ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠨᠡᠭᠦᠳᠡᠯ ᠤᠨ ᠰᠢᠪᠠᠭᠤ —  ᠳᠠᠭᠤᠳᠠᠭᠠᠴᠢ ᠠᠯᠲᠠᠨ᠋ᠧᠴᠢᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/13
            ᠨᠡᠭᠦᠳᠡᠯ ᠤᠨ ᠰᠢᠪᠠᠭᠤ                                                        ᠠᠯᠳᠠᠨ᠋ᠧᠴᠢᠷ         ᠨᠠᠮᠣᠷ ᠪᠣᠯᠵᠣ ᠨᠠᠪᠴᠢ ᠰᠢᠷᠭᠠᠯᠳᠣᠵᠠᠢ᠃         ᠦᠳᠦ ᠰᠦᠳᠦ ᠨᠢ ᠪᠦᠷᠢᠳᠦᠭᠰᠡᠨ ᠦᠷ᠎ᠡ ᠵᠣᠯᠵᠠᠭ᠎ᠠ ᠪᠠᠨ ᠬᠠᠷᠠᠭᠰᠠᠨ ᠬᠦᠭᠰᠢᠨ ᠰᠢᠪᠠᠭᠤᠳ ᠦᠩᠭᠡ ᠶᠢᠷᠳᠢᠨᠴᠦ ᠶᠢᠨ ᠢᠶᠠᠨ ᠵᠢᠷᠦᠮ ᠢᠶᠠᠷ᠂ ᠡᠪᠦᠭᠡ ᠲᠡᠭᠡᠳᠦᠰ ᠤᠨ ᠢᠶᠠᠨ ᠶᠣᠰᠣ ᠪᠠᠷ ᠡᠨᠡᠬᠦ ᠰᠠᠶᠢᠬᠠᠨ ᠨᠠᠷᠠ ᠨᠢ ᠰᠢᠷᠭᠠᠯ ᠨᠠᠯᠠᠭᠠᠷᠬᠠᠨ ᠨᠣᠳᠤᠭ ᠠᠴᠠ ᠪᠠᠨ ᠨᠡᠭᠦᠬᠦ ᠯᠡ ᠬᠡᠷᠡᠭᠳᠡᠢ ᠪᠣᠯᠣᠭᠰᠠᠨ ᠢᠶᠠᠨ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠵᠦᠩ  ᠢᠶᠠᠷ ᠢᠶᠠᠨ ᠰᠡᠷᠡᠨ ᠮᠡᠳᠡᠷᠡᠵᠡᠢ᠃ ᠲᠡᠶᠢᠨᠬᠦ ᠪᠦᠬᠦᠶᠢᠯᠡ ᠰᠢᠪᠠᠭᠤᠳ ᠤᠨ ᠶᠡᠭᠡ ᠬᠤᠷᠠᠯᠳᠠᠢ ᠵᠣᠷᠰᠢᠯ ᠶᠣᠰᠣᠭᠠᠷ ᠬᠤᠯᠣᠰᠣᠳᠠᠢ ᠨᠠᠭᠤᠷ ᠤᠨ ᠲᠣᠮᠳᠠᠬᠢ ᠪᠢᠴᠢᠬᠠᠨ  ᠪᠣᠯᠳᠤᠭ ᠲᠡᠭᠡᠷ᠎ᠡ ᠨᠢᠵᠢᠭᠢᠷ ᠶᠡᠭᠡ ᠶᠠᠪᠣᠭᠳᠠᠵᠣ ᠠᠪᠠᠢ᠃         ᠡᠪᠦᠭᠡᠨ ᠠᠬᠠᠯᠠᠭᠴᠢ᠄         ︽ᠡᠪᠦᠭᠡᠳ ᠤᠨ ᠶᠣᠰᠤ — ᠶᠢᠷᠳᠢᠨᠴᠦ ᠶᠢᠨ ᠵᠢᠷᠦᠮ ᠢᠶᠠᠷ ᠣᠳᠣᠮ ᠢᠶᠠᠨ ᠲᠠᠭᠠᠵᠦ ᠣᠯᠠᠮᠵᠢᠯᠠᠯ ᠢᠶᠠᠨ ᠪᠠᠷᠢᠭᠠᠳ ᠣᠣᠯ ᠤᠨ ᠵᠠᠮ ᠢᠶᠠᠷ ᠢᠶᠠᠨ ᠣᠳᠣᠷᠯᠠᠨ ᠨᠡᠭᠦᠨ᠎ᠡ︾ ᠬᠡᠮᠡᠬᠦ ᠰᠠᠨᠠᠭ᠎ᠠ ᠪᠠᠨ ᠣᠯᠠᠨ ᠰᠠᠶᠢᠬᠠᠨ ᠪᠣᠳᠠᠳᠣ ᠵᠢᠱᠢᠶ᠎ᠡ ᠪᠠᠷ ᠣᠬᠠᠭᠤᠯᠣᠨ ᠲᠠᠶᠢᠴᠢᠯᠠᠯᠳᠠ ᠬᠢᠭᠰᠡᠨ ᠨᠢ ᠬᠠᠷᠢᠨ ᠦᠪᠦᠩ ᠲᠣᠯᠣᠭᠠᠶᠢᠳᠣ᠂ ᠣᠳᠣᠢ ᠰᠡᠭᠦᠯᠳᠦ ᠲᠡᠷᠢᠭᠦᠳᠡᠢ ᠵᠠᠯᠠᠭᠤ ᠰᠢᠪᠠᠭᠤᠳ ᠤᠨ ᠬᠦᠨᠳᠦ ᠬᠡᠴᠡᠭᠦᠦ ᠡᠰᠡᠷᠭᠦᠴᠡᠯ ᠳᠤ ᠣᠴᠠᠷᠠᠨ᠎ᠠ ᠭᠡᠰᠡᠨ ᠢ ᠬᠡᠨ ᠴᠦ ᠪᠣᠳᠣᠵᠣ ᠣᠯᠣᠭᠰᠠᠨ ᠦᠭᠡᠢ᠃         ︽ᠪᠠᠯᠠᠷᠯᠢᠭ ᠣᠳᠣᠮᠰᠢᠯ ᠢ ᠣᠰᠠᠳᠬᠠᠵᠦ᠂ ᠪᠣᠯᠪᠠᠰᠣᠨ ᠰᠣᠶᠣᠯ ᠢ ᠪᠦᠳᠦᠭᠡᠨ᠎ᠡ︾ ᠭᠡᠳ ᠦᠪᠦᠩ ᠲᠣᠯᠣᠭᠠᠶᠢᠳᠣ ᠦᠩᠭᠡ  ᠢᠯᠭᠠᠷᠠᠭᠰᠠᠨ ᠰᠠᠶᠢᠬᠠᠨ ᠲᠠᠯᠠᠪᠴᠢ ᠪᠠᠨ ᠲᠡᠨᠡᠶᠢᠯᠬᠡᠨ ᠬᠠᠯᠢᠨ ᠲᠡᠭᠦᠯᠢᠬᠦ ᠪᠠᠶᠢᠳᠠᠯ ᠦᠵᠡᠭᠦᠯᠬᠦ ᠢᠨᠦ ᠣᠭᠤ ᠴᠦ ᠣᠮᠣᠷᠬᠠᠭ ᠰᠠᠭᠰᠠᠭᠤ ᠠᠭᠰᠠᠨ ᠴᠦ ᠠᠷᠪᠠᠨ ᠬᠤᠪᠢ ᠶᠢᠨ ᠰᠦᠷ ᠭᠡᠷᠡᠯᠳᠡᠢ ᠠᠵᠠᠢ᠃         ︽ᠪᠦᠳᠦᠭᠦᠯᠢᠭ ᠨᠡᠭᠦᠳᠡᠯ ᠢ ᠡᠴᠦᠰᠯᠡᠭᠦᠯᠵᠦ᠂ ᠪᠦᠳᠦᠭᠡᠯᠴᠢ ᠠᠮᠢᠳᠣᠷᠠᠯ ᠢ ᠴᠣᠭᠴᠠᠯᠠᠨ᠎ᠠ︾ ᠭᠡᠳ ᠣᠳᠣᠢ ᠰᠡᠭᠦᠯᠳᠦ ᠮᠣᠶᠢᠯ ᠬᠠᠷ᠎ᠠ ᠨᠢᠳᠦ ᠪᠠᠨ ᠲᠣᠳᠣᠶᠢᠯᠭᠠᠨ ᠱᠣᠩᠪᠠᠨ ᠲᠡᠭᠳᠡᠬᠦ ᠲᠦᠷᠢ ᠭᠠᠷᠭᠠᠬᠤ ᠠᠨᠣ ᠲᠠᠩᠴᠦ ᠬᠡᠢ ᠬᠦᠭᠡᠷᠦᠦ ᠠᠭᠰᠠᠨ ᠴᠦ ᠮᠦᠨ ᠪᠠᠰᠠ ᠶᠢᠰᠦᠨ ᠬᠤᠪᠢ ᠶᠢᠨ ᠬᠦᠭᠡᠷᠦᠬᠦᠨ ᠲᠡᠭᠵᠢᠨ ᠠᠵᠣᠬᠤᠢ᠃         ᠨᠣᠳᠤᠭ ᠤᠨ ᠪᠠᠶᠠᠯᠢᠭ ᠲᠤ ᠭᠡᠳᠡᠰᠦ ᠲᠦᠭᠦᠷᠦᠨ᠂ ᠣᠯᠠᠷᠢᠯ ᠤᠨ ᠰᠠᠶᠢᠬᠠᠨ ᠳᠤ ᠦᠩᠭᠡᠵᠢᠨ ᠪᠣᠶᠢᠵᠢᠭᠰᠠᠨ ᠵᠠᠯᠠᠭᠤ ᠰᠢᠪᠠᠭᠤᠳ ︽ᠭᠠᠩᠭᠠᠷ ᠭᠤᠩᠭᠤᠷ︾ ᠭᠡᠯᠴᠢᠨ ︽ᠰᠢᠨ᠎ᠡ ᠶᠢ ᠪᠠᠶᠢᠭᠤᠯᠵᠣ ᠰᠢᠨ᠎ᠡ ᠶᠢ ᠡᠭᠦᠳᠦᠨ᠎ᠡ ᠁ ᠰᠠᠶᠢᠨ ᠢ ᠢᠳᠡᠵᠦ ᠰᠠᠶᠢᠬᠠᠨ ᠢ ᠡᠮᠦᠰᠦᠨ᠎ᠡ ᠁ ᠬᠤᠴᠣᠷᠣᠩᠭᠤᠢ ᠠᠮᠢᠳᠣᠷᠠᠯ ᠠᠴᠠ ᠠᠩᠬᠢᠵᠢᠷᠠᠨ᠎ᠠ᠂ ᠣᠳᠣᠬᠢᠴᠢᠯᠠᠭᠰᠠᠨ ᠠᠮᠢᠳᠣᠷᠠᠯ ᠢ ᠡᠳ᠋ᠯᠡᠨ᠎ᠡ  ︾ ᠬᠡᠮᠡᠯᠳᠦᠭᠡᠳ ᠰᠡᠳᠬᠢᠯ ᠨᠢ ᠬᠦᠭᠰᠡᠨ ᠵᠣᠷᠢᠭ ᠨᠢ ᠬᠦᠪᠴᠢᠯᠡᠭᠳᠡᠭᠡᠳ ᠣᠷᠢᠶ᠎ᠠ ᠯᠣᠽᠦ᠋ᠩ ᠬᠠᠰᠬᠢᠷᠣᠨ ᠣᠷᠪᠠᠭᠠᠳ ᠭᠠᠷᠣᠮᠠᠷ ᠵᠠᠩᠨᠠᠨ᠎ᠠ᠃          ᠡᠪᠦᠭᠡᠨ ᠠᠬᠠᠯᠠᠭᠴᠢ ᠠᠭᠤᠷᠯᠠᠭᠠᠳ ᠪᠦᠬᠦ ᠪᠡᠶ᠎ᠡ ᠨᠢ ᠴᠡᠴᠡᠷᠬᠢᠯᠡᠨ᠎ᠡ᠃ ᠠᠭᠤᠰᠬᠢ ᠵᠢᠷᠦᠬᠡ ᠨᠢ ᠰᠠᠪᠠᠯᠠᠭᠠᠳ ᠰᠠᠭᠤᠷᠢ ᠠᠯᠳᠠᠨ ᠡᠷᠭᠢᠴᠡᠨ᠎ᠡ᠃         ︽ᠡᠪᠦᠭᠡᠳ ᠤᠨ ᠶᠣᠰᠣ ᠡ᠂ ᠡᠪᠦᠭᠡᠳ ᠤᠨ ᠶᠣᠰᠣ ᠭᠡᠵᠦ ᠪᠠᠶᠢᠬᠤ ᠳᠤ ᠁︾ ︽ᠶᠢᠷᠳᠢᠨᠴᠦ ᠶᠢᠨ ᠵᠢᠷᠦᠮ ᠡ᠂ ᠶᠢᠷᠳᠢᠨᠴᠦ ᠶᠢᠨ ᠵᠢᠷᠦᠮ ᠭᠡᠵᠦ ᠪᠠᠶᠢᠬᠤ ᠳᠤ ᠁︾ ᠬᠡᠮᠡᠨ ᠲᠠᠯᠠᠪᠴᠢ ᠵᠢᠭᠦᠷ ᠢᠶᠠᠨ ᠲᠡᠪᠢᠨ᠂ ᠠᠬᠢᠨ ᠲᠡᠬᠢᠨ ᠵᠠᠷᠯᠠᠭᠰᠠᠨ ᠠᠪᠠᠴᠦ  ᠶᠠᠮᠠᠷ ᠴᠦ ᠦᠢᠯᠡᠳᠦᠯ ᠭᠠᠷᠭᠠᠵᠦ ᠴᠢᠳᠠᠭ᠎ᠠ ᠦᠭᠡᠢ᠃         ᠬᠦᠭᠰᠢᠨ ᠰᠢᠪᠠᠭᠤᠳ ᠰᠠᠨᠳᠣᠷᠣᠭᠠᠳ ︽ᠭᠦᠩᠭᠡᠷ ᠭᠠᠩᠭᠠᠷ︾ ᠭᠡᠯᠴᠢᠪᠡ᠃ ᠲᠡᠦᠬᠡ ᠰᠣᠳᠣᠷ ᠣᠷᠪᠠᠭᠤᠯᠣᠨ ᠶᠣᠰᠣ ᠵᠢᠷᠦᠮ ᠶᠠᠷᠢᠯᠳᠣᠪᠠ᠃         ︽ᠣᠯᠠᠨ ᠣᠯᠠᠨ ᠮᠢᠩᠭᠠᠨ ᠵᠢᠯ ᠢᠶᠠᠷ ᠪᠢᠳᠡ ᠴᠢᠨᠢ ᠣᠳᠣᠷᠯᠠᠨ ᠨᠡᠭᠦᠳᠡᠯᠯᠡᠭᠡᠳ ᠯᠡ ᠁︾         ︽ᠬᠠᠪᠣᠷᠵᠢᠶ᠎ᠠ ᠨᠠᠮᠣᠷᠵᠢᠶ᠎ᠠ ᠡᠪᠦᠯᠵᠢᠶ᠎ᠡ ᠵᠣᠰᠠᠯᠠᠩ ᠭᠡᠳ ᠡᠭᠡᠯᠵᠢᠯᠡᠨ ᠰᠡᠯᠭᠦᠭᠡᠳ ᠯᠡ ᠁︾         ︽ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠵᠣᠬᠢᠴᠠᠭᠠᠳ᠂ ᠨᠡᠶᠢᠭᠡᠮ ᠲᠠᠢ ᠪᠠᠨ ᠡᠶᠡᠳᠦᠭᠡᠳ ᠯᠡ ᠁︾         ︽ᠢᠩᠬᠢᠭᠡᠳ ᠯᠡ ᠲᠡᠩᠭᠡᠭᠡᠳ ᠯᠡ ᠁︾ ᠬᠡᠮᠡᠨ ᠬᠡᠳᠦᠢ ᠣᠯᠠᠨ ᠶᠡᠷᠢᠵᠦ ᠲᠠᠳᠦᠢ ᠠᠷᠪᠢᠨ ᠶᠠᠩᠰᠢᠭᠰᠠᠨ ᠠᠪᠠᠴᠦ   ᠶᠠᠮᠠᠷ ᠴᠦ ᠲᠣᠰᠠ ᠪᠣᠯᠤᠭ᠎ᠠ ᠦᠭᠡᠢ᠃         ᠦᠪᠦᠩ ᠲᠣᠯᠣᠭᠠᠶᠢᠳᠣ ᠶᠢᠨ ᠶᠠᠷᠢᠶ᠎ᠠ ᠢᠯᠡᠳᠭᠡᠯ ᠪᠣᠳᠣᠯ ᠰᠡᠳᠬᠢᠯ ᠢ ᠢᠨᠦ ᠬᠦᠨᠳᠡᠵᠦ᠂ ᠣᠳᠣᠢ ᠰᠡᠭᠦᠯᠳᠦ ᠶᠢᠨ ᠣᠷᠢᠶ᠎ᠠ ᠯᠣᠽᠦ᠋ᠩ ᠰᠠᠨᠠᠯ ᠬᠦᠰᠡᠯ ᠢ ᠢᠨᠦ ᠬᠦᠭᠰᠡᠭᠦᠯᠬᠦᠶ᠎ᠡ ᠵᠠᠯᠠᠭᠤ ᠪᠠᠭᠠᠬᠠᠨ ᠰᠢᠪᠠᠭᠤᠳ ᠤᠨ ᠣᠶᠣᠨ ᠲᠡᠷᠢᠬᠢ ᠠᠭᠤᠰᠬᠢ ᠵᠢᠷᠦᠬᠡ ᠬᠦᠭᠡᠷᠦᠨ ᠬᠦᠭᠡᠰᠦᠷᠡᠵᠦ᠂ ᠠᠬᠠᠮᠠᠳ ᠲᠣᠮᠣᠭᠠᠳᠠᠳ ᠤᠨ ᠬᠢᠨ ᠵᠠᠬᠢᠶ᠎ᠠ ᠵᠢᠭᠠᠪᠣᠷᠢ ︽ᠣᠩᠭᠤᠰᠣ ᠠᠯᠳᠠᠬᠤ︾ ᠶᠢᠨ ᠬᠢᠷᠢ ᠶᠠᠭᠤᠮ᠎ᠠ ᠪᠣᠯᠣᠭᠠᠳ ᠡᠪᠦᠭᠡ ᠲᠡᠭᠡᠳᠦᠰ ᠤᠨ ᠬᠢᠨ ᠦᠪ ᠰᠣᠶᠣᠯ ︽ᠦᠨᠡᠰᠦ ᠬᠤᠭ︾ ᠰᠢᠣᠬᠠᠨ ᠬᠠᠶᠠᠭᠳᠠᠵᠠᠢ᠃         ︽ᠳ᠋ᠧᠪᠡᠵᠡᠨ — ᠵᠣᠨ ᠳᠠᠭᠠᠨ ᠬᠠᠯᠠᠭᠤᠴᠠᠬᠤ ᠦᠭᠡᠢ ᠡᠪᠦᠯ ᠳᠡᠭᠡᠨ ᠲᠠᠭᠠᠷᠠᠬᠤ ᠦᠭᠡᠢ᠂ ᠬᠠᠪᠣᠷ ᠰᠢᠭ᠋ ᠯᠡ ᠣᠷᠢᠬᠠᠨ ᠲᠣᠯᠠᠭᠠᠨ᠂ ᠨᠠᠮᠣᠷ ᠰᠢᠭ᠋ ᠯᠡ ᠪᠠᠶᠠᠨ ᠲᠠᠩᠰᠤᠭ᠂ ᠰᠡᠷ ᠰᠡᠷ ᠵᠦᠭᠡᠯᠡᠨ ᠰᠠᠯᠬᠢ ᠲᠠᠢ᠂ ᠪᠣᠷ ᠪᠣᠷ ᠵᠦᠰᠡᠷ ᠪᠣᠷᠣᠭᠠᠨ ᠲᠠᠢ᠂ ᠬᠡᠵᠢᠶᠡᠳᠡ ᠪᠠᠨ ᠨᠡᠭᠦᠳᠡᠯᠯᠡᠵᠦ ᠣᠳᠣᠷᠯᠠᠬᠤ ᠦᠭᠡᠢ᠂ ᠶᠠᠳᠠᠷᠠᠵᠦ ᠵᠦᠳᠡᠷᠡᠬᠦ ᠦᠭᠡᠢ ᠶᠢᠷᠳᠢᠨᠴᠦ ᠶᠢᠨ ᠭᠠᠳᠠᠨᠠᠬᠢ ᠲᠣᠭᠤᠷ ᠤᠨ ᠬᠦᠷᠢᠶᠡᠯᠡᠩ︾ ᠪᠣᠢ ᠭᠡᠳᠡᠭ ᠢ ᠪᠠᠳᠣ ᠠᠴᠠ ᠪᠠᠳᠣ ᠢᠳᠡᠭᠡᠭᠰᠡᠨ ᠵᠠᠯᠠᠭᠤ ᠪᠠᠭᠠᠬᠠᠨ ᠰᠢᠪᠠᠭᠤᠳ ᠤᠨ ᠣᠶᠣᠨ ᠲᠠᠷᠢᠬᠢ ᠠᠭᠤᠰᠬᠢ ᠵᠢᠷᠦᠬᠡᠨ ᠳᠤ ᠵᠢᠷᠭᠠᠯ ᠤᠨ ᠣᠷᠳᠣᠨ᠂ ᠴᠡᠩᠬᠡᠯ ᠤᠨ ᠭᠠᠵᠠᠷ᠂ ᠬᠦᠰᠡᠯ ᠤᠨ ᠪᠠᠭᠤᠴᠠ ᠁ ᠭᠡᠬᠦ ᠠᠴᠠ ᠦᠭᠡᠷ᠎ᠡ ᠶᠠᠭᠤᠮ᠎ᠠ ᠪᠠᠭᠳᠠᠬᠤ ᠵᠠᠢ ᠦᠭᠡᠢ ᠪᠣᠯᠪᠠᠢ᠃               ᠰᠢᠪᠠᠭᠤᠳ᠂ ᠵᠦᠭ ᠴᠢᠭᠯᠡᠯ ᠢᠶᠠᠨ ᠰᠢᠨᠡᠴᠢᠯᠡᠵᠦ᠂ ᠵᠠᠮ ᠮᠦᠷ ᠢᠶᠠᠨ ᠦᠭᠡᠷᠡᠴᠢᠯᠡᠵᠡᠢ᠃         ᠦᠪᠦᠩ ᠲᠣᠯᠣᠭᠠᠶᠢᠳᠣ᠂ ᠣᠳᠣᠢ ᠰᠡᠭᠦᠯᠳᠦ ᠰᠦᠷᠦᠭ ᠤᠨ ᠡᠮᠦᠨ᠎ᠡ ᠬᠤᠰᠢᠭᠤᠷᠠᠨ᠎ᠠ᠃ ᠣᠮᠤᠭ ᠲᠠᠢ ᠱᠣᠩᠪᠠᠨ ᠰᠦᠷ ᠲᠠᠢ ᠰᠣᠮᠣᠳᠠᠬᠤ ᠶᠢ ᠨᠢ ᠬᠠᠷᠠᠭᠰᠠᠨ ᠵᠠᠯᠠᠭᠤ ᠪᠠᠭᠠᠴᠣᠳ ᠬᠦᠭᠡᠷᠦᠨ ᠬᠦᠭᠰᠡᠭᠡᠳ ᠡᠯᠢᠨ ᠬᠠᠯᠢᠨ ᠲᠡᠭᠦᠯᠢᠨ ᠨᠢᠰᠬᠦ ᠢᠨᠦ ᠪᠠᠰᠠ ᠴᠦ ᠠᠳᠠᠪᠠᠰᠢ ᠭᠠᠶᠢᠬᠠᠯᠳᠠᠢ ᠪᠠᠶᠢᠯᠤᠭ᠎ᠠ᠃ ᠴᠠᠭ ᠤᠨ ᠪᠠᠶᠢᠳᠠᠯ ᠠᠴᠠ ᠬᠤᠵᠢᠮᠳᠠᠨ ᠬᠦᠷᠦᠨ ᠤ ᠰᠠᠨᠠᠭᠠᠨ ᠠᠴᠠ ᠵᠦᠷᠢᠵᠦ᠂ ᠦᠷ᠎ᠡ ᠬᠡᠦᠬᠡᠳ ᠦᠨᠳᠡᠭᠡ ᠵᠣᠯᠵᠠᠭ᠎ᠠ ᠳᠠᠭᠠᠨ ᠴᠢᠳᠦᠷ ᠲᠣᠰᠢᠶ᠎ᠠ ᠪᠣᠯᠴᠢᠬᠠᠪᠠᠦ ᠬᠡᠮᠡᠨ ᠰᠠᠨᠠᠭᠰᠠᠨ ᠬᠦᠭᠰᠢᠨ ᠰᠢᠪᠠᠭᠤᠳ ᠰᠦᠷᠦᠭ ᠤᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠶᠠᠪᠣᠵᠦ ᠦᠩᠭᠡᠷᠡᠭᠡ ᠦᠭᠡᠢ ᠵᠠᠮ ᠢᠶᠠᠷ ᠣᠴᠢᠬᠤ ᠲᠣᠷ᠎ᠠ ᠦᠭᠡᠢ ᠭᠠᠵᠠᠷ ᠣᠷᠣᠭᠤ ᠭᠤᠨᠢᠭᠳᠠᠢ ᠪᠦᠭᠡᠳ ᠬᠦᠴᠢᠷᠳᠡᠢ ᠲᠡᠮᠡᠦᠯᠡᠨ ᠠᠪᠠᠢ᠃         ᠰᠢᠪᠠᠭᠤᠨ ᠰᠦᠷᠦᠭ᠂ ᠠᠯᠣᠰ ᠤᠨ ᠪᠠᠷ᠎ᠠ ᠵᠦᠭᠯᠡᠨ ᠠᠶᠠᠨ ᠤ ᠵᠠᠮ ᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠁         ᠬᠡᠳᠦᠢ ᠶᠠᠪᠣᠵᠦ ᠬᠡᠴᠢᠨᠡᠨ ᠣᠳᠠᠭᠰᠠᠨ ᠢᠶᠠᠨ ᠬᠡᠨ ᠴᠦ ᠲᠦᠰᠦᠭᠡᠯᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠨᠢᠭᠡ ᠮᠡᠳᠡᠬᠦ  ᠳᠤ ᠯᠡ ᠲᠣᠣᠭᠤᠷ ᠨᠢ ᠲᠠᠯᠠᠢ ᠲᠠᠩᠬᠢᠰ ᠦᠷᠭᠦᠯᠵᠢᠯᠡᠭᠡᠳ ᠴᠡᠩᠬᠡᠷᠯᠡᠨ ᠨᠡᠯᠦᠶᠢᠵᠦ ᠪᠠᠶᠢᠯ᠎ᠠ᠃ ᠬᠦᠰᠡᠯ ᠲᠡᠮᠡᠦᠯᠡᠯ  ᠳᠡᠭᠡᠨ ᠬᠦᠳᠦᠯᠦᠭᠳᠡᠭᠰᠡᠨ ᠬᠦᠭᠡᠷᠦᠬᠦᠢ ᠰᠢᠪᠠᠭᠤᠳ ᠬᠦᠪᠡᠭᠡ ᠬᠢᠵᠠᠭᠠᠷ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠬᠤᠯᠠ ᠶᠢᠨ ᠵᠠᠮ  ᠳᠤ ᠣᠳᠣ ᠰᠠᠶ᠋ᠢ ᠰᠠᠨᠠᠭ᠎ᠠ ᠪᠣᠯᠪᠠ᠃ ᠵᠣᠯᠵᠠᠭ᠎ᠠ ᠰᠢᠪᠠᠭᠤᠳ ᠤᠨ ᠶᠠᠷᠢᠶ᠎ᠠ ᠬᠦᠭᠡᠷᠦᠭᠡ ᠢᠳᠡᠭ ᠢᠳᠡᠭ ᠢᠶᠠᠷ ᠠᠷᠢᠯᠣᠨ ᠵᠠᠮᠬᠠᠷᠠᠭᠠᠳ ᠲᠣᠭᠤᠢ ᠨᠣᠮᠣᠢ ᠪᠣᠯᠴᠢᠬᠠᠭᠰᠠᠨ ᠬᠤᠪᠢ ᠬᠤᠪᠢ ᠪᠠᠨ ᠬᠦᠭᠡᠭᠡᠳ ᠵᠢᠳᠭᠦᠭᠦᠯᠵᠦ ᠢᠷᠡᠯ᠎ᠡ᠃ ᠲᠡᠳᠡᠨ ᠤ ᠬᠠᠳᠠᠭᠤᠷᠠᠵᠦ ᠭᠦᠢᠴᠡᠭᠡ ᠦᠭᠡᠢ ᠲᠠᠯᠠᠪᠴᠢ ᠵᠢᠭᠦᠷ ᠨᠢ ᠬᠤᠯᠠ ᠶᠢᠨ ᠠᠶᠠᠨ ᠤ ᠬᠠᠯᠠ ᠲᠠᠮᠣ ᠳᠤ ᠡᠨᠡᠯᠦᠨ ᠰᠢᠨᠠᠯᠣᠨ ᠡᠪᠡᠳᠴᠦ ᠡᠬᠢᠯᠡᠪᠡ᠃ ᠠᠭᠠᠵᠢᠭᠤ ᠲᠠᠯᠪᠢᠭᠤ ᠶᠠᠪᠣᠶ᠎ᠠ ᠭᠡᠬᠦ ᠳᠤ ᠰᠦᠷᠦᠭ ᠤᠨ ᠵᠠᠢ ᠶᠡᠬᠡᠰᠴᠦ᠂ ᠲᠦᠷᠦᠭᠦᠴᠢ ᠶᠢᠨ ᠰᠢᠪᠠᠭᠤᠳ ᠬᠤᠯᠠ ᠠᠴᠠ ᠬᠤᠯᠠ ᠲᠠᠰᠣᠷᠬᠠᠶᠢᠳᠠᠨ ᠬᠤᠯᠠᠳᠴᠠᠢ᠃ ᠠᠮᠠᠷᠠᠵᠦ ᠵᠢᠭᠠᠬᠠᠨ ᠰᠠᠭᠤᠶ᠎ᠠ ᠭᠡᠬᠦᠯᠡᠷ ᠰᠦᠷᠦᠭ ᠠᠴᠠ ᠪᠠᠨ ᠬᠤᠴᠣᠷᠠᠬᠤ  ᠶᠢ ᠪᠣᠣ ᠬᠡᠯᠡ ᠬᠦᠯ ᠲᠠᠯᠪᠢᠬᠤ ᠭᠠᠵᠠᠷ ᠦᠭᠡᠢ ᠠᠨᠠᠪᠠᠳ ᠲᠠᠯᠠᠢ ᠦᠷᠭᠦᠯᠵᠢᠯᠡᠭᠰᠡᠨ ᠢ ᠶᠠᠭᠠᠬᠢᠨ᠎ᠠ ᠭᠡᠯᠳᠡᠢ︖         ᠬᠦᠭᠡ ᠲᠠᠯᠠᠢ ᠬᠦᠭᠡᠰᠦᠷᠡᠨ ᠲᠠᠪᠠᠯᠭᠠᠯᠠᠭᠠᠳ ᠬᠦᠢᠳᠡᠨ ᠵᠢᠪᠠᠷ ᠬᠤᠣᠭᠢᠨ ᠱᠣᠣᠭᠢᠨ᠎ᠠ᠃ ᠬᠦᠭᠰᠢᠨ ᠰᠢᠪᠠᠭᠤᠳ ᠬᠡᠴᠡᠭᠦᠦ ᠲᠣᠯᠭᠠᠷᠠᠵᠦ ᠬᠡᠷᠡᠭ ᠪᠢᠰᠢᠳᠡᠭᠰᠡᠨ ᠢ ᠭᠠᠳᠠᠷᠯᠠᠭᠰᠠᠨ ᠠᠪᠠᠴᠦ᠂ ︽ᠴᠡᠷᠢᠭ ᠤᠨ ᠰᠡᠳᠬᠢᠯ ᠢ ᠰᠠᠮᠠᠭᠤᠷᠠᠭᠤᠯᠣᠨ᠂ ᠪᠠᠶᠢᠯᠳᠣᠬᠤ ᠬᠦᠴᠦᠨ ᠢ ᠨᠢ ᠰᠣᠯᠠᠷᠠᠭᠤᠯᠬᠤ︾ ᠠᠴᠠ ᠡᠮᠢᠶᠡᠨ ᠲᠣᠣᠭᠠᠷᠴᠦ ᠴᠢᠳᠠᠬᠤ ᠦᠭᠡᠢ ᠪᠢᠳᠡᠭᠦᠦ ᠳᠡᠭᠡᠨ ᠰᠢᠷᠬᠠᠯᠠᠨ ᠵᠢᠷᠦᠬᠡᠨ ᠳᠡᠭᠡᠨ ᠣᠬᠢᠯᠠᠯᠳᠣᠭᠰᠠᠭᠠᠷ ᠨᠢᠰᠦᠯᠳᠦᠨ᠎ᠡ᠃ ᠲᠣᠯᠭᠠᠷᠠᠵᠦ ᠢᠷᠡᠭᠰᠡᠨ ᠵᠣᠪᠠᠯᠠᠩ ᠢ ᠲᠣᠭᠤᠯᠵᠣ ᠯᠡ ᠭᠠᠷᠬᠤ ᠠᠴᠠ ᠪᠢᠰᠢ ᠲᠣᠭᠤᠷᠢᠨ ᠭᠠᠷᠴᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠭᠰᠠᠨ ᠬᠤᠶᠢᠨ᠎ᠠ ᠶᠠᠭᠤ ᠪᠣᠯᠣᠭᠰᠠᠨ ᠴᠦ ᠵᠣᠷᠢᠭᠰᠠᠨ ᠵᠦᠭ ᠵᠦᠭᠯᠡᠭᠰᠡᠨ ᠴᠢᠭ ᠲᠡᠭᠡᠨ ᠨᠢᠭᠡ ᠰᠡᠳᠬᠢᠯ ᠨᠡᠶᠢᠳᠡ ᠶᠢᠨ ᠵᠣᠷᠢᠭ  ᠢᠶᠠᠷ ᠲᠡᠮᠡᠦᠯᠡᠨ ᠵᠢᠳᠬᠦᠬᠦ ᠯᠡ ᠬᠡᠷᠡᠭᠳᠡᠢ ᠪᠣᠯᠵᠠᠢ᠃ ᠵᠣᠯᠵᠠᠭ᠎ᠠ ᠰᠢᠪᠠᠭᠤᠳ ᠢᠳᠡᠭ ᠢᠳᠡᠭ ᠢᠶᠠᠷ ᠰᠣᠨᠵᠣᠷᠠᠨ ᠬᠤᠴᠣᠷᠴᠦ ᠢᠷᠡᠯ᠎ᠡ᠃ ᠵᠢᠭᠦᠷ ᠲᠠᠯᠠᠪᠴᠢ ᠨᠢ ᠮᠢᠨᠴᠣᠭᠦᠷᠡᠭᠡᠳ ᠰᠠᠨᠠᠭ᠎ᠠ ᠪᠠᠷ ᠨᠢ ᠵᠠᠷᠣᠭᠳᠠᠬᠤ ᠪᠠᠨ ᠪᠣᠯᠢᠵᠠᠢ᠃ ᠲᠡᠭᠡᠨ ᠲᠡᠭᠡᠭᠰᠡᠭᠡᠷ ᠴᠢᠬᠢ ᠨᠢ ᠱᠣᠣᠭᠢᠵᠦ ᠨᠢᠳᠦ  ᠨᠢ ᠡᠷᠢᠶᠡᠯᠵᠢᠭᠡᠳ ᠬᠠᠮᠢᠭᠠᠰᠢ ᠶᠠᠭᠤᠨ ᠳᠤ ᠶᠠᠪᠣᠭ᠎ᠠ ᠪᠠᠨ ᠮᠡᠳᠡᠬᠦ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠣᠭᠠᠳ ᠨᠢᠭᠡ ᠬᠤᠶᠠᠷ ᠢᠶᠠᠷ ᠬᠡᠯᠪᠡᠯᠵᠡᠨ ᠲᠡᠯᠪᠡᠯᠵᠡᠨ ᠠᠭᠰᠠᠭᠠᠷ ᠭᠤᠳᠣᠰ ᠭᠤᠳᠣᠰ ᠬᠢᠨ ᠲᠠᠯᠠᠢ ᠣᠷᠣᠭᠤ ᠣᠨᠠᠵᠦ ᠣᠷᠣᠭᠠᠳ ᠵᠢᠭᠠᠰᠣᠨ ᠢᠳᠡᠰᠢ ᠪᠣᠯᠵᠣ ᠪᠠᠶᠢᠪᠠ ᠁         ᠦᠪᠦᠩ ᠲᠣᠯᠣᠭᠠᠶᠢᠳᠣ᠂ ᠣᠳᠣᠢ ᠰᠡᠭᠦᠯᠳᠦ ᠡᠨᠡ ᠪᠦᠬᠦᠨ ᠢ ᠬᠠᠮᠢᠶᠠᠷᠣᠯ ᠦᠭᠡᠢ ᠬᠦᠵᠦᠬᠦᠦ ᠰᠣᠩᠭᠠᠨ ᠬᠦᠯ ᠲᠡᠶᠢᠷᠦᠭᠡᠳ ᠣᠷᠣᠭᠰᠢ ᠱᠣᠩᠭᠤᠨ ᠨᠢᠰᠦᠨ᠎ᠡ᠃ ᠲᠡᠳᠡ ᠴᠣᠬᠤᠮ ᠬᠠᠷ᠎ᠠ ᠠᠮᠢ ᠪᠠᠨ ᠯᠡ ᠪᠣᠳᠣᠭᠰᠠᠨ ᠶᠤᠮ ᠦᠦ ᠡᠰᠡᠬᠦᠯ᠎ᠡ ︽ᠬᠡᠨ ᠨᠢᠭᠡᠨ ᠤ ᠦᠬᠦᠯ ᠬᠤᠷᠣᠭᠳᠠᠯ ᠳᠤ ᠰᠡᠳᠬᠢᠯ ᠠᠯᠭᠠᠰᠠᠨ ᠬᠤᠷᠭᠤᠭᠠᠳᠠᠬᠤ ᠶᠤᠮ ᠪᠣᠯ ᠰᠦᠷᠦᠭ ᠣᠯᠠᠨ ᠤ ᠠᠮᠢ ᠨᠠᠰᠣ ᠲᠡᠷᠡ ᠪᠦᠬᠦᠨ ᠢᠶᠠᠷ ᠢᠶᠠᠨ ᠲᠠᠭᠤᠰᠣᠨ᠎ᠠ︾ ᠬᠡᠮᠡᠨ ᠶᠡᠭᠡ ᠲᠠᠯ᠎ᠠ ᠶᠢ ᠲᠦᠰᠦᠭᠡᠯᠡᠨ ᠪᠣᠳᠣᠭᠰᠠᠨ ᠶᠤᠮ ᠦᠦ ᠭᠡᠳᠡᠭ ᠢ ᠪᠣᠰᠣᠳ ᠰᠢᠪᠠᠭᠤᠳ ᠬᠡᠨ ᠠᠯᠢᠨ ᠴᠦ ᠮᠡᠳᠡᠭᠰᠡᠨ ᠦᠭᠡᠢ᠃               ᠬᠠᠷ᠎ᠠ ᠡᠭᠦᠯᠡᠰ ᠬᠤᠮᠣᠷᠭᠠᠯᠠᠨ ᠡᠪᠬᠡᠷᠦᠯᠳᠦᠭᠡᠳ ᠬᠤᠷᠮᠣᠰᠳᠠ ᠲᠡᠭᠷᠢ ᠠᠶᠣᠩᠭᠠᠯᠠᠨ ᠴᠠᠬᠢᠯᠣᠨ᠎ᠠ᠃         ᠬᠠᠷᠠᠵᠦ ᠪᠠᠶᠢᠳᠠᠯ᠎ᠠ ᠲᠣᠭᠰᠢᠨ ᠪᠣᠷᠣᠭᠠᠨ ᠰᠠᠭᠤᠯᠠᠭ᠎ᠠ ᠰᠠᠪᠠ ᠪᠠᠷ ᠴᠢᠳᠬᠤᠵᠣ ᠪᠠᠶᠢᠬᠤ ᠰᠢᠭ᠋ ᠠᠰᠬᠠᠷᠠᠭᠤᠯᠵᠣ ᠪᠠᠶᠢᠭᠰᠠᠨ ᠢᠶᠠᠨ ᠦᠨᠳᠡᠭᠡᠨ ᠴᠢᠨᠡᠭᠡᠨ ᠮᠦᠨᠳᠦᠷ ᠪᠣᠯᠵᠣ ᠬᠤᠪᠢᠷᠠᠭᠠᠳ ᠬᠠᠶᠢᠷ᠎ᠠ ᠨᠠᠶᠢᠷ ᠦᠭᠡᠢ ᠴᠣᠬᠢᠯᠠᠵᠦ ᠢᠷᠡᠪᠡ᠃         ᠮᠦᠨᠳᠦᠷ ᠲᠤ ᠴᠣᠬᠢᠭᠤᠯᠣᠭᠰᠠᠨ ᠵᠣᠯᠵᠠᠭ᠎ᠠ ᠰᠢᠪᠠᠭᠤᠳ ᠭᠠᠰᠠᠯᠠᠩᠳᠠᠶᠢᠬᠠᠨ ᠭᠠᠭᠠᠯᠠᠭᠰᠠᠭᠠᠷ ᠲᠠᠯᠪᠠᠯᠵᠠᠨ ᠣᠨᠠᠵᠦ ᠪᠠᠶᠢᠬᠤ ᠳᠤ ᠠᠶᠠᠨ ᠵᠠᠮ ᠤᠨ ᠶᠠᠳᠠᠷᠠᠭ᠎ᠠ᠂ ᠠᠶᠣᠣᠯᠢᠬᠠᠢ ᠴᠡᠭᠡᠵᠢᠨ ᠤ ᠭᠠᠰᠢᠭᠤᠳᠠᠯ᠂ ᠠᠭᠠᠳᠠᠷ ᠪᠣᠷᠣᠭᠠᠨ ᠤ ᠴᠣᠬᠢᠯᠳᠠ ᠵᠡᠷᠭᠡ ᠳᠤ ᠲᠠᠪᠬᠤᠷ ᠲᠠᠪᠬᠤᠷ ᠣᠨᠣᠭᠳᠠᠭᠰᠠᠨ ᠬᠦᠭᠰᠢᠨ ᠰᠢᠪᠠᠭᠤᠳ ᠴᠦ ᠨᠢᠭᠡ ᠬᠤᠶᠠᠷ ᠢᠶᠠᠷ ᠬᠤᠶᠢᠨ᠎ᠠ ᠬᠤᠶᠢᠨ᠎ᠠ ᠠᠴᠠ ᠪᠠᠨ ᠴᠢᠮᠡᠭᠡ ᠢᠮᠡᠭᠡ ᠦᠭᠡᠢ ᠣᠶᠢᠴᠢᠵᠦ ᠪᠠᠶᠢᠯ᠎ᠠ᠃                     ᠠᠭᠠᠳᠠᠷ ᠪᠣᠷᠣᠭᠠᠨ ᠠᠭᠠᠵᠢᠮᠬᠠᠨ ᠠᠷᠢᠯᠵᠦ᠂ ᠲᠣᠭᠰᠢᠨ ᠮᠦᠨᠳᠦᠷ ᠲᠦᠷ ᠵᠣᠭᠰᠣᠪᠠ᠃         ᠰᠢᠪᠠᠭᠤᠳ ᠤᠨ ᠰᠦᠷᠦᠭ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠰᠢᠩᠭᠡᠷᠡᠨ ᠴᠦᠬᠡᠭᠡᠷᠡᠵᠡᠢ᠃ ᠰᠢᠷᠬ᠎ᠠ ᠲᠠᠢ ᠵᠢᠭᠦᠷ ᠰᠣᠷᠪᠢ ᠲᠠᠢ ᠪᠡᠶ᠎ᠡ ᠶᠢᠨ ᠢᠶᠠᠨ ᠡᠪᠡᠳᠴᠦ ᠬᠠᠪᠣᠳᠬᠤ ᠶᠢ ᠲᠡᠰᠪᠦᠷᠢᠯᠡᠨ᠂ ᠦᠯᠦᠰᠬᠦ ᠶᠢᠨ ᠭᠠᠴᠢᠭᠳᠠᠯ ᠶᠠᠳᠠᠷᠠᠬᠤ ᠶᠢᠨ ᠲᠣᠶᠢᠯ ᠤᠨ ᠲᠠᠪᠬᠤᠷ ᠲᠠᠪᠬᠤᠷ ᠵᠣᠪᠠᠯᠠᠩ ᠢ ᠠᠷᠭᠠᠴᠠᠨ ᠨᠢᠰᠦᠯᠳᠦᠬᠦ ᠵᠠᠯᠠᠭᠤᠬᠠᠨ ᠰᠢᠪᠠᠭᠤᠳ ᠲᠤ ᠣᠳᠣ ︽ᠵᠢᠷᠭᠠᠯ ᠤᠨ ᠣᠷᠳᠣᠨ — ᠳ᠋ᠧᠪᠡᠵᠡᠨ︾ ᠢ ᠪᠢᠰᠢ ᠬᠠᠷᠢᠨ ︽ᠵᠢᠭᠦᠷ ᠠᠮᠠᠷᠠᠭᠤᠯᠬᠤ ᠵᠢᠭᠠᠬᠠᠨ ᠭᠠᠵᠠᠷ︾ ᠲᠠᠭᠠᠷᠠᠭᠠᠳ ︽ᠦᠯ ᠲᠠᠷᠣᠬᠤ ᠦᠴᠦᠬᠡᠨ ᠶᠠᠭᠤᠮ᠎ᠠ︾ ᠣᠯᠬᠤ ᠯᠡ ᠬᠠᠮᠤᠭ ᠶᠡᠭᠡ ᠭᠤᠷᠢᠳᠠᠯ ᠪᠣᠯᠵᠣ ᠦᠯᠡᠳᠡᠵᠡᠢ᠃ ᠬᠦᠭᠰᠢᠨ ᠰᠢᠪᠠᠭᠤᠳ ᠠᠴᠠ ᠦᠷ᠎ᠡ ᠶᠢᠨ ᠭᠠᠭᠴᠠ ᠡᠪᠦᠭᠡᠨ ᠠᠬᠠᠯᠠᠭᠴᠢ ᠯᠡ ᠬᠠᠰᠢᠷ ᠰᠠᠭᠤᠭᠰᠠᠨ ᠬᠠᠭᠤᠴᠢᠨ ︽ᠭᠠᠷ︾ ᠭᠡᠰᠡᠨ ᠢᠶᠠᠷ ᠢᠶᠠᠨ ᠦᠦ ᠡᠰᠡᠬᠦᠯ᠎ᠡ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠪᠠᠨ ᠪᠡᠶᠡᠯᠡᠭᠦᠯᠵᠦ ᠲᠡᠶᠢᠯᠦᠭᠡ ᠦᠭᠡᠢ ᠬᠡᠮᠡᠨ ᠰᠢᠳᠦ ᠵᠠᠭᠤᠭᠰᠠᠨ ᠤ ᠦᠦ ᠪᠣᠣ ᠮᠡᠳᠡ ᠵᠦᠳᠡᠭᠦᠬᠡᠨ ᠠᠮᠢ ᠲᠠᠢ ᠦᠯᠡᠳᠡᠭᠡᠳ ᠰᠦᠷᠦᠭ ᠤᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ  ᠵᠣᠪᠠᠭᠤᠷᠢᠳᠠᠶᠢᠬᠠᠨ ᠲᠡᠪᠢᠵᠦ ᠪᠠᠶᠢᠪᠠ᠃         ᠬᠦᠭᠡ ᠲᠡᠭᠷᠢ ᠬᠦᠭᠡᠮᠳᠦᠭ ᠲᠠᠯᠠᠢ ᠵᠠᠯᠭᠠᠯᠳᠣᠭᠠᠳ ᠬᠦᠪᠡᠭᠡ ᠬᠢᠵᠠᠭᠠᠷ ᠦᠭᠡᠢ᠃         ᠢᠯᠠᠭᠳᠠᠨ ᠣᠬᠤᠷᠢᠭᠰᠠᠨ ᠣᠲᠠᠷᠢᠶᠠᠲ   ᠤᠨ ᠡᠷᠡᠮᠳᠡᠭ ᠵᠡᠷᠡᠮᠳᠡᠭ ᠴᠡᠷᠢᠭ ᠤᠳ ᠰᠢᠭ ᠰᠢᠪᠠᠭᠤᠳ ᠤᠨ ᠰᠦᠷᠦᠭ ᠡᠮᠬᠢ ᠵᠠᠮᠪᠠᠷᠠᠭ᠎ᠠ ᠪᠠᠨ ᠠᠯᠳᠠᠭᠰᠠᠨ ᠠᠪᠠᠴᠦ ᠭᠠᠰᠢᠭᠤᠳᠠᠯ ᠭᠠᠩᠰᠠᠷᠠᠯ ᠤᠨ ᠠᠶᠠᠰ ᠲᠠᠢ ᠦᠴᠦᠬᠡᠨ ᠲᠣᠣᠷ᠎ᠠ ᠲᠠᠭᠤᠨ ᠢᠶᠠᠷ ︽ᠭᠠᠩᠭᠠᠷ ᠭᠤᠩᠭᠤᠷ ᠁︾ ᠬᠡᠮᠡᠨ ᠲᠠᠭᠤ ᠴᠢᠮᠡᠭᠡ ᠠᠪᠣᠯᠴᠠᠭᠰᠠᠭᠠᠷ ᠬᠦᠴᠢᠷᠳᠡᠢ ᠣᠶᠢᠳᠬᠠᠷᠳᠠᠢ ᠣᠷᠣᠭᠰᠢᠯᠠᠨ᠎ᠠ᠃         ᠲᠡᠳᠡ ᠡᠪᠦᠭᠡᠳ ᠤᠨ ᠶᠣᠰᠣᠨ ᠤ ᠦᠨᠡᠨ ᠵᠦᠪ ᠤᠨ ᠢᠯᠠᠭᠳᠠᠰᠢ ᠦᠭᠡᠢ ᠶᠢ ᠣᠬᠠᠭᠠᠷᠠᠵᠦ ᠢᠷᠡᠪᠡ᠃ ᠶᠢᠷᠳᠢᠨᠴᠦ ᠶᠢᠨ  ᠵᠢᠮ᠎ᠡ ᠶᠢ ᠲᠡᠷᠰᠯᠡᠵᠦ ᠪᠣᠯᠣᠰᠢ ᠦᠭᠡᠢ ᠶᠢ ᠲᠠᠨᠢᠵᠦ ᠡᠬᠢᠯᠡᠪᠡ᠃ ᠲᠡᠳᠡ ︽ᠭᠡᠮ ᠨᠢ ᠡᠮᠦᠨ᠎ᠡ ᠪᠠᠨ ᠭᠡᠮᠰᠢᠯ ᠨᠢ ᠬᠤᠶᠢᠨ᠎ᠠ ᠪᠠᠨ︾ ᠪᠠᠶᠢᠳᠠᠭ ᠤᠨ ᠵᠠᠷᠴᠢᠮ ᠢᠶᠠᠷ ᠲᠦᠪ ᠶᠣᠰᠣᠨ ᠤ ᠵᠠᠯᠬᠠᠭᠠᠯ ᠳᠤ ᠣᠴᠠᠷᠠᠬᠤ ᠨᠢ ᠵᠠᠶᠢᠯᠠᠰᠢ ᠦᠭᠡᠢ ᠪᠣᠯᠣᠭᠰᠠᠨ ᠪᠦᠭᠡᠳ ᠵᠠᠶᠢᠯᠠᠵᠦ ᠪᠣᠯᠳᠠᠵᠦ ᠴᠦ ᠴᠢᠳᠠᠰᠢ ᠦᠭᠡᠢ ᠭᠡᠰᠡᠨ ᠢ ᠮᠡᠳᠡᠷᠡᠭᠰᠡᠨ ᠠᠪᠠᠴᠦ ︽ᠦᠪᠡᠷ ᠢᠶᠠᠨ ᠣᠶᠢᠴᠢᠭᠰᠠᠨ ᠬᠡᠦᠬᠡᠳ ᠣᠬᠢᠯᠠᠳᠠᠭ ᠦᠭᠡᠢ︾ ᠶᠢᠨ ᠶᠣᠰᠣ ᠪᠠᠷ ᠬᠡᠨ ᠠᠯᠢᠨ ᠴᠦ ᠲᠣᠣᠭᠠᠷᠴᠦ ᠴᠢᠳᠠᠭᠰᠠᠨ ᠦᠭᠡᠢ᠃         ᠦᠪᠦᠩ ᠲᠣᠯᠣᠭᠠᠶᠢᠳᠣ ᠡᠪᠡᠳᠬᠦ ᠶᠠᠳᠠᠷᠠᠬᠤ ᠪᠠᠨ ᠲᠡᠰᠪᠦᠷᠢᠯᠡᠨ ᠠᠭᠠᠵᠢᠮᠬᠠᠨ ᠲᠡᠪᠢᠨ᠎ᠡ᠃ ︽ᠡᠪᠦᠭᠡᠳ  ᠤᠨ ᠶᠣᠰᠣ᠂ ᠶᠢᠷᠳᠢᠨᠴᠦ ᠶᠢᠨ ᠵᠢᠷᠦᠮ︾ ᠠᠴᠠ ᠣᠷᠪᠠᠨ ᠲᠡᠷᠰᠯᠡᠭᠡᠳ ᠠᠶᠢᠮᠠᠭ ᠪᠦᠯᠦᠭ ᠣᠭᠰᠠᠭ᠎ᠠ ᠲᠦᠷᠦᠯ ᠳᠡᠭᠡᠨ ᠠᠭᠤᠴᠢᠯᠠᠵᠦ ᠪᠣᠯᠣᠰᠢ ᠦᠭᠡᠢ ᠯᠣᠳᠣ ᠶᠡᠭᠡ ᠬᠤᠬᠢᠷᠠᠯ ᠣᠴᠠᠷᠠᠭᠤᠯᠣᠭᠰᠠᠨ ᠢᠶᠠᠨ ᠮᠡᠳᠡᠭᠰᠡᠨ ᠪᠣᠯᠪᠠᠴᠦ ᠣᠳᠣ ᠲᠡᠭᠦᠨ  ᠳᠤ ᠣᠰᠣᠯ ᠪᠣᠷᠣᠭᠤ ᠪᠠᠨ ᠮᠡᠳᠡᠷᠡᠵᠦ᠂ ᠣᠬᠤᠷᠢᠵᠦ ᠪᠣᠴᠠᠬᠤ ᠵᠠᠮ ᠭᠡᠵᠦ ᠶᠠᠭ ᠲᠠᠭ ᠪᠣᠯᠵᠠᠢ᠃ ᠣᠳᠣᠢ ᠰᠡᠭᠦᠯᠳᠦ ᠣᠨᠠᠵᠣ ᠣᠶᠢᠴᠢᠮᠠᠷ ᠪᠣᠯᠬᠤ ᠳᠠᠭᠠᠨ ︽ᠠᠪᠣᠷᠭᠤ ᠵᠢᠭᠠᠰᠣ ᠶᠢᠨ ᠢᠳᠡᠰᠢ ᠪᠣᠯᠣᠭᠠᠳ ᠰᠠᠨᠠᠭ᠎ᠠ ᠠᠮᠠᠷᠠᠶ᠎ᠠ︾ ᠬᠡᠮᠡᠨ ᠪᠣᠳᠣᠭᠰᠠᠨ ᠠᠪᠠᠴᠦ ᠦᠪᠦᠩ ᠲᠣᠯᠣᠭᠠᠶᠢᠳᠣ ᠶᠢᠨ ᠣᠷᠣᠭᠰᠢᠯᠠᠯ᠂  ᠰᠦᠷᠦᠭ ᠰᠢᠪᠠᠭᠤᠳ ᠤᠨ ᠲᠡᠮᠡᠦᠯᠡᠯ ᠨᠢ ︽ᠣᠳᠣ ᠯᠡ ᠣᠳᠠᠬᠤ ᠦᠭᠡᠢ ︿ᠳ᠋ᠧᠪᠡᠵᠡᠨ﹀ ᠳᠤ ᠬᠦᠷᠦᠨ᠎ᠡ ᠳ᠋ᠠ︾ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠮᠠᠷ ᠰᠠᠨᠠᠭᠳᠠᠬᠤᠯᠠᠷ ᠠᠬᠢᠭᠠᠳ ᠬᠠᠳᠠᠭᠤᠵᠢᠨ ᠲᠠᠪᠢᠵᠠᠢ᠃                   ᠬᠠᠷ᠎ᠠ ᠲᠣᠯᠪᠤ︕         ᠲᠡᠷᠡ᠂ ᠲᠡ᠊ — ᠷᠡ ᠬᠤᠯᠠ ᠶᠢᠨ ᠠᠯᠣᠰ ᠲᠡᠭᠷᠢ ᠶᠢᠨ ᠬᠦᠪᠡᠭᠡᠨ ᠤ ᠲᠡᠨᠳᠡᠴᠡ ᠬᠠᠷ᠎ᠠ ᠲᠣᠯᠪᠤ ᠢᠯᠡᠷᠡᠪᠡ᠃ ᠣᠨᠳᠠᠷᠠᠬᠤ ᠰᠢᠬᠠᠭᠰᠠᠨ ᠠᠮᠢᠨ ᠭᠠᠯ ᠨᠢ ᠠᠬᠢᠭᠠᠳ ᠲᠦᠷᠡᠯᠵᠡᠭᠰᠡᠨ ᠦᠨᠦ ᠰᠢᠪᠠᠭᠤᠳ ᠪᠠᠶᠢᠳᠠᠭ ᠬᠦᠴᠦᠨ ᠢᠶᠠᠨ ᠰᠢᠪᠬᠠᠨ ᠪᠠᠶᠢᠵᠦ ᠡᠴᠦᠰ ᠤᠨ ᠲᠠᠭᠠᠷᠢᠯᠳᠠ ᠬᠢᠯ᠎ᠡ᠃         ︽ᠫᠦᠰ ᠲᠦᠰ ᠁ ᠫᠠᠰ ᠲᠠᠰ ᠁︾᠃         ᠬᠦᠷᠦᠰᠦ ᠰᠢᠷᠣᠢ ᠣᠯᠵᠣ ᠬᠠᠷᠠᠭᠰᠠᠨ ᠬᠦᠭᠡᠷᠦᠬᠦᠢ ᠰᠢᠪᠠᠭᠤᠳ ᠭᠠᠵᠠᠷ ᠪᠠᠭᠤᠬᠤ ᠳᠠᠭᠠᠨ ᠪᠡᠶ᠎ᠡ ᠪᠠᠨ ᠡᠵᠡᠮᠳᠡᠬᠦ ᠲᠡᠩᠬᠡᠭᠡ ᠦᠭᠡᠢ ᠬᠦᠰᠡᠷ ᠣᠶᠢᠴᠢᠵᠦ ᠪᠠᠶᠢᠪᠠ᠃ ᠲᠡᠳᠡ ᠦᠵᠦᠭᠦᠷ ᠬᠢᠵᠠᠭᠠᠷ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠦᠷᠭᠡᠨ ᠶᠡᠭᠡ ᠲᠠᠯᠠᠢ ᠶᠢᠨ ᠲᠣᠮᠳᠠᠬᠢ ᠦᠴᠦᠬᠡᠨ ᠪᠠᠭ᠎ᠠ ᠦᠨᠦᠴᠢᠨ ᠠᠷᠠᠯ ᠲᠡᠭᠡᠷ᠎ᠡ ᠵᠣᠯ ᠲᠠᠢ ᠬᠦᠷᠴᠦ ᠢᠷᠡᠭᠰᠡᠨ  ᠨᠢ ᠡᠨᠡ ᠪᠠᠶᠢᠵᠠᠢ᠃         ᠬᠡᠳᠦᠶᠢᠴᠢᠨᠡᠨ ᠣᠳᠠᠭᠰᠠᠨ ᠢ ᠪᠣᠣ ᠮᠡᠳᠡ᠃ ︽ᠴᠢᠰ ᠴᠠᠰ ᠁︾ ︽ᠫᠢᠳ ᠫᠠᠳ ᠁︾ ︽ᠵᠢᠷ ᠵᠣᠷ ᠁︾ ᠬᠡᠮᠡᠬᠦ ᠲᠡᠷᠡ ᠬᠤᠯᠠ ᠶᠢᠨ ᠠᠳᠠᠯ᠎ᠠ ᠪᠠᠨ ᠲᠡᠶᠢᠮᠦ ᠯᠡ ᠣᠶᠢᠷᠠᠬᠠᠨ ᠠᠶ᠎ᠠ ᠲᠠᠭᠤᠨ ᠢᠶᠠᠷ ᠲᠡᠳᠡ ᠨᠢᠭᠡ ᠨᠢᠭᠡ ᠪᠠᠷ ᠢᠶᠠᠨ ᠨᠢᠳᠦ ᠪᠠᠨ ᠵᠠᠪᠰᠠᠷᠯᠠᠪᠠ᠃ ᠰᠠᠯᠬᠢᠨ ᠤ ᠠᠶᠠᠰ ᠢᠶᠠᠷ ᠨᠠᠶᠢᠭᠤᠭᠰᠠᠨ ᠶᠠᠩᠵᠦ ᠶᠢᠨ ᠣᠷᠭᠤᠮᠠᠯ  ᠠᠴᠠ ᠰᠠᠮᠰᠠ ᠴᠣᠷᠭᠢᠮ᠎ᠠ ᠰᠠᠶᠢᠬᠠᠨ ᠦᠨᠦᠷ ᠠᠩᠭᠢᠯᠣᠭᠠᠳ᠂ ᠨᠢᠰᠦᠯᠳᠦᠬᠦ ᠭᠦᠶᠦᠯᠳᠦᠬᠦ ᠬᠤᠷᠣᠬᠠᠢ ᠰᠢᠪᠡᠵᠢ ᠠᠴᠠ ᠲᠣᠷ᠎ᠠ ᠪᠣᠯᠢᠶᠠᠮ᠎ᠠ ᠰᠣᠳᠣᠨ ᠠᠮᠳᠠ ᠮᠡᠳᠡᠷᠡᠭᠳᠡᠨ᠎ᠡ᠃         ᠲᠡᠳᠡ ᠬᠡᠨ ᠠᠯᠢᠨ ᠠᠴᠠ ᠪᠠᠨ ᠬᠤᠴᠣᠷᠬᠤ ᠠᠴᠠ ᠪᠠᠨ ᠠᠶᠣᠭᠰᠠᠨ ᠰᠢᠭ᠋ ᠬᠤᠪᠬᠤ ᠬᠤᠪᠬᠤ ᠦᠰᠦᠷᠦᠨ ᠪᠣᠰᠴᠠᠭᠠᠪᠠ᠃ ᠣᠨᠠᠵᠦ ᠪᠠᠶᠢᠨ᠎ᠠ ᠪᠣᠰᠴᠦ ᠪᠠᠶᠢᠨ᠎ᠠ᠂ ᠪᠣᠰᠴᠦ ᠪᠠᠶᠢᠨ᠎ᠠ ᠣᠨᠠᠵᠦ ᠪᠠᠶᠢᠨ᠎ᠠ᠃ ᠲᠡᠳᠡ ᠮᠦᠯᠬᠦᠵᠦ ᠪᠠᠶᠢᠨ᠎ᠠ ᠮᠠᠭᠠᠵᠢᠵᠦ ᠪᠠᠶᠢᠨ᠎ᠠ᠂ ᠨᠠᠶᠢᠭᠤᠵᠣ ᠪᠠᠶᠢᠨ᠎ᠠ ᠲᠠᠶᠢᠭᠤᠵᠣ ᠪᠠᠶᠢᠨ᠎ᠠ᠃ ︽ᠬᠡᠨ ᠶᠠᠭᠤ︾ ᠶᠢ ᠨᠢ ᠴᠦ  ᠮᠡᠳᠡᠵᠦ ᠲᠠᠨᠢᠳᠠᠭ ᠦᠭᠡᠢ ᠬᠤᠷᠣᠬᠠᠢ ᠰᠢᠪᠡᠵᠢ ᠨᠦᠭᠦᠳ ᠢ ᠬᠤᠩᠰᠢᠶᠠᠷ ᠠᠮᠠ ᠪᠠᠨ ᠣᠯᠬᠤ ᠦᠭᠡᠢ ᠬᠤᠳᠣᠭᠤᠳᠣ ᠭᠡᠳᠡᠰᠦ  ᠪᠠᠨ ᠮᠡᠳᠡᠬᠦ ᠦᠭᠡᠢ ᠲᠣᠶ᠋ᠢᠯᠠᠵᠦ ᠪᠠᠶᠢᠨ᠎ᠠ ᠵᠣᠭᠤᠭᠯᠠᠵᠦ ᠪᠠᠶᠢᠨ᠎ᠠ᠃         ᠲᠡᠳᠡ ᠮᠠᠩᠰᠢᠭᠤᠷᠠᠨ ᠣᠨᠳᠠᠵᠦ ᠪᠠᠶᠢᠨ᠎ᠠ᠂ ᠲᠠᠬᠢᠵᠦ ᠪᠣᠰᠣᠭᠠᠳ ᠵᠣᠭᠤᠭᠯᠠᠵᠦ ᠪᠠᠶᠢᠨ᠎ᠠ  ᠁         ᠡᠪᠦᠭᠡᠨ ᠠᠬᠠᠯᠠᠭᠴᠢ ᠡᠨᠡ ᠪᠦᠬᠦᠨ ᠢ ᠨᠢᠳᠦ ᠲᠦᠭᠦᠷᠬᠡᠨ ᠬᠠᠷᠠᠭᠠᠳ ᠯᠡ ᠪᠠᠶᠢᠶ᠎ᠠ ᠭᠡᠰᠡᠨ ᠰᠢᠭ ᠭᠠᠭᠴᠠ ᠬᠤᠷᠣᠬᠠᠢ ᠬᠠᠭᠠᠰ ᠰᠢᠪᠡᠵᠢ ᠴᠦ ᠢᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠨᠢᠳᠦ ᠪᠠᠨ ᠨᠡᠬᠡᠭᠡᠭᠰᠡᠨ ᠶᠠᠩᠵᠦ ᠪᠠᠷ ᠢᠶᠠᠨ ᠨᠢᠷᠸᠠᠨ ᠲᠦᠷᠢ ᠪᠠᠨ ᠦᠵᠡᠭᠦᠯᠵᠡᠢ᠃ ᠡᠪᠦᠭᠡᠴᠣᠣᠯ ᠪᠠᠭᠠᠴᠣᠣᠯ ᠢᠶᠠᠨ ᠪᠦᠬᠦᠨ ᠢ ᠠᠯᠳᠠᠭᠠᠳ ᠵᠢᠷᠦᠬᠡ ᠨᠢ ᠴᠠᠷᠴᠠᠭᠰᠠᠨ ᠵᠠᠯᠠᠭᠤ ᠰᠢᠪᠠᠭᠤᠳ ᠲᠤ ᠭᠠᠭᠴᠠ ᠯᠡ ᠦᠯᠡᠳᠡᠭᠰᠡᠨ ᠠᠬᠠᠯᠠᠭᠴᠢ ᠶᠢᠨ ᠦᠭᠦᠯ ᠲᠡᠮᠡᠢ ᠶᠠᠭᠤᠮ᠎ᠠ ᠪᠣᠯᠣᠭᠰᠠᠨ ᠦᠭᠡᠢ᠃         ᠡᠳᠦᠷ ᠬᠤᠭᠤᠴᠠᠭ᠎ᠠ ᠡᠭᠡᠯᠵᠢᠯᠡᠨ ᠡᠭᠡᠯᠵᠢᠯᠡᠭᠰᠡᠭᠡᠷ ᠬᠡᠳᠦᠶᠢᠴᠢᠨᠡᠨ ᠣᠳᠠᠭᠰᠠᠨ ᠢ ᠬᠡᠨ ᠠᠯᠢᠨ ᠴᠦ ᠠᠵᠢᠶᠠᠷᠠᠭᠰᠠᠨ ᠦᠭᠡᠢ᠃ ᠠᠳᠡ ᠡᠳᠦᠷᠵᠢᠨ ᠰᠦᠨᠢᠵᠢᠨ ᠠᠯᠠᠯᠳᠣᠭᠠᠨ ᠲᠣᠯᠣᠯᠳᠣᠭᠠᠨ ᠬᠢᠭᠡᠳ ᠬᠠᠰᠢᠷᠠᠳᠠᠭ ᠦᠭᠡᠢ ᠮᠢᠬᠠᠴᠢᠨ ᠠᠮᠢᠳᠠᠨ — ᠠᠷᠢᠶᠠᠳᠠᠨ ᠭᠦᠷᠦᠭᠡᠰᠦ ᠨᠦᠭᠦᠳ ᠪᠠᠶᠢᠭ᠎ᠠ ᠦᠭᠡᠢ᠃ ᠲᠡᠶᠢᠨᠬᠦ ᠦᠪᠦᠩ ᠲᠣᠯᠣᠭᠠᠶᠢᠳᠣ᠂ ᠣᠳᠣᠢ ᠰᠡᠭᠦᠯᠳᠦ ᠶᠢᠨ ᠨᠢᠳᠦᠨ ᠳᠤ ᠢᠯᠠᠯᠳᠠ ᠶᠢᠨ ᠣᠮᠣᠭᠰᠢᠯ ᠲᠣᠳᠣᠷᠠᠨ ︽ᠶᠢᠷᠳᠢᠨᠴᠦ ᠶᠢᠨ ᠭᠠᠳᠠᠨᠠᠬᠢ ᠲᠣᠭᠤᠷ  ᠤᠨ ᠬᠦᠷᠢᠶᠡᠯᠡᠩ — ᠳ᠋ᠧᠪᠡᠵᠡᠨ︾ ᠤ ᠵᠢᠩᠬᠢᠨᠢ ᠡᠵᠡᠨ ᠨᠢ ᠪᠣᠯᠣᠭᠰᠠᠨ ᠳᠠᠭᠠᠨ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠵᠣᠷᠢᠭᠵᠢᠭᠠᠳ ᠲᠠᠭᠤᠯᠠᠨ ᠪᠦᠵᠢᠭᠯᠡᠮᠡᠷ ᠰᠠᠨᠠᠭᠳᠠᠵᠠᠢ᠃         ᠲᠡᠳᠡᠨ ᠤ ᠬᠤᠶᠠᠷ ᠬᠦᠯ ᠨᠢ ᠠᠭᠠᠵᠢᠮ ᠢᠶᠠᠷ ᠵᠢᠷᠢᠯᠵᠡᠨ ᠬᠦᠳᠡᠯᠵᠦ ᠡᠬᠢᠯᠡᠭᠰᠡᠨ ᠠᠪᠠᠴᠦ ᠬᠤᠣᠰ ᠲᠠᠯᠠᠪᠴᠢ ᠨᠢ ᠰᠠᠨᠠᠭ᠎ᠠ ᠪᠠᠷ ᠨᠢ  ᠲᠡᠯᠭᠡᠵᠦ ᠦᠭᠭᠦᠭᠰᠡᠨ ᠦᠭᠡᠢ᠃ ︽ᠭᠠᠩᠭᠠᠷ ᠭᠤᠩᠭᠤᠷ ᠁︾ ᠬᠡᠮᠡᠨ ᠭᠠᠶᠢᠬᠠᠯᠳᠣᠭᠰᠠᠨ ᠰᠢᠪᠠᠭᠤᠳ ᠬᠦᠴᠦᠯᠡᠨ ᠬᠦᠴᠦᠯᠡᠨ ᠲᠡᠪᠢᠬᠦ ᠳᠤ ︽ᠫᠠᠷ ᠫᠠᠷ ᠁︾ ᠬᠡᠮᠡᠬᠦ ᠮᠠᠭᠤᠬᠠᠢ ᠲᠠᠭᠤᠨ ᠯᠡ ᠭᠠᠷᠣᠭᠰᠠᠨ ᠠᠴᠠ ᠪᠢᠰᠢ ᠲᠡᠭᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠶᠢ ᠪᠣᠣ ᠬᠡᠯᠡ ᠵᠢᠭᠦᠷ ᠨᠢ ᠣᠭ ᠢᠶᠠᠷ ᠢᠶᠠᠨ ᠲᠠᠰᠣᠷᠠᠵᠦ ᠣᠨᠠᠮᠠᠷ ᠰᠢᠷᠬᠠᠯᠠᠨ ᠡᠪᠡᠳᠴᠠᠢ ᠁         ᠰᠢᠷᠬ᠎ᠠ ᠳᠠᠭᠠᠨ ᠡᠷᠬᠡᠭᠰᠡᠨ ᠬᠦᠭᠡᠷᠦᠬᠦᠢ ᠰᠢᠪᠠᠭᠤᠳ ᠠᠬᠢᠭᠠᠳ ᠨᠢᠰᠦᠨ ᠲᠡᠪᠳᠡᠷᠢᠬᠦ ᠭᠡᠭᠴᠢ ᠶᠢ ᠠᠷᠣ ᠬᠤᠶᠢᠨ᠎ᠠ ᠪᠠᠨ ᠲᠠᠶᠠᠭᠳᠠᠵᠦ᠂ ︽ᠲᠡᠭᠡᠷ᠎ᠡ ᠪᠠᠨ ᠲᠠᠷᠣᠯᠠᠯ ᠦᠭᠡᠢ᠂ ᠲᠡᠷᠭᠡᠳᠡ ᠪᠠᠨ ᠮᠦᠯᠵᠢᠯ ᠦᠭᠡᠢ︾ ︽ᠳ᠋ᠧᠪᠡᠵᠡᠨ︾ ᠤ ᠠᠮᠢᠳᠣᠷᠠᠯ ᠳᠠᠭᠠᠨ ᠬᠠᠨᠣᠨ ᠠᠭᠤᠰᠣᠭᠠᠳ ᠠᠮ ᠰᠠᠮ ᠵᠢᠷᠭᠠᠵᠠᠢ᠃               ᠲᠦᠷᠢᠮᠡᠬᠡᠶᠢᠯᠡᠯ ᠳᠤ ᠣᠴᠠᠷᠠᠨ ᠲᠡᠭᠡᠷᠡᠮᠳᠡᠯᠭᠡ ᠳᠤ ᠲᠠᠭᠠᠷᠢᠭᠳᠠᠭᠰᠠᠨ ᠦᠨᠦᠴᠢᠨ ᠪᠠᠭ᠎ᠠ ᠠᠷᠠᠯ ᠤᠨ ᠦᠴᠦᠬᠡᠨ ᠬᠤᠷᠣᠬᠠᠢ ᠰᠢᠪᠠᠵᠢ ᠨᠤᠭᠤᠳ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠴᠦᠬᠡᠷᠡᠵᠦ ᠢᠷᠡᠯ᠎ᠡ᠃ ᠭᠡᠳᠡᠰᠦ ᠪᠠᠨ ᠲᠦᠭᠦᠷᠭᠡᠵᠦ ᠲᠡᠶᠢᠯᠬᠦ ᠦᠭᠡᠢ ᠪᠣᠯᠣᠭᠰᠠᠨ ᠬᠦᠭᠡᠷᠦᠬᠦᠢ ᠰᠢᠪᠠᠭᠤᠳ ᠠᠷᠭ᠎ᠠ ᠪᠣᠰᠣ ᠡᠪᠡᠰᠦ ᠣᠷᠭᠤᠮᠠᠯ ᠣᠷᠣᠭᠤ ᠴᠡᠷᠢᠭᠯᠡᠭᠰᠡᠨ ᠪᠠᠶᠢᠪᠠ᠃ ᠡᠪᠡᠰᠦ ᠣᠷᠭᠤᠮᠠᠯ ᠬᠡᠳᠦᠢ ᠰᠢᠮ᠎ᠡ ᠲᠡᠵᠢᠭᠡᠯ ᠲᠠᠢ ᠭᠡᠳᠡᠭ ᠠᠪᠠᠴᠦ ᠦᠭᠡᠬᠦ ᠲᠣᠰᠣ ᠢᠳᠡᠵᠦ ᠰᠣᠷᠣᠭᠰᠠᠨ ᠲᠡᠳᠡᠨ ᠤ ᠭᠡᠳᠡᠰᠦ ᠨᠢ ᠲᠦᠭᠦᠷᠪᠡᠴᠦ ᠰᠡᠳᠬᠢᠯ ᠨᠢ ᠬᠠᠨᠣᠬᠤ ᠦᠭᠡᠢ ᠲᠡᠩᠰᠢᠬᠦ ᠪᠣᠯᠪᠠ᠃         ᠣᠳᠣ᠂ ᠡᠪᠡᠰᠦᠨ ᠤ ᠨᠠᠮᠠᠭ᠎ᠠ ᠣᠷᠭᠤᠮᠠᠯ ᠤᠨ ᠨᠠᠪᠴᠢ ᠴᠦ ᠣᠯᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃         ᠦᠪᠦᠩ ᠲᠣᠯᠣᠭᠠᠶᠢᠳᠣ ᠣᠳᠣᠢ ᠰᠡᠭᠦᠯᠳᠦ ᠳᠤ ᠪᠠᠰᠠ ᠨᠢᠭᠡᠨ ᠬᠠᠳᠠᠭᠤ ᠰᠢᠯᠭᠠᠯᠳᠠ ᠲᠣᠯᠵᠦ ᠢᠷᠡᠯ᠎ᠡ᠃ ᠪᠣᠴᠠᠶ᠎ᠠ ᠭᠡᠬᠦ ᠳᠤ ᠪᠣᠯᠬᠤ ᠶᠠᠭᠤᠮ᠎ᠠ ᠪᠢᠰᠢ᠃ ᠲᠠᠯᠠᠪᠴᠢ ᠶᠢᠨ ᠣᠭ ᠨᠢ ᠡᠪᠡᠳᠬᠦ ᠶᠢ ᠪᠣᠣ ᠬᠡᠯᠡ ᠬᠡᠳᠦᠶᠢᠴᠢᠨᠡᠭᠡᠨ ᠬᠤᠭᠤᠴᠠᠭ᠎ᠠ ᠵᠠᠷᠣᠵᠦ ᠬᠡᠷᠡᠭᠯᠡᠭᠰᠡᠨ ᠦᠭᠡᠢ ᠵᠢᠭᠦᠷ ᠲᠠᠯᠠᠪᠴᠢ ᠨᠢ ᠣᠭ ᠤᠨ ᠢᠶᠠᠨ ᠪᠣᠳᠣᠪᠠᠯ ᠬᠤᠯᠠ ᠠᠪᠴᠢᠨ ᠵᠢᠵᠢᠭᠷᠡᠭᠰᠡᠨ ᠢ ᠲᠡᠳᠡ ᠦᠪᠡᠷᠳᠡᠭᠡᠨ ᠮᠡᠳᠡᠵᠦ ᠪᠠᠶᠢᠨ᠎ᠠ᠃ ᠵᠢᠭᠦᠷ ᠲᠠᠯᠠᠪᠴᠢ ᠨᠢ ᠣᠣᠯ ᠤᠨ ᠢᠶᠠᠨ ᠰᠢᠭ᠋ ᠪᠠᠶᠢᠬᠤ ᠪᠠᠷ ᠪᠣᠳᠣᠬᠤ ᠳᠤ ᠲᠡᠭᠵᠢᠨ ᠭᠤᠸᠠᠯᠢᠭ ᠪᠡᠶ᠎ᠡ ᠮᠠᠬᠠᠪᠣᠳ ᠨᠢ ᠴᠦ ᠨᠣᠭᠤᠰᠦ ᠰᠢᠣᠬᠠᠨ ᠪᠦᠳᠦᠭᠦᠨ ᠲᠠᠷᠭᠤᠨ ᠶᠠᠭᠤᠮ᠎ᠠ ᠪᠣᠯᠣᠭᠰᠠᠨ ᠶᠤᠮ ᠴᠢᠨᠢ ᠨᠢᠰᠦᠨ ᠲᠡᠭᠦᠯᠢᠬᠦ ᠬᠡᠮᠡᠭᠴᠢ ᠭᠤᠨᠵᠢ ᠶᠢᠨ ᠵᠣᠭᠤᠭ ᠪᠣᠯᠵᠠᠢ᠃         ᠨᠡᠩ ᠴᠦ ᠲᠡᠷᠡ ᠠᠯᠣᠰ ᠤᠨ ᠠᠶᠠᠨ ᠤ ᠨᠢᠳᠦ ᠬᠠᠯᠢᠷᠠᠮ᠎ᠠ ᠵᠣᠪᠠᠭᠤᠷᠢ ᠵᠦᠳᠡᠭᠦᠷᠢ᠂ ᠵᠢᠷᠦᠬᠡ ᠰᠢᠮᠰᠢᠷᠠᠮ᠎ᠠ ᠦᠷᠡᠭᠳᠡᠯ ᠰᠦᠢᠳᠦᠯ ᠁ ᠲᠡᠷᠡ ᠪᠦᠬᠦᠨ ᠢ ᠪᠣᠳᠣᠵᠦ ᠰᠡᠳᠬᠢᠬᠦ ᠠᠴᠠ ᠪᠠᠨ ᠴᠦ ᠠᠶᠣᠬᠤ ᠪᠣᠯᠣᠭᠰᠠᠨ ᠰᠢᠪᠠᠭᠤᠳ ᠲᠤ ᠠᠬᠢᠭᠠᠳ ᠪᠣᠴᠠᠬᠤ ᠭᠡᠵᠦ ᠲᠡᠷᠡ ᠬᠤᠯᠠ ᠲᠡᠭᠷᠢ ᠣᠶᠢᠷ᠎ᠠ ᠪᠣᠯᠵᠠᠢ᠃ ᠦᠯᠪᠡᠷᠡᠯ ᠤᠨ ᠬᠡᠴᠡᠭᠦᠦ ᠳᠤ ᠲᠣᠯᠭᠠᠷᠠᠭᠰᠠᠨ ᠰᠢᠪᠠᠭᠤᠳ ᠠᠷᠭ᠎ᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳᠤ ᠲᠠᠯᠠᠢ ᠬᠦᠪᠡᠭᠡᠨ ᠤ ᠵᠢᠷᠠᠭᠠᠬᠠᠢ ᠲᠡᠰᠢ ᠠᠮᠢ ᠲᠡᠮᠡᠴᠡᠨ ᠦᠬᠦᠯᠳᠦᠪᠡ᠃ ᠪᠠᠭ᠎ᠠ ᠯᠡ ᠲᠣᠳᠣᠭᠰᠢ ᠣᠷᠣᠭᠰᠠᠭᠠᠷ ᠲᠡᠪᠳᠡᠷᠢᠵᠦ ᠪᠠᠶᠢᠭᠰᠠᠨ ᠴᠦ ᠪᠣᠯᠵᠣ ᠦᠭᠭᠦ ᠦᠭᠡᠢ ᠵᠢᠪᠬᠦ ᠭᠡᠳ ᠯᠡ ᠠᠶᠣᠯᠭᠠᠨ᠎ᠠ᠃ ᠰᠠᠨᠳᠣᠷᠬᠤ ᠶᠢᠨ ᠡᠷᠬᠡᠨ ᠳᠤ ᠰᠠᠮᠪᠠᠭ᠎ᠠ ᠲᠦᠷᠦᠭᠳᠡᠭᠰᠡᠨ ᠲᠡᠳᠡ ᠬᠤᠶᠠᠷ ᠬᠦᠯ ᠢᠶᠠᠷ ᠢᠶᠠᠨ ᠰᠡᠯᠢᠭᠦᠷ ᠪᠣᠯᠭᠠᠭᠰᠠᠨ   ᠨᠢ ᠬᠠᠷᠢᠨ ᠠᠩᠬ᠎ᠠ ᠡᠬᠢᠨ ᠳᠡᠭᠡᠨ ᠪᠦᠳᠦᠵᠦ ᠦᠭᠭᠦ ᠦᠭᠡᠢ ᠲᠣᠩᠭᠤᠷᠣᠭᠠᠳ ᠲᠣᠩᠭᠤᠷᠣᠭᠠᠳ ᠣᠰᠣ ᠵᠠᠯᠭᠢᠵᠦ ᠪᠠᠶᠢᠭᠰᠠᠨ ᠴᠦ ᠡᠳᠦᠷ ᠣᠳᠠᠭᠠᠨ ᠳᠠᠭᠠᠨ ᠢᠳᠡᠭ ᠢᠳᠡᠭ ᠢᠶᠠᠷ ᠪᠡᠶ᠎ᠡ ᠪᠠᠨ ᠲᠣᠭᠳᠠᠭᠠᠵᠦ ᠲᠡᠶᠢᠯᠦᠭᠡᠳ ᠭᠦᠶᠦᠬᠡᠨ ᠰᠢᠭ ᠣᠰᠣᠨ ᠳᠤ ᠨᠢ ᠠᠯᠳᠠ ᠲᠠᠯᠢᠮ ᠴᠦ ᠭᠡᠰᠡᠨ ᠣᠮᠪᠠᠨ ᠲᠡᠭᠳᠡᠬᠦ ᠴᠢᠳᠠᠯ ᠲᠠᠢ ᠪᠣᠯᠵᠦ ᠢᠷᠡᠵᠡᠢ᠃ ᠲᠣᠣᠭᠤᠷ ᠲᠡᠷᠭᠡᠳᠡᠭᠦᠷ ᠨᠢ ᠦᠩᠭᠡᠷᠡᠬᠦ ᠵᠢᠷᠠᠭᠠᠬᠠᠢ ᠶᠢ ᠢᠳᠡᠬᠦ ᠭᠡᠵᠦ ᠬᠦᠢᠳᠡᠨ ᠰᠢᠷᠦᠭᠦᠨ ᠣᠰᠣ ᠣᠷᠣᠭᠤ ᠬᠦᠴᠦᠯᠡᠨ ᠬᠦᠴᠦᠯᠡᠨ ᠲᠣᠩᠰᠢᠨ ᠲᠣᠶ᠋ᠢᠭᠰᠠᠭᠠᠷ ᠪᠠᠶᠢᠵᠦ᠂ ᠬᠠᠶᠠ ᠬᠠᠶᠠ ᠲᠡᠭ ᠲᠣᠮᠳᠠᠭᠤᠷ ᠨᠢ ᠬᠠᠪᠴᠢᠭᠠᠳ ᠠᠪᠬᠤ ᠮᠡᠷᠭᠡᠵᠢᠯ ᠲᠠᠢ ᠪᠣᠯᠣᠭᠰᠠᠨ ᠢᠶᠠᠷ ᠭᠡᠳᠡᠰᠦ ᠲᠣᠮᠳᠠᠭᠤᠷ ᠴᠦ ᠭᠡᠰᠡᠨ ᠠᠮᠢ ᠭᠤᠣᠯ ᠢᠶᠠᠨ ᠠᠷᠭᠠᠴᠠᠨ ᠡᠳᠦᠷ ᠬᠤᠨᠤᠭ ᠨᠦᠭᠴᠢᠭᠡᠬᠦ ᠪᠣᠯᠪᠠ᠃         ᠬᠠᠷᠢᠨ ᠲᠡᠭᠡᠬᠦ ᠳᠤ ᠪᠠᠶᠢᠭᠠᠯᠢ ᠶᠢᠨ ᠵᠢᠮ᠎ᠡ ᠭᠡᠬᠦ ᠦᠦ᠂ ᠠᠯᠢ ᠡᠰᠡᠬᠦᠯ᠎ᠡ ᠨᠡᠶᠢᠭᠡᠮ ᠤᠨ ᠰᠢᠬᠠᠯᠳᠠ ᠭᠡᠬᠦ ᠦᠦ ᠪᠣᠣ ᠮᠡᠳᠡ᠂ ᠰᠣᠨᠢᠨ ᠭᠠᠶᠢᠬᠠᠯᠳᠠᠢ ᠬᠤᠪᠢᠷᠠᠯ ᠬᠤᠪᠢᠰᠣᠯᠳᠠ ᠲᠡᠳᠡᠨ ᠤ ᠪᠡᠶ᠎ᠡ ᠲᠡᠭᠡᠷ᠎ᠡ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠡᠭᠦᠰᠴᠦ ᠡᠬᠢᠯᠡᠯ᠎ᠡ᠃ ᠰᠢᠪᠠᠭᠤᠳ ᠤᠨ ᠰᠡᠯᠢᠬᠦᠷ ᠪᠣᠯᠭᠠᠨ ᠵᠠᠷᠣᠭᠰᠠᠨ ᠬᠦᠯ ᠤᠨ ᠰᠠᠯᠠᠭ᠎ᠠ ᠨᠢ ᠠᠭᠠᠵᠢᠮ  ᠢᠶᠠᠷ ᠨᠡᠶᠢᠯᠡᠯᠳᠦᠨ ᠲᠠᠪᠠᠭᠯᠠᠷᠠᠨ ᠯᠠᠷᠪᠠᠶᠢᠵᠦ ᠡᠬᠢᠯᠡᠭᠰᠡᠨ ᠢᠶᠠᠨ ᠣᠳᠠᠵᠦ ᠲᠦᠳᠡᠯ ᠦᠭᠡᠢ ᠬᠠᠪᠴᠢᠭᠤᠷ ᠪᠣᠯᠭᠠᠨ ᠬᠡᠷᠡᠭᠯᠡᠭᠰᠡᠨ ᠬᠤᠩᠰᠢᠶᠠᠷ ᠠᠮᠠ ᠨᠢ ᠴᠦ ᠠᠶᠠᠨᠳᠠᠭᠠᠨ ᠦᠷᠭᠡᠵᠢᠨ ᠵᠣᠵᠠᠭᠠᠷᠠᠵᠦ ᠡᠷᠳᠡᠶᠢᠭᠡᠳ ᠠᠯᠢ ᠬᠡᠳᠦᠶᠢᠨᠡᠢ ᠲᠠᠷᠭᠤᠯᠠᠵᠦ ᠮᠢᠬᠠᠯᠠᠭᠰᠠᠨ ᠪᠡᠶ᠎ᠡ ᠲᠠᠢ ᠨᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠵᠣᠬᠢᠴᠠᠭᠰᠠᠨ ᠨᠢ ᠭᠠᠶᠢᠬᠠᠮᠠᠷ᠃ ᠨᠡᠩ ᠴᠦ ᠬᠤᠩᠰᠢᠶᠠᠷ ᠠᠮᠠ ᠲᠠᠢ ᠪᠠᠨ ᠵᠣᠬᠢᠴᠠᠬᠤ ᠭᠡᠰᠡᠨ ᠤ ᠴᠦ ᠪᠣᠯᠪᠠᠦ ᠬᠤᠭᠤᠯᠠᠢ ᠠᠮᠠ ᠨᠢ ᠴᠦ ᠰᠦᠭᠡᠩᠬᠢᠳᠡᠨ ᠰᠣᠯᠣᠭᠠᠶᠢᠷᠠᠭᠠᠳ ︽ᠭᠠᠩᠭᠠᠷ ᠭᠤᠩᠭᠤᠷ︾ ᠬᠡᠮᠡᠭᠰᠡᠨ ᠢᠷᠠᠭᠤ ᠰᠣᠨᠣᠰᠬᠤᠯᠠᠩ ᠲᠠᠭᠤᠨ ᠨᠢ ᠴᠦ ︽ᠭᠤᠸᠠ ᠭᠤᠸᠠ︾ ᠭᠡᠬᠦ ᠰᠢᠦ ᠯᠡ ᠰᠣᠨᠢᠨ ᠠᠪᠢᠶ᠎ᠠ ᠪᠣᠯᠵᠦ ᠬᠦᠰᠢᠭᠡᠳ ᠠᠯᠴᠠᠭ ᠲᠠᠷᠪᠠᠭ ᠠᠯᠬᠤᠳᠠᠯ ᠭᠢᠰᠭᠢᠳᠡᠯ ᠲᠠᠢ ᠨᠢ ᠠᠶᠢᠵᠠᠮ ᠲᠠᠭᠠᠷᠠᠨ ᠵᠣᠬᠢᠴᠠᠭᠰᠠᠨ ᠢ ᠰᠢᠪᠠᠭᠤᠳ ᠦᠪᠡᠷᠳᠡᠭᠡᠨ ᠴᠦ ᠢᠳᠡᠭᠡᠵᠦ ᠶᠠᠳᠠᠨ᠎ᠠ᠃         ᠴᠣᠬᠤᠮ ᠹᠢᠽᠢᠣᠯᠣᠬᠢ ᠶᠢᠨ ᠬᠤᠪᠢᠷᠠᠯᠳᠠ ᠭᠡᠳᠡᠭ ᠶᠠᠭᠤᠮ᠎ᠠ ᠠᠶᠠᠨᠳᠠᠭᠠᠨ ᠡᠭᠦᠰᠪᠡᠦ ᠡᠰᠡᠬᠦᠯ᠎ᠡ ᠦᠨᠳᠦᠰᠦ ᠣᠭᠰᠠᠭᠠᠨ ᠤ  ᠣᠨᠳᠣᠣᠰᠢᠯ ᠭᠡᠭᠴᠢ ᠨᠢ ᠠᠯᠪᠠ ᠪᠠᠷ ᠲᠦᠷᠢᠵᠦ ᠢᠷᠡᠪᠡᠦ ᠭᠡᠳᠡᠭ ᠢ ᠰᠢᠪᠠᠭᠤᠳ ᠤᠨ ᠬᠡᠨ ᠠᠯᠢᠨ ᠴᠦ ᠪᠣᠳᠣᠯᠬᠢᠯᠠᠬᠤ ᠵᠣᠷᠢᠭ ᠬᠦᠷᠦᠭᠰᠡᠨ ᠦᠭᠡᠢ᠃ ᠨᠡᠩ ᠴᠦ ᠠᠯᠣᠰ ᠢᠷᠡᠭᠡᠳᠦᠢ᠂ ᠣᠳᠣᠮ ᠣᠭᠰᠠᠭ᠎ᠠ ᠬᠡᠮᠡᠬᠦ ᠠᠭᠤᠣ ᠪᠣᠳᠣᠯ ᠠᠪᠣᠷᠭᠤ ᠬᠦᠰᠡᠯ ᠭᠡᠭᠴᠢ ᠶᠢ ᠶᠠᠭᠤ ᠶᠢ ᠨᠢ ᠦᠭᠦᠯᠡᠬᠦᠪ᠃ ᠨᠠᠭᠠᠳᠣ ᠵᠠᠬ᠎ᠠ ᠶᠢᠨ ᠦᠨᠦ ᠮᠠᠷᠭᠠᠰᠢ  ᠶᠢᠨ ᠠᠮᠢᠳᠣᠷᠠᠯ ᠠᠬᠤᠢ ᠶᠠᠮᠠᠷ ᠪᠣᠯᠣᠨ᠎ᠠ ᠭᠡᠳᠡᠭ ᠢ ᠦᠪᠦᠩ ᠲᠣᠯᠣᠭᠠᠶᠢᠳᠣ᠂ ᠣᠳᠣᠢ ᠰᠡᠭᠦᠯᠳᠦ ᠲᠡᠳᠡ ᠪᠦᠬᠦᠨ ᠢᠶᠠᠷ  ᠢᠶᠠᠨ ᠪᠣᠳᠣᠵᠦ ᠰᠡᠳᠬᠢᠬᠦ ᠠᠴᠠ ᠪᠠᠨ ᠴᠦ ᠬᠠᠯᠢᠷᠠᠨ ᠰᠦᠷᠳᠡᠬᠦ ᠪᠣᠯᠣᠭᠰᠠᠨ  ᠬᠤᠶᠢᠨ᠎ᠠ ᠦᠪᠡᠷ ᠪᠡᠶ᠎ᠡ ᠶᠢᠨ ᠬᠢᠨ ᠦᠬᠦᠯ᠂ ᠦᠨᠳᠦᠰᠦ ᠣᠭᠰᠠᠭᠠᠨ ᠤ ᠬᠢᠨ ᠮᠦᠬᠦᠯ ᠬᠡᠮᠡᠭᠴᠢ ᠶᠢ ᠲᠦᠰᠦᠭᠡᠯᠡᠨ ᠪᠣᠳᠣᠬᠤ ᠵᠣᠷᠢᠭ ᠰᠦᠰᠦ ᠠᠯᠢ ᠬᠡᠳᠦᠶᠢᠨᠡᠢ ᠠᠷᠢᠯᠵᠦ ᠪᠦᠷᠢᠯᠦᠭᠰᠡᠨ ᠠᠵᠣᠭᠤ ᠁
  
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠵᠡᠬᠦᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠤᠯᠠᠭᠠᠠ ᠬᠤᠩ︾ ᠢᠰᠭᠦᠯᠭᠦ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠮᠣᠩᠭᠤᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢᠶᠠᠨ ᠦᠷ᠎ᠡ ᠬᠡᠥᠬᠡᠳ ᠲᠡᠭᠡᠨ ᠦᠪᠯᠡᠭᠦᠯᠦᠨ ᠰᠤᠷᠭᠠᠬᠤ ᠶᠢ ᠨᠡᠶᠢᠭᠡᠮ ᠁
ᠬᠠᠭᠤᠷᠮᠠᠭ ᠠᠷᠢᠭᠢᠨ ᠠᠴᠠ ᠪᠣᠯᠣᠭᠰᠠᠨ ᠬᠤᠣᠷ ᠬᠦᠨᠦᠬᠡᠯ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号