ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠴᠦᠰ ᠤᠨ ᠶᠠᠩᠬᠢᠷ — ᠳᠠᠭᠤᠳᠠᠭᠠᠴᠢ ᠠᠯᠲᠠᠨ᠋ᠧᠴᠢᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/13
            ᠡᠴᠦᠰ ᠤᠨ ᠶᠠᠩᠬᠢᠷ                                                                                                              ᠠᠯᠳᠠᠨ᠋ᠧᠴᠢᠷ         ᠭᠤᠤᠯ ᠦᠳᠡ ᠶᠢᠨ ᠭᠠᠯ ᠨᠠᠷᠠᠨ ᠠᠰ ᠲᠡᠭᠡᠷ᠎ᠡ ᠠᠴᠠ ᠲᠦᠬᠡᠨᠡᠭᠰᠡᠨ ᠠᠭᠠᠬᠢᠮ᠎ᠠ ᠵᠤᠨ ᠤ ᠪᠦᠭᠴᠢᠮ ᠬᠠᠯᠠᠭᠤᠨ᠂ ᠠᠮᠢᠳᠠᠨ ᠭᠤᠤᠯᠳᠠᠨ ᠪᠦᠬᠦᠨ ᠢ ᠠᠮᠢᠰᠬᠤᠭ᠎ᠠ ᠠᠪᠤᠭᠤᠯᠬᠤ ᠦᠬᠡᠢ ᠬᠡᠮᠡᠷᠬᠡᠨ ᠠᠷᠭ᠎ᠠ ᠠᠭᠠᠰᠢ ᠶᠢ ᠨᠢ ᠠᠯᠳᠠᠷᠠᠭᠤᠯᠤᠨ᠎ᠠ᠃         ᠬᠡᠳᠡᠰᠤ ᠪᠠᠨ ᠴᠢᠷᠦᠭᠰᠡᠨ ᠡᠮ᠎ᠡ ᠶᠠᠩᠬᠢᠷ ᠬᠠᠷᠭᠠᠨ᠎ᠠ ᠮᠤᠳᠤᠨ ᠤ ᠰᠡᠶᠢᠮᠡᠬᠡᠷ ᠰᠡᠬᠦᠳᠡᠷ ᠢ ᠡᠷᠢᠯᠬᠢᠯᠡᠨ ᠠᠮᠢ ᠲᠡᠮᠡᠴᠡᠨ᠎ᠡ᠃ ᠰᠠᠶᠢᠬᠠᠨ ᠬᠠᠨ ᠤ ᠪᠠᠨ ᠰᠠᠷᠢᠳᠠᠭ ᠤᠷᠬᠢᠯ ᠤᠨ ᠪᠡᠷᠬᠡ ᠪᠠᠷᠳᠠᠭ᠎ᠠ ᠬᠢᠬᠡᠳ ᠢᠨᠠᠭ ᠬᠠᠶᠢᠷ᠎ᠠ ᠠᠯᠢ ᠪᠠᠶᠢᠭᠰᠠᠨ ᠢᠶᠠᠨ ᠬᠠᠷᠠᠮ ᠦᠬᠡᠢ ᠡᠷᠬᠦᠳᠡᠭ ᠲᠡᠭᠡ ᠶᠠᠩᠬᠢᠷ ᠤᠨ ᠢᠶᠠᠨ ᠬᠠᠮᠠᠭᠠᠯᠠᠯ ᠢᠶᠠᠷ ᠲᠦᠡᠭᠬᠡᠵᠤ ᠠᠮᠢ ᠭᠤᠤᠯ ᠲᠠᠢ ᠯᠡ ᠦᠯᠡᠳᠡᠭᠰᠡᠨ ᠡᠨᠡ ᠭᠠᠭᠴᠠ ᠡᠮ᠎ᠡ ᠶᠠᠩᠬᠢᠷ᠂ ᠤᠳᠤ ᠲᠠᠪᠤ ᠠᠷᠪᠠᠨ ᠡᠳᠦᠷ ᠲᠠᠢ ᠪᠤᠯ ᠵᠢᠷᠭᠠᠯ ᠵᠤᠪᠠᠯᠠᠩ ᠬᠤᠤᠰᠯᠠᠭᠰᠠᠨ ᠡᠨᠡ ᠬᠦ᠋ ᠡᠷᠢᠶᠡᠨ ᠪᠠᠷᠠᠭᠠᠨ ᠶᠢᠷᠳᠢᠨᠴᠤ ᠳᠤ ᠵᠠᠶᠠᠭᠠᠬᠤ ᠪᠤᠯᠤᠭᠰᠠᠨ ᠡᠩᠬᠦᠷᠡᠢ ᠦᠷ᠎ᠡ ᠪᠠᠨ ᠬᠡᠵᠤ ᠵᠤᠪᠠᠵᠤ ᠵᠦᠳᠡᠨ ᠶᠠᠪᠤᠭ᠎ᠠ ᠠᠵᠠᠢ᠃         ᠲᠡᠷᠡ ᠰᠡᠬᠦᠳᠡᠷ ᠲᠠᠭᠠᠨ ᠡᠷᠬᠢᠴᠨᠨ᠎ᠡ᠃ ᠤᠳᠤ ᠢᠳᠡᠬᠡᠳ ᠠᠮᠳᠠ ᠦᠬᠡᠢ᠂ ᠬᠡᠪᠳᠡᠬᠡᠳ ᠨᠤᠶᠢᠷ ᠦᠬᠡᠢ ᠪᠤᠯᠵᠠᠢ᠃ ᠤᠰᠤ᠂ ᠲᠡᠶᠢᠮᠤ ᠡ︕ ᠤᠳᠤ ᠲᠤᠰᠤᠯ ᠤᠰᠤ ᠴᠤ ᠬᠡᠰᠡᠨ ᠤᠯᠤᠭᠠᠳ ᠤᠭᠤᠴᠢᠬᠤ ᠨᠢ ᠬᠦᠬᠡᠷᠦᠬᠦᠢ ᠡᠬᠡ ᠦᠷ᠎ᠡ ᠬᠤᠶᠠᠷ ᠤᠨ ᠠᠮᠢ ᠭᠤᠤᠯ ᠢ ᠠᠪᠤᠷᠠᠬᠤ ᠴᠤᠷ ᠤᠨ ᠭᠠᠭᠴᠠ ᠭᠤᠷᠢᠳᠠᠯ ᠪᠤᠯᠤᠭᠰᠠᠨ ᠨᠢ ᠦᠨᠡᠨᠳᠡᠢ᠃ ᠤᠰᠤᠨ ᠳᠤ ᠶᠠᠪᠤᠳᠠᠭ ᠵᠠᠮ ᠢᠶᠠᠨ ᠡᠮ᠎ᠡ ᠶᠠᠩᠬᠢᠷ ᠲᠤᠳᠤ ᠠᠴᠠ ᠲᠤᠳᠤ ᠴᠡᠬᠡᠵᠢᠯᠡᠵᠤ ᠪᠠᠶᠢᠨ᠎ᠠ᠃ ᠨᠢᠳᠤ ᠪᠠᠨ ᠠᠨᠢᠭᠠᠳ ᠶᠠᠪᠤᠭᠰᠠᠨ ᠴᠤ ᠠᠳᠡᠭᠡ ᠦᠬᠡᠢ ᠬᠦᠷᠬᠦ ᠯᠡ ᠭᠠᠵᠠᠷ᠃ ᠲᠡᠬᠡᠪᠡᠴᠤ ᠲᠡᠷᠡ ᠵᠠᠮ ᠢᠶᠠᠷ ᠲᠡᠷᠡ ᠭᠠᠵᠠᠷ ᠤᠭᠳᠤ ᠤᠴᠢᠵᠤ ᠪᠤᠯᠬᠤ ᠦᠬᠡᠢ ᠬᠡᠳᠡᠭ ᠢᠶᠠᠨ ᠲᠡᠷᠡ ᠨᠡᠩ ᠴᠤ ᠲᠤᠳᠤ ᠠᠴᠠ ᠲᠤᠳᠤ ᠮᠡᠳᠡᠨ᠎ᠡ᠃         ᠭᠤᠷᠪᠠᠨ ᠡᠳᠦᠷ ᠤᠨ ᠯᠡ ᠡᠮᠤᠨ᠎ᠡ᠂ ᠲᠡᠭᠡ ᠶᠠᠩᠬᠢᠷ ᠤᠨ ᠢᠶᠠᠨ ᠲᠠᠭᠠᠭᠤᠯᠤᠯ ᠬᠠᠮᠠᠭᠠᠯᠠᠯ ᠢᠶᠠᠷ ᠲᠡᠷᠡ ᠯᠡ ᠵᠠᠮ ᠢᠶᠠᠷ ᠦᠳᠡ ᠶᠢᠨ ᠤᠰᠤᠨ ᠳᠠᠭᠠᠨ ᠶᠠᠪᠤᠭᠰᠠᠨ ᠢᠶᠠᠨ ᠪᠠᠳᠤ ᠴᠡᠬᠡᠵᠢᠯᠡᠵᠤ ᠪᠠᠶᠢᠨ᠎ᠠ ᠰᠢᠣ ᠳ᠋ᠠ᠃         ᠁ ᠲᠡᠷᠡ ᠤᠰᠤ ᠤᠤᠭᠤᠬᠤ ᠠᠭᠱᠠᠨ ᠳᠤ ᠯᠡ ᠲᠤᠤᠷᠠᠳᠤ ᠤᠷᠤᠰᠬᠠᠯ ᠤᠨ ᠲᠠᠨᠳᠡᠴᠡ ︽ᠱᠤᠷ᠂ ᠱᠤᠷ᠂ ᠱᠤᠷ ᠁︾ ᠬᠡᠬᠦ ᠰᠤᠨᠢᠨ ᠴᠢᠮᠡᠭᠡ ᠠᠨᠢᠷ ᠲᠤᠭᠤᠯᠳᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠶᠡᠷᠦ ᠠᠴᠠ ᠦᠨᠦᠷᠳᠦᠭᠳᠡᠵᠤ ᠦᠵᠡᠭᠡ ᠦᠬᠡᠢ ᠨᠢᠯᠤᠭᠤᠨ ᠮᠠᠭᠤᠬᠠᠢ ᠦᠨᠦᠷ ᠬᠠᠮᠠᠷ ᠭᠠᠳᠠᠮ᠎ᠠ ᠰᠡᠩᠬᠢᠨᠡᠵᠡᠢ᠃ ᠪᠠᠶᠢᠳᠠᠯ ᠬᠡᠴᠡᠬᠦᠳᠡᠭᠰᠡᠨ ᠢ ᠬᠤᠷᠴᠠ ᠰᠡᠷᠡᠯ ᠢᠶᠠᠷ ᠢᠶᠠᠨ ᠪᠠᠷᠤᠭᠯᠠᠭᠰᠠᠨ ᠬᠤᠤᠰ ᠶᠠᠩᠬᠢᠷ ᠵᠡᠷᠬᠡᠳᠡ ᠪᠠᠨ ᠴᠤᠴᠢᠮᠠᠭ ᠡᠷᠬᠢᠵᠤ ᠪᠤᠷᠤ ᠮᠦᠷ ᠢᠶᠠᠷ ᠢᠶᠠᠨ ᠪᠤᠴᠠᠨ ᠬᠠᠷᠠᠶᠢᠪᠠ  ᠃         ︽ᠭᠤᠸᠠ ᠯᠠ᠂ ᠱᠠ ᠯᠠ ᠁︾ ᠶᠡᠷᠦ ᠰᠤᠨᠤᠰᠴᠤ ᠦᠡᠭᠬᠡᠷᠡᠭᠡ ᠦᠬᠡᠢ ᠰᠤᠨᠢᠬᠠᠨ ᠲᠠᠭᠤᠨ ᠢᠶᠠᠷ ᠤᠷᠢᠯᠠᠯᠳᠤᠭᠰᠠᠨ ᠬᠤᠶᠠᠷ ᠬᠦᠯ ᠲᠠᠢ ᠬᠠᠷ᠎ᠠ ᠲᠤᠯᠤᠭᠠᠶᠢᠳᠤ ᠭᠤᠵᠤᠭᠤᠷ ᠠᠮᠢᠳᠠᠳ ᠠᠷᠤ ᠠᠴᠠ ᠨᠢ ᠨᠡᠬᠡᠨ ᠢᠷᠡᠬᠦ ᠪᠦᠬᠡᠳ ︽ᠲᠦᠡᠭ ᠲᠠᠩ︾ ᠬᠡᠮᠡᠬᠦ ᠨᠦᠰᠡᠷ ᠲᠠᠭᠤᠨ ᠦᠷᠬᠦᠯᠵᠢᠯᠡᠬᠡᠳ ᠪᠠᠰᠠ ᠨᠢᠬᠡ ᠰᠤᠨᠢᠬᠠᠨ ᠦᠨᠦᠷ ᠲᠠᠢ ᠬᠦᠬᠡ ᠴᠡᠩᠬᠡᠷ ᠤᠳᠤᠭ᠎ᠠ ᠪᠠᠶᠢᠨ ᠲᠠᠬᠢᠨ ᠰᠤᠭᠤᠨᠠᠭᠯᠠᠨ᠎ᠠ᠃         ᠠᠭᠤᠯᠠᠨ ᠤ ᠪᠠᠷᠳᠠᠭ᠎ᠠ᠂ ᠮᠤᠳᠤᠨ ᠤ ᠢᠭ᠌ᠴᠢ ᠳᠤ ᠰᠤᠴᠢᠮᠠᠭ ᠬᠦᠶᠤᠳᠡᠯ ᠢᠶᠠᠷ ᠢᠶᠠᠨ ᠬᠤᠷᠤᠮ ᠵᠠᠭᠤᠷ᠎ᠠ ᠭᠤᠵᠤᠭᠤᠷ ᠤᠳ ᠠᠴᠠ ᠨᠡᠯᠢᠶᠡᠳ ᠵᠠᠶᠢᠳᠠᠨ ᠠᠮᠵᠢᠬᠰᠠᠨ ᠪᠤᠯᠪᠠᠴᠤ᠂ ᠦᠵᠡᠳᠡᠯ᠎ᠡ ᠡᠮ᠎ᠡ ᠶᠠᠩᠬᠢᠷ ᠤᠨ ᠬᠡᠳᠡᠰᠤ ᠭᠠᠵᠠᠷ ᠴᠢᠷᠦᠭᠳᠡᠮ᠎ᠡ ᠪᠤᠯᠵᠤ᠂ ᠲᠤᠷᠭᠠᠨ ᠬᠦᠶᠤᠳᠠᠯ ᠨᠢ ᠮᠡᠳᠡᠭᠳᠡᠮ᠎ᠡ ᠰᠤᠯᠠᠷᠠᠭᠠᠳ᠂ ᠠᠮᠢᠰᠬᠤᠭ᠎ᠠ ᠨᠢ ᠪᠦᠭᠯᠡᠷᠡᠨ ᠰᠦᠢᠯᠬᠢᠯᠡᠵᠤ ᠡᠬᠢᠯᠡᠯ᠎ᠡ᠃ ᠬᠠᠨᠢ ᠶᠢᠨ ᠢᠶᠠᠨ ᠵᠤᠪᠠᠯ ᠵᠦᠳᠡᠷᠡᠯ ᠢ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠮᠡᠳᠡᠷᠡᠭᠰᠡᠨ ᠲᠡᠭᠡ ᠶᠠᠩᠬᠢᠷ᠂ ᠵᠤᠬᠬᠢᠨ ᠬᠦᠯᠢᠬᠡᠯᠵᠡᠬᠦ᠂ ᠪᠠᠶᠡᠳᠡᠨ ᠨᠦᠷᠢᠬᠦ ᠬᠡᠬᠦᠴᠢᠯᠡᠨ ᠶᠠᠩᠵᠤ ᠶᠢᠨ ᠠᠷᠭ᠎ᠠ ᠠᠪᠤᠭᠰᠠᠨ ᠪᠤᠯᠪᠠᠴᠤ ᠶᠠᠮᠠᠷ ᠴᠤ ᠲᠤᠰᠠ ᠪᠤᠯᠤᠭ᠎ᠠ ᠦᠬᠡᠢ᠃ ᠡᠮ᠎ᠡ ᠶᠠᠩᠬᠢᠷ ᠤᠨ ᠬᠦᠯᠦᠰᠤ ᠤᠰᠤ ᠴᠢᠪ ᠴᠢᠪ ᠲᠤᠰᠤᠯᠠᠵᠤ᠂ ᠠᠶᠤᠨ ᠰᠤᠴᠢᠭᠰᠠᠨ ᠨᠢᠳᠤ ᠨᠢ ᠬᠦᠬᠡᠷᠦᠬᠦᠶᠢᠯᠡᠯᠳᠡᠢ ᠪᠦᠯᠳᠡᠬᠡᠨᠡᠨ᠎ᠡ᠃ ᠭᠤᠵᠣᠭᠤᠷ ᠬᠠᠷ᠎ᠠ ᠨᠤᠭᠤᠳ ᠢᠳᠡᠭ ᠢᠳᠡᠭ ᠢᠶᠠᠷ ᠤᠶᠢᠷᠠᠳᠤᠨ ᠢᠷᠡᠯ᠎ᠡ᠃ ︽ᠭᠤᠸᠠ ᠯᠠ᠂ ᠱᠠ ᠯᠠ ᠁︾ ᠤᠷᠢᠯᠠᠯᠳᠤᠬᠤ ᠲᠠᠭᠤᠨ ᠵᠤᠭᠰᠤᠭ᠎ᠠ ᠦᠬᠡᠢ᠃ ︽ᠲᠦᠡᠭ ᠲᠠᠩ᠂ ᠲᠦᠡᠭ ᠲᠠᠩ ᠁︾ ᠨᠦᠰᠡᠷ ᠲᠠᠭᠤᠨ ᠦᠷᠬᠦᠯᠵᠢᠯᠡᠨ᠎ᠡ᠃        ᠡᠨᠡ ᠯᠡ ᠬᠤᠷᠳᠤᠴᠠ ᠪᠠᠷ ᠠᠮᠢ ᠭᠠᠷᠤᠨ᠎ᠠ ᠬᠡᠵᠤ᠂ ᠲᠡᠷᠡ ᠬᠤᠯᠠ ᠲᠡᠭᠷᠢ ᠤᠶᠢᠷ᠎ᠠ ᠪᠣᠯᠣᠭᠰᠠᠨ ᠬᠡᠳᠡᠭ ᠢ ᠲᠡᠭᠡ ᠶᠠᠩᠬᠢᠷ ᠡᠷᠡᠬᠦᠯ ᠤᠬᠠᠭᠠᠨ ᠳᠠᠭᠠᠨ ᠪᠤᠳᠤᠵᠤ ᠠᠮᠵᠢᠵᠠᠢ᠃ ᠲᠡᠷᠡ ᠦᠬᠦᠨ ᠬᠠᠭ᠋ᠤᠨ ᠠᠮᠢ ᠵᠢᠭᠤᠳᠠᠭ᠎ᠠ ᠨᠠᠰᠤᠨ  ᠤ ᠬᠠᠨᠢ ᠶᠢᠨ ᠢᠶᠠᠨ ᠬᠦᠬᠡᠷᠦᠬᠦᠢ ᠲᠦᠷᠢ ᠶᠢ ᠬᠠᠷᠠᠵᠤ᠂ ᠶᠢᠷᠳᠢᠨᠴᠤ ᠶᠠᠮᠠᠷ ᠢ ᠮᠡᠳᠡᠬᠦ ᠵᠠᠪ ᠦᠬᠡᠢ ᠦᠬᠦᠯ ᠮᠦᠬᠦᠯ  ᠳᠤ ᠲᠤᠯᠭᠠᠷᠠᠭᠰᠠᠨ ᠡᠩᠬᠦᠷᠡᠢ ᠦᠷ᠎ᠡ ᠪᠠᠨ ᠪᠤᠳᠤᠭᠠᠳ ᠡᠷ᠎ᠡ ᠪᠤᠯᠬᠤ ᠶᠢᠨ ᠬᠠᠷᠢᠭᠤᠴᠠᠯᠭ᠎ᠠ᠂ ᠡᠴᠢᠬᠡ ᠰᠠᠭᠤᠬᠤ ᠶᠢᠨ ᠡᠬᠦᠷᠬᠡ ᠪᠠᠨ ᠡᠷᠬᠡᠪᠰᠢ ᠬᠦᠢᠴᠡᠳᠬᠡᠬᠦ ᠴᠠᠭ ᠤᠳᠤ ᠪᠤᠯᠤᠭᠰᠠᠨ ᠬᠡᠳᠡᠭ ᠢᠶᠠᠨ ᠬᠡᠨ ᠢᠶᠠᠷ ᠴᠤ ᠬᠡᠯᠡᠬᠦᠯᠬᠦ ᠦᠬᠡᠢ ᠤᠬᠠᠭᠠᠷᠠᠵᠠᠢ᠃         ᠲᠡᠳᠡ ᠠᠭᠤᠯᠠᠨ ᠪᠠᠯ ᠤᠨ ᠬᠠᠮᠤᠭ ᠢᠭ᠌ᠴᠢ ᠰᠠᠬᠤᠯᠢᠭ ᠬᠠᠷᠠᠭᠠᠨ᠎ᠠ ᠤᠯᠠᠭᠠᠪᠤᠷ ᠲᠠᠢ ᠭᠠᠵᠠᠷ ᠬᠦᠷᠴᠤ ᠢᠷᠡᠯ᠎ᠡ᠃ ᠤᠳᠤ ᠡᠬᠦᠨ ᠳᠤ ᠯᠡ ᠠᠷᠭ᠎ᠠ ᠬᠢᠬᠦ ᠴᠢᠬᠤᠯᠠ ᠲᠠᠢ ᠬᠡᠮᠡᠨ ᠰᠢᠢᠳᠦᠭᠰᠡᠨ ᠲᠡᠭᠡ ᠶᠠᠩᠬᠢᠷ ᠴᠢᠭᠯᠡᠯ ᠢᠶᠠᠨ ᠦᠬᠡᠷᠡᠴᠢᠯᠡᠵᠤ᠂ ᠵᠡᠬᠦᠨ ᠵᠦᠭ ᠰᠢᠷᠭᠤᠯᠠᠨ ᠤᠷᠤᠭᠠᠳ ᠠᠷᠪᠠᠭᠠᠳ ᠮᠧᠲᠷ ᠶᠠᠪᠤᠭᠰᠠᠨ ᠢᠶᠠᠨ ᠵᠦᠳᠡᠬᠦᠤ ᠯᠡ ᠲᠠᠭᠠᠵᠤ ᠰᠦᠢᠯᠬᠢᠯᠡᠵᠤ ᠢᠷᠡᠭᠰᠡᠨ ᠡᠮ᠎ᠡ ᠶᠠᠩᠬᠢᠷ ᠢ ᠬᠦᠡᠭᠬᠡᠬᠡᠨ ᠶᠤᠪᠤᠷᠤᠮᠠᠭᠴᠠ᠂ ᠲᠡᠷᠡ ᠨᠢ ᠪᠡᠶ᠎ᠡ ᠳᠡᠭᠡᠨ ᠡᠵᠡᠨ ᠪᠤᠯᠵᠤ ᠲᠡᠶᠢᠯᠦᠯ ᠦᠬᠡᠢ ᠤᠯᠠᠭᠠᠪᠤᠷ ᠤᠨ ᠤᠭ ᠲᠤ ᠰᠢᠷᠭᠤᠴᠢᠨ ᠤᠨᠠᠪᠠ᠃ ᠲᠡᠭᠡ ᠶᠠᠩᠬᠢᠷ᠂ ᠡᠩᠬᠦᠷᠡᠢ ᠬᠠᠨᠢ ᠪᠠᠨ ᠬᠠᠶᠢᠷᠠᠯᠠᠵᠤ ᠰᠠᠨᠠᠭᠰᠠᠨ᠂ ᠰᠠᠯᠵᠤ ᠶᠠᠳᠠᠭᠰᠠᠨ ᠵᠦᠷᠢᠴᠡᠯᠳᠦ ᠰᠡᠳᠬᠢᠯᠭᠡ ᠪᠠᠷ ᠬᠡᠰᠡᠭ ᠵᠠᠭᠤᠷ᠎ᠠ ᠦᠨᠦᠷᠯᠡᠭᠡᠳ ᠬᠦᠯ  ᠢᠶᠠᠨ ᠨᠢᠬᠡ ᠨᠢᠬᠡ ᠪᠠᠷ ᠵᠦᠬᠡᠬᠡᠨ ᠠᠭᠠᠵᠢᠮ ᠤᠬᠤᠷᠢᠭᠰᠠᠨ ᠢᠶᠠᠨ ᠬᠡᠨᠡᠳᠳᠡ ᠤᠭᠵᠤᠮ ᠡᠷᠬᠢᠵᠤ᠂ ᠮᠤᠳᠤ ᠰᠢᠭᠤᠢ  ᠶᠢᠨ ᠲᠤᠮᠳᠠᠭᠤᠷ ᠰᠢᠷᠭᠤᠴᠢᠨ ᠵᠦᠭ ᠪᠤᠷᠤᠭᠤᠯᠠᠨ ᠲᠡᠬᠦᠯᠢᠭᠰᠡᠭᠡᠷ ᠤᠳᠠᠵᠤ ᠲᠦᠳᠡᠯ ᠦᠬᠡᠢ ᠠᠯᠠᠭ᠎ᠠ ᠪᠤᠯᠵᠠᠢ᠃ ᠡᠮ᠎ᠡ ᠶᠠᠩᠬᠢᠷ ᠬᠠᠶᠢᠷᠠᠳᠤ ᠢᠵᠢᠯᠢ ᠶᠢᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠶᠠᠪᠤᠬᠤ ᠬᠡᠮᠡᠨ ᠦᠨᠳᠡᠯᠵᠡᠭᠰᠡᠨ ᠪᠤᠯᠪᠠᠴᠤ᠂ ᠮᠠᠭᠤᠳᠠᠵᠤ ᠵᠦᠳᠡᠭᠰᠡᠨ ᠬᠦᠨᠳᠤ ᠪᠠᠶ᠎ᠡ ᠪᠠᠨ ᠡᠷᠬᠦᠵᠤ ᠲᠡᠶᠢᠯᠦᠯ ᠦᠬᠡᠢ ᠤᠭ ᠤᠷᠤᠨ ᠳᠠᠭᠠᠨ ᠨᠤᠭᠳᠤᠰᠬᠢᠵᠡᠢ᠃ ᠲᠡᠬᠦᠨ ᠤ ᠨᠤᠮᠤᠬᠠᠨ ᠪᠤᠷᠤ ᠨᠢᠳᠤᠨ ᠠᠴᠠ ᠪᠦᠳᠦᠬᠦᠨ ᠪᠦᠳᠦᠬᠦᠨ ᠨᠢᠯᠪᠤᠰᠤᠨ ᠲᠤᠰᠤᠯ ᠰᠤᠪᠤᠳ ᠤᠨ ᠬᠡᠯᠬᠢᠶ᠎ᠡ ᠰᠢᠣᠬᠠᠨ ᠪᠦᠮᠪᠦᠷᠢᠯ᠎ᠡ᠃         ᠲᠡᠬᠡᠳᠡᠯ᠎ᠡ ᠮᠠᠭᠤᠬᠠᠢ ᠨᠢᠯᠤᠭᠤᠨ ᠦᠨᠦᠷ ᠨᠡᠩ ᠠᠶᠢᠬᠤᠪᠳᠤᠷ ᠪᠤᠯᠵᠤ᠂ ︽ᠭᠤᠸᠠ ᠯᠠ᠂ ᠱᠠ ᠯᠠ ᠁︾ ᠬᠡᠵᠤ ᠤᠷᠢᠯᠠᠯᠳᠤᠬᠤ ᠲᠠᠭᠤᠨ ᠵᠠᠬ᠎ᠠ ᠳᠤᠨᠢ ᠲᠤᠯᠵᠤ ᠢᠷᠡᠮᠡᠷ ᠪᠤᠯᠤᠯ᠎ᠠ᠃ ᠡᠮ᠎ᠡ ᠶᠠᠩᠬᠢᠷ ᠨᠢᠳᠤ ᠪᠠᠨ ᠠᠨᠢᠨ ᠠᠮᠢᠰᠬᠤᠯ ᠢᠶᠠᠨ ᠲᠠᠷᠤᠭᠠᠳ᠂ ᠪᠦᠳᠦᠬᠦᠨ ᠬᠡᠳᠡᠰᠤ ᠪᠠᠨ ᠨᠢᠭᠤᠨ ᠲᠠᠯᠳᠠᠯᠠᠬᠤ ᠬᠡᠰᠡᠨ ᠰᠢᠭ ᠤᠯᠠᠭᠠᠪᠤᠷ ᠤᠨ ᠤᠭ ᠤᠷᠤᠭᠤ ᠠᠳᠤᠷᠢᠨ ᠰᠢᠷᠬᠢᠪᠡ᠃         ᠲᠡᠷᠡ ᠲᠤᠳᠤᠷ᠎ᠠ ᠪᠠᠨ ︽ᠡᠴᠢᠬᠡ ᠲᠡᠭᠷᠢ ᠮᠢᠨᠢ᠂ ᠡᠬᠡ ᠲᠡᠯᠡᠬᠡᠢ ᠮᠢᠨᠢ︕  ᠨᠤᠳᠤᠭ ᠢᠶᠠᠨ ᠰᠠᠬᠢᠵᠤ ᠨᠤᠭᠤᠯᠤᠭᠤᠷ ᠢᠶᠠᠨ ᠢᠳᠡᠬᠡᠳ᠂ ᠠᠮᠢ ᠭᠤᠤᠯ ᠢᠶᠠᠨ ᠯᠡ ᠡᠪᠯᠡᠬᠦᠯᠵᠤ ᠪᠠᠶᠢᠭ᠎ᠠ ᠦᠴᠦᠬᠡᠨ ᠦᠷ᠎ᠡ ᠪᠠᠨ ᠦᠷᠦᠬᠡᠯ  ᠤᠨ ᠡᠷᠬᠡᠨ ᠳᠤ ᠤᠷᠤᠭᠤᠯᠵᠤ᠂ ᠦᠬᠦᠯ ᠤᠨ ᠵᠤᠪᠠᠯᠠᠩ ᠠᠮᠰᠠᠭᠤᠯᠤᠨ᠎ᠠ ᠬᠡᠵᠤ ᠤᠤ ᠳ᠋ᠠ︖ ᠬᠠᠯᠠᠭᠤᠨ ᠡᠩᠬᠡᠷ ᠪᠦᠯᠢᠶᠡᠨ ᠰᠢᠷᠦᠢ ᠳᠤ ᠴᠢᠨᠢ ᠤᠨᠠᠵᠤ ᠢᠷᠡᠬᠦ ᠵᠠᠪ ᠪᠤᠯᠤᠭ᠎ᠠ ᠦᠬᠡᠢ ᠦᠷ᠎ᠡ ᠪᠠᠨ ᠬᠠᠷᠬᠢᠰ ᠲᠡᠭᠡᠷᠡᠮ ᠤᠨ ᠬᠠᠷ᠎ᠠ ᠰᠠᠪᠠᠷ ᠲᠤ ᠦᠷᠳᠦᠬᠦᠯᠦᠨ᠂ ᠬᠠᠨᠣᠵᠣ ᠴᠠᠳᠣᠰᠢ ᠦᠬᠡᠢ ᠬᠤᠪᠳᠤᠭ ᠰᠢᠨᠣᠯ ᠢ ᠨᠢ ᠲᠠᠶᠢᠯᠠᠬᠤ ᠬᠡᠵᠤ ᠤᠤ ᠳ᠋ᠠ ᠁ ᠬᠠᠨ ᠬᠠᠶᠢᠷᠬᠠᠨ ᠮᠢᠨᠢ ᠡ︕ ᠬᠠᠪᠴᠢᠯ ᠵᠢᠯᠠᠭ᠎ᠠ ᠮᠢᠨᠢ︾ ᠬᠡᠵᠤ ᠡᠮ᠎ᠡ ᠶᠠᠩᠬᠢᠷ ᠡᠮᠬᠡᠨᠢᠨ ᠵᠠᠯᠪᠠᠷᠢᠨ᠎ᠠ᠃         ︽ᠭᠤᠸᠠ ᠯᠡ᠂ ᠱᠠ ᠯᠠ ᠁ ᠭᠤᠸᠠ ᠯᠠ᠂ ᠱᠠ ᠯᠠ ᠁︾ ᠭᠤᠵᠤᠭᠤᠷ ᠬᠠᠷ᠎ᠠ ᠨᠤᠭᠤᠳ ᠦᠮᠡᠬᠡᠢ ᠨᠢᠯᠤᠭᠤᠨ ᠦᠨᠦᠷ ᠢᠶᠠᠨ ᠰᠡᠩᠬᠢᠨᠡᠬᠦᠯᠦᠭᠰᠡᠬᠡᠷ ᠡᠮ᠎ᠡ ᠶᠠᠩᠬᠢᠷ ᠠᠴᠠ ᠬᠡᠳᠦᠬᠡᠨ ᠠᠯᠬᠤᠮ ᠤᠨ ᠲᠡᠷᠳᠡᠭᠡ ᠤᠷᠢᠯᠠᠵᠤ ᠴᠢᠷᠠᠯᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠶᠠᠭᠤ ᠪᠤᠯᠤᠭᠰᠠᠨ ᠢ ᠪᠤᠤ ᠮᠡᠳᠡ ᠬᠡᠨᠡᠳᠳᠡ ᠡᠰᠡᠷᠬᠦ ᠴᠢᠭᠯᠡᠯ ᠢ ᠪᠠᠷᠢᠨ ᠬᠤᠷᠳᠤᠯᠠᠨ ᠬᠤᠯᠠᠳᠤᠯ᠎ᠠ᠃         ᠡᠴᠢᠬᠡ ᠲᠡᠭᠷᠢ ᠡᠬᠡ ᠲᠡᠯᠡᠬᠡᠢ ᠮᠢᠨᠢ ᠡᠨᠡᠷᠢᠯ ᠬᠠᠶᠢᠷᠠᠯᠠᠵᠠᠢ᠃ ᠡᠨᠡᠯᠵᠤ ᠰᠢᠨᠠᠯᠤᠭᠰᠠᠨ ᠦᠷ᠎ᠡ ᠪᠠᠨ ᠦᠬᠦᠯ  ᠤᠨ ᠲᠠᠮᠤ ᠠᠴᠠ ᠠᠪᠤᠷᠠᠵᠠᠢ᠃ ᠦᠷ᠎ᠡ ᠪᠠᠨ ᠬᠡᠰᠡᠨ ᠡᠮ᠎ᠡ ᠶᠠᠩᠬᠢᠷ ᠶᠠᠭᠤ ᠪᠤᠯᠤᠭᠰᠠᠨ ᠴᠦ ᠵᠢᠭᠠᠬᠠᠨ ᠰᠠᠨᠠᠭ᠎ᠠ ᠠᠮᠠᠷᠠᠵᠤ ᠠᠪᠤᠯ᠎ᠠ᠃         ︽ᠲᠦᠡᠭ ᠲᠠᠩ᠂ ᠲᠦᠡᠭ ᠲᠠᠩ ᠁︾ ᠦᠨᠦ ᠨᠦᠰᠡᠷ ᠲᠠᠭᠤᠨ ᠡᠰᠡᠷᠬᠦ ᠲᠠᠯ᠎ᠠ ᠶᠢᠨ ᠬᠠᠳᠠᠨ ᠤ ᠲᠠᠨᠳᠡ ᠠᠴᠠ ᠲᠠᠬᠢᠨᠳᠠ ᠰᠤᠨᠤᠰᠳᠠᠪᠠ᠃         ︽ᠬᠠᠶᠢᠷᠠᠳᠤ ᠬᠠᠨᠢ — ᠲᠡᠭᠡ ᠶᠠᠩᠬᠢᠷ︾ ᠬᠡᠮᠡᠬᠦ ᠪᠤᠳᠤᠯ ᠰᠠᠶ᠋ᠢᠬᠠᠨ ᠠᠮᠤᠷᠵᠢᠵᠤ ᠠᠪᠤᠭᠰᠠᠨ ᠡᠮ᠎ᠡ ᠶᠠᠩᠬᠢᠷ ᠤᠨ ᠪᠤᠳᠤᠯ ᠳᠤ ᠬᠠᠷᠪᠤᠨ ᠤᠷᠤᠬᠤ ᠪᠠᠷ ᠲᠠᠬᠢᠭᠠᠳ ᠬᠠᠭᠠᠴᠠᠯ ᠵᠤᠪᠠᠯ ᠤᠨ ᠮᠠᠨᠠᠨ ᠪᠦᠬᠦ ᠰᠠᠨᠠᠭ᠎ᠠ ᠰᠡᠳᠬᠢᠯ  ᠢ ᠨᠢ ᠪᠦᠷᠬᠦᠨ ᠢᠷᠡᠯ᠎ᠡ᠃ ᠲᠡᠷᠡ ᠬᠠᠳᠠᠭᠤᠵᠢᠨ ᠪᠤᠰᠤᠭᠠᠳ ᠠᠭᠤᠯᠠ ᠦᠬᠡᠳᠡ  ᠦᠭᠰᠤᠨ ᠬᠦᠴᠢᠷᠳᠡᠶᠢᠬᠡᠨ ᠱᠤᠭᠰᠢᠵᠤ᠂ ︽ᠲᠡᠷᠡ ᠮᠢᠨᠢ ᠶᠠᠭᠠᠬᠢᠭ᠎ᠠ ᠪᠤᠯ︖ ᠬᠠᠷ᠎ᠠ ᠠᠶᠤᠯ ᠠᠴᠠ ᠬᠡᠯᠳᠦᠷᠢᠭᠰᠡᠨ ᠪᠤᠯ ᠤᠤ︖︾ ᠬᠡᠮᠡᠨ ᠰᠠᠨᠠᠨ ᠰᠠᠨᠠᠨ ᠬᠤᠷᠳᠤᠯᠠᠨ᠎ᠠ᠃ ᠲᠡᠷᠡ ᠢᠭ᠌ᠴᠢ ᠤᠢ ᠮᠤᠳᠤᠨ ᠠᠴᠠ ᠰᠢᠷᠭᠤᠯᠠᠨ ᠭᠠᠷᠤᠮᠠᠭᠴᠠ᠂ ᠡᠰᠡᠷᠬᠦ ᠲᠠᠯ᠎ᠠ ᠶᠢᠨ ᠠᠭᠤᠯᠠ ᠦᠬᠡᠳᠡ ᠬᠦᠰᠡᠯ ᠭᠤᠷᠢᠳᠠᠯ ᠤᠨ ᠬᠠᠷᠠᠴᠠ ᠬᠦᠶᠦᠯᠬᠡᠯ᠎ᠡ᠃         ᠦᠨᠡᠨ ᠢ ᠬᠡᠯᠡᠬᠦ ᠳᠤ ᠲᠡᠭᠡ ᠶᠠᠩᠬᠢᠷ ᠢᠭ᠌ᠴᠢ ᠬᠠᠷᠭᠠᠨ᠎ᠠ᠂ ᠰᠠᠬᠤᠯᠢᠭ ᠤᠯᠠᠭᠠᠪᠤᠷ ᠢᠶᠠᠷ ᠲᠠᠮᠵᠢᠨ ᠠᠰ ᠲᠡᠭᠡᠭᠰᠢ ᠤᠷᠬᠢᠯ ᠦᠬᠡᠳᠡ ᠶᠠᠪᠤᠪᠠᠯ ᠲᠠᠮᠡᠢ ᠬᠡᠳᠤᠨ ᠵᠠᠭᠤᠨ ᠠᠯᠬᠤᠮ ᠬᠦᠶᠦᠬᠦ ᠦᠬᠡᠢ ᠠᠭᠤᠯᠠ ᠶᠢ ᠲᠠᠪᠠᠨ ᠴᠢᠨᠠᠬᠰᠢ ᠭᠠᠷᠴᠤ ᠡᠰᠡᠨ ᠮᠡᠨᠳᠤ ᠠᠮᠢ ᠭᠠᠷᠴᠤ ᠪᠤᠯᠬᠤ ᠶᠢ ᠴᠠᠭᠠᠨ᠎ᠠ ᠨᠢ ᠭᠠᠷᠳᠠᠯ᠎ᠠ ᠮᠡᠳᠡᠵᠤ ᠪᠠᠶᠢᠯ᠎ᠠ᠃ ᠬᠡᠳᠡᠯ᠎ᠡ ᠲᠡᠬᠦᠨ ᠳᠤ ᠭᠠᠭᠴᠠ ᠬᠠᠷ᠎ᠠ ᠠᠮᠢ ᠪᠠᠨ ᠯᠡ ᠪᠤᠷᠤᠯᠠᠭᠤᠯᠬᠤ ᠤᠨᠴᠠ ᠡᠷᠬᠡ ᠬᠡᠵᠤ ᠶᠠᠭᠠᠬᠢᠭᠰᠠᠨ ᠴᠤ ᠪᠠᠶᠢᠵᠤ ᠴᠢᠳᠠᠭᠰᠠᠨ ᠦᠬᠡᠢ᠃ ᠬᠠᠷᠢᠨ ᠡᠮ᠎ᠡ ᠦᠷ᠎ᠡ ᠪᠠᠨ ᠬᠠᠮᠠᠭᠠᠯᠠᠬᠤ᠂ ᠡᠷᠦᠬᠡ ᠬᠡᠷ ᠲᠡᠭᠡᠨ ᠬᠠᠷᠢᠭᠤᠴᠠᠬᠤ ᠦᠨᠡᠨᠴᠢ ᠬᠠᠶᠢᠷ᠎ᠠ᠂ ᠠᠮᠢᠳᠠᠨ ᠭᠤᠤᠯᠳᠠᠨ ᠳᠤ ᠪᠤᠷᠬᠠᠨ ᠠᠴᠠ ᠵᠠᠶᠠᠭᠠᠭᠰᠠᠨ ᠠᠪᠢᠶᠠᠰ ᠯᠡ ᠲᠡᠬᠦᠨ ᠢ ᠤᠢ ᠮᠤᠳᠤ ᠰᠡᠶᠢᠷᠡᠭ ᠢᠯᠡ ᠭᠠᠵᠠᠷ ᠢ ᠰᠤᠩᠭᠤᠨ ᠪᠠᠷᠠᠭᠤᠨ ᠠᠭᠤᠯᠠ ᠶᠢᠨ ᠨᠠᠭᠠᠳᠤ ᠬᠠᠯᠴᠠᠭᠠᠢ ᠬᠠᠵᠠᠭᠤ ᠦᠬᠡᠳᠡ ᠬᠠᠷᠠᠶᠢᠯᠭᠠᠵᠤ᠂ ᠭᠤᠵᠤᠭᠤᠷ ᠤᠳ ᠤᠨ ᠬᠠᠷᠠᠯᠳᠠ ᠶᠢ ᠪᠡᠶ᠎ᠡ ᠵᠦᠭ ᠢᠶᠠᠨ ᠰᠢᠯᠵᠢᠬᠦᠯᠦᠨ ᠠᠪᠤᠭᠰᠠᠨ ᠪᠠᠶᠢᠵᠠᠢ᠃         ︽ᠠ  ︕ ᠲᠠ᠊ — ᠷᠠ ᠪᠠᠶᠢᠨ᠎ᠠ᠃ ᠬᠠᠨᠢ ᠮᠢᠨᠢ︕︾         ︽ᠢᠱᠢ︕ ᠴᠢ ᠮᠢᠨᠢ ᠶᠠᠭᠤ ᠬᠡᠳ ᠲᠠᠯᠳᠠᠭ᠎ᠠ ᠦᠬᠡᠢ ᠢᠯᠡ ᠭᠠᠵᠠᠷ ᠦᠬᠡᠳᠡ ᠬᠦᠷᠦᠳᠡᠭ ᠶᠤᠮ ᠳ᠋ᠠ︖ ᠲᠡᠷᠡ ᠭᠤᠵᠤᠭᠤᠷ ᠤᠳ ᠁ ᠠᠢ︕ ᠲᠡᠶᠢᠮᠤ ᠪᠢᠰᠢ ᠡ  ᠁ ᠡᠬᠡ ᠦᠷ᠎ᠡ ᠪᠢᠳᠡᠨ ᠢ ᠯᠡ ᠬᠡᠳ ᠁︾ ᠬᠡᠬᠦᠴᠢᠯᠡᠨ ᠡᠯᠳᠡᠪ ᠡᠰᠡᠨ ᠢᠶᠠᠷ ᠢᠭᠳᠦᠯᠡᠨ ᠪᠤᠳᠤᠭᠰᠠᠨ ᠡᠮ᠎ᠡ ᠶᠠᠩᠬᠢᠷ ᠤᠨ ᠲᠤᠷᠮᠤᠭᠤᠷ ᠨᠢᠳᠤᠨ ᠠᠴᠠ ᠲᠠᠬᠢᠭᠠᠳ ᠰᠤᠪᠤᠳ ᠤᠨ ᠬᠡᠯᠬᠢᠶ᠎ᠡ ᠰᠤᠪᠤᠷᠠᠨ ᠪᠠᠭᠤᠵᠠᠢ᠃         ᠲᠡᠭᠡ ᠶᠠᠩᠬᠢᠷ ᠤᠳᠤ ᠲᠠᠪᠢᠭᠠᠳ ᠯᠡ ᠠᠯᠬᠤᠮ ᠢ ᠲᠡᠰᠪᠦᠷᠢᠯᠡᠬᠡᠳ ᠲᠠᠪᠬᠢᠭᠠᠳ ᠯᠡ ᠪᠠᠶᠢᠪᠠᠯ ᠪᠠᠷᠠᠭᠤᠨ ᠠᠭᠤᠯᠠ ᠶᠢ ᠲᠠᠪᠠᠭᠠᠳ ᠴᠠᠭᠠᠰᠢ ᠭᠠᠷᠤᠭᠰᠠᠭᠠᠷ ᠠᠮᠢᠳᠤ ᠦᠯᠡᠳᠡᠬᠦ ᠨᠢ ᠲᠠᠮᠵᠢᠭ ᠦᠬᠡᠢ᠃ ᠬᠡᠳᠡᠯ᠎ᠡ ᠲᠡᠭᠡ ᠶᠠᠩᠬᠢᠷ  ᠤᠨ ᠬᠤᠷᠳᠤᠴᠠ ᠶᠡᠷᠦ ᠶᠢᠨ ᠴᠠᠭ ᠠᠴᠠ ᠲᠠᠩᠴᠤ ᠤᠳᠠᠭᠠᠨ ᠪᠤᠯᠤᠭᠰᠠᠨ ᠬᠡᠳᠡᠭ ᠢ ᠡᠮ᠎ᠡ ᠶᠠᠩᠬᠢᠷ ᠠᠨᠳᠠᠯ ᠦᠬᠡᠢ ᠠᠵᠢᠵᠤ ᠮᠡᠳᠡᠭᠰᠡᠨ ᠪᠤᠯᠪᠠᠴᠤ ᠠᠯᠢ ᠬᠡᠳᠦᠶᠢᠨ ᠤ ᠦᠬᠡᠢ ᠬᠡᠷᠦᠵᠤ ᠢᠷᠡᠭᠰᠡᠨ ᠭᠤᠵᠤᠭᠤᠷ ᠤᠳ ᠤᠨ ᠨᠦᠰᠡᠷ ᠲᠠᠭᠤ  ᠲᠠᠢ ᠶᠠᠭᠤᠮᠠᠨ ᠳᠤ ᠬᠡᠳᠡᠰᠤ ᠪᠠᠨ ᠰᠦᠪᠡᠯᠡᠬᠦᠯᠦᠨ ᠬᠦᠨᠳᠤ ᠰᠢᠷᠠᠭᠳᠤᠭᠰᠠᠨ ᠬᠡᠳᠡᠭ ᠢ ᠲᠡᠷᠡ ᠬᠡᠷᠬᠢᠨ ᠮᠡᠳᠡᠬᠦ ᠠᠵᠠᠢ︕         ᠲᠡᠭᠡ ᠶᠠᠩᠬᠢᠷ᠂ ᠠᠭᠤᠯᠠ ᠲᠠᠪᠠᠨ ᠠᠮᠢ ᠭᠠᠷᠤᠨ᠎ᠠ ᠬᠡᠭᠴᠢ ᠴᠢᠳᠠᠰᠢ ᠦᠬᠡᠢ ᠬᠡᠷᠡᠭ ᠬᠡᠳᠡᠭ ᠢᠶᠠᠨ ᠲᠤᠳᠤᠷᠬᠠᠢ ᠮᠡᠳᠡᠵᠤ ᠪᠠᠶᠢᠪᠠᠴᠤ ᠲᠡᠩᠬᠡᠬᠡ ᠲᠠᠮᠢᠷ ᠢᠶᠠᠨ ᠰᠢᠪᠬᠠᠨ ᠰᠢᠪᠬᠠᠨ᠂ ᠬᠠᠶᠢᠷ᠎ᠠ᠂ ᠠᠮᠢᠳᠤᠷᠠᠯ᠂ ᠬᠠᠨᠢ᠂ ᠦᠷ᠎ᠡ ᠶᠢᠨ ᠢᠶᠠᠨ ᠲᠦᠯᠦᠬᠡ ᠨᠢᠬᠡ ᠮᠢᠨᠦ᠋ᠲ ᠨᠢᠬᠡ ᠰᠧᠺᠦ᠋ᠨ᠋ᠳ᠋ ᠴᠤ ᠵᠤᠭᠰᠤᠵᠤ ᠪᠤᠯᠬᠤ ᠦᠬᠡᠢ ᠬᠡᠳᠡᠭ ᠢᠶᠠᠨ ᠨᠡᠩ ᠲᠤᠳᠤᠷᠬᠠᠢ ᠮᠡᠳᠡᠵᠤ ᠪᠠᠶᠢᠯ᠎ᠠ᠃         ︽ᠪᠤᠰᠢᠭᠤ᠂ ᠪᠤᠰᠢᠭᠤ  ᠃ ᠪᠤᠰᠢᠭᠤᠯᠠ ᠡ︕︾ ᠡᠮ᠎ᠡ ᠶᠠᠩᠬᠢᠷ ᠤᠨ ᠵᠢᠷᠦᠬᠡ ︽ᠫᠤᠯ ᠫᠤᠯ︾ ᠲᠦᠭᠰᠢᠵᠤ᠂ ᠢᠵᠢᠯᠢ ᠶᠢᠨ ᠢᠶᠠᠨ ᠦᠬᠦᠯ ᠤᠨ ᠬᠠᠷ᠎ᠠ ᠠᠶᠤᠯ ᠠᠴᠠ ᠮᠤᠯᠳᠤᠷᠠᠨ ᠭᠠᠷᠬᠤ ᠶᠢ ᠬᠦᠰᠡᠨ ᠬᠦᠰᠡᠨ ᠲᠠᠭᠠᠳᠬᠠᠨ᠎ᠠ᠃         ︽ᠲᠦᠡᠭ᠂ ᠲᠠᠩ︾᠃ ᠨᠦᠰᠡᠷ ᠲᠠᠭᠤᠨ ᠲᠠᠬᠢᠭᠠᠳ ᠭᠠᠷᠤᠯ᠎ᠠ᠃ ᠨᠦᠰᠡᠷ ᠲᠠᠭᠤᠨ ᠭᠠᠷᠤᠭᠰᠠᠨ ᠵᠦᠭ  ᠠᠴᠠ ᠬᠦᠬᠡ ᠤᠳᠤᠭ᠎ᠠ ᠰᠣᠭᠤᠨᠠᠭ ᠲᠠᠳᠠᠨ ᠠᠭᠠᠷ ᠲᠤ ᠰᠢᠩᠬᠡᠨ ᠵᠠᠮᠬᠠᠷᠠᠵᠤ ᠪᠠᠶᠢᠯ᠎ᠠ᠃ ᠲᠡᠭᠡ ᠶᠠᠩᠬᠢᠷ ᠭᠤᠳᠤᠴᠢᠨ ᠤᠨᠠᠪᠠ᠃ ᠵᠦᠪᠳᠡᠢ ᠬᠠ ᠨᠢ ᠰᠦᠪᠡᠯᠡᠭᠳᠡᠬᠡᠳ ᠬᠠᠯᠠᠭᠤᠨ ᠴᠢᠰᠤ ᠨᠢ ᠰᠠᠳᠠᠭᠠᠨᠠᠨ ᠤᠷᠤᠰᠴᠠᠢ᠃ ᠲᠡᠷᠡ ᠡᠪᠡᠳᠬᠦ  ᠪᠠᠨ ᠲᠡᠰᠪᠦᠷᠢᠯᠡᠨ᠂ ᠬᠦᠴᠦᠯᠡᠨ ᠪᠠᠶᠢᠵᠤ ᠰᠢᠨ᠎ᠡ ᠰᠢᠷᠬ᠎ᠠ ᠪᠠᠨ ᠪᠤᠰᠢᠭᠤᠬᠠᠨ ᠲᠤᠯᠢᠶᠠᠭᠰᠠᠨ ᠪᠤᠯᠪᠠᠴᠤ ᠴᠢᠰᠤ ᠪᠠᠨ ᠲᠤᠭᠳᠠᠪᠦᠷᠢᠵᠢᠭᠤᠯᠵᠤ ᠲᠡᠶᠢᠯᠦᠬᠡ ᠦᠬᠡᠢ᠃ ᠭᠤᠵᠤᠭᠤᠷ ᠤᠳ ᠬᠤᠮᠢᠨ ᠢᠷᠡᠵᠤ᠂ ᠵᠠᠷᠢᠮ ᠨᠢ ᠲᠡᠬᠦᠨ ᠠᠴᠠ ᠭᠤᠴᠢᠭᠠᠳ ᠯᠡ ᠠᠯᠬᠤᠮ ᠤᠨ ᠵᠠᠶᠢᠳᠠᠢ ᠤᠶᠢᠷᠠᠳᠤᠨ ᠢᠷᠡᠭᠰᠡᠨ ᠪᠠᠶᠢᠯ᠎ᠠ᠃         ᠲᠡᠭᠡ ᠶᠠᠩᠬᠢᠷ ᠬᠠᠮᠤᠭ ᠬᠦᠴᠦ ᠪᠠᠨ ᠰᠢᠪᠬᠠᠨ ᠪᠠᠶᠢᠵᠤ ᠲᠡᠯᠳᠡᠷᠬᠢᠯᠡᠨ ᠪᠤᠰᠪᠠ᠃ ᠭᠤᠷᠪᠠᠨ ᠬᠦᠯ ᠢᠶᠠᠷ  ᠢᠶᠠᠨ ᠲᠤᠭᠤᠯᠳᠠᠨ ᠠᠰᠬ᠎ᠠ ᠬᠠᠳᠠᠨ ᠤ ᠡᠪ ᠵᠠᠢ ᠶᠢ ᠦᠵᠡᠨ ᠲᠡᠮᠡᠤᠯᠬᠦ ᠪᠠᠷ ᠢᠶᠠᠨ ᠲᠡᠮᠡᠣᠯᠵᠤ ᠯᠡ ᠪᠠᠶᠢᠪᠠ᠃ ᠶᠠᠳᠠᠵᠤ ᠴᠦᠬᠦᠭᠰᠡᠨ ᠦᠨᠦ ᠭᠤᠵᠤᠭᠤᠷ ᠤᠳ ᠠᠭᠤᠷᠯᠠᠭᠰᠠᠨ ᠪᠤᠯᠤᠯᠳᠠᠢ ︽ᠭᠤᠸᠠ ᠯᠠ ᠭᠤᠸᠠ ᠯᠡ︾ ᠬᠡᠮᠡᠨ ᠶᠡᠬᠡᠳᠡ ᠤᠷᠢᠯᠠᠯᠳᠤᠭᠰᠠᠭᠠᠷ ᠭᠠᠵᠠᠷ ᠨᠠᠭᠠᠯᠳᠤᠨ ᠬᠡᠪᠳᠡᠵᠡᠬᠡᠵᠤ᠂ ᠦᠨᠦ ᠴᠡᠩᠬᠡᠷ ᠬᠦᠬᠡ ᠤᠳᠤᠭ᠎ᠠ ᠲᠠᠢ ᠨᠠᠷᠢᠨ ᠲᠦᠡᠭᠽᠢ  ᠪᠠᠨ ︽ᠲᠦᠡᠭ ᠲᠠᠩ ᠁︾ ᠦᠬᠡᠢ ᠦᠷᠬᠦᠯᠵᠢᠯᠡᠨ ᠲᠤᠤᠭᠠᠷᠭᠠᠯ᠎ᠠ᠃         ᠲᠡᠭᠡ ᠶᠠᠩᠬᠢᠷ ᠲᠠᠬᠢᠨᠳᠠ ᠪᠦᠳᠦᠴᠢᠨ ᠤᠨᠠᠪᠠ᠃ ᠲᠡᠷᠡ ᠰᠢᠷᠬᠠᠨ ᠬᠠᠯᠠᠭᠤᠨ ᠳᠠᠭᠠᠨ ᠲᠤᠤᠷ᠎ᠠ ᠨᠢ ᠪᠤᠰᠬᠤ ᠶᠢ ᠭᠤᠷᠢᠯᠠᠭᠰᠠᠨ ᠪᠤᠯᠪᠠᠴᠤ᠂ ᠲᠦᠷᠪᠡᠨ ᠬᠦᠯ ᠤᠨ ᠬᠢᠨᠢ ᠠᠯᠢ ᠨᠢᠬᠡᠨ ᠴᠤ ᠲᠡᠬᠦᠨ ᠳᠤ ᠵᠠᠷᠤᠭᠳᠠᠬᠤ ᠪᠠᠨ ᠪᠤᠯᠢᠵᠠᠢ᠃ ᠲᠡᠷᠡ ᠲᠤᠯᠤᠭᠠᠢ ᠪᠠᠨ ᠠᠭᠠᠵᠢᠮᠬᠠᠨ ᠡᠷᠭᠦᠬᠦ ᠳᠤ ᠬᠤᠶᠠᠷ ᠬᠦᠯ ᠲᠠᠢ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠤᠨ ᠦᠰᠦ ᠦᠭᠡᠢ ᠣᠯᠠᠭᠠᠨ ᠨᠢᠭᠤᠷ ᠪᠦᠷᠳᠦᠯᠵᠡᠨ ᠬᠠᠷᠠᠭᠳᠠᠨ᠎ᠠ᠃ ᠵᠢᠪᠡᠬᠦᠤ ᠨᠢ ᠬᠦᠷᠦᠭᠰᠡᠨ ᠲᠡᠭᠡ ᠶᠠᠩᠬᠢᠷ ᠲᠤᠯᠤᠭᠠᠢ  ᠪᠠᠨ ᠲᠠᠭᠠᠭᠠᠵᠤ ᠲᠡᠶᠢᠯᠬᠦ ᠦᠬᠡᠢ ᠭᠠᠵᠠᠷ ᠲᠠᠷᠡᠯᠡᠪᠡ᠃ ᠲᠡᠷᠡ ᠨᠢᠳᠤ ᠪᠠᠨ ᠠᠭᠠᠵᠢᠮᠬᠠᠨ ᠠᠨᠢᠯ᠎ᠠ᠃ ᠤᠳᠤ ᠦᠬᠦᠯ ᠬᠡᠳᠡᠭ ᠶᠠᠭᠤᠮ᠎ᠠ ᠲᠡᠬᠦᠨ ᠢ ᠰᠦᠷᠳᠡᠬᠦᠯᠵᠤ ᠲᠡᠶᠢᠯᠬᠦ ᠪᠠᠨ ᠪᠤᠯᠢᠵᠠᠢ᠃         ᠲᠡᠬᠡᠬᠦ ᠳᠤ ᠶᠢᠷᠳᠢᠨᠴᠤ ᠳᠤ ᠢᠷᠡᠵᠤ ᠵᠠᠪᠳᠤᠭ᠎ᠠ ᠦᠬᠡᠢ ᠬᠦᠬᠡᠷᠦᠬᠦᠢ ᠦᠷ᠎ᠡ ᠨᠢ ᠪᠤᠳᠤᠭᠳᠠᠯ᠎ᠠ᠃ ᠦᠷ᠎ᠡ  ᠶᠢ ᠨᠢ ᠬᠡᠵᠤ ᠡᠬᠦᠷᠳᠦᠵᠤ ᠶᠠᠪᠤᠭ᠎ᠠ ᠨᠠᠰᠤᠨ ᠤ ᠬᠠᠨᠢ ᠨᠢ ᠦᠬᠡᠶᠢᠯᠡᠭᠳᠡᠯ᠎ᠡ᠃ ᠲᠡᠷᠡ ᠨᠢᠳᠤ ᠪᠠᠨ ᠬᠦᠴᠦᠯᠡᠨ ᠨᠡᠬᠡᠬᠡᠪᠡ᠃ ᠬᠠᠮᠤᠭ ᠡᠴᠦᠰ ᠤᠨ ᠬᠦᠴᠦᠨ ᠴᠢᠳᠠᠯ ᠢᠶᠠᠨ ᠰᠢᠪᠬᠠᠨ ᠪᠠᠶᠢᠵᠤ᠂ ᠲᠤᠯᠤᠭᠠᠢ ᠢᠶᠠᠨ ᠲᠠᠬᠢᠨᠳᠠ ᠡᠷᠬᠦᠯ᠎ᠡ᠃ ᠪᠦᠬᠦ ᠪᠡᠶ᠎ᠡ ᠨᠢ ᠰᠠᠯᠭᠠᠨᠠᠨ ᠴᠡᠴᠡᠷᠬᠢᠯᠡᠵᠤ᠂ ᠬᠦᠯᠦᠰᠤᠨ ᠳᠤ ᠲᠡᠪᠳᠦᠭᠰᠡᠨ ᠨᠠᠷᠢᠬᠠᠨ ᠬᠦᠵᠦᠬᠦᠤ ᠨᠢ ᠲᠤᠯᠤᠭᠠᠢ ᠶᠢ  ᠨᠢ ᠲᠠᠭᠠᠭᠠᠵᠤ ᠶᠠᠳᠠᠮ᠎ᠠ ᠨᠠᠶᠢᠭᠤᠵᠤ ᠪᠠᠶᠢᠪᠠ  ᠃ ᠡᠰᠡᠷᠬᠦ ᠲᠠᠯ᠎ᠠ ᠶᠢᠨ ᠠᠭᠤᠯᠠ ᠶᠢᠨ ᠪᠠᠷᠳᠠᠭᠠᠳᠤ ᠤᠷᠬᠢᠯ ᠪᠦᠷᠳᠦᠯᠵᠡᠨ ᠪᠠᠶᠢᠭᠰᠠᠨ ᠢᠶᠠᠨ ᠲᠤᠳᠤ ᠬᠠᠷᠠᠭᠳᠠᠯ᠎ᠠ᠃ ᠲᠡᠷᠡ ︽ᠠ︕ ᠠᠮᠠᠷᠠᠭ ᠬᠠᠨᠢ ᠮᠢᠨᠢ ᠲᠡᠨᠳᠡ ᠯᠡ ᠠᠮᠤᠷ ᠲᠦᠪᠰᠢᠨ ᠪᠠᠶᠢᠵᠤ᠂ ᠬᠦᠬᠡᠷᠦᠬᠦᠢ ᠦᠷ᠎ᠡ ᠶᠢ ᠮᠢᠨᠢ ᠁︾ ᠬᠡᠵᠤ ᠪᠤᠳᠤᠵᠤ ᠠᠮᠵᠢᠳᠠᠯ᠎ᠠ ᠶᠠᠮᠠᠷ ᠨᠢᠬᠡᠨ ᠬᠦᠨᠳᠤ ᠨᠦᠰᠡᠷ ᠶᠠᠭᠤᠮ᠎ᠠ ᠲᠤᠯᠤᠭᠠᠢ ᠤᠷᠤᠭᠤ ᠨᠢ ︽ᠲᠦᠱ︾ ᠬᠢᠳᠡᠯ᠎ᠡ ᠵᠠᠯᠠᠷᠠᠨ ᠪᠠᠭᠤᠵᠠᠢ ᠁         ᠤᠰᠤᠨ ᠳᠤ ᠶᠠᠪᠤᠬᠤ ᠵᠠᠮ ᠢᠶᠠᠨ ᠪᠤᠷᠤᠭᠤᠯᠠᠵᠤ᠂ ᠤᠤᠯ ᠵᠠᠮ ᠠᠴᠠ ᠲᠠᠪᠢᠭᠠᠳ ᠠᠯᠬᠤᠮ ᠤᠨ ᠲᠡᠭᠡᠬᠦᠷ ᠪᠤᠯᠠᠭ ᠤᠨ ᠡᠬᠢᠨ ᠳᠤ ᠤᠴᠢᠬᠤ ᠪᠠᠷ ᠡᠮ᠎ᠡ ᠶᠠᠩᠬᠢᠷ ᠪᠤᠳᠤᠯᠭ᠎ᠠ ᠲᠤᠭᠳᠠᠪᠠ᠃ ᠵᠠᠮ ᠮᠦᠷ ᠦᠬᠡᠢ ᠲᠡᠭᠡᠷ᠎ᠡ ᠪᠠᠨ ᠠᠶᠤᠮᠰᠢᠭᠳᠠᠢ ᠬᠡᠳᠡᠭ ᠢ ᠲᠤᠳᠤᠷᠬᠠᠢ ᠮᠡᠳᠡᠪᠡᠴᠤ᠂ ᠲᠡᠬᠦᠨ ᠠᠴᠠ ᠦᠬᠡᠷ᠎ᠠ ᠲᠤᠬᠢᠳᠠᠢ ᠠᠷᠭ᠎ᠠ ᠲᠡᠬᠦᠨ ᠳᠤ ᠤᠯᠳᠠᠭᠰᠠᠨ ᠦᠬᠡᠢ᠃ ᠲᠡᠷᠡ ᠬᠦᠨᠳᠤ ᠬᠡᠳᠡᠰᠤ ᠪᠠᠨ ᠴᠢᠷᠴᠤ᠂ ᠬᠦᠯᠦᠰᠤ ᠤᠰᠤ ᠪᠠᠨ ᠭᠤᠭᠤᠵᠢᠭᠤᠯᠤᠭᠰᠠᠭᠠᠷ ᠮᠦᠴᠡ ᠬᠢᠷᠢᠳᠡᠢ ᠵᠠᠮᠨᠠᠭᠠᠳ ᠲᠦᠡᠭᠬᠡᠵᠤ ᠤᠰᠤᠨ ᠤ ᠪᠠᠷ᠎ᠠ ᠦᠵᠡᠯ᠎ᠡ᠃         ᠤᠰᠤ᠂ ᠵᠦᠪᠬᠡᠨ ᠤᠰᠤ ᠲᠡᠳᠦᠢ ᠯᠡ ᠪᠢᠰᠢ ᠪᠠᠶᠢᠵᠠᠢ᠃ ᠬᠠᠷᠢᠨ ᠪᠠᠯ ᠪᠤᠷᠠᠮ᠂ ᠠᠮᠢᠳᠤ ᠶᠢᠨ ᠷᠠᠰᠢᠶᠠᠨ ᠬᠡᠪᠡᠯ ᠨᠢᠬᠡ ᠯᠡ ᠦᠬᠡ ᠡ︕ ᠬᠤᠷᠤᠮᠬᠠᠨ ᠵᠠᠭᠤᠷ᠎ᠠ ᠬᠤᠪᠳᠤᠭᠯᠠᠨ ᠤᠤᠭᠤᠭᠰᠠᠨ ᠳᠠᠭᠠᠨ ᠪᠡᠶ᠎ᠡ ᠪᠠᠨ ᠵᠢᠮᠡᠯᠡᠵᠤ ᠠᠪᠤᠭᠰᠠᠨ ᠡᠮ᠎ᠡ ᠶᠠᠩᠬᠢᠷ ᠬᠤᠤᠷᠳᠠᠨ ᠲᠠᠶᠢᠰᠤᠨ — ᠭᠤᠵᠣᠭᠤᠷ ᠴᠢᠳᠬᠦᠷ ᠤᠳ ᠪᠠᠰᠠ ᠬᠦᠷᠦᠬᠡᠳ ᠢᠷᠡᠬᠦ ᠴᠤ ᠪᠢᠯᠡ ᠤᠤ ᠬᠡᠰᠡᠨ ᠰᠢᠭ ᠤᠷᠴᠢᠨ ᠲᠤᠭᠤᠷᠢᠨ ᠢᠶᠠᠨ ᠰᠡᠷᠡᠮᠵᠢᠳᠡᠶᠢᠬᠡᠨ ᠠᠵᠢᠪᠠ᠃        ᠲᠡᠷᠡ ᠬᠠᠨᠳᠠᠯ᠎ᠠ ᠤᠤᠭᠤᠵᠤ ᠠᠪᠤᠭᠠᠳ ᠵᠢᠭᠠᠬᠠᠨ ᠠᠮᠢᠰᠬᠤᠭ᠎ᠠ ᠠᠪᠴᠢᠬᠠᠭᠠᠳ ᠪᠤᠴᠠᠬᠤ ᠪᠠᠷ ᠲᠦᠯᠦᠪᠯᠡᠵᠡᠢ᠃ ᠲᠡᠬᠦᠨ ᠤ ᠨᠢᠳᠤ ᠪᠠᠨ ᠠᠨᠢᠵᠤ  ︽ᠦᠷ᠎ᠡ ᠮᠢᠨᠢ᠂ ᠤᠳᠤ ᠴᠤ ᠪᠢᠳᠡ ᠬᠠᠳᠠᠵᠤ ᠦᠬᠦᠬᠦ ᠬᠠᠳᠠᠭᠤ ᠠᠶᠤᠯ ᠠᠴᠠ ᠮᠤᠯᠳᠤᠷᠠᠯ᠎ᠠ ᠰᠢᠤ ᠁︾ ᠬᠡᠵᠤ ᠰᠡᠳᠬᠢᠯ ᠲᠠᠯᠪᠢᠭᠤᠷᠠᠨ ᠪᠤᠳᠤᠵᠤ ᠠᠮᠵᠢᠬᠤ ᠶᠢᠨ ᠬᠢᠨᠢ ᠵᠠᠪᠰᠠᠷ ᠦᠨᠦ ᠰᠤᠨᠢᠬᠠᠨ ᠴᠢᠮᠡᠭᠡ᠂ ᠡᠳᠡᠬᠡᠳ ᠦᠨᠦᠷ ᠤᠤᠯ ᠤᠨ ᠤᠰᠤᠨ ᠤ ᠭᠠᠵᠠᠷ ᠤᠷᠴᠢᠮ ᠠᠴᠠ ᠲᠠᠬᠢᠨᠳᠠ ᠰᠤᠨᠤᠷ ᠢ  ᠨᠢ ᠲᠤᠷᠬᠢᠭᠤᠯᠤᠨ ᠰᠠᠷᠠᠯ ᠢ ᠨᠢ ᠬᠦᠨᠳᠡᠵᠤ ᠢᠷᠡᠯ᠎ᠡ᠃ ︽ᠠᠶᠤᠯ᠂ ᠬᠠᠷ᠎ᠠ ᠠᠶᠤᠯ︾ ᠬᠦᠮᠦᠷᠢᠨ ᠢᠷᠡᠭᠰᠡᠨ ᠬᠡᠳᠡᠭ  ᠢ ᠢᠵᠢᠯᠢ ᠪᠠᠨ ᠠᠯᠳᠠᠭᠰᠠᠨ ᠬᠠᠷᠠᠰᠠᠯᠳᠤ ᠤᠴᠠᠷᠠᠯ ᠨᠢ ᠲᠡᠬᠦᠨ ᠳᠤ ᠲᠤᠳᠤᠷᠬᠠᠢ ᠬᠡᠯᠡᠵᠤ ᠦᠭᠴᠤ ᠪᠠᠶᠢᠯ᠎ᠠ᠃ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠲᠤ ᠪᠠᠰᠠ ᠯᠡ ᠰᠡᠷᠡᠭᠳᠡᠵᠡᠢ᠃ ᠡᠮ᠎ᠡ ᠶᠠᠩᠬᠢᠷ ᠤᠬᠤᠰᠬᠢᠨ ᠡᠷᠬᠢᠯ᠎ᠡ᠃ ᠤᠤᠯ ᠤᠨ ᠤᠰᠤᠨ ᠤ ᠭᠠᠵᠠᠷ ᠠᠳᠡ ᠠᠴᠠ ᠲᠠᠪᠢᠭᠠᠳ ᠯᠡ ᠠᠯᠬᠤᠮ ᠵᠠᠶᠢᠳᠠᠢ ᠪᠠᠶᠢᠳᠠᠭ ᠪᠤᠯᠬᠤᠷ ᠠᠭᠠᠵᠢᠭᠤᠯᠠᠵᠤ ᠡᠰᠡ ᠪᠤᠯᠤᠨ᠎ᠠ᠃ ᠲᠡᠷᠡ ᠬᠠᠷᠭᠠᠨ᠎ᠠ ᠤᠯᠠᠭᠠᠪᠦᠷ ᠤᠨ ᠢᠭ᠌ᠴᠢ ᠰᠠᠬᠤᠯᠢᠭ ᠢ ᠨᠢ ᠠᠰᠢᠭᠯᠠᠨ ᠬᠠᠵᠠᠭᠤ ᠲᠡᠰᠢᠭᠤᠯᠤᠨ ᠲᠡᠭᠡᠭᠰᠢ ᠲᠡᠮᠡᠤᠯᠪᠡ᠃         ︽ᠭᠤᠸᠠ ᠯᠡ ᠱᠠ ᠯᠠ᠂ ᠭᠤᠸᠠ ᠯᠠ ᠱᠠ ᠯᠠ ᠁︾᠃ ᠶᠠᠩᠬᠢᠷ ᠤᠨ ᠵᠢᠭᠤᠳᠠᠨ ᠲᠤᠳᠠᠭᠠᠭᠰᠠᠨ  ᠢ ᠤᠯᠵᠤ ᠬᠠᠷᠠᠭᠰᠠᠨ ᠭᠤᠵᠤᠭᠤᠷ ᠤᠳ ᠨᠢᠭᠤᠨ ᠲᠠᠯᠳᠠᠯᠠᠬᠤ ᠪᠠᠨ ᠪᠣᠯᠢᠭᠠᠳ ᠤᠷᠢᠯᠠᠨ ᠪᠠᠷᠬᠢᠯᠳᠤᠭᠰᠠᠭᠠᠷ ᠰᠢᠭᠤᠳ ᠨᠢᠬᠡᠨ ᠢᠷᠡᠵᠤ ᠪᠠᠶᠢᠭ᠎ᠠ ᠨᠢ ᠲᠤᠳᠤᠷᠬᠠᠢ᠃ ᠤᠳᠤ ᠠᠮᠠᠷᠠᠭ ᠬᠠᠨᠢ — ᠲᠡᠭᠡ ᠶᠠᠩᠬᠢᠷ ᠤᠨ ᠬᠢᠨᠢ ᠬᠠᠮᠠᠭᠠᠯᠠᠯ ᠪᠦᠪᠠᠶᠢᠯᠠᠯ ᠲᠡᠬᠦᠨ ᠳᠤ ᠪᠠᠶᠢᠬᠤ ᠦᠬᠡᠢ ᠪᠤᠯᠤᠭᠰᠠᠨ᠃ ᠡᠩᠬᠦᠷᠡᠢ ᠦᠷ᠎ᠡ ᠪᠠᠨ ᠡᠰᠡᠨ ᠮᠠᠨᠳᠤ ᠲᠦᠷᠦᠵᠤ ᠦᠰᠬᠡᠬᠦ ᠲᠠᠷᠬᠠᠨ ᠡᠬᠦᠷᠬᠡ ᠲᠤᠷᠤᠢ ᠪᠠᠭᠤᠷᠠᠢ ᠭᠠᠭᠴᠠ ᠪᠡᠶ᠎ᠡ ᠳᠤᠨᠢ ᠲᠤᠯᠭᠠᠷᠠᠭᠰᠠᠨ ᠢ ᠡᠮ᠎ᠡ ᠶᠠᠩᠬᠢᠷ ᠲᠤᠳᠤ ᠠᠴᠠ ᠲᠤᠳᠤ ᠮᠡᠳᠡᠨ᠎ᠡ᠃ ᠲᠡᠬᠡᠬᠦ ᠪᠠᠷ ᠲᠡᠬᠦᠨ ᠤ ᠬᠦᠶᠤᠳᠡᠯ ᠠᠯᠢ ᠴᠤ ᠤᠳᠠᠭ᠎ᠠ ᠲᠠᠢ ᠨᠢ ᠠᠳᠠᠯᠢᠳᠬᠠᠰᠢ ᠦᠬᠡᠢ ᠬᠤᠷᠳᠤᠨ ᠪᠠᠶᠢᠭᠰᠠᠨ ᠪᠦᠬᠡᠳ ᠲᠡᠭᠡᠷ᠎ᠡ ᠤᠳᠠᠭ᠎ᠠ — ᠲᠡᠭᠡ ᠶᠠᠩᠬᠢᠷ ᠤᠨ ᠠᠳᠡᠭᠰᠡᠨ ᠲᠡᠷᠡ ᠤᠳᠠᠭ᠎ᠠ ᠠᠴᠠ ᠴᠤ ᠲᠦᠷᠬᠡᠨ ᠪᠤᠯᠤᠭᠰᠠᠨ ᠨᠢ ᠭᠠᠶᠢᠬᠠᠯᠳᠠᠢ ᠪᠠᠶᠢᠪᠠ᠃         ︽ᠲᠦᠡᠭ ᠲᠠᠩ᠂ ᠲᠦᠡᠭ ᠲᠠᠩ ᠁︾ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠤᠨ ᠬᠦᠬᠡ ᠤᠳᠤᠭ᠎ᠠ ᠲᠠᠢ ᠬᠦᠨᠳᠡᠯᠡᠨ ᠲᠦᠡᠭᠽᠢ ᠡᠷᠦᠢ ᠬᠤᠷᠤᠢ ᠦᠬᠡᠢ ᠲᠤᠤᠭᠠᠷᠤᠨ᠂ ᠲᠡᠬᠦᠨ ᠠᠴᠠ ᠨᠢ ᠰᠤᠭᠤᠷᠠᠨ ᠭᠠᠷᠤᠭᠰᠠᠨ ᠬᠦᠴᠦᠳᠤ ᠶᠠᠭᠤᠮ᠎ᠠ ᠬᠠᠵᠠᠭᠤ ᠬᠠᠪᠢᠷᠭ᠎ᠠ ᠪᠠᠷ ᠨᠢ ︽ᠰᠢᠣ ᠰᠢᠤ ᠁︾ ᠢᠰᠬᠡᠷᠤᠨ ᠦᠡᠭᠬᠡᠷᠡᠬᠦ ᠪᠦᠬᠡᠳ ᠬᠠᠳᠠ ᠪᠤᠳᠠᠨ ᠲᠡᠭᠡᠷ᠎ᠡ ᠭᠠᠯ ᠭᠠᠷᠳᠠᠯ᠎ᠠ ︽ᠨᠢᠱ ᠲᠢᠱ︾ ᠪᠤᠳᠠᠷᠠᠨ ᠲᠤᠰᠤᠨ᠎ᠠ᠃ ︽ᠡᠨᠡ ᠶᠠᠭᠤᠮᠠᠨ ᠳᠤ ᠰᠦᠪᠡᠯᠡᠭᠳᠡᠪᠡᠯ ᠴᠤ ᠁︾ ᠬᠡᠬᠦ ᠠᠴᠠ ᠡᠮ᠎ᠡ ᠶᠠᠩᠬᠢᠷ ᠤᠨ ᠪᠦᠬᠦ ᠪᠡᠶ᠎ᠡ ᠨᠢ ᠲᠠᠭᠵᠢᠰᠬᠢᠨ ᠠᠪᠤᠭᠰᠠᠨ ᠪᠤᠯᠪᠠᠴᠤ ᠬᠠᠷᠢᠨ ᠬᠤᠷᠳᠤᠴᠠ ᠨᠢ ᠤᠯᠠᠮ ᠠᠴᠠ ᠤᠯᠠᠮ ᠴᠢᠩᠭᠠᠷᠠᠵᠤ ᠢᠷᠡᠯ᠎ᠡ᠃         ︽ᠬᠠᠨ ᠬᠠᠶᠢᠷᠬᠠᠨ ᠮᠢᠨᠢ᠂ ᠬᠠᠪᠴᠢᠯ ᠵᠢᠯᠠᠭ᠎ᠠ ᠮᠢᠨᠢ ᠁ ᠬᠠᠶᠢᠷᠠᠯᠠᠨ ᠪᠠᠭᠳᠠᠭᠠᠵᠤ ᠦᠵᠡ ᠡ ᠁ ᠬᠡᠮ ᠦᠬᠡᠢ ᠬᠦᠬᠡᠷᠦᠬᠦᠨ ᠦᠷ᠎ᠡ ᠳᠤ ᠮᠢᠨᠢ ᠬᠡᠷ ᠪᠤᠯᠤᠨ ᠰᠡᠬᠦᠶᠢᠵᠤ ᠦᠯᠦᠬᠡᠢ ᠪᠤᠯᠤᠨ ᠪᠦᠪᠡᠶᠢᠯᠡ ᠳ᠋ᠠ ᠁ ᠬᠠᠨ ᠬᠠᠶᠢᠷᠬᠠᠨ ᠮᠢᠨᠢ᠂ ᠬᠠᠪᠴᠢᠯ ᠵᠢᠯᠠᠭ᠎ᠠ ᠮᠢᠨᠢ ᠡ ᠁︾         ᠬᠤᠤᠷ ᠤᠨ ᠦᠨᠳᠤᠰᠤ ᠬᠤᠶᠠᠷ ᠬᠦᠯ ᠲᠠᠢ ᠴᠢᠳᠬᠦᠷ ᠤᠳ ᠠᠴᠠ ᠲᠤᠳᠠᠭᠠᠵᠤ ᠭᠠᠷᠴᠤ ᠪᠤᠯᠳᠠᠭ ᠯᠡ ᠪᠠᠶᠢᠬᠰᠠᠨ ᠴᠤ ᠬᠦᠬᠡ ᠤᠳᠤᠭ᠎ᠠ ᠲᠠᠢ ᠬᠦᠨᠳᠡᠯᠡᠨ ᠲᠦᠡᠭᠽᠢ ᠠᠴᠠ ᠱᠤᠤᠬᠢᠵᠤ ᠢᠷᠡᠬᠦ ᠲᠡᠷᠡ ᠶᠠᠭᠤᠮ᠎ᠠ ᠬᠠᠳᠠ ᠴᠢᠯᠠᠭᠤ ᠶᠢ ᠨᠦᠬᠡᠯᠡᠨ ᠰᠦᠪᠡᠯᠡᠵᠤ᠂ ᠬᠠᠷᠭᠠᠨ᠎ᠠ ᠪᠤᠳᠠᠷᠭᠠᠨ᠎ᠠ ᠶᠢ ᠬᠤᠭᠤᠯᠤᠨ ᠬᠤᠪᠬᠤᠯᠠᠳᠠᠭ ᠬᠤᠶᠢᠨ᠎ᠠ ᠲᠡᠬᠦᠨ  ᠠᠴᠠ ᠴᠤ ᠬᠡᠷᠬᠢᠨ ᠵᠢᠭᠤᠳᠠᠵᠤ ᠭᠠᠷᠬᠤ ᠪᠢᠯᠡ︖ ᠲᠡᠭᠡᠭᠡᠳ ᠲᠡᠷᠡ ᠨᠢ ᠬᠠᠷᠭᠠᠨ᠎ᠠ ᠤᠯᠠᠭᠠᠪᠤᠷ ᠤᠨ ᠦᠵᠦᠬᠦᠷ  ᠢᠶᠠᠷ ᠬᠠᠷᠠᠶᠢᠯᠠᠨ ᠦᠡᠭᠬᠡᠷᠡᠵᠤ᠂ ᠬᠠᠪᠴᠢᠯ ᠭᠤᠤ ᠶᠢᠨ ᠲᠡᠬᠡᠬᠦᠷ  ᠦᠰᠦᠷᠬᠢᠯᠡᠨ ᠭᠠᠷᠴᠢᠬᠠᠳᠠᠭ ᠠᠷᠳᠠᠭ ᠲᠦᠷᠬᠡᠨ ᠬᠦᠶᠤᠳᠠᠯ ᠲᠠᠢ ᠠᠷᠤ ᠬᠡᠷ ᠤᠨ ᠬᠢᠨᠢ ᠠᠪᠤᠷᠭᠤ ᠲᠦᠰᠢᠭ — ᠠᠮᠠᠷᠠᠭ ᠬᠠᠨᠢ ᠶᠢ ᠨᠢ ᠴᠤ ᠬᠠᠮᠢᠶ᠎ᠠ ᠨᠠᠮᠢᠶ᠎ᠠ ᠦᠬᠡᠢ ᠰᠦᠪᠡᠯᠡᠨ ᠨᠦᠬᠡᠯᠡᠬᠡᠳ ᠬᠠᠯᠠᠭᠤᠨ ᠴᠢᠰᠤ ᠶᠢ ᠨᠢ ᠰᠤᠷᠤᠨ ᠲᠠᠭᠤᠰᠬᠠᠵᠤ᠂ ᠬᠠᠷᠠᠮᠰᠠᠯᠳᠠᠢ ᠪᠠᠷ ᠴᠠᠭᠠᠳᠤ ᠶᠢᠷᠳᠢᠨᠴᠤ  ᠳᠤ ᠶᠠᠪᠤᠭᠤᠯᠤᠭᠰᠠᠨ ᠬᠠᠷ᠎ᠠ ᠬᠤᠤᠷᠳᠠᠢ ᠬᠠᠳᠠᠭᠤ ᠶᠠᠭᠤᠮ᠎ᠠ ᠬᠡᠭᠴᠢ ᠶᠢ ᠡᠮ᠎ᠡ ᠶᠠᠩᠬᠢᠷ ᠶᠠᠭᠠᠬᠢᠭᠰᠠᠨ ᠴᠤ ᠮᠠᠷᠳᠠᠵᠤ ᠴᠢᠳᠠᠬᠤ ᠦᠬᠡᠢ ᠪᠠᠳᠤ ᠴᠡᠬᠡᠵᠢᠯᠡᠵᠤ ᠪᠠᠶᠢᠨ᠎ᠠ ᠰᠢᠣ ᠳ᠋ᠠ᠃ ᠤᠳᠤ ᠲᠡᠬᠦᠨ ᠤ ᠲᠠᠷᠢᠬᠢᠨ ᠳᠤ ︽ᠠᠷᠭ᠎ᠠ᠂ ᠠᠷᠭ᠎ᠠ ᠤᠬᠠᠭᠠᠨ︾ ᠬᠡᠰᠡᠨ ᠶᠠᠭᠤᠮ᠎ᠠ ᠯᠡ ᠭᠠᠵᠠᠷ ᠠᠪᠤᠨ ᠡᠷᠬᠢᠯᠳᠤᠵᠤ ᠪᠠᠶᠢᠪᠠ ᠁ ᠲᠡᠷᠡ ᠦᠪᠡᠷ ᠤᠨ ᠲᠦᠷᠦᠵᠤ ᠦᠰᠦᠭᠰᠡᠨ ᠠᠭᠤᠯᠠᠨ ᠠᠭᠤᠢ ᠪᠠᠨ ᠰᠠᠨᠠᠵᠤ ᠤᠯᠤᠯ᠎ᠠ᠃ ︽ᠲᠡᠶᠢᠮᠤ ᠡ᠂ ᠲᠡᠨᠳᠡ ᠤᠴᠢᠶ᠎ᠠ︕ ᠲᠡᠷᠡ ᠪᠤᠯ ᠦᠶ᠎ᠡ  ᠶᠢᠨ ᠦᠶ᠎ᠡ ᠪᠠᠷ ᠢᠶᠠᠨ ᠬᠡᠣᠬᠡᠳ ᠠᠴᠢᠨᠠᠷ ᠢᠶᠠᠨ ᠦᠷᠡᠵᠢᠬᠦᠯᠵᠤ ᠦᠰᠭᠡᠳᠡᠭ ᠦᠯᠦᠬᠡᠢ — ᠲᠡᠯᠳᠡ ᠨᠢᠭᠤᠴᠠᠭᠠᠢ ᠲᠠᠷᠬᠠᠨ ᠤᠷᠤᠨ ᠶᠤᠮ᠃ ᠬᠤᠷᠳᠣᠨ ᠣᠴᠢᠶ᠎ᠠ︕︾        ᠲᠡᠷᠡ ᠠᠭᠤᠯᠠᠨ ᠠᠭᠤᠢ ᠨᠢ ᠠᠳᠡ ᠠᠴᠠ ᠲᠠᠪᠤᠨ ᠵᠠᠭᠤᠨ ᠠᠯᠬᠤᠮ ᠤᠨ ᠵᠠᠶᠢᠳᠠᠢ ᠯᠡ ᠪᠠᠶᠢᠳᠠᠭ ᠠᠭᠤᠯᠠᠨ ᠪᠤᠯᠳᠤᠭᠤᠷ ᠤᠨ ᠠᠷᠤ ᠬᠠᠵᠠᠭᠤ ᠳᠤ ᠤᠪᠤᠶᠢᠵᠤ ᠭᠠᠷᠤᠭᠰᠠᠨ ᠪᠢᠴᠢᠬᠠᠨ ᠬᠠᠳᠠᠨ ᠳᠤ ᠪᠠᠶᠢᠷᠢᠰᠢᠵᠤ᠂ ᠶᠠᠭ ᠲᠡᠷᠡ ᠪᠤᠯᠳᠤᠭᠤᠷ ᠢ ᠰᠢᠬᠠᠬᠰᠠᠨ ᠤᠷᠤᠭᠰᠢ ᠬᠠᠷᠠᠭᠰᠠᠨ ᠡᠬᠦᠳᠡ ᠲᠠᠢ ᠪᠤᠯᠬᠤᠷ ᠲᠤᠩ ᠨᠢᠭᠤᠴᠠ ᠲᠠᠯᠳᠠ ᠭᠠᠵᠠᠷ ᠪᠠᠶᠢᠵᠠᠢ ᠃ ᠡᠷᠬᠢᠨ ᠲᠤᠭᠤᠷᠢᠨ ᠢᠶᠠᠷ ᠨᠢ ᠤᠯᠢᠶᠠᠰᠤᠨ ᠮᠤᠳᠤ ᠵᠢᠭᠳᠡᠷᠡᠬᠡᠳ ᠬᠠᠷᠠᠭ᠎ᠠ ᠰᠡᠷᠡᠯ ᠤᠨ ᠬᠠᠯᠬᠠᠪᠴᠢ ᠪᠤᠯᠤᠭᠰᠠᠨ ᠪᠦᠬᠡᠳ ᠲᠡᠨᠳᠡ ᠬᠦᠷᠳᠡᠯᠡᠬᠢ ᠵᠠᠮ ᠨᠢ ᠪᠡᠷᠬᠡ ᠪᠠᠷᠳᠠᠭ᠎ᠠ ᠶᠡᠭᠡ ᠲᠠᠢ ᠪᠦᠬᠡᠳ ᠤᠢ ᠮᠤᠳᠤ ᠰᠠᠬᠤᠯᠢᠭ ᠪᠤᠯᠬᠤᠷ ᠪᠡᠶ᠎ᠡ ᠲᠠᠯᠳᠠᠯᠠᠬᠤ ᠰᠠᠶᠢᠨ ᠲᠠᠯ᠎ᠠ ᠲᠠᠢ ᠪᠠᠶᠢᠳᠠᠭ ᠠᠵᠠᠢ᠃ ᠨᠡᠩ ᠴᠤ ᠠᠭᠤᠢ ᠶᠢᠨ ᠤᠶᠢᠷᠠᠯᠴᠠᠭᠠᠬᠢ ᠬᠤᠷᠢᠭᠠᠳ ᠠᠯᠬᠤᠮ  ᠤᠨ ᠵᠠᠮ ᠢ ᠢᠷᠡᠵᠤ ᠦᠡᠭᠬᠡᠷᠡᠭᠰᠡᠨ ᠦᠬᠡᠢ ᠠᠮᠢᠳᠠᠳ ᠪᠤᠯ ᠶᠠᠭᠠᠬᠢᠭᠰᠠᠨ ᠴᠤ ᠡᠷᠢᠵᠤ ᠤᠯᠬᠤ ᠦᠬᠡᠢ ᠪᠠᠶᠢᠳᠠᠭ ᠪᠦᠬᠡᠳ ᠬᠤᠶᠠᠷ ᠬᠦᠯ ᠲᠠᠢ ᠭᠤᠵᠤᠭᠤᠷ ᠤᠳ ᠲᠤ ᠪᠤᠯ ᠨᠡᠩ ᠴᠤ ᠲᠡᠶᠢᠮᠤ ᠬᠢᠯᠪᠠᠷᠬᠠᠨ ᠣᠯᠣᠭᠠᠳ ᠠᠪᠴᠢᠬᠠᠬᠤ ᠯᠡ ᠠᠵᠤ ᠪᠢᠰᠢ ᠪᠠᠶᠢᠯ᠎ᠠ᠃         ︽ᠲᠦᠡᠭ ᠲᠠᠩ ᠁︾ ᠦᠨᠤ ᠨᠦᠰᠡᠷ ᠲᠠᠭᠤᠨ ᠲᠠᠰᠤᠷᠠᠭ᠎ᠠ ᠦᠬᠡᠢ ᠲᠤᠭᠤᠯᠳᠠᠨ ︽ᠰᠢᠤ ᠰᠢᠤ ᠁︾ ᠬᠡᠮᠡᠨ ᠠᠭᠠᠷ ᠲᠡᠭᠷᠢ ᠳᠤ ᠡᠯᠢᠨ ᠬᠠᠯᠢᠨ ᠴᠤᠤᠷᠢᠶ᠎ᠠ ᠲᠠᠳᠠᠭᠠᠳ ︽ᠲᠢᠱ ᠨᠢᠱ︾ ᠬᠢᠳᠡᠯ᠎ᠡ ᠠᠭᠤᠯᠠ ᠬᠠᠳᠠᠨ ᠳᠤ ᠬᠠᠶᠢᠷ᠎ᠠ ᠨᠠᠶᠢᠷ ᠦᠬᠡᠢ ᠴᠤᠷᠬᠢᠨ ᠪᠠᠭᠤᠨ᠎ᠠ᠃         ᠡᠮ᠎ᠡ ᠶᠠᠩᠬᠢᠷ ᠡᠨᠡ ᠪᠦᠬᠦᠨ ᠠᠴᠠ ᠠᠶᠤᠵᠤ ᠰᠦᠷᠳᠡᠬᠦ ᠴᠤ ᠦᠬᠡᠢ ᠪᠤᠯᠵᠠᠢ᠃ ᠲᠡᠬᠦᠨ ᠤ ᠪᠦᠬᠦ ᠪᠡᠶ᠎ᠡ ᠬᠦᠯᠦᠷᠡᠨ᠂ ᠬᠦᠵᠦᠬᠦᠣ ᠨᠢ ᠭᠤᠷᠤᠶᠢᠨ ᠰᠤᠨᠵᠤ᠂ ᠬᠦᠯ ᠨᠢ ᠨᠠᠷᠢᠰᠤᠨ ᠵᠢᠷᠢᠯᠵᠡᠬᠡᠳ᠂ ᠬᠡᠳᠡᠰᠤ ᠨᠢ ᠤᠯᠠᠮ ᠠᠴᠠ ᠪᠦᠳᠦᠬᠦᠷᠡᠨ ᠲᠤᠮᠤᠷᠠᠵᠤ᠂ ᠡᠮ᠎ᠡ ᠶᠠᠩᠬᠢᠷ ᠲᠤ ᠯᠡ ᠪᠠᠶᠢᠳᠠᠭ ᠭᠤᠸ᠎ᠠ ᠦᠵᠡᠰᠬᠦᠯᠡᠩ ᠭᠠᠯᠪᠢᠷ ᠲᠦᠷᠬᠦ ᠨᠢ ᠦᠴᠦᠬᠡᠨ ᠴᠤ ᠬᠠᠷᠠᠭᠳᠠᠬᠤ ᠪᠠᠨ ᠪᠤᠯᠢᠵᠠᠢ᠃ ᠬᠡᠳᠡᠯ᠎ᠡ ᠲᠡᠬᠦᠨ ᠳᠤ ᠡᠨᠡ ᠪᠦᠬᠦᠨ ᠢ ᠠᠩᠵᠠᠭᠠᠷᠠᠬᠤ ᠵᠠᠪ ᠴᠢᠯᠦᠬᠡ ᠬᠡᠵᠤ ᠬᠠᠨᠣᠰᠠ ᠠᠴᠠ ᠪᠠᠶᠢᠬᠤ ᠪᠢᠯᠠ᠃         ᠶᠠᠩᠬᠢᠷ ᠪᠢᠴᠢᠬᠠᠨ ᠪᠤᠯᠳᠤᠭᠤᠷ ᠢ ᠤᠷᠢᠶᠠᠭᠠᠳ ᠭᠠᠷᠤᠯ᠎ᠠ᠃ ᠭᠤᠵᠤᠭᠤᠷ ᠤᠳ ᠵᠠᠭᠤᠭᠠᠳ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ ᠤᠷᠢᠯᠠᠨ ᠬᠠᠰᠬᠢᠷᠴᠤ ᠪᠠᠶᠢᠬᠤ ᠶᠢ ᠶᠠᠩᠬᠢᠷ ᠬᠤᠷᠴᠠ ᠰᠡᠷᠡᠯ ᠢᠶᠠᠷ ᠢᠶᠠᠨ ᠮᠡᠳᠡᠵᠤ ᠪᠠᠶᠢᠯ᠎ᠠ᠃ ᠤᠳᠤ ᠲᠡᠭᠡᠭᠰᠢ ᠦᠭᠰᠤᠨ ᠨᠠᠶᠠ ᠶᠡᠷᠡᠨ ᠠᠯᠬᠤᠮ ᠲᠠᠢ ᠪᠤᠯ ᠠᠭᠤᠢ ᠳᠤ ᠬᠦᠷᠴᠢᠬᠡᠨ᠎ᠡ᠃ ᠡᠮ᠎ᠡ ᠶᠠᠩᠬᠢᠷ ᠬᠦᠨ ᠬᠡᠭᠴᠢ ᠠᠮᠢᠰᠬᠤᠵᠤ ᠠᠪᠤᠭᠠᠳ ︽ᠬᠦᠬᠡᠷᠦᠬᠦᠢ ᠦᠷ᠎ᠡ ᠮᠢᠨᠢ᠂ ᠶᠢᠷᠳᠢᠨᠴᠦ ᠶᠢᠨ ᠨᠠᠷᠠ ᠶᠢ ᠦᠵᠡᠬᠦ ᠬᠤᠪᠢ ᠲᠠᠢ ᠠᠵᠠᠢ ᠁︾ ᠬᠡᠮᠡᠨ ᠪᠤᠳᠤᠬᠤ ᠪᠠᠷ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠨᠢ ᠤᠷᠤᠰᠬᠤ ᠠᠯᠳᠠᠭᠠᠳ ᠬᠠᠮᠤᠭ ᠪᠡᠶ᠎ᠡ ᠨᠢ ᠲᠠᠯᠪᠢᠭᠤᠷᠠᠵᠤ ᠢᠷᠡᠵᠡᠢ᠃         ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠠᠭᠤᠯᠠᠨ ᠪᠤᠯᠳᠤᠭᠤᠷ ᠢ ᠤᠷᠢᠶᠠᠭᠠᠳ ᠭᠠᠷᠴᠤ ᠢᠷᠡᠬᠦ ᠦᠶ᠎ᠡ ᠳᠤ ᠡᠮ᠎ᠡ ᠶᠠᠩᠬᠢᠷ ᠠᠯᠢ ᠬᠡᠳᠤᠶᠢᠨᠡᠢ ᠠᠭᠤᠯᠠᠨ ᠠᠭᠤᠢ ᠳᠠᠭᠠᠨ ᠠᠮᠤᠷ ᠲᠠᠶᠢᠪᠤᠡᠭ ᠬᠦᠷᠦᠬᠡᠳ ᠢᠷᠡᠴᠢᠬᠡᠭᠰᠡᠨ ᠪᠠᠶᠢᠯ᠎ᠠ᠃ ᠭᠤᠵᠤᠭᠤᠷ ᠤᠳ ᠤᠨ ︽ᠭᠤᠸᠠ ᠯᠠ ᠱᠠ ᠯᠠ ᠁︾ ᠬᠡᠬᠦ ᠡᠭᠳᠡᠬᠦᠤ ᠬᠦᠷᠬᠡᠮ᠎ᠡ ᠭᠠᠰᠠᠩ ᠲᠠᠭᠤᠨ ᠠᠭᠤᠢ  ᠶᠢᠨ ᠤᠶᠢᠷᠠᠯᠴᠠᠭ᠎ᠠ ᠰᠤᠨᠤᠰᠳᠠᠨ ᠪᠠᠶᠢᠬᠰᠠᠨ ᠢᠶᠠᠨ ᠢᠳᠡᠭ ᠢᠳᠡᠭ ᠢᠶᠠᠷ ᠴᠢᠨᠠᠭᠰᠢᠯᠠᠯ᠎ᠠ᠃ ᠲᠡᠳᠡ ᠶᠠᠩᠬᠢᠷ ᠤᠨ ᠪᠡᠷ᠎ᠡ  ᠶᠢ ᠠᠯᠳᠠᠴᠢᠬᠠᠭᠠᠳ ᠡᠷᠢᠯ ᠪᠤᠯᠵᠤ ᠪᠠᠶᠢᠭ᠎ᠠ ᠠᠵᠣᠭᠤ᠃         ᠶᠠᠩᠬᠢᠷ ᠤᠳᠤ ᠰᠠᠶ᠋ᠢ ᠶᠠᠳᠠᠷᠠᠭᠰᠠᠨ ᠢᠶᠠᠨ ᠮᠡᠳᠡᠯ᠎ᠡ᠃ ᠪᠦᠬᠦ ᠪᠡᠶ᠎ᠡ ᠨᠢ ᠲᠠᠭᠵᠢᠨ ᠴᠡᠴᠡᠷᠡᠬᠦ ᠪᠦᠬᠡᠳ ᠬᠡᠳᠡᠰᠤ ᠨᠢ ᠦᠶ᠎ᠡ ᠦᠶ᠎ᠡ ᠮᠤᠰᠬᠢᠨ ᠡᠪᠡᠳᠴᠤ ᠪᠠᠶᠢᠯ᠎ᠠ᠃ ᠢᠰᠢᠬᠡᠯᠡᠬᠦ ᠴᠠᠭ ᠨᠢ ᠠᠷᠠᠢ ᠪᠤᠯᠤᠭ᠎ᠠ ᠦᠬᠡᠢ ᠪᠤᠯᠬᠤᠷ ᠡᠮ᠎ᠡ ᠶᠠᠩᠬᠢᠷ ᠲᠦᠷᠬᠡᠨ ᠬᠦᠶᠤᠯᠳᠡ ᠠᠴᠠ ᠪᠤᠯᠤᠯ᠎ᠠ ᠬᠡᠮᠡᠨ ᠪᠤᠳᠤᠭᠠᠳ ᠠᠭᠤᠢ ᠶᠢᠨ ᠲᠤᠳᠤᠷᠠᠬᠢ ᠬᠠᠭᠤᠷᠠᠢ ᠭᠠᠵᠠᠷ ᠬᠦᠯ ᠵᠢᠬᠢᠨ ᠬᠡᠪᠳᠡᠯ᠎ᠡ᠃ ᠬᠡᠳᠤᠢ ᠤᠳᠠᠭᠰᠠᠨ ᠢ ᠪᠤᠤ ᠮᠡᠳᠡ᠂ ᠤᠷᠢᠯᠠᠨ ᠬᠠᠰᠬᠢᠷᠬᠤ ᠲᠠᠭᠤᠨ ᠢᠶᠠᠷ ᠡᠮ᠎ᠡ ᠶᠠᠩᠬᠢᠷ ᠵᠦᠳᠡᠬᠦᠬᠡᠨ ᠰᠡᠷᠡᠪᠡ᠃ ᠶᠠᠳᠠᠷᠠᠨ ᠲᠤᠶᠢᠯᠳᠠᠭᠰᠠᠨ ᠲᠡᠷᠡ ᠪᠠᠷ ᠪᠦᠬᠡ ᠤᠨᠳᠠᠭᠰᠠᠨ ᠪᠠᠶᠢᠵᠠᠢ᠃ ᠨᠢᠯᠤᠭᠤᠨ ᠮᠠᠭᠤᠬᠠᠢ ᠦᠨᠦᠷ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠬᠠᠮᠠᠷ ᠭᠠᠳᠠᠮ᠎ᠠ ᠦᠨᠦᠷᠳᠦᠭᠳᠡᠨ ︽ᠭᠤᠸᠠ ᠯᠠ ᠱᠠ ᠯᠠ ᠁︾ ᠬᠡᠳᠡᠭ ᠭᠤᠵᠤᠭᠤᠷ ᠤᠳ ᠤᠨ ᠡᠭᠳᠡᠬᠦᠤ ᠲᠠᠢ ᠲᠠᠭᠤᠨ ᠴᠢᠬᠢ ᠲᠠᠯᠠᠳᠤᠮ᠎ᠠ ᠤᠶᠢᠷᠠᠳᠴᠤ ᠢᠷᠡᠭᠰᠡᠨ ᠪᠠᠶᠢᠵᠤ ᠰᠢᠣ᠃ ᠶᠠᠩᠬᠢᠷ ᠠᠶᠤᠨ ᠰᠤᠴᠢᠭᠰᠠᠨ ᠬᠦᠴᠦᠨ ᠳᠡᠭᠡᠨ ᠭᠤᠰ ᠦᠰᠦᠷᠤᠨ ᠪᠣᠰᠪᠠ᠃ ᠲᠤᠷᠮᠤᠭᠤᠷ ᠬᠤᠶᠠᠷ ᠨᠢᠳᠤ ᠨᠢ ᠤᠷᠤᠨ ᠲᠤᠷᠤᠨ ᠦᠬᠡᠢ ᠬᠦᠯᠢᠪᠡᠯᠵᠡᠵᠤ᠂ ᠨᠠᠮᠠᠶᠢᠭᠰᠠᠨ ᠬᠤᠶᠠᠷ ᠴᠢᠬᠢ ᠨᠢ ᠠᠰ ᠲᠡᠭᠡᠭᠰᠢ ᠪᠠᠨ ᠰᠡᠷᠡᠶᠢᠵᠡᠢ᠃ ᠲᠡᠷᠡ ᠠᠭᠤᠢ ᠠᠴᠠ ᠭᠠᠷᠴᠤ ᠰᠡᠷᠡᠮᠵᠢᠳᠡᠶᠢᠬᠡᠨ ᠠᠵᠢᠭᠯᠠᠪᠠ᠃         ᠭᠤᠵᠤᠭᠤᠷ ᠤᠳ ᠲᠠᠪᠢᠭᠠᠳ ᠯᠡ ᠠᠯᠬᠤᠮ ᠤᠨ ᠵᠠᠶᠢᠳᠠᠢ ᠲᠤᠤᠷ᠎ᠠ ᠬᠠᠵᠠᠭᠤ ᠳᠤᠨᠢ ᠬᠦᠷᠴᠤ ᠢᠷᠡᠴᠢᠬᠡᠬᠡᠳ ᠡᠬᠦᠷ ᠦᠬᠡᠳᠡ ᠨᠢ ᠵᠢᠭᠠᠨ ᠲᠤᠬᠢᠯᠴᠠᠨ ᠬᠦᠬᠡᠷᠦᠯᠳᠤᠵᠤ ᠪᠠᠶᠢᠪᠠ᠃ ᠲᠡᠷᠡ ᠤᠯᠠᠨ ᠲᠠᠨᠢᠯ ᠪᠣᠰᠣ ᠤᠭᠳᠤᠷ ᠲᠤᠭᠳᠤᠷ ᠤᠨ ᠲᠤᠮᠳᠠ ᠡᠳᠡᠬᠡᠳ ᠠᠰᠳᠠᠭᠠᠨ ᠠᠳᠠᠯ᠎ᠠ ᠪᠠᠨ ᠤᠨᠴᠠ ᠶᠢᠨ ᠲᠠᠰᠤᠯ ᠦᠷᠬᠦᠯᠵᠢ ᠶᠠᠭᠤᠮ᠎ᠠ ᠭᠤᠳᠣᠷᠠᠭᠰᠠᠨ ᠤᠨᠴᠠᠭᠠᠢ ᠨᠢᠬᠡᠨ ᠭᠤᠵᠤᠭᠤᠷ ᠬᠠᠷ᠎ᠠ ᠪᠠᠶᠢᠬᠤ ᠪᠠᠷ ᠨᠢ ᠯᠠᠪᠳᠠᠭᠤᠯᠠᠪᠠᠯ ᠬᠡᠴᠢᠨᠡᠬᠡᠨ ᠵᠢᠯ ᠢᠶᠠᠷ ᠡᠲᠦᠷ  ᠤᠨ ᠮᠠᠷᠭᠠᠰᠢ ᠦᠪᠡᠷ ᠤᠨ ᠬᠢᠨᠢ ᠢᠵᠢᠯ ᠲᠦᠷᠦᠯᠳᠡᠨ ᠢᠮᠠᠭᠠᠳ ᠢ ᠠᠳᠤᠭᠤᠯᠠᠵᠤ ᠶᠠᠪᠤᠳᠠᠭ ᠨᠤᠮᠤᠬᠠᠨ ᠬᠠᠷ᠎ᠠ ᠪᠠᠶᠢᠯ᠎ᠠ᠃ ᠲᠡᠷᠡ ᠶᠡᠷᠦ ᠠᠴᠠ ᠶᠠᠩᠬᠢᠷ ᠲᠤ ᠬᠤᠤᠷ ᠬᠦᠷᠬᠡᠳᠡᠭ ᠦᠬᠡᠢ ᠪᠤᠯᠬᠤᠷ ᠲᠡᠳ᠋ᠨ ᠬᠡᠨ ᠠᠯᠢᠨ ᠠᠴᠠ ᠪᠠᠨ ᠠᠶᠤᠵᠤ ᠰᠤᠴᠢᠬᠤ ᠦᠬᠡᠢ ᠡᠶ᠎ᠡ ᠨᠠᠶᠢᠷᠳᠠᠢ ᠪᠤᠯᠤᠭᠰᠠᠨ ᠶᠤᠮ᠃ ᠬᠡᠳᠡᠯ᠎ᠡ ᠲᠡᠷᠡ ᠦᠨᠦᠳᠦᠷ ᠶᠠᠭᠠᠬᠢᠬᠤ ᠳᠠᠭᠠᠨ ᠦᠬᠦᠯ ᠤᠨ ᠲᠠᠶᠢᠰᠤᠨ — ᠴᠢᠳᠬᠦᠷ ᠤᠳ ᠲᠢ ᠬᠠᠮᠰᠠᠨ ᠨᠠᠶᠢᠯᠡᠪᠡ︖         ︽ᠠ︕ ᠲᠡᠷᠡ ᠵᠠᠮ ᠲᠠᠭᠠᠭᠤᠯᠵᠤ ᠢᠷᠡᠵᠡᠢ᠃ ᠲᠡᠷᠡ ᠮᠠᠨ ᠢ ᠪᠠᠨ ᠬᠤᠳᠠᠯᠳᠤᠴᠢᠬᠠᠵᠠᠢ ᠁︾ ᠬᠡᠬᠦ ᠠᠴᠠ ᠶᠠᠩᠬᠢᠷ ᠤᠨ ᠠᠮᠠᠷᠠᠨ ᠲᠠᠶᠢᠪᠤᠷᠢᠰᠢᠬᠰᠠᠨ ᠪᠡᠶ᠎ᠡ ᠠᠬᠢᠭᠠᠳ ᠠᠬᠵᠢᠰᠬᠢᠨ ᠴᠡᠴᠡᠷᠬᠢᠯᠡᠵᠤ᠂ ᠰᠠᠶ᠋ᠢᠬᠠᠨ ᠰᠡᠪᠬᠢᠭᠰᠡᠨ ᠬᠦᠯᠦᠰᠤ ᠨᠢ ᠲᠠᠬᠢᠭᠠᠳ ᠴᠢᠭᠢᠭᠯᠡᠵᠡᠢ᠃ ︽ᠨᠣᠮᠣᠬᠠᠨ ᠬᠠᠷ᠎ᠠ ᠡ︕ ᠴᠢ ᠴᠤ ᠮᠦᠨ ᠴᠢᠳᠬᠦᠷ ᠪᠠᠶᠢᠵᠠᠢ ᠁︾᠃ ᠲᠡᠷᠡᠬᠡᠨ ᠠᠬᠱᠠᠨ᠎ᠠ ᠶᠠᠩᠬᠢᠷ ᠤᠨ ᠲᠤᠷᠮᠤᠯᠵᠠᠬᠰᠠᠨ ᠪᠤᠷᠤ ᠨᠢᠳᠤᠨ ᠠᠴᠠ ᠬᠤᠷᠣᠰᠣᠯ ᠭᠤᠮᠤᠳᠠᠯ ᠤᠨ ᠨᠢᠯᠪᠤᠰᠤ ᠬᠤᠶᠠᠷ ᠵᠤᠷᠪᠤᠰᠯᠠᠨ ᠤᠷᠤᠰᠪᠠ᠃ ᠨᠢᠭᠤᠴᠠ ᠡᠬᠦᠷ ᠨᠢ ᠰᠡᠷᠡᠭᠳᠡᠭᠰᠡᠨ ᠨᠢ ᠭᠠᠷᠴᠠᠭ᠎ᠠ ᠦᠬᠡᠢ ᠪᠤᠯᠵᠠᠢ᠃ ᠤᠳᠤ ᠶᠠᠭᠠᠬᠢᠳᠠᠭ ᠪᠢᠯᠡ︖ ᠢᠰᠢᠬᠡ ᠲᠠᠢ ᠬᠡᠳᠡᠰᠤ ᠪᠠᠨ ᠴᠢᠷᠦᠬᠡᠳ ᠲᠣᠳᠠᠭᠠᠵᠦ ᠲᠡᠶᠢᠯᠬᠦ ᠦᠬᠡᠢ ᠨᠢ ᠮᠡᠳᠡᠬᠡᠵᠢ ᠶᠢᠨ ᠬᠡᠷᠡᠭ᠃ ︽ᠪᠠᠷᠰ ᠢ ᠠᠭᠤᠯᠠᠨ ᠠᠴᠠ ᠨᠢ ᠰᠠᠯᠭᠠᠬᠤ︾ ᠪᠤᠯ ᠲᠡᠭᠡᠳᠤ ᠠᠷᠭ᠎ᠠ ᠶᠤᠮ ᠰᠠᠨ᠃ ᠲᠡᠭᠡ ᠶᠠᠩᠬᠢᠷ ᠨᠢ ᠡᠨᠡ ᠠᠷᠭ᠎ᠠ ᠶᠢ ᠯᠡ ᠬᠡᠷᠡᠭᠯᠡᠬᠡᠳ ᠡᠬᠡ ᠦᠷ᠎ᠡ ᠬᠤᠶᠠᠭᠤᠯᠠ ᠶᠢ ᠠᠮᠢ ᠪᠠᠨ ᠦᠭᠴᠤ ᠪᠠᠶᠢᠭᠠᠳ  ᠠᠪᠤᠷᠠᠭᠰᠠᠨ ᠶᠤᠮ᠃ ᠤᠳᠤ ᠦᠪᠡᠷ ᠤᠨ ᠬᠢᠨᠢ ᠡᠬᠡᠯᠵᠢ ᠪᠤᠯᠵᠠᠢ᠃ ᠠᠮᠢ ᠪᠠᠨ ᠴᠦᠯᠡᠵᠤ ᠪᠠᠶᠢᠭᠠᠳ ᠴᠤ ᠬᠡᠰᠡᠨ ᠦᠷ᠎ᠡ ᠪᠠᠨ ᠠᠪᠤᠷᠠᠬᠤ ᠴᠠᠭ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠲᠤᠯᠵᠤ ᠢᠷᠡᠯ᠎ᠡ᠃ ᠬᠡᠳᠡᠯ᠎ᠡ ᠡᠮ᠎ᠡ ᠶᠠᠩᠬᠢᠷ ᠤᠨ ᠢᠰᠢᠬᠡᠯᠡᠬᠦ ᠴᠠᠭ ᠨᠢ ᠪᠤᠯᠤᠭ᠎ᠠ ᠦᠬᠡᠢ᠂ ᠪᠠᠰᠠ ᠴᠤ ᠬᠡᠳᠤᠨ ᠡᠲᠦᠷ ᠤᠨ ᠵᠠᠢ  ᠲᠠᠢ ᠪᠠᠶᠢᠭᠰᠠᠭᠠᠷ᠃ ᠶᠠᠭᠠᠬᠢᠯᠳᠠᠢ ᠪᠢᠯᠡ︖ ᠭᠤᠵᠤᠭᠤᠷ ᠤᠳ ᠡᠭᠴᠡ ᠠᠰᠬ᠎ᠠ ᠬᠠᠳᠠᠨ ᠵᠠᠮ ᠢᠶᠠᠷ ᠠᠭᠤᠢ ᠳᠤ ᠤᠷᠤᠵᠤ ᠢᠷᠡᠳᠡᠯ᠎ᠡ ᠨᠠᠭᠠᠳᠤ ᠵᠠᠬ᠎ᠠ ᠳᠠᠭᠠᠨ ᠬᠠᠭᠠᠰ ᠮᠦᠴᠡ ᠬᠡᠷᠡᠭᠰᠡᠬᠦ ᠨᠢ ᠯᠠᠪᠳᠠᠢ᠃ ᠡᠨᠡ ᠬᠠᠭᠠᠰ ᠮᠦᠴᠡ ᠯᠡ ᠡᠮ᠎ᠡ ᠶᠠᠩᠬᠢᠷ ᠲᠤ ᠦᠯᠡᠳᠡᠭᠰᠡᠨ ᠦᠷ᠎ᠡ ᠶᠢᠨ ᠢᠶᠠᠨ ᠬᠠᠯᠠᠭᠤᠨ ᠠᠮᠢ ᠶᠢ ᠠᠪᠤᠷᠠᠬᠤ ᠠᠯᠳᠠ ᠠᠴᠠ ᠴᠤ ᠦᠨᠡᠳᠡᠢ ᠬᠤᠪᠤᠷᠬᠠᠨ ᠴᠠᠭ ᠪᠤᠯᠵᠤ ᠦᠯᠡᠳᠡᠵᠡᠢ᠃         ︽ᠢᠰᠢᠬᠡᠯᠡᠨ᠎ᠡ︕ ᠤᠷᠢᠳᠴᠢᠯᠠᠨ ᠢᠰᠢᠬᠡᠯᠡᠨ᠎ᠡ᠃︾ ᠡᠨᠡ ᠪᠤᠯ ᠴᠤᠷ ᠤᠨ ᠭᠠᠭᠴᠠ ᠠᠷᠭ᠎ᠠ ᠦᠬᠡᠢ  ᠠᠴᠠ ᠰᠢᠬᠠᠬᠳᠠᠨ ᠭᠠᠷᠤᠭᠰᠠᠨ ︽ᠲᠡᠭᠡᠳᠤ︾ ᠠᠷᠭ᠎ᠠ᠃ ᠡᠮ᠎ᠡ ᠶᠠᠩᠬᠢᠷ ᠢ ᠪᠠᠶᠢᠴᠢᠬ᠎ᠠ ᠡᠷᠳᠡ ᠲᠡᠭᠡᠳᠤ ᠶᠢᠨ ᠬᠢᠨ ᠦᠶ᠎ᠡ ᠳᠤ ᠴᠤ ᠭᠠᠷᠴᠤ ᠦᠡᠭᠬᠡᠷᠡᠭᠰᠡᠨ ᠦᠬᠡᠢ ᠵᠤᠷᠢᠭᠤᠳᠠ ᠤᠷᠢᠳᠴᠢᠯᠠᠨ ᠢᠰᠢᠬᠡᠯᠡᠬᠦ ᠹᠢᠽᠢᠦᠯᠤᠬᠢ ᠶᠢᠨ ᠬᠡᠨᠡᠨ ᠠᠵᠢᠯᠯᠠᠭ᠎ᠠ ᠶᠢ ᠲᠡᠷᠡ ᠠᠪᠬᠤ ᠪᠠᠷ ᠰᠢᠭᠤᠳᠴᠠᠢ᠃ ︽ᠡᠴᠢᠬᠡ ᠲᠡᠭᠷᠢ᠂ ᠡᠬᠡ ᠲᠡᠯᠡᠬᠡᠢ ᠮᠢᠨᠢ︕ ᠦᠷᠦᠰᠢᠶᠡᠵᠤ ᠬᠠᠶᠢᠷᠠᠯᠠ ᠁ ᠬᠠᠨ ᠬᠠᠶᠢᠷᠬᠠᠨ ᠬᠠᠪᠴᠢᠯ ᠵᠢᠯᠠᠭ᠎ᠠ ᠮᠢᠨᠢ ᠲᠡᠮᠵᠢᠵᠦ ᠲᠣᠰᠠᠯᠠ ᠁︾ ᠡᠮ᠎ᠡ ᠶᠠᠩᠬᠢᠷ ᠬᠠᠵᠠᠭᠤᠯᠠᠨ ᠬᠡᠪᠳᠡᠬᠡᠳ ᠲᠤᠭᠤᠭᠰᠢ ᠬᠦᠴᠦᠯᠡᠨ ᠲᠦᠯᠢᠵᠤ ᠡᠬᠢᠯᠡᠪᠡ᠃ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠨᠢ ᠴᠢᠮᠡᠭᠡ ᠢᠮᠡᠭᠡ ᠦᠬᠡᠢ ᠪᠦᠮᠪᠦᠷᠢᠵᠤ᠂ ᠬᠦᠢᠳᠡᠨ ᠬᠦᠯᠦᠰᠤ ᠨᠢ ᠴᠢᠪ ᠴᠢᠪ ᠲᠤᠰᠤᠯᠠᠨ᠎ᠠ᠃ ︽ᠦᠷ᠎ᠡ ᠮᠢᠨᠢ᠂ ᠬᠦᠬᠡᠷᠦᠬᠦᠢ ᠦᠷ᠎ᠡ ᠮᠢᠨᠢ ᠡ︕ ᠮᠠᠭᠤ ᠡᠵᠢ ᠳᠡᠭᠡᠨ ᠬᠠᠮᠵᠢ ᠳ᠋ᠠ ᠬᠠᠮᠵᠢ᠃ ᠦᠬᠡᠢ ᠪᠤᠯ ᠡᠬᠡ ᠦᠷ᠎ᠡ ᠬᠤᠶᠠᠭᠤᠯᠠ ᠪᠠᠨ ᠬᠠᠷ᠎ᠠ ᠲᠠᠮᠦᠷ  ᠢᠶᠠᠷ ᠰᠦᠪᠡᠯᠡᠬᠦᠯᠵᠤ᠂ ᠬᠠᠯᠠᠭᠤᠨ ᠠᠮᠢ ᠪᠠᠨ ᠠᠯᠳᠠᠨ᠎ᠠ ᠰᠢᠤ ᠳ᠋ᠠ︕︾᠃ ᠬᠠᠷ᠎ᠠ ᠬᠦᠴᠦᠨ ᠢᠶᠠᠷ ᠢᠶᠠᠨ ᠲᠡᠪᠬᠡᠷᠤᠨ ᠬᠦᠶᠦᠭᠰᠡᠨ ᠤ ᠤᠤ ᠡᠰᠡᠬᠦᠯ᠎ᠡ ᠡᠴᠢᠬᠡ ᠲᠡᠭᠷᠢ ᠡᠬᠡ ᠲᠡᠯᠡᠬᠡᠢ ᠦᠷᠦᠰᠢᠶᠡᠯ ᠬᠠᠶᠢᠷᠠᠯᠠᠪᠠ ᠤᠤ ᠪᠤᠤ ᠮᠡᠳᠡ ᠶᠠᠭᠤ ᠴᠤ ᠬᠡᠰᠡᠨ ᠢᠰᠢᠬᠡ ᠨᠢ ᠲᠤᠭᠤᠭᠰᠢᠯᠠᠨ ᠠᠭᠠᠷᠴᠠᠭ ᠤᠨ ᠶᠠᠰᠤ ᠨᠢ ᠨᠢᠬᠡᠨᠳᠡ ᠨᠡᠬᠡᠬᠡᠭᠳᠡᠭᠰᠡᠨ ᠨᠢ ᠡᠮ᠎ᠠ ᠶᠠᠩᠬᠢᠷ ᠤᠨ ᠢᠳᠡᠬᠡᠯ ᠵᠤᠷᠢᠭ ᠢ ᠨᠡᠩ ᠴᠤ ᠬᠦᠪᠴᠢᠯᠠᠵᠤ ᠦᠭᠴᠡᠢ᠃         ᠲᠦᠷᠦᠵᠤ ᠬᠦᠡᠭᠬᠡᠵᠢᠬᠦ ᠬᠡᠮᠡᠭᠴᠢ ᠨᠢᠬᠡ ᠶᠤᠰᠤᠨ ᠤ ᠵᠢᠷᠭᠠᠯᠠᠩ ᠤᠨ ᠡᠮᠤᠨᠡᠬᠢ ᠵᠤᠪᠠᠯᠠᠩ ᠪᠠᠶᠢᠵᠤ᠂ ᠦᠬᠦᠵᠤ ᠰᠡᠬᠡᠬᠦ ᠶᠢᠨ ᠬᠠᠳᠠᠭᠤ ᠲᠡᠮᠡᠴᠡᠬᠡᠨ ᠪᠤᠯᠳᠠᠭ ᠠᠪᠠᠴᠤ ᠡᠨᠡᠬᠦᠬᠡᠨ ᠠᠬᠱᠠᠨ᠎ᠠ ᠡᠮ᠎ᠡ ᠶᠠᠩᠬᠢᠷ ᠲᠤ ᠠᠪᠴᠤ ᠬᠡᠯᠡᠪᠡᠯ ᠡᠪᠡᠳᠴᠤ ᠬᠠᠪᠤᠳᠬᠤ ᠬᠡᠮᠡᠭᠴᠢ ᠡᠩ ᠵᠢᠷ ᠤᠨ ᠦᠴᠦᠬᠡᠨ ᠶᠠᠪᠤᠳᠠᠯ ᠰᠢᠭ᠋ ᠪᠤᠯᠵᠤ᠂ ᠶᠠᠮᠠᠷ ᠴᠤ ᠬᠠᠷᠰᠢ ᠰᠠᠭᠠᠳ ᠤᠴᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠦᠬᠡᠢ ᠨᠢ ᠭᠠᠶᠢᠬᠠᠮᠠᠷ ᠪᠠᠶᠢᠯ᠎ᠠ᠃ ᠢᠰᠢᠬᠡ ᠮᠠᠶᠢᠯᠠᠨ ᠮᠠᠶᠢᠯᠠᠭᠰᠠᠭᠠᠷ ᠶᠢᠷᠳᠢᠨᠴᠦ ᠳᠤ ᠮᠡᠨᠳᠤᠯᠡᠪᠡ᠃ ᠡᠮ᠎ᠡ ᠶᠠᠩᠬᠢᠷ ᠲᠤ ᠲᠠᠶᠢᠪᠤᠰᠢᠷᠠᠵᠤ ᠬᠡᠪᠳᠡᠬᠦ ᠴᠠᠭ ᠪᠠᠶᠢᠭᠰᠠᠨ ᠦᠬᠡᠢ ᠪᠤᠯᠬᠤᠷ ᠠᠯᠪᠠ ᠪᠠᠷ ᠪᠤᠰᠴᠤ ᠢᠰᠢᠬᠡ ᠪᠠᠨ ᠪᠤᠰᠢᠭᠤᠬᠠᠨ ᠲᠤᠯᠢᠶᠠᠨ ᠬᠠᠳᠠᠭᠠᠬᠤ ᠶᠢ ᠰᠠᠨᠠᠪᠠ᠃ ᠦᠬᠢᠨ ᠢᠰᠢᠬᠡ ᠪᠠᠶᠢᠬᠤ ᠪᠠᠷ ᠨᠢ ︽ᠠᠢ︕ ᠦᠬᠢᠨ ᠦᠷ᠎ᠡ ᠮᠢᠨᠢ︕ ᠡᠨᠡ ᠯᠡ ᠡᠷᠢᠶᠡᠨ ᠪᠠᠷᠠᠭᠠᠨ ᠶᠢᠷᠳᠢᠨᠴᠤ  ᠳᠤ ᠴᠢ ᠮᠢᠨᠢ ᠶᠠᠭᠠᠬᠢᠵᠤ ᠴᠤ ᠠᠮᠢᠳᠤᠷᠠᠬᠤ ᠪᠤᠯ ᠡ︾ ᠬᠡᠳ ᠨᠢᠯᠪᠤᠰᠤ ᠨᠢ ᠤᠷᠤᠰᠬᠤ ᠶᠢ ᠵᠠᠪᠳᠤᠳᠠᠯ᠎ᠠ ᠬᠡᠳᠡᠰᠤ ᠨᠢ ᠲᠠᠬᠢᠭᠠᠳ ᠮᠤᠰᠬᠢᠭᠠᠳ ᠲᠤᠭᠤᠭᠰᠢ ᠪᠠᠭᠤᠯᠭᠠᠬᠤ ᠰᠢᠭ᠋ ᠪᠤᠯᠪᠠ᠃ ᠡᠮ᠎ᠡ ᠶᠠᠩᠬᠢᠷ ᠰᠠᠨᠳᠣᠷᠣᠨ ᠲᠣᠷᠣᠭᠰᠢ ᠣᠴᠣᠶᠢᠨ ᠰᠠᠭᠤᠳᠠᠯ᠎ᠠ ︽ᠮᠠᠢ ᠮᠠᠢ︾ ᠮᠠᠶᠢᠯᠠᠭᠰᠠᠭᠠᠷ ᠪᠠᠰᠠ ᠨᠢᠭᠡ ᠢᠰᠢᠬᠡ ᠨᠢ ᠪᠣᠯᠳᠠᠰᠬᠢᠨ ᠭᠠᠷᠴᠦ ᠢᠷᠡᠪᠡ᠃ ᠬᠡᠳᠡᠰᠤ ᠨᠢ ᠴᠦᠯᠳᠦᠶᠢᠬᠡᠳ ᠲᠡᠩᠴᠤ ᠪᠦᠳᠦᠬᠦᠨ ᠪᠠᠶᠢᠭᠰᠠᠨ ᠨᠢ ᠢᠬᠡᠷ᠎ᠡ ᠪᠠᠶᠢᠭᠰᠠᠨ ᠰᠠᠨᠵᠠᠢ᠃ ᠲᠡᠷᠡ ᠨᠢ ᠬᠠᠷᠢᠨ ᠡᠷ᠎ᠡ ᠢᠰᠢᠬᠡ ᠪᠠᠶᠢᠭᠰᠠᠨ ᠢᠶᠠᠷ ᠡᠮ᠎ᠡ ᠶᠠᠩᠬᠢᠷ ︽ᠶᠠᠭᠤ ᠴᠤ ᠬᠡᠰᠡᠨ ᠬᠠᠨᠢ ᠲᠠᠢ ᠪᠤᠯᠤᠭᠰᠠᠨ ᠁ ᠪᠤᠷᠬᠠᠨ ᠲᠡᠭᠷᠢ ᠦᠷᠦᠰᠢᠶᠡᠵᠡᠢ︾ ᠬᠡᠳ ᠲᠦᠷ ᠴᠤ ᠬᠡᠰᠡᠨ ᠪᠠᠶᠠᠷᠯᠠᠵᠤ ᠠᠪᠤᠪᠠ᠃         ︽ᠭᠤᠸᠠ ᠯᠠ ᠱᠠ ᠯᠠ᠂ ᠭᠤᠸᠠ ᠯᠠ ᠱᠠ ᠯᠠ ᠁︾ ᠬᠡᠮᠡᠬᠦ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠤᠨ ᠲᠠᠭᠤᠨ ᠤᠯᠠᠮ ᠠᠴᠠ ᠤᠯᠠᠮ ᠤᠶᠢᠷᠠᠳᠴᠤ ᠢᠷᠡᠯ᠎ᠡ᠃ ᠬᠡᠶ᠎ᠡ ᠡᠮ᠎ᠡ ᠶᠠᠩᠬᠢᠷ ᠤᠳᠤ ᠪᠠᠷ ᠢᠶᠠᠨ ᠶᠠᠪᠤᠵᠤ ᠡᠰᠡ ᠪᠤᠯᠤᠨ᠎ᠠ᠃ ᠬᠠᠯᠳᠤ ᠮᠦᠯᠳᠤ ᠲᠤᠯᠢᠶᠠᠨ ᠬᠠᠳᠠᠭᠠᠭᠰᠠᠨ ᠬᠤᠶᠠᠷ ᠢᠰᠢᠬᠡ ᠪᠠᠨ ᠵᠦᠬᠡᠯᠡᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠠᠷᠭᠠᠯᠠᠨ ᠪᠠᠶᠢᠵᠤ ᠪᠤᠰᠬᠠᠭᠰᠠᠨ ᠡᠮ᠎ᠡ ᠶᠠᠩᠬᠢᠷ ᠰᠠᠷᠠᠶᠢᠨ ᠴᠢᠨᠤᠷᠡᠭᠰᠡᠨ ᠬᠤᠶᠠᠷ ᠬᠦᠬᠦ ᠪᠠᠨ ᠠᠮᠠ ᠦᠬᠡᠳᠡ ᠨᠢ ᠣᠶᠢᠷᠠᠳᠣᠭᠤᠯᠵᠦ ᠦᠭᠪᠡ᠃         ᠠᠮᠢᠳᠠᠨ ᠭᠤᠤᠯᠳᠠᠨ ᠤ ᠲᠦᠷᠦᠯᠬᠢ ᠶᠢᠨ ᠠᠪᠢᠶᠠᠰ ᠴᠢᠳᠠᠪᠦᠷᠢ ᠬᠡᠵᠤ ᠠᠶᠢᠬᠤᠪᠳᠤᠷ ᠬᠡᠴᠡᠬᠦᠤ ᠪᠠᠶᠢᠭᠰᠠᠨ ᠰᠠᠨᠵᠠᠢ᠃ ᠬᠦᠯ ᠲᠡᠭᠡᠷ᠎ᠡ ᠪᠠᠨ ᠵᠦᠳᠡᠬᠦᠬᠡᠨ ᠲᠤᠭᠳᠠᠭᠠᠳ ᠲᠡᠯᠳᠡᠷᠬᠢᠯᠡᠵᠤ ᠪᠠᠶᠢᠭᠰᠠᠨ ᠴᠤ ᠪᠢᠴᠢᠬᠠᠨ ᠬᠤᠶᠠᠷ ᠢᠰᠢᠬᠡ᠂ ᠡᠬᠡ ᠶᠢᠨ ᠢᠶᠠᠨ ᠬᠦᠬᠦᠨ ᠲᠣᠪᠴᠢ ᠶᠢ ᠨᠢᠬᠡ ᠨᠢ ᠨᠢᠬᠡ ᠤᠯᠵᠤ ᠡᠮᠬᠦᠬᠡᠳ ᠬᠦᠬᠡᠰᠤ ᠰᠠᠭᠭᠠᠭᠤᠯᠤᠨ ᠬᠤᠪᠳᠤᠭ ᠰᠤᠷᠤᠬᠤ ᠨᠢ ᠶᠠᠮᠠᠷ ᠬᠦᠬᠡᠷᠦᠬᠦᠶᠢᠯᠡᠯᠳᠡᠢ ᠠᠵᠠᠢ᠃ ᠡᠮ᠎ᠡ ᠶᠠᠩᠬᠢᠷ ᠤᠨ ᠨᠢᠯᠪᠤᠰᠤ ᠠᠬᠢᠭᠠᠳ ᠯᠡ ᠢᠪᠢᠯᠵᠤ ᠪᠠᠶᠢᠭ᠎ᠠ ᠰᠦ ᠰᠢᠭ ᠢᠶᠠᠨ ᠵᠤᠭᠰᠤᠭ᠎ᠠ ᠦᠬᠡᠢ ᠤᠷᠤᠰᠤᠯ᠎ᠠ᠃ ᠬᠦᠬᠡᠷᠦᠬᠦᠢ ᠠᠮᠢᠳᠠᠨ ᠵᠢᠷᠭᠤᠭᠠᠨ ᠭᠤᠤᠯᠳᠠᠨ ᠤ ᠡᠬᠡ ᠪᠤᠯᠤᠭᠰᠠᠳ ᠪᠦᠷ ᠡᠶᠢᠮᠤ ᠯᠡ ᠦᠷᠦᠪᠴᠢᠬᠡᠨ ᠮᠦᠷᠳᠡᠬᠡᠨ ᠲᠡᠶᠢᠮᠤ ᠯᠡ ᠬᠠᠷᠠᠮ ᠦᠬᠡᠢ ᠪᠠᠶᠢᠳᠠᠭ ᠰᠠᠨᠵᠠᠢ᠃ ᠤᠳᠠᠵᠤ ᠲᠦᠳᠡᠯ ᠦᠬᠡᠢ ᠡᠬᠡ ᠶᠢᠨ ᠰᠢᠷ᠎ᠠ ᠤᠭᠤᠷᠠᠭ ᠲᠠᠭᠠᠨ ᠱᠠᠩᠳᠠᠭᠤᠷᠠᠭᠰᠠᠨ ᠢᠬᠡᠷ᠎ᠡ ᠢᠰᠢᠬᠡ ᠨᠢ ᠡᠬᠡ ᠲᠠᠢ ᠪᠠᠨ ᠨᠤᠤᠷᠠᠯᠳᠤᠬᠤ ᠪᠠᠨ ᠪᠤᠯᠢᠵᠤ ᠡᠶᠢᠰᠢ ᠲᠡᠶᠢᠰᠢ ᠰᠢᠷᠳᠡᠯᠬᠢᠯᠡᠨ ᠲᠡᠨᠳᠦᠷ ᠮᠦᠨᠳᠤᠷ ᠲᠤᠭᠤᠷᠢᠨ᠎ᠠ᠃ ᠨᠢᠯᠬ᠎ᠠ ᠪᠡᠯᠴᠢᠷ ᠬᠦᠬᠡᠷᠦᠬᠦᠨ ᠬᠤᠶᠠᠷ ᠢᠰᠢᠬᠡ᠂ ᠬᠠᠭᠠᠴᠠᠯ ᠰᠠᠨᠠᠯ᠂ ᠠᠮᠢᠳᠤᠷᠠᠯ ᠲᠡᠮᠡᠴᠡᠯ ᠬᠡᠵᠤ ᠶᠠᠭᠤ ᠪᠤᠯᠬᠤ ᠶᠢ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ︕         ᠤᠳᠤ ᠡᠬᠡ ᠦᠷ᠎ᠡ ᠶᠢᠨ ᠬᠠᠶᠢᠷ᠎ᠠ ᠰᠡᠳᠬᠢᠯᠬᠡ ᠬᠡᠳ ᠨᠤᠤᠷᠠᠯᠳᠤᠬᠤ ᠴᠠᠭ ᠪᠠᠶᠢᠬᠤ ᠦᠬᠡᠢ ᠪᠤᠯᠵᠠᠢ᠃ ᠡᠮ᠎ᠡ ᠶᠠᠩᠬᠢᠷ ᠬᠦᠬᠡᠷᠦᠬᠦᠨ ᠬᠤᠶᠠᠷ ᠦᠷ᠎ᠡ ᠪᠠᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠦᠨᠦᠷᠯᠡᠨ ᠦᠬᠦᠬᠡᠷᠳᠦᠭᠰᠡᠨ ᠢᠶᠠᠨ ᠬᠡᠨᠡᠳᠳᠡ ᠤᠬᠤᠰᠬᠢᠨ ᠡᠷᠬᠢᠵᠤ ᠠᠭᠤᠢ ᠠᠴᠠ ᠪᠠᠨ ᠭᠠᠷᠤᠮᠠᠭᠴᠠ ᠬᠠᠳᠠᠨ ᠤ ᠪᠠᠷᠳᠠᠭ᠎ᠠ ᠶᠢ ᠠᠰᠢᠭᠯᠠᠨ ᠬᠠᠵᠠᠭᠤ  ᠲᠠᠭᠠᠨ ᠬᠤᠷᠳᠤᠯᠠᠪᠠ᠃ ᠲᠡᠬᠦᠨ ᠢ ᠠᠭᠤᠢ ᠠᠴᠠ ᠲᠦᠴᠢ ᠲᠠᠪᠢᠨ ᠠᠯᠬᠤᠮ ᠵᠠᠶᠢᠳᠠᠬᠤ ᠦᠶ᠎ᠡ ᠳᠤ ᠰᠠᠶ᠋ᠢ ᠭᠤᠵᠤᠭᠤᠷ ᠤᠳ ᠤᠯᠵᠤ ᠬᠠᠷᠠᠭᠠᠳ ᠠᠭᠤᠢ ᠦᠬᠡᠳᠡ ᠮᠠᠴᠤᠬᠤ ᠪᠠᠨ ᠪᠤᠯᠢᠵᠤ᠂ ᠬᠤᠶᠢᠨ᠎ᠠ ᠠᠴᠠ ᠨᠢ ᠡᠷᠢᠶᠡᠨ ᠰᠠᠭᠠᠷᠠᠯ ᠢᠶᠠᠷ ᠪᠠᠷᠬᠢᠷᠠᠯᠳᠤᠭᠰᠠᠭᠠᠷ ᠠᠰᠯᠠᠨ ᠨᠡᠬᠡᠵᠤ ᠢᠷᠡᠪᠡ᠃         ︽ᠭᠤᠸᠠ ᠯᠠ ᠱᠠ ᠯᠠ ᠁︾ ︽ᠲᠦᠡᠭ ᠲᠠᠩ᠂ ᠲᠦᠡᠭ ᠲᠠᠩ ᠁︾ ᠬᠤᠶᠠᠷ ᠬᠦᠯ ᠲᠠᠢ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠡᠷᠦᠢ ᠬᠤᠷᠤᠢ ᠦᠬᠡᠢ ᠤᠷᠢᠯᠠᠯᠳᠤᠨ᠂ ᠬᠦᠬᠡ ᠤᠳᠤᠭ᠎ᠠ ᠲᠠᠢ ᠬᠦᠨᠳᠡᠯᠡᠨ ᠲᠦᠡᠭᠽᠢ ᠵᠤᠭᠰᠤᠭ᠎ᠠ ᠵᠢᠯᠤᠭᠤ ᠦᠬᠡᠢ ᠲᠦᠡᠭᠬᠢᠨᠡᠨ᠎ᠡ᠃         ᠡᠮ᠎ᠡ ᠶᠠᠩᠬᠢᠷ ᠤᠨ ᠪᠡᠶ᠎ᠡ ᠲᠡᠭᠬᠡᠬᠡ ᠲᠠᠮᠢᠷ ᠰᠤᠯᠠ ᠪᠠᠶᠢᠭᠰᠠᠨ ᠴᠤ ᠬᠠᠷᠢᠨ ᠶᠡᠬᠡᠳᠡ ᠬᠦᠡᠭᠬᠡᠨ ᠱᠦᠡᠭᠬᠡᠨ ᠪᠤᠯᠴᠢᠬᠠᠵᠠᠢ᠃ ᠲᠡᠷᠡ ᠬᠠᠵᠠᠭᠤ ᠶᠢ ᠲᠠᠭᠠᠨ ᠣᠮᠠᠷᠠᠰᠢᠯᠠᠵᠦ᠂ ᠠᠭᠤᠯᠠ ᠲᠠᠪᠠᠨ ᠭᠠᠷᠬᠤ ᠪᠠᠷ ᠲᠦᠯᠦᠪᠯᠡᠪᠡ᠃ ᠠᠭᠤᠯᠠᠨ ᠤᠷᠤᠢ ᠠᠳᠡ ᠠᠴᠠ ᠲᠦᠷᠪᠡ ᠲᠠᠪᠤᠨ ᠵᠠᠭᠤᠨ ᠠᠯᠬᠤᠮ ᠠᠴᠠ ᠬᠡᠳᠦᠷᠡᠬᠦ ᠦᠬᠡᠢ ᠪᠦᠬᠡᠳ ᠬᠤᠶᠠᠷ ᠬᠦᠯᠳᠡᠨ ᠨᠦᠭᠦᠳ ᠶᠠᠭᠠᠬᠢᠭᠰᠠᠨ ᠴᠤ ᠲᠠᠪᠠᠵᠤ ᠲᠡᠶᠢᠯᠬᠦ ᠦᠬᠡᠢ ᠬᠡᠳᠡᠭ ᠢ ᠲᠡᠷᠡ ᠲᠤᠳᠤᠷᠬᠠᠢ ᠮᠡᠳᠡᠵᠤ ᠪᠠᠶᠢᠯ᠎ᠠ᠃         ᠡᠮ᠎ᠡ ᠶᠠᠩᠬᠢᠷ ᠬᠤᠷᠳᠤᠴᠠ ᠪᠠᠨ ᠲᠡᠩᠴᠡᠬᠦᠯᠦᠨ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠲᠠᠢ ᠵᠠᠭᠤᠨ ᠠᠯᠬᠤᠮ ᠤᠨ ᠵᠠᠢ ᠲᠠᠢ ᠪᠠᠶᠢᠬᠤ ᠶᠢ ᠪᠠᠷᠢᠮᠳᠠᠯᠠᠵᠤ ᠪᠠᠶᠢᠯ᠎ᠠ᠃ ᠲᠡᠩᠴᠤ ᠬᠤᠷᠳᠤᠯᠠᠭᠠᠳ ᠬᠡᠳᠦᠷᠬᠡᠢ ᠵᠠᠶᠢᠳᠠᠪᠠᠯ ᠴᠢᠳᠬᠦᠷ ᠤᠳ ᠬᠠᠰᠢᠷᠠᠵᠤ ᠴᠦᠬᠦᠬᠡᠳ ᠲᠡᠬᠦᠨ ᠢ ᠬᠠᠶᠠᠵᠤ᠂ ᠠᠭᠤᠢ ᠦᠬᠡᠳᠡ ᠨᠢ ᠡᠷᠬᠢᠵᠤ ᠤᠴᠢᠬᠤ ᠠᠴᠠ ᠡᠮᠢᠶᠡᠨ᠎ᠡ᠃ ᠲᠡᠩᠳᠡᠬᠦᠣ ᠠᠭᠠᠵᠢᠭᠤᠯᠤᠭᠠᠳ ᠭᠤᠵᠤᠭᠤᠷ ᠤᠳ ᠲᠠᠢ ᠬᠡᠳᠤ ᠤᠶᠢᠷᠠᠳᠪᠠᠯ ᠦᠨᠦ ᠬᠦᠬᠡ ᠤᠳᠤᠭ᠎ᠠ ᠲᠠᠢ ᠬᠦᠨᠳᠡᠯᠡᠨ ᠶᠠᠭᠤᠮᠠᠨ ᠳᠤ ᠬᠢᠯᠪᠠᠷᠬᠠᠨ ᠰᠦᠪᠡᠯᠡᠭᠳᠡᠬᠦ ᠶᠢ ᠪᠤᠤ ᠬᠡᠯᠡ ᠬᠢᠷᠠᠬᠠᠢ ᠨᠢᠳᠤ ᠲᠠᠢ ᠨᠢᠬᠡᠨ ᠳᠤᠨᠢ ᠢᠰᠢᠬᠡᠯᠡᠭᠰᠡᠨ ᠬᠡᠳᠡᠭ  ᠢᠶᠠᠨ ᠰᠡᠷᠡᠭᠳᠡᠪᠡᠯ ᠨᠡᠩ ᠴᠤ ᠪᠠᠷᠠᠭᠰᠠᠨ ᠬᠡᠷᠡᠭ ᠪᠤᠯᠤᠨ᠎ᠠ ᠬᠡᠵᠤ ᠰᠡᠷᠬᠡᠭ ᠤᠬᠠᠭᠠᠨ ᠳᠠᠭᠠᠨ ᠰᠡᠳᠬᠢᠨ ᠪᠤᠳᠤᠵᠤ ᠠᠮᠵᠢᠭᠰᠠᠨ ᠪᠠᠶᠢᠵᠠᠢ᠃ ᠵᠠᠮ ᠤᠨ ᠶᠡᠬᠡᠨᠭᠬᠢ ᠬᠠᠭᠠᠰ ᠢ ᠬᠤᠷᠤᠭᠠᠵᠤ᠂ ᠴᠠᠭ ᠨᠡᠯᠢᠶᠡᠳ ᠢ ᠦᠷᠡᠭᠰᠡᠨ ᠪᠤᠯᠪᠠᠴᠤ ᠡᠨᠡ ᠤᠳᠠᠭ᠎ᠠ ᠡᠮ᠎ᠡ ᠶᠠᠩᠬᠢᠷ ᠲᠡᠳᠤᠢ ᠶᠠᠳᠠᠷᠠᠭ᠎ᠠ ᠦᠬᠡᠢ᠃ ᠤᠳᠤ ᠤᠢ ᠮᠤᠳᠤ ᠰᠡᠶᠢᠷᠡᠭᠵᠢᠭᠰᠡᠨ ᠠᠪᠠᠴᠦ ᠠᠰᠬ᠎ᠠ ᠬᠠᠳᠠ ᠰᠡᠭᠦᠶᠢᠯᠴᠡᠭᠡᠳ ᠪᠠᠷᠳᠠᠭ᠎ᠠ ᠪᠡᠷᠬᠡ ᠶᠡᠭᠡ ᠪᠤᠯᠵᠠᠢ᠃ ᠡᠮ᠎ᠡ ᠶᠠᠩᠬᠢᠷ ᠤᠨ ᠪᠤᠳᠤᠯ ᠰᠡᠳᠬᠢᠯᠬᠡ ᠲᠠᠯᠪᠢᠭᠤᠷᠠᠨ ᠲᠡᠭᠰᠢᠷᠡᠵᠤ᠂ ︽ᠲᠠᠪᠢᠭᠠᠳ ᠯᠡ ᠠᠯᠬᠤᠮ ᠲᠠᠢ ᠪᠤᠯ ᠠᠭᠤᠯᠠ ᠲᠠᠪᠠᠨ᠎ᠠ ᠁ ᠬᠦᠬᠡᠷᠦᠬᠦᠢ ᠡᠬᠡ ᠦᠷ᠎ᠡ ᠪᠢᠳᠡ ᠭᠤᠷᠪᠠᠭᠤᠯᠠ ᠮᠠᠷᠭᠠᠰᠢ ᠶᠢᠨ ᠨᠠᠷᠠ ᠶᠢ ᠡᠰᠡᠨ ᠮᠡᠨᠳᠤ ᠬᠠᠷᠠᠬᠤ ᠨᠢ ᠁︾ ᠬᠡᠵᠤ ᠪᠤᠳᠤᠬᠤ ᠪᠠᠷ ᠲᠤᠷᠮᠤᠯᠵᠠᠭᠰᠠᠨ ᠬᠤᠶᠠᠷ ᠨᠢᠳᠤᠨ ᠳᠤᠨᠢ ᠮᠦᠨ ᠯᠡ ᠨᠢᠯᠪᠤᠰᠤ ᠪᠦᠷᠬᠦᠵᠡᠢ᠃         ᠭᠤᠵᠤᠭᠤᠷ ᠤᠳ ᠮᠠᠭᠤᠳᠠᠵᠤ ᠲᠤᠶᠢᠯᠳᠠᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠤᠯᠵᠤ᠂ ᠬᠦᠬᠡ ᠤᠳᠤᠭᠠᠳᠤ ᠬᠦᠨᠳᠡᠯᠡᠨ ᠲᠦᠡᠭᠽᠢ ᠪᠠᠨ ᠠᠯᠪᠠ ᠶᠢᠨ ᠲᠡᠳᠦᠢ ᠲᠤᠤᠭᠠᠷᠭᠠᠵᠤ ᠪᠠᠶᠢᠪᠠ᠃ ᠡᠮ᠎ᠡ ᠶᠠᠩᠬᠢᠷ ᠠᠭᠤᠯᠠ ᠲᠠᠪᠠᠨ ᠴᠢᠨᠠᠭᠰᠢ ᠭᠠᠷᠬᠤ  ᠶᠢ ᠶᠠᠭᠠᠷᠠᠭᠰᠠᠨ ᠦᠬᠡᠢ᠃ ︽ᠭᠤᠵᠤᠭᠤᠷ ᠤᠳ ᠴᠤᠬᠤᠮ ᠶᠠᠭᠤ ᠶᠠᠭᠠᠬᠢᠬᠤ ᠬᠡᠵᠤ ᠁ ᠪᠠᠰᠠ ᠶᠠᠮᠠᠷ ᠵᠠᠯᠢ ᠮᠡᠭᠡ ᠭᠠᠷᠭᠠᠬᠤ ᠪᠤᠯ︖︾ ᠬᠡᠰᠡᠨ ᠰᠢᠭ ᠬᠤᠶᠢᠰᠢ ᠡᠷᠬᠢᠨ ᠠᠵᠢᠶᠠᠷᠠᠪᠠ᠃ ᠭᠤᠵᠤᠭᠤᠷ ᠤᠳ ᠤᠨᠵᠢᠢᠵᠤ ᠯᠠᠪᠳᠠᠶᠢᠨ ᠵᠤᠭᠰᠤᠵᠠᠭᠠᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠪᠦᠬᠦᠳᠡᠬᠡᠷ ᠭᠠᠵᠠᠷ ᠨᠠᠭᠠᠯᠳᠤᠨ ᠬᠡᠪᠳᠡᠴᠢᠬᠡᠪᠡ᠃ ︽ᠮᠠᠭᠤ ᠴᠢᠳᠬᠦᠷ ᠤᠳ ᠤᠨ ᠲᠡᠩᠬᠡᠬᠡ ᠲᠠᠮᠢᠷ ᠨᠢ ᠲᠠᠭᠤᠰᠤᠭᠰᠠᠨ ᠪᠠᠶᠢᠯᠬᠦᠢ᠂ ᠤᠳᠤ ᠶᠠᠭᠠᠬᠢᠵᠦ ᠴᠢᠳᠠᠬᠤᠪ ᠁︾ ᠬᠡᠵᠤ ᠡᠮ᠎ᠡ ᠶᠠᠩᠬᠢᠷ ᠡᠮᠵᠡᠭᠬᠡᠨ ᠪᠤᠳᠤᠯ ᠳᠠᠭᠠᠨ ᠪᠠᠶᠠᠰᠤᠨ ᠪᠠᠶᠢᠳᠠᠯ᠎ᠠ ᠦᠨᠦ ᠬᠦᠬᠡ ᠴᠡᠩᠬᠡᠷ ᠤᠳᠤᠭ᠎ᠠ ᠶᠠᠭ ᠯᠡ ᠬᠤᠯᠠ ᠶᠢᠨ ᠬᠤᠯᠠᠬᠢ ᠠᠶᠢᠯ ᠤᠳ ᠤᠨ ᠤᠷᠤᠢ ᠠᠴᠠ ᠰᠤᠭᠤᠨᠠᠭᠯᠠᠬᠤ ᠴᠡᠩᠬᠡᠷ ᠤᠳᠤᠭ᠎ᠠ ᠰᠢᠳᠬᠠᠨ ᠵᠡᠷᠬᠡ ᠪᠠᠷ ᠰᠤᠭᠤᠨᠠᠭᠯᠠᠭᠰᠠᠨ ᠢᠶᠠᠨ ᠬᠦᠨᠳᠡᠯᠡᠨ ᠲᠦᠡᠭᠽᠢ ᠨᠦᠭᠦᠳ ᠵᠢᠭᠳᠡ ᠪᠠᠷ ︽ᠲᠦᠡᠭ ᠲᠠᠩ᠂ ᠲᠦᠡᠭ ᠲᠠᠩ ᠁︾ ᠬᠡᠵᠤ ᠴᠢᠬᠢ ᠶᠢ ᠨᠢ ᠲᠤᠷᠬᠢᠳᠠᠯ᠎ᠠ ᠫᠠᠷᠴᠢᠬᠢᠨᠠᠨ ᠲᠤᠤᠭᠠᠷᠤᠭᠠᠳ ︽ᠰᠢᠤ ᠰᠢᠤ ᠁︾ ᠬᠡᠮᠡᠨ ᠠᠭᠠᠷ ᠢ ᠵᠦᠰᠦᠨ ᠢᠰᠬᠡᠷᠤᠨ ᠱᠤᠤᠬᠢᠭᠠᠳ ︽ᠨᠢᠱ ᠲᠢᠱ ᠁︾ ᠬᠡᠯᠴᠡᠨ ᠠᠭᠤᠯᠠ ᠬᠠᠳᠠ ᠶᠢ ᠨᠦᠬᠡᠯᠡᠨ ᠰᠦᠪᠡᠯᠡᠪᠡ᠃         ᠠᠷᠭ᠎ᠠ ᠴᠦᠬᠦᠭᠰᠡᠨ ᠴᠢᠳᠬᠦᠷ ᠤᠳ᠂ ᠮᠠᠭᠤ ᠰᠠᠶᠢᠨ ᠵᠠᠯᠢ ᠮᠡᠬᠡᠳᠡᠨ ᠨᠦᠭᠦᠳ ᠤᠬᠠᠭᠠᠨ ᠵᠠᠷᠤᠵᠤ ᠲᠠᠬᠦᠨ  ᠢ ᠰᠠᠭᠠᠳᠤᠭᠤᠯᠤᠭᠠᠳ ᠡᠴᠦᠰ ᠤᠨ ᠪᠤᠷᠤᠩᠬᠤᠢ ᠲᠠᠭᠠᠷᠢᠯᠳᠠ ᠬᠢᠵᠤ ᠪᠠᠶᠢᠬᠤ ᠶᠢ ᠮᠡᠳᠡᠭᠰᠡᠨ ᠶᠠᠩᠬᠢᠷ᠂ ᠲᠡᠶᠢᠰᠤᠨ  ᠢᠶᠠᠨ ᠲᠠᠩᠴᠤ ᠬᠦᠡᠭᠬᠡᠪᠴᠢᠯᠡᠭᠰᠡᠨ ᠢᠶᠠᠨ ᠤᠳᠤ ᠰᠠᠶ᠋ᠢ ᠤᠬᠠᠭᠠᠷᠠᠭᠠᠳ ᠤᠬᠤᠰᠬᠢᠨ ᠡᠷᠬᠢᠨ ᠵᠢᠭᠤᠳᠠᠬᠤ ᠬᠡᠳᠡᠯ᠎ᠡ ᠪᠤᠷᠤᠭᠤ ᠲᠠᠯ᠎ᠠ ᠶᠢᠨ ᠭᠤᠶ᠎ᠠ ᠨᠢ ︽ᠵᠢᠮ︾ ᠬᠡᠬᠦ ᠶᠢᠨ ᠵᠡᠷᠬᠡ ᠪᠡᠶ᠎ᠡ ᠪᠠᠨ ᠡᠵᠡᠮᠳᠡᠵᠤ ᠲᠡᠶᠢᠯᠤᠯ ᠦᠬᠡᠢ ᠠᠷᠤᠭᠰᠢ ᠬᠠᠨᠳᠠᠷᠤᠨ ᠤᠨᠠᠭᠠᠳ ᠬᠡᠳᠤ ᠬᠡᠳᠤ ᠦᠡᠭᠬᠦᠷᠢᠪᠡ᠃ ᠶᠠᠩᠬᠢᠷ ᠦᠨᠦ ᠯᠡ ᠶᠠᠭᠤᠮᠠᠨ ᠳᠤ ᠰᠦᠪᠡᠯᠡᠭᠳᠡᠵᠡᠢ᠃ ᠠᠷᠢᠭᠤᠨ ᠤᠯᠠᠭᠠᠨ ᠴᠢᠰᠤ ᠨᠢ ᠠᠰᠬᠠᠵᠤ ᠴᠢᠳᠬᠤᠮ᠎ᠠ ᠤᠷᠤᠰᠬᠤ ᠶᠢ ᠬᠠᠷᠠᠭᠰᠠᠨ ᠡᠮ᠎ᠡ ᠶᠠᠩᠬᠢᠷ ᠡᠪᠡᠳᠬᠦ ᠪᠠᠨ ᠲᠡᠰᠪᠦᠷᠢᠯᠡᠨ ᠰᠢᠷᠬ᠎ᠠ ᠪᠠᠨ ᠲᠤᠯᠢᠶᠠᠪᠠ᠃         ︽ᠭᠤᠸᠠ ᠯᠠ ᠱᠠ ᠯᠠ ᠁︾ ᠬᠡᠵᠤ ᠬᠦᠭᠡᠷᠦᠯᠳᠦᠨ ᠤᠷᠢᠯᠠᠯᠳᠤᠬᠤ ᠲᠠᠭᠤᠨ ᠠᠯᠢ ᠴᠤ ᠤᠳᠠᠭ᠎ᠠ  ᠠᠴᠠ ᠲᠠᠭᠡᠷᠡᠳᠡᠨ ᠭᠤᠵᠤᠭᠤᠷ ᠴᠢᠳᠬᠦᠷ ᠤᠳ ᠶᠠᠩᠬᠢᠷ ᠦᠬᠡᠳᠡ ᠦᠬᠦᠯᠳᠡᠨ ᠭᠦᠶᠦᠯᠳᠦᠪᠡ᠃ ᠠᠵᠠ ᠪᠠᠷ ᠦᠨᠦ ᠶᠠᠭᠤᠮ᠎ᠠ ᠶᠠᠰᠤᠨ ᠳᠤᠨᠢ ᠰᠢᠷᠭᠤᠭᠰᠠᠨ ᠦᠬᠡᠢ ᠪᠤᠯᠬᠤᠷ ᠡᠮ᠎ᠡ ᠶᠠᠩᠬᠢᠷ ᠬᠠᠳᠠᠭᠤᠵᠢᠨ ᠪᠤᠰᠴᠤ ᠲᠠᠬᠢᠨ ᠵᠢᠭᠤᠳᠠᠬᠤ ᠬᠡᠮᠡᠳᠡᠯ᠎ᠡ ︽ᠡ ᠠ ᠁︾ ᠬᠡᠮᠡᠬᠦ ᠡᠷᠢᠶᠠᠨ ᠰᠠᠭᠠᠷᠠᠯ ᠴᠤᠴᠢᠮᠠᠭ ᠲᠠᠭᠤᠨ ᠭᠤᠵᠤᠭᠤᠷ ᠤᠳ ᠤᠨ ᠲᠡᠨᠳᠡ ᠠᠴᠠ ᠠᠬᠢᠨ ᠲᠤᠭᠤᠯᠳᠠᠪᠠ᠃ ᠶᠠᠩᠬᠢᠷ ᠬᠦᠶᠦᠬᠦ ᠬᠡᠰᠡᠨ ᠢᠶᠠᠨ ᠪᠤᠯᠢᠵᠤ ᠰᠡᠷᠡᠮᠵᠢᠳᠡᠶᠢᠬᠡᠨ ᠠᠵᠢᠭᠯᠠᠪᠠᠯ ᠬᠠᠷᠢᠨ ᠢᠯᠡᠯᠳᠡ  ᠳᠠᠭᠠᠨ ᠰᠣᠭᠳᠣᠭᠤᠷᠠᠭᠰᠠᠨ ᠨᠢᠬᠡ ᠴᠢᠳᠬᠦᠷ ᠨᠢ ᠬᠠᠳᠠᠨ ᠠᠴᠠ ᠪᠦᠮᠪᠦᠷᠢᠬᠦ ᠴᠢᠯᠠᠭᠤ ᠰᠢᠭ᠋ ᠯᠡ ᠲᠤᠷᠤᠭᠰᠢ ᠦᠡᠭᠬᠦᠷᠢᠳᠤᠵᠤ ᠪᠠᠶᠢᠭᠰᠠᠨ ᠠᠵᠠᠢ᠃ ᠨᠦᠬᠦᠬᠡ ᠴᠢᠳᠬᠦᠷ ᠤᠳ ᠨᠢ ︽ᠦ ᠠ ᠁︾ ᠬᠡᠯᠴᠡᠨ ᠦᠨᠦᠬᠢ ᠶᠢᠨ  ᠢᠶᠠᠨ ᠵᠦᠭ ᠤᠨᠠᠵᠤ ᠲᠤᠰᠤᠨ ᠭᠦᠶᠦᠯᠳᠦᠪᠡ᠃         ᠬᠦᠬᠡᠷᠦᠬᠦᠢ ᠶᠠᠩᠬᠢᠷ ᠤᠨ ᠮᠢᠬ᠎ᠠ ᠶᠢ ᠢᠳᠡᠬᠦ ᠬᠡᠰᠡᠨ ᠰᠢᠨᠤᠬᠠᠢ ᠴᠢᠳᠬᠦᠷ ᠤᠳ ᠨᠢᠬᠡ ᠶᠢᠨ ᠢᠶᠠᠨ ᠴᠢᠰᠤ  ᠶᠢ ᠦᠵᠡᠭᠡᠳ ᠰᠠᠶ᠋ᠢ ᠰᠠᠨᠠᠭ᠎ᠠ ᠨᠢ ᠠᠮᠠᠷᠠᠵᠤ ᠰᠡᠳᠬᠢᠯ ᠨᠢ ᠮᠤᠬᠤᠵᠠᠢ᠃ ᠡᠮ᠎ᠡ ᠶᠠᠩᠬᠢᠷ ᠬᠦᠨ ᠬᠡᠭᠴᠢ ᠠᠮᠢᠰᠬᠤᠵᠤ ᠠᠪᠤᠭᠠᠳ ᠰᠢᠷᠬ᠎ᠠ ᠲᠠᠢ ᠬᠦᠯ ᠢᠶᠠᠨ ᠴᠢᠷᠦᠭᠰᠡᠬᠡᠷ ᠠᠭᠤᠢ ᠵᠦᠭ ᠢᠶᠠᠨ — ᠦᠷ᠎ᠡ ᠦᠬᠡᠳᠡ ᠪᠠᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠲᠡᠮᠡᠤᠯᠪᠡ ᠁                          
 
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠵᠡᠬᠦᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠤᠯᠠᠭᠠᠠ ᠬᠤᠩ︾ ᠢᠰᠭᠦᠯᠭᠦ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠮᠣᠩᠭᠤᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢᠶᠠᠨ ᠦᠷ᠎ᠡ ᠬᠡᠥᠬᠡᠳ ᠲᠡᠭᠡᠨ ᠦᠪᠯᠡᠭᠦᠯᠦᠨ ᠰᠤᠷᠭᠠᠬᠤ ᠶᠢ ᠨᠡᠶᠢᠭᠡᠮ ᠁
ᠬᠠᠭᠤᠷᠮᠠᠭ ᠠᠷᠢᠭᠢᠨ ᠠᠴᠠ ᠪᠣᠯᠣᠭᠰᠠᠨ ᠬᠤᠣᠷ ᠬᠦᠨᠦᠬᠡᠯ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号