ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠪᠢᠳᠡᠭᠦᠯᠭᠦ ᠪᠠ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠲᠡᠭᠷᠢ ᠲᠠᠭᠢᠬᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/11
            ᠪᠢᠳᠡᠭᠦᠯᠭᠦ ᠪᠠ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠲᠡᠭᠷᠢ ᠲᠠᠭᠢᠬᠤ                                                                         ᠳ᠋᠊᠂ ᠪᠠᠳᠥᠪᠠᠶᠠᠷ          ᠮᠣᠩᠭᠤᠯᠴᠣᠳ ᠡᠷᠲᠡ ᠳᠡᠭᠡᠳᠦ ᠶᠢᠨ ᠦᠶ᠎ᠡ ᠠᠴᠠ ᠪᠠᠨ ︽ᠲᠡᠭᠷᠢ ᠶᠢ ᠰᠢᠲᠦᠳᠡᠭ︾ ᠪᠠᠶᠢᠵᠠᠢ᠃ ᠣᠯᠠᠮᠵᠢᠯᠠᠯᠲᠦ ᠬᠡᠯᠪᠡᠷᠢ ᠨᠢ ᠲᠡᠭᠷᠢ ᠳᠤ ᠮᠦᠷᠭᠦᠬᠦ᠂ ᠲᠡᠭᠷᠢ ᠲᠠᠬᠢᠬᠤ ᠶᠣᠰᠣᠯᠠᠯ ᠪᠣᠯᠣᠨ᠎ᠠ᠃ ᠪᠠᠭᠠᠷᠢᠨᠴᠣᠳ ᠪᠦᠷ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠲᠡᠭᠷᠢ ᠳᠤ ᠮᠦᠷᠭᠦᠳᠡᠭ ᠶᠣᠰᠣ ᠲᠠᠢ᠃ ᠲᠡᠳᠡ ᠬᠤᠷᠢᠮ ᠬᠢᠪᠡᠯ ᠮᠦᠨ ᠪᠠᠰᠠ ᠲᠡᠭᠷᠢ ᠪᠣᠷᠬᠠᠨ ᠳᠠᠭᠠᠨ ᠮᠦᠷᠭᠦᠵᠦ ᠭᠠᠯ ᠤᠨ ᠪᠣᠷᠬᠠᠨ ᠪᠠ ᠲᠡᠭᠡᠳᠦᠰ ᠲᠡᠭᠡᠨ ᠮᠦᠷᠭᠦᠳᠡᠭ ᠵᠠᠩᠰᠢᠯ ᠲᠠᠢ ᠶᠤᠮ ᠃ ︽ᠠᠯᠢᠪᠠ ᠲᠡᠭᠷᠢ ᠶᠢᠨ ᠰᠠᠬᠢᠭᠤᠯᠰᠣᠨ ᠪᠣᠯ ᠪᠦᠷ ᠪᠠᠶᠢᠭᠠᠯᠢ ᠶᠢᠨ ᠬᠦᠴᠦᠨ ᠤ ᠰᠢᠳᠢᠴᠢᠯᠡᠯ᠂ ᠪᠠᠶᠢᠭᠠᠯᠢ ᠠᠴᠠ ᠳᠠᠪᠠᠭᠰᠠᠨ ᠬᠡᠲᠦ ᠬᠦᠴᠦᠨ ᠤ ᠲᠣᠰᠬᠠᠯ ᠪᠣᠯᠣᠨ᠎ᠠ︾᠃                   ᠮᠠᠨᠠᠶᠢᠬᠢᠨ ᠤ ᠰᠢᠨᠡᠯᠡᠬᠦ ᠵᠠᠩᠰᠢᠯ ᠭᠡᠵᠦ ᠡᠩ ᠤᠨ ᠮᠤᠩᠭᠤᠯᠴᠤᠳ ᠲᠠᠢ ᠠᠳᠠᠯᠢᠬᠠᠨ ᠯᠠ ᠪᠠᠶᠢᠳᠠᠭ ᠶᠤᠮ᠃ ᠭᠡᠬᠦ ᠳᠤ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠪᠦᠬᠦᠨ ᠦᠪᠡᠷᠮᠢᠴᠡ ᠵᠠᠩ ᠰᠣᠶᠣᠯ ᠲᠠᠢ ᠪᠠᠶᠢᠳᠠᠭ ᠪᠣᠯᠪᠠᠴᠤ ᠭᠠᠵᠠᠷ ᠭᠠᠵᠠᠷ  ᠤᠨ ᠵᠠᠩ᠂ ᠭᠦᠵᠡᠭᠡ ᠭᠦᠵᠡᠭᠡᠨ ᠤ ᠪᠣᠯᠣᠩ ᠭᠡᠭᠴᠢ ᠪᠠᠷ ᠬᠡᠰᠡᠭ ᠵᠠᠷᠢᠮ ᠳᠠᠭᠠᠨ ᠵᠦᠷᠢᠶ᠎ᠡ ᠲᠠᠢ ᠪᠠᠶᠢᠳᠠᠭ᠃ ᠡᠶᠢᠮᠦ  ᠠᠴᠠ ᠠᠳᠡ ᠵᠦᠪᠬᠡᠨ ᠵᠡᠭᠦᠨ ᠪᠠᠭᠠᠷᠢᠨ ᠤ ᠬᠡᠰᠡᠭ ᠮᠣᠩᠭᠤᠯᠴᠣᠳ ᠤᠨ ᠰᠢᠨᠡᠯᠡᠬᠦ ᠵᠠᠩᠰᠢᠯ ᠢ ᠳᠦᠭᠦᠮᠬᠡᠨ ᠶᠠᠷᠢᠵᠤ᠂ ᠦᠩᠭᠡᠷᠡᠬᠦ ᠮᠠᠷᠭᠠᠰᠢ ᠳᠤ ᠳᠤᠷᠠᠳᠬᠠᠯ ᠪᠤᠯᠭᠠᠨ ᠦᠵᠡᠬᠦ ᠮᠡᠷᠭᠡᠳ ᠲᠤ ᠰᠣᠨᠢᠷᠬᠠᠯ ᠪᠣᠯᠭᠠᠨ ᠵᠠᠯᠬᠠᠭᠤ ᠬᠦᠮᠦᠨ ᠤ ᠨᠠᠵᠠᠭᠠᠢ ᠪᠣᠳᠣᠯ ᠢᠶᠠᠨ ᠲᠡᠮᠳᠡᠭᠯᠡᠪᠠᠢ᠃ ᠨᠡᠶᠢᠭᠡᠮ ᠬᠦᠭᠵᠢᠵᠦ ᠲᠡᠥᠬᠡ ᠶᠢᠨ ᠬᠦᠷᠳᠦ ᠤᠷᠤᠭᠰᠢᠯᠠᠵᠣ ᠯᠠ ᠪᠠᠶᠢᠭᠰᠠᠨ ᠴᠠᠭ ᠲᠤ ᠠᠯᠢᠪᠠ ᠵᠦᠢᠯ ᠤᠨ ᠵᠠᠩ ᠳᠠᠳᠬᠠᠯ ᠤᠳ ᠨᠢ ᠳᠠᠭᠠᠯᠳᠣᠨ ᠭᠦᠭᠵᠢᠵᠦ ᠬᠤᠪᠢᠷᠠᠬᠤ ᠨᠢ ᠯᠠᠪᠲᠠᠢ᠃ ᠨᠢᠭᠡ ᠦᠨᠳᠦᠰᠦᠲᠡᠨ ᠳᠤ ᠵᠠᠪᠠᠯ ᠦᠪᠡᠷ ᠤᠨ ᠭᠡᠰᠡᠨ ᠵᠠᠩ ᠵᠢᠷᠦᠮ ᠲᠠᠢ ᠰᠣᠶᠣᠯ ᠪᠣᠯᠪᠠᠰᠣᠨ ᠲᠠᠢ ᠪᠠᠶᠢᠬᠤ ᠶᠤᠰᠤᠲᠠᠢ᠃ ᠨᠡᠩ ᠴᠦ ᠪᠤᠰᠤᠳ ᠢ ᠲᠠᠭᠤᠷᠢᠶᠠᠨ ᠦᠪᠡᠷ ᠤᠨ ᠪᠣᠯᠪᠠᠰᠣᠨ ᠰᠣᠶᠣᠯ ᠢᠶᠠᠨ ᠭᠤᠯᠣᠵᠣ ᠵᠢᠭᠰᠢᠨ ᠪᠦᠷᠢᠯᠭᠡᠨ ᠲᠠᠶᠠᠭᠳᠠᠵᠣ ᠶᠠᠭᠠᠬᠢᠭᠰᠠᠨ ᠴᠦ ᠪᠣᠯᠬᠤ ᠦᠭᠡᠢ᠃ ᠪᠢᠳᠡᠨ ᠳᠤ ᠬᠠᠷᠢᠨ ᠦᠪ ᠰᠤᠶᠤᠯ ᠤᠨ ᠦᠯᠡᠳᠡᠵᠦ ᠪᠠᠶᠢᠭ᠎ᠠ ᠵᠦᠢᠯ ᠢᠶᠠᠨ ᠰᠢᠨ᠎ᠡ ᠨᠡᠶᠢᠭᠡᠮ ᠰᠢᠨ᠎ᠡ ᠠᠮᠢᠳᠣᠷᠠᠯ ᠲᠠᠢ ᠪᠠᠨ ᠤᠶᠠᠯᠳᠣᠭᠤᠯᠣᠨ ᠰᠢᠩᠭᠡᠭᠡᠵᠦ ᠠᠭᠤᠰᠬᠠᠨ ᠰᠢᠮᠡᠳᠭᠡᠵᠦ ᠤᠯᠠᠮᠵᠢᠯᠠᠨ ᠠᠪᠬᠤ ᠴᠢᠬᠤᠯᠠ ᠲᠠᠢ ᠵᠦᠢᠯ ᠮᠠᠰᠢ ᠣᠯᠠᠨ ᠪᠠᠶᠢᠨ᠎ᠠ᠃ ᠮᠠᠨ ᠤ ᠡᠪᠦᠭᠡ ᠳᠡᠭᠡᠳᠦᠰ ᠠᠴᠠ ᠤᠯᠠᠮᠵᠢᠯᠠᠨ ᠦᠯᠡᠳᠡᠭᠰᠡᠨ ᠣᠥᠷ ᠰᠣᠶᠣᠯ ᠪᠠᠶᠠᠯᠢᠭ ᠵᠣᠵᠠᠭᠠᠨ ᠪᠠᠶᠢᠳᠠᠭ᠃ ᠭᠡᠪᠡᠴᠦ ᠲᠣᠰ ᠬᠦᠮᠦᠨ ᠤ ᠮᠡᠳᠡᠯᠭᠡ ᠬᠢᠵᠠᠭᠠᠷᠲᠠᠢ ᠪᠣᠯᠬᠤᠷ ᠲᠡᠷᠡ ᠪᠦᠬᠦᠨ ᠢ ᠤᠬᠠᠭᠤᠯᠣᠨ ᠰᠡᠶᠢᠷᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ᠃ ᠠᠳᠡ ᠵᠦᠪᠬᠡᠨ ᠪᠢᠲᠡᠭᠦᠯᠡᠬᠦ ᠪᠠ ᠰᠢᠨ᠎ᠡ  ᠶᠢᠨ ᠨᠢᠭᠡᠨ ᠤ ᠲᠡᠭᠷᠢ ᠳᠤ ᠮᠦᠷᠭᠦᠬᠦ ᠵᠠᠩ ᠵᠢᠷᠦᠮ ᠢ ᠳᠦᠭᠦᠮᠬᠡᠨ ᠲᠡᠮᠳᠡᠭᠯᠡᠶ᠎ᠡ᠃ ᠮᠣᠩᠭᠤᠯ ᠬᠦᠮᠦᠨ ᠰᠢᠨ᠎ᠡ ᠵᠢᠯ ᠰᠢᠨᠡᠯᠡᠬᠦ ᠳᠡᠭᠡᠨ ᠶᠠᠭᠤᠨ ᠤ ᠡᠮᠦᠨ᠎ᠡ ᠲᠡᠭᠷᠢ ᠪᠣᠷᠬᠠᠨ ᠢ ᠬᠠᠮᠤᠭ ᠤᠨ ᠳᠡᠭᠡᠳᠦ ᠰᠢᠲᠦᠭᠡᠨ ᠪᠣᠯᠭᠠᠨ ᠲᠠᠬᠢᠳᠠᠭ᠃ ᠤᠴᠢᠷ ᠨᠢ ︿ᠲᠡᠭᠷᠢ ᠠᠪᠤ᠂ ᠲᠡᠯᠡᠬᠡᠢ ᠡᠵᠢ﹀ ᠭᠡᠳᠡᠭ ᠪᠢᠰᠢᠥ ᠳ᠋ᠠ᠃                 ᠮᠠᠨ ᠤ ᠠᠳᠡ ᠭᠠᠯ ᠲᠠᠬᠢᠭᠰᠠᠨ ᠠᠴᠠ ᠡᠬᠢᠯᠡᠨ ᠪᠢᠲᠡᠭᠦᠨ ᠤ ᠡᠳᠦᠷ ᠪᠣᠯᠳᠠᠯ᠎ᠠ ᠲᠡᠭᠷᠢ ᠳᠤ ᠮᠦᠷᠭᠦᠬᠦ ᠰᠢᠨᠡᠯᠡᠬᠦ ᠪᠡᠯᠡᠳᠭᠡᠯ ᠬᠢᠳᠡᠭ᠃ ᠡᠭᠦᠨ ᠳᠤ ᠭᠤᠥᠯᠳᠠᠭᠤ ᠦᠷᠦᠮ᠎ᠡ ᠭᠠᠷᠭᠠᠬᠤ ︵ᠰᠦ ᠬᠦᠭᠡᠷᠡᠭᠦᠯᠬᠦ ᠶᠢ ᠬᠡᠯᠡᠵᠦ ᠪᠠᠶᠢᠨ᠎ᠠ︶᠂ ᠬᠠᠪᠰᠠᠢ ᠪᠣᠥᠪᠤ ᠬᠢᠬᠦ᠂ ᠬᠤᠯᠢᠭᠰᠠᠨ ᠪᠣᠳᠠᠭ᠎ᠠ ᠲᠠᠷᠣᠬᠤ᠂ ᠰᠢᠭᠢᠷ᠎ᠡ ᠲᠣᠯᠣᠭᠠᠢ ᠬᠤᠶᠢᠬᠠᠯᠠᠬᠤ᠂ ᠲᠡᠭᠷᠢ  ᠶᠢᠨ ᠵᠣᠯᠠ ᠤᠷᠢᠶᠠᠬᠤ ᠵᠡᠷᠭᠡ ᠠᠵᠢᠯ ᠤᠳ ᠢ ᠬᠢᠳᠡᠭ᠃ ᠦᠷᠦᠮ᠎ᠡ ᠭᠠᠷᠭᠠᠬᠤ ᠳᠤ᠂ ᠲᠦᠭᠦᠬᠡᠢ ᠰᠦ ᠪᠠᠨ ᠰᠢᠷᠡᠮᠦᠨ ᠲᠤᠭᠤᠬᠠᠨ ᠳᠤ ᠬᠢᠵᠦ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠪᠣᠴᠠᠯᠭᠠᠵᠣ᠂ ᠪᠣᠴᠠᠯᠪᠠᠯ ᠲᠠᠷᠣᠢ ᠰᠦ ᠬᠦᠭᠡᠷᠡᠬᠦ ᠪᠣᠯᠬᠤᠷ ᠰᠢᠨᠠᠭ᠎ᠠ ᠪᠠᠷ ᠰᠦ ᠪᠠᠨ ᠰᠠᠮᠣᠷᠠᠵᠣ ᠪᠠᠶᠢᠭᠠᠳ ᠰᠠᠶᠢᠲᠣᠷ ᠪᠣᠴᠠᠯᠭᠠᠬᠤ ᠬᠡᠷᠡᠭᠲᠠᠢ᠃ ᠨᠡᠯᠢᠶᠡᠳ ᠪᠣᠴᠠᠯᠭᠠᠭᠰᠠᠨ ᠤ ᠰᠡᠭᠦᠯᠡᠷ ᠭᠠᠯ  ᠢᠶᠠᠨ ᠨᠠᠮᠵᠠᠭᠠᠵᠣ ᠲᠣᠭᠤᠭ᠎ᠠ ᠲᠠᠢ ᠰᠦ ᠪᠠᠨ ᠪᠣᠰᠣᠳ ᠭᠠᠵᠠᠷ ᠭᠠᠷᠭᠠᠵᠣ ᠲᠠᠯᠪᠢᠬᠤ ᠬᠡᠷᠡᠭᠲᠠᠢ᠃ ᠭᠡᠬᠦ ᠳᠡᠭᠡᠨ ᠲᠣᠭᠤᠭ᠎ᠠ ᠲᠠᠢ ᠰᠦ ᠪᠠᠨ ᠬᠦᠳᠡᠯᠭᠡᠵᠣ ᠪᠣᠯᠬᠤ ᠦᠭᠡᠢ᠃ ᠵᠢᠪᠠᠷ ᠰᠠᠯᠬᠢᠨ ᠳᠤ ᠴᠣᠬᠢᠬᠤ ᠠᠴᠠ ᠣᠨᠴᠠ ᠬᠢᠴᠢᠶᠡᠬᠦ ᠬᠡᠷᠡᠭᠲᠠᠢ᠃ ᠲᠡᠭᠡᠭᠡᠳ ᠰᠦ ᠨᠢ ᠬᠦᠷᠦᠵᠦ ᠦᠷᠦᠮ᠎ᠡ ᠨᠢ ᠰᠠᠶᠢᠲᠣᠷ ᠠᠪᠴᠠᠯᠳᠣᠭᠰᠠᠨ ᠤ ᠰᠡᠭᠦᠯᠡᠷ ᠨᠢᠭᠡ ᠨᠠᠷᠢᠨ ᠬᠠᠭᠠᠯᠣᠭᠰᠠᠨ ᠬᠤᠯᠣᠰᠣᠨ ᠰᠠᠪᠠᠭ᠎ᠠ ᠪᠣᠶᠣ ᠳᠡᠷᠡᠰᠦ ᠡᠪᠡᠰᠦ ᠣᠯᠵᠣ ᠦᠷᠦᠮ᠎ᠡ ᠶᠢᠨ ᠢᠶᠠᠨ ᠳᠣᠥᠭᠤᠷ ᠨᠢ ᠰᠢᠷᠭᠤᠭᠤᠯᠵᠣ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠬᠠᠪᠰᠣᠷᠣᠨ ᠬᠠᠮᠣᠵᠣ ᠠᠪᠣᠭᠠᠳ ᠡᠷᠲᠡ ᠠᠴᠠ ᠪᠡᠯᠡᠳᠭᠡᠭᠰᠡᠨ ᠠᠮᠪᠠᠨ ᠪᠣᠶᠣ ᠲᠣᠭᠤᠭᠠᠨ ᠤ ᠪᠦᠷᠬᠦᠭᠦᠯ ᠳᠡᠭᠡᠷ᠎ᠡ ᠪᠠᠨ ᠲᠠᠯ᠎ᠠ ᠰᠠᠷᠠᠨ ᠤ ᠬᠡᠯᠪᠡᠷᠢ ᠲᠠᠢ ᠪᠣᠯᠭᠠᠨ ᠲᠠᠯᠪᠢᠭᠠᠳ ᠬᠠᠲᠠᠭᠠᠪᠠᠯ ᠳᠠᠷᠣᠢ ᠦᠷᠦᠮ᠎ᠡ ᠪᠣᠯᠬᠤ ᠶᠤᠮ᠃ ᠬᠠᠪᠰᠠᠢ ᠬᠢᠬᠦ ᠳᠤ᠂ ᠴᠠᠭᠠᠨ ᠭᠤᠯᠢᠷ ᠲᠠᠭᠠᠨ ᠰᠢᠷ᠎ᠠ ᠲᠣᠰᠣ᠂ ᠪᠣᠷᠠᠮ ᠬᠢᠵᠣ ᠨᠣᠬᠤᠭᠠᠳ ᠠᠮᠪᠠᠨ ᠲᠡᠭᠡᠷ᠎ᠡ ᠬᠠᠪᠲᠠᠭᠠᠶᠢᠯᠠᠨ ᠪᠦᠮᠪᠦᠷᠢᠭᠦᠯᠵᠦ ᠲᠣᠬᠢᠷᠠᠮᠵᠢᠲᠠᠢ ᠵᠣᠵᠠᠭᠠᠨ ᠪᠣᠯᠬᠤ ᠳᠤ ᠣᠷᠲᠣ ᠳᠦᠷᠪᠡᠯᠵᠢᠨ ᠪᠣᠶᠣ ᠣᠯᠠᠨ ᠶᠠᠩᠵᠣ ᠬᠡᠯᠪᠡᠷᠢᠲᠠᠢ ᠪᠣᠯᠭᠠᠨ ᠬᠡᠷᠴᠢᠭᠡᠳ ᠰᠢᠷ᠎ᠠ ᠲᠣᠰᠣ ᠪᠣᠶᠣ ᠰᠢᠯᠦᠨ ᠲᠣᠰᠣᠨ ᠳᠤ ᠪᠣᠴᠠᠯᠭᠠᠵᠣ᠂ ᠪᠣᠯᠭᠤᠭᠠᠵᠣ ᠠᠪᠣᠭᠰᠠᠨ ᠢ ᠬᠠᠪᠰᠠᠢ ᠪᠣᠭᠤᠷᠰᠤᠭ ᠭᠡᠳᠡᠭ᠃ ᠬᠤᠯᠢᠭᠰᠠᠨ ᠪᠣᠳᠠᠭ᠎ᠠ ᠨᠢ᠂ ᠬᠠᠭᠤᠷᠣᠭᠰᠠᠨ ᠪᠣᠳᠠᠭ᠎ᠠ ᠪᠠᠨ ᠢᠩ ᠳᠡᠭᠡᠷ᠎ᠡ ᠬᠡᠮᠬᠡᠯᠡᠵᠦ ᠠᠪᠣᠭᠠᠳ ᠰᠢᠷ᠎ᠠ ᠲᠣᠰᠣ᠂ ᠪᠣᠷᠠᠮ ︵ᠱᠠᠲᠠᠩ︶ ᠲᠠᠢ ᠬᠤᠯᠢᠵᠣ ᠲᠣᠭᠤᠭᠠᠨ ᠳᠠᠭᠠᠨ ᠬᠢᠵᠦ ᠲᠣᠭᠤᠭ᠎ᠠ ᠪᠠᠨ ᠬᠠᠯᠠᠭᠠᠵᠣ ᠲᠣᠰᠣ ᠭᠤᠯᠢᠷ ᠨᠢ ᠨᠡᠶᠢᠯᠡᠵᠣ ᠢᠷᠡᠬᠦ ᠶᠢᠨ ᠦᠶ᠎ᠡ  ᠳᠤ ᠭᠠᠷᠭᠠᠵᠣ ᠠᠪᠣᠭᠠᠳ ᠬᠡᠪ ᠳᠤ ᠲᠠᠷᠣᠵᠣ ᠠᠪᠣᠪᠠᠯ ᠳᠠᠷᠣᠢ ᠪᠣᠯᠴᠢᠬᠠᠨ᠎ᠠ᠃                 ᠵᠢᠯ ᠪᠦᠷᠢ ᠶᠢᠨ ᠬᠠᠭᠤᠴᠢᠨ ᠵᠢᠯ ᠤᠨ ᠬᠠᠮᠤᠭ ᠰᠡᠭᠦᠯ ᠤᠨ ᠡᠳᠦᠷ ᠨᠢ ᠳᠠᠷᠤᠢ ᠡᠨᠡ ᠵᠢᠯ ᠤᠨ ᠪᠢᠲᠡᠭᠦᠨ ᠪᠣᠯᠬᠤ ᠶᠤᠮ᠃ ᠳᠠᠷᠣᠢ ᠯᠠ ︵ᠬᠦᠬᠡᠭᠡ ᠰᠠᠷ᠎ᠠ︶ ᠰᠠᠷ᠎ᠠ ᠶᠢᠨ ᠬᠤᠷᠢ ᠶᠢᠰᠦᠨ ᠪᠣᠶᠣ ᠭᠤᠴᠢᠨ ᠪᠣᠯ ᠪᠢᠲᠡᠭᠦᠨ ᠤ ᠡᠳᠦᠷ ᠶᠤᠮ᠃ ᠪᠢᠲᠡᠭᠦᠨ ᠪᠣᠯ ᠨᠢᠭᠡ ᠵᠢᠯ ᠤᠨ ᠬᠠᠮᠤᠭ ᠤᠨ  ᠶᠠᠭᠠᠷᠠᠯᠲᠠᠢ ᠡᠳᠦᠷ ᠪᠣᠯᠬᠤ ᠶᠤᠮ᠃ ᠮᠦᠨ ᠪᠢᠲᠡᠭᠦᠨ  ᠤ ᠳᠣᠯᠣᠭᠠᠨ ᠲᠣᠭᠤᠭ᠎ᠠ ᠢᠳᠡᠨ᠎ᠡ ᠭᠡᠵᠦ ᠬᠡᠯᠡᠳᠡᠭ᠃ ᠪᠢᠲᠡᠭᠦᠨ ᠪᠣᠯᠬᠤ ᠠᠴᠠ ᠡᠮᠦᠨ᠎ᠡ ᠡᠪᠣᠯ ᠤᠨ ᠢᠳᠡᠰᠢᠨ ᠤ ᠬᠤᠨᠢ ᠢᠮᠠᠭᠠᠨ ᠲᠣᠯᠣᠭᠠᠢ᠂ ᠰᠢᠭᠢᠷ᠎ᠡ ᠪᠠᠨ ᠬᠤᠶᠢᠬᠠᠯᠠᠵᠣ ᠴᠢᠨᠠᠬᠤ ᠪᠠᠷ ᠪᠡᠯᠡᠳᠭᠡᠳᠡᠭ᠃ ᠪᠢᠲᠡᠭᠦᠨ ᠤ ᠡᠮᠦᠨ᠎ᠡ ᠡᠳᠦᠷ ᠲᠡᠭᠦᠨ ᠢᠶᠠᠨ ᠴᠢᠨᠠᠵᠣ ᠢᠳᠡᠬᠦ ᠪᠠᠷ ᠪᠣᠯᠭᠤᠭᠠᠵᠣ ᠲᠠᠯᠪᠢᠨ᠎ᠠ᠃ ᠤᠯᠠᠩᠬᠢ ᠨᠢ ᠪᠦᠷ ᠪᠢᠲᠡᠭᠦᠨ ᠤ ᠦᠷᠯᠦᠭᠡ ᠪᠡᠯᠡᠳᠭᠡᠭᠰᠡᠨ ᠰᠢᠭᠢᠷ᠎ᠡ ᠲᠣᠯᠣᠭᠠᠢ ᠪᠠᠨ ᠬᠠᠯᠠᠭᠤᠯᠣᠭᠠᠳ ᠪᠢᠲᠡᠭᠦᠥ ᠬᠤᠭᠤᠯᠠ ᠢᠳᠡᠳᠡᠭ᠃ ᠢᠳᠡᠬᠦ ᠠᠴᠠ ᠪᠠᠨ ᠡᠮᠦᠨ᠎ᠡ ᠵᠠᠪᠠᠯ ᠲᠡᠭᠷᠢ ᠪᠣᠷᠬᠠᠨ ᠳᠠᠭᠠᠨ ᠡᠷᠭᠦᠵᠦ ᠳᠡᠭᠡᠳᠦᠰ ᠲᠡᠭᠡᠨ ᠡᠷᠭᠦᠳᠡᠭ ᠶᠤᠮ᠃ ᠡᠷᠭᠦᠬᠦ ᠳᠡᠭᠡᠨ ᠬᠤᠨᠢᠨ ᠲᠣᠯᠤᠭᠠᠢ ᠶᠢᠨ ᠴᠢᠬᠢ ᠶᠢ ᠨᠢ ᠣᠭᠲᠣᠯᠵᠣ ᠠᠪᠣᠭᠠᠳ ᠪᠣᠷᠬᠠᠨ ᠳᠠᠭᠠᠨ ᠡᠷᠭᠦᠵᠦ᠂ ᠬᠢᠲᠤᠭ᠎ᠠ ᠪᠠᠷ ᠵᠢᠵᠢᠭᠯᠡᠨ ᠬᠡᠷᠴᠢᠭᠡᠳ ᠲᠡᠭᠷᠢ ᠪᠣᠷᠬᠠᠨ᠂ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠭ ᠰᠠᠪᠳᠠᠭ᠂ ᠳᠡᠭᠡᠳᠦᠰ ᠲᠡᠭᠡᠨ ᠡᠷᠭᠦᠨ᠎ᠡ᠃ ᠪᠠᠰᠠ ᠠᠷᠢᠬᠢᠨ ᠰᠠᠴᠣᠯᠢ ᠪᠠᠨ ᠡᠷᠭᠦᠨ᠎ᠡ᠃ ᠡᠷᠭᠦᠯᠲᠡ ᠰᠠᠴᠣᠯᠢ ᠪᠠᠨ ᠪᠦᠬᠦᠨ ᠢ ᠡᠷᠭᠦᠵᠦ ᠪᠠᠷᠠᠪᠠᠯ᠂ ᠪᠦᠭᠦᠳᠡᠭᠡᠷ ᠢᠶᠠᠨ ᠰᠢᠭᠢᠷ᠎ᠡ ᠲᠣᠯᠣᠭᠠᠢ ᠪᠠᠨ ᠮᠦᠯᠵᠢᠵᠦ ᠪᠢᠲᠡᠭᠦᠥ ᠬᠤᠭᠤᠯᠠ ᠬᠡᠮᠡᠨ ᠢᠳᠡᠬᠦ ᠶᠤᠮ᠃ ᠠᠶᠢᠯ ᠡᠷᠦᠬᠡ ᠪᠣᠯᠭᠠᠨ ᠭᠡᠷ ᠲᠡᠷᠭᠡ᠂ ᠬᠦᠷᠢᠶ᠎ᠡ ᠬᠠᠰᠢᠶ᠎ᠠ ᠪᠠᠨ ᠭᠢᠯᠠᠶᠢᠲᠠᠯ᠎ᠠ ᠴᠡᠪᠡᠷᠯᠡᠨ ᠭᠡᠷ ᠤᠨ ᠲᠣᠲᠣᠷ᠎ᠠ ᠪᠠᠨ ᠵᠢᠷᠤᠭ ᠬᠤᠸᠠᠷ ᠢᠶᠠᠷ ᠭᠤᠶᠣᠯᠠᠨ ᠴᠢᠮᠡᠵᠦ᠂ ᠭᠠᠳᠠᠨ᠎ᠠ ᠪᠠᠨ ᠳᠠᠷᠴᠤᠭ ᠬᠡᠶᠢᠮᠣᠷᠢ ᠪᠠᠨ ᠪᠣᠰᠬᠠᠨ᠂ ᠰᠢᠨ᠎ᠡ ᠬᠤᠪᠴᠠᠰᠣ ᠬᠤᠨᠠᠷ ᠢᠶᠠᠨ ᠭᠠᠷᠭᠠᠵᠣ  ᠠᠪᠳᠠᠭ ᠪᠠᠶᠢᠨ᠎ᠠ᠃ ᠪᠣᠥᠪᠤ ᠪᠣᠭᠤᠷᠰᠤᠭ ᠢᠶᠠᠨ ᠲᠠᠪᠠᠭᠯᠠᠵᠣ ᠬᠦᠵᠢ ᠵᠣᠯᠠ ᠡᠷᠭᠦᠨ ᠪᠣᠷᠬᠠᠨ ᠢᠶᠠᠨ ᠲᠠᠬᠢᠳᠠᠭ᠃ ᠡᠨᠡ ᠡᠳᠦᠷ ᠪᠣᠵᠠᠷ ᠪᠣᠷᠲᠠᠭ ᠬᠤᠭ ᠨᠣᠪᠰᠢ ᠪᠣᠯᠣᠭᠰᠠᠨ ᠶᠠᠭᠤᠮ᠎ᠠ ᠪᠠᠨ ᠬᠤᠯᠠ ᠠᠪᠠᠴᠢᠵᠤ ᠳᠠᠯᠳᠠ ᠭᠠᠵᠠᠷ ᠬᠠᠶᠠᠬᠤ ᠪᠣᠶᠣ ᠰᠢᠲᠠᠭᠠᠳᠠᠭ᠃ ᠪᠢᠲᠡᠭᠦᠨ᠂ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠬᠤᠶᠠᠷ ᠡᠳᠦᠷ ᠡᠮ ᠣᠥᠭᠤᠳᠠᠭ ᠦᠭᠡᠢ᠃ ᠭᠡᠷ ᠵᠠᠭᠤᠷ᠎ᠠ  ᠪᠠᠨ ᠬᠡᠯᠡ ᠠᠮᠠ ᠪᠣᠯᠬᠤ ᠶᠢ ᠣᠨᠴᠠ ᠴᠡᠭᠡᠷᠯᠡᠳᠡᠭ ᠪᠦᠭᠡᠳ ᠮᠠᠯ ᠬᠠᠷ᠎ᠠ ᠪᠠᠨ ᠴᠣᠬᠢᠳᠠᠭ ᠦᠭᠡᠢ᠃ ᠪᠢᠲᠡᠭᠦᠨ ᠤ ᠣᠷᠣᠢ ᠪᠠᠩᠰᠢ ᠢᠳᠡᠳᠡᠭ᠃ ᠪᠠᠩᠰᠢ ᠶᠢᠨ ᠳᠣᠲᠣᠷ᠎ᠠ ᠪᠠᠨ ᠬᠦᠪᠦᠩ᠂ ᠵᠣᠭᠤᠰ᠂ ᠪᠣᠳᠠᠭ᠎ᠠ᠂ ᠨᠡᠭᠦᠷᠡᠰᠦ᠂ ᠣᠳᠠᠰᠣ ᠵᠡᠷᠭᠡ ᠶᠢ ᠬᠢᠭᠡᠳ ᠢᠳᠡᠬᠦ ᠶᠢᠨ ᠦᠶ᠎ᠡ ᠳᠤ ᠵᠣᠭᠤᠰ ᠲᠠᠭᠠᠷᠠᠭᠰᠠᠨ ᠨᠢ ᠠᠷᠪᠢᠨ ᠵᠣᠭᠤᠰ ᠲᠠᠢ ᠪᠣᠯᠵᠣ᠂ ᠬᠦᠪᠦᠩ ᠲᠠᠭᠠᠷᠠᠭᠰᠠᠨ ᠨᠢ ᠴᠠᠭᠠᠨ ᠰᠡᠳᠬᠢᠯ ᠲᠠᠢ᠂ ᠨᠡᠭᠦᠷᠡᠰᠦ ᠲᠠᠭᠠᠷᠠᠭᠰᠠᠨ ᠨᠢ ᠬᠠᠷ᠎ᠠ ᠰᠡᠳᠬᠢᠯ ᠲᠠᠢ ᠭᠡᠵᠦ ᠶᠡᠬᠡᠯ᠎ᠡ ᠬᠦᠭᠡᠷᠦᠯᠳᠦᠵᠡᠭᠡᠳᠡᠭ ᠶᠤᠮ᠃ ᠪᠢᠲᠡᠭᠦᠨ ᠤ ᠪᠠᠩᠰᠢ᠂ ᠠᠷᠢᠬᠢ ᠶᠢ ᠮᠦᠨ ᠲᠡᠭᠷᠢ ᠪᠣᠷᠬᠠᠨ᠂ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠪᠦᠬᠦᠨ ᠳᠤ ᠡᠷᠭᠦᠵᠦ᠂ ᠡᠪᠦᠭᠡ ᠲᠡᠭᠡᠳᠦᠰ ᠲᠡᠭᠡᠨ ᠮᠦᠨ ᠭᠡᠭᠡᠵᠦ ᠣᠷᠬᠢᠭᠳᠠᠭᠤᠯᠣᠯ ᠦᠭᠡᠢ ᠪᠠᠷ ᠰᠠᠶᠢᠨ ᠡᠷᠭᠦᠬᠦ ᠬᠡᠷᠡᠭᠲᠠᠢ᠃ ᠪᠦᠬᠦ ᠭᠡᠷ ᠤᠨ ᠬᠦᠮᠦᠰ ᠪᠦᠷ ᠰᠠᠭᠤᠯᠴᠠᠵᠣ ᠠᠪᠤ ᠡᠵᠢ ᠠᠬᠠᠰ ᠵᠠᠬᠠᠰ ᠲᠠᠭᠠᠨ ᠠᠷᠢᠬᠢ ᠬᠡᠮᠨᠡᠨ᠎ᠡ᠃  ᠪᠠᠩᠰᠢ ᠪᠠᠨ ᠢᠳᠡᠵᠦ ᠪᠠᠷᠠᠪᠠᠯ ᠳᠠᠷᠣᠢ ᠨᠢᠭᠡ ᠠᠶᠠᠭ᠎ᠠ ᠪᠠᠩᠰᠢ ᠶᠢᠨ ᠳᠡᠭᠡᠷ᠎ᠡ ᠨᠢᠭᠡ ᠪᠣᠶᠣ ᠬᠡᠳᠦᠨ ᠰᠢᠭᠢᠷ᠎ᠡ ᠲᠠᠯᠪᠢᠨ ᠬᠠᠷᠢᠯᠴᠠᠨ ᠬᠦᠷᠭᠡᠯᠴᠡᠳᠡᠭ ᠪᠢᠯᠠ᠃         ᠪᠢᠲᠡᠭᠦᠨ ᠤ ᠡᠳᠦᠷ ᠲᠡᠭᠷᠢ ᠶᠢᠨ ᠵᠣᠯᠠ ᠣᠷᠢᠶᠠᠬᠤ ᠪᠣᠯ ᠨᠢᠭᠡᠨ ᠲᠣᠩ ᠨᠠᠷᠢᠯᠢᠭ ᠠᠵᠢᠯ ᠶᠤᠮ᠃ ᠤᠷᠢᠳᠦ  ᠶᠢᠨ ᠯᠠᠮᠠ ᠨᠠᠷ ᠰᠦᠮ᠎ᠡ ᠰᠣᠪᠣᠷᠭ᠎ᠠ ᠳᠤ ᠵᠤᠯᠠ ᠡᠷᠭᠦᠬᠦ ᠳᠡᠭᠡᠨ ᠵᠤᠯᠠ ᠶᠢᠨ ᠭᠤᠥᠯ ᠢᠶᠠᠨ ᠦᠯᠦᠨ ᠴᠠᠭᠠᠨ ᠡᠪᠡᠰᠦᠨ  ᠤ ᠤᠷᠣᠢ ᠪᠠᠷ ᠬᠢᠳᠡᠭ᠂ ᠭᠡᠬᠦ ᠳᠡᠭᠡᠨ ᠬᠡᠳᠦᠨ ᠳᠠᠪᠬᠤᠷ ᠬᠦᠪᠣᠩ ᠢᠶᠠᠷ ᠴᠢᠩᠭ᠎ᠠ ᠤᠷᠢᠶᠠᠳᠠᠭ᠂ ᠢᠩᠬᠢᠪᠡᠯ ᠵᠤᠯᠠ  ᠶᠢᠨ ᠭᠤᠥᠯ ᠨᠢ ᠴᠢᠩᠭ᠎ᠠ ᠪᠣᠯᠬᠤ ᠮᠦᠷᠲᠡᠭᠡᠨ ᠤᠳᠠᠭᠠᠨ ᠴᠠᠭ ᠠᠰᠠᠬᠤ ᠶᠤᠮ᠃ ᠲᠡᠭᠷᠢ ᠶᠢᠨ ᠵᠤᠯᠠ ︵ᠪᠠᠰᠠ ᠪᠠᠮᠪᠠᠷ ᠠᠰᠠᠭᠠᠬᠤ ᠭᠡᠳᠡᠭ︶ ᠤᠷᠢᠶᠠᠬᠤ ᠳᠤ ᠬᠠᠷᠢᠨ ᠳᠡᠷᠡᠰᠦ ᠡᠪᠡᠰᠦᠨ ᠤ ᠭᠤᠥᠯ ᠢᠶᠠᠷ ᠬᠢᠳᠡᠭ᠃ ᠡᠭᠦᠨ ᠳᠤ ᠵᠦᠪᠬᠡᠨ ᠨᠢᠭᠡ ᠯᠡ ᠭᠤᠥᠯ ᠤᠷᠢᠶᠠᠬᠤ ᠪᠢᠰᠢ ᠬᠠᠷᠢᠨ ᠵᠠᠭᠤ ᠨᠠᠢᠮᠠᠨ ᠭᠤᠥᠯ ᠤᠷᠢᠶᠠᠳᠠᠭ ᠲᠣᠯᠠ ᠨᠡᠯᠢᠶᠡᠳ ᠴᠠᠭ ᠬᠡᠷᠡᠭᠰᠡᠬᠦ ᠶᠤᠮ᠃ ᠨᠢᠭᠡ ᠭᠤᠥᠯ ᠢ ᠬᠤᠶᠠᠷ ᠭᠤᠷᠪᠠᠨ ᠮᠦᠷ ᠣᠷᠢᠶᠠᠬᠤ ᠬᠡᠷᠡᠭᠲᠠᠢ᠃ ᠡᠩ ᠤᠨ ᠪᠠᠭ᠎ᠠ ᠵᠣᠯᠠ ᠶᠢᠨ ᠭᠤᠥᠯ ᠤᠨ ᠦᠵᠦᠭᠦᠷ ᠢ ᠴᠢᠩᠭ᠎ᠠ ᠤᠷᠢᠶᠠᠳᠠᠭ ᠪᠣᠯᠪᠠᠴᠣ ᠪᠠᠮᠪᠠᠷ ᠢ ᠬᠠᠷᠢᠨ ᠦᠵᠦᠭᠦᠷ ᠢ ᠨᠢ ᠰᠣᠯᠠ ᠲᠠᠯᠪᠢᠵᠣ ᠲᠤᠭ ᠰᠢᠭ᠋ ᠦᠯᠡᠳᠡᠭᠡᠳᠡᠭ᠃ ᠡᠨᠡ ᠮᠡᠲᠦ ᠪᠠᠷ ᠲᠤᠭ᠎ᠠ ᠶᠣᠰᠣᠭᠠᠷ ᠪᠦᠬᠦᠨ ᠢ ᠤᠷᠢᠶᠠᠵᠣ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠨᠢᠭᠡ ᠤᠷᠭ᠎ᠠ  ᠶᠢᠨ ᠴᠡᠭᠡᠵᠢ ︵ᠶᠣᠵᠣᠭᠤᠷ︶ ᠤᠯᠵᠣ ᠦᠵᠦᠭᠦᠷ ᠲᠡᠭᠡᠷ᠎ᠡ ᠨᠢ ᠲᠡᠳᠡᠭᠡᠷ ᠭᠤᠥᠯ ᠤᠳ ᠢᠶᠠᠨ ᠤᠷᠤᠢ ᠶᠢ ᠨᠢ ᠵᠡᠷᠭᠡᠴᠡᠭᠦᠯᠦᠨ ᠱᠦᠭᠦᠷ ᠤᠷᠢᠶᠠᠬᠤ ᠰᠢᠭ ᠳᠣᠭᠤᠶᠢᠳᠠᠭᠤᠯᠣᠨ ᠬᠦᠪᠦᠩ ᠤᠳᠠᠰᠣ ᠪᠠᠷ ᠴᠢᠩᠭ᠎ᠠ ᠤᠷᠢᠶᠠᠨ᠎ᠠ᠃ ᠡᠨᠡᠬᠦ ᠭᠤᠥᠯ ᠨᠢᠭᠡᠪᠦᠷᠢ ᠶᠢ ᠨᠢᠭᠡ ᠲᠤᠬᠤᠢ ᠤᠷᠴᠢᠮ ᠤᠷᠢᠶᠠᠳᠠᠭ᠃ ᠢᠩᠬᠢᠪᠡᠯ ᠡᠨᠡᠬᠦ ᠪᠠᠮᠪᠠᠷ ᠤᠨ ᠭᠤᠥᠯ ᠨᠢ ᠪᠠᠷᠤᠭ ᠨᠢᠭᠡ ᠲᠣᠬᠤᠢ ᠪᠣᠯᠣᠨ᠎ᠠ᠃ ᠤᠷᠣᠨ ᠨᠣᠲᠤᠭ ᠤᠨ ᠵᠠᠩᠰᠢᠯ ᠤᠨ ᠵᠦᠷᠢᠶ᠎ᠡ ᠠᠴᠠ ᠪᠣᠯᠵᠣ ᠵᠠᠷᠢᠮ ᠤᠷᠤᠨ ᠳᠤ ᠲᠦᠳᠡᠭ ᠭᠠᠯ ᠲᠦᠯᠡᠵᠦ ᠲᠡᠭᠷᠢ ᠳᠤ ᠮᠦᠷᠭᠦᠳᠡᠭ ᠭᠡᠨ᠎ᠡ᠃ ᠪᠣᠳᠣᠬᠤ ᠳᠤ ᠡᠨᠡ ᠨᠢ ᠳᠦᠭᠦᠮᠴᠢᠯᠡᠭᠰᠡᠨ ᠶᠠᠪᠣᠳᠠᠯ ᠪᠣᠯᠣᠨ᠎ᠠ᠃ ᠤᠴᠢᠷ ᠨᠢ ᠨᠡᠭᠦᠳᠡᠯ ᠮᠠᠯᠵᠢᠯ ᠡᠷᠬᠢᠯᠡᠵᠦ ᠪᠠᠶᠢᠭ᠎ᠠ ᠮᠣᠩᠭᠤᠯᠴᠣᠳ ᠵᠢᠯ ᠤᠨ ᠳᠦᠷᠪᠡᠨ  ᠤᠯᠠᠷᠢᠯ ᠢᠶᠠᠨ ᠲᠠᠭᠠᠨ ᠨᠡᠭᠦᠵᠦ ᠶᠠᠪᠣᠳᠠᠭ ᠲᠣᠯᠠ ᠡᠪᠦᠯ ᠤᠨ ᠤᠯᠠᠷᠢᠯ ᠳᠤ ᠦᠩ ᠰᠢᠮᠡᠯᠢᠭ ᠮᠦᠷᠲᠡᠭᠡᠨ ᠢᠭ᠌ᠴᠢ ᠵᠤᠵᠠᠭᠠᠨ ᠡᠪᠡᠰᠦ ᠬᠤᠯᠤᠰᠣ ᠲᠠᠢ ᠨᠦᠮᠦᠷᠢ ᠭᠠᠵᠠᠷ ᠢ ᠰᠣᠩᠭᠤᠬᠤ ᠨᠢ ᠯᠠᠪᠲᠠᠢ ᠶᠤᠮ᠃ ᠲᠡᠶᠢᠮᠦ ᠠᠴᠠ ᠮᠤᠩᠭᠤᠯ ᠭᠡᠷ ᠤᠨ ᠬᠠᠵᠠᠭᠤ  ᠳᠤ ᠢᠯᠡ ᠭᠠᠯ ᠲᠦᠯᠡᠵᠦ ᠲᠡᠭᠷᠢ ᠳᠤ ᠮᠦᠷᠭᠦᠨ᠎ᠡ ᠭᠡᠭᠴᠢ ᠪᠠᠶᠢᠵᠣ ᠪᠣᠯᠣᠰᠢ ᠦᠭᠡᠢ ᠬᠡᠷᠡᠭ ᠶᠤᠮ᠃ ᠡᠶᠢᠮᠦᠷᠬᠦ ᠪᠠᠮᠪᠠᠷ ᠠᠰᠠᠭᠠᠬᠤ ᠨᠢ ᠦᠨᠳᠦᠷ ᠲᠡᠭᠡᠷ᠎ᠡ ᠪᠠᠮᠪᠠᠷ ᠤᠨ ᠭᠠᠯ ᠨᠢ ᠳᠣᠸᠠᠯᠠᠵᠣ ᠳᠦᠷᠪᠡᠨ ᠵᠦᠭ ᠤᠨ ᠤᠶᠢᠷ᠎ᠠ ᠤᠷᠴᠢᠮ  ᠢ ᠡᠳᠦᠷ ᠮᠡᠲᠦ ᠭᠡᠷᠡᠯᠲᠦᠭᠦᠯᠵᠦ ᠭᠠᠯ ᠨᠢ ᠠᠮᠠᠷᠬᠠᠨ ᠤᠮᠲᠠᠷᠠᠬᠤ ᠦᠭᠡᠢ ᠮᠦᠷᠲᠡᠭᠡᠨ ᠪᠣᠲᠠᠷᠠᠵᠤ ᠲᠠᠰᠣᠷᠠᠵᠤ ᠶᠠᠪᠣᠬᠤ ᠦᠭᠡᠢ ᠶᠤᠮ᠃ ᠡᠨᠡ ᠪᠠᠮᠪᠠᠷ ᠤᠨ ᠡᠰᠢ ᠶᠢ ᠡᠪᠦᠯ ᠤᠨ ᠬᠦᠯᠳᠡᠭᠦᠥ ᠳᠤ ᠭᠠᠵᠠᠷ ᠬᠠᠳᠬᠤᠵᠣ ᠪᠣᠯᠬᠤ ᠦᠭᠡᠢ ᠲᠣᠯᠠ ᠬᠡᠷᠪᠡ ᠴᠠᠰᠤ ᠲᠠᠢ ᠪᠤᠯ ᠴᠠᠰᠤᠨ ᠤᠪᠣᠭᠠᠨ ᠳᠤ ᠬᠠᠳᠬᠤᠨ᠎ᠠ᠂ ᠦᠭᠡᠢ ᠪᠤᠯ ᠮᠠᠩᠬ᠎ᠠ ᠰᠢᠷᠤᠢ ᠶᠢ ᠤᠪᠣᠭᠠᠯᠠᠵᠣ ᠲᠣᠮᠳᠠ ᠨᠢ ᠨᠦᠬᠡ ᠭᠠᠷᠭᠠᠭᠠᠳ ᠬᠠᠳᠬᠤᠨ᠎ᠠ᠃  ᠵᠠᠷᠢᠮ ᠳᠠᠭᠠᠨ ᠮᠤᠳᠣᠨ ᠲᠡᠷᠭᠡᠨ ᠤ ᠬᠦᠷᠳᠦ ᠪᠠᠨ ᠰᠣᠭᠤᠯᠵᠣ ᠪᠣᠯᠣ ᠶᠢᠨ ᠨᠦᠬᠡᠨ ᠳᠤ ᠨᠢ ᠬᠠᠳᠬᠤᠵᠣ ᠲᠣᠭᠲᠠᠭᠠᠨ᠎ᠠ᠃ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠦᠷᠯᠦᠭᠡ ᠡᠷᠲᠡ ᠬᠠᠷᠠᠩᠭᠤᠢ ᠪᠠᠷ ᠪᠣᠰᠴᠣ ᠲᠤᠭᠤᠭᠠᠨ ᠳᠤ ᠰᠢᠷ᠎ᠠ ᠲᠣᠰᠣ ᠬᠢᠵᠦ ᠬᠠᠶᠢᠯᠤᠭᠤᠯᠣᠭᠠᠳ ᠪᠡᠯᠡᠳᠭᠡᠵᠦ ᠲᠠᠯᠪᠢᠭᠰᠠᠨ ᠪᠠᠮᠪᠠᠷ ᠢᠶᠠᠨ ᠠᠪᠴᠢᠷᠠᠵᠣ ᠬᠠᠶᠢᠯᠣᠭᠤᠯᠣᠭᠰᠠᠨ ᠰᠢᠷ᠎ᠠ ᠲᠣᠰᠣ ᠪᠠᠨ ᠪᠠᠭ᠎ᠠ ᠪᠠᠭ᠎ᠠ ᠪᠠᠷ ᠪᠠᠮᠪᠠᠷ ᠳᠡᠭᠡᠷ᠎ᠡ ᠪᠠᠨ ᠴᠢᠳᠬᠤᠵᠣ ᠰᠢᠮᠡᠳᠭᠡᠨ᠎ᠡ᠃ ᠲᠡᠭᠡᠭᠡᠳ‌ᠦᠷᠯᠦᠭᠡ ᠶᠢᠨ ᠬᠠᠷᠠᠩᠭᠤᠢ ᠳᠤ ᠪᠠᠮᠪᠠᠷ ᠢᠶᠠᠨ ᠠᠰᠠᠭᠠᠭᠠᠳ ᠪᠡᠯᠡᠳᠭᠡᠭᠰᠡᠨ ᠤᠷᠣᠨ ᠳᠤ ᠨᠢ ᠬᠠᠳᠬᠤᠵᠣ ᠲᠠᠯᠪᠢᠨ᠎ᠠ᠃ ᠵᠤᠯᠠ ᠪᠠᠨ ᠲᠣᠭᠤᠷᠢᠭᠤᠯᠵᠣ ᠡᠷᠭᠢᠨ ᠲᠤᠭᠤᠷᠢᠨ ᠢᠰᠡᠭᠡᠢ ᠰᠢᠷᠳᠡᠭ ᠲᠠᠯᠪᠢᠵᠣ ᠮᠦᠷᠭᠦᠬᠦ  ᠪᠠᠷ ᠪᠡᠯᠡᠳᠭᠡᠨ᠎ᠡ᠃ ᠵᠣᠯᠠ ᠶᠢᠨ ᠵᠡᠭᠦᠨ ᠬᠤᠶᠢᠨ᠎ᠠ ᠠᠶᠠᠭᠠᠨ ᠰᠢᠷᠡᠭᠡ ᠲᠠᠯᠪᠢᠵᠣ ᠳᠡᠭᠡᠷ᠎ᠡ ᠨᠢ ᠲᠡᠭᠷᠢ ᠳᠤ ᠡᠷᠭᠦᠬᠦ ᠠᠷᠢᠬᠢ᠂ ᠰᠦ ᠲᠠᠢ ᠴᠠᠢ᠂ ᠬᠤᠷᠣᠳ ᠲᠣᠰᠣ᠂ ᠬᠠᠭᠤᠷᠣᠭᠰᠠᠨ ᠠᠮᠣ᠂ ᠪᠣᠥᠪᠤ ᠪᠣᠭᠤᠷᠰᠤᠭ ᠰᠢᠬᠢᠷ ᠪᠣᠷᠮ᠎ᠠ ᠵᠡᠷᠭᠡ ᠢᠳᠡᠭᠡᠨ ᠤ ᠳᠡᠭᠡᠵᠢ ᠪᠠᠨ ᠦᠷᠦᠵᠦ ᠲᠠᠯᠪᠢᠭᠠᠳ ᠡᠷᠭᠦᠬᠦ ᠪᠠᠷ ᠪᠡᠯᠡᠳᠭᠡᠨ᠎ᠡ᠃ ᠭᠡᠷ ᠤᠨ ᠡᠵᠡᠨ ᠪᠦᠰᠡᠭᠦᠢ ᠡᠬᠢᠯᠡᠵᠦ ᠰᠦ ᠲᠠᠢ ᠴᠠᠢ ᠪᠠᠨ ᠡᠷᠭᠦᠮᠡᠭᠴᠡ ᠭᠡᠷ ᠤᠨ ᠡᠵᠡᠨ ᠵᠢᠴᠢ ᠤᠯᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠠᠷᠢᠬᠢ ᠲᠡᠷᠢᠭᠦᠯᠡᠨ ᠪᠡᠯᠡᠳᠭᠡᠭᠰᠡᠨ ᠵᠦᠢᠯ ᠢᠶᠠᠨ ᠬᠤᠴᠣᠷᠣᠯ ᠦᠭᠡᠢ ᠪᠦᠬᠦᠨ ᠢ ᠲᠡᠭᠷᠢ ᠳᠤ ᠡᠷᠭᠦᠨ᠎ᠡ᠃ ᠠᠷᠢᠬᠢ ᠪᠠᠨ ᠡᠷᠭᠦᠬᠦ ᠳᠤ ᠵᠠᠪᠠᠯ ᠲᠣᠰᠬᠠᠢ ᠬᠢᠭᠰᠡᠨ ᠮᠣᠳᠣᠨ ᠬᠠᠯᠪᠠᠭ᠎ᠠ ︵ᠬᠠᠯᠪᠠᠭᠠᠨ ᠲᠡᠭᠡᠷ᠎ᠡ ᠨᠢ ᠶᠢᠰᠦᠨ ᠬᠤᠪᠬᠢᠯ ᠲᠠᠢ︶ ᠪᠠᠷ ᠡᠷᠭᠦᠨ᠎ᠡ᠃ ᠡᠷᠭᠦᠯᠲᠡ ᠪᠠᠷᠠᠮᠠᠭᠴᠠ ᠭᠡᠷ ᠤᠨ ᠡᠵᠡᠨ ᠲᠦᠷᠦᠭᠦᠯᠵᠦ ᠤᠯᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠳᠠᠭᠠᠵᠣ ᠮᠦᠷᠭᠦᠨ᠎ᠡ᠃ ᠡᠭᠦᠨ ᠳᠤ ᠨᠢᠭᠡ ᠰᠠᠭᠤᠳᠠᠯ ᠳᠤ ᠭᠤᠷᠪᠠ ᠮᠦᠷᠭᠦᠭᠡᠳ ᠭᠤᠷᠪᠠ ᠭᠤᠷᠪᠠ ᠶᠢᠰᠦᠨᠲᠡ ᠮᠦᠷᠭᠦᠵᠦ ᠲᠠᠬᠢᠨ ᠪᠣᠰᠴᠣ ᠤᠷᠤᠨ ᠰᠢᠯᠵᠢᠭᠡᠳ ᠭᠤᠷᠪᠠ ᠭᠤᠷᠪᠠ ᠮᠦᠷᠭᠦᠵᠦ ᠨᠢᠭᠡ ᠲᠣᠭᠤᠷᠢᠪᠠᠯ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠲᠤ ᠲᠡᠭᠷᠢ ᠳᠤ ᠮᠦᠷᠭᠦᠨ᠎ᠡ᠃ ᠲᠠᠬᠢᠨ ᠲᠡᠷᠡ ᠣᠷᠣᠨ ᠳᠠᠭᠠᠨ ᠪᠠᠰᠠ ᠪᠠᠰᠠ ᠨᠢᠭᠡ ᠣᠳᠠᠭ᠎ᠠ ᠮᠦᠷᠭᠦᠪᠡᠯ ᠳᠠᠷᠣᠢ ᠶᠢᠰᠦ ᠶᠢᠰᠦ ᠨᠠᠶᠠᠨ ᠨᠢᠭᠡᠨ ᠮᠦᠷᠭᠦᠯᠲᠡ ᠭᠦᠢᠴᠡᠬᠦ ᠪᠣᠯᠣᠨ᠎ᠠ᠃ ᠡᠭᠦᠨ ᠳᠤ ᠨᠢᠭᠡ ᠠᠶᠢᠯ ᠳᠤ ᠨᠢᠭᠡ ᠭᠡᠷ ᠤᠨ ᠬᠡᠳᠦᠨ ᠭᠡᠷ ᠪᠠᠶᠢᠪᠠᠯ ᠲᠡᠷᠡ ᠬᠡᠳᠦᠨ ᠭᠡᠷ ᠪᠣᠶᠣ ᠠᠶᠢᠮᠠᠭ ᠤᠭᠰᠠᠭ᠎ᠠ ᠪᠠᠷ ᠢᠶᠠᠨ ᠦᠨᠳᠦᠷ ᠨᠠᠰᠤᠲᠠᠢ ᠬᠦᠨᠳᠦᠲᠦ ᠠᠬᠠᠮᠠᠳ ᠳᠠᠭᠠᠨ ᠬᠦᠷᠦᠯᠴᠡᠨ ᠤᠴᠢᠵᠣ ᠬᠠᠮᠲᠣ ᠪᠠᠷ ᠲᠡᠭᠷᠢ ᠳᠤ ᠮᠦᠷᠭᠦᠳᠡᠭ᠃ ᠮᠦᠷᠭᠦᠯᠲᠡ ᠭᠦᠢᠴᠡᠭᠰᠡᠨ ᠤ ᠲᠠᠷᠠᠭ᠎ᠠ ᠪᠦᠭᠦᠳᠡᠭᠡᠷ ᠢᠶᠠᠨ ᠡᠷᠦᠬᠡ ᠭᠡᠷ ᠲᠡᠭᠡᠨ ᠤᠷᠤᠵᠤ ᠨᠠᠰᠣᠲᠠᠨ ᠨᠠᠷ ᠨᠢ ᠳᠡᠭᠡᠷ᠎ᠡ ᠰᠠᠭᠤᠳᠠᠯ ᠳᠤ ᠵᠠᠯᠠᠷᠠᠭᠰᠠᠨ ᠤ ᠬᠤᠶᠢᠨ᠎ᠠ ᠬᠡᠥᠬᠡᠳ ᠪᠡᠷᠢᠶᠡᠳ ᠪᠦᠬᠦᠨ ᠢᠶᠠᠷ ᠢᠶᠠᠨ ᠨᠠᠰᠣᠲᠠᠨ ᠳᠠᠭᠠᠨ ᠨᠠᠰᠣᠨ ᠤ ᠶᠡᠭᠡ ᠪᠠᠭ᠎ᠠ ᠶᠢᠨ ᠳᠠᠷᠠᠭᠠᠯᠠᠯ ᠢᠶᠠᠷ ᠮᠦᠷᠭᠦᠨ ᠵᠣᠯᠭᠠᠨ᠎ᠠ᠃ ᠮᠦᠷᠭᠦᠬᠦ ᠳᠤ ᠡᠮᠦᠨ᠎ᠡ ᠬᠤᠷᠮᠤᠢ ᠪᠠᠨ ᠳᠡᠯᠭᠡᠨ ᠰᠦᠭᠦᠳᠴᠦ ᠬᠤᠶᠠᠷ ᠭᠠᠷ ᠢᠶᠠᠨ ᠳᠣᠷᠣᠭᠰᠢ ᠪᠠᠨ ᠲᠠᠯᠪᠢᠬᠤ ᠶᠢᠨ ᠲᠠᠭᠠᠥ ᠲᠣᠯᠣᠭᠠᠢ ᠪᠦᠬᠦᠶᠢᠵᠦ ᠳᠠᠬᠢᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠬᠦ ᠶᠢᠨ ᠲᠠᠭᠠᠥ ᠬᠤᠶᠠᠷ ᠭᠠᠷ ᠢᠶᠠᠨ ᠭᠠᠳᠠᠭᠰᠢ ᠪᠠᠨ ᠳᠡᠯᠭᠡᠨ᠎ᠡ᠂ ᠡᠨᠡ ᠦᠶ᠎ᠡ ᠳᠤ ᠨᠠᠰᠣᠲᠠᠨ ᠠᠴᠠ ᠢᠷᠦᠭᠡᠯ ᠲᠠᠯᠪᠢᠬᠤ ᠪᠣᠯᠣᠨ᠎ᠠ᠃ ᠡᠶᠢᠮᠦᠷᠬᠦ ᠢᠷᠦᠭᠡᠯ ᠲᠣᠩ ᠠᠷᠪᠢᠨ ᠪᠠᠶᠢᠳᠠᠭ᠃ ᠠᠳᠡ ᠵᠦᠪᠬᠡᠨ ᠴᠦᠭᠡᠨ ᠬᠡᠳᠦ ᠶᠢ ᠲᠡᠮᠳᠡᠭᠯᠡᠰᠦᠭᠡᠢ᠃               ᠦᠨᠳᠦᠷ ᠭᠠᠵᠠᠷ ᠭᠡᠷ ᠢᠶᠠᠨ ᠪᠠᠷᠢᠵᠣ             ᠦᠷᠭᠡᠨ ᠲᠠᠯ᠎ᠠ ᠳᠤ ᠮᠠᠯ ᠢᠶᠠᠨ ᠮᠠᠯᠵᠢᠵᠣ             ᠦᠷ᠎ᠡ ᠠᠴᠢ ᠶᠢᠨ ᠢᠶᠠᠨ ᠰᠠᠶᠢᠨ ᠢ ᠦᠵᠡᠨ             ᠦᠯᠵᠠᠢ ᠪᠣᠶᠠᠨ ᠳᠡᠯᠭᠡᠷᠡᠵᠢ ᠶᠠᠪᠤ᠃             ᠨᠠᠷᠠ ᠠᠳᠠᠯᠢ ᠮᠠᠨᠳᠣᠵᠣ             ᠨᠠᠪᠴᠢ ᠠᠳᠠᠯᠢ ᠳᠡᠯᠭᠡᠷᠡᠵᠦ             ᠤᠯᠠᠨ ᠳᠠᠭᠠᠨ ᠬᠦᠨᠳᠦᠲᠠᠢ             ᠤᠳᠣ ᠠᠳᠠᠯᠢ ᠭᠡᠷᠡᠯᠲᠠᠢ ᠶᠠᠪᠤ᠃             ᠠᠶᠠᠨ ᠳᠤ ᠶᠠᠪᠣᠪᠠᠯ ᠤᠯᠵᠠ ᠲᠠᠢ             ᠠᠪᠠ ᠳᠤ ᠶᠠᠪᠣᠪᠠᠯ ᠭᠠᠨᠵᠤᠭ᠎ᠠ ᠲᠠᠢ             ᠠᠵᠢᠯ ᠦᠢᠯᠡᠰ ᠲᠡᠭᠡᠨ ᠭᠠᠷᠮᠠᠭᠠᠶᠢᠯᠠᠵᠣ             ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠬᠦᠴᠦ ᠪᠠᠨ ᠡᠷᠭᠦ᠃               ᠲᠦᠷᠦ ᠳᠤ ᠨᠡᠷᠡᠲᠠᠢ             ᠲᠦᠮᠡᠨ ᠳᠤ ᠴᠣᠥᠲᠠᠢ             ᠤᠯᠣᠰ ᠳᠠᠭᠠᠨ ᠠᠯᠳᠠᠷᠲᠠᠢ             ᠤᠯᠠᠨ ᠳᠤ ᠴᠣᠯᠠ ᠲᠠᠢ ᠶᠠᠪᠤ᠃               ᠡᠳᠦᠷ ᠡᠳᠦᠷ ᠰᠡᠳᠬᠢᠯ ᠠᠮᠣᠷ             ᠦᠷᠭᠦᠯᠵᠢᠳᠡ ᠡᠰᠡᠨ ᠮᠡᠨᠳᠦ             ᠡᠪᠳᠴᠢᠨ ᠲᠠᠬᠤᠯ ᠦᠭᠡᠢ             ᠦᠯᠵᠠᠢ ᠲᠠᠢ ᠵᠢᠷᠭᠠᠵᠣ ᠶᠠᠪᠤ᠃               ᠰᠠᠮᠠᠭ᠎ᠠ ᠯᠢᠩᠬᠤᠸ᠎ᠠ ᠠᠳᠠᠯᠢ ᠲᠡᠯᠭᠡᠷᠡᠵᠦ             ᠰᠠᠷᠠ ᠨᠠᠷᠠ ᠠᠳᠠᠯᠢ ᠭᠡᠷᠡᠯᠲᠦᠵᠦ ᠶᠠᠪᠤ᠃             ᠴᠣᠯᠮᠣᠨ ᠳᠤ ᠠᠳᠠᠯᠢ ᠭᠡᠷᠡᠯᠲᠦᠵᠦ ᠶᠠᠪᠤ               ᠴᠤᠭ ᠵᠢᠪᠬᠤᠭ᠎ᠠ ᠪᠠᠳᠠᠷᠠᠵᠣ ᠶᠠᠪᠤ             ᠴᠣᠮᠣᠷᠯᠢᠭ ᠠᠳᠠᠯᠢ ᠳᠡᠯᠭᠡᠷᠡᠵᠦ ᠶᠠᠪᠤ               ᠴᠣᠪᠣᠭᠤ ᠰᠡᠷᠭᠦᠯᠡᠩ ᠦᠰᠴᠦ ᠶᠠᠪᠤ᠃             ᠪᠢᠴᠢᠭ ᠡᠷᠳᠡᠮ ᠰᠣᠷᠴᠣ ᠶᠠᠪᠤ               ᠪᠢᠯᠢᠭ ᠤᠬᠠᠭᠠᠨ ᠨᠡᠭᠡᠭᠳᠡᠭᠦᠯᠵᠦ ᠶᠠᠪᠤ             ᠪᠣᠶᠠᠨ ᠬᠡᠰᠢᠭ ᠨᠡᠮᠡᠭᠳᠡᠭᠦᠯᠵᠦ ᠶᠠᠪᠤ             ᠪᠣᠯᠳᠣ ᠤᠯᠠᠨ ᠳᠠᠭᠠᠨ ᠮᠠᠭᠲᠠᠭᠳᠠᠵᠣ ᠶᠠᠪᠤ᠃ ᠭᠡᠵᠦ ᠢᠷᠦᠭᠡᠳᠡᠭ᠃ ᠢᠷᠦᠭᠡᠭᠳᠡᠵᠦ ᠪᠠᠶᠢᠭ᠎ᠠ ᠬᠦᠮᠦᠨ‌ᠢᠷᠦᠭᠡᠵᠦ ᠪᠠᠷᠠᠬᠤ ᠠᠴᠠ ᠡᠮᠦᠨ᠎ᠡ ᠪᠣᠰᠴᠣ ᠪᠣᠯᠬᠤ ᠦᠭᠡᠢ᠃ ᠪᠠᠰᠠ ᠬᠠᠳᠠᠮ ᠠᠪᠤ ᠳᠤ ᠬᠦᠥ ᠪᠡᠷᠢ ᠨᠢ ᠬᠠᠳᠠᠭ ᠵᠤᠯᠭᠠᠭᠤᠯᠳᠠᠭ ᠦᠭᠡᠢ ᠵᠦᠪᠬᠡᠨ ᠮᠦᠷᠭᠦᠪᠡᠯ ᠪᠣᠯᠴᠢᠬᠠᠨ᠎ᠠ᠃ ᠲᠡᠭᠦᠥ ᠪᠡᠷᠢ ᠨᠢ ᠬᠠᠳᠠᠮ ᠠᠬ᠎ᠠ ᠲᠠᠢ ᠬᠠᠳᠠᠭ ᠵᠤᠯᠭᠤᠯᠳᠠᠭ ᠦᠭᠡᠢ ᠵᠦᠪᠬᠡᠨ ᠮᠦᠷᠭᠦᠪᠡᠯ ᠪᠣᠯᠴᠢᠬᠠᠨ᠎ᠠ᠃ ᠢᠩᠬᠢᠵᠦ ᠵᠣᠯᠭᠠᠵᠣ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠨᠠᠷᠠ ᠭᠠᠷᠬᠤ ᠠᠴᠠ ᠡᠮᠦᠨ᠎ᠡ ᠪᠠᠰᠠ ᠬᠡᠳᠦᠨ ᠠᠶᠢᠯ ᠲᠣᠭᠤᠷᠢᠵᠣ ᠵᠠᠪᠳᠣᠳᠠᠭ ᠪᠠᠶᠢᠨ᠎ᠠ᠃ ᠭᠡᠬᠦ ᠳᠡᠭᠡᠨ ᠨᠢᠭᠡ ᠠᠶᠢᠯ ᠳᠤ ᠪᠠᠶᠠᠨ ᠶᠠᠳᠠᠭᠤ ᠭᠡᠵᠦ ᠢᠯᠭᠠᠯ ᠦᠭᠡᠢ ᠪᠦᠬᠦᠨ ᠳᠤ ᠵᠤᠯᠭᠠᠳᠠᠭ ᠰᠠᠶᠢᠬᠠᠨ ᠵᠠᠩᠰᠢᠯ ᠲᠠᠢ ᠶᠤᠮ᠃ ᠪᠠᠰᠠ ᠡᠨᠡ ᠨᠢᠭᠡ ᠵᠢᠯ ᠳᠤ ᠡᠯᠢᠭᠡᠨ ᠰᠠᠳᠣᠨ ᠨᠢ ᠬᠡᠳᠦᠢ ᠬᠤᠯᠠ ᠪᠠᠶᠢᠭᠰᠠᠨ ᠴᠦ ᠵᠠᠪᠠᠯ ᠨᠢᠭᠡ ᠤᠳᠠᠭ᠎ᠠ ᠡᠷᠭᠢᠵᠦ ᠦᠵᠡᠳᠡᠭ.᠃ ᠠᠶᠢᠯ ᠳᠤ ᠵᠤᠯᠭᠠᠬᠤ ᠳᠤ ᠠᠷᠢᠬᠢ ᠵᠢᠯ ᠤᠨ ᠬᠤᠭᠤᠯᠠ ᠲᠣᠲᠠᠭᠳᠠᠵᠣ ᠪᠤᠯᠳᠠᠭ ᠦᠭᠡᠢ ᠪᠦᠭᠡᠳ ᠬᠤᠯᠠ ᠶᠢᠨ ᠰᠠᠳᠣᠨ ᠳᠠᠭᠠᠨ ᠪᠣᠯ ᠪᠠᠰᠠ ᠬᠦᠮᠦᠨ ᠪᠦᠬᠦᠨ ᠳᠤ ᠪᠡᠯᠡᠭ ᠲᠠᠢ ᠪᠠᠶᠢᠳᠠᠭ᠃                 ᠬᠠᠮᠤᠭ ᠰᠡᠭᠦᠯ ᠳᠤ ᠨᠢ ᠡᠷᠬᠢᠮ ᠤᠯᠠᠨ ᠨᠠᠶᠢᠵᠠ ᠨᠦᠬᠦᠳ ᠮᠣᠩᠭᠤᠯ ᠲᠣᠭᠤᠷᠭᠠᠲᠠᠨ ᠵᠢᠯ ᠠᠴᠠ ᠵᠢᠯ ᠲᠡᠭᠵᠢᠷᠡᠨ ᠮᠠᠨᠳᠣᠬᠤ ᠪᠣᠯᠲᠣᠭᠠᠢ︕  ᠲᠠ ᠪᠦᠬᠦᠨ ᠤ ᠰᠠᠨᠠᠭᠰᠠᠨ ᠪᠦᠬᠦᠨ ᠴᠢᠨᠢ ᠰᠠᠭᠠᠷ ᠦᠭᠡᠢ ᠪᠦᠲᠦᠬᠦ ᠪᠣᠯᠲᠣᠭᠠᠢ︕    
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠮᠣᠩᠭᠤᠯ ᠦᠠᠳᠣᠰᠣᠳᠠᠠ ᠤ ᠰᠣᠷ ᠬᠠᠷᠪᠤᠯᠳᠠ
ᠤᠪᠤᠭ᠎ᠠ ᠲᠠᠬᠢᠬᠤ
ᠪᠠᠭᠠᠷᠢᠨ ᠮᠤᠩᠭᠤᠯᠴᠥᠳ ᠤᠨ ᠭᠠᠯ ᠲᠠᠭᠢᠯᠭ᠎ᠠ
ᠪᠠᠭᠠᠷᠢᠨ ᠬᠡᠣᠬᠡᠳ ᠤᠨ ᠪᠦᠮᠪᠦᠭᠡ ᠨᠢᠰᠠᠯᠬᠤ ᠨᠠᠭᠠᠳᠤᠮ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号