ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
︵ᠨᠢᠭᠡ︶ ᠯᠢᠶᠣᠤ ᠤᠯᠤᠰ ᠤᠨ ᠬᠠᠭᠠᠨᠳᠤ ᠲᠦᠷᠤ ᠶᠢ ᠪᠠᠶᠢᠭᠤᠯᠬᠤ ᠠᠴᠠ ᠡᠮᠤᠨᠡᠬᠢ ᠬᠢᠳᠠᠨ ᠤ ᠨᠡᠶᠢᠭᠡᠮ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/11
    ᠬᠢᠳᠠᠨ ᠪᠣᠯ ᠳ᠋ᠦᠩᠬᠤ ᠦᠨᠳᠤᠰᠤᠳᠡᠨ ᠤ ᠰᠢᠰᠲ᠋ᠧᠮ ᠳᠤ ᠬᠠᠷᠢᠶᠠᠯᠠᠬᠳᠠᠬᠤ ᠪᠦᠭᠡᠳ ᠰᠢᠶᠠᠨᠪᠠᠢ ᠦᠨᠳᠤᠰᠤᠳᠡᠨ  ᠤ ᠨᠢᠭᠡᠨ ᠰᠠᠯᠠᠭ᠎ᠠ ᠮᠦᠨ᠃ ᠤᠭ ᠲᠠᠭᠠᠨ ᠢᠦᠶᠢᠸᠧᠨ᠂ ᠺᠦᠮᠦ᠋ᠸᠧᠰᠢ ᠬᠤᠶᠠᠷ ᠠᠶᠢᠮᠠᠭ ᠲᠠᠢ ᠬᠠᠮᠳᠤ ᠪᠠᠷ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠵᠤ  ᠪᠠᠶᠢᠪᠠ᠂ ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ344 ᠣᠨ ︵ᠵᠡᠬᠦᠨ ᠶᠢᠨ ᠤᠯᠤᠰ ᠤᠨ ᠺᠠᠩ ᠳ᠋ᠠᠢ ᠬᠠᠭᠠᠨ  ᠤ ᠵᠢᠶᠠᠨ ᠶᠤᠸᠠᠨ ᠤ ᠬᠤᠶᠠᠳᠤᠭᠠᠷ ᠣᠨ︶ ᠳᠤ ᠡᠮᠤᠨᠡᠳᠤ ᠶᠠᠨ ᠤᠯᠤᠰ ᠤᠨ ᠡᠵᠡᠨ ᠮᠤ᠋ ᠿᠦᠩ ᠬᠤᠸᠠᠩ ᠢᠦᠶᠢᠸᠧᠨ  ᠢᠳ᠋ᠸᠦ᠋ᠬᠦ᠋ᠢ ᠶᠢ ᠲᠤᠪᠳᠤᠯᠤᠬᠰᠠᠨ᠎ᠠ᠂ ᠬᠢᠳᠠᠨ ᠪᠠᠰᠠ ᠬᠠᠮᠳᠤ ᠪᠠᠷ ᠢᠯᠠᠬᠳᠠᠭᠠᠳ᠂ ᠰᠢᠶᠠᠨᠪᠠᠢ ᠦᠨᠳᠤᠰᠤᠳᠡᠨ ᠠᠴᠠ ᠬᠠᠭᠠᠴᠡᠨ ᠰᠠᠯᠵᠤ ᠦᠪᠡᠷ ᠢ ᠪᠠᠨ ︽ᠬᠢᠳᠠᠨ︾ ᠬᠡᠵᠤ ᠨᠡᠷᠡᠯᠡᠨ᠂ ᠬᠤᠸᠠᠩ ᠱᠦᠢ ᠭᠤᠣᠯ ︵ᠣᠳᠣᠬᠢ ᠰᠢᠷ᠎ᠠ ᠮᠦᠷᠡᠨ︶ ᠪᠤᠯᠤᠨ ᠲᠤ ᠡᠾᠧ ᠭᠤᠣᠯ ︵ᠣᠳᠣᠬᠢ ᠯᠤᠤᠬ᠎ᠠ ᠶᠢᠨ ᠭᠤᠣᠯ︶ ᠤᠨ ᠰᠠᠪᠠ ᠭᠠᠵᠠᠷ ᠣᠷᠴᠢᠮ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠵᠤ ᠪᠠᠶᠢᠪᠠ᠃ ᠡᠬᠢᠨ ᠳᠡᠭᠡᠨ ︽ᠴᠠᠭᠠᠨ ᠮᠣᠷᠢ︾᠂ ︽ᠭᠦᠬᠡ ᠦᠬᠡᠷ︾ ᠵᠡᠷᠬᠡ ᠬᠤᠶᠠᠷᠬᠠᠨ ᠣᠪᠣᠭ ᠢ  ᠪᠠᠭᠳᠠᠭᠠᠬᠰᠡᠨ ᠵᠢᠵᠢᠭ ᠠᠶᠢᠮᠠᠭ ᠪᠠᠶᠢᠪᠠ᠂ ᠰᠡᠬᠦᠯ ᠳᠡᠭᠡᠨ ᠦᠷ᠎ᠠ ᠠᠴᠢᠨᠠᠷ ᠨᠢ ᠦᠷᠡᠵᠢᠨ ᠠᠷᠪᠢᠵᠢᠨ ᠠᠷᠪᠢᠵᠢᠵᠤ᠂ ᠬᠦᠮᠤᠨ ᠠᠮᠠ ᠨᠢ ᠬᠦᠭᠵᠢᠨ ᠤᠯᠠᠰᠢᠷᠭᠠᠳ ᠠᠯᠭᠤᠷ ᠠᠭᠠᠵᠢᠮ ᠢᠶᠠᠷ ᠨᠠᠶᠢᠮᠡᠨ ᠣᠪᠣᠭ ᠲᠦᠷᠤᠯ ᠪᠤᠯᠤᠨ ᠬᠦᠭᠵᠢᠭᠰᠡᠨ ᠪᠦᠭᠡᠳ ᠨᠠᠶᠢᠮᠡᠨ ᠣᠪᠣᠭ ᠲᠦᠷᠤᠯ ᠠᠴᠠ ᠪᠠᠨ ᠶᠠᠪᠤᠨ ᠶᠠᠪᠤᠬᠰᠠᠭᠠᠷ ᠨᠠᠢᠮᠠᠨ ᠠᠶᠢᠮᠠᠭ ᠪᠤᠯᠤᠨ ᠬᠦᠭᠵᠢᠭᠰᠡᠨ ᠪᠠᠶᠢᠨ᠎ᠠ᠃ ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ ᠵᠢᠷᠭᠤᠭ᠎ᠠ᠂ ᠲᠣᠯᠣᠳᠣᠭᠠᠷ ᠵᠠᠭᠤᠨ ᠤ ᠠᠭᠤᠯᠵᠠᠷ ︵ᠰᠦᠢ ᠣᠯᠤᠰ ᠤᠨ ᠦᠶ᠎ᠡ︶ ᠢᠶᠠᠷ᠂ ᠬᠢᠳᠠᠨ ᠨᠢᠭᠡᠨ ᠦᠶ᠎ᠡ  ᠠᠷᠪᠡᠨ ᠠᠶᠢᠮᠠᠭ ᠪᠤᠯᠤᠨ  ᠬᠦᠭᠵᠢᠵᠤ᠂ ᠵᠠᠷᠢᠮ ᠠᠶᠢᠮᠠᠭ ᠨᠢ ᠭᠤᠷᠪᠡᠨ ᠮᠢᠩᠭᠠᠨ ᠴᠡᠷᠢᠭ ᠲᠠᠢ᠂ ᠵᠠᠷᠢᠮ ᠠᠶᠢᠮᠠᠭ ᠨᠢ ᠮᠢᠩᠭ᠎ᠠ ᠭᠠᠷᠤᠢ ᠴᠡᠷᠢᠭ ᠲᠠᠢ ᠪᠠᠶᠢᠵᠤ᠂ ᠰᠠᠯᠪᠤᠷᠢ ᠠᠶᠢᠮᠠᠭ ᠨᠢ ᠪᠠᠰᠠ ᠲᠦᠷᠪᠡᠨ ᠮᠢᠩᠭ᠎ᠠ ᠭᠠᠷᠤᠢ ᠡᠷᠤᠬᠡ ᠪᠠᠶᠢᠵᠡᠢ ᠭᠡᠰᠡᠨ ᠶᠠᠷᠢᠶ᠎ᠠ ᠪᠤᠢ᠃  ᠲᠤᠯᠤᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠪᠤᠯᠬᠤ   ᠳᠤ ︵ᠲᠠᠩ ᠤᠯᠤᠰ ᠤᠨ ᠡᠬᠢ︶ ︽ᠰᠢᠯᠢᠳᠡᠭ ᠴᠡᠷᠢᠭ︾ ᠨᠢ ᠲᠦᠷᠪᠡᠨ ᠲᠦᠮᠡ ᠳᠤ ᠬᠦᠷᠴᠤ᠂ ᠮᠠᠰᠢ ᠤᠯᠠᠨ ᠠᠶᠢᠮᠠᠭ ᠢ ᠪᠠᠭᠳᠠᠭᠠᠬᠰᠡᠨ ᠲᠤᠮᠤ ᠠᠶᠢᠮᠠᠭ ᠪᠤᠯᠤᠬᠰᠡᠨ ᠶᠤᠮ᠃     ᠣᠮᠠᠷᠠᠳᠤ ᠸᠧᠢ ᠣᠯᠤᠰ ᠤᠨ ᠦᠶ᠎ᠡ ᠳᠤ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ ᠲᠦᠷᠪᠡᠳᠤᠬᠡᠷ ᠵᠠᠭᠤᠨ ᠤ ᠰᠡᠬᠦᠯᠴᠢ ᠠᠴᠠ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ ᠬᠦᠷᠳᠡᠯ᠎ᠠ︶ ᠬᠢᠳᠠᠨ ᠬᠠᠷᠠᠬᠠᠨ ᠠᠶᠢᠮᠠᠭ ᠤᠨ ᠬᠤᠯᠪᠤᠭ᠎ᠠ  ᠪᠤᠯᠵᠤ ᠴᠢᠳᠠᠭᠠᠳᠤᠢ ᠪᠠᠶᠢᠪᠠ᠃ ᠲᠡᠤᠬᠡᠨ ᠳᠤ  ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠢᠶᠠᠷ ᠬᠢᠳᠠᠨ ᠤ  ᠨᠠᠢᠮᠠᠨ ᠠᠶᠢᠮᠠᠭ ᠲᠤᠰ ᠪᠦᠷᠢ ᠦᠪᠡᠷᠰᠡᠳ ᠤᠨ ᠠᠶᠢᠮᠠᠭ ᠤᠨ ᠰᠠᠶᠢᠨ  ᠮᠣᠷᠢ᠂ ᠡᠯᠳᠡᠭᠰᠡᠨ ᠠᠷᠠᠰᠤ ᠪᠠᠨ ᠣᠮᠠᠷᠠᠳᠤ ᠸᠧᠢ ᠣᠯᠣᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠲᠤ ᠡᠷᠬᠦᠨ ᠪᠠᠷᠢᠳᠠᠭ ᠪᠦᠬᠡᠳ ᠲᠤᠰ ᠲᠤᠰ ᠢᠶᠠᠷ ᠢᠶᠠᠨ ᠡᠾᠧ  ᠯᠦᠩ ︵ᠣᠳᠣᠬᠢ ᠯᠢᠶᠣᠤᠨᠢᠩ ᠮᠤᠵᠢ ᠶᠢᠨ ᠴᠣᠤ ᠶᠠᠩ ᠰᠢᠶᠠᠨ︶ ᠪᠤᠯᠤᠨ ᠮᠢ ᠶᠦᠨ ︵ᠣᠳᠣᠬᠢ ᠪᠡᠬᠡᠵᠢᠩ ᠬᠤᠳᠠ ᠶᠢᠨ ᠮᠢ ᠶᠦᠨ ᠰᠢᠶᠠᠨ︶ ᠤ  ᠬᠤᠭᠤᠷᠣᠨᠳᠣ ᠣᠮᠠᠷᠠᠳᠤ ᠸᠧᠢ ᠤᠯᠤᠰ ᠯᠤᠭ᠎ᠠ ᠬᠤᠳᠠᠯᠳᠤᠭ᠎ᠠ ᠮᠠᠶᠢᠮᠠᠢ ᠬᠡᠯᠴᠡᠳᠡᠭ ᠪᠠᠶᠢᠵᠡᠢ᠃ ᠡᠨᠡ ᠨᠢ ᠲᠣᠬᠠᠢ ᠦᠶ᠎ᠡ ᠶᠢᠨ ᠬᠢᠳᠠᠨ ᠤ ᠡᠯ᠎ᠠ ᠠᠶᠢᠮᠠᠭ ᠤᠳ ᠮᠦᠨᠴᠤ ᠲᠣᠰ ᠲᠣᠰ ᠪᠡᠶ᠎ᠡ ᠪᠠᠨ ᠲᠠᠭᠠᠭᠠᠬᠰᠡᠨ ᠴᠢᠨᠠᠷ ᠲᠠᠢ  ᠪᠠᠶᠢᠬᠰᠡᠨ ᠪᠦᠬᠡᠳ ᠴᠢᠨᠠᠬᠰᠢᠯᠠᠪᠠᠯ ᠵᠠᠷᠢᠮ ᠳᠠᠭᠠᠨ ᠡᠯ᠎ᠠ ᠠᠶᠢᠮᠠᠭ ᠤᠨ ᠬᠤᠭᠤᠷᠣᠨᠳᠣ ᠪᠠᠨ ᠬᠠᠷᠢᠯᠴᠠᠨ ᠵᠤᠬᠰᠤᠯ ᠦᠬᠡᠢ ᠲᠠᠶᠢᠳᠤᠴᠢᠳᠠᠭ  ᠢ ᠬᠠᠷᠠᠭᠤᠯᠵᠤ ᠪᠤᠢ᠃ ᠰᠦᠢ ᠤᠯᠤᠰ ᠤᠨ ᠡᠬᠢᠨ ᠤ ᠦᠶ᠎ᠡ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ︶ ᠬᠦᠷᠤᠬᠡᠳ᠂ ᠡᠯ᠎ᠠ ᠠᠶᠢᠮᠠᠭ ᠤᠳ ᠨᠢ ᠵᠤᠬᠢᠬᠤ ᠬᠡᠮᠵᠢᠶᠡᠨ᠎ᠠ ᠬᠤᠯᠪᠤᠭᠠᠯᠠᠬᠰᠡᠨ ᠤᠴᠢᠷ᠂  ᠡᠨᠡ ᠦᠶᠡᠰ ︽ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠭᠠᠷᠪᠠᠰᠤ᠂ ᠠᠬᠠᠮᠠᠳ ᠨᠠᠷ ᠠᠨᠤ ᠬᠠᠷᠢᠯᠴᠡᠨ ᠵᠦᠪᠳᠡᠯᠴᠡᠳᠡᠭ᠂ ᠴᠡᠷᠢᠭ ᠲᠠᠶᠢᠴᠢᠯᠡᠨ ᠣᠯᠠᠨ ᠢ ᠬᠦᠳᠡᠯᠬᠡᠬᠦᠢ ᠳᠤᠷ ᠬᠦᠷᠪᠠᠰᠤ᠂ ᠬᠡᠷᠡᠴᠢ ᠪᠠᠷᠢᠮᠳᠠ ᠪᠠᠨ ᠲᠠᠭᠠᠷᠠᠭᠤᠯᠳᠠᠭ ᠪᠦᠯᠣᠬᠡ︾᠃      ᠲᠠᠩ ᠤᠯᠤᠰ ᠤᠨ ᠡᠬᠢᠨ ᠤ ᠦᠶ᠎ᠡ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ ᠲᠣᠯᠣᠳᠣᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ︶ ᠳᠤ  ᠰᠠᠶ᠋ᠢ ᠬᠢᠳᠠᠨ ᠤ ᠠᠶᠢᠮᠠᠭ ᠤᠨ ᠬᠤᠯᠪᠣᠭ᠎ᠠ ᠪᠦᠷᠢᠯᠳᠤᠵᠤ ᠴᠢᠳᠠᠬᠰᠡᠨ ᠶᠤᠮ᠃ ︽ᠰᠢᠨ᠎ᠠ ᠲᠠᠩ ᠤᠯᠤᠰ ᠤᠨ ᠪᠢᠴᠢᠭ᠂ ᠬᠢᠳᠠᠨ ᠤ ᠱᠠᠰᠳᠢᠷ︾ ᠲᠤ ᠲᠡᠮᠳᠡᠭᠯᠡᠭᠰᠡᠨ  ᠢᠶᠠᠷ᠂ ᠲᠡᠷᠨ ᠦᠶ᠎ᠡ ᠶᠢᠨ ᠬᠢᠳᠠᠨ ᠤ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠲᠦᠷᠤᠬᠦᠤ ᠨᠢ ᠳ᠋ᠡᠾᠧ ᠣᠪᠤᠭᠳᠠᠨ ᠪᠠᠶᠢᠬᠰᠡᠨ ᠪᠦᠬᠡᠳ ᠬᠤᠯᠪᠤᠭᠠᠨ ᠤ ᠪᠤᠯᠵᠤᠭ᠎ᠠ ᠳᠤ  ᠄ ᠴᠡᠷᠢᠭ ᠮᠤᠷᠢ ᠲᠠᠶᠢᠴᠢᠯᠠᠵᠤ ᠭᠠᠳᠠᠬᠰᠢ ᠲᠣᠪᠳᠣᠯᠣᠨ ᠲᠠᠶᠢᠳᠤᠬᠤ ᠳᠤ ᠬᠦᠷᠪᠠᠯ᠂ ᠡᠯ᠎ᠠ ᠠᠶᠢᠮᠠᠭ ᠤᠳ ᠡᠷᠬᠡᠪᠠᠰᠢ ᠬᠠᠮᠳᠤᠷᠠᠵᠤ᠂ ᠨᠢᠬᠡᠳᠤᠯᠳᠠᠢ ᠬᠦᠳᠠᠯᠤᠮᠤᠢ︔ ᠠᠩ ᠬᠦᠷᠤᠬᠡ ᠶᠢ  ᠪᠤᠯ ᠡᠯ᠎ᠠ ᠠᠶᠢᠮᠠᠭ ᠬᠠᠷᠢᠨ ᠲᠤᠰ ᠲᠤᠰ ᠲᠠᠭᠠᠨ  ᠬᠢᠵᠤ ᠪᠤᠯᠤᠨ᠎ᠠ ᠬᠡᠵᠤ ᠲᠤᠬᠳᠠᠭᠠᠪᠠ᠃       ᠬᠢᠳᠠᠨᠴᠤᠳ ᠤᠭ ᠲᠠᠭᠠᠨ ᠭᠤᠪᠢ ᠶᠢᠨ ᠠᠷᠤ ᠳᠤ ᠪᠠᠶᠢᠭᠤᠯᠤᠬᠳᠠᠬᠰᠡᠨ ᠲᠦᠷᠺ ᠤᠨ ᠪᠤᠭᠤᠯ ᠤᠨ ᠡᠵᠡᠨ ᠤ ᠲᠦᠷᠤ ᠶᠢᠨ ᠬᠠᠷᠢᠶᠠᠳᠤ ᠪᠠᠶᠢᠬᠰᠡᠨ ᠪᠦᠬᠡᠳ ᠲᠦᠷᠺ  ᠤᠨ ᠨᠤᠶᠠᠷᠬᠠᠬᠴᠢᠳ ᠳ᠋ᠡᠾᠧ ᠣᠪᠤᠬᠳᠠᠨ ᠢ ᠴᠢᠬᠢᠨ ︵ᠲᠦᠷᠺ ᠤᠨ ᠨᠤᠶᠠᠨ ᠤ  ᠴᠤᠯᠠ︶ ᠡᠷᠬᠦᠮᠵᠢᠯᠡᠭᠰᠡᠨ ᠪᠢᠯᠠ᠃ ᠲᠠᠩ ᠤᠯᠤᠰ ᠤᠨ ᠭᠤᠤ ᠽᠤ᠋ ᠬᠠᠭᠠᠨ ᠤ ᠡᠤ ᠳ᠋ᠧ  ᠶᠢᠨ ᠣᠨ ᠨᠤᠭᠤᠳ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ  ᠤᠨ ᠳᠠᠭᠠᠨ618-626 ᠣᠨ︶ ᠲᠤ ᠬᠢᠳᠠᠨ ᠤ ᠠᠶᠢᠮᠠᠭ ᠤᠨ ᠶᠡᠭᠡ ᠠᠬᠠᠮᠠᠳ ᠰᠦᠨ ᠣᠤ ᠼᠤᠤ ᠤᠷᠢᠳ ᠬᠤᠵᠢᠳ ᠲᠠᠩ ᠤᠯᠤᠰ ᠲᠤ ᠡᠯᠴᠢ ᠵᠠᠷᠤᠵᠤ ᠠᠯᠪᠠ  ᠪᠠᠷᠢᠵᠡᠢ᠃ ᠲᠠᠶᠢᠽᠦ᠋ᠩ ᠬᠠᠭᠠᠨ ᠤ ᠵᠧᠨ ᠭᠤᠸᠠᠨ ᠤ ᠬᠤᠶᠠᠳᠤᠭᠠᠷ ᠣᠨ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ628 ᠣᠨ︶ ᠳᠤ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠲᠦᠷᠤᠬᠦᠤ ᠮᠦᠸᠧᠾᠦ᠋ᠢ ᠲᠦᠷᠺ ᠠᠴᠠ  ᠲᠡᠷᠰᠯᠡᠨ ᠰᠠᠯᠵᠤ᠂ ᠲᠠᠩ ᠣᠯᠣᠰ ᠲᠤ ᠲᠠᠭᠠᠬᠰᠡᠨ ᠪᠦᠬᠡᠳ ᠲᠠᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠲᠠᠭᠠᠵᠤ ᠲᠦᠷᠺ ᠢ ᠲᠠᠶᠢᠯᠠᠬᠰᠡᠨ ᠪᠠᠶᠢᠨ᠎ᠠ᠃ ᠺᠦᠭᠧ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠲᠦᠷᠤᠬᠦᠤ ᠪᠤᠯᠤᠬᠰᠡᠨ ᠦᠶ᠎ᠡ ᠳᠤ᠂  ᠨᠡᠩ ᠴᠦ ᠪᠦᠬᠦ ᠠᠶᠢᠮᠠᠭ ᠢᠶᠠᠷ ᠢᠶᠠᠨ ᠲᠠᠩ ᠤᠯᠤᠰ ᠲᠤ ᠲᠠᠭᠠᠪᠠ᠂ ᠲᠠᠩ ᠤᠯᠤᠰ ᠬᠢᠳᠠᠨ ᠤ ᠮᠠᠯᠵᠢᠨ ᠨᠤᠳᠤᠬᠰᠢᠵᠤ ᠪᠠᠶᠢᠬᠰᠡᠨ ᠭᠠᠵᠠᠷ ᠤᠷᠤᠨ ᠳᠤ ᠰᠦᠩ ᠮᠦᠸᠧ  ᠶᠢᠨ ᠳ᠋ᠦᠳᠦ᠋ ᠶᠢᠨ ᠶᠠᠮᠤᠨ ᠪᠠ ᠠᠷᠪᠡᠨ ᠵᠸᠤ ᠪᠠᠶᠢᠭᠤᠯᠵᠤ᠂ ᠺᠦᠭᠧ ᠪᠠᠷ ᠠᠷᠪᠠᠨ ᠵᠸᠤ ᠶᠢᠨ ᠴᠡᠷᠢᠭ ᠤᠨ ᠶᠠᠪᠤᠳᠠᠯ ᠤᠨ ᠡᠷᠬᠢᠯᠡᠭᠴᠢ᠂ ᠰᠦᠩ ᠮᠦᠸᠧ ᠶᠢᠨ ᠳ᠋ᠦᠳᠦ᠋ ᠲᠠᠯᠪᠢᠵᠤ᠂ ᠦᠵᠢᠨᠡᠨ ︵ᠬᠡᠷᠬᠡᠮ︶ ᠡᠷᠬᠦᠮᠵᠢᠯᠡᠭᠰᠡᠨ ᠪᠦᠬᠡᠳ ᠯᠢ ᠤᠪᠣᠭ ᠱᠠᠩᠨᠠᠬᠰᠡᠨ ᠪᠠᠶᠢᠨ᠎ᠠ᠃ ᠢᠩᠬᠢᠬᠡᠳ ᠬᠢᠳᠠᠨ ᠪᠤᠯᠤᠨ  ᠲᠡᠬᠦᠨ ᠤ ᠮᠠᠯᠵᠢᠨ ᠨᠤᠳᠤᠬᠰᠢᠵᠤ ᠪᠠᠶᠢᠬᠰᠡᠨ ᠭᠠᠵᠠᠷ ᠤᠷᠤᠨ ᠢ ᠲᠠᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠰᠢᠭᠤᠳ ᠵᠠᠬᠢᠷᠤᠬᠰᠡᠨ ᠪᠢᠯᠠ᠃ ᠡᠤ ᠽᠧ ᠲᠢᠶᠠᠨ ᠤ ᠵᠠᠰᠠᠭ ᠪᠠᠷᠢᠵᠤ ᠪᠠᠶᠢᠬᠰᠡᠨ ᠦᠶ᠎ᠠ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ684-704 ᠣᠨ︶ ᠳᠤ ᠲᠠᠩ ᠤᠯᠤᠰ ᠤᠨ ᠬᠢᠯᠢ ᠶᠢᠨ ᠲᠦᠰᠢᠮᠡᠯ ᠵᠤᠤ ᠸᠧᠨ ᠡᠾᠦ᠋ᠢ ᠪᠤᠷᠦᠭᠤ ᠠᠷᠭ᠎ᠠ ᠬᠡᠮᠵᠢᠶ᠎ᠠ ᠠᠪᠤᠬᠰᠡᠨ ᠠᠴᠠ ᠪᠤᠯᠵᠤ᠂ ᠬᠢᠳᠠᠨ ᠤ ᠡᠰᠡᠷᠬᠦᠴᠡᠯ ᠢ ᠳᠡᠭᠳᠡᠭᠡᠵᠤ᠂ ᠠᠶᠢᠮᠠᠭ ᠤᠨ ᠲᠦᠷᠤᠬᠦᠤ ᠰᠦᠨ ᠸᠠᠨ ᠿᠦᠩ ᠤᠨ ᠵᠢᠯᠤᠭᠤᠳᠤᠯᠭ᠎ᠠ ᠲᠤᠤᠷ᠎ᠠ ᠂ ᠶᠢᠤ ᠵᠸᠤ᠂ ᠶᠢᠩ ᠵᠸᠤ᠂ ︵ᠣᠳᠣᠬᠢ ᠪᠡᠬᠡᠵᠢᠩ ᠬᠤᠳᠠ ᠪᠤᠯᠤᠨ  ᠡᠾᠧᠪᠸᠢ ᠮᠤᠵᠢ ᠶᠢᠨ ᠡᠾᠧ ᠵᠢᠶᠠᠨ ᠰᠢᠶᠠᠨ ᠣᠷᠴᠢᠮ︶ ᠵᠠᠷᠬᠡ ᠭᠠᠵᠠᠷ ᠢ ᠬᠠᠯᠳᠠᠨ ᠲᠤᠶᠢᠪᠡᠭᠡᠭᠰᠡᠨ ᠪᠤᠯᠪᠠᠴᠤ ᠣᠳᠠᠯ ᠦᠬᠡᠢ ᠲᠠᠩ ᠤᠯᠤᠰ ᠲᠤ ᠢᠯᠠᠬᠳᠠᠵᠠᠢ᠃ ᠢᠩᠬᠢᠬᠡᠳ  ᠰᠢᠶᠤᠸᠠᠨ ᠽᠦᠩ ᠬᠠᠭᠠᠨ ᠤ ᠦᠶ᠎ᠡ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ712-756 ᠣᠨ︶ ᠳᠤ ᠲᠠᠬᠢᠨ ᠲᠠᠩ ᠣᠯᠣᠰ ᠲᠤ ᠲᠠᠭᠠᠬᠰᠡᠨ ᠪᠠᠶᠢᠨ᠎ᠠ᠃ ᠲᠠᠩ ᠤᠯᠤᠰ ᠤᠨ ᠡᠴᠤᠰ ᠤᠨ ᠨᠢᠭᠡᠨ ᠦᠶ᠎ᠡ ᠳᠤ᠂ ᠬᠢᠳᠠᠨ ᠬᠢᠭᠡᠳ ᠲᠠᠩ ᠲᠠᠩ ᠣᠯᠣᠰ ᠤᠨ ᠬᠤᠭᠤᠷᠤᠨᠳᠤ ᠬᠠᠷᠢᠴᠠᠭ᠎ᠠ ᠡᠬᠡᠳᠡᠷᠬᠡᠨ ᠪᠤᠳᠤᠯᠢᠶᠡᠨ ᠲᠠᠢ ᠪᠠᠶᠢᠵᠤ᠂ ᠠᠯᠪᠠ ᠪᠠᠷᠢᠵᠤ᠂ ᠨᠤᠶᠠᠨ ᠰᠠᠭᠤᠵᠤ᠂ ᠠᠷᠠᠯᠵᠢᠶ᠎ᠠ ᠬᠤᠳᠠᠯᠳᠤᠭ᠎ᠠ ᠬᠢᠵᠤ ᠪᠠᠶᠢᠳᠠᠯ᠎ᠠ ᠪᠠᠨ ᠪᠠᠰᠠ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠬᠢᠵᠤ ᠪᠤᠯᠢᠶᠠᠨ ᠲᠡᠭᠡᠷᠡᠮᠳᠠᠵᠤ ᠪᠠᠶᠢᠯ᠎ᠠ᠃ ᠡᠳᠡᠭᠡᠷ ᠨᠠᠷᠢᠨ ᠪᠤᠳᠤᠯᠢᠶᠠᠨᠳᠠᠢ ᠬᠠᠷᠢᠴᠠᠭ᠎ᠠ ᠪᠠᠷ  ᠲᠠᠮᠵᠢᠨ᠂ ᠬᠢᠳᠠᠨᠴᠤᠳ ᠲᠤᠮᠳᠠᠳᠤ  ᠤᠷᠤᠨ ᠤ ᠹᠸᠤᠳᠠᠯ ᠤᠨ ᠲᠠᠪᠰᠢᠩᠭᠤᠢ ᠠᠵᠤ ᠠᠬᠤᠢ᠂ ᠰᠤᠶᠤᠯ ᠳᠤ  ᠬᠤᠷᠴᠠ ᠨᠦᠯᠤᠬᠡᠯᠡᠭᠳᠡᠭᠰᠡᠨ  ᠶᠤᠮ᠃      ᠲᠠᠩ ᠤᠯᠤᠰ ᠤᠨ ᠦᠶ᠎ᠠ ᠳᠤ ᠬᠢᠳᠠᠨ ᠨᠢᠬᠡᠨᠳᠠ  ᠡᠳᠤᠷ ᠢᠷᠡᠬᠦᠶ᠎ᠡ ᠬᠦᠴᠤᠷᠬᠡᠭᠵᠢᠵᠡᠢ᠃ ᠲᠠᠩ ᠤᠯᠤᠰ ᠤᠨ ᠡᠴᠤᠰ ᠪᠤᠯᠬᠤ ᠳᠤ᠂  ᠭᠤᠪᠢ ᠶᠢᠨ ᠠᠷᠤ ᠳᠠᠬᠢ ᠣᠶᠢᠭᠤᠷ ᠤᠨ ᠲᠦᠷᠤ ᠲᠤᠷᠤᠶᠢᠳᠡᠨ ᠮᠦᠬᠦᠵᠤ᠂ ᠲᠣᠮᠳᠠᠳᠣ ᠣᠷᠣᠨ ᠤ ᠬᠠᠷᠢᠶᠠᠳᠤ ᠪᠠᠯᠭᠠᠰᠤ ᠨᠤᠭᠤᠳ ᠬᠡᠰᠡᠭᠯᠡᠨ ᠡᠵᠡᠯᠡᠭᠰᠡᠨ᠎ᠠ᠂ ᠲᠠᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠬᠦᠴᠤᠨ ᠴᠢᠳᠠᠯ ᠦᠬᠡᠢ ᠪᠤᠯᠤᠭᠠᠳ᠂ ᠬᠢᠵᠠᠭᠠᠷ ᠤᠷᠤᠨ ᠤ  ᠨᠢᠭᠡᠨᠳᠠ ᠵᠠᠬᠢᠷᠴᠤ ᠦᠯᠤ ᠴᠢᠳᠠᠬᠤ ᠪᠤᠯᠤᠬᠰᠡᠨ ᠲᠤᠯᠠ ᠂ ᠬᠢᠳᠠᠨ ᠤ ᠢᠵᠠᠭᠤᠷᠳᠠᠨ ᠨᠠᠷ ᠲᠤᠬᠢᠶᠠᠯ ᠢ ᠵᠠᠪᠳᠤᠨ᠂ ᠲᠦᠷᠤ ᠪᠠᠶᠢᠭᠤᠯᠤᠭᠠᠳ᠂ ᠡᠬᠡ ᠤᠯᠤᠰ ᠤᠨ ᠣᠮᠠᠷᠠᠳᠤ ᠣᠷᠣᠨ ᠤ ᠨᠢᠭᠡᠨ ᠬᠦᠴᠤᠷᠬᠡᠭ ᠶᠡᠭᠡ ᠬᠦᠴᠤᠨ ᠪᠤᠯᠤᠬᠰᠡᠨ ᠪᠢᠯᠡ᠃        ᠬᠢᠳᠠᠨ ᠬᠦᠭᠵᠢᠯ ᠤᠨ ᠶᠠᠪᠤᠴᠨ ᠳᠠᠭᠠᠨ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠣᠳᠣᠷᠢᠳᠬᠤ ᠡᠷᠬᠡ ᠶᠢ ᠡᠬᠢᠨ ᠳᠡᠭᠡᠨ ᠳ᠋ᠡᠾᠧ ᠤᠪᠣᠭ ᠡᠵᠡᠮᠰᠢᠵᠤ ᠪᠠᠶᠢᠪᠠ᠃ ᠳ᠋ᠡᠾᠧ ᠣᠪᠣᠭ ᠤᠨ ᠠᠩᠬᠠᠳᠤᠬᠴᠢ ᠲᠦᠷᠤᠬᠦᠤ ᠨᠢ ᠲᠠᠷᠤᠢ ᠡᠮᠤᠨ᠎ᠠ ᠲᠣᠷᠠᠳᠤᠬᠰᠡᠨ ᠺᠦᠭᠧ ᠮᠦᠨ᠃ ᠲᠠᠩ ᠣᠯᠣᠰ ᠤᠨ ᠰᠢᠶᠤᠸᠠᠨ ᠽᠦᠩ ᠬᠠᠭᠠᠨ ᠤ ᠺᠠᠢ ᠶᠤᠸᠠᠨ ᠤ ᠠᠷᠪᠡᠨ ᠨᠠᠢᠮᠠᠳᠤᠭᠠᠷ ᠣᠨ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ730 ᠣᠨ︶ ᠳ᠋ᠡᠾᠧ ᠤᠪᠣᠭ ᠤᠨ ᠬᠠᠮᠤᠭ ᠡᠴᠤᠰ ᠤᠨ ᠲᠦᠷᠣᠬᠦᠣ ᠪᠤᠯᠬᠤ ᠱᠤᠤᠬᠦ᠋ ᠠᠯᠠᠬᠳᠠᠬᠰᠡᠨ ᠠᠴᠠ ᠬᠤᠶᠢᠰᠢ᠂ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠤᠳᠤᠷᠢᠳᠬᠤ ᠡᠷᠬᠡ ᠨᠢ ᠦᠭᠡᠷ᠎ᠠ ᠨᠢᠭᠡᠨ ᠣᠪᠣᠭ — ᠶᠤᠤᠨᠢᠶᠠᠨ ᠣᠪᠣᠭ ᠤᠨ ᠭᠠᠷ ᠲᠤ ᠣᠷᠣᠬᠰᠡᠨ ᠪᠠᠶᠢᠨ᠎ᠠ᠃ ᠶᠤᠤᠨᠢᠶᠠᠨ ᠣᠪᠣᠭ ᠤᠨ ᠠᠩᠬᠠᠳᠤᠬᠴᠢ ᠲᠦᠷᠤᠬᠦᠤ ᠨᠢ ᠲᠠᠷᠤᠢ ᠸᠠ ᠬᠠᠭᠠᠨ ᠴᠢᠦᠶᠢᠯᠢᠶᠧ ᠮᠦᠨ᠃ ᠴᠢᠣᠶᠢᠯᠢᠶᠧ ᠠᠴᠠ ᠶᠧᠯᠢᠣᠢ ᠣᠪᠣᠭ ᠤᠨ ᠲᠦᠷᠤ ᠪᠠᠶᠢᠭᠤᠯᠬᠤ ᠪᠤᠯᠳᠠᠯ᠎ᠠ ︵ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ916 ᠣᠨ︶ ᠪᠠᠷᠤᠭ ᠵᠠᠭᠤ ᠳᠠᠯᠠ ᠭᠠᠷᠤᠢ ᠣᠨ ᠪᠤᠯᠪᠠ᠃ ᠲᠡᠤᠬᠡ ᠶᠢᠨ ᠪᠢᠴᠢᠭ ᠲᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ ᠨᠡᠶᠢᠳᠠ ᠶᠢᠰᠤᠨ ᠦᠶ᠎ᠠ ᠣᠯᠠᠮᠵᠢᠯᠠᠬᠰᠡᠨ ᠪᠠᠶᠢᠨ᠎ᠠ ︵ ᠶᠡᠷᠤᠩᠬᠡᠢ ᠳᠡᠭᠡᠨ ︽ᠶᠤᠤᠨᠢᠶᠠᠨ ᠤ ᠶᠢᠰᠤᠨ ᠦᠶ᠎ᠡ︾ ᠭᠡᠳᠡᠭ︶᠃ ᠶᠤᠤᠨᠢᠶᠠᠨ ᠤ ᠦᠶ᠎ᠡ ᠳᠤ ᠶᠧᠯᠢᠤᠢ ᠣᠪᠣᠭ ᠪᠣᠯ ᠬᠤᠯᠪᠤᠭᠠᠨ ᠤ ᠲᠣᠳᠣᠷᠠᠬᠢ ᠳ᠋ᠢᠶᠧᠯᠠ ᠠᠶᠢᠮᠠᠭ ᠲᠤ ᠬᠠᠷᠢᠶᠠᠯᠠᠬᠳᠠᠵᠤ᠂  ᠦᠶ᠎ᠡ ᠣᠯᠠᠷᠢᠨ ᠠᠶᠢᠮᠠᠭ ᠤᠨ ᠲᠣᠳᠣᠭᠠᠳᠤ ᠶᠢᠨ ᠢᠯᠢᠵᠢᠨ ︵ᠴᠡᠷᠢᠭ  ᠮᠣᠷᠢᠨ ᠢ ᠬᠠᠮᠢᠶᠠᠷᠬᠤ ᠶᠡᠭᠡ ᠨᠤᠶᠠᠨ︶ ᠪᠠᠶᠢᠬᠰᠡᠨ ᠶᠤᠮ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠢᠳᠠᠨ ᠤ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠲᠣᠳᠣᠭᠠᠳᠤ ᠶᠢᠨ ᠣᠯᠣᠰ ᠲᠦᠷᠤ ᠶᠢᠨ ᠲᠦᠷᠤᠬᠦᠤ ᠪᠤᠯᠬᠤ ᠨᠢᠭᠡᠨ ᠶᠡᠭᠡ ᠠᠬᠠᠮᠠᠳ ᠪᠠᠶᠢᠬᠤ  ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠴᠡᠷᠢᠭ ᠤᠨ ᠶᠠᠪᠤᠳᠠᠯ ᠤᠨ ᠲᠠᠷᠤᠭ᠎ᠠ ᠪᠤᠯᠬᠤ ᠨᠢᠭᠡᠨ ᠢᠯᠢᠵᠢᠨ ᠲᠠᠢ ᠪᠠᠶᠢᠵᠤ᠂ ᠬᠤᠶᠠᠷ ᠨᠤᠶᠠᠨ ᠬᠠᠷᠢᠭᠤᠴᠠᠬᠤ  ᠲᠦᠷᠢᠮ ᠢ  ᠬᠡᠷᠡᠭᠵᠢᠬᠦᠯᠵᠤ ᠪᠠᠶᠢᠵᠡᠢ᠃ ᠶᠤᠤᠨᠢᠶᠠᠨ ᠣᠪᠣᠭ ᠢᠶᠠᠷ ᠲᠦᠷᠤᠬᠦᠯᠡᠬᠦᠯᠤᠭ᠍ᠰᠡᠨ ᠠᠶᠢᠮᠠᠭ ᠤᠨ ᠬᠤᠯᠪᠤᠭᠠᠨ ᠤ ᠴᠡᠷᠢᠭ ᠤᠨ ᠨᠤᠶᠠᠨ ᠪᠤᠯᠵᠤ᠂  ᠲᠣᠶᠢᠯ ᠤᠨ ᠶᠡᠭᠡ ᠡᠷᠬᠡ ᠲᠠᠢ ᠪᠠᠶᠢᠬᠰᠡᠨ ᠶᠤᠮ᠃        ᠬᠢᠳᠠᠨ ᠤ ᠡᠯ᠎ᠠ ᠠᠶᠢᠮᠠᠭ ᠤᠨ ᠪᠠ ᠠᠶᠢᠮᠠᠭ ᠤᠨ  ᠬᠤᠯᠪᠤᠭᠠᠨ ᠤ ᠲᠦᠷᠤᠬᠦᠴᠤᠳ ᠢ ᠪᠦᠷ ︽ᠠᠬᠠᠮᠠᠳ︾ ᠬᠡᠳᠡᠭ᠂ ᠡᠬᠢᠨ ᠳᠡᠭᠡᠨ ᠪᠤᠯ ᠢᠯᠢᠵᠢᠨ ᠢ ᠬᠦᠷᠳᠡᠯ᠎ᠠ ᠴᠦᠮ ᠣᠪᠣᠭ ᠲᠦᠷᠤᠯ ᠪᠠ ᠠᠶᠢᠮᠠᠭ ᠤᠨ ᠲᠣᠳᠣᠭᠠᠳᠤ ᠳᠠᠭᠠᠨ ᠠᠷᠠᠳᠴᠢᠯᠠᠯ ᠢᠶᠠᠷ ᠰᠤᠩᠭᠤᠵᠤ ᠪᠠᠶᠢᠵᠠᠢ᠃ ︽ᠰᠢᠨ᠎ᠠ ᠲᠠᠪᠤᠨ ᠲᠦᠷᠤ ᠶᠢᠨ ᠲᠡᠤᠬᠡ᠂ ᠲᠦᠷᠪᠡᠨ ᠶᠢ ᠶᠢᠨ ᠲᠣᠬᠠᠢ ᠲᠠᠭᠠᠯᠳᠤᠭᠤᠯᠤᠯ︾ ᠤᠨ ᠨᠢᠭᠡᠳᠤᠬᠡᠷ ᠲᠤ  ᠡᠶᠢᠮᠤᠷᠬᠦ  ᠰᠤᠩᠭᠤᠭᠤᠯᠢ ᠶᠢᠨ ᠪᠠᠶᠢᠳᠠᠯ ᠢ ᠲᠦᠷᠰᠤᠯᠡᠨ ᠬᠡᠯᠡᠬᠦ ᠳᠡᠭᠡᠨ  ᠄ ᠬᠢᠳᠠᠨ ᠤ ᠡᠯ᠎ᠠ ᠠᠶᠢᠮᠠᠭ ᠤᠨ  ᠲᠦᠷᠤᠬᠦᠤ ᠶᠢ ︽ᠠᠬᠠᠮᠠᠳ︾ ᠬᠡᠵᠤ  ᠲᠠᠭᠤᠳᠠᠳᠠᠭ᠂  ᠦᠷᠬᠦᠯᠵᠢ ᠨᠢᠭᠡᠨ ᠠᠬᠠᠮᠠᠳ ᠢ ᠰᠤᠩᠭᠤᠵᠤ ᠲᠤᠭ ᠬᠡᠩᠬᠡᠷᠬᠡ ᠪᠠᠶᠢᠭᠤᠯᠤᠨ ᠨᠠᠢᠮᠠᠨ ᠠᠶᠢᠮᠠᠭ ᠢ ᠶᠠᠷᠤᠩᠬᠡᠶᠢᠯᠡᠨ ᠵᠠᠬᠢᠷᠤᠭᠤᠯᠳᠠᠭ︔ ᠲᠤᠰᠢᠶᠠᠯ ᠳᠤ ᠤᠳᠠᠭᠠᠨ ᠵᠢᠯ ᠪᠠᠶᠢᠬᠰᠡᠨ ᠪᠤᠶᠤ ᠤᠪᠣᠭ ᠲᠦᠷᠤᠯ ᠤᠨ ᠲᠤᠳᠤᠷ᠎ᠠ ᠨᠢ ᠡᠪᠡᠳᠴᠢᠨ ᠭᠠᠮᠰᠢᠭ ᠭᠠᠷᠴᠤ᠂ ᠮᠠᠯ ᠠᠵᠤ ᠠᠬᠤᠢ ᠮᠠᠭᠤᠳᠠᠬᠤ ᠳᠤ ᠬᠦᠷᠪᠠᠯ᠂ ᠲᠠᠷᠤᠢ ᠨᠠᠢᠮᠠᠨ ᠠᠶᠢᠮᠠᠭ ᠢᠶᠠᠷ ᠢᠶᠠᠨ  ᠴᠤᠬᠯᠠᠨ ᠵᠦᠪᠳᠡᠯᠴᠡᠵᠤ᠂ ᠲᠤᠭ ᠭᠡᠩᠭᠡᠷᠬᠡ ᠪᠠᠨ ᠰᠤᠯᠢᠵᠤ ᠪᠤᠰᠤᠳ ᠠᠬᠠᠮᠠᠳ ᠢᠶᠠᠷ ᠤᠷᠤᠭᠯᠠᠭᠤᠯᠳᠠᠭ  ᠤᠷᠤᠯᠠᠬᠳᠠᠬᠰᠡᠳ ᠨᠢ ᠬᠤᠯᠪᠤᠭᠠᠨ ᠤ ᠪᠤᠯᠵᠤᠭ᠎ᠠ ᠤᠤᠯ ᠠᠴᠠ  ᠡᠶᠢᠮᠦ ᠪᠠᠶᠢᠳᠠᠭ ᠬᠡᠵᠤ ᠦᠵᠡᠳᠡᠭ ᠲᠤᠯᠠ᠂ ᠡᠰᠡᠷᠬᠦᠴᠡᠨ  ᠲᠡᠮᠡᠴᠡᠯᠳᠣᠵᠤ ᠴᠢᠳᠠᠬᠤ ᠦᠬᠡᠢ  ᠶᠤᠮ᠃  ᠬᠤᠵᠢᠮ ᠶᠤᠤᠨᠢᠶᠠᠨ ᠣᠪᠣᠭ ᠤᠨ ᠦᠶ᠎ᠡ ᠶᠢᠨ ᠽᠤ᠋ ᠡᠤ ᠬᠠᠭᠠᠨ ︵ᠲᠠᠩ ᠤᠯᠤᠰ ᠲᠡᠬᠦᠨ ᠳᠤ ᠯᠢ ᠬᠤᠸᠠᠢ ᠰᠢᠤ ᠭᠡᠬᠦ ᠨᠡᠷ᠎ᠠ ᠱᠠᠩᠨᠠᠵᠡᠢ︶  ᠤ ᠦᠶ᠎ᠡ ᠬᠦᠷᠤᠬᠡᠳ ︵ᠪᠠᠷᠤᠭ ᠲᠠᠩ ᠤᠯᠤᠰ ᠤᠨ ᠰᠢᠶᠤᠸᠠᠨ ᠽᠦᠩ ᠬᠠᠭᠠᠨ ᠤ ᠺᠠᠢ ᠶᠤᠸᠠᠨ ᠤ ᠡᠴᠤᠰ᠂ ᠨᠡᠶᠢᠳᠠ ᠶᠢᠨ ᠣᠨ ᠲᠣᠭᠠᠯᠠᠯ  ᠤᠨ734-741 ᠣᠨ ᠤ ᠬᠤᠭᠤᠷᠤᠨᠳᠤ︶ ᠰᠤᠩᠭᠤᠭᠤᠯᠢ ᠶᠢᠨ ᠲᠦᠷᠢᠮ ᠨᠢ ᠡᠪᠳᠡᠷᠠᠵᠤ᠂ ᠵᠠᠷᠢᠮ ᠰᠤᠷᠪᠤᠯᠵᠢᠳᠤ ᠣᠪᠣᠭ ᠲᠦᠷᠤᠯ ᠪᠤᠶᠤ  ᠭᠡᠷ ᠤᠨ ᠬᠢ ᠠᠴᠠ ᠰᠤᠩᠭᠤᠬᠤ ᠪᠠᠷ ᠡᠩ ᠤᠨ ᠰᠤᠩᠭᠤᠭᠤᠯᠢ ᠶᠢ ᠤᠷᠤᠯᠠᠭᠤᠯᠤᠬᠰᠡᠨ ᠲᠤᠯᠠ᠂ ᠠᠷᠠᠳᠴᠢᠯᠠᠬᠰᠡᠨ ᠰᠤᠩᠭᠤᠭᠤᠯᠢ ᠶᠢᠨ ᠲᠦᠷᠢᠮ ᠨᠢ ᠦᠨᠡᠨᠳᠡᠬᠡᠨ ᠰᠤᠷᠪᠤᠯᠵᠢᠳᠤ ᠣᠪᠣᠭ ᠲᠦᠷᠤᠯ ᠪᠤᠶᠤ  ᠭᠡᠷ ᠤᠨ ᠬᠢᠨ ᠤ ᠰᠤᠷᠪᠤᠯᠵᠢᠳᠠᠨ ᠤ ᠰᠤᠩᠭᠤᠭᠤᠯᠢ ᠶᠢᠨ ᠲᠦᠷᠢᠮ ᠪᠤᠯᠵᠤ ᠬᠤᠪᠢᠷᠠᠬᠰᠡᠨ ᠪᠠᠶᠢᠨ᠎ᠠ᠃ ︽ᠯᠢᠶᠣᠤ ᠤᠯᠤᠰ ᠤᠨ ᠲᠡᠤᠬᠡ᠂ ᠰᠢᠶᠤᠤ ᠬᠠᠨ ᠤ ᠭᠡᠷ ᠤᠨ ᠪᠤᠭᠤᠯ ᠤᠨ ᠱᠠᠰᠳᠢᠷ︾ ᠲᠤ᠄ ︽ᠢᠯᠢᠵᠢᠨ ᠶᠠᠯᠢ ︵ ᠶᠧᠯᠢᠤᠢ ᠣᠪᠣᠭ ᠤᠨ ᠳᠡᠭᠡᠳᠤᠰ︶ ᠽᠤ᠋ ᠡᠤ ᠶᠢ ᠬᠠᠭᠠᠨ ᠪᠤᠯᠭᠠᠬᠰᠡᠨ ᠠᠴᠠ ᠶᠡᠭᠡ ᠰᠠᠭᠤᠷᠢᠨ ᠰᠠᠶ᠋ᠢ ᠲᠤᠬᠳᠠᠪᠤᠷᠢᠵᠢᠪᠠᠢ︾ ᠬᠡᠵᠤ  ᠲᠡᠮᠳᠡᠭᠯᠡᠪᠠ᠃ ᠡᠨᠡ ᠨᠢ ᠲᠠᠷᠤᠢ ᠠᠬᠠᠮᠠᠳ ᠢ ᠰᠤᠷᠪᠤᠯᠵᠢᠳᠠᠨ ᠠᠴᠠ ᠰᠤᠩᠭᠤᠬᠤ ᠲᠦᠷᠢᠮ ᠪᠤᠢ ᠪᠤᠯᠤᠬᠰᠡᠨ ᠳᠤ ᠴᠢᠭᠯᠡᠬᠦᠯᠤᠨ ᠬᠡᠯᠡᠭᠰᠡᠨ ᠶᠤᠮ᠃ ᠬᠢᠳᠠᠨ ᠪᠤᠯ ᠨᠡᠬᠦᠳᠠᠯᠴᠢᠨ ᠠᠶᠢᠮᠠᠭ ᠮᠦᠨ᠃ ᠤᠷᠢᠳᠤ ᠳᠠᠭᠠᠨ ᠲᠡᠳᠡ ᠬᠠᠯᠠᠭᠤᠨ ᠬᠦᠢᠳᠡᠨ ᠤ ᠠᠶ᠎ᠠ ᠪᠠᠷ ᠤᠰᠤ ᠪᠡᠯᠴᠢᠬᠡᠷ ᠢ ᠲᠠᠭᠠᠵᠤ᠂ ᠮᠠᠯ ᠠᠵᠤ ᠠᠬᠤᠢ ᠶᠢ ᠡᠵᠡᠩᠨᠠᠨ ᠪᠠᠶᠢᠵᠤ᠂ ᠲᠤᠬᠳᠠᠬᠰᠡᠨ ᠤᠷᠤᠨ  ᠰᠠᠭᠤᠴᠨ ᠦᠬᠡᠢ᠂ ᠢᠰᠡᠬᠡᠢ ᠶᠢᠨ ᠮᠠᠶᠢᠬᠠᠨ ᠢᠶᠠᠷ ᠭᠡᠷ ᠣᠷᠤᠨ ᠪᠤᠯᠭᠠᠵᠤ ᠪᠠᠶᠢᠪᠠ᠃ ᠲᠡᠳᠠ ᠬᠡᠳᠤᠶᠢᠪᠠᠷ ᠮᠠᠯ ᠠᠵᠤ ᠠᠬᠤᠢ ᠪᠠᠷ ᠭᠤᠣᠯ ᠪᠤᠯᠭᠠᠵᠤ ᠪᠠᠶᠢᠬᠰᠡᠨ ᠪᠤᠯᠪᠠᠴᠤ ᠵᠢᠭᠠᠰᠤ ᠪᠠᠷᠢᠵᠤ ᠠᠩ ᠬᠢᠬᠦ ᠨᠢ ᠨᠡᠶᠢᠭᠡᠮ ᠤᠨ ᠠᠵᠤ ᠠᠬᠤᠢ ᠳᠤ ᠮᠦᠨ ᠵᠤᠬᠢᠬᠤ ᠪᠠᠶᠢᠷᠢ ᠶᠢ ᠡᠵᠡᠯᠡᠵᠤ ᠪᠠᠶᠢᠯ᠎ᠠ᠃ ᠶᠠᠭ ︽ᠯᠢᠶᠣᠤ ᠤᠯᠤᠰ ᠤᠨ ᠲᠡᠤᠬᠡ᠂ ᠠᠮᠤ ᠪᠠᠷᠠᠭᠠᠨ ᠤ ᠲᠡᠮᠳᠡᠭᠯᠡᠯ︾ ᠳᠤ ᠬᠡᠯᠡᠭᠰᠡᠨᠴᠢᠯᠡᠨ᠄ ᠬᠢᠳᠠᠨ ᠤ ᠬᠠᠭᠤᠴᠢᠨ ᠵᠠᠩᠰᠢᠯ ᠪᠤᠯᠪᠠᠴᠤ ᠪᠠᠶᠠᠨ ᠠᠨᠤ ᠠᠳᠤᠭᠤᠨ ᠳᠤᠷ ᠪᠤᠢ᠂ ᠬᠦᠴᠤᠷᠬᠡᠭ ᠢᠨᠤ ᠴᠡᠷᠢᠭ ᠲᠤᠷ ᠪᠤᠢ᠂ ᠠᠳᠤᠭᠤᠨ ᠠᠨᠤ ᠤᠰᠤ ᠪᠡᠯᠴᠢᠭᠡᠷ ᠢ ᠲᠠᠭᠠᠵᠤ ᠪᠠᠯᠴᠢᠵᠤ᠂ ᠬᠦᠮᠤᠨ ᠢᠨᠤ ᠰᠦ ᠲᠠᠷᠠᠭ ᠤᠤᠭᠤᠮᠤᠢ︔ ᠨᠤᠮᠤ ᠰᠤᠮᠤ ᠨᠠᠮᠨᠠᠨ ᠬᠦᠷᠤᠬᠡ ᠬᠢᠵᠤ᠂ ᠡᠳᠤᠷ ᠤᠨ ᠬᠡᠷᠡᠭᠰᠡᠯ ᠢᠶᠠᠨ ᠬᠠᠩᠭᠠᠮᠤᠢ᠂ ᠠᠮᠤ ᠬᠦᠨᠡᠰᠦ ᠲᠡᠵᠢᠭᠡᠯ ᠪᠤᠷᠳᠤᠭ᠎ᠠ ᠶᠢ ᠴᠦᠮ ᠡᠬᠦᠨ ᠳᠤ ᠲᠦᠰᠢᠬᠦ ᠠᠵᠤᠭᠤ᠃ ᠽᠤ᠋ ᠡᠤ ᠬᠠᠭᠠᠨ ᠤ ᠦᠶ᠎ᠡ ᠪᠤᠯᠤᠭᠠᠳ᠂ ᠲᠠᠷᠢᠶ᠎ᠠ ᠲᠠᠷᠢᠬᠤ ᠪᠠ ᠪᠦᠰ ᠨᠡᠬᠡᠬᠦ᠂ ᠲᠡᠮᠤᠷ ᠬᠠᠶᠢᠯᠤᠭᠤᠯᠬᠤ᠂ ᠲᠠᠪᠤᠰᠤ ᠲᠤᠩᠭᠠᠬᠤ ᠵᠡᠷᠬᠡ ᠭᠠᠷ ᠦᠢᠯᠡᠳᠪᠤᠷᠢ ᠴᠦ ᠬᠦᠭᠵᠢᠨ ᠡᠬᠢᠯᠠᠵᠤ᠂ ︽ᠬᠡᠬᠡᠷ᠎ᠠ ᠭᠠᠳᠠᠨ᠎ᠠ ᠨᠤᠳᠤᠬᠰᠢᠨ ᠤᠷᠤᠰᠢᠵᠤ᠂ ᠲᠤᠬᠳᠠᠬᠰᠡᠨ ᠤᠷᠤᠨ ᠰᠠᠭᠤᠴᠨ ᠦᠬᠡᠢ︾  ᠪᠠᠷ ᠨᠡᠯᠢᠶᠡᠳ ᠶᠡᠭᠡ ᠬᠡᠪᠴᠢᠶᠡᠨ᠎ᠠ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠠᠴᠠ ᠰᠠᠯᠵᠤ᠂ ︽ᠠᠶᠢᠮᠠᠭ ᠤᠬᠰᠠᠭ᠎ᠠ ᠶᠢ ᠡᠬᠢᠯᠡᠨ ᠡᠪᠯᠡᠨ ᠵᠤᠬᠢᠶᠠᠵᠤ᠂ ᠲᠤᠰ ᠲᠤᠰ ᠬᠤᠪᠢᠳᠠᠬᠰᠡᠨ ᠭᠠᠵᠠᠷ ᠲᠠᠢ ᠪᠠᠶᠢᠬᠤ︾  ᠂ ᠲᠠᠷᠤᠢ ︽ᠯᠢᠶᠣᠤ ᠤᠯᠤᠰ ᠤᠨ ᠲᠡᠤᠬᠡ︾ ᠳᠤ ᠬᠡᠯᠡᠭᠰᠡᠨ ︽ᠬᠡᠪᠴᠢᠶ᠎ᠡ ᠬᠤᠪᠢᠶᠠᠨ ᠠᠶᠢᠮᠠᠭ ᠪᠠᠶᠢᠭᠤᠯᠤᠬᠰᠡᠨ︾ ᠨᠡᠯᠢᠶᠡᠳ ᠪᠠᠭ᠎ᠠ ᠬᠡᠪᠴᠢᠶᠡᠨ᠎ᠠ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠳᠤ ᠰᠢᠯᠵᠢᠨ ᠤᠷᠤᠵᠡᠢ᠃ ︽ᠬᠡᠪᠴᠢᠶ᠎ᠡ ᠬᠤᠪᠢᠶᠠᠨ ᠠᠶᠢᠮᠠᠭ ᠪᠠᠶᠢᠭᠤᠯᠬᠤ︾ ᠬᠡᠳᠡᠭ ᠨᠢ ᠲᠠᠷᠤᠢ ᠤᠭ ᠤᠨ ᠶᠡᠭᠡ ᠰᠢᠭ ᠬᠡᠪᠴᠢᠶᠡᠨ᠎ᠠ  ᠨᠡᠬᠦᠳᠡᠯᠯᠡᠬᠦ ᠳᠤ ᠲᠤᠬᠢᠷᠠᠬᠰᠡᠨ ︽ᠬᠦᠷᠢᠶ᠎ᠡ ︾ ᠪᠠᠨ ᠵᠢᠵᠢᠭ ᠰᠢᠭ ᠬᠡᠪᠴᠢᠶᠡᠨ᠎ᠠ ᠨᠡᠬᠦᠳᠡᠯᠯᠡᠬᠦ ᠳᠤ ᠲᠤᠬᠢᠷᠠᠬᠰᠡᠨ ︽ᠠᠶᠢᠮᠠᠭ︾  ᠪᠤᠯᠭᠠᠨ ᠦᠬᠡᠷᠡᠴᠢᠯᠡᠭᠰᠡᠨ ᠪᠦᠭᠡᠳ ᠡᠯ᠎ᠠ ︽ᠠᠶᠢᠮᠠᠭ︾ ᠨᠢ ᠮᠦᠨ ᠵᠤᠬᠢᠬᠤ ᠬᠡᠮᠵᠢᠶᠡᠨ ᠤ ᠭᠠᠵᠠᠷ ᠲᠠᠷᠢᠶ᠎ᠠ ᠬᠤᠪᠢᠳᠠᠨ ᠠᠪᠴᠤ᠂ ᠦᠪᠡᠷ ᠤᠨ ᠠᠶᠢᠮᠠᠭ ᠤᠨ ᠬᠢᠯᠢ ᠶᠢᠨ ᠵᠠᠭᠠᠭ ᠪᠤᠯᠭᠠᠬᠰᠡᠨ ᠪᠠᠶᠢᠨ᠎ᠠ᠃  ᠡᠶᠢᠮᠦ ᠪᠤᠯᠬᠤᠷ ᠡᠨᠡ ᠦᠶ᠎ᠡ ᠶᠢᠨ ᠠᠶᠢᠮᠠᠭ ᠤᠨ ᠤᠳᠬ᠎ᠠ ᠠᠭᠤᠯᠭ᠎ᠠ ᠨᠢ ᠤᠭ ᠠᠶᠢᠮᠠᠭ ᠤᠨ ᠬᠢ ᠠᠴᠠ ᠪᠠᠭ᠋ᠠᠨ ᠤᠨᠳᠤᠤ ᠪᠤᠯᠪᠠ᠃ ᠡᠨᠡ ᠦᠶ᠎ᠡ ᠶᠢᠨ ︽ᠠᠶᠢᠮᠠᠭ︾ ᠪᠤᠯ ᠭᠠᠵᠠᠷ ᠲᠠᠷᠢᠶ᠎ᠠ ᠲᠠᠢ ᠤᠶᠠᠯᠳᠤᠬᠰᠡᠨ᠂ ᠵᠤᠬᠢᠬᠤ ᠬᠡᠮᠵᠢᠶᠡᠨ ᠤ ᠭᠠᠵᠠᠷ ᠤᠷᠤᠨ ᠢ ᠡᠵᠡᠯᠡᠨ ᠪᠦᠷᠢᠯᠳᠤᠭ᠍ᠰᠡᠨ ᠮᠠᠯ ᠠᠵᠤ ᠠᠬᠤᠢ ᠪᠠ ᠲᠠᠷᠢᠶᠠᠯᠠᠩ ᠦᠢᠯᠡᠳᠪᠤᠷᠢᠯᠡᠯ ᠤᠨ ᠨᠢᠬᠡᠴᠨ ︵︽ᠠᠶᠢᠮᠠᠭ︾ ᠤᠨ  ᠪᠦᠷᠢᠯᠳᠤᠬᠦᠨ ᠨᠢ ᠬᠤᠪᠢᠶᠠᠨ ᠠᠪᠤᠬᠰᠡᠨ ︽ᠬᠤᠪᠢ ᠶᠢᠨ ᠭᠠᠵᠠᠷ︾ ᠲᠠᠭᠠᠨ ᠨᠡᠬᠦᠳᠡᠯᠯᠡᠨ ᠮᠠᠯᠵᠢᠳᠠᠭ︶ ᠪᠤᠯᠬᠤ ᠶᠢᠨ ᠬᠠᠮᠳᠤ᠂ ᠪᠠᠰᠠ ᠣᠪᠣᠭ ᠲᠦᠷᠤᠯ ᠪᠠ ᠠᠶᠢᠮᠠᠭ ᠢ ᠦᠨᠳᠤᠰᠤᠯᠡᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠬᠰᠡᠨ ᠴᠡᠷᠢᠭ ᠤᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠪᠤᠯᠤᠨ᠎ᠠ᠂ ᠲᠠᠷᠤᠢ ᠠᠶᠢᠯ ᠲᠤᠰᠬᠤᠨ ᠪᠤᠯᠬᠤ ᠮᠦᠷᠳᠡᠬᠡᠨ ᠪᠠᠰᠠ ᠴᠡᠷᠢᠭ ᠤᠨ ᠰᠠᠭᠤᠷᠢᠨ ᠭᠠᠵᠠᠷ ᠪᠤᠯᠬᠤ ᠶᠤᠮ᠃ ᠤᠶᠢᠯᠡᠳᠪᠤᠷᠢᠯᠡᠯ ᠤᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠪᠤᠯᠤᠨ ᠴᠡᠷᠢᠭ ᠤᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠶᠢ ᠴᠢᠩᠭ᠎ᠠ ᠤᠶᠠᠯᠳᠤᠭᠤᠯᠵᠤ᠂ ︽ᠠᠶᠢᠮᠠᠭ︾ ᠲᠤᠳᠤᠷᠠᠬᠢ ᠣᠪᠣᠭ ᠲᠦᠷᠤᠯ ᠤᠨ ᠪᠦᠷᠢᠯᠳᠤᠬᠡᠨ ᠨᠢ ᠴᠢᠯᠤᠬᠡᠳᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠪᠤᠯᠬᠤ ᠶᠢᠨ ᠬᠠᠮᠳᠤ ᠪᠠᠰᠠ ᠵᠡᠪᠰᠡᠭᠲᠦ ᠪᠠᠶᠢᠯᠳᠤᠬᠴᠢ ᠪᠤᠯᠬᠤ ᠶᠤᠮ᠃ ᠲᠡᠳᠡ ᠲᠠᠶᠢᠪᠤᠩ ᠴᠠᠭ ᠲᠤ ᠪᠤᠯ ᠤᠶᠢᠯᠡᠳᠪᠤᠷᠢᠯᠡᠯ ᠬᠦᠳᠡᠯᠮᠤᠷᠢ ᠳᠤ ᠤᠷᠤᠯᠴᠠᠵᠤ᠂ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠭᠠᠷᠬᠤ ᠳᠤ ᠬᠦᠷᠪᠡᠯ  ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠨ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠤᠷᠤᠯᠴᠠᠳᠠᠭ ᠪᠠᠶᠢᠨ᠎ᠠ᠃ ᠶᠠᠭ ︽ᠯᠢᠶᠣᠤ ᠤᠯᠤᠰ ᠤᠨ ᠲᠡᠤᠬᠡ᠂ ᠴᠡᠷᠢᠭ ᠤᠨ ᠬᠠᠮᠠᠭᠠᠯᠠᠯᠳᠠ ᠶᠢᠨ ᠲᠡᠮᠳᠡᠭᠯᠡᠯ ᠲᠡᠬᠡᠳᠤ ᠬᠢᠭᠡᠳ ᠬᠤᠷᠢᠭ᠎ᠠ ᠬᠠᠮᠠᠭᠠᠯᠠᠯᠳᠠ ᠶᠢᠨ  ᠲᠡᠮᠳᠡᠭᠯᠡᠯ ᠲᠡᠭᠡᠳᠤ︾ ᠳᠤ ᠬᠡᠯᠡᠭᠰᠡᠨᠴᠢᠯᠡᠨ᠄ ︽ᠠᠯᠢᠪᠠ ᠢᠷᠭᠡᠳ  ︵ᠡᠷᠡᠭᠳᠠᠢ︶ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨ ᠡᠴᠠ‌‍ᠲ᠋ᠡᠬᠡᠰᠢᠬᠢ᠂ ᠲᠠᠪᠢᠨ ᠨᠠᠰᠤᠨ ᠠᠴᠠ ᠲᠤᠷᠤᠬᠰᠢᠬᠢ ᠶᠢ ︽ᠴᠦᠮ︾ ᠴᠡᠷᠢᠭ ᠤᠨ ᠲᠠᠩᠰᠡᠨ ᠳᠤᠷ ᠤᠷᠤᠭᠤᠯᠤᠮᠤᠢ︾︔ ︽ᠲᠠᠶᠢᠨ  ᠭᠠᠷᠪᠠᠰᠤ ᠲᠤᠪᠳᠤᠯᠬᠤ ᠲᠠᠶᠢᠳᠤᠬᠤ ᠪᠠᠷ ᠤᠶᠢᠯᠡᠰ ᠪᠤᠯᠭᠠᠨ᠂ ᠴᠢᠯᠤᠬᠡ ᠴᠠᠭ ᠪᠤᠯᠪᠠᠰᠤ ᠮᠠᠯ ᠮᠠᠯᠵᠢᠬᠤ ᠵᠢᠭᠠᠰᠤ ᠪᠠᠷᠢᠵᠤ ᠠᠮᠢᠳᠤᠷᠠᠮᠤᠢ᠃︾ ᠦᠢᠯᠡᠳᠪᠤᠷᠢᠯᠡᠯ ᠪᠠ  ᠴᠡᠷᠢᠭ ᠤᠨ ᠶᠠᠪᠤᠳᠠᠯ ᠢ ᠬᠤᠤᠰᠯᠠᠭᠤᠯᠤᠬᠰᠡᠨ ᠡᠶᠢᠮᠤᠷᠬᠦ ᠵᠤᠬᠢᠶᠠᠨ  ᠪᠠᠶᠢᠭᠤᠯᠤᠯᠳᠠ ᠪᠤᠯ ᠲᠤᠮᠳᠠᠳᠤ ᠤᠯᠤᠰ ᠤᠨ  ᠡᠷᠳᠡᠨ  ᠤ ᠦᠶ᠎ᠡ ᠶᠢᠨ ᠣᠮᠠᠷᠠᠳᠤ ᠣᠷᠣᠨ ᠤ ᠨᠡᠬᠦᠳᠡᠯᠴᠢᠨ ᠦᠨᠳᠤᠰᠤᠳᠡᠨ ᠳᠤ ᠣᠯᠠᠨ ᠪᠠᠶᠢᠳᠠᠭ ᠪᠢᠯᠠ᠃
  
ᠢᠷᠡᠯᠲᠡ᠄ ︽ᠲᠣᠮᠳᠠᠳᠣ ᠣᠯᠣᠰ ᠤᠨ ᠡᠷᠳᠡᠨ ᠤ ᠣᠮᠠᠷᠠᠳᠤ ᠶᠢᠨ ᠦᠨᠳᠤᠰᠣᠳᠠᠡ ᠨᠦᠭᠦᠳ ᠤᠨ ᠲᠣᠪᠴᠢ ᠲᠡᠣᠬᠡ︾ ᠠᠴᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠤᠮ ᠲᠠᠢ ᠨᠦᠬᠦᠷᠯᠠᠪᠠᠯ ᠨᠢᠳᠦ ᠨᠡᠭᠡᠭᠡᠭᠳᠡᠨ᠎ᠠ
ᠬᠡᠷ ᠤᠨ ᠬᠦᠮᠤᠵᠢᠯ ᠤᠨ ᠲᠠᠪᠤᠨ ᠤᠬᠠᠮᠰᠠᠷ
ᠵᠢᠷᠠᠨ ᠣᠷᠬᠢᠵᠦ ᠳᠣᠭᠯᠠᠬᠤ
ᠠᠯᠲᠠᠨ ᠮᠡᠯᠡᠬᠡᠢ ᠣᠷᠣᠵᠣ ᠳᠣᠭᠯᠠᠬᠤ
ᠱᠠᠭ᠎ᠠ ᠨᠢᠰᠠᠯᠵᠣ ᠳᠣᠭᠯᠠᠬᠤ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号