ ᠰᠤᠷᠪᠤᠯᠵᠢᠰ ᠤᠨ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠪᠠᠯ ᠠᠳᠡᠬᠢ  ᠬᠦᠮᠤᠰ ᠰᠢᠨ᠎ᠠ ᠴᠢᠯᠠᠭᠤᠨ ᠵᠡᠪᠰᠡᠭ ᠤᠨ ᠡᠬᠢᠨ ᠤ ᠦᠶ᠎ᠡ ᠠᠴᠠ ᠲᠠᠷᠢᠶᠠᠯᠠᠵᠤ ᠪᠠᠶᠢᠬᠰᠡᠨ ᠪᠦᠭᠡᠳ ᠦᠬᠤᠸᠠᠨ ᠰᠢᠶᠠᠨᠪᠢ ᠶᠢᠨ ᠦᠶ᠎ᠡ  ᠳᠤ ᠮᠤᠩᠭᠤᠯ ᠠᠮᠤ᠂ ᠰᠢᠯᠤᠬᠡᠢ᠂ ᠰᠠᠭᠠᠭ ᠢ ᠨᠠᠮᠤᠬᠯᠠᠨ ᠲᠠᠷᠢᠳᠠᠭ ᠪᠠᠶᠢᠨ᠎ᠠ᠃ ᠰᠦᠩ ᠤᠯᠤᠰ ᠤᠨ ᠡᠯᠴᠢᠳ ᠤᠨ ᠲᠡᠮᠳᠡᠭᠯᠡᠯ ᠳᠤ ᠬᠢᠳᠠᠨᠴᠤᠳ ︽ᠦᠷ᠎ᠡ ᠪᠠᠨ ᠴᠦᠮ ᠳᠡᠯᠠᠩ ᠳᠡᠭᠡᠷ᠎ᠡ ᠠᠨᠤ ᠰᠠᠴᠤᠵᠤ᠂ ᠰᠠᠯᠬᠢᠨ ᠢᠶᠠᠷ ᠡᠯᠡᠰᠤ ᠶᠢ ᠦᠯᠢᠶᠡᠯᠭᠡᠨ ᠲᠠᠷᠤᠮᠤᠢ︾ ᠭᠡᠵᠤ ᠬᠢᠳᠠᠨᠴᠤᠳ ᠤᠨ ᠮᠤᠩᠭᠤᠯ ᠰᠢᠯᠤᠬᠡᠢ ᠨᠠᠮᠠᠬᠠᠯᠠᠨ ᠲᠠᠷᠢᠳᠠᠭ ᠢ ᠳᠡᠮᠳᠡᠭᠯᠡᠵᠡᠢ᠃ ᠳᠡᠬᠦᠨ ᠢ  ᠪᠤᠯᠪᠠᠰᠤᠷᠠᠭᠤᠯᠵᠤ ᠪᠠᠶᠢᠬᠰᠡᠨ ᠲᠤᠬᠠᠢ ᠰᠢᠭᠤᠳ ᠲᠤᠳᠤᠷᠬᠠᠢ  ᠮᠡᠳᠡᠭᠡ ᠪᠠᠶᠢᠬᠤ ᠦᠬᠡᠢ᠂ ᠭᠡᠪᠠᠴᠤ ᠬᠢᠳᠠᠨᠴᠤᠳ ᠯᠤᠭ᠎ᠠ ᠠᠵᠤ ᠠᠬᠤᠢ ᠶᠢᠨ ᠬᠡᠯᠪᠡᠷᠢ ᠨᠢ ᠠᠳᠠᠯᠢ ᠲᠦᠪᠡᠳᠴᠤᠳ ᠤᠨ ᠮᠤᠩᠭᠤᠯ ᠠᠮᠤ ᠴᠠᠶᠢᠯᠭᠠᠵᠤ ᠪᠠᠶᠢᠬᠰᠡᠨ ᠲᠤᠬᠠᠢ ︽ᠮᠤᠳᠤᠨ ᠢᠶᠠᠷ ᠮᠠᠨᠴᠤ ᠬᠢᠵᠤ᠂ ᠳ᠋ᠦᠨᠵᠡ ᠶᠢ ᠣᠬᠳᠤᠯᠤᠨ ᠤᠭᠤᠷ ᠬᠢᠮᠤᠢ︾ ᠭᠡᠵᠤ ᠵᠠᠷᠢᠮ ᠰᠤᠷᠪᠤᠯᠵᠢᠰ ᠲᠤ ᠲᠡᠮᠳᠡᠭᠯᠡᠵᠦ ᠪᠤᠢ᠂ ᠡᠬᠦᠨ ᠠᠴᠠ ᠦᠵᠡᠪᠠᠯ ᠬᠢᠳᠠᠨᠴᠤᠳ ᠪᠠᠰᠠ ᠤᠭᠤᠷ ᠮᠠᠨᠴᠤ ᠪᠠᠷ ᠬᠠᠷ᠎ᠠ ᠪᠤᠳᠠᠭ᠎ᠠ ᠪᠠᠨ ᠴᠠᠶᠢᠯᠭᠠᠵᠤ ᠪᠠᠶᠢᠬᠰᠡᠨ ᠢ ᠵᠦᠢᠴᠢᠯᠡᠨ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ︽ᠯᠢᠶᠣᠤ ᠤᠯᠤᠰ ᠤᠨ ᠰᠤᠳᠤᠷ︾ ᠲᠤ ᠄ ︽ᠬᠤᠭᠤᠯᠠ ᠬᠦᠨᠡᠰᠦ ᠡᠪᠡᠰᠤ ᠪᠤᠷᠳᠤᠭᠠᠨ   ᠤ ᠢᠷᠡᠯᠳᠠ ᠠᠨᠤ ᠡᠬᠦᠨ ᠳᠤᠷ ᠠᠬᠤ ᠪᠤᠯᠡᠢ︾  ᠭᠡᠰᠡᠨ ᠲᠡᠮᠳᠡᠭᠯᠡᠯ ᠢ ᠬᠢᠳᠠᠳ ᠢᠶᠠᠷ 糗粮刍茭 道在是矣︾ᠭᠡᠵᠤ ᠲᠡᠮᠳᠡᠭᠯᠡᠵᠦ ᠪᠤᠢ᠃ ᠡᠬᠦᠨ ᠳᠤ 糗 ᠭᠡᠵᠤ ᠬᠠᠭᠤᠷᠠᠢ ᠬᠦᠨᠡᠰᠤ ᠶᠢ ᠭᠡᠯᠡᠵᠤ ᠪᠠᠶᠢᠳᠠᠭ  ᠃ ᠬᠢᠳᠠᠳ ᠬᠡᠯᠡᠨ ᠤ ︽ᠦᠬᠡᠰ ᠤᠨ ᠳᠠᠯᠡᠢ︾ ︵辞海︶ ᠲᠤᠯᠢ ᠳᠤ ᠡᠨᠡ糗 ᠬᠡᠳᠡᠭ ᠦᠬᠡ ᠶᠢ ᠬᠠᠭᠤᠷᠠᠵᠤ ᠪᠤᠯᠭᠤᠬᠰᠡᠨ ᠠᠮᠤ ᠪᠤᠭᠤᠳᠠᠢ ᠵᠡᠷᠬᠡ ᠦᠷ᠎ᠡ ᠲᠠᠷᠢᠶᠠᠨ ᠢ ᠬᠡᠯᠡᠮᠤᠢ᠂ ᠵᠠᠷᠢᠮ ᠢ ᠨᠢ ᠤᠭᠤᠷᠳᠠᠵᠤ ᠪᠦᠬᠦᠯᠢ ᠪᠠᠷ ᠨᠢ ᠴᠠᠶᠢᠯᠭᠠᠨ᠂ ᠵᠠᠷᠢᠮ ᠢ ᠨᠢ ᠤᠭᠤᠷᠳᠠᠨ ᠲᠠᠯᠬ᠎ᠠ ᠪᠤᠯᠭᠠᠳᠠᠭ ᠬᠡᠵᠤ ᠲᠠᠶᠢᠯᠪᠤᠷᠢᠯᠠᠵᠡᠢ᠃ ᠡᠨᠡ ᠨᠢ ᠶᠠᠭ ᠮᠤᠩᠭᠤᠯᠴᠤᠳ ᠤᠨ ᠬᠠᠭᠤᠷᠠᠬᠰᠡᠨ ᠠᠮᠤ᠂ ᠬᠠᠭᠤᠷᠠᠬᠰᠡᠨ ᠠᠮᠤ ᠶᠢᠨ ᠳᠠᠯᠬ᠎ᠠ ᠵᠠᠷᠮ᠎ᠠ ᠲᠠᠢ ᠠᠳᠠᠯᠢ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠪᠠᠯ ᠬᠢᠳᠠᠨᠴᠤᠳ ᠬᠠᠭᠤᠷᠠᠬᠰᠡᠨ ᠠᠮᠤ ᠭᠠᠷᠭᠠᠵᠤ ᠢᠳᠡᠬᠦ ᠪᠤᠶᠤ ᠬᠠᠭᠤᠷᠠᠬᠰᠡᠨ ᠠᠮᠤ ᠶᠢᠨ ᠲᠠᠯᠬ᠎ᠠ  ᠵᠠᠷᠮ᠎ᠠ ᠪᠠᠨ ᠰᠦ ᠠᠶᠢᠷᠠᠭ ᠲᠠᠭᠠᠨ ᠬᠤᠳᠬᠤᠵᠤ ᠢᠳᠠᠵᠤ ᠪᠠᠶᠢᠬᠰᠡᠨ ᠪᠤᠯᠤᠳᠠᠢ᠃ ᠬᠡᠪᠠᠴᠤ ᠬᠠᠭᠤᠴᠢ ᠰᠤᠳᠤᠯᠤᠯ ᠤᠨ ᠮᠠᠯᠳᠠᠯᠭ᠎ᠠ ᠪᠠᠷ ᠬᠠᠷ᠎ᠠ ᠮᠤᠩᠭᠤᠯ ᠠᠮᠤ ᠶᠢᠨ ᠬᠤᠯᠳᠠᠰᠤ ᠤᠯᠳᠠᠬᠰᠡᠨ ᠠᠴᠠ ᠦᠬᠡᠷ᠎ᠠ ᠴᠠᠶᠢᠯᠭᠠᠬᠰᠡᠨ ᠮᠤᠩᠭᠤᠯ ᠠᠮᠤ ᠪᠠᠷ ᠰᠢᠩᠭᠡᠨ ᠪᠤᠳᠠᠭ᠎ᠠ ᠴᠢᠨᠠᠵᠤ ᠢᠳᠡᠳᠡᠭ ᠬᠡᠰᠡᠨ ᠰᠤᠷᠪᠤᠯᠵᠢᠰ ᠤᠨ ᠲᠡᠮᠳᠡᠭᠯᠡᠯ ᠪᠤᠢ᠃ ᠡᠬᠦᠨ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠨᠠᠷᠢᠮᠤ᠂ ᠰᠢᠯᠤᠬᠡᠢ ᠶᠢ ᠴᠤ ᠴᠢᠨᠠᠵᠤ ᠢᠳᠠᠵᠤ ᠪᠠᠶᠢᠵᠡᠢ᠃ ᠤᠮᠠᠷᠠᠳᠤ ᠰᠦᠩ ᠤᠯᠤᠰ ᠤᠨ ᠠᠯᠠᠳᠠᠷᠳᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠳᠠᠨ ᠴᠧᠨ ᠺᠦᠸᠧ ᠯᠢᠶᠤᠤ ᠤᠯᠤᠰ ᠲᠤ ᠡᠯᠴᠢᠯᠡᠭᠡᠳ ᠪᠢᠴᠢᠭᠰᠡᠨ ︽ᠬᠢᠳᠠᠨ   ᠳᠤ ᠡᠯᠴᠢᠯᠡᠭᠰᠡᠨ ᠵᠢᠷᠤᠭ ᠤᠨ ᠬᠠᠭᠤᠯᠪᠤᠷᠢ︾ ︵沈括著： ︽使虏图抄︾︶ ᠭᠡᠳᠡᠭ ᠨᠤᠮ ᠳᠠᠭᠠᠨ ᠬᠢᠳᠠᠨᠴᠤᠳ ︽ᠵᠠᠮᠨᠠᠪᠠᠰᠤ ᠮᠤᠷᠢ ᠤᠨᠤᠮᠤᠢ᠂ ᠢᠳᠡᠬᠦ ᠢᠨᠤ ᠦᠬᠡᠷ ᠬᠤᠨᠢᠨ ᠤ ᠮᠢᠬ᠎ᠠ ᠬᠢᠭᠡᠳ ᠰᠦ ᠬᠤᠷᠤᠳ᠂ ᠲᠡᠬᠦᠨ ᠤ ᠠᠷᠠᠰᠤ ᠶᠢ ᠡᠮᠤᠰᠤᠨ ᠵᠠᠪᠰᠡᠷ ᠠᠨᠤ ᠬᠠᠭᠤᠷᠠᠬᠰᠡᠨ ᠠᠮᠤ ᠶᠢᠨ ᠰᠢᠩᠬᠡᠨ ᠪᠤᠳᠠᠭ᠎ᠠ ᠢᠳᠡᠮᠤᠢ︾ ᠬᠡᠵᠤ ᠬᠢᠳᠠᠨᠴᠤᠳ ᠤᠨ ᠮᠤᠩᠭᠤᠯ ᠠᠮᠤ ᠪᠠᠷ ᠰᠢᠩᠭᠡᠨ ᠪᠤᠳᠠᠭ᠎ᠠ ᠴᠢᠨᠠᠵᠤ ᠢᠳᠡᠳᠡᠭ ᠲᠤᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠲᠠᠳᠡ ᠴᠠᠭ ᠤᠨ ᠬᠤᠭᠤᠯᠠ ᠳᠠᠭᠠᠨ ᠰᠢᠩᠬᠡᠨ ᠪᠤᠳᠠᠭ᠎ᠠ ᠢᠳᠡᠳᠡᠭ ᠢᠶᠠᠷ ᠪᠠᠷᠠᠬᠤ ᠦᠬᠡᠢ ᠲᠠᠶᠢᠬᠡᠤ ᠶᠢᠨ ᠮᠡᠨᠳᠤᠯᠡᠭᠰᠡᠨ ᠡᠳᠤᠷ ᠤᠨ ᠨᠠᠶᠢᠷ ᠳᠡᠭᠡᠷ᠎ᠠ ᠴᠦ ᠬᠦᠮᠤᠰ ᠢ ᠶᠡᠬᠡᠪᠡᠷ ᠲᠠᠶᠢᠯᠠᠬᠤᠢ ᠳᠤᠷ ︽ ᠰᠢᠩᠬᠡᠨ ᠪᠤᠳᠠᠭᠠᠨ︾ ᠤ ᠠᠶᠠᠭ᠎ᠠ ᠵᠦᠷᠢᠯᠳᠤᠮᠤᠢ ᠬᠡᠵᠤ ᠲᠠᠮᠳᠡᠭᠡᠯᠵᠤ ᠪᠤᠢ᠃ ᠲᠡᠭᠡᠪᠠᠯ ᠬᠢᠳᠠᠨᠴᠤᠳ ᠤᠨ  ᠢᠳᠡᠳᠡᠭ ᠰᠢᠩᠬᠡᠨ ᠪᠤᠳᠠᠭ᠎ᠠ ᠨᠢ ᠬᠢᠳᠠᠳ ᠤᠨ ᠢᠳᠡᠳᠡᠭ ᠰᠢᠩᠭᠡᠨ ᠪᠤᠳᠠᠭ᠎ᠠ ᠤᠤ︖ ᠬᠡᠪᠠᠯ ᠲᠠᠶᠢᠮᠤ ᠪᠢᠰᠢ ᠬᠠᠷᠢᠨ ᠮᠢᠬ᠎ᠠ ᠬᠦᠰᠬᠦᠯᠡᠭᠰᠡᠨ ᠴᠠᠭ᠎ᠠ ᠲᠠᠪᠤᠰᠤ ᠲᠠᠢ ᠰᠢᠩᠬᠡᠨ ᠪᠤᠳᠠᠭ᠎ᠠ  ᠪᠤᠯᠤᠨ᠎ᠠ᠃ ᠣᠮᠠᠷᠠᠳᠤ  ᠰᠦᠩ ᠤᠯᠤᠰ ᠤᠨ ᠬᠦᠮᠤᠨ ᠮᠸᠢ ᠱᠧᠩ ᠢᠤᠢ ᠶᠢᠨ ︽ᠵᠢᠩ   ᠴᠦᠨ ᠢ ᠬᠦᠷᠭᠡᠵᠤ ᠤᠮᠠᠷᠠᠰᠢ ᠡᠯᠴᠢᠯᠡᠬᠦᠯᠤᠭ᠍ᠰᠡᠨ ᠢᠨᠤ︾ ᠭᠡᠳᠡᠭ ᠰᠢᠯᠦᠭ ᠲᠡᠭᠡᠨ ︽ᠲᠦᠷᠤ ᠶᠢᠨ ᠢᠳᠡᠬᠦᠯᠤᠭ᠍ᠰᠡᠨ ᠴᠠᠭ᠎ᠠ ᠲᠠᠢ ᠪᠤᠳᠠᠭ᠎ᠠ ︵ᠰᠢᠩᠭᠡᠨ  ᠪᠤᠳᠠᠭ᠎ᠠ︶ ᠶᠢᠨ ᠠᠶᠠᠭᠠᠨ ᠲᠡᠭᠡᠷ᠎ᠠ ᠨᠢ ᠮᠦᠰᠤ ᠬᠦᠯᠳᠠᠵᠤ᠂ ᠰᠦᠨᠢ ᠶᠢᠨ ᠬᠦᠨ᠎ᠡ ᠢᠰᠡᠬᠡᠢ ᠭᠡᠷ ᠲᠤ ᠭᠡᠪᠳᠡᠷᠤᠨ ᠰᠠᠷᠠᠨ ᠡᠯᠡᠰᠤ ᠶᠢ ᠭᠡᠶᠢᠬᠦᠯᠤᠮᠤᠢ︾ ᠬᠡᠵᠤ ᠰᠢᠯᠤᠭ᠍ᠯᠡᠨ ᠮᠦᠨ ᠬᠢᠳᠠᠨᠴᠤᠳ ᠤᠨ ᠴᠠᠭ᠎ᠠ ᠲᠠᠢ ᠰᠢᠩᠭᠡᠨ ᠪᠤᠳᠠᠭ᠎ᠠ ᠶᠢ ᠲᠤᠷᠠᠳᠤᠬᠰᠡᠨ ᠪᠠᠶᠢᠨ᠎ᠠ᠃ ᠰᠦᠩ ᠤ᠊ ‍ᠯᠤᠰ  ᠤᠨ ᠬᠦᠮᠤᠨ ᠵᠤ᠋ ᠢᠤᠢ ᠶᠢᠨ ᠪᠢᠴᠢᠭᠰᠡᠨ ︽ᠫᠢᠩ ᠵᠸᠤ ᠶᠢᠨ ᠲᠤᠬᠠᠢ ᠦᠬᠦᠯᠡᠬᠦᠢ ᠢᠨᠤ︾ ᠭᠡᠳᠡᠭ ᠨᠤᠮ ᠳᠤ᠄ ︽ᠤᠷᠢᠳᠤ ᠶᠢᠨ ᠬᠦᠩ ᠯᠢᠶᠣᠤ ᠤᠯᠤᠰ ᠲᠤᠷ ᠬᠦᠷᠬᠦᠢ ᠡᠳᠤᠷ᠎ᠡ᠂ ᠨᠢᠭᠡ ᠠᠶᠠᠭ᠎ᠠ ᠰᠦ  ᠲᠠᠢ ᠰᠢᠩᠭᠡᠨ ᠪᠤᠳᠠᠭ᠎ᠠ ᠤᠷᠤᠭᠤᠯᠵᠤᠬᠤᠢ᠂ ᠦᠨᠡᠭᠡᠷ ᠡᠷᠬᠢᠮ᠂ ᠭᠡᠪᠠᠴᠤ ᠦᠭᠡᠬᠦ ᠲᠤᠰᠤ ᠬᠦᠮᠡᠯᠳᠤᠬᠡᠳ ᠠᠮᠠᠨ ᠠᠴᠠ ᠤᠨᠠᠮ᠎ᠠ︾ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠲᠡᠮᠳᠡᠭᠯᠡᠯ ᠨᠢ ᠲᠠᠷᠤᠢ ᠬᠢᠳᠠᠨᠴᠤᠳ ᠤᠳᠣ ᠶᠢᠨ ᠮᠤᠩᠭᠤᠯᠴᠤᠳ ᠲᠠᠢ ᠠᠳᠠᠯᠢ ᠮᠢᠬ᠎ᠠ ᠬᠦᠰᠬᠦᠯᠡᠭᠰᠡᠨ ᠴᠠᠭ᠎ᠠ ᠲᠠᠪᠤᠰᠤ ᠲᠠᠢ ᠰᠢᠩᠭᠡᠨ ᠪᠤᠳᠠᠭ᠎ᠠ ᠢᠳᠡᠳᠡᠭ ᠢ ᠬᠡᠷᠡᠴᠢᠯᠡᠵᠤ ᠪᠤᠢ᠃    ︽ᠯᠢᠶᠣᠤ ᠤᠯᠤᠰ ᠤᠨ ᠰᠤᠳᠤᠷ︾ ᠲᠤ ᠬᠢᠳᠠᠨᠴᠤᠳ ︽ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠲᠤᠯᠤᠭᠠᠨ ᠤ ᠬᠦᠮᠤᠨ ᠤ ᠡᠳᠤᠷ ᠬᠠᠭᠠᠷᠢᠬᠰᠡᠨ ᠪᠤᠳᠪᠤ  ᠢᠳᠡᠵᠤ᠂ ᠲᠡᠬᠦᠨ ᠢᠶᠠᠨ ᠲᠡᠭᠷᠢ ᠶᠢ ᠤᠳᠤᠬᠤ ᠬᠡᠵᠤ ᠬᠡᠯᠡᠮᠤᠢ︾ ᠬᠡᠰᠡᠨ ᠳᠡᠮᠳᠡᠭᠯᠡᠯ ᠪᠤᠢ᠂ ᠡᠬᠦᠨ ᠠᠴᠠ ᠬᠢᠳᠠᠨᠴᠤᠳ ᠪᠢᠳᠡᠬᠦᠨ ᠤ ᠦᠳᠡᠰᠢ ᠴᠠᠭᠠᠨ ᠬᠤᠨᠢᠨ ᠤ ᠨᠤᠭᠤᠰᠤᠨ ᠳᠤ ᠰᠢᠯᠤᠬᠡᠢ ᠪᠤᠳᠠᠭ᠎ᠠ ᠶᠢ ᠨᠤᠬᠤᠵᠤ ᠪᠤᠭᠤᠷᠰᠤᠭ ᠪᠦᠭᠡᠮᠯᠡᠭᠡᠳ ᠲᠤᠭᠤᠨᠤ ᠪᠠᠷ ᠢᠶᠠᠨ ᠭᠠᠳᠠᠬᠰᠢ ᠰᠢᠳᠡᠳᠡᠭ ᠬᠡᠵᠤ  ᠲᠡᠮᠳᠡᠭᠯᠡᠵᠤ ᠪᠤᠢ᠃ ᠪᠠᠰᠠ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠲᠠᠪᠤᠨ ᠳᠤ ᠠᠬᠢ ᠶᠢᠨ ᠪᠤᠭᠤᠷᠰᠤᠭ ᠢᠳᠠᠨ᠎ᠡ ᠬᠡᠵᠤ ᠲᠡᠮᠳᠡᠭᠯᠡᠵᠢ᠃ ᠠᠳᠡ ᠲᠡᠮᠳᠡᠭᠯᠡᠨ ᠪᠦᠬᠦᠢ ᠬᠠᠭᠠᠷᠢᠬᠰᠡᠨ ᠪᠤᠤᠪᠤ ᠨᠢ ᠵᠠᠷᠢᠮ᠂ ᠵᠤᠤ ᠤᠳᠠ ᠶᠢᠨ ᠮᠤᠩᠭᠤᠯᠴᠤᠳ ᠤᠨ ᠢᠳᠡᠳᠡᠭ ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ ᠤᠨ ᠬᠠᠭᠠᠷᠢᠬᠰᠡᠨ ᠪᠤᠤᠪᠤ ᠪᠠᠶᠢᠬᠤ   ᠳᠠᠭᠠᠨ ᠲᠠᠭᠠᠷᠠᠨ᠎ᠠ᠃ ᠰᠢᠯᠤᠬᠡᠢ ᠪᠤᠳᠠᠭ᠎ᠠ ᠶᠢ ᠴᠠᠭᠠᠨ ᠬᠤᠨᠢᠨ ᠤ ᠨᠤᠭᠤᠰᠤ ᠪᠠᠷ ᠬᠡᠪᠯᠡᠳᠡᠭ ᠮᠤᠩᠭᠤᠯ ᠠᠮᠤ ᠶᠢᠨ ᠵᠠᠷᠢᠮ ᠤᠨ ᠪᠤᠭᠤᠷᠰᠤᠭ ᠪᠤᠯᠤᠨ᠎ᠠ᠃  ᠡᠷᠳᠡ ᠳᠡᠭᠡᠨ ᠳᠡᠬᠦᠨ ᠢ ᠪᠦᠮᠪᠤᠬᠡᠯᠡᠵᠤ ᠬᠢᠵᠤ ᠪᠠᠶᠢᠬᠰᠡᠨ ᠪᠠᠶᠢᠵᠡᠢ᠃ ᠬᠢᠳᠠᠨᠴᠤᠳ ᠤᠨ ᠴᠠᠷᠴᠠᠭᠠᠬᠰᠡᠨ ᠪᠤᠳᠠᠭ᠎ᠠ ᠨᠢ ᠶᠠᠭ ᠡᠶᠢᠮᠤ ᠪᠠᠶᠢᠬᠰᠡᠨ ᠳᠠᠭᠠᠨ ᠲᠠᠭᠠᠷᠠᠨ᠎ᠠ᠃ ᠬᠢᠳᠠᠨᠴᠤᠳ ᠤᠨ ᠰᠠᠭᠠᠭ ᠤᠨ ᠭᠤᠯᠢᠷ ᠢᠳᠠᠵᠤ ᠪᠠᠶᠢᠬᠰᠡᠨ ᠡᠰᠡᠬᠦ ᠲᠤᠬᠠᠢ ᠬᠢᠳᠠᠳ ᠬᠡᠯᠡᠨ ᠤ ᠲᠦᠪ ᠰᠤᠳᠤᠷ ᠤᠳ ᠲᠤ ᠲᠡᠮᠳᠡᠭᠯᠡᠯ ᠠᠯᠠᠭ᠎ᠠ᠃ ᠬᠡᠪᠠᠴᠤ ᠬᠠᠭᠤᠴᠢ  ᠰᠤᠳᠤᠯᠤᠬᠴᠢᠳ  ᠯᠢᠶᠣᠤ ᠤᠯᠤᠰ ᠤᠨ ᠲᠡᠭᠡᠳᠤ ᠨᠡᠶᠢᠰᠯᠡᠯ ᠤᠨ ᠬᠢᠳᠠᠳ ᠬᠤᠳᠠ ᠠᠴᠠ ᠪᠤᠭᠤᠳᠠᠢ᠂ ᠰᠠᠭᠠᠭ᠂ ᠬᠤᠨᠤᠭ ᠠᠮᠤ ᠤᠯᠤᠬᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠲᠠᠷᠤᠢ ᠰᠠᠭᠠᠭ ᠤᠨ ᠭᠤᠯᠢᠷ ᠢᠳᠡᠵᠦ ᠪᠠᠶᠢᠬᠰᠡᠨ ᠤ ᠭᠡᠷᠡᠴᠢ ᠮᠦᠨ᠃ ᠪᠤᠳᠤᠬᠤ ᠳᠤ ᠲᠡᠬᠦᠪᠡᠷ ᠪᠤᠭᠤᠷᠰᠤᠭ ᠬᠠᠭᠠᠷᠢᠵᠤ ᠢᠳᠡᠬᠦ ᠪᠤᠶᠤ ᠮᠢᠬᠠᠨ ᠱᠦᠯᠤᠨ ᠳᠡᠭᠡᠨ ᠲᠠᠰᠤᠯᠵᠤ ᠱᠦᠯᠤ ᠲᠠᠢ ᠭᠤᠯᠢᠷ ᠬᠤᠭᠤᠯᠠ ᠪᠤᠯᠭᠠᠨ ᠢᠳᠠᠵᠤ ᠪᠠᠶᠢᠬᠰᠡᠨ ᠪᠠᠶᠢᠬᠤ ᠡ᠃ ᠤᠴᠢᠷ ᠨᠢ ᠬᠢᠳᠠᠨᠴᠤᠳ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠵᠠᠩ ᠦᠢᠯᠡ  ᠣᠳᠣ ᠶᠢᠨ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠤᠨ ᠵᠠᠩ ᠤᠶᠢᠯᠡ ᠲᠠᠢ  ᠶᠡᠭᠡ ᠲᠤᠬᠢᠷᠠᠯᠴᠠᠳᠠᠭ ᠤᠨᠴᠠᠯᠢᠭ ᠲᠠᠢ᠂ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠰᠠᠭᠠᠭ ᠤᠨ ᠭᠤᠯᠢᠷ ᠢ ᠢᠩᠬᠢᠵᠤ ᠢᠳᠡᠳᠡᠭ᠃ ᠡᠨᠡ ᠨᠢ ᠬᠢᠳᠠᠨᠴᠤᠳ ᠤᠨ ᠰᠠᠭᠠᠭ ᠤᠨ ᠭᠤᠯᠢᠷ ᠢ ᠢᠩᠬᠢᠵᠤ ᠪᠠᠵᠠᠭᠠᠵᠤ ᠢᠳᠠᠵᠤ ᠪᠠᠶᠢᠬᠰᠡᠨ ᠢ ᠲᠠᠮᠤ ᠪᠠᠷ ᠬᠡᠷᠡᠴᠢᠯᠠᠵᠤ ᠪᠤᠢ᠃ᠬᠢᠳᠠᠨᠴᠤᠳ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠲᠠᠪᠤᠨ ᠳᠤ ᠢᠳᠡᠳᠡᠭ ᠪᠤᠬᠠᠰ ︵渤海︶ ᠤᠨ ᠠᠬᠢ ᠶᠢᠨ ᠪᠤᠭᠤᠷᠰᠤᠭ ᠭᠡᠳᠡᠭ ᠨᠢ ᠢᠰᠡᠭᠡᠭᠰᠡᠨ ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ ᠲᠤ ᠴᠢᠨᠠᠬᠰᠡᠨ ᠪᠤᠷᠴᠠᠭ ᠢ ᠪᠠᠭᠯᠠᠵᠤ ᠵᠢᠩᠨᠡᠭᠰᠡᠨ ᠪᠦᠮᠪᠤᠭᠡᠯᠢᠭ ᠪᠤᠭᠤᠷᠰᠤᠭ ᠪᠤᠯᠤᠳᠠᠢ᠃ ᠡᠶᠢᠮᠤ ᠪᠤᠭᠤᠷᠰᠤᠭ ᠢ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠣᠳᠤ ᠪᠤᠯᠳᠠᠯ᠎ᠠ ᠡᠷᠬᠢᠮ ᠢᠳᠡᠬᠡᠨ ᠪᠤᠯᠭᠠᠨ ᠰᠢᠷ᠎ᠠ  ᠲᠤᠰᠤᠨ ᠳᠤ ᠲᠦᠷᠤᠵᠤ ᠢᠳᠡᠳᠡᠭ᠃ ᠪᠤᠳᠤᠬᠤ ᠳᠤ ᠡᠨᠡ  ᠬᠦ  ᠤᠯᠠᠮᠵᠢᠯᠠᠯᠳᠤ ᠪᠠᠵᠠᠭᠠᠯᠭ᠎ᠠ ᠨᠢ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠤᠨ ᠲᠤᠮᠳᠠ ᠬᠠᠳᠠᠭᠠᠯᠠᠬᠳᠠᠨ ᠦᠯᠡᠳᠡᠭᠰᠡᠨ ᠶᠤᠮ ᠪᠠᠶᠢᠨ᠎ᠠ᠃    ᠨᠡᠬᠦᠳᠡᠯᠴᠢᠳ ᠨᠤᠭᠤᠭ᠎ᠠ ᠵᠢᠮᠢᠰ ᠢᠳᠡᠬᠦ  ᠦᠬᠡᠢ ᠪᠢᠰᠢ᠂ ᠮᠦᠨ ᠢᠳᠡᠳᠡᠭ᠃ ᠮᠤᠩᠭᠤᠯᠴᠤᠳ ᠢᠶᠠᠷ ᠵᠢᠱᠢᠶᠡᠯᠡᠬᠦ  ᠳᠤ ᠬᠠᠯᠠᠭᠠᠢ᠂ ᠯᠤᠤᠯᠢ᠂ ᠬᠡᠷᠡᠰ᠂ ᠤᠰᠤᠨ ᠬᠠᠯᠠᠭᠠᠢ ᠮᠡᠳᠤᠰ ᠢᠶᠠᠷ ᠨᠤᠭᠤᠭ᠎ᠠ ᠭᠠᠷᠭᠠᠵᠤ ᠢᠳᠡᠳᠡᠭ ᠪᠦᠬᠡᠳ ᠦᠷᠢᠯ ᠂ ᠮᠤᠶᠢᠯ᠂ ᠤᠯᠠᠭᠠᠨ᠎ᠠ ᠲᠤᠯᠤᠭᠠᠨ᠎ᠠ ᠁ ᠬᠡᠬᠦ ᠮᠡᠳᠤ  ᠢᠳᠠᠵᠤ ᠪᠤᠯᠳᠠᠭ ᠬᠡᠬᠡᠷ᠎ᠠ ᠶᠢᠨ ᠵᠢᠮᠢᠰ ᠢ ᠴᠦᠮ ᠢᠳᠡᠳᠡᠭ ᠃ ᠬᠢᠳᠠᠨᠴᠤᠳ ᠴᠦ ᠪᠠᠰᠠ ᠡᠶᠢᠮᠤ ᠤᠯᠠᠮᠵᠢᠯᠠᠯ ᠪᠠᠶᠢᠵᠤ ᠪᠠᠶᠢᠵᠡᠢ᠃ ᠶᠧ  ᠯᠦᠩ ᠯᠢ ᠶᠢᠨ ︽ᠬᠢᠳᠠᠨ ᠤᠯᠤᠰ ᠤᠨ ᠲᠤᠪᠴᠢᠶᠠᠨ︾ ᠭᠡᠬᠦ ᠨᠤᠮ ᠳᠤ ᠯᠢᠶᠣᠤ ᠤᠯᠤᠰ ᠠᠴᠠ ᠰᠦᠩ ᠤᠯᠤᠰ ᠲᠤ ᠪᠡᠯᠩ  ᠪᠤᠯᠭᠠᠨ ᠬᠦᠷᠭᠡᠵᠤ ᠪᠠᠶᠢᠬᠰᠡᠨ ᠵᠤᠶᠢᠯᠡᠰ ᠲᠤ᠄ ︽ᠪᠠᠯ ᠳᠤ ᠲᠠᠷᠤᠵᠤ ᠬᠠᠳᠠᠭᠠᠬᠰᠡᠨ ᠠᠭᠤᠯᠠ ᠶᠢᠨ ᠵᠢᠮᠢᠰ ᠠᠷᠪᠡᠨ ᠠᠯᠢᠮ᠎ᠠ ᠶᠢᠨ ᠡᠭᠡᠳᠡᠭ ᠰᠠᠪᠠ᠂ ᠪᠠᠯ ᠳᠤ ᠲᠠᠷᠤᠬᠰᠡᠨ ᠠᠭᠤᠯᠠ ᠶᠢᠨ ᠵᠢᠮᠢᠰ ᠠᠷᠪᠠᠨ ᠰᠠᠪᠡᠭ᠂ ᠠᠭᠤᠯᠠ ᠶᠢᠨ ᠠᠯᠢᠮ᠎ᠠ ᠱᠠᠪᠳᠠᠯ᠎ᠠ ᠲᠦᠷᠪᠡᠨ ᠰᠠᠪᠡᠭ᠂ ᠰᠢᠳ ᠲᠠᠤᠯᠡᠢ ᠶᠢᠨ ᠪᠦᠬᠡᠷ᠎ᠠ᠂ ᠰᠠᠮᠤᠷ ᠤᠯᠠᠭᠠᠨ᠎ᠠ᠂ ᠬᠦᠷᠡᠩ ᠤᠯᠠᠭᠠᠨ᠎ᠠ᠂ ᠯᠧᠩ ᠯᠢ ᠠᠯᠢᠮ᠎ᠠ᠂ ᠠᠯᠢᠮ᠎ᠠ ᠬᠠᠳ ᠬᠤᠷᠢᠨ ᠠᠪᠳᠠᠷ᠎ᠠ᠂ ᠲᠤᠳᠤᠷᠭ᠎ᠠ ᠶᠢᠨ ᠭᠤᠯᠢᠷ ᠲᠠᠢ ᠬᠤᠯᠢᠵᠤ  ᠨᠤᠬᠤᠬᠰᠡᠨ ᠪᠠᠴᠢᠯᠠᠬᠰᠡᠨ  ᠮᠢ ᠯᠢ ᠠᠯᠢᠮ᠎ᠠ ︵面粳糜梨糖︶ ᠶᠢᠨ ᠪᠠᠵᠠᠮᠠᠭ ᠠᠷᠪᠡᠨ ᠠᠶᠠᠭ᠎ᠠ ᠬᠡᠵᠤ ᠲᠠᠮᠳᠡᠭᠡᠯᠵᠤ ᠪᠤᠢ᠃ ᠡᠳᠡᠭᠡᠷ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ  ᠴᠦᠮ ᠬᠢᠳᠠᠨ ᠤ ᠨᠤᠳᠤᠭ ᠲᠤ ᠤᠷᠭᠤᠳᠠᠭ᠂ ᠲᠡᠬᠦᠨ ᠢ ᠡᠨᠡ ᠮᠡᠳᠤ ᠲᠡᠬᠡᠳᠤ ᠬᠡᠮᠵᠢᠶ᠎ᠡ   ᠪᠠᠷ ᠡᠳ᠋ᠰᠢᠬᠦᠯᠵᠤ ᠪᠠᠶᠢᠬᠤ ᠠᠴᠠ ᠦᠵᠡᠪᠠᠯ ᠲᠡᠬᠦᠨ ᠢ ᠢᠳᠡᠬᠡᠨ ᠪᠤᠯᠭᠠᠨ ᠢᠳᠡᠭᠰᠡᠨ ᠲᠡᠤᠬᠡ ᠶᠡᠭᠡ ᠤᠷᠳᠤ ᠪᠠᠶᠢᠬᠰᠡᠨ ᠳᠠᠭᠠᠨ ᠲᠠᠭᠠᠷᠠᠨ᠎ᠠ᠃ ᠡᠶᠢᠮᠤ ᠠᠴᠠ  ᠬᠢᠳᠠᠨᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠣ ᠢᠳᠡᠬᠡᠨ ᠤᠮᠳᠠᠭᠠᠨ ᠳᠤ ᠭᠡᠭᠡᠷ᠎ᠠ  ᠶᠢᠨ ᠵᠢᠮᠢᠰ ᠪᠠᠶᠢᠵᠤ ᠪᠠᠶᠢᠯ᠎ᠠ ᠭᠡᠵᠤ ᠬᠡᠯᠡᠬᠦ ᠳᠤ ᠪᠤᠷᠤᠭᠤᠳᠠᠮᠠᠷ ᠵᠤᠶᠢᠯ ᠦᠬᠡᠢ᠃ ᠬᠢᠳᠠᠨᠴᠤᠳ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ ᠢ ᠢᠳᠠᠵᠤ ᠪᠠᠶᠢᠬᠰᠡᠨ ᠶᠤᠮ ᠪᠤᠯ ᠬᠡᠬᠡᠷ᠎ᠠ ᠶᠢᠨ ᠨᠤᠭᠤᠭ᠎ᠠ ᠶᠢ ᠢᠳᠠᠵᠤ  ᠪᠠᠶᠢᠬᠰᠡᠨ ᠨᠢ ᠴᠤ ᠮᠡᠳᠠᠭᠡᠵᠢ ᠶᠢᠨ ᠬᠡᠷᠡᠭ᠃ ᠭᠡᠳᠠᠯ᠎ᠠ ᠴᠤᠬᠤᠮ ᠶᠠᠮᠠᠷ ᠶᠠᠮᠠᠷ ᠬᠡᠬᠡᠷ᠎ᠠ ᠶᠢᠨ ᠨᠤᠭᠤᠭ᠎ᠠ ᠶᠢ ᠢᠳᠠᠵᠤ ᠪᠠᠶᠢᠬᠰᠡᠨ  ᠲᠤᠬᠠᠢ ᠰᠤᠷᠪᠤᠯᠵᠢᠰ ᠲᠤ ᠲᠤᠳᠤᠷᠬᠠᠢ ᠲᠠᠮᠳᠡᠭᠯᠡᠯ ᠪᠠᠶᠢᠬᠤ  ᠦᠬᠡᠢ  ᠂ ᠡᠶᠢᠮᠤ ᠠᠴᠠ ᠠᠳᠡ ᠶᠠᠭᠤ  ᠶᠠᠭᠤ ᠬᠡᠵᠤ ᠲᠤᠳᠤᠷᠬᠠᠢ ᠬᠡᠯᠡᠬᠦ ᠶᠢᠨ  ᠠᠷᠭ᠎ᠠ ᠦᠭᠡᠢ ᠪᠠᠶᠢᠨ᠎ᠠ᠃ ᠭᠡᠪᠠᠴᠤ ᠮᠤᠩᠭᠤᠯᠴᠤᠳ ᠤᠨ ᠡᠷᠳᠠ ᠬᠠᠭᠤᠴᠢᠳ ᠲᠤ ᠢᠳᠠᠵᠤ ᠪᠠᠶᠢᠬᠰᠡᠨ ᠭᠡᠭᠡᠷ᠎ᠠ ᠶᠢᠨ ᠨᠤᠭᠤᠭ᠎ᠠ ᠲᠠᠢ ᠵᠤᠶᠢᠴᠢᠯᠠᠵᠤ ᠦᠵᠡᠪᠠᠯ ᠭᠤᠭᠤᠳ᠂ ᠮᠡᠩᠬᠢᠷ᠂ ᠬᠦᠮᠡᠯᠢ᠂ ᠲᠤᠬᠳᠠᠳᠰᠤ ᠶᠢ ᠢᠳᠠᠵᠤ ᠪᠠᠶᠢᠯ᠎ᠠ ᠬᠡᠬᠦ ᠳᠤ   ᠲᠡᠮᠢ ᠪᠤᠷᠤᠭᠤᠳᠠᠮᠠᠷ ᠵᠤᠶᠢᠯ  ᠦᠬᠡᠢ᠃ ᠤᠴᠢᠷ ᠨᠢ ᠡᠳᠡᠭᠡᠷ ᠭᠡᠭᠡᠷ᠎ᠠ ᠶᠢᠨ ᠨᠤᠭᠤᠭ᠎ᠠ ᠬᠢᠳᠠᠨᠴᠤᠳ ᠤᠨ ᠤᠨᠠᠭᠠᠨ ᠨᠤᠳᠤᠭ  ᠲᠤ ᠤᠳᠣ ᠪᠤᠯᠳᠠᠯ᠎ᠠ ᠤᠷᠭᠤᠬᠰᠠᠭᠠᠷ ᠪᠠᠶᠢᠬᠤ ᠳᠤ ᠤᠷᠤᠰᠢᠨ᠎ᠠ᠃    ᠬᠢᠳᠠᠨᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠢᠳᠡᠬᠡᠨ ᠤᠮᠳᠠᠭᠠᠨ ᠢ ᠨᠠᠷᠢᠪᠴᠢᠯᠠᠨ ᠰᠢᠨᠵᠢᠯᠡᠵᠦ ᠦᠵᠡᠪᠠᠯ ᠴᠢᠯᠤᠬᠡᠯᠡᠭᠳᠡᠬᠦ ᠠᠴᠠ ᠡᠮᠤᠨ᠎ᠠ ᠵᠡᠬᠦᠨ ᠮᠤᠩᠭᠤᠯ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ  ᠵᠠᠩᠰᠢᠯ ᠲᠠᠢ ᠡᠭᠡᠭᠡ ᠠᠳᠠᠯᠢ ᠪᠠᠶᠢᠨ᠎ᠠ᠃ ᠤᠯᠠᠭᠠᠨ ᠢᠳᠡᠬᠡᠨ ᠢ ᠪᠠᠵᠠᠭᠠᠬᠤ ᠨᠢ ᠪᠦᠬᠦ ᠮᠤᠩᠭᠤᠯᠴᠤᠳ ᠲᠠᠢ ᠶᠠᠭ ᠠᠳᠠᠯᠢ᠃ ᠮᠤᠩᠭᠤᠯ᠂ ᠰᠢᠯᠤᠬᠡᠢ᠂ ᠰᠠᠭᠠᠭ ᠢ ᠨᠠᠮᠤᠬᠯᠠᠵᠤ ᠲᠠᠷᠢᠬᠤ᠂ ᠮᠤᠩᠭᠤᠯ ᠠᠮᠤ ᠶᠢ ᠬᠠᠭᠤᠷᠴᠤ  ᠢᠳᠡᠬᠦ᠂ ᠮᠤᠩᠭᠤᠯ ᠠᠮᠤ ᠪᠠᠷ ᠬᠦᠰᠬᠦᠯᠡᠭᠰᠡᠨ ᠴᠠᠭ᠎ᠠ ᠲᠠᠪᠤᠰᠤ ᠲᠠᠢ ᠰᠢᠩᠬᠡᠨ ᠪᠤᠳᠠᠭ᠎ᠠ ᠴᠢᠨᠠᠵᠤ ᠢᠳᠡᠬᠦ᠂ ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ ᠢᠶᠠᠷ ᠪᠤᠭᠤᠷᠰᠤᠭ ᠬᠠᠭᠠᠷᠢᠵᠤ᠂ ᠪᠤᠭᠤᠷᠰᠤᠭ ᠵᠢᠩᠨᠡᠵᠤ ᠢᠳᠡᠬᠦ ᠨᠢ ᠴᠦᠮ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠤᠨ ᠬᠢ ᠲᠠᠢ ᠠᠪ ᠠᠳᠠᠯᠢ ᠪᠠᠶᠢᠨ᠎ᠠ᠃    ᠭᠡᠭᠡᠷ᠎ᠠ ᠶᠢᠨ ᠨᠤᠭᠤᠭ᠎ᠠ  ᠳᠡᠭᠦᠵᠤ ᠢᠳᠡᠬᠦ᠂ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ ᠢ ᠳᠡᠬᠦᠵᠤ ᠢᠳᠡᠬᠦ ᠪᠠ ᠭᠡᠭᠡᠷ᠎ᠠ ᠶᠢᠨ ᠵᠢᠮᠢᠰ ᠢ ᠡᠳ᠋ᠰᠢᠬᠦᠯᠬᠦ ᠨᠢ ᠮᠦᠨ ᠵᠡᠬᠦᠨ ᠮᠤᠩᠭᠤᠯᠴᠤᠳ ᠤᠨ ᠬᠢ ᠲᠠᠢ ᠠᠳᠠᠯᠢ  ᠪᠠᠶᠢᠨ᠎ᠠ᠃ᠡᠬᠦᠨ ᠠᠴᠠ ᠪᠢᠳᠠ᠂ ᠬᠢᠳᠠᠨᠴᠤᠳ ᠬᠢᠭᠡᠳ ᠮᠤᠩᠭᠤᠯᠴᠤᠳ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠰᠤᠶᠤᠯ ᠡᠬᠦᠰᠤᠯ ᠭᠠᠷᠤᠯ ᠤᠨ ᠲᠠᠯ᠎ᠠ ᠪᠠᠷ ᠦᠨᠳᠤᠰᠤ ᠨᠢᠭᠡᠳᠠᠢ ᠪᠦᠭᠡᠳ ᠤᠯᠠᠮᠵᠢᠯᠠᠯ ᠵᠠᠯᠭᠠᠮᠵᠢᠯᠠᠯ ᠤᠨ ᠬᠠᠷᠢᠴᠠᠭ᠎ᠠ ᠲᠠᠢ ᠭᠡᠳᠡᠭ ᠢ  ᠮᠠᠳᠡᠵᠤ ᠪᠤᠯᠤᠨ᠎ᠠ᠃    
 
ᠢᠷᠡᠯᠲᠡ᠄ ᠪᠦ᠂ ᠫᠧᠷᠯᠡᠢ ᠶᠢᠨ ︽ᠬᠢᠳᠠᠨᠴᠤᠳ ᠤᠨ ᠡᠳ᠋ ᠤᠨ ᠰᠤᠶᠤᠯ︾ ᠠᠴᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠤᠮ ᠲᠠᠢ ᠨᠦᠬᠦᠷᠯᠠᠪᠠᠯ ᠨᠢᠳᠦ ᠨᠡᠭᠡᠭᠡᠭᠳᠡᠨ᠎ᠠ
ᠬᠡᠷ ᠤᠨ ᠬᠦᠮᠤᠵᠢᠯ ᠤᠨ ᠲᠠᠪᠤᠨ ᠤᠬᠠᠮᠰᠠᠷ
ᠵᠢᠷᠠᠨ ᠣᠷᠬᠢᠵᠦ ᠳᠣᠭᠯᠠᠬᠤ
ᠠᠯᠲᠠᠨ ᠮᠡᠯᠡᠬᠡᠢ ᠣᠷᠣᠵᠣ ᠳᠣᠭᠯᠠᠬᠤ
ᠱᠠᠭ᠎ᠠ ᠨᠢᠰᠠᠯᠵᠣ ᠳᠣᠭᠯᠠᠬᠤ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号