ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠨᠠᠶᠢᠷᠠᠭᠤᠯᠣᠯ ᠬᠤᠶᠠᠷ ᠬᠤᠪᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/6/22
              ᠨᠠᠶᠢᠷᠠᠭᠤᠯᠣᠯ ᠬᠤᠶᠠᠷ ᠬᠤᠪᠢ                                                                 ᠨᠠᠮᠤᠷ ᠤᠨ ᠥᠩᠭᠡ     ᠶᠢᠰᠥᠨ ᠰᠠᠷ᠎ᠠ ᠡ ᠭᠡᠵᠤ  ᠂ ᠥᠷᠥᠮᠡᠨ ᠰᠢᠷᠭᠠᠯ ᠨᠠᠮᠤᠷ ᠤᠨ ᠥᠩᠭᠡ ᠲᠤᠳᠤᠷᠠᠭᠰᠠᠨ ᠮᠥᠴᠡ ᠪᠠᠶᠢᠯᠳᠠᠢ  ︕     ᠥᠷᠯᠥᠭᠡ᠂ ᠠᠵᠢᠯ ᠵᠥᠭ ᠢᠶᠠᠨ ᠶᠠᠭᠠᠷᠠᠭᠰᠠᠨ ᠬᠥᠮᠥᠨ ᠤ ᠤᠷᠤᠰᠬᠠᠯ ᠲᠡᠷᠭᠡᠨ ᠱᠤᠣᠭᠢᠶᠠᠨ ᠠᠴᠠ ᠵᠠᠶᠢᠳᠠᠵᠤ᠂ ᠰᠢᠨ᠎ᠡ ᠬᠤᠳᠠ ᠶᠢᠨ ᠴᠡᠴᠡᠷᠯᠢᠭ ᠢ ᠴᠢᠭᠯᠡᠪᠡ  ᠃ ᠴᠡᠴᠡᠷᠯᠢᠭ᠂ ᠨᠠᠮᠵᠢᠭᠤᠬᠠᠨ ᠪᠠᠶᠢᠯ᠎ᠠ  ᠃      ᠡᠪᠡᠰᠤ ᠮᠤᠳᠤᠨ ᠲᠤᠮᠳᠠᠭᠤᠷ ᠭᠤᠯᠭᠤᠭᠰᠠᠨ ᠤᠰᠤᠨ ᠬᠤᠭᠤᠯᠠᠢ ᠠᠴᠠ ᠰᠥᠷᠴᠢᠨ ᠪᠤᠷᠭᠢᠯᠬᠤ ᠤᠰᠤ᠂ ᠥᠷᠯᠥᠭᠡ ᠶᠢᠨ ᠨᠠᠷᠠᠨ ᠤ ᠰᠢᠵᠢᠷ ᠲᠤᠶᠠᠭ᠎ᠠ ᠲᠠᠢ ᠨᠡᠶᠢᠯᠡᠯᠳᠤᠵᠤ ᠡᠳᠡᠭᠡᠳ ᠤᠨ ᠭᠤᠶᠤ ᠠᠮᠢᠯᠠᠯ ᠤᠨ ᠬᠥᠴᠥᠨ ᠢ ᠭᠠᠶᠢᠬᠠᠭᠤᠯᠵᠤ ᠬᠠᠷᠠᠭᠳᠠᠨ᠎ᠠ᠃ ᠴᠡᠴᠡᠷᠯᠢᠭ ᠤᠨ ᠬᠤᠭ ᠨᠤᠪᠰᠢ ᠴᠡᠪᠡᠷᠯᠡᠭᠰᠡᠨ ︽ᠠᠵᠢᠯᠴᠢ︾ ᠪᠥᠰᠡᠭᠦᠢ ᠡᠷᠳᠡ  ᠶᠢᠨ ᠠᠵᠢᠯ ᠤᠨ ᠢᠶᠠᠨ ᠰᠡᠭᠦᠯ ᠢ ᠰᠢᠪᠳᠤᠷᠴᠤ᠂ ᠱᠥᠭᠦᠷ ᠲᠡᠪᠢᠭᠦᠷ ᠢᠶᠠᠨ ᠠᠴᠢᠵᠤ  ᠴᠠᠬᠢᠯᠭᠠᠨ ᠮᠤᠲ᠋ᠤᠷ ᠢᠶᠠᠨ ᠤᠨᠤᠭᠰᠠᠭᠠᠷ ᠬᠤᠯᠠᠳᠠᠯ᠎ᠠ᠃ ᠪᠢ᠂ ᠥᠩᠭᠡ ᠨᠢ ᠰᠢᠷᠭᠠᠯᠳᠤᠭᠰᠠᠨ ᠴᠦ ᠡᠷᠬᠢᠮᠰᠥᠭ ᠰᠥᠭᠯᠡᠶᠢᠨ ᠵᠢᠭᠳᠡᠷᠡᠭᠰᠡᠨ ᠴᠠᠭᠠᠨ ᠤᠯᠢᠶᠠᠰᠤᠨ ᠤ ᠲᠤᠮᠳᠠᠭᠤᠷ ᠶᠡᠷᠤ ᠪᠠᠶᠢᠭ᠎ᠠ ᠥᠭᠡᠢ ᠨᠠᠮᠵᠤᠣᠷᠬᠠᠨ ᠠᠯᠬᠤᠭ᠎ᠠ ᠪᠠᠷ ᠠᠯᠬᠤᠪᠠ ᠁     ᠲᠡᠶᠢᠮᠤ ᠡ᠂ ᠥᠪᠡᠷ ᠤᠨ ᠪᠡᠶ᠎ᠡ ᠳᠤ ᠪᠠᠨ ᠢᠩᠭᠢᠵᠤ ᠴᠢᠯᠥᠭᠡ ᠥᠭᠭᠦᠭᠡ ᠥᠭᠡᠢ ᠲᠠᠩᠴᠢ ᠤᠳᠠᠵᠠᠢ᠃ ᠲᠡᠭᠡᠬᠦ  ᠳᠤ ᠶᠠᠮᠠᠷ ᠨᠢᠭᠡᠨ ᠲᠠᠯᠳᠠ ᠶᠢᠨ ᠲᠤᠬᠢᠶᠠᠯᠠᠯ  ᠨᠠᠳᠠ ᠳᠤ ᠶᠠᠭᠠᠬᠢᠬᠤ ᠠᠷᠭ᠎ᠠ ᠥᠭᠡᠢ ︽ ᠵᠠᠷᠯᠢᠭ︾ ᠪᠠᠭᠤᠯᠭᠠᠵᠤ᠂ ︽ᠠᠵᠢᠯ ᠠᠴᠠ ᠴᠢᠯᠥᠭᠡᠯᠡᠵᠤ᠂ ᠠᠮᠢ ᠪᠠᠨ ᠰᠠᠬᠢᠬᠤ︾ ᠶᠢᠨ ︽ᠲᠤᠰᠢᠶᠠᠯ︾ ᠬᠠᠶᠢᠷᠠᠯᠠᠭᠰᠠᠨ ᠢ ᠪᠢ ᠲᠤᠷ᠎ᠠ ᠥᠭᠡᠢ ᠴᠦ ᠡᠭᠳᠡᠭᠦᠴᠡᠯ ᠥᠭᠡᠢ ᠪᠠᠷ ᠬᠥᠯᠢᠶᠡᠵᠤ ᠠᠪᠤᠪᠠ᠃ ᠪᠢ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠤᠩ ᠲᠠᠶᠢᠪᠤᠭᠤᠨ ᠢᠶᠠᠷ ᠴᠠᠭ ᠮᠥᠴᠡ  ᠶᠢᠨ ᠠᠨᠢᠷᠭᠦᠢ ᠶᠢ ᠮᠡᠳᠡᠷᠡᠵᠤ᠂ ᠤᠷᠴᠢᠨ ᠪᠠᠶᠢᠭᠠᠯᠢ ᠶᠢᠨ ᠡᠷᠬᠢᠮᠰᠥᠭ ᠭᠤᠶᠤ ᠶᠢ ᠲᠠᠭᠠᠰᠢᠶᠠᠵᠤ ᠲᠠᠶᠢᠪᠤᠭᠤᠬᠠᠨ ᠠᠯᠬᠤᠯᠠᠪᠠ ᠁      ᠴᠡᠴᠡᠷᠯᠢᠭ ᠲᠤ ᠬᠥᠮᠥᠨ ᠲᠡᠶᠢᠮᠤ ᠠᠷᠪᠢᠨ ᠪᠢᠰᠢ᠂ ᠭᠡᠪᠡᠴᠤ ᠰᠡᠳᠬᠢᠯ ᠤᠨᠴᠠ ᠶᠢᠨ ᠲᠠᠭᠠᠳᠠᠢ᠃ ᠪᠢ ᠠᠭᠤᠷ ᠠᠮᠢᠰᠬᠤᠯ ᠤᠨ ᠴᠡᠪᠡᠷ ᠲᠤᠩᠭᠠᠯᠠᠭ ᠢ ᠪᠠᠭ᠋ᠠᠷᠬᠠᠵᠤ᠂ ᠬᠤᠭ ᠲᠤᠭᠤᠰᠤ ᠠᠴᠠ ᠰᠡᠷᠭᠡᠶᠢᠯᠡᠭᠰᠡᠨ ᠠᠮᠠᠪᠴᠢ ᠪᠠᠨ ᠠᠪᠬᠤ  ᠶᠢᠨ ᠵᠠᠭᠤᠷ᠎ᠠ ᠡᠷᠭᠢᠵᠤ ᠬᠠᠷᠠᠬᠤ ᠳᠤ᠂ ᠬᠤᠷᠢᠭᠠᠳ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ ᠥᠪᠴᠢ ᠪᠡᠶ᠎ᠡ ᠳᠤ ᠪᠠᠨ ᠥᠨᠡᠰᠥᠨ ᠥᠩᠭᠡ ᠶᠢᠨ ᠲᠠᠮᠢᠷ ᠤᠨ ᠬᠤᠪᠴᠠᠰᠤ ᠡᠮᠥᠰᠥᠭᠰᠡᠨ‌ᠡᠪᠥᠭᠡᠨ ᠠᠪᠤ  ᠴᠢᠮᠪᠠᠶᠢᠯᠢᠭ ᠠᠯᠬᠤᠵᠤ ᠢᠷᠡᠬᠦ ᠨᠢ ᠬᠠᠷᠠᠭᠳᠠᠪᠠ᠃ ᠤᠨ ᠵᠢᠯ ᠤᠨ ᠡᠯᠡᠭᠡᠯᠳᠡ ᠶᠢ ᠨᠢᠭᠤᠵᠤ ᠴᠢᠳᠠᠭᠰᠠᠨ ᠥᠭᠡᠢ ᠰᠢᠩᠭᠡᠷᠡᠭᠰᠡᠨ ᠬᠡᠳᠥᠨ ᠭᠡᠵᠢᠭᠡ ᠪᠠᠨ ᠡᠪᠯᠢᠭ ᠬᠤᠶᠢᠰᠢ ᠰᠠᠮᠨᠠᠵᠤ  ᠂ ᠥᠳᠡᠯᠥᠭᠡ ᠨᠠᠰᠤᠨ ᠤ ᠨᠠᠮᠪᠠ ᠶᠢ ᠭᠠᠶᠢᠬᠠᠭᠤᠯᠤᠭᠰᠠᠨ ᠡᠨᠡ ᠨᠠᠰᠤᠳᠠᠨ ᠨᠠᠳᠠ ᠳᠤ ᠤᠨᠴᠠ ᠶᠢᠨ ᠠᠩᠬᠠᠷᠤᠯᠳᠠᠢ ᠰᠠᠨᠠᠭᠳᠠᠪᠠ᠃ ᠥᠷᠯᠥᠭᠡ ᠶᠢᠨ ᠬᠤᠭᠤᠯᠠᠨ ᠤ ᠪᠠᠨ ᠲᠠᠷᠠᠭ᠎ᠠ ᠪᠡᠶ᠎ᠡ ᠶᠢᠨ ᠪᠤᠯᠪᠠᠰᠤᠷᠠᠯ ᠬᠢᠵᠤ ᠶᠠᠪᠤᠭ᠎ᠠ  ᠨᠢ ᠲᠤᠳᠤᠷᠬᠠᠢ᠃ ᠲᠠᠨᠢᠯ ᠬᠥᠮᠥᠨ ᠪᠢᠰᠢ ᠶᠢᠨ ᠤᠴᠢᠷ ᠪᠢ ᠮᠡᠨᠳᠤ ᠠᠰᠠᠭᠤᠬᠤ ᠶᠢ ᠲᠠᠳᠠᠭᠠᠯᠵᠠᠵᠤ ᠴᠠᠭᠠᠰᠢ ᠶᠠᠪᠤᠬᠤ  ᠪᠠᠷ ᠢᠶᠠᠨ ᠶᠠᠪᠤᠭᠰᠠᠭᠠᠷ ᠵᠤᠬᠢᠶᠠᠮᠠᠯ ᠨᠠᠭᠤᠷ ᠤᠨ ᠲᠡᠭᠡᠷᠡᠬᠢ ᠬᠥᠭᠦᠷᠭᠡ ᠬᠥᠷᠪᠡ᠃ ᠤᠰᠤ ᠨᠢ ᠲᠠᠳᠠᠷᠠᠭᠰᠠᠨ ᠵᠤᠬᠢᠶᠠᠮᠠᠯ ᠨᠠᠭᠤᠷ ᠤᠷᠮ᠎ᠠ ᠬᠠᠶᠢᠷᠠᠯᠠᠭᠰᠠᠨ ᠥᠭᠡᠢ ᠴᠦ᠂ ᠤᠯᠠᠷᠢᠯ ᠲᠠᠭᠠᠵᠤ ᠤᠷᠤᠰᠢᠨ ᠲᠤᠭᠳᠠᠨᠢᠯ ᠳᠤ ᠪᠠᠨ ᠶᠠᠭᠠᠷᠠᠭᠰᠠᠨ ᠰᠢᠮᠠᠭᠤᠯ ᠰᠢᠪᠡᠵᠢ ᠬᠠᠷᠢᠨ ᠪᠥᠭᠡᠮᠨᠡᠷᠡᠨ ︽ᠪᠤᠵᠢᠭᠢᠨᠠᠯᠳᠤᠨ᠎ᠠ︾᠃ ᠪᠢ ᠲᠡᠨᠳᠡ ᠠᠴᠠ ᠬᠤᠷᠳᠤᠬᠠᠨ ᠵᠠᠶᠢᠯᠠᠬᠤ ᠶᠢ ᠪᠤᠳᠤᠪᠠ᠃ ᠨᠠᠭᠤᠷ ᠤᠨ ᠴᠠᠭᠠᠳᠤ ᠬᠥᠪᠡᠭᠡᠨ ᠳᠤ ᠲᠡᠭᠵᠢᠨ ᠨᠠᠰᠤᠨ ᠤ ᠬᠤᠶᠠᠷ ᠬᠡᠥᠬᠡᠨ ᠭᠠᠷ ᠲᠤ ᠪᠠᠨ ᠰᠤᠯᠠ ᠤᠭᠤᠳᠠ ᠲᠠᠢ ᠶᠠᠭᠤᠮ᠎ᠠ ᠲᠡᠭᠦᠵᠢᠯᠡᠵᠤ ᠵᠤᠭᠤᠭᠳᠠᠵᠤ ᠶᠠᠪᠤᠬᠤ ᠨᠢ ᠠᠩᠬ᠎ᠠ ᠶᠡᠭᠡ ᠰᠤᠷᠭᠠᠭᠤᠯᠢ ᠲᠡᠭᠦᠰᠥᠭᠰᠡᠨ ᠤᠶᠤᠳᠠᠳ ᠪᠠᠶᠢᠬᠤ ᠭᠡᠵᠤ ᠪᠤᠳᠤᠭᠳᠠᠪᠠ᠃ ᠲᠡᠳᠡ ᠢᠷᠡᠬᠦ ᠡᠳᠥᠷ ᠤᠳ ᠤᠨ ᠠᠵᠢᠯ ᠠᠮᠢᠳᠤᠷᠠᠯ ᠢᠶᠠᠨ ᠲᠥᠰᠥᠪᠯᠡᠵᠤ ᠶᠠᠪᠤᠭ᠎ᠠ ᠳ᠋ᠠ︕ ᠡᠶᠢᠮᠤ ᠡᠷᠳᠡ ᠪᠤᠯᠵᠤᠵᠤ ᠠᠭᠤᠯᠵᠠᠭᠰᠠᠨ ᠢᠶᠠᠷ ᠦᠵᠡᠬᠦ ᠳᠤ᠂ ᠥᠴᠥᠭᠡᠳᠥᠷ ᠰᠥᠨᠢᠵᠢᠨ ᠲᠡᠳᠡ ᠡᠨᠡ ᠲᠤᠬᠠᠢ ᠪᠤᠳᠤᠯᠭᠠᠨ ᠳᠤ ᠪᠠᠨ ᠲᠠᠷᠤᠭᠳᠠᠵᠤ ᠨᠤᠶᠢᠷ ᠬᠤᠯᠵᠢᠵᠤ ᠬᠤᠨᠤᠭᠰᠠᠨ ᠨᠢ ᠯᠠᠪᠳᠠᠢ᠃ ᠶᠠᠭᠠᠬᠢᠬᠤᠪ ᠳ᠋ᠠ᠂ ᠤᠳᠤ ᠶᠡᠭᠡ ᠰᠤᠷᠭᠠᠭᠤᠯᠢ ᠲᠡᠭᠦᠰᠥᠭᠡᠳ ᠠᠵᠢᠯ ᠠᠮᠢᠳᠤᠷᠠᠯ ᠤᠨ ᠰᠤᠩᠭᠤᠯᠳᠠ ᠳᠤ ᠪᠠᠨ ᠪᠤᠳᠤᠯ ᠲᠥᠭᠡᠷᠢᠵᠤ ᠶᠠᠪᠤᠭ᠎ᠠ ᠵᠠᠯᠠᠭᠤᠴᠤᠳ ᠮᠢᠨᠢ ᠮᠤᠩ ᠥᠭᠡᠢ ᠰᠢᠥ ᠳ᠋ᠠ  ︕      ᠪᠢ ᠵᠡᠭᠦᠨᠰᠢ ᠰᠠᠯᠠᠭ᠎ᠠ ᠵᠠᠮ ᠡᠯᠭᠦᠭᠡᠳ ᠲᠡᠮᠡᠢ ᠶᠠᠪᠤᠭ᠎ᠠ ᠥᠭᠡᠢ ᠪᠠᠷ᠂ ᠬᠠᠵᠠᠭᠤ ᠪᠠᠷ ᠠᠷᠪᠠᠨ ᠲᠤᠯᠤᠭ᠎ᠠ ᠨᠠᠢᠮᠠᠨ ᠨᠠᠰᠤᠨ ᠤ ᠤᠷᠴᠢᠮ ᠤᠨ ᠬᠥᠤ ᠬᠡᠥᠬᠡᠨ ᠬᠤᠶᠠᠷ ᠵᠥᠷᠢᠵᠤ ᠭᠠᠷᠪᠠ᠃ ᠤᠳᠤ ᠶᠢᠨ ᠵᠠᠯᠠᠭᠤᠰ ᠡᠷᠳᠡ ᠢᠨᠠᠭᠯᠠᠬᠤ ᠨᠢ ᠰᠤᠨᠢᠨ ᠪᠢᠰᠢ ᠶᠢᠨ ᠤᠴᠢᠷ ᠪᠢ ᠲᠡᠳᠥᠢ ᠯᠡ ᠭᠠᠶᠢᠬᠠᠭᠰᠠᠨ ᠥᠭᠡᠢ ᠴᠦ᠂ ᠡᠳᠡ ᠪᠤᠯ ᠥᠨᠳᠥᠷ ᠲᠤᠮᠳᠠᠳᠤ ᠶᠢᠨ ᠰᠤᠷᠤᠭᠴᠢᠳ ᠪᠠᠶᠢᠬᠤ ᠭᠡᠵᠤ ᠪᠠᠳᠤᠳᠠᠢ ᠨᠤᠳᠠᠯᠠᠵᠤ ᠪᠤᠳᠤᠪᠠ  ᠃  ᠭᠡᠬᠦ ᠳᠤ ᠪᠠᠨ ᠲᠡᠳᠡ ᠬᠢᠴᠢᠶᠡᠯ  ᠠᠴᠠ ᠪᠠᠨ ᠲᠤᠳᠠᠭᠠᠭᠰᠠᠨ ᠨᠢ ᠴᠦ ᠯᠠᠪᠳᠠᠢ᠂ ᠲᠡᠳᠡ ᠴᠡᠴᠡᠷᠯᠢᠭ ᠲᠤ ᠨᠠᠭᠠᠳᠬᠤ ᠪᠠᠷ ᠢᠷᠡᠵᠤ ᠪᠠᠶᠢᠭ᠎ᠠ ᠴᠦ ᠪᠢᠰᠢ᠃ ᠬᠡᠥᠬᠡᠨ ᠰᠤᠷᠤᠭᠴᠢ ᠨᠢ ︽ᠠᠪᠤ ᠡᠵᠢ ᠤᠷᠤᠭ ᠰᠠᠯᠤᠭᠰᠠᠨ ᠠᠴᠠ ᠬᠤᠶᠢᠰᠢ᠂ ᠪᠢ ᠶᠡᠷᠤ ᠨᠢ ᠰᠠᠨᠠᠭ᠎ᠠ ᠰᠡᠳᠬᠢᠯ ᠪᠠᠴᠢᠮᠳᠠᠭᠠᠳ ᠁︾ ᠭᠡᠵᠤ ᠶᠠᠷᠢᠬᠤ ᠶᠢ ᠨᠢ ᠬᠠᠵᠠᠭᠤ ᠪᠠᠷ ᠵᠥᠷᠢᠵᠤ ᠭᠠᠷᠬᠤ ᠬᠤᠷᠤᠮ ᠳᠤ ᠰᠤᠨᠤᠰᠴᠤ ᠠᠮᠵᠢᠪᠠ᠃ ᠵᠠᠯᠠᠭᠤ ᠨᠠᠰᠤᠨ ᠤ ᠵᠠᠩ ᠰᠡᠳᠬᠢᠴᠡ ᠶᠢᠨ ᠰᠢᠯᠵᠢᠯᠳᠡ ᠶᠢᠨ ᠴᠢᠬᠤᠯᠠ ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠪᠠᠶᠢᠭ᠎ᠠ ᠡᠳᠡᠭᠡᠷ ᠵᠠᠯᠠᠭᠤᠰ ᠠᠮᠢᠳᠤᠷᠠᠯ ᠤᠨ ᠶᠠᠭᠤ ᠪᠥᠬᠦᠨ ᠳᠤ ᠰᠡᠷᠭᠡᠭ ᠮᠡᠳᠡᠷᠡᠮᠵᠢ ᠲᠠᠢ ᠪᠠᠶᠢᠵᠤ᠂ ᠬᠢᠯᠪᠠᠷᠬᠠᠨ ᠲᠤᠭᠳᠤᠯᠵᠤ᠂ ᠬᠢᠯᠪᠠᠷᠬᠠᠨ ᠰᠢᠷᠬᠠᠳᠠᠵᠤ᠂  ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠤᠭᠳᠠᠪᠤᠷᠢ ᠥᠭᠡᠢ ᠪᠠᠶᠢᠳᠠᠭ ᠤᠨ ᠤᠴᠢᠷ᠂ ᠲᠡᠷᠡ ᠬᠡᠥᠬᠡᠨ ᠠᠮᠢᠳᠤᠷᠠᠯ ᠳᠤ ᠲᠤᠬᠢᠶᠠᠯᠳᠤᠭᠰᠠᠨ ᠪᠤᠬᠢᠨᠢᠳᠥᠯ ᠢᠶᠠᠨ ᠠᠭᠤᠳᠠᠯᠠᠬᠤ ᠭᠠᠵᠠᠷ ᠥᠭᠡᠢ ︽ᠡᠷᠡᠭᠳᠡᠢ ᠨᠠᠶᠢᠵᠠ︾ ᠪᠠᠨ ᠲᠠᠭᠤᠳᠠᠨ ᠠᠪᠴᠢᠷᠠᠵᠤ᠂ ᠶᠠᠷᠢᠵᠤ ᠠᠭᠤᠵᠢᠷᠠᠬᠤ ᠪᠤᠷᠤᠭᠤ ᠪᠢᠰᠢ᠃ ᠪᠢ ᠲᠡᠳᠡᠨ ᠢ ᠪᠤᠷᠤᠭᠤᠳᠬᠠᠬᠤ ᠶᠢ ᠪᠤᠳᠤᠭᠰᠠᠨ ᠥᠭᠡᠢ᠃ ᠬᠠᠷᠢᠨ ᠡᠨᠡ ᠬᠡᠥᠬᠡᠳ ᠤᠨ ᠠᠪᠤ ᠡᠵᠢ ᠶᠢᠨ ᠬᠠᠷᠢᠭᠤᠴᠠᠯᠭ᠎ᠠ ᠥᠭᠡᠢ ᠳᠤ ᠭᠤᠮᠤᠳᠠᠯ ᠡᠪᠥᠷᠯᠡᠪᠡ  ᠃     ᠠᠢ᠂ ᠨᠡᠶᠢᠭᠡᠮ ᠶᠡᠭᠡ ᠶᠢᠨ ᠤᠴᠢᠷ᠂ ᠠᠯᠢ ᠤᠴᠢᠷ ᠲᠤ ᠨᠢ ᠬᠠᠷᠠᠮᠰᠠᠭᠠᠳ ᠬᠥᠢᠴᠡᠭᠦ ᠪᠢᠯᠡ  ︖     ᠪᠢ ᠴᠢᠨᠠᠭᠰᠢ ᠠᠯᠬᠤᠵᠤ᠂ ᠴᠢᠯᠠᠭᠤᠨ ᠬᠠᠪᠳᠠᠰᠤ ᠪᠤᠰᠬᠠᠵᠤ ᠰᠡᠶᠢᠯᠥᠭᠰᠡᠨ ᠲᠤᠮᠤᠬᠠᠨ ᠰᠡᠶᠢᠯᠥᠮᠡᠯ ᠤᠨ ᠲᠡᠷᠭᠡᠳᠡ ᠬᠥᠷᠪᠡ᠃ ᠡᠷᠳᠡᠨ ᠤ ᠬᠠᠭᠤᠴᠢᠨ ᠬᠤᠳᠠ ᠶᠢᠨ ᠥᠵᠡᠮᠵᠢ ᠶᠢ ᠲᠥᠪᠯᠡᠷᠡᠭᠦᠯᠥᠨ ᠲᠤᠰᠬᠠᠬᠤ ᠶᠢ ᠴᠢᠷᠮᠠᠶᠢᠭᠰᠠᠨ ᠡᠨᠡ ᠪᠥᠳᠥᠭᠡᠯ ᠢ ᠥᠵᠡᠬᠦ ᠪᠤᠯᠭᠠᠨ ᠳᠤ ᠠᠳᠠᠯᠢ ᠪᠤᠰᠤ ᠶᠢᠨ ᠲᠥᠷᠥᠭᠳᠡᠯ ᠤᠷᠤᠳᠠᠭ ᠨᠢ ᠰᠤᠨᠢᠨ᠃ ᠡᠨᠡ ᠤᠳᠠᠭ᠎ᠠ ᠤᠨᠴᠠᠯᠠᠨ ᠲᠤᠪᠤᠶᠢᠯᠭᠠᠵᠤ ᠲᠤᠳᠤᠷᠠᠭᠤᠯᠤᠭᠰᠠᠨ ᠭᠠᠯᠠᠭᠤᠳ ᠤᠨ ᠨᠡᠭᠦᠳᠡᠯ ᠨᠢ ᠨᠠᠳᠠ ᠳᠤ ᠤᠨᠴᠠᠭᠠᠢ ᠲᠤᠳᠤᠷᠠᠭᠤᠨ ᠬᠠᠷᠠᠭᠳᠠᠪᠠ᠃ ᠤᠨ ᠵᠢᠯ ᠤᠨ ᠤᠯᠠᠷᠢᠯ ᠰᠤᠯᠢᠭᠳᠠᠯ ᠢ ᠪᠡᠯᠭᠡᠳᠡᠬᠦ ᠭᠡᠰᠡᠨ ᠭᠡᠵᠢ ᠤᠤ ᠭᠡᠵᠤ ᠪᠤᠳᠤᠵᠤ ᠵᠤᠭᠰᠤᠳᠠᠯ᠎ᠠ᠂ ᠴᠠᠭᠠᠨᠠᠬᠢ ᠰᠠᠯᠠᠭ᠎ᠠ ᠵᠠᠮ ᠢᠶᠠᠷ ᠭᠤᠷᠪᠠᠨ ᠪᠤᠭᠤᠷᠤᠯ ᠡᠵᠢ ᠥᠨᠳᠥᠷ ᠲᠠᠭᠤᠨ ᠢᠶᠠᠷ ᠲᠥᠩᠭᠢᠨᠡᠭᠦᠯᠥᠨ ᠵᠤᠭᠤᠭᠳᠠᠭᠰᠠᠭᠠᠷ ᠬᠥᠷᠴᠤ ᠢᠷᠡᠪᠡ᠃ ᠲᠡᠳᠡ ᠨᠠᠷ ᠤᠨ ᠴᠢᠷᠠᠢ ᠳᠤ ᠥᠷᠯᠥᠭᠡ ᠶᠢᠨ ᠨᠠᠷᠠᠨ ᠤ ᠰᠢᠷᠭᠠᠯ ᠲᠤᠶᠠᠭ᠎ᠠ ᠭᠡᠶᠢᠭᠦᠯᠵᠤ ᠬᠠᠷᠠᠭᠳᠠᠭᠰᠠᠨ ᠥᠭᠡᠢ᠂ ᠬᠠᠷᠢᠨ ᠲᠤᠭᠤᠮᠵᠢᠷ ᠥᠭᠡᠢ ᠭᠤᠨᠢᠭ ᠠᠭᠤᠯᠤᠭᠳᠠᠵᠤ ᠪᠠᠶᠢᠭ᠎ᠠ ᠠᠴᠠ ᠬᠡᠨ ᠠᠯᠢᠨ ᠤ ᠬᠢᠨᠢ ᠪᠤᠳᠤᠯ ᠢ ᠲᠠᠭᠠᠮᠠᠭᠯᠠᠵᠤ ᠴᠢᠳᠠᠭᠰᠠᠨ ᠥᠭᠡᠢ ᠴᠦ᠂ ᠥᠷᠯᠥᠭᠡ ᠶᠢᠨ ᠬᠤᠭᠤᠯᠠᠨ ᠤ ᠥᠶ᠎ᠡ ᠳᠤ ᠪᠡᠷᠢᠶᠡᠳ ᠬᠡᠥᠬᠡᠳ ᠲᠤ ᠪᠠᠨ ᠲᠤᠷ᠎ᠠ ᠥᠭᠡᠢ ᠬᠥᠷᠥᠭᠰᠡᠨ ᠮᠠᠭᠠᠳ ᠭᠡᠵᠤ ᠪᠤᠳᠤᠯ᠎ᠠ᠃ ᠮᠢᠨᠤ ᠲᠠᠭᠠᠮᠠᠭ ᠤᠷᠤ ᠥᠭᠡᠢ ᠪᠢᠰᠢ ᠶᠤᠮ᠃ ᠲᠡᠳᠡᠨ ᠤ ᠲᠤᠳᠤᠷᠠᠬᠢ ᠠᠯᠢ ᠨᠢᠭᠡ ᠶᠢᠨ ᠬᠢᠨᠢ ᠶᠠᠷᠢᠭᠰᠠᠨ ︽ᠬᠤᠭᠤᠯᠠ ᠪᠤᠳᠠᠭ᠎ᠠ ᠪᠠᠨ ᠪᠡᠯᠡᠨ ᠪᠤᠯᠭᠠᠴᠢᠬᠠᠬᠤ ᠳᠤ ᠡᠷ᠎ᠡ ᠡᠮ᠎ᠡ ᠬᠤᠶᠠᠭᠤᠯᠠ ᠪᠠᠨ ᠪᠤᠰᠬᠤ ᠥᠭᠡᠢ᠂ ᠢᠳᠡᠭᠡᠳ ᠪᠠᠷᠠᠬᠤᠯᠠᠷ ᠨᠢ ᠠᠶᠠᠭ᠎ᠠ ᠰᠠᠪᠠ ᠶᠢ  ᠨᠢ ᠪᠠᠰᠠ ᠪᠢ ᠤᠭᠢᠶᠠᠳᠠᠭ ᠰᠢᠥ︾ ᠭᠡᠬᠦ ᠥᠭᠡ ᠶᠢ ᠰᠤᠨᠤᠰᠤᠭᠰᠠᠨ ᠲᠠᠢ ᠬᠤᠯᠪᠤᠭ᠎ᠠ ᠲᠠᠢ ᠶᠤᠮ᠃ ᠨᠠᠰᠤᠳᠠᠢ ᠬᠥᠮᠥᠰ ᠡ ᠭᠡᠵᠤ ᠵᠠᠷᠢᠮ ᠳᠤ ᠪᠠᠨ ᠪᠠᠰᠠ ᠰᠤᠨᠢᠨ ᠶᠤᠮ᠃ ᠬᠤᠳᠠ ᠭᠠᠵᠠᠷ ᠠᠵᠢᠯᠯᠠᠵᠤ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ ᠵᠠᠯᠠᠭᠤᠴᠤᠳ ᠠᠯᠢ ᠨᠢ ᠡᠨᠡ ᠤᠯᠠᠨ ᠤ ᠬᠥᠯ ᠥᠢᠮᠡᠭᠡᠨ ᠤ ᠲᠥᠷᠭᠡᠨ ᠠᠶᠢᠵᠠᠮ ᠳᠤ ᠶᠠᠳᠠᠷᠠᠵᠤ ᠪᠠᠶᠢᠭ᠎ᠠ ᠥᠭᠡᠢ ᠪᠤᠢ ︖ ᠲᠡᠩᠬᠡᠭᠡ ᠲᠠᠢ ᠯᠠ ᠪᠤᠯ ᠬᠤᠶᠢᠮᠤᠷ ᠤᠨ ᠪᠤᠷᠬᠠᠨ ᠨᠥᠮᠥᠷᠢ ᠶᠢ ᠨᠢ ᠲᠤᠯᠠᠭᠠᠯᠠᠭᠰᠠᠨ ᠨᠠᠰᠣᠳᠠᠳ ᠨᠢ ᠬᠡᠮᠵᠢᠶᠡᠨ  ᠳᠤ ᠪᠠᠨ ᠲᠡᠮ ᠪᠤᠯᠵᠤ ᠶᠠᠪᠤᠬᠤ ᠳᠤ ᠯᠠ᠂ ᠲᠡᠳᠥᠢ ᠯᠡ ᠥᠨ᠎ᠡ ᠲᠤᠭᠠᠴᠢᠭᠠᠳ ᠶᠠᠭᠠᠬᠢᠬᠤᠪ  ︖ ᠬᠥᠮᠥᠨ ᠭᠡᠵᠤ ᠵᠠᠷᠢᠮ ᠳᠤ ᠪᠠᠨ ᠨᠠᠰᠤᠳᠠᠢ ᠵᠠᠯᠠᠭᠤ ᠶᠢᠨ ᠢᠯᠭᠠᠭ᠎ᠠ ᠥᠭᠡᠢ ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠶᠠᠳᠠᠷᠠᠬᠤ ᠶᠤᠮ ᠡ  ︕     ᠪᠢ ᠵᠠᠯᠭᠠᠯᠳᠤᠭᠰᠠᠨ ᠪᠤᠳᠤᠯ ᠳᠤ ᠪᠠᠨ ᠬᠥᠳᠥᠯᠥᠭᠳᠡᠵᠤ ᠴᠠᠭᠠᠨᠠᠬᠢ ᠰᠡᠷᠢᠭᠦᠴᠡᠬᠦ ᠲᠡᠶᠢᠰᠠ ᠵᠥᠭ ᠤᠶᠢᠷᠠᠳᠬᠤ  ᠳᠤ᠂ ᠲᠡᠨᠳᠡ ᠬᠠᠷᠢᠨ ᠬᠡᠳᠥᠨ ᠡᠪᠥᠭᠡᠨ ᠠᠭᠤᠯᠵᠠᠴᠢᠬᠠᠭᠠᠳ ᠵᠤᠭᠠᠳᠠᠢ ᠵᠤᠭᠤᠭᠳᠠᠵᠤ ᠢᠨᠢᠶᠡᠯᠴᠡᠬᠦ ᠨᠢ ᠰᠠᠶ᠋ᠢ ᠶᠢᠨ ᠡᠮᠡᠭᠡᠳ ᠢ ᠪᠤᠳᠤᠪᠠᠯ ᠤᠪᠤᠭ᠎ᠠ ᠵᠢᠷᠭᠠᠯᠳᠠᠢ ᠰᠠᠨᠠᠭᠳᠠᠪᠠ᠃ ᠲᠡᠳᠡ ᠠᠵᠢᠯ ᠤᠨ ᠠᠮᠠᠷᠠᠯᠳᠠ ᠪᠠᠨ ᠠᠪᠤᠭᠰᠠᠨ ᠬᠥᠮᠥᠰ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠠᠮᠢᠳᠤᠷᠠᠯ ᠤᠷᠤᠰᠢᠨ ᠲᠤᠭᠳᠠᠨᠢᠯ ᠤᠨ ᠲᠤᠯᠭᠠᠮ᠎ᠠ ᠱᠠᠭᠠᠷᠳᠠᠯᠭ᠎ᠠ ᠳᠤ ᠪᠠᠴᠢᠯᠠᠭᠳᠠᠬᠤ ᠥᠭᠡᠢ ᠥᠪᠡᠷ ᠤᠨ ᠢᠶᠠᠨ ᠭᠡᠰᠡᠨ ᠲᠡᠳᠬᠦᠪᠥᠷᠢ ᠪᠤᠶᠤ ᠬᠠᠳᠠᠭᠠᠯᠠᠮᠵᠢ ᠲᠠᠢ ᠬᠥᠮᠥᠰ ᠴᠦ ᠮᠠᠭᠠᠳ᠃  ᠴᠠᠭᠠᠨ᠎ᠠ ᠠᠴᠠ ᠨᠢ ᠪᠠᠰᠠ ᠲᠤᠭᠤᠢ ᠤᠨᠤᠭᠰᠠᠨ ᠬᠡᠳᠥᠨ ᠡᠪᠥᠭᠡᠳ ᠡᠳᠡᠨᠠᠷ ᠢ ᠴᠢᠭᠯᠡᠵᠤ ᠠᠶᠢᠰᠥᠢ ᠨᠢ ᠲᠡᠳᠡ ᠨᠠᠷ ᠤᠨ ᠨᠢᠭᠡ ᠡᠳᠥᠷ ᠤᠨ ᠠᠮᠢᠳᠤᠷᠠᠯ ᠢᠩᠭᠢᠵᠤ ᠵᠤᠭᠠᠳᠠᠢ ᠡᠬᠢᠯᠡᠭᠡ ᠨᠢ ᠲᠠᠮᠵᠢᠭ ᠥᠭᠡᠢ᠃ ᠲᠡᠳᠡᠨ ᠤ ᠪᠡᠶ᠎ᠡ ᠲᠡᠭᠡᠷ᠎ᠡ ᠠᠴᠠ ᠶᠤᠰᠤᠳᠠᠢ ᠬᠤᠳᠠ  ᠶᠢᠨ ᠪᠤᠭᠤᠷᠤᠯᠴᠤᠳ ᠤᠨ ᠨᠡᠶᠢᠳᠡᠯᠢᠭ ᠲᠥᠷᠬᠦ ᠶᠢ ᠤᠯᠵᠤ ᠬᠠᠷᠠᠪᠠ  ᠃     ᠪᠢ ᠴᠠᠭ ᠢᠶᠠᠨ ᠥᠵᠡᠬᠦ ᠳᠤ ᠭᠡᠷ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠴᠠᠭ ᠰᠢᠬᠠᠮ ᠪᠤᠯᠴᠢᠬᠠᠭᠰᠠᠨ ᠲᠤᠯᠠ ᠵᠤᠬᠢᠶᠠᠮᠠᠯ ᠨᠠᠭᠤᠷ ᠢ ᠵᠥᠪ ᠡᠷᠭᠢᠵᠤ ᠭᠡᠷ ᠵᠥᠭ ᠢᠶᠠᠨ ᠪᠤᠴᠠᠵᠤ ᠠᠯᠬᠤᠳᠠᠯ᠎ᠠ᠂ ᠮᠢᠨᠤ ᠲᠡᠷᠭᠡᠳᠡᠭᠦᠷ ᠠᠩᠬ᠎ᠠ ᠠᠭᠤᠯᠵᠠᠭᠰᠠᠨ ᠥᠨᠥᠬᠢ ᠥᠪᠴᠢ ᠪᠡᠶ᠎ᠡ ᠲᠠᠮᠢᠷ ᠤᠨ ᠬᠤᠪᠴᠠᠰᠤᠲᠠᠢ ᠡᠪᠥᠭᠡᠨ ᠴᠦ ᠰᠢᠷᠥᠭᠦᠬᠡᠨ ᠠᠯᠬᠤᠭᠰᠠᠭᠠᠷ ᠪᠤᠴᠠᠬᠤ ᠬᠠᠷᠠᠭᠳᠠᠪᠠ ᠃ ᠲᠡᠷᠡ ᠪᠠᠰᠠ ᠥᠪᠡᠷ ᠤᠨ ᠢᠶᠠᠨ ᠲᠥᠯᠥᠪᠯᠡᠭᠰᠡᠨ ᠠᠵᠢᠯ ᠲᠠᠢ ᠪᠠᠶᠢᠬ᠎ᠠ᠃ ᠲᠡᠷᠡ ᠲᠡᠳᠬᠦᠪᠥᠷᠢ ᠳᠤ ᠪᠠᠨ ᠰᠠᠨᠠᠭ᠎ᠠ ᠬᠠᠩᠬᠤᠯᠤᠭᠤᠨ ᠵᠥᠭᠡᠷ ᠰᠠᠭᠤᠬᠤ ᠶᠢ ᠪᠤᠳᠤᠬᠤ ᠥᠭᠡᠢ᠂ ᠥᠳᠡᠯᠥᠭᠡ ᠨᠠᠰᠤᠨ ᠤ ᠥᠪᠡᠷ ᠤᠨ ᠢᠶᠠᠨ ᠲᠡᠮᠡᠥᠯᠡᠯ ᠲᠠᠢ ᠪᠠᠶᠢᠬᠤ ᠨᠢ ᠨᠠᠳᠠ ᠳᠤ ᠪᠠᠭ᠋ᠠᠷᠬᠠᠬᠤ ᠪᠤᠳᠤᠯ ᠲᠥᠷᠥᠭᠳᠡᠪᠡ᠃ ᠥᠨᠡᠨ ᠳᠤ ᠪᠠᠨ ᠬᠥᠮᠥᠨ ᠥᠳᠡᠯᠥᠨ᠎ᠡ ᠭᠡᠳᠡᠭ ᠴᠦ ᠪᠠᠰᠠ ᠥᠳᠡᠯᠬᠦ ᠶᠢᠨ ᠬᠡᠪ ᠨᠠᠮᠪᠠ ᠪᠠᠶᠢᠳᠠᠭ ᠶᠤᠮ ᠪᠠᠶᠢᠨ᠎ᠠ  ᠃     ᠪᠢ ᠰᠠᠭᠤᠭᠠᠯᠢ ᠲᠤᠭᠤᠷᠢᠭ ᠪᠠ ᠴᠡᠴᠡᠷᠯᠢᠭ ᠤᠨ ᠬᠤᠭᠤᠷᠤᠨᠳᠤᠬᠢ ᠵᠠᠰᠠᠮᠠᠯ ᠵᠠᠮ ᠢ ᠥᠩᠭᠡᠷᠡᠬᠦ ᠳᠤ᠂ ᠵᠠᠮ ᠤᠨ ᠬᠠᠵᠠᠭᠤ ᠳᠤ ᠭᠤᠶᠤ ᠰᠠᠶᠢᠬᠠᠨ ᠵᠢᠵᠢᠭ ᠮᠠᠰᠢᠨ ᠭᠤᠯᠭᠤᠨ ᠵᠤᠭᠰᠤᠵᠤ ᠲᠤᠳᠤᠷ᠎ᠠ ᠠᠴᠠ ᠨᠢ ᠠᠮᠠᠷᠠᠭ ᠬᠤᠶᠠᠷ ᠵᠠᠯᠠᠭᠤ ᠵᠢᠷᠭᠠᠯᠳᠠᠢ ᠮᠥᠰᠢᠶᠡᠭᠰᠡᠭᠡᠷ ᠪᠠᠭᠤᠵᠤ ᠢᠷᠡᠪᠡ᠃ ᠵᠠᠯᠠᠭᠤ ᠨᠠᠰᠤᠨ ᠤ ᠪᠠᠯ ᠰᠢᠭ᠋ ᠡᠨᠡ ᠢᠨᠢᠶᠡᠳᠤ ᠨᠠᠳᠠ ᠳᠤ ᠬᠢᠵᠠᠭᠠᠯᠠᠰᠢ ᠥᠭᠡᠢ ᠲᠤᠭᠳᠤᠯᠤᠯ ᠡᠷᠭᠢᠴᠡᠭᠦᠯᠥᠭᠦᠯᠵᠤ᠂ ᠪᠢ ᠴᠦ ᠥᠪᠡᠷ ᠤᠨ ᠡᠷᠬᠡ ᠥᠭᠡᠢ ᠰᠡᠮᠬᠡᠨ ᠢᠨᠢᠶᠡᠪᠡ᠃ ᠤᠣᠯ ᠳᠤ ᠪᠠᠨ ᠪᠢ ᠢᠩᠬᠢᠵᠤ ᠬᠡᠯᠬᠢᠶᠡᠷᠡᠵᠤ ᠶᠠᠪᠤᠬᠤ ᠬᠤᠣᠰ ᠤᠳ ᠢ ᠥᠵᠡᠭᠡᠳ ᠲᠡᠳᠥᠢ ᠯᠡ ᠲᠠᠭᠠᠰᠢᠶᠠᠳᠠᠭ ᠥᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠤᠳᠤ ᠬᠠᠷᠢᠨ ᠥᠵᠡᠬᠦ ᠪᠤᠯᠭᠠᠨ ︽ᠪᠠᠰᠠ ᠨᠢᠭᠡ ᠭᠤᠣᠨᠢ ᠵᠠᠯᠠᠭᠤ ᠠᠶᠢᠯ ᠪᠤᠯᠬᠤ ᠨᠢ ᠡ︾ ᠭᠡᠵᠤ ᠪᠤᠳᠤᠬᠤ ᠪᠤᠯᠤᠭᠰᠠᠨ ᠨᠢ ᠤᠳᠤ ᠬᠥᠳᠡᠭᠡ ᠨᠤᠳᠤᠭ ᠲᠤ ᠮᠢᠨᠢ ᠭᠤᠣᠨᠢ ᠵᠠᠯᠠᠭᠤᠴᠤᠳ ᠲᠠᠩᠴᠢ ᠤᠯᠠᠳᠠᠭᠰᠠᠨ  ᠤ ᠤᠴᠢᠷ ᠪᠠᠶᠢᠬᠤ ᠡ  ᠃    ᠨᠠᠮᠤᠷ ᠤᠨ ᠥᠩᠭᠡ ᠪᠠᠷ ᠰᠡᠳᠬᠢᠯ  ᠪᠠᠶᠠᠰᠬᠠᠭᠰᠠᠨ ᠮᠢᠨᠤ ᠨᠢᠭᠡ ᠡᠳᠥᠷ ᠤᠨ ᠠᠵᠢᠯ ᠤᠷᠮ᠎ᠠ ᠲᠠᠢ ᠡᠬᠢᠯᠡᠬᠦ ᠨᠢ ᠡ  ᠁                  ᠤᠣᠭᠠᠯ ᠮᠠᠯᠵᠢᠯ ᠠᠮᠢᠳᠣᠷᠠᠯ ᠪᠠᠭ᠎ᠠ ᠨᠠᠰᠤ ᠶᠢ ᠮᠢᠨᠢ ᠪᠠᠶᠠᠨ ᠪᠠᠶᠢᠯᠭᠠᠭᠰᠠᠨ ᠶᠤᠮ    ᠪᠢ ᠮᠠᠯᠵᠢᠬᠤ ᠤᠷᠤᠨ ᠳᠤ ᠲᠥᠷᠥᠵᠤ ᠥᠰᠥᠭᠰᠡᠨ ᠪᠤᠯᠬᠤᠷ ᠮᠠᠯᠵᠢᠬᠤ ᠰᠤᠶᠤᠯ ᠤᠨ ᠥᠨ᠎ᠡ ᠴᠡᠨ᠎ᠡ ᠶᠢ ᠠᠭᠤᠳᠠᠯᠠᠭᠠᠳ ᠪᠠᠷᠠᠬᠤ ᠦᠭᠡᠢ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠨᠢ ᠵᠢᠯ ᠤᠨ ᠲᠥᠷᠪᠡᠨ ᠤᠯᠠᠷᠢᠯ ᠳᠤ ᠰᠡᠯᠡᠭᠦᠤ ᠴᠠᠭ ᠭᠡᠵᠣ ᠪᠠᠶᠢᠳᠠᠭ ᠦᠭᠡᠢ ᠪᠤᠯᠪᠠᠴᠤ᠂ ᠭᠠᠳᠠᠨ᠎ᠠ ᠪᠠᠨ ᠮᠠᠯ ᠲᠠᠢ ᠠᠶᠢᠯ ᠤᠨ ᠠᠳᠠᠯ ᠣᠨᠳᠣᠷᠣᠯᠭ᠎ᠠ ᠬᠥᠮᠥᠨ ᠳᠤ ᠪᠡᠰᠡᠷᠡᠭ ᠲᠥᠷᠥᠭᠳᠡᠯ ᠥᠭᠳᠡᠭ ᠦᠭᠡᠢ ᠪᠢᠯᠡ  ᠃    ᠪᠢᠳᠡ ᠠᠬ᠎ᠠ ᠲᠡᠭᠦᠣ ᠤᠯᠠᠭᠤᠯᠠ ᠪᠠᠶᠢᠵᠤ᠂ ᠪᠠᠭ᠎ᠠ ᠶᠢᠨ ᠥᠶ᠎ᠡ ᠳᠤ ᠮᠠᠨ ᠤ ᠡᠳ᠋ᠯᠡᠵᠤ ᠬᠡᠷᠡᠭᠯᠡᠳᠡᠭ ᠶᠠᠭᠤ ᠪᠥᠬᠦᠨ ᠲᠤᠶᠢᠯ ᠤᠨ ᠪᠤᠷᠤᠭᠵᠢᠭᠤᠨ ᠶᠡᠷᠤᠮᠳᠡᠭ ᠪᠠᠶᠢᠭᠰᠠᠨ ᠴᠦ᠂ ᠠᠵᠢᠯᠴᠢ ᠬᠥᠳᠡᠯᠮᠥᠷᠢᠴᠢ ᠠᠪᠤ ᠡᠵᠢ ᠶᠢᠨ ᠮᠢᠨᠢ ᠲᠤᠳᠤᠮᠳᠠᠯᠭ᠎ᠠ ᠪᠠᠷ ᠡᠳᠥᠷ ᠠᠴᠠ ᠡᠳᠥᠷ ᠥᠷᠡᠵᠢᠨ ᠵᠤᠵᠠᠭᠠᠷᠠᠵᠤ ᠪᠠᠶᠢᠭᠰᠠᠨ ᠬᠠᠯᠠᠭᠤᠨ ᠠᠮᠢᠰᠬᠤᠯᠳᠤ ᠮᠠᠯ ᠰᠦᠷᠦᠭ  ᠨᠢ ᠮᠠᠨ ᠳᠤ ᠦᠶᠦᠭ ᠲᠡᠨᠢᠭᠦᠨ ᠰᠠᠭᠤᠭᠳᠠᠯ ᠦᠭᠴᠦ᠂ ᠰᠡᠳᠬᠢᠯ ᠵᠢᠷᠥᠬᠡ ᠶᠢ ᠮᠢᠨᠢ ᠪᠠᠶᠠᠨ ᠴᠠᠳᠬᠤᠯᠠᠩ ᠪᠠᠶᠢᠯᠭᠠᠵᠤ ᠴᠢᠳᠠᠭᠰᠠᠨ ᠶᠤᠮ᠃ ᠣᠳᠣ ᠡᠷᠭᠢᠴᠡᠭᠦᠯᠵᠤ ᠦᠵᠡᠬᠦ ᠳᠤ ᠮᠠᠯᠴᠢᠨ ᠮᠤᠩᠭᠤᠯ ᠤᠨ ᠰᠡᠳᠬᠢᠯ ᠳᠤ ︽ᠮᠠᠯ ᠤᠨ ᠪᠤᠶᠠᠨ︾ ᠬᠡᠴᠢᠨᠡᠨ ᠥᠨ᠎ᠡ ᠴᠡᠨ᠎ᠡ ᠲᠠᠢ ᠤᠬᠠᠭᠲᠠᠬᠤᠨ ᠠᠵᠢ  ᠃    ᠬᠠᠪᠤᠷ ᠤᠨ ᠬᠠᠳᠠᠭᠤ ᠬᠠᠷᠠᠰᠣ ᠤᠯᠠᠷᠢᠯ ᠳᠤ᠂ ᠬᠠᠰᠢᠶᠠᠨ ᠠᠴᠠ ᠲᠤᠭᠤᠯᠳᠠᠬᠤ ᠲᠥᠯ ᠤᠨ ᠲᠠᠭᠤᠨ ᠨᠢ ᠡᠨᠡ ᠠᠶᠢᠯ ᠤᠨ ᠠᠳᠠᠯ ᠣᠨᠳᠤᠷᠤᠯᠭ᠎ᠠ ᠶᠢᠨ ᠥᠭᠡᠳᠡ ᠬᠡᠶᠢᠮᠥᠷᠢ ᠶᠢ ᠣᠶᠠᠩᠭᠠᠯᠠᠨ ᠴᠢᠪᠬᠠᠳᠠᠵᠣ  ᠂  ᠬᠠᠩᠰᠢ ᠨᠡᠭᠡᠭᠡᠵᠣ ᠬᠠᠭᠳᠠ ᠨᠣᠭᠤᠭᠠᠷᠠᠬᠤ ᠪᠠᠷ᠂ ᠬᠤᠷᠠᠭ᠎ᠠ ᠲᠤᠭᠤᠯ ᠤᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠬᠢᠴᠢᠶᠡᠯ ᠤᠨ ᠨᠣᠮ ᠢᠶᠠᠨ ᠰᠤᠭᠤᠪᠴᠢᠯᠠᠵᠤ ᠭᠥᠶᠥᠳᠡᠭ ᠪᠠᠭ᠎ᠠ ᠨᠠᠰᠤ ᠮᠢᠨᠢ ᠶᠤᠰᠤᠳᠠᠢ ᠠᠭᠤᠯᠭ᠎ᠠ ᠪᠠᠶᠠᠨ ᠪᠠᠶᠢᠭᠰᠠᠨ᠃  ᠪᠢᠳᠡ ᠲᠠᠪᠤ ᠲᠤᠯᠤᠭᠠᠨ ᠨᠠᠰᠤᠨ ᠠᠴᠠ ᠪᠠᠨ ᠡᠬᠢᠯᠡᠵᠤ ᠢᠩᠭᠢᠵᠣ ᠠᠵᠢᠯ ᠳᠤ ᠣᠷᠣᠭᠰᠠᠨ ᠶᠤᠮ ᠳ᠋ᠠ᠃ ᠲᠡᠭᠦᠨ ᠤ ᠲᠠᠷᠠᠭ᠎ᠠ ᠪᠠᠷ ᠢᠮᠠᠭ᠎ᠠ ᠰᠠᠮᠨᠠᠬᠤ᠂ ᠬᠤᠨᠢ ᠬᠠᠶᠢᠴᠢᠯᠠᠬᠤ ᠣᠯᠠᠷᠢᠯ ᠪᠣᠯᠬᠤ ᠳᠤ ᠮᠠᠯᠴᠢᠳ ᠤᠨ ᠡᠯᠪᠡᠭ ᠬᠤᠷᠢᠶᠠᠯᠲᠠ ᠶᠢᠨ ᠴᠠᠭ ᠪᠣᠯᠳᠠᠭ ᠴᠦ᠂ ᠨᠤᠲᠤᠭ ᠤᠨ ᠠᠬᠠᠮᠠᠳ ᠤᠨ ᠶᠠᠷᠢᠶᠠᠨ ᠳᠤ ᠢᠮᠠᠭᠠᠨ ᠨᠣᠣᠰᠣ᠂ ᠬᠤᠨᠢᠨ ᠣᠩᠭᠠᠰᠤᠨ ᠠᠴᠠ ᠪᠠᠨ ᠬᠡᠳᠥᠢ ᠣᠷᠣᠯᠭ᠎ᠠ ᠣᠯᠬᠤ ᠲᠤᠬᠠᠢ ᠶᠠᠷᠢᠶ᠎ᠠ ᠵᠤᠭᠤᠭ ᠰᠣᠨᠣᠷᠳᠠᠳᠠᠭ ᠦᠭᠡᠢ᠂ ᠬᠠᠷᠢᠨ ᠠᠭᠤᠷ ᠠᠮᠢᠰᠬᠤᠯ ᠬᠠᠯᠠᠭᠤᠨ ᠪᠣᠯᠬᠤ ᠠᠴᠠ ᠡᠮᠥᠨ᠎ᠡ ᠬᠤᠨᠢ ᠮᠠᠯ ᠢᠶᠠᠨ ᠬᠤᠷᠳᠤᠬᠠᠨ ᠬᠦᠩᠭᠡᠷᠡᠭᠦᠯᠵᠣ ᠦᠭᠭᠦᠨ᠂ ᠨᠠᠷᠠ ᠬᠤᠷ᠎ᠠ ᠳᠤ ᠬᠤᠷᠳᠤᠬᠠᠨ ᠬᠦᠷᠪᠡᠰᠢᠬᠦ ᠳᠤ ᠨᠢ ᠰᠠᠨᠠᠭᠠᠰᠢᠷᠠᠵᠤ ᠶᠠᠭᠠᠷᠠᠳᠠᠭ᠃ ᠮᠠᠯᠴᠢᠨ ᠮᠣᠩᠭᠤᠯ ᠤᠨ ᠮᠢᠨᠢ ︽ᠮᠠᠯ ᠤᠨ ᠪᠣᠶᠠᠨ︾ ᠢᠶᠠᠨ ᠢᠩᠭᠢᠵᠦ ᠲᠡᠭᠡᠳᠦᠯᠡᠬᠦ ᠤᠬᠠᠮᠰᠠᠷ ᠪᠤᠰᠤᠳ ᠠᠯᠢ ᠴᠦ ᠦᠨᠳᠦᠰᠦᠳᠡᠨ ᠳᠤ ᠪᠠᠶᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠶᠤᠮ᠃ ᠲᠡᠳᠡ ᠮᠠᠯ ᠠᠴᠠ ᠪᠠᠨ ᠣᠯᠬᠤ ᠶᠢ ᠯᠠ ᠪᠤᠳᠤᠳᠠᠭ ᠪᠢᠰᠢ ᠬᠠᠷᠢᠨ ᠮᠠᠯ ᠢ ᠪᠠᠨ ︽ᠠᠮᠢ ᠭᠤᠣᠯ ᠲᠠᠢ ᠶᠤᠮ︾ ᠭᠡᠵᠦ ᠡᠨᠡᠷᠢᠵᠦ ᠬᠠᠶᠢᠷᠠᠯᠠᠳᠠᠭ ᠨᠢ ᠠᠳᠠᠪᠠᠰᠢ ᠭᠠᠶᠢᠬᠠᠮᠰᠢᠭ ᠲᠠᠢ ᠰᠤᠶᠤᠯ ᠤᠨ ᠲᠤᠭᠳᠠᠴᠠ ᠪᠢᠯᠡ  ᠃    ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠶᠠᠪᠣᠭᠤᠯ ᠮᠠᠶᠢᠮᠠᠶᠢᠴᠢᠨ ᠴᠥᠬᠡᠨ ᠪᠠᠶᠢᠵᠣ᠂ ᠨᠣᠣᠰᠣ ᠨᠣᠯᠣᠣᠷ ᠢᠶᠠᠨ ᠰᠢᠭᠤᠳ ᠬᠠᠩᠭᠠᠯᠭ᠎ᠠ ᠶᠢᠨ ᠬᠤᠷᠰᠢᠶᠠᠨ ᠳᠤ ᠥᠭᠳᠡᠭ ᠪᠦᠭᠡᠳ ᠠᠷᠠᠳ ᠨᠢ ᠦᠨᠡᠨᠴᠢ ᠨᠣᠣᠰᠣᠨ ᠳᠤ ᠪᠠᠨ ᠬᠤᠯᠢᠴᠠ ᠬᠢᠳᠡᠭ ᠦᠭᠡᠢ᠂ ᠬᠤᠷᠰᠢᠶ᠎ᠠ ᠨᠢ ᠢᠳᠡᠭᠡᠮᠵᠢᠳᠡᠢ᠂ ᠦᠨ᠎ᠡ ᠬᠠᠩᠰᠢ ᠬᠡᠯᠪᠡᠯᠵᠡᠭᠦᠯᠳᠡᠭ ᠦᠭᠡᠢ ᠯᠠ ᠪᠠᠶᠢᠵᠤ ᠳ᠋ᠠ᠃ ᠠᠪᠤ ᠮᠢᠨᠢ ᠨᠣᠣᠰᠣ ᠨᠣᠯᠣᠣᠷ ᠢᠶᠠᠨ ᠬᠤᠳᠠᠯᠳᠤᠵᠤ ᠬᠤᠷᠰᠢᠶᠠᠨ ᠠᠴᠠ ᠪᠣᠴᠠᠵᠤ ᠢᠷᠡᠬᠦ ᠳᠤ ᠪᠠᠨ ᠬᠡᠥᠬᠡᠳ ᠤᠳ ᠲᠤ ᠪᠠᠨ ᠬᠦᠮᠦᠨ ᠪᠣᠯᠭᠠᠨ ᠳᠤ ᠪᠡᠯᠡᠭ ᠲᠠᠢ ᠪᠠᠶᠢᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠶᠤᠮ᠃ ᠮᠢᠨᠣ ᠣᠢ ᠤᠬᠠᠭᠠᠨ ᠳᠤ ᠤᠳᠣ ᠪᠣᠯᠲᠠᠯ᠎ᠠ ᠲᠣᠳᠣ ᠴᠡᠭᠡᠵᠢᠯᠡᠭᠳᠡᠭᠰᠡᠨ ᠵᠦᠢᠯ ᠪᠣᠯ ᠮᠠᠨ ᠤ ᠬᠦᠮᠦᠨ ᠪᠣᠯᠭᠠᠨ ᠳᠤ ᠨᠢᠵᠡᠭᠡᠳ ᠰᠡᠷᠢᠭᠦᠨ ᠱᠠᠬᠠᠢ᠂ ᠭᠤᠶᠣ ᠬᠠᠨᠵᠢᠶᠠᠷ ᠁  ᠪᠠᠰᠠ ᠮᠢᠶᠠᠨᠪᠣᠣ᠂ ᠴᠢᠱᠦ᠋ᠢ ᠁ ᠵᠡᠷᠭᠡ ᠶᠢ ᠠᠪᠴᠢᠷᠠᠬᠤ ᠨᠢ ᠵᠣᠷᠰᠢᠯ ᠰᠢᠭ᠋ ᠪᠠᠶᠢᠳᠠᠭ ᠶᠤᠮ ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠲᠡᠷᠡᠬᠦ ᠰᠦᠯᠢᠶᠣᠣ ᠰᠡᠷᠢᠭᠦᠨ ᠱᠠᠬᠠᠢ ᠰᠢᠭ᠋ ᠭᠤᠶᠣ ᠱᠠᠬᠠᠢ ᠶᠢ ᠪᠢ ᠣᠳᠣ ᠪᠣᠯᠳᠠᠯ᠎ᠠ ᠣᠯᠵᠣ ᠡᠮᠦᠰᠦᠭᠡ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠨ᠎ᠠ᠃ ᠲᠤᠬᠠᠢ ᠶᠢᠨ ᠦᠶ᠎ᠠ ᠶᠢᠨ ᠴᠢᠱᠦ᠋ᠢ᠂ ᠮᠢᠶᠠᠨᠪᠣᠣ ᠁ ᠣᠳᠣ ᠶᠢᠨ ᠶᠠᠮᠠᠷ ᠴᠦ ᠲᠠᠩᠰᠤᠭ ᠢᠳᠡᠭᠡᠨ ᠠᠴᠠ ᠠᠮᠲᠠ ᠲᠠᠢ ᠪᠠᠶᠢᠵᠣ ᠳ᠋ᠠ  ᠃  ᠮᠠᠯ ᠤᠨ ᠪᠤᠶᠠᠨ ᠳᠤ ᠲᠦᠰᠢᠵᠦ  ᠪᠠᠭ᠎ᠠ ᠨᠠᠰᠤ ᠮᠢᠨᠢ ᠵᠢᠷᠭᠠᠯᠲᠠᠢ  ᠯᠠ ᠪᠠᠶᠢᠭᠰᠠᠨ   ᠶᠤᠮ  ᠃    ᠵᠣᠨ ᠤ ᠵᠢᠷᠭᠤᠭᠠᠨ ᠰᠠᠷ᠎ᠠ ᠪᠣᠯᠬᠤ ᠳᠤ ᠰᠠᠭᠠᠯᠢ ᠰᠦ ᠶᠢᠨ ᠡᠯᠪᠡᠭ ᠬᠤᠷᠢᠶᠠᠯᠲᠠ ᠶᠢᠨ ᠴᠠᠭ ᠡᠬᠢᠯᠡᠨ᠎ᠡ᠃ ᠦᠷ ᠢᠶᠠᠷ ᠪᠣᠰᠴᠣ ᠦᠨᠢᠶᠡᠨ ᠵᠡᠯᠡᠨ ᠳᠤ ᠶᠠᠭᠠᠷᠠᠳᠠᠭ ᠡᠵᠢ ᠮᠢᠨᠢ ᠮᠢᠨᠣ ᠰᠡᠳᠬᠢᠯ ᠳᠤ ᠲᠤᠩ ︽ ᠠᠭᠤᠣ ᠶᠡᠭᠡ︾ ᠪᠤᠯᠵᠣ ᠰᠠᠨᠠᠭᠳᠠᠳᠠᠭ᠃ ᠤᠴᠢᠷ ᠨᠢ ᠡᠷᠲᠡ ᠶᠢᠨ ᠲᠡᠷᠡ ᠠᠮᠲᠠᠲᠣ ᠨᠣᠶᠢᠷ ᠲᠤ ᠬᠡᠨ ᠬᠦᠮᠦᠨ ᠴᠦ ᠬᠠᠷᠠᠮᠴᠢ ᠪᠠᠶᠢᠳᠠᠭ ᠴᠦ ᠡᠵᠢ ᠮᠢᠨᠢ ᠬᠠᠷᠢᠨ ᠲᠡᠷᠡ ᠨᠣᠶᠢᠷ ᠲᠤ ᠠᠮᠲᠠᠰᠢᠵᠣ ᠦᠵᠡᠭᠡ ᠦᠭᠡᠢ᠃ ᠭᠠᠯ ᠢᠶᠠᠨ ᠬᠦᠭᠵᠢᠭᠡᠵᠦ ᠴᠠᠢ ᠪᠠᠨ ᠲᠠᠯᠪᠢᠭᠠᠳ᠂ ᠦᠨᠢᠶᠡᠨ ᠰᠠᠭᠤᠯᠠᠭ᠎ᠠ ᠪᠠᠨ ᠲᠣᠬᠤᠶᠢᠯᠠᠵᠣ ᠡᠭᠦᠳᠡ ᠰᠡᠬᠦᠨ ᠭᠠᠷᠬᠤ ᠁ ᠠᠯᠬᠤᠮ ᠨᠢᠭᠡᠪᠦᠷᠢ ᠨᠢ ᠪᠦᠦᠪᠡᠢ ᠶᠢᠨ ᠲᠠᠭᠤᠣ ᠰᠢᠭ᠋ ᠬᠡᠥᠬᠡᠳ ᠤᠳ ᠢᠶᠠᠨ ᠠᠷᠭᠠᠳᠠᠵᠣ ᠪᠠᠶᠢᠭᠰᠠᠨ ᠴᠦ ᠨᠣᠶᠢᠷ ᠵᠡᠭᠦᠳᠥᠨ ᠤ ᠪᠠᠨ ᠳᠤᠮᠳᠠ ᠲᠡᠷᠡ ᠪᠦᠬᠦ ᠬᠢᠳᠡᠯ ᠢ ᠨᠢ ᠪᠢᠳᠡ ᠰᠣᠨᠣᠷ ᠢᠶᠠᠷ ᠢᠶᠠᠨ ᠲᠦᠰᠦᠪᠯᠡᠵᠣ ᠪᠠᠶᠢᠭᠰᠠᠨ ᠶᠤᠮ᠃ ᠰᠠᠭᠠᠯᠢ ᠶᠢᠨ ᠰᠠᠭᠤᠯᠠᠭᠠᠨ  ᠳᠤ ᠪᠠᠭᠤᠬᠤ ᠰᠦᠨ ᠬᠦᠷᠬᠢᠷ᠎ᠡ ᠶᠢᠨ  ᠠᠶᠢᠵᠠᠮᠲᠤ ᠠᠰᠬᠠᠷᠠᠯ ᠤᠨ ᠳᠤᠮᠳᠠ ᠡᠵᠢ ᠮᠢᠨᠢ ᠡᠳᠦᠷ ᠤᠨ ᠠᠵᠢᠯ ᠢᠶᠠᠨ ᠢᠷᠦᠭᠡᠯ ᠲᠠᠢ ᠡᠬᠢᠯᠡᠳᠡᠭ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠯᠠ ᠠᠭᠠᠭ ᠲᠠᠢ ᠴᠠᠢ ᠶᠢᠨ ᠦᠨᠦᠷ ᠢᠶᠠᠷ ᠬᠠᠮᠠᠷ ᠬᠤᠷᠤᠬᠠᠶᠢᠰᠢᠭᠤᠯᠤᠨ ᠰᠡᠷᠢᠬᠦ ᠳᠤ  ᠂  ᠲᠣᠭᠤᠭᠠᠨ ᠳᠤ ᠲᠠᠷᠭᠢᠯᠤᠭᠰᠠᠨ ᠪᠣᠴᠠᠯᠤᠭᠰᠠᠨ ᠰᠦ᠂ ᠬᠠᠶᠠ ᠪᠠᠰᠠ ᠵᠢᠩᠨᠡᠭᠰᠡᠨ ᠴᠠᠭᠠᠨ ᠭᠤᠯᠢᠷ ᠤᠨ ᠪᠤᠣᠪᠤ ᠁ ᠮᠠᠨ ᠤ ᠡᠮᠥᠨ᠎ᠡ ᠲᠠᠯᠪᠢᠭᠳᠠᠳᠠᠭ᠃ ᠣᠳᠣ ᠪᠣᠳᠣᠬᠤ ᠳᠤ ᠮᠠᠨ ᠤ ᠪᠠᠭ᠎ᠠ ᠨᠠᠰᠤ ᠡᠵᠢ ᠶᠢᠨ ᠭᠠᠷ ᠢᠶᠠᠷ ᠬᠢᠭᠰᠡᠨ ᠶᠠᠮᠠᠷ ᠰᠠᠶᠢᠬᠠᠨ ᠡᠷᠡᠭᠦᠯ ᠢᠳᠡᠭᠡᠨ ᠢᠶᠠᠷ ᠦᠰᠦᠨ ᠲᠣᠷᠨᠢᠭᠰᠠᠨ ᠪᠢᠯᠡ ᠳ᠋ᠠ᠃    ᠦᠳᠡ ᠳᠤ ᠰᠤᠷᠭᠠᠭᠤᠯᠢ ᠲᠠᠷᠬᠠᠭᠠᠳ ᠢᠷᠡᠬᠦ ᠳᠤ ᠦᠯᠦᠰᠦᠭᠰᠡᠨ ᠬᠤᠳᠤᠭᠤᠳᠤ ᠶᠢ ᠠᠶᠢᠷᠠᠭ ᠤᠨ ᠬᠥᠭᠡᠰᠦ ᠱᠠᠭᠢᠭᠤᠯᠤᠭᠰᠠᠨ ᠬᠠᠭᠤᠷᠤᠭᠰᠠᠨ ᠠᠮᠤ ᠪᠣᠶᠤ ᠰᠦ ᠲᠠᠢ ᠬᠤᠳᠬᠤᠭᠰᠠᠨ ᠵᠠᠷᠮ᠎ᠠ ᠪᠠᠷ ᠬᠤᠷᠤᠮ ᠠᠷᠭᠠᠴᠠᠭᠠᠬᠤ ᠨᠢ ᠮᠠᠰᠢ ᠵᠢᠷᠭᠠᠯᠲᠠᠢ ᠪᠠᠶᠢᠭᠰᠠᠨ᠃ ᠡᠳᠦᠷ ᠤᠳᠠᠯ ᠦᠭᠡᠢ ᠡᠭᠦᠳᠡᠨ ᠠᠷᠤ ᠳᠤ ᠡᠯᠭᠦᠭᠰᠡᠨ ᠥᠷᠥᠮ᠎ᠡ ᠰᠠᠪᠠᠯᠠᠭᠰᠠᠨ ᠱᠦᠭᠦᠮᠡᠯ ᠳᠦᠭᠦᠷᠬᠦ ᠳᠤ᠂ ᠡᠵᠢ ᠮᠢᠨᠢ ᠠᠯᠢ ᠨᠢᠭᠡ ᠡᠳᠦᠷ ᠲᠡᠷᠡ ᠱᠦᠭᠦᠮᠡᠯ ᠢ ᠶᠡᠭᠦᠯᠡᠵᠤ ᠡᠷᠴᠢᠭᠡᠵᠤ ᠪᠣᠯᠪᠠᠰᠤᠷᠠᠭᠤᠯᠤᠨ ᠲᠣᠰᠣ ᠰᠢᠷᠭᠠᠭᠠᠳᠠᠭ ᠪᠣᠯ ᠭᠡᠵᠣ ᠪᠠᠶᠠᠷᠯᠠᠨ ᠬᠦᠯᠢᠶᠡᠳᠡᠭ ᠶᠤᠮ᠃ ᠰᠦ ᠰᠠᠭᠠᠯᠢ ᠡᠳ᠋ᠰᠢᠭᠦᠯᠳᠡᠭ ᠵᠤᠨ ᠤ ᠤᠯᠠᠷᠢᠯ ᠳᠤ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠬᠡᠵᠢᠶᠡᠳᠡ ᠲᠡᠨᠢᠭᠦᠨ ᠴᠠᠳᠬᠤᠯᠠᠩ ᠪᠠᠶᠢᠵᠤ᠂ ᠢᠷᠡᠭᠰᠡᠨ ᠭᠡᠶᠢᠴᠢᠨ ᠵᠣᠴᠢᠨ ᠢᠶᠠᠨ ᠶᠠᠭᠠᠬᠢᠵᠤ ᠵᠣᠴᠢᠯᠠᠬᠤ ᠲᠤᠬᠠᠢ ᠶᠡᠷᠤ ᠭᠠᠷ ᠨᠤᠬᠤᠯᠠᠵᠤ ᠭᠠᠴᠢᠭᠳᠠᠬᠤ ᠶᠠᠪᠤᠳᠠᠯ ᠭᠠᠷᠳᠠᠭ ᠦᠭᠡᠢ ᠪᠦᠭᠡᠳ ᠶᠠᠪᠤᠬᠤ ᠳᠤ ᠨᠢ ᠪᠠᠰᠠ ︽ᠴᠠᠭᠠᠨ ᠢᠳᠡᠭᠡᠨ︾ ᠤ ᠪᠡᠯᠡᠭ ᠲᠠᠢ ᠪᠠᠶᠢᠵᠤ᠂ ᠣᠳᠣ  ᠶᠢᠨ ᠰᠢᠭ᠋ ᠴᠠᠭᠠᠨ ᠢᠳᠡᠭᠡᠨ ᠢᠶᠠᠨ ᠥᠨ᠎ᠡ ᠬᠠᠩᠰᠢ ᠲᠦᠰᠦᠪᠯᠡᠳᠡᠭ ᠦᠭᠡᠢ ᠪᠦᠭᠡᠳ᠂ ᠬᠠᠷᠢᠨ ᠲᠡᠭᠡᠪᠡᠯ ︽ᠮᠠᠭᠤ ᠢᠷᠸ᠎ᠠ᠂ ᠮᠠᠯ ᠤᠨ ᠪᠤᠶᠠᠨ ᠭᠤᠮᠤᠳᠠᠨ᠎ᠠ︾ ᠭᠡᠵᠤ ᠶᠠᠷᠢᠳᠠᠭ᠃ ᠶᠠᠮᠠᠷ ᠰᠠᠶᠢᠬᠠᠨ ᠰᠣᠶᠣᠯ ᠠᠷᠠᠨᠰᠢᠨ ᠪᠢᠯᠡ ᠳ᠋ᠧ  ︔    ᠨᠠᠮᠤᠷ ᠤᠨ ᠲᠣᠰᠣᠨ ᠲᠠᠷᠭᠤ ᠶᠢᠨ ᠤᠯᠠᠷᠢᠯ ᠪᠣᠯ ᠮᠠᠯᠴᠢᠳ ᠤᠨ ᠮᠠᠩᠨᠠᠢ ᠲᠡᠨᠢᠢᠬᠦ ᠴᠠᠭ ᠪᠣᠯᠣᠨ᠎ᠠ᠃ ᠬᠠᠮᠤᠭ ᠰᠠᠭᠤᠭᠳᠠᠯ ᠲᠠᠢ ᠨᠢ ᠬᠠᠳᠤᠯᠠᠩ ᠤᠨ ᠨᠠᠮᠤᠷ ᠤᠳ ᠪᠢᠯᠡ᠃ ᠠᠳᠤᠭᠤ ᠮᠠᠯ ᠤᠨ ᠢᠶᠠᠨ ᠡᠪᠦᠯ ᠤᠨ ᠲᠡᠵᠢᠭᠡᠯ ᠢ ᠨᠥᠭᠡᠴᠡᠯᠡᠬᠦ ᠶᠢᠨ ᠲᠦᠯᠦᠭᠡ᠂ ᠨᠠᠮᠤᠷ ᠤᠨ ᠰᠡᠭᠦᠯᠴᠢ ᠪᠠᠷ ᠡᠪᠡᠰᠦᠨ ᠦᠷ᠎ᠡ ᠪᠣᠯᠪᠠᠰᠤᠷᠠᠵᠤ ᠡᠬᠢᠯᠡᠬᠦ ᠪᠠᠷ ᠮᠠᠯᠴᠢᠳ ᠬᠠᠳᠤᠯᠠᠩ ᠳᠤ ᠭᠠᠷᠤᠨ᠎ᠠ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠮᠠᠰᠢᠨᠴᠢᠯᠠᠯᠲᠠ ᠬᠦᠭᠵᠢᠭᠡ ᠦᠭᠡᠢ ᠪᠠᠶᠢᠵᠤ᠂ ᠪᠦᠷ ᠯᠠ ᠰᠠᠨᠳᠤᠤ ᠪᠠᠷ ᠬᠠᠳᠤᠨ᠎ᠠ᠃ ᠠᠪᠤ ᠮᠢᠨᠢ ᠮᠠᠰᠢ ᠤᠷᠠᠨ ᠬᠦᠮᠦᠨ ᠪᠠᠶᠢᠵᠤ᠂ ︽ᠬᠠᠳᠤᠯᠠᠩ ᠤᠨ ᠴᠡᠷᠢᠭ︾ ᠢᠶᠠᠨ ᠵᠡᠪᠰᠡᠭᠯᠡᠬᠦ ᠭᠡᠵᠤ ᠬᠡᠳᠦᠨ ᠡᠳᠦᠷ ᠤᠨ ᠡᠮᠦᠨ᠎ᠡ ᠠᠴᠠ ᠮᠣᠩᠭᠠᠨᠢᠵᠤ ᠡᠬᠢᠯᠡᠳᠡᠭ᠃ ᠲᠡᠭᠡᠭᠡᠳ ᠯᠠ ᠮᠠᠨ ᠤ ᠠᠬ᠎ᠠ ᠡᠭᠡᠴᠢ ᠨᠠᠷ ᠤᠨ ᠬᠦᠮᠦᠨ ᠪᠣᠯᠭᠠᠨ ᠤ ᠬᠦᠴᠦ ᠲᠡᠩᠭᠡᠬᠡ᠂ ᠪᠡᠶ᠎ᠡ ᠪᠠᠶᠢᠳᠠᠯ ᠳᠤ ᠲᠣᠬᠢᠷᠠᠭᠰᠠᠨ ᠰᠠᠨᠳᠤᠤ ᠶᠢ ᠡᠰᠢᠯᠡᠵᠤ ᠬᠠᠳᠠᠵᠤ ᠲᠣᠬᠢᠷᠠᠭᠤᠯᠳᠠᠭ᠃  ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠪᠢ ᠰᠠᠨᠳᠤᠤ ᠪᠠᠷᠢᠬᠤ ᠲᠡᠩᠬᠡᠭᠡ ᠦᠭᠡᠢ ᠴᠦ᠂ ᠬᠠᠳᠤᠭᠰᠠᠨ ᠡᠪᠡᠰᠥ ᠶᠢ ᠨᠢ ᠬᠤᠶᠢᠨ᠎ᠠ ᠠᠴᠠ ᠨᠢ ᠣᠪᠤᠭᠠᠯᠠᠬᠤ ᠡᠭᠦᠷᠭᠡ ᠲᠠᠢ ᠬᠠᠳᠤᠯᠠᠩ ᠳᠤ ᠲᠠᠭᠠᠵᠤ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ᠃ ᠨᠠᠮᠤᠷ ᠤᠨ ᠬᠠᠳᠤᠯᠠᠩ ᠤᠨ ᠬᠠᠮᠤᠭ ᠤᠨ ᠲᠤᠷᠠᠳᠬᠠᠯ ᠲᠠᠢ ᠵᠦᠢᠯᠡᠰ ᠪᠣᠯ ︽ᠬᠠᠳᠤᠯᠠᠩ ᠤᠨ ᠬᠦᠨᠡᠰᠦ︾ ᠪᠣᠯᠣᠨ᠎ᠠ᠃ ᠦᠳᠡ ᠤᠶᠢᠷᠠᠳᠬᠤ ᠳᠤ ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠬᠠᠳᠤᠯᠠᠩ ᠤᠨ ᠲᠠᠯᠠᠪᠠᠢ ᠶᠢ ᠠᠵᠢᠭᠯᠠᠵᠤ᠂  ᠬᠠᠮᠢᠭ᠎ᠠ ᠠᠴᠠ ᠡᠬᠢᠯᠡᠵᠤ ᠤᠲᠤᠭ᠎ᠠ ᠰᠤᠭᠤᠨᠠᠭᠯᠠᠬᠤ ᠶᠢ ᠶᠠᠭᠠᠷᠠᠨ ᠬᠦᠯᠢᠶᠡᠳᠡᠭ᠃ ᠲᠡᠭᠡᠭᠡᠳ ᠯᠠ ᠬᠤᠶᠠᠷ ᠭᠤᠷᠪᠠᠨ ᠠᠶᠢᠯ ᠭᠠᠯ ᠬᠦᠭᠵᠢᠭᠡᠵᠦ ᠡᠬᠢᠯᠡᠭᠰᠡᠭᠡᠷ᠂ ᠪᠢᠳᠡ ᠴᠦ ᠲᠤᠯᠭ᠎ᠠ ᠶᠢᠨ ᠴᠢᠯᠠᠭᠤ ᠲᠣᠬᠢᠷᠠᠭᠤᠯᠵᠤ  ᠂  ᠭᠠᠯ ᠬᠦᠭᠵᠢᠭᠡᠵᠦ ᠴᠠᠢ ᠪᠠᠨ ᠴᠢᠨᠠᠨ᠎ᠠ᠃ ᠬᠠᠳᠤᠯᠠᠩ ᠤᠨ ᠭᠠᠵᠠᠷ ᠢᠳᠡᠬᠦ ᠬᠦᠨᠡᠰᠦ ᠶᠠᠭᠠᠬᠢᠬᠤ ᠳᠤ ᠪᠠᠨ ᠭᠡᠷ ᠲᠤ ᠢᠳᠡᠬᠦ ᠬᠤᠭᠤᠯᠠ ᠠᠴᠠ ᠠᠮᠲᠠ  ᠲᠠᠢ ᠪᠠᠶᠢᠳᠠᠭ ᠲᠤᠬᠠᠢ ᠪᠣᠳᠤᠵᠤ ᠤᠯᠬᠤ ᠦᠭᠡᠢ  ᠃    ᠣᠷᠤᠢ ᠬᠠᠳᠤᠯᠠᠩ ᠠᠴᠠ ᠪᠣᠴᠠᠬᠤ ᠲᠡᠷᠭᠡᠨ ᠴᠣᠪᠤᠭ᠎ᠠ ᠶᠢ ᠳᠠᠭᠠᠵᠤ᠂ ᠪᠢᠳᠡ ᠴᠦ ᠴᠤᠭ ᠪᠤᠴᠠᠨ᠎ᠠ᠃ ᠠᠶᠢᠯ  ᠤᠨ ᠣᠯᠠᠨ ᠲᠠᠢ ᠨᠡᠶᠢᠯᠡᠬᠦ ᠶᠢ ᠶᠠᠭᠠᠷᠠᠳᠠᠭ ᠨᠢ ᠵᠠᠮ ᠲᠠᠭᠤᠰᠤᠨ ᠣᠯᠠᠨ ᠢ ᠢᠨᠢᠶᠡᠯᠭᠡᠳᠡᠭ ᠠᠶᠢᠯ ᠤᠨ ᠠᠪᠠᠭ᠎ᠠ ᠶᠢᠨ ᠶᠦᠮᠦᠷᠯᠢᠭ ᠶᠠᠷᠢᠶ᠎ᠠ ᠶᠢ ᠰᠤᠨᠤᠰᠬᠤ ᠶᠢᠨ ᠲᠦᠯᠦᠭᠡ ᠶᠤᠮ᠃ ᠣᠳᠣ  ᠡᠷᠭᠢᠴᠡᠭᠦᠯᠭᠦ ᠳᠤ ᠶᠠᠮᠠᠷ ᠶᠡᠭᠡ ᠠᠪᠢᠶᠠᠰᠯᠢᠭ ᠬᠥᠮᠥᠨ ᠪᠢᠯᠡ ᠭᠡᠵᠦ ᠪᠣᠳᠤᠬᠤ ᠶᠤᠮ᠃ ᠡᠨᠡ ᠢᠨᠢᠶᠡᠳᠦᠮ ᠱᠤᠭ ᠤᠨ ᠳᠤᠮᠳᠠ ᠬᠠᠳᠤᠯᠠᠩ ᠳᠤ ᠶᠠᠳᠠᠷᠠᠭᠰᠠᠨ ᠬᠦᠮᠦᠰ ᠤᠨ ᠴᠤᠭ ᠵᠣᠯᠢ ᠰᠡᠷᠭᠦᠵᠦ ᠪᠠᠶᠢᠳᠠᠭ᠃ ᠬᠠᠳᠤᠯᠠᠩ ᠤᠨ ᠤᠯᠠᠷᠢᠯ ᠨᠢ ᠮᠦᠨ ᠴᠦ ᠨᠢᠭᠡᠨ ᠡᠯᠪᠡᠭ ᠬᠤᠷᠢᠶᠠᠯᠳᠠ ᠶᠢᠨ ᠤᠯᠠᠷᠢᠯ ᠪᠠᠶᠢᠵᠤ᠂ ᠨᠥᠭᠡᠴᠡᠯᠡᠭᠰᠡᠨ ᠲᠡᠵᠢᠭᠡᠯ ᠡᠪᠡᠰᠦ ᠶᠢᠨ ᠬᠡᠮᠵᠢᠶ᠎ᠡ ᠨᠢ ᠡᠨᠡ ᠠᠶᠢᠯ ᠤᠨ ᠣᠨᠳᠤᠷᠤᠯᠭ᠎ᠠ ᠶᠢᠨ ᠡᠪᠥᠯᠵᠢᠶᠡᠨ ᠤ  ᠪᠠᠲᠤᠯᠠᠭ᠎ᠠ ᠪᠣᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠶᠤᠮ᠃    ᠮᠦᠩᠭᠦᠨ ᠡᠪᠦᠯ ᠤᠨ ᠴᠠᠭ ᠪᠣᠯᠬᠤ ᠳᠤ ᠮᠣᠩᠭᠤᠯ ᠨᠤᠲᠤᠭ ᠲᠤ ᠮᠦᠨ ᠴᠦ ᠨᠢᠭᠡ ᠵᠦᠢᠯ ᠤᠨ ᠲᠠᠩᠰᠤᠭ ᠴᠠᠭ ᠮᠦᠴᠡ ᠬᠦᠷᠴᠤ ᠢᠷᠡᠨ᠎ᠡ᠃ ᠮᠠᠯ ᠠᠬᠤᠢ ᠪᠠᠨ ᠠᠷᠠᠴᠢᠯᠠᠬᠤ ᠶᠢᠨ ᠵᠠᠶᠢᠴᠢᠨ ᠳᠤ ᠴᠠᠭᠠᠯᠠᠬᠤ ᠶᠢᠨ ᠪᠡᠯᠡᠳᠬᠡᠯ ᠬᠢᠬᠦ ᠭᠡᠵᠦ ᠶᠠᠭᠠᠷᠠᠬᠤ ᠶᠢᠨ ᠳᠤᠮᠳᠠ ᠪᠠᠶᠠᠰᠤᠯ ᠬᠦᠯᠢᠶᠡᠳᠡᠭ᠃ ᠪᠠᠭ᠎ᠠ ᠨᠠᠰᠤᠨ ᠤ ᠴᠠᠭᠠᠨ ᠰᠠᠷ᠎ᠠ ᠶᠠᠮᠠᠷ ᠪᠠᠶᠠᠷ ᠵᠢᠷᠭᠠᠯ ᠲᠠᠢ ᠪᠠᠶᠢᠯ᠎ᠠ ᠳ᠋ᠠ᠃ ᠡᠵᠢ ᠮᠢᠨᠢ ᠬᠦᠮᠦᠨ ᠪᠣᠯᠭᠠᠨ ᠢ ᠰᠢᠨ᠎ᠡ ᠱᠠᠬᠠᠢ ᠲᠠᠢ ᠰᠢᠨᠡᠯᠡᠭᠦᠯᠬᠦ ᠭᠡᠵᠦ ᠣᠯᠣᠰᠤ ᠲᠠᠮᠣᠵᠤ᠂ ᠤᠯᠠ ᠰᠢᠷᠢᠨ᠎ᠡ᠃ ᠪᠢᠳᠡ ᠴᠠᠭᠠᠨ ᠰᠠᠷ᠎ᠠ ᠡᠮᠦᠰᠬᠦ ᠰᠢᠨ᠎ᠡ ᠬᠤᠪᠴᠠᠰᠤ ᠪᠠᠨ ᠠᠪᠳᠠᠷ᠎ᠠ ᠳᠤ ᠪᠠᠨ ᠬᠤᠷᠢᠶᠠᠯᠭᠠᠵᠦ᠂ ︽ᠣᠳᠣ ᠤᠳᠠᠬᠤ ᠦᠭᠡᠢ ᠣᠯᠵᠤ ᠡᠮᠦᠰᠦᠨ᠎ᠡ ᠳ᠋ᠠ︾ ᠬᠡᠮᠡᠨ ᠪᠤᠳᠤᠨ ᠪᠣᠳᠣᠨ ᠪᠠᠶᠠᠰᠤᠨ᠎ᠠ᠃ ᠠᠯᠢ ᠪᠦᠬᠦᠢ ᠡᠯᠪᠡᠭ ᠳᠡᠯᠪᠡᠭ ᠢᠳᠡᠭᠡᠨ ᠤᠮᠳᠠᠭᠠᠨ ᠢᠶᠠᠨ ᠢᠷᠡᠭᠰᠡᠨ ᠭᠡᠶᠢᠴᠢᠨ ᠵᠣᠴᠢᠨ ᠳᠤ ᠪᠠᠨ ᠥᠩᠭᠡ ᠲᠠᠢ ᠲᠠᠯ᠎ᠠ ᠲᠠᠢ ᠭᠠᠷᠭᠠᠬᠤ ᠭᠡᠵᠦ ᠨᠦᠭᠡᠴᠡᠯᠡᠵᠦ ᠲᠠᠯᠪᠢᠬᠤ ᠶᠠᠮᠠᠷ ᠰᠠᠶᠢᠬᠠᠨ ᠵᠤᠴᠢᠨᠰᠠᠭ ᠵᠠᠩᠰᠢᠯ ᠪᠢᠯᠡ᠃ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠪᠣᠯᠬᠤ ᠳᠤ᠂ ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠰᠠᠳᠤᠨ ᠲᠦᠷᠦᠯ ᠢᠶᠠᠨ ᠵᠠᠪᠠᠯ ᠡᠷᠭᠢᠵᠦ ᠦᠵᠡᠬᠦ ᠰᠠᠶᠢᠬᠠᠨ ᠵᠠᠩᠰᠢᠯ ᠲᠠᠢ᠃ ᠲᠡᠭᠡᠬᠦ ᠳᠤ ᠮᠤᠩᠭᠤᠯᠴᠤᠳ ᠮᠢᠨᠢ ᠦᠨᠳᠦᠷ ᠨᠠᠰᠤ ᠲᠠᠢ ᠠᠬᠠᠮᠠᠳ ᠪᠤᠭᠤᠷᠤᠯ ᠢᠶᠠᠨ᠂ ᠢᠯᠠᠩᠭᠤᠶ᠎ᠠ ᠵᠢᠯ ᠤᠨ ᠪᠠᠶᠠᠷ᠂ ᠨᠠᠰᠤᠨ ᠪᠠᠶᠠᠷ ᠪᠣᠯᠬᠤ ᠳᠤ ᠨᠢ ᠪᠦᠷ ᠴᠦ ᠶᠡᠭᠡ ᠬᠥᠯ ᠬᠦᠭᠡᠷᠴᠡᠭ ᠪᠣᠯᠳᠠᠭ᠃ ᠢᠩᠭᠢᠭᠡᠳ ᠯᠠ ᠬᠠᠮᠤᠭ ᠲᠡᠭᠡᠳᠦ ᠪᠡᠯᠡᠭ ︽ᠬᠠᠯᠠᠭᠤᠨ ᠬᠤᠰᠢᠭᠤᠳᠤ︾ ᠳᠤ ᠪᠠᠨ ᠦᠯᠵᠡᠢ ᠪᠡᠯᠭᠡ ᠶᠢᠨ ᠤᠯᠠᠭᠠᠨ ᠵᠠᠩᠭᠢᠶ᠎ᠠ ᠵᠠᠩᠭᠢᠳᠴᠤ᠂ ᠪᠠᠶᠠᠷ ᠤᠨ ᠪᠡᠯᠡᠭ ᠪᠣᠯᠭᠠᠳᠠᠭ᠃ ᠣᠳᠣ ᠡᠷᠭᠢᠴᠡᠭᠦᠯᠵᠦ ᠦᠵᠡᠬᠦ ᠳᠤ ᠰᠠᠳᠤᠨ ᠲᠦᠷᠦᠯ ᠤᠨ ᠬᠠᠷᠢᠯᠴᠠᠭᠠᠨ ᠤ ᠰᠡᠳᠬᠢᠯ ᠮᠠᠰᠢ ᠨᠠᠨᠳᠢᠨ ᠦᠨᠡᠨᠴᠢ ᠪᠠᠶᠢᠵᠤ᠂ ᠲᠡᠷᠡ ᠰᠠᠶᠢᠬᠠᠨ ᠮᠤᠩᠭᠤᠯ ᠰᠣᠶᠣᠯ ᠮᠠᠰᠢ ᠦᠨᠡᠲᠡᠢ ᠪᠠᠶᠢᠵᠠᠢ᠃ ᠣᠳᠣ ᠶᠢᠨ ᠰᠢᠭ᠋ ᠨᠠᠰᠤᠲᠠᠨ ᠪᠤᠭᠤᠷᠤᠯᠴᠤᠳ ᠢᠶᠠᠷ ᠢᠶᠠᠨ ︽ᠠᠷᠠᠯᠵᠢᠶ᠎ᠠ︾ ᠬᠢᠬᠦ ᠤᠬᠠᠮᠰᠠᠷ ᠁  ᠣᠷᠤᠰᠢᠳᠠᠭ ᠦᠭᠡᠢ ᠯᠠ ᠳ᠋ᠠ  ᠃       ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠥᠷᠯᠦᠭᠡ ᠪᠣᠯᠬᠤ ᠳᠤ᠂ ᠠᠪᠤ ᠮᠢᠨᠢ ᠮᠠᠨᠤᠰ ᠢ ᠡᠩ ᠤᠨ ᠡᠳᠦᠷ ᠠᠴᠠ ᠨᠡᠩ ᠡᠷᠲᠡ ᠪᠣᠰᠬᠤ ᠶᠢ ᠱᠠᠭᠠᠷᠳᠠᠳᠠᠭ᠃ ᠠᠶᠢᠯ ᠠᠴᠠ ᠡᠷᠲᠡ᠂ ᠬᠦᠮᠦᠨ ᠠᠴᠠ ᠡᠷᠲᠡ ᠪᠤᠰᠴᠣ᠂ ᠠᠭᠠᠷ ᠲᠡᠭᠷᠢ ᠳᠤ ᠭᠢᠯᠠᠯᠵᠠᠬᠤ ᠣᠳᠣᠳ ᠤᠨ ᠭᠢᠯᠪᠠᠭ᠎ᠠ ᠰᠢᠩᠭᠡᠷᠡᠭᠡ ᠦᠭᠡᠢ ᠪᠠᠶᠢᠬᠤ ᠳᠤ᠂ ᠠᠯᠤᠰ ᠤᠨ ᠠᠭᠤᠯᠠᠰ ᠤᠨ ᠪᠠᠷ᠎ᠠ ᠲᠣᠳᠤᠷᠠᠭ᠎ᠠ ᠦᠭᠡᠢ ᠪᠠᠶᠢᠬᠤ ᠳᠤ᠂ ᠦᠨᠡᠭᠡᠨ ᠬᠠᠷᠠᠩᠭᠤᠢ ᠪᠠᠷ ᠲᠡᠭᠷᠢ ᠳᠤ ᠮᠦᠷᠭᠦᠵᠦ᠂  ᠤᠭᠳᠤᠵᠤ ᠠᠪᠤᠭᠰᠠᠨ ᠰᠢᠨ᠎ᠡ ᠣᠨ ᠳᠤ ᠪᠠᠨ ᠬᠦᠮᠦᠨ ᠪᠦᠬᠦᠨ ᠥᠭᠡᠳᠡ ᠡᠰᠡᠷᠡᠭ ᠦᠯᠵᠡᠢ ᠬᠡᠶᠢᠮᠦᠷᠢ ᠲᠠᠢ ᠪᠠᠶᠢᠬᠤ ᠶᠢ ᠬᠦᠰᠡᠨ ᠲᠠᠭᠠᠳᠬᠠᠳᠠᠭ᠃ ᠠᠪᠤ ᠮᠢᠨᠢ ᠶᠡᠷᠤ ᠠᠴᠠ ᠡᠩ ᠤᠨ ᠴᠠᠭ ᠲᠤ ᠴᠦ ᠡᠳᠦᠷ ᠤᠨ ᠠᠵᠢᠯ ᠣᠷᠤᠶᠢᠳᠠᠵᠤ ᠡᠬᠢᠯᠡᠬᠦ ᠶᠢ ᠵᠢᠭᠰᠢᠵᠦ᠂ ᠦᠳᠡ ᠪᠣᠯᠳᠠᠯ᠎ᠠ ᠤᠨᠳᠠᠬᠤ ᠶᠢ ᠨᠡᠩ ᠴᠡᠭᠡᠷᠯᠡᠵᠦ᠂ ᠠᠳᠤᠭᠤ ᠮᠠᠯ ᠢᠶᠠᠨ ᠬᠡᠪᠲᠡᠷᠢ ᠳᠤ ᠨᠢ ᠬᠤᠷᠢᠬᠤ ᠶᠢ ᠦᠵᠡᠨ ᠶᠠᠳᠠᠳᠠᠭ᠃ ᠢᠯᠠᠩᠭᠤᠶ᠎ᠠ ᠰᠢᠨ᠎ᠡ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠳᠤ᠂ ᠠᠶᠢᠯ ᠠᠴᠠ ᠤᠷᠢᠳᠠᠵᠤ ᠭᠠᠯ ᠢᠶᠠᠨ ᠬᠥᠭᠵᠢᠭᠡᠨ᠂ ᠴᠠᠢ ᠪᠠᠨ ᠴᠢᠨᠠᠵᠤ᠂ ᠲᠡᠭᠡᠳᠦᠰ ᠲᠤ ᠪᠠᠨ ᠮᠦᠷᠭᠦᠯ ᠬᠢᠬᠦ ᠶᠢ ᠣᠨᠴᠠ ᠴᠢᠬᠤᠯᠠᠴᠢᠯᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠠᠳᠤᠭᠤ ᠮᠠᠯ ᠴᠦ ᠠᠳᠠᠯᠢᠬᠠᠨ ᠰᠢᠨᠡᠯᠡᠨ᠎ᠡ ᠰᠢᠥ ᠬᠡᠮᠡᠨ ᠡᠩ ᠤᠨ ᠡᠳᠦᠷ ᠠᠴᠠ ᠪᠠᠨ ᠢᠯᠡᠭᠦᠤ ᠰᠠᠶᠢᠬᠠᠨ ᠳᠣᠲᠤᠮᠳᠠᠳᠠᠭ᠃ ᠠᠪᠤ ᠮᠢᠨᠢ ᠨᠠᠰᠤᠨ ᠡᠴᠦᠰᠯᠡᠳᠡᠯ᠎ᠡ ᠪᠠᠨ ᠡᠨᠡ ᠶᠣᠰᠤ ᠵᠠᠩᠰᠢᠯ ᠢᠶᠠᠷ ᠢᠶᠠᠨ ᠮᠠᠨᠤᠰ ᠢ ᠱᠠᠭᠠᠷᠳᠠᠵᠤ᠂ ᠦᠪᠡᠷ ᠤᠨ ᠮᠣᠩᠭᠤᠯ ᠰᠡᠳᠬᠢᠯ ᠤᠨ ᠢᠲᠡᠭᠡᠯ ᠰᠦᠰᠦᠭ ᠢᠶᠠᠷ ᠢᠶᠠᠨ ᠬᠡᠥᠬᠡᠳ ᠠᠴᠢ ᠨᠠᠷ ᠢᠶᠠᠨ ᠰᠤᠷᠭᠠᠨ ᠬᠦᠮᠦᠵᠢᠭᠦᠯᠦᠭᠰᠡᠨ ᠪᠢᠯᠡ᠃ ᠶᠠᠮᠠᠷ  ᠶᠡᠭᠡ ᠪᠠᠶᠠᠨ ᠥᠪ ᠰᠤᠷᠭᠠᠯ ᠪᠢᠯᠡ︖ ᠣᠳᠣ ᠡᠷᠭᠢᠴᠡᠭᠦᠯᠦᠨ ᠪᠣᠳᠤᠬᠤ ᠳᠤ  ᠪᠠᠭ᠎ᠠ ᠨᠠᠰᠤ ᠮᠢᠨᠢ ᠲᠤᠷᠠᠰᠤᠯ ᠳᠤ ᠬᠤᠴᠤᠷᠴᠠᠢ᠃ ᠮᠠᠨ ᠤ ᠪᠠᠭ᠎ᠠ ᠨᠠᠰᠤ ᠮᠠᠰᠢ ︽ ᠪᠠᠶᠠᠨ︾ ᠪᠠᠶᠢᠭᠰᠠᠨ  ᠃    ᠨᠤᠲᠤᠭ ᠮᠢᠨᠢ ᠨᠣᠭᠤᠭᠠᠨ ᠢᠶᠠᠷ ᠢᠶᠠᠨ ᠪᠠᠶᠢᠬᠤ ᠳᠤ᠂ ᠠᠳᠤᠭᠤ ᠮᠠᠯ ᠮᠢᠨᠢ ᠰᠦᠷᠦᠭ ᠢᠶᠠᠷ ᠢᠶᠠᠨ ᠪᠠᠶᠢᠬᠤ ᠳᠤ᠂ ᠪᠢᠳᠡ ︽ᠪᠠᠶᠠᠨ︾  ᠪᠠᠶᠢᠭᠰᠠᠨ᠂ ᠪᠢᠳᠡᠨ ᠤ ᠰᠡᠳᠬᠢᠯ ᠪᠠᠶᠠᠨ ᠪᠠᠶᠢᠭᠰᠠᠨ᠂ ᠪᠢᠳᠡᠨ ᠤ ᠰᠣᠶᠣᠯ ᠪᠠᠶᠠᠨ ᠪᠠᠶᠢᠭᠰᠠᠨ  ᠡ  ᠃  
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠤᠯᠠᠭᠠᠠ ᠬᠤᠩ︾ ᠢᠰᠭᠦᠯᠭᠦ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠮᠣᠩᠭᠤᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢᠶᠠᠨ ᠦᠷ᠎ᠡ ᠬᠡᠥᠬᠡᠳ ᠲᠡᠭᠡᠨ ᠦᠪᠯᠡᠭᠦᠯᠦᠨ ᠰᠤᠷᠭᠠᠬᠤ ᠶᠢ ᠨᠡᠶᠢᠭᠡᠮ ᠁
ᠬᠠᠭᠤᠷᠮᠠᠭ ᠠᠷᠢᠭᠢᠨ ᠠᠴᠠ ᠪᠣᠯᠣᠭᠰᠠᠨ ᠬᠤᠣᠷ ᠬᠦᠨᠦᠬᠡᠯ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号