ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠦᠯᠢᠭᠡᠷ ᠤᠨ ᠡᠪᠦᠭᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/6/22
             ᠦᠯᠢᠭᠡᠷ ᠤᠨ ᠡᠪᠦᠭᠡ    ᠬᠠᠩᠰᠢ ᠪᠣᠯᠬᠤ ᠪᠠᠷ ᠯᠡ ᠬᠤᠳᠠ ᠵᠡᠭᠡᠯᠢ ᠬᠤᠯᠠ ᠭᠠᠵᠠᠷ ᠠᠯᠪᠠ ᠠᠵᠢᠯ ᠢᠶᠠᠷ ᠪᠠᠶᠢᠭ᠎ᠠ ᠮᠠᠨᠠᠶᠢᠬᠢᠨ ᠤ ᠮᠣᠩᠭᠤᠯᠴᠣᠳ ᠤᠨ ᠣᠯᠠᠩᠬᠢ ᠨᠢ ᠨᠣᠳᠤᠭ ᠵᠦᠭ ᠢᠶᠠᠨ ᠰᠠᠯᠬᠢ ᠠᠪᠴᠣ ᠬᠠᠷᠢᠵᠣ ᠨᠢᠭᠡ ᠦᠵᠡᠬᠦ᠂ ᠠᠭᠤᠯᠵᠠᠵᠣ ᠨᠢᠭᠡ ᠣᠴᠠᠷᠠᠬᠤ ᠶᠣᠮᠰᠠᠨ ᠬᠡᠮᠡᠬᠦ ᠰᠡᠳᠬᠢᠯᠭᠡ ᠪᠠᠷ ᠣᠪᠣᠯᠵᠠᠭᠠᠳ ᠡᠬᠢᠯᠡᠳᠡᠭ ᠪᠢᠯᠡ︕ ᠡᠨᠡ ᠵᠢᠯ ᠤᠨ ᠬᠠᠩᠰᠢ ᠪᠠᠷ ᠪᠢ ᠴᠦ ᠵᠣᠷᠰᠢᠯ ᠶᠣᠰᠣᠭᠠᠷ ᠲᠣᠭᠳᠠᠨ ᠶᠠᠳᠠᠨ ᠬᠦᠭᠰᠡᠵᠦ᠂ ᠪᠠᠶᠢᠭᠤᠯᠣᠯᠭ᠎ᠠ ᠠᠴᠠ ᠪᠠᠨ  ᠬᠤᠶᠠᠷ ᠬᠤᠨᠤᠭ ᠤᠨ ᠴᠢᠯᠦᠭᠡ ᠠᠪᠴᠣ ᠨᠣᠳᠤᠭ ᠲᠤ ᠪᠠᠨ ᠬᠠᠷᠢᠵᠦ ᠬᠠᠭᠤᠴᠢᠳ ᠲᠤ ᠪᠠᠨ ᠲᠣᠶ᠋ᠢᠩ ᠲᠦᠯᠡᠰᠢ ᠰᠢᠳᠠᠭᠠᠨ ᠲᠡᠭᠡᠳᠦᠰ ᠤᠨ   ᠢᠶᠠᠨ ᠭᠡᠭᠡᠨ ᠰᠦᠨᠡᠰᠦᠨ ᠳᠤ ᠠᠯᠢᠪᠠ ᠪᠦᠬᠦᠨ ᠢᠶᠠᠨ ᠲᠠᠭᠠᠳᠬᠠᠨ ᠵᠠᠯᠪᠠᠷᠢᠵᠤ ᠡᠯᠪᠡᠷᠢᠯ ᠰᠦᠵᠢᠭ ᠢᠶᠠᠨ ᠭᠦᠢᠴᠡᠳᠬᠡᠬᠦ ᠂ ᠨᠠᠶᠠ ᠶᠢᠨ ᠲᠠᠪᠠᠭ᠎ᠠ ᠲᠦᠭᠦᠭᠰᠡᠨ ᠨᠠᠰᠣᠳᠠᠨ ᠪᠣᠭᠤᠷᠣᠯ ᠡᠵᠢ ᠪᠠᠨ ᠴᠦ ᠡᠷᠭᠢᠬᠦ ᠴᠦ ᠰᠢᠭ᠂ ᠨᠠᠷᠭᠢᠵᠦ ᠲᠠᠰᠴᠣ ᠦᠰᠦᠭᠰᠡᠨ ᠲᠡᠭᠦᠦ ᠨᠠᠷ   ᠢᠶᠠᠨ  ᠴᠦ ᠦᠵᠡᠵᠦ ᠬᠠᠷᠠᠬᠤ  ᠬᠡᠮᠡᠨ ᠮᠣᠷᠳᠠᠭᠰᠠᠨ ᠶᠤᠮ ᠰᠠᠨ︕    ᠡᠨᠡ ᠵᠢᠯ ᠤᠨ ᠬᠠᠩᠰᠢ ᠭᠡᠵᠦ ᠰᠡᠳᠬᠢᠯ ᠳᠤ ᠲᠠᠭᠠᠳᠠᠢ ᠶᠢ ᠶᠠᠭᠠᠬᠢᠨ᠎ᠠ᠂ ᠲᠦᠷᠦᠭᠦᠦ ᠰᠦᠨᠢ ᠠᠴᠠ ᠨᠢ ᠡᠬᠢᠯᠡᠭᠡᠳ ᠯᠡ ᠪᠣᠷᠣᠭᠠᠨ ᠴᠠᠰᠣ ᠪᠣᠷᠠᠵᠣ ᠰᠢᠪᠡᠷᠡᠨ ᠠᠭᠤᠷ ᠠᠮᠢᠰᠬᠤᠯ ᠴᠡᠪᠡᠷᠰᠢᠭᠡᠳ ᠪᠣᠷ ᠪᠣᠷ ᠪᠣᠷᠣᠭᠠᠨ ᠲᠠᠢ ᠮᠡᠷ ᠮᠡᠷ ᠰᠠᠯᠬᠢ ᠲᠠᠢ ᠪᠣᠷᠬᠠᠨ ᠤ ᠣᠷᠣᠨ ᠢ ᠰᠠᠨᠠᠭᠳᠠᠭᠤᠯᠣᠨᠠᠮ ᠡ︕ ᠬᠤᠳᠠ ᠵᠡᠭᠡᠯᠢ ᠶᠢᠨ ᠪᠣᠬᠢᠷ ᠣᠳᠤᠭ᠎ᠠ᠂ ᠲᠡᠮᠠᠬᠢ ᠰᠡᠫᠢᠷᠲ ᠤᠨ ᠨᠢᠯᠣᠭᠤᠨ ᠬᠤᠣᠷ ᠲᠤ ᠣᠯᠠᠩᠳᠠᠵᠣ ᠣᠰᠣᠳᠣᠭᠰᠠᠨ ᠨᠢᠳᠦ ᠪᠠᠨ ᠬᠠᠪᠣᠷ ᠤᠨ ᠵᠢᠪᠠᠷ ᠢᠶᠠᠷ ᠵᠦᠯᠭᠦᠭᠦᠯᠵᠦ ᠵᠢᠯᠠᠭ᠎ᠠ ᠦᠭᠰᠦᠨ ᠠᠯᠬᠤᠬᠤ ᠳᠤ ᠴᠡᠭᠡᠵᠢ ᠣᠩᠭᠤᠶᠢᠨ ᠨᠢᠳᠦ ᠭᠡᠷᠡᠯᠳᠦᠭᠡᠳ ᠰᠢᠨ᠎ᠡ ᠬᠠᠪᠣᠷ ᠪᠡᠶᠡᠨ  ᠳᠤ ᠣᠷᠣᠰᠬᠤ ᠮᠡᠳᠦ ᠴᠤᠭ ᠵᠠᠯᠢ ᠰᠡᠷᠭᠦᠬᠦ ᠶᠢ ᠶᠠᠭᠤᠨ ᠦᠭᠦᠯᠡᠨᠡᠮ︕ ᠵᠣᠯᠠᠭ ᠲᠠᠪᠠᠭᠰᠠᠨ ᠰᠡᠪᠰᠡᠭᠡᠷ ᠴᠠᠰᠣ ᠶᠢ ᠭᠢᠰᠬᠢᠯᠡᠨ ᠡᠪᠦᠭᠡ ᠡᠮᠡᠭᠡ ᠶᠢᠨ ᠢᠶᠠᠨ ᠬᠠᠭᠤᠴᠢ ᠣᠶᠢᠷᠠᠳᠬᠤ ᠳᠤ ᠦᠷᠯᠦᠭᠡ ᠡᠷᠳᠡ ᠶᠢᠨ ᠵᠦᠭᠡᠯᠡᠨ ᠨᠠᠷᠠ ᠠᠭᠤᠯᠠ  ᠲᠠᠭᠠᠨ ᠡᠮᠵᠢᠶᠡᠷᠯᠡᠵᠦ ᠬᠦᠳᠦᠯ ᠬᠢᠷ᠎ᠡ ᠶᠢᠨ ᠡᠩᠭᠡᠷ ᠲᠣᠪᠴᠢ ᠦᠭᠡᠢ ᠠᠯᠳᠠᠨ ᠭᠡᠷᠡᠯ ᠢᠶᠠᠨ ᠲᠣᠯᠠᠶᠢᠨ ᠰᠠᠴᠣᠭᠰᠠᠨ ᠪᠠᠶᠢᠯ᠎ᠠ᠃ ᠮᠣᠳᠣᠳ ᠤᠨ ᠰᠠᠯᠠᠭ᠎ᠠ ᠮᠦᠴᠢᠷ ᠲᠤ ᠪᠠᠳᠮᠠᠯᠠᠨ ᠰᠠᠭᠤᠭᠰᠠᠨ ᠴᠠᠰᠤᠨ ᠱᠠᠭᠱᠣᠷᠠᠭ᠎ᠠ᠂ ᠬᠠᠶᠢᠯᠣᠭᠠᠳ ᠬᠢᠯᠬᠢᠭᠳᠡᠭᠰᠡᠨ ᠮᠦᠰᠦᠨ ᠣᠨᠵᠢᠯᠯᠠᠭ᠎ᠠ ᠨᠤᠭᠤᠳ ᠨᠢᠰᠬᠦ ᠪᠠᠷ ᠪᠠᠵᠠᠭᠠᠭᠰᠠᠨ ᠰᠢᠪᠠᠭᠤ ᠱᠠᠭᠠᠵᠠᠭᠠᠢ ᠴᠦ ᠰᠢᠭ᠋᠂ ᠨᠢᠮᠭᠡᠨ ᠱᠠ ᠡᠮᠦᠰᠦᠭᠰᠡᠨ ᠪᠦᠰᠡᠭᠦᠢ ᠶᠢᠨ ᠬᠦᠵᠦᠭᠦᠨ ᠳᠤ ᠭᠢᠯᠳᠠᠭᠠᠨᠠᠭᠳᠠᠭᠰᠠᠨ ᠬᠠᠰ ᠤᠨ ᠰᠣᠨᠳᠣᠷ ᠴᠦ ᠭᠡᠯᠳᠠᠢ︕    ︽ᠠᠢ ᠳ᠋ᠠ ᠬᠦᠭᠡᠷᠦᠬᠡᠢ︕ ᠡᠪᠦᠭᠡ ᠡᠮᠡᠭᠡ ᠶᠢᠨ ᠢᠶᠠᠨ ᠵᠠᠬ᠎ᠠ ᠳᠤ ᠢᠷᠡᠴᠢᠬᠡᠯ᠎ᠡ ᠰᠢᠦ︕︾ ᠭᠡᠬᠦ ᠰᠡᠳᠬᠢᠯᠬᠡ  ᠶᠢᠨ ᠮᠦᠷᠦᠭᠡᠳᠦᠯ ᠦᠨᠳᠡᠶᠢᠨ ᠪᠣᠰᠬᠤ ᠳᠤ ᠨᠢᠳᠦᠨ ᠳᠤ ᠵᠠᠶᠢᠷ ᠭᠦᠶᠦᠨ᠎ᠡ᠃ ᠨᠢᠳᠦᠨ ᠢᠯᠡ ᠬᠠᠭᠤᠴᠢᠳ ᠮᠠᠨᠢ  ᠴᠠᠰᠣᠨ ᠤ ᠲᠣᠣᠷ᠎ᠠ ᠠᠴᠠ ᠴᠠᠷᠠᠰᠣᠨ ᠣᠢ ᠲᠦᠰᠢᠵᠦ ᠲᠦᠭᠳᠦᠶᠢᠨ ᠬᠠᠷᠠᠭᠳᠠᠨ᠎ᠠ᠃ ᠡᠪᠦᠭᠡ ᠮᠢᠨᠢ ᠪᠣᠷᠬᠠᠨ ᠪᠣᠯᠬᠤ  ᠠᠴᠠ ᠪᠠᠨ ᠡᠮᠦᠨ᠎ᠡ ᠵᠢᠯ ᠨᠢ ᠶᠠᠭ ᠯᠡ ᠢᠩᠬᠢᠵᠦ ᠬᠠᠩᠰᠢ ᠪᠣᠯᠵᠣ ᠬᠠᠭᠳᠠ ᠲᠦᠯᠬᠢᠬᠦ ᠲᠦᠯᠦᠪ ᠢᠶᠠᠷ ᠬᠦᠭᠰᠢᠨ ᠰᠠᠭᠠᠷᠠᠯ ᠡᠯᠵᠢᠭᠡᠨ ᠲᠡᠷᠭᠡ ᠪᠠᠨ ᠶᠣᠭᠤᠭᠤᠯᠵᠣ ᠪᠠᠭ᠎ᠠ ᠠᠪᠠᠭ᠎ᠠ ᠪᠣᠯᠣᠨ ᠲᠡᠭᠡᠳᠦ ᠲᠣᠮᠳᠠᠳᠣ ᠶᠢᠨ ᠨᠢᠭᠡᠳᠦᠭᠡᠷ ᠣᠨ  ᠳᠤ ᠪᠠᠶᠢᠭᠰᠠᠨ ᠨᠠᠮ᠎ᠠ ᠶᠢ ᠲᠠᠭᠠᠭᠤᠯᠣᠨ ᠢᠷᠡᠭᠡᠳ ᠭᠠᠵᠠᠷ ᠤᠨ ᠪᠠᠶᠢᠴᠠ ᠶᠢ ᠰᠢᠨᠵᠢᠵᠦ ᠬᠠᠷᠠᠭᠤᠯᠳᠠᠭᠠᠳ ᠯᠠ᠄ ︽ᠵᠠ᠂ ᠠᠪᠤ ᠪᠠᠨ ᠨᠢᠳᠦ ᠠᠨᠢᠭᠰᠠᠭᠠᠷ ᠠᠪᠴᠢᠷᠠᠭᠠᠳ ᠠᠳᠡ ᠲᠠᠯᠪᠢᠴᠢᠬ᠎ᠠ︕ ᠡᠨᠡ ᠵᠢᠯ ᠠᠴᠠ ᠪᠡᠶ᠎ᠡ ᠬᠠᠷᠢᠭᠤ ᠦᠭᠡᠢ ᠰᠠᠨᠠᠭᠳᠠᠭᠠᠳ ᠯᠡ᠂ ᠶᠡᠷᠦ ᠨᠢ ᠨᠠᠰᠣᠳᠠᠢ ᠬᠦᠮᠦᠨ ᠢ ᠲᠠᠭᠤᠳᠠᠳᠠᠭ ᠲᠡᠷᠡ ᠦᠭᠡᠳᠡ ᠨᠢ ᠲᠦᠭᠦᠵᠦ ᠪᠠᠶᠢᠭ᠎ᠠ ᠯᠡ ᠶᠤᠮ ᠰᠢᠭ᠋ ᠬᠡᠭᠦᠷ ᠤᠨ ᠰᠢᠷᠣᠢ ᠦᠨᠦᠷᠳᠡᠭᠡᠳ ᠪᠠᠶᠢᠬᠤ ᠶᠤᠮ᠂ ᠬᠡᠣᠬᠡ ᠡ︕︾ ᠭᠡᠵᠦ ᠣᠶᠢᠷ᠎ᠠ ᠬᠠᠪᠢ ᠶᠢᠨ ᠠᠭᠤᠯᠠ ᠲᠣᠯᠣᠭᠠᠳ ᠣᠰᠣ ᠪᠣᠯᠠᠭ ᠤᠨ ᠨᠡᠷᠡᠶᠢᠳᠦᠯ ᠢ ᠶᠠᠷᠢᠵᠦ ᠲᠠᠭᠤᠳᠠᠨ ᠦᠪᠡᠷ ᠤᠨ ︽ᠨᠣᠳᠤᠭ︾ ᠢᠶᠠᠨ ᠰᠣᠩᠭᠤᠵᠣ ᠲᠠᠯᠪᠢᠭᠰᠠᠨ ᠶᠤᠮ ᠳ᠋ᠠ︕ ᠣᠳᠣ ᠡᠷᠭᠢᠴᠡᠭᠦᠯᠬᠦ ᠳᠤ ᠭᠤᠴᠢᠭᠠᠳ ᠵᠢᠯ ᠪᠣᠯᠵᠠᠢ᠃ ᠴᠠᠭ ᠮᠦᠴᠡ ᠭᠡᠵᠦ ᠬᠡᠴᠢᠨᠡᠨ ᠬᠤᠷᠳᠣᠨ ᠦᠩᠭᠡᠷᠡᠨ ᠣᠳᠳᠠᠭ ᠠᠵᠠᠢ᠂ ᠣᠨᠳᠠᠭᠠᠳ ᠰᠡᠷᠢᠭᠰᠡᠨ ᠮᠡᠳᠦ ᠨᠢᠭᠡ ᠮᠡᠳᠡᠬᠦᠯ᠎ᠡ ᠪᠢ ᠴᠦ ᠲᠦᠴᠢ ᠶᠢᠨ ᠲᠠᠪᠠᠭ᠎ᠠ ᠦᠭᠡᠳᠡᠯᠡᠵᠦ ᠬᠠᠰᠢᠷ ᠰᠠᠭᠤᠵᠣ ᠡᠪᠦᠭᠡᠨ ᠰᠢᠭᠢᠷ᠎ᠡ ᠠᠪᠴᠠᠢ᠃    ᠮᠠᠨᠣᠰ ᠬᠠᠭᠤᠷᠠᠢ ᠴᠦᠪᠦᠳᠡᠯ ᠲᠡᠭᠦᠨ ᠭᠠᠯ ᠬᠦᠭᠵᠢᠭᠡᠵᠦ ᠭᠡᠷ ᠭᠡᠷ ᠠᠴᠠ ᠪᠠᠨ ᠦᠪᠡᠷ ᠤᠨ ᠬᠤᠪᠢ ᠬᠡᠮᠡᠨ ᠪᠡᠯᠡᠳᠬᠡᠨ ᠠᠪᠴᠢᠷᠠᠭᠰᠠᠨ ᠡᠷᠭᠦᠴᠡ ᠪᠠᠷᠢᠴᠠ ᠪᠠᠨ ᠡᠷᠭᠦᠵᠦ ᠰᠢᠳᠠᠭᠠᠨ ᠮᠦᠷᠭᠦᠬᠦ ᠳᠤ ᠬᠦᠭᠡᠷᠦᠬᠦᠢ ᠲᠡᠭᠦᠦ᠂ ᠦᠶᠡᠯᠢᠳ ᠬᠤᠶᠠᠷ ᠲᠡᠭᠦᠦ᠂ ᠬᠤᠶᠠᠷ ᠠᠴᠢ ᠬᠦᠪᠡᠭᠦᠨ ᠲᠠᠢ ᠪᠠᠨ ᠪᠢᠳᠡ ᠴᠢᠨᠢ ᠬᠡᠳᠦᠭᠦᠯᠬᠡᠨ ᠯᠡ ᠪᠠᠶᠢᠯ᠎ᠠ᠃ ᠡᠳᠡᠨ  ᠤ ᠪᠠᠨ ᠲᠣᠮᠳᠠ  ᠪᠢ ᠴᠢᠨᠢ ᠣᠳᠣ ᠠᠪᠤ ᠶᠢᠨ ᠲᠠᠷᠠᠭ᠎ᠠ ᠠᠬ᠎ᠠ ᠭᠡᠳᠡᠭ ᠢᠶᠠᠷ  ᠶᠡᠭᠡ ᠮᠡᠳᠡᠳᠡᠭ᠂ ᠬᠤᠯᠠ ᠬᠠᠷᠠᠳᠠᠭ ᠬᠦᠮᠦᠨ ᠢᠶᠠᠷ ᠦᠵᠡᠭᠳᠡᠳᠡᠭ ᠶᠤᠮ ᠠᠵᠠᠢ᠃ ᠠᠵᠠᠢ ᠮᠢᠨᠢ ᠪᠠᠶᠢᠬᠤ ᠳᠤ ᠬᠡᠥᠬᠡᠳ ᠵᠣᠯᠵᠠᠭ᠎ᠠ ᠲᠡᠭᠦᠦ ᠨᠠᠷ ᠢᠶᠠᠨ ᠪᠦᠭᠦᠳᠡ ᠶᠢ ᠲᠠᠭᠠᠭᠤᠯᠣᠨ ᠢᠷᠡᠭᠡᠳ ᠬᠠᠭᠤᠴᠢᠳ ᠤᠨ ᠢᠶᠠᠨ ᠭᠡᠭᠡᠨ ᠰᠦᠨᠡᠰᠦᠨ ᠳᠤ ᠲᠠᠬᠢᠯᠭ᠎ᠠ ᠶᠤᠭᠠᠨ ᠡᠷᠭᠦᠵᠦ ᠶᠣᠰᠣ ᠣᠴᠢᠷ ᠢᠶᠠᠨ ᠭᠦᠢᠴᠡᠳᠬᠡᠭᠡᠳ ᠲᠠᠬᠢᠯᠭ᠎ᠠ ᠶᠢᠨ ᠭᠠᠯ ᠢᠶᠠᠨ ᠲᠣᠭᠤᠷᠢᠨ ᠬᠤᠷᠮᠣᠢ ᠲᠡᠪᠢᠰᠦᠨ ᠵᠠᠪᠢᠯᠠᠵᠣ ᠰᠠᠭᠤᠵᠠᠭᠠᠭᠠᠳ ᠲᠡᠭᠡᠳᠦᠰ ᠤᠨ ᠬᠡᠰᠢᠭ ᠬᠡᠮᠡᠨ ᠡᠷᠭᠦᠯᠳᠡ ᠶᠢᠨ ᠠᠷᠢᠬᠢᠨ ᠠᠴᠠ ᠪᠠᠨ ᠠᠬ᠎ᠠ ᠲᠡᠭᠦᠦ ᠭᠤᠷᠪᠠᠭᠤᠯᠠ  ᠪᠠᠨ ᠭᠠᠷ ᠲᠠᠭᠠᠭᠤᠯᠣᠨ ᠰᠢᠮᠡᠭᠡᠳ ᠬᠡᠳᠦᠨ ᠬᠡᠣᠬᠡᠳ ᠠᠴᠢᠨᠠᠷ ᠪᠢᠳᠡᠨ ᠳᠤ ᠪᠠᠨ ᠦᠯᠢᠭᠡᠷ ᠵᠣᠭᠤᠭ ᠪᠣᠯᠭᠠᠨ ᠣᠯᠠᠨ ᠠᠷᠪᠢᠨ ᠣᠴᠢᠷ ᠶᠣᠰᠣ ᠶᠠᠷᠢᠭᠠᠳ ᠪᠢᠳᠡ ᠴᠢᠨᠢ ᠣᠯᠠᠭᠤᠯᠠ ᠯᠡ ᠰᠢᠭ᠋ ᠪᠣᠳᠣᠭᠳᠠᠳᠠᠭ ᠮᠠᠨᠢ ᠦᠴᠦᠭᠡᠳᠦᠷᠬᠡᠨ ᠬᠡᠮᠡᠷ ᠰᠠᠨᠠᠭᠳᠠᠨ᠎ᠠ᠃ ᠣᠳᠣ ᠪᠢᠳᠡ ᠴᠢᠨᠢ ᠦᠶᠡᠯᠢᠳ ᠬᠠᠶᠠᠯᠢᠳ ᠲᠠᠢ ᠪᠠᠨ ᠨᠡᠶᠢᠯᠡᠭᠡᠳ ᠡᠨᠡ ᠬᠡᠳᠦᠬᠡᠨ ᠬᠠᠭᠤᠴᠢ ᠪᠠᠨ ᠡᠷᠬᠢᠳᠡᠭ ᠡᠷᠡᠰ ᠤᠳ ᠲᠠᠢ ᠪᠣᠯᠣᠭᠰᠠᠨ ᠳᠤ ᠪᠠᠨ ᠲᠣᠳᠣᠷ᠎ᠠ ᠨᠢᠭᠡ ᠭᠤᠳᠣᠷᠠᠮᠠᠷ ᠴᠦ᠂ ᠣᠶᠠᠷᠠᠮᠠᠷ ᠴᠦ᠂ ᠬᠤᠷᠣᠰᠣᠮᠠᠷ ᠴᠦ ᠁ ᠣᠯᠠᠨ ᠣᠯᠠᠨ ᠰᠡᠳᠬᠢᠯᠭᠡ ᠣᠷᠢᠶᠠᠯᠳᠣᠨ ᠪᠣᠰᠣᠭᠠᠳ ᠴᠢᠩᠭ᠎ᠠ ᠴᠢᠩᠭ᠎ᠠ ᠪᠠᠯᠭᠤᠭᠰᠠᠨ ᠬᠠᠳᠠᠭᠤ ᠬᠠᠷ᠎ᠠ ᠶᠢᠨ ᠢᠳᠡᠨ ᠳᠤ ᠡᠷᠬᠡᠯᠡᠮᠡᠷ ᠴᠦ᠂ ᠣᠬᠢᠯᠠᠮᠠᠷ ᠴᠦ᠂ ᠬᠠᠰᠬᠢᠷᠣᠮᠠᠷ ᠴᠦ ᠁ ᠰᠠᠨᠠᠭᠳᠠᠭᠠᠳ ᠣᠰᠣ ᠵᠠᠭᠤᠭᠰᠠᠨ ᠶᠠᠭᠵᠢᠭ ᠬᠠᠷ᠎ᠠ ᠴᠠᠷᠠᠰᠣᠨ ᠤ ᠭᠠᠰᠢᠭᠤᠨ ᠣᠳᠤᠭ᠎ᠠ ᠲᠠᠢ ᠬᠤᠯᠢᠯᠳᠣᠨ ᠡᠨᠡᠬᠦ ᠪᠦᠳᠦᠭᠦᠨ ᠡᠪᠦᠭᠡᠨ ᠰᠦᠪᠡᠭᠡ ᠲᠣᠯᠣᠭᠰᠠᠨ ᠬᠡᠮᠡᠷ ᠲᠣᠷᠤᠭ ᠲᠠᠷᠭᠤᠨ ᠰᠠᠶᠢᠬᠠᠨ ᠠᠭᠤᠯᠠ ᠶᠢᠨ ᠡᠩᠭᠡᠷ ᠲᠠᠬᠢ ᠴᠠᠰᠦᠨ ᠤ ᠠᠭᠠᠷ ᠲᠤ ᠵᠣᠪᠠᠭᠤᠷᠢᠳᠠᠶᠢᠬᠠᠨ ᠰᠢᠩᠭᠡᠨ ᠠᠭᠤᠰᠴᠣ ᠪᠠᠶᠢᠯ᠎ᠠ ᠁    ᠠᠢ ᠬᠦᠭᠡᠷᠦᠬᠦᠢ︕ ᠡᠪᠦᠭᠡ ᠮᠠᠨᠢ ︽ᠨᠣᠳᠤᠭ︾ ᠢᠶᠠᠨ ᠣᠨᠣᠭᠠᠵᠣ  ᠰᠣᠩᠭᠤᠭᠰᠠᠨ ᠶᠤᠮ ᠪᠠᠶᠢᠨ᠎ᠠ ᠳ᠋ᠠ︕ ᠪᠠᠷᠠᠭᠤᠨ ᠠᠴᠠ ᠨᠢ ᠠᠷᠵᠢᠭᠠᠷ ᠮᠣᠷᠢᠨ ᠰᠢᠪᠠᠭ᠎ᠠ ᠲᠠᠢ ᠴᠢᠯᠠᠭᠤᠳᠣ ᠶᠢᠨ ᠣᠷᠣᠢ ᠨᠠᠯᠠᠵᠣ᠂ ᠵᠡᠭᠦᠨ ᠳᠤ ᠨᠢ ᠲᠥᠩ ᠵᠣᠵᠠᠭᠠᠨ ᠴᠠᠭᠠᠨ ᠬᠤᠰᠣ ᠲᠠᠢ ᠤᠯᠠᠭᠠᠨ ᠲᠣᠯᠣᠭᠠᠢ ᠰᠡᠭᠡᠷ ᠡᠷᠭᠦᠨ ᠰᠡᠬᠦᠶᠢᠭᠡᠳ ᠡᠮᠦᠨ᠎ᠡ ᠨᠢ ᠮᠣᠷᠢᠨ ᠣᠰᠣᠨ ᠭᠤᠣᠯ ᠰᠣᠨᠣᠯᠵᠠᠭᠠᠳ ᠬᠠᠪᠣᠷ ᠡᠷᠳᠡ ᠲᠦᠯᠵᠢᠵᠦ᠂ ᠨᠠᠮᠣᠷ ᠡᠷᠳᠡ ᠪᠣᠯᠪᠠᠰᠣᠷᠠᠨ ᠨᠠᠷᠠ ᠡᠷᠳᠡ ᠲᠣᠰᠳᠠᠭ ᠠᠳᠠᠪᠠᠰᠢ ᠰᠢᠳᠢ ᠲᠠᠢ ᠭᠠᠵᠠᠷ ᠣᠰᠣᠨ ᠪᠠᠶᠢᠵᠠᠢ᠃ ᠡᠨᠡ ᠨᠢ ᠪᠦᠷ ᠯᠡ ᠦᠶ᠎ᠡ ᠦᠶ᠎ᠡ ᠪᠠᠨ ᠵᠠᠯᠭᠠᠵᠣ ᠦᠨᠳᠦᠰᠦ ᠨᠠᠮᠠᠭ᠎ᠠ ᠪᠠᠨ ᠵᠠᠯᠭᠠᠬᠤ ᠬᠤᠶᠢᠴᠢ ᠳᠤ ᠪᠠᠨ ᠬᠦᠷᠦᠭᠰᠡᠨ ᠡᠪᠦᠭᠡ ᠶᠢᠨ ᠮᠢᠨᠢ  ᠰᠠᠨᠠᠭ᠎ᠠ ᠪᠠᠶᠢᠭ᠎ᠠ ᠪᠢᠰᠢᠦ ᠦᠦ ᠳ᠋ᠠ︕    ᠠᠯᠢ ᠡᠷᠳᠡ ᠮᠠᠨᠠᠶᠢᠬᠢᠨ ᠤ ᠲᠡᠭᠡᠳᠦᠰ ᠭᠠᠯᠳᠠᠨ ᠪᠣᠱᠣᠭᠳᠣ ᠶᠢᠨ ᠮᠠᠨᠵᠣ ᠶᠢᠨ ᠡᠰᠡᠷᠭᠦ ᠶᠠᠪᠣᠭᠤᠯᠣᠭᠰᠠᠨ ᠰᠢᠳᠣᠷᠭᠤ ᠶᠣᠰᠣᠨ ᠤ ᠲᠡᠮᠡᠴᠡᠯ ᠳᠤ ᠦᠪᠦᠷ ᠬᠠᠯᠬ᠎ᠠ ᠶᠢᠨ ᠬᠢᠯᠢ ᠲᠠᠪᠠᠭᠤᠯᠣᠨ ᠠᠬ᠎ᠠ ᠲᠡᠭᠦᠦ ᠲᠠᠪᠣᠭᠤᠯᠠ ᠪᠠᠨ ᠦᠪᠦᠷ  ᠤᠷᠤᠭᠤᠳᠠᠨ ᠡᠨᠡᠬᠦ ᠰᠢᠳᠣᠷᠭᠤ ᠶᠣᠰᠣᠨ ᠤ ᠲᠡᠮᠡᠴᠡᠯ ᠳᠤ ᠣᠷᠣᠯᠴᠠᠭᠰᠠᠨ ᠪᠠᠶᠢᠵᠠᠢ᠃ ᠪᠠᠶᠢᠯᠳᠣᠭᠠᠨ ᠤ ᠶᠠᠪᠣᠴᠠ ᠳᠤ ᠠᠬ᠎ᠠ ᠲᠡᠭᠦᠦ ᠲᠠᠪᠣᠭᠤᠯᠠ ᠪᠠᠨ ᠵᠠᠳᠠᠷᠠᠨ ᠰᠠᠯᠣᠭᠠᠳ ᠡᠪᠦᠭᠡ ᠶᠢᠨ ᠬᠤᠯᠣᠨᠴᠠ ᠶᠢᠨ ᠦᠶ᠎ᠡ ᠪᠠᠷᠠᠭᠤᠨ  ᠠᠴᠠ ᠵᠡᠭᠦᠨᠰᠢᠯᠡᠵᠦ ᠦᠶ᠎ᠡ ᠣᠯᠠᠷᠢᠨ ᠶᠠᠪᠣᠭᠰᠠᠭᠠᠷ ᠪᠠᠶᠢᠵᠣ ᠪᠠᠭᠠᠷᠢᠨ ᠣᠷᠣᠵᠣ ᠬᠦᠯ ᠲᠣᠭᠳᠠᠭᠰᠠᠨ ᠁ ᠭᠡᠵᠦ ᠡᠪᠦᠭᠡ ᠮᠠᠨᠢ ᠣᠯᠠᠨ ᠬᠠᠭᠤᠴᠢᠯᠠᠳᠠᠭ ᠢ ᠲᠡᠷᠡ ᠦᠶ᠎ᠡ ᠳᠤ ᠪᠠᠭ᠎ᠠ ᠪᠠᠶᠢᠵᠣ ᠦᠦᠬᠡ ᠲᠡᠦᠬᠡ ᠶᠢᠨ ᠲᠣᠬᠠᠢ ᠲᠡᠮᠡᠢ ᠠᠩᠬᠠᠷᠣᠯ ᠳᠤ ᠪᠠᠨ ᠠᠪᠳᠠᠭ ᠦᠭᠡᠢ ᠣᠴᠢᠷ ᠣᠳᠣ ᠭᠡᠮᠰᠢᠯ ᠪᠣᠯᠣᠨ ᠬᠤᠴᠣᠷᠴᠠᠢ᠃ ᠬᠠᠶᠠ ᠵᠠᠷᠢᠮ ᠳᠤ ᠪᠠᠨ ᠲᠡᠦᠬᠡ  ᠨᠣᠮ ᠣᠷᠪᠠᠭᠤᠯᠣᠨ ᠣᠳᠣᠮ ᠰᠣᠳᠣᠷ ᠤᠨ ᠲᠣᠬᠠᠢ ᠡᠷᠭᠢᠴᠡᠭᠦᠯᠦᠨ ᠦᠵᠡᠬᠦ ᠳᠤ ᠯᠢᠭᠳᠡᠨ ᠪᠣᠯᠣᠨ ᠴᠣᠭᠳᠣ ᠲᠠᠶᠢᠵᠢ ᠶᠢᠨ ᠦᠶ᠎ᠡ ᠶᠢᠨ ᠴᠣᠬᠤᠷ  ᠬᠠᠯᠬ᠎ᠠ ᠶᠢᠨ ᠬᠤᠶᠢᠴᠢᠰ ᠪᠣᠯᠳᠠᠭ ᠴᠦ ᠶᠤᠮ ᠦᠦ︖ ᠡᠰᠡᠭᠦᠯ᠎ᠡ ᠭᠤᠪᠢ ᠶᠢᠨ ᠠᠷᠣ ᠶᠢᠨ ᠵᠠᠰᠠᠭᠳᠣ ᠬᠠᠨ ᠠᠶᠢᠮᠠᠭ ᠤᠨ ᠭᠠᠳᠠᠷ ᠬᠠᠯᠬ᠎ᠠ ᠨᠢ ᠲᠣᠳᠣᠭᠠᠳᠣᠬᠢ ᠵᠠᠭᠤᠷᠠᠭᠠᠨ ᠠᠴᠠ ᠪᠠᠨ ᠪᠣᠯᠵᠣ ᠬᠠᠩᠭᠠᠢ ᠠᠭᠤᠯᠠ ᠶᠢ ᠲᠠᠪᠠᠨ ᠵᠣᠣ ᠣᠳᠠ ᠴᠢᠭᠤᠯᠭᠠᠨ ᠳᠠᠬᠢ ᠰᠢᠷᠠᠮᠦ᠋ᠷᠡᠨ ᠭᠤᠣᠯ ᠤᠨ ᠬᠠᠪᠢ ᠪᠠᠷ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠮᠢᠳᠣᠷᠠᠯ ᠬᠢᠵᠦ ᠪᠠᠶᠢᠭᠰᠠᠨ ᠭᠤᠮᠪᠤ ᠢᠯᠳᠡᠩ ᠤᠨ ᠬᠤᠶᠢᠴᠢᠰ ᠴᠦ ᠪᠣᠯᠪᠠᠣ︖ ᠭᠡᠵᠦ ᠪᠣᠳᠣᠳᠠᠭ᠃ ᠭᠡᠪᠡᠴᠦ ᠡᠪᠦᠭᠡ ᠶᠢᠨ ᠬᠡᠯᠡᠳᠡᠭ ᠢᠶᠠᠷ ᠮᠠᠨᠠᠶᠢᠬᠢᠨ ᠬᠠᠯᠬ᠎ᠠ ᠲᠠᠶᠢᠵᠢ ᠢᠵᠠᠭᠤᠷᠳᠠᠨ ᠪᠠᠶᠢᠵᠦ ᠵᠦᠪ ᠶᠣᠰᠣᠨ ᠤ ᠲᠦᠯᠦᠭᠡ ᠡᠷᠡᠯᠬᠡᠯᠡᠳᠡᠭ ᠰᠠᠶᠢᠨ ᠡᠷᠡᠴᠦᠦᠯ ᠪᠠᠶᠢᠯ᠎ᠠ ᠭᠡᠬᠦ ᠠᠴᠠ ᠴᠣᠭᠳᠣ ᠲᠠᠶᠢᠵᠢ ᠴᠣᠬᠤᠷ ᠬᠠᠯᠬ᠎ᠠ ᠶᠢᠨ ᠬᠤᠶᠢᠴᠢᠰ ᠪᠠᠶᠢᠬᠤ ᠡ ᠭᠡᠵᠦ ᠵᠦᠪᠳᠡᠭᠡᠳᠡᠭ ᠶᠤᠮ᠃    ᠡᠪᠦᠭᠡ ᠮᠠᠨᠢ᠂ ᠡᠪᠦᠭᠡ ᠪᠠᠨ ᠣᠯᠵᠣ  ᠬᠠᠷᠠᠭ᠎ᠠ ᠦᠭᠡᠢ  ᠃ ᠮᠢᠨᠦ ᠬᠤᠯᠣᠨᠴᠠ ᠲᠠᠮᠦᠰᠦ᠋ᠷᠦᠩ ᠭᠡᠭᠴᠢ ᠲᠡᠮᠦᠷ ᠲᠦᠷᠪᠡᠯᠵᠢᠨ ᠪᠠᠶ᠎ᠠ ᠲᠠᠢ  ᠶᠠᠰᠣ ᠬᠠᠳᠠᠭᠤ ᠲᠣᠭᠰᠢᠨ ᠰᠢᠷᠦᠭᠦᠨ ᠵᠠᠩ ᠲᠠᠢ ᠴᠢᠬᠢᠷᠠᠭ ᠪᠦᠳᠦᠭᠦᠨ ᠬᠦᠮᠦᠨ ᠪᠠᠶᠢᠵᠦ ᠢᠳᠡᠷ ᠨᠠᠰᠣᠨ ᠳᠠᠭᠠᠨ ᠡᠷᠳᠡ ᠬᠠᠯᠢᠭᠰᠡᠨ ᠭᠡᠳᠡᠭ᠃ ᠲᠡᠭᠡᠭᠡᠳ ᠯᠡ ᠡᠪᠦᠭᠡ ᠮᠠᠨᠢ ᠬᠦᠭᠡᠷᠦᠬᠦᠢ᠂ ᠵᠣᠯᠠᠢ ᠵᠣᠯᠠᠢ ᠪᠠᠨ ᠭᠢᠰᠬᠢᠭᠰᠡᠨ ᠭᠤᠷᠪᠠᠨ ᠲᠡᠭᠦᠦ᠂ ᠬᠤᠶᠠᠷ ᠦᠬᠢᠨ ᠲᠡᠭᠦᠦ ᠪᠠᠨ ᠬᠦᠮᠦᠨ ᠪᠣᠯᠭᠠᠵᠣ ᠠᠶᠢᠯ ᠡᠷᠦᠬᠡ ᠪᠣᠯᠭᠠᠬᠤ ᠳᠤ ᠠᠬ᠎ᠠ ᠶᠢᠨ ᠶᠡᠭᠡ ᠪᠠᠷ ᠠᠪᠤ ᠰᠢᠭ᠋ ᠶᠠᠪᠣᠵᠣ ᠪᠠᠶᠢᠭᠰᠠᠨ ᠠᠵᠠᠢ᠃ ᠡᠪᠦᠭᠡ ᠶᠢᠨ ᠮᠠᠨᠢ ᠲᠡᠭᠦᠦ ᠨᠠᠷ ᠴᠢᠮᠡᠳ᠂ ᠭᠤᠮᠪᠤ᠂ ᠬᠤᠷᠢᠨᠲ᠋ᠠᠪᠤᠨ ᠬᠡᠬᠦ ᠦᠨᠳᠦᠷ ᠲᠣᠮᠣ ᠪᠡᠶ᠎ᠡ ᠲᠠᠢ ᠮᠠᠬᠠᠷᠠᠨᠽᠠ ᠬᠡᠮᠡᠷ ᠪᠣᠵᠠᠭᠠᠢ ᠬᠦᠮᠦᠰ ᠤᠳ ᠪᠠᠶᠢᠵᠠᠢ᠃ ᠨᠠᠮ᠎ᠠ ᠶᠢ ᠲᠦᠬᠦᠭᠡ ᠣᠷᠣᠬᠤ ᠦᠶ᠎ᠡ ᠪᠠᠷ ᠭᠤᠮᠪᠤ ᠡᠪᠦᠭᠡ ᠪᠠ ᠬᠤᠷᠢᠨᠲ᠋ᠠᠪᠤᠨ ᠡᠪᠦᠭᠡ ᠮᠠᠨ ᠤ ᠳᠤ ᠨᠢᠭᠡ ᠣᠳᠠᠭ᠎ᠠ ᠢᠷᠡᠵᠦ ᠪᠠᠶᠢᠭᠰᠠᠨ ᠢ ᠨᠢ ᠪᠦᠦᠷ ᠲᠦᠦᠷ ᠮᠡᠳᠡᠬᠦ ᠶᠤᠮ᠃ ᠴᠢᠮᠡᠳ ᠡᠪᠦᠭᠡ ᠮᠠᠨᠢ ᠬᠠᠭᠤᠷᠮᠠᠭ ᠮᠠᠨᠵᠣ ᠶᠢᠨ ᠦᠶ᠎ᠡ ᠳᠤ ᠴᠠᠭᠳᠠᠭ᠎ᠠ ᠶᠢᠨ ᠵᠠᠬᠢᠷᠭᠠᠨ ᠳᠤ ᠠᠵᠢᠯᠯᠠᠵᠣ ᠬᠤᠵᠢᠮ ᠨᠢ ᠾᠧ ᠽᠧ ᠵᠠᠩ ᠤᠨ ᠵᠡᠭᠦᠨ ᠬᠤᠶᠢᠳᠣ ᠶᠢᠨ ᠦᠪᠡᠷ ᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠲᠤ ᠪᠠᠶᠢᠵᠦ ᠾᠧ ᠽᠧ ᠵᠠᠩ ᠤᠨ ᠮᠡᠷᠭᠡᠨ ᠫᠣᠣᠴᠢ ᠶᠢᠨ ᠨᠢᠭᠡᠨ ᠬᠡᠮᠡᠭᠳᠡᠵᠦ ᠪᠠᠶᠢᠵᠠᠢ᠃    ᠰᠣᠶᠣᠯ ᠤᠨ ᠬᠤᠪᠢᠰᠬᠠᠯ ᠤᠨ ᠦᠶ᠎ᠡ ᠳᠤ ᠲᠡᠷᠡ ᠪᠦᠬᠦᠨ ᠭᠠᠪᠢᠶ᠎ᠠ ᠵᠢᠳᠬᠦᠯ ᠨᠢ ᠶᠠᠯ᠎ᠠ ᠨᠢᠭᠦᠯ ᠪᠣᠯᠵᠣ ᠣᠷᠪᠠᠯᠭ᠎ᠠ ᠭᠠᠷᠭᠠᠭᠴᠢ ᠣᠯᠠᠭᠠᠨ ᠲᠡᠪᠡᠯᠳᠡᠨ ᠳᠤ ᠲᠡᠮᠡᠴᠡᠭᠳᠡᠭᠡᠳ ᠨᠡᠷ᠎ᠡ ᠨᠢᠭᠤᠷ ᠲᠤ ᠨᠢ ᠭᠦᠷᠦᠭᠡᠳ ᠲᠡᠰᠬᠦᠶ᠎ᠡ ᠪᠡᠷᠬᠡ ᠪᠣᠯᠬᠤ ᠳᠤ ᠪᠠᠨ ᠪᠠᠶ᠎ᠠ ᠪᠠᠨ ᠶᠡᠭᠦᠳᠬᠡᠵᠠᠢ᠃ ᠬᠡᠬᠦ ᠳᠤ ᠪᠠᠨ ᠬᠦᠭᠡᠷᠦᠬᠦᠢ᠂ ᠴᠢᠮᠡᠳ ᠡᠪᠦᠭᠡ ᠪᠠᠨ ᠪᠢ ᠶᠡᠷᠦ  ᠨᠢ ᠦᠵᠡᠵᠦ ᠦᠩᠭᠡᠷᠡᠭᠡ ᠦᠭᠡᠢ ᠪᠣᠯᠬᠤᠷ ᠶᠠᠮᠠᠷ ᠰᠢᠦ ᠪᠡᠶ᠎ᠡ ᠲᠠᠮᠢᠷ᠂ ᠵᠢᠰᠦ ᠴᠢᠷᠠᠢ ᠲᠠᠢ ᠬᠦᠮᠦᠨ ᠪᠣᠯᠪᠠ ᠳ᠋ᠠ ᠭᠡᠵᠦ ᠶᠡᠭᠡ ᠪᠣᠳᠣᠳᠠᠭ᠃    ᠡᠪᠦᠭᠡ ᠮᠠᠨᠢ ᠨᠢᠭᠡ ᠨᠠᠰᠣ ᠪᠠᠷ ᠢᠶᠠᠨ ᠦᠬᠡᠷ ᠬᠠᠷᠢᠭᠤᠯᠣᠭᠰᠠᠨ ᠦᠬᠡᠷᠴᠢᠨ ᠬᠦᠮᠦᠨ᠃ ᠦᠬᠡᠷ ᠲᠤ ᠯᠡ ᠲᠣᠩ ᠡᠭᠡᠯᠢᠳᠠᠢ᠂ ᠬᠡᠳᠦᠨ ᠵᠠᠭᠤᠨ ᠦᠬᠡᠷ ᠤᠨ ᠲᠣᠮᠳᠠ ᠠᠴᠠ ᠦᠪᠡᠷ ᠤᠨ ᠠᠯᠳᠠᠭᠤᠯ ᠰᠣᠪᠠᠢ ᠪᠢᠷᠠᠭᠤ ᠰᠢᠳᠦᠯᠠᠩ ᠢᠶᠠᠨ ᠬᠢᠷᠪᠢᠭᠡᠳ ᠭᠠᠷᠣᠭᠰᠠᠭᠠᠷ ᠯᠡ ᠦᠵᠡᠭᠡᠳ ᠲᠠᠨᠢᠴᠢᠬᠠᠳᠠᠭ ᠦᠬᠡᠷ ᠤᠨ ᠵᠢᠰᠦᠨ ᠳᠤ ᠣᠨᠴᠠᠭᠠᠢ ᠬᠦᠮᠦᠨ ᠪᠠᠶᠢᠵᠠᠢ᠃ ᠭᠡᠬᠦ ᠳᠤ ᠪᠠᠨ ᠮᠠᠯ ᠣᠨᠣᠭᠠᠨ ᠳᠤ ᠪᠠᠨ ᠬᠠᠶᠢᠷᠠᠳᠠᠢ ᠭᠡᠳᠡᠭ ᠢ ᠶᠠᠭᠤᠨ ᠦᠭᠦᠯᠡᠨᠡᠮ᠂ ᠮᠠᠯᠳᠠᠵᠣ ᠮᠠᠭᠠᠵᠢᠭᠠᠳ ᠯᠡ ᠶᠠᠭ ᠯᠡ ᠬᠡᠨ ᠨᠢᠭᠡᠨ ᠲᠠᠢ ᠪᠠᠨ ᠵᠣᠭᠤᠭ ᠶᠠᠷᠢᠵᠦ ᠪᠠᠶᠢᠭ᠎ᠠ ᠬᠡᠮᠡᠷ ᠦᠬᠡᠷ ᠲᠠᠢ ᠪᠠᠨ ᠲᠦᠩᠭᠢᠨᠡᠳᠡᠯ᠎ᠡ ᠶᠠᠷᠢᠭᠠᠳ ᠪᠠᠶᠢᠳᠠᠭ᠃    ᠮᠢᠩᠭ᠎ᠠ ᠶᠢᠰᠦᠨ ᠵᠠᠭᠤ ᠬᠤᠷᠢᠭᠠᠳ ᠣᠨ ᠤ ᠦᠶ᠎ᠡ ᠪᠠᠷ ᠿᠧ ᠾᠧ ᠶᠢᠨ ᠣᠨᠴᠠᠭᠠᠢ ᠣᠷᠣᠨ ᠠᠴᠠ ᠯᠢᠨᠰᠢ ᠳᠤ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ ᠠᠳᠠᠷ ᠬᠠᠭᠠᠯᠪᠦᠷᠢᠯᠠᠯᠳᠠ ᠶᠢᠨ ᠬᠤᠪᠢᠶᠠᠷᠢ ᠲᠣᠪᠴᠢᠶ᠎ᠠ ᠭᠠᠷᠭᠠᠵᠣ ᠸᠠᠩ ᠱᠢ ᠴᠧᠨ ᠪᠣᠯᠣᠨ ᠰᠧᠳᠡᠩᠨᠠᠮᠵᠢᠯᠸᠠᠩᠪᠣᠣ ᠶᠢᠨ ᠵᠢᠯᠣᠭᠤᠳᠣᠯᠭ᠎ᠠ ᠲᠣᠣᠷ᠎ᠠ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠳᠤ ᠵᠢᠩᠬᠢᠨᠢ ᠪᠠᠷ ᠠᠳᠠᠷ ᠬᠠᠭᠠᠯᠪᠦᠷᠢᠯᠠᠵᠣ ᠡᠬᠢᠯᠡᠬᠦ ᠳᠤ ᠣᠷᠢᠳᠣ ᠶᠢᠨ ᠪᠠᠭᠠᠷᠢᠨ ᠵᠡᠬᠦᠨ ᠭᠠᠷᠣᠨ ᠬᠤᠰᠢᠭᠤᠨ ᠤ ᠪᠣᠷᠬᠠᠨᠳᠣ ᠶᠢᠨ ᠠᠮᠠᠨ  ᠳᠤ ᠬᠠᠶᠢᠴᠢ ᠶᠢᠨ ᠲᠠᠯ᠎ᠠ ᠪᠠᠷ ᠮᠠᠯᠵᠢᠨ ᠰᠠᠭᠤᠵᠣ ᠪᠠᠶᠢᠭᠰᠠᠨ ᠮᠠᠨᠠᠶᠢᠬᠢᠨ ᠤ ᠮᠠᠯᠵᠢᠯ ᠤᠨ ᠣᠷᠣᠨ ᠵᠠᠢ ᠪᠠᠭᠠᠰᠴᠣ ᠮᠦᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠠᠷ᠎ᠠ ᠴᠡᠷᠢᠭ ᠤᠨ ᠬᠦᠯ ᠠᠴᠠ ᠲᠦᠷᠪᠡᠨ ᠲᠣᠳᠠᠭᠠᠵᠣ ᠠᠴᠢᠶ᠎ᠠ ᠬᠦᠰᠬᠡ ᠪᠠᠨ ᠪᠠᠭᠯᠠᠨ ᠮᠠᠯ ᠣᠨᠤᠭ᠎ᠠ ᠪᠠᠨ ᠲᠠᠭᠤᠵᠣ ᠬᠦᠨᠳᠡᠯᠡᠨ ᠢᠶᠠᠷ ᠭᠠᠷᠴᠣ ᠨᠠᠷᠢᠨ ᠲᠠᠪᠠᠭ᠎ᠠ ᠦᠭᠡᠳᠡᠯᠡᠨ ᠣᠯᠠᠭᠠᠨ ᠱᠣᠷᠣᠩ ᠲᠠᠮᠵᠢᠨ ᠡᠷᠳᠡᠨ ᠤ ᠯᠢᠶᠣᠣ ᠣᠯᠣᠰ ᠤᠨ ᠱᠧᠩᠽᠦ᠋ᠩ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠪᠠᠶᠢᠭᠤᠯᠣᠭᠰᠠᠨ ᠴᠢᠩ ᠵᠸᠦ ᠬᠤᠳᠠ  ᠶᠢᠨ ᠡᠮᠦᠨᠡᠬᠢ ᠣᠳᠣ ᠶᠢᠨ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠰᠣᠪᠣᠷᠭ᠎ᠠ ᠰᠣᠮᠣᠨ ᠤ ᠡᠮᠦᠨ᠎ᠡ ᠪᠠᠶᠢᠳᠠᠭ ᠪᠢᠳᠡᠭᠦᠦ ᠬᠠᠶᠢᠯᠠᠰᠣ ᠲᠠᠢ ᠶᠡᠭᠡ ᠮᠠᠩᠬᠠᠨ ᠲᠠᠪᠠᠭ᠎ᠠ ᠲᠠᠢ ᠸᠠᠭᠠᠷ ᠤᠨ ᠮᠠᠩᠬᠠᠨ ᠳᠤ ᠰᠢᠷᠭᠤᠨ᠂ ᠴᠢᠩ ᠣᠯᠣᠰ ᠤᠨ ᠴᠢᠩ ᠯᠢᠩ ᠣᠩᠭᠤᠨ ᠤ ᠬᠠᠪᠢ ᠪᠠᠷ ᠨᠢᠭᠤᠨ ᠰᠠᠭᠤᠷᠢᠰᠢᠵᠦ  ᠠᠮᠢᠳᠣᠷᠠᠭᠰᠠᠨ ᠠᠵᠣᠭᠤ᠃ ᠡᠭᠦᠨ ᠳᠤ ᠡᠪᠦᠭᠡ ᠶᠢᠨ ᠢᠶᠠᠨ ᠡᠨᠡ ᠣᠯᠠᠨ ᠦᠯᠢᠭᠡᠷ ᠵᠣᠭᠤᠭ ᠤᠨ ᠲᠣᠮᠳᠠ ᠠᠴᠠ ︽ᠲᠡᠮᠦᠷ ᠬᠦᠬᠡ ᠦᠬᠡᠷ︾ ᠤᠨ ᠦᠯᠢᠭᠡᠷ ᠨᠠᠳᠠ ᠳᠤ ᠶᠠᠭᠤ ᠨᠢᠭᠡ ᠭᠠᠶᠢᠬᠠᠮᠰᠢᠭ ᠪᠣᠯᠵᠣ ᠣᠳᠣ ᠪᠣᠯᠳᠠᠯ᠎ᠠ ᠪᠣᠳᠣᠭᠳᠠᠭᠠᠳ ᠪᠠᠶᠢᠳᠠᠭ᠃    ᠮᠢᠨᠦ ᠪᠠᠭ᠎ᠠ ᠡᠪᠦᠭᠡ ᠬᠤᠷᠢᠨᠲ᠋ᠠᠪᠣᠨ ᠠᠷᠪᠠᠭᠠᠳ ᠨᠠᠰᠣᠨ ᠳᠤ ᠪᠠᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠴᠡᠷᠢᠭ ᠤᠨ ᠬᠦᠯ ᠲᠡᠭᠡᠷᠡᠮ ᠲᠣᠨᠤᠭ᠎ᠠ ᠠᠴᠠ ᠵᠠᠶᠢᠳᠠᠵᠣ ᠬᠤᠶᠢᠰᠢ ᠨᠡᠭᠦᠳᠡᠯᠯᠡᠵᠦ ᠬᠦᠴᠦᠨ ᠤ ᠠᠵᠢᠯ ᠣᠯᠵᠣ ᠬᠢᠬᠦ ᠪᠠᠷ ᠭᠠᠷᠣᠭᠠᠳ ᠬᠠᠷᠢᠵᠦ ᠢᠷᠡᠭᠰᠡᠨ ᠦᠭᠡᠢ ᠲᠡᠨᠳᠡ ᠪᠠᠨ ᠠᠶᠢᠯ ᠭᠡᠷ ᠪᠣᠯᠵᠣ ᠨᠣᠳᠣᠭᠰᠢᠵᠦ ᠰᠠᠭᠤᠭᠰᠠᠨ ᠰᠠᠨᠵᠠᠢ᠃ ᠢᠩᠬᠢᠭᠡᠳ ᠵᠠᠯᠠᠭᠤ ᠬᠠᠯᠠᠭᠤᠨ ᠨᠠᠰᠣᠨ ᠳᠤ ᠪᠠᠨ ᠪᠠᠶᠢᠭᠰᠠᠨ ᠡᠪᠦᠭᠡ ᠮᠡᠨᠢ ᠲᠡᠭᠦᠦ ᠪᠠᠨ ᠡᠷᠭᠢᠵᠦ ᠦᠵᠡᠬᠦ ᠴᠦ ᠲᠡᠷᠡ ᠡᠵᠢ ᠨᠠᠭᠤᠷ ᠠᠴᠠ ᠪᠠᠭ᠎ᠠ ᠰᠠᠭ᠎ᠠ ᠲᠠᠪᠣᠰᠣ ᠵᠠᠯᠠᠬᠤ ᠴᠦ ᠲᠡᠷᠡ ᠲᠠᠪᠠᠭᠠᠨ ᠡᠩᠭᠡᠷ ᠤᠨ ᠵᠣᠩᠳᠣᠷ ᠠᠴᠠ ᠮᠠᠯ ᠢᠶᠠᠷ ᠢᠶᠠᠨ ᠵᠣᠯᠢᠵᠦ ᠣᠯᠣᠭᠰᠠᠨ ᠴᠠᠶᠢᠯᠭᠠᠭᠰᠠᠨ ᠮᠣᠩᠭᠤᠯ᠂ ᠰᠠᠭᠠᠭ᠂ ᠪᠣᠭᠤᠳᠠᠢ ᠵᠡᠷᠭᠡ ᠪᠠᠨ ᠠᠴᠢᠶᠠᠯᠠᠭᠠᠳ ︽ᠲᠡᠮᠦᠷ ᠬᠦᠬᠡ ᠦᠬᠡᠷ︾ ᠢᠶᠠᠷ ᠢᠶᠠᠨ ᠭᠠᠷ ᠤᠨ ᠦᠬᠡᠷ ᠪᠣᠯᠭᠠᠵᠣ ᠭᠤᠷᠪᠠᠨ ᠲᠡᠷᠭᠡ ᠬᠦᠳᠦᠯᠵᠦ ᠦᠵᠦᠮᠦᠴᠢᠨ ᠵᠦᠭ ᠨᠠᠮᠣᠷ ᠤᠨ ᠰᠡᠭᠦᠯᠴᠢ ᠪᠠᠷ ᠠᠶᠠᠨ ᠢᠶᠠᠷ ᠬᠦᠳᠡᠯᠵᠠᠢ᠃ ᠰᠠᠷ᠎ᠠ ᠶᠢᠨ ᠠᠶᠠᠨ ᠬᠦᠭᠡᠭᠡᠵᠦ ᠪᠣᠴᠠᠵᠣ ᠢᠷᠡᠬᠦ ᠵᠠᠮ ᠳᠤ ᠪᠠᠨ ᠦᠵᠦᠮᠦᠴᠢᠨ ᠪᠠᠭᠠᠷᠢᠨ ᠤ ᠬᠢᠯᠢ ᠬᠢᠵᠠᠭᠠᠷ ᠣᠶᠢᠷᠠᠳᠬᠤ ᠪᠠᠷ ᠠᠭᠤᠷ ᠠᠮᠢᠰᠬᠤᠯ ᠬᠦᠢᠳᠡᠷᠡᠵᠦ ᠴᠠᠰᠣ ᠬᠠᠶᠠᠯᠠᠨ ᠨᠢᠳᠦ ᠨᠡᠭᠡᠭᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠴᠠᠭᠠᠨ ᠰᠢᠭᠤᠷᠭ᠎ᠠ ᠭᠤᠶᠠᠳᠠᠨ ᠵᠠᠮ ᠮᠦᠷ ᠲᠠᠷᠣᠭᠳᠠᠨ ᠵᠣᠳ ᠪᠠᠭᠤᠵᠠᠢ᠃ ᠡᠪᠦᠭᠡ ᠮᠢᠨᠢ ᠭᠠᠵᠠᠷ ᠤᠨ ᠪᠠᠶᠢᠴᠠ ᠶᠢᠨ ᠲᠦᠯᠦᠪ ᠢᠶᠠᠷ ᠢᠶᠠᠨ ᠨᠣᠳᠤᠭ ᠤᠨ ᠬᠢᠯᠢ ᠲᠠᠪᠠᠭᠤᠯᠣᠨ ᠲᠠᠪᠠᠭᠠᠨ ᠡᠩᠭᠡᠷ ᠣᠷᠣᠵᠣ ᠪᠠᠭᠤᠴᠠ ᠠᠪᠬᠤ ᠬᠡᠮᠡᠨ ᠦᠬᠡᠷ ᠢᠶᠠᠨ ᠱᠠᠯᠠᠵᠣ ᠲᠡᠷᠭᠡ ᠪᠠᠨ ᠶᠣᠭᠤᠯᠣᠭᠰᠠᠭᠠᠷ ᠪᠠᠶᠢᠵᠣ ᠪᠦᠷᠦᠢ ᠶᠢᠨ ᠦᠶ᠎ᠡ ᠪᠠᠷ ᠲᠠᠰᠢᠭᠤ ᠰᠢᠭ᠋ ᠬᠦᠳᠦᠯ ᠤᠨ ᠣᠷᠣᠢ ᠳᠤ ᠭᠠᠷᠣᠭᠰᠠᠨ ᠭᠠᠷ ᠤᠨ ᠲᠡᠮᠦᠷ ᠬᠦᠬᠡ ᠦᠬᠡᠷ ᠣᠷᠣᠭᠰᠢ ᠨᠢᠭᠡ ᠠᠯᠬᠤᠮ ᠴᠦ ᠠᠯᠬᠤᠬᠤ ᠦᠭᠡᠢ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠲᠠᠮᠤᠷᠤᠳᠠᠵᠤ ᠮᠦᠷᠭᠦᠨ ᠰᠡᠵᠢᠵᠦ ᠬᠤᠶᠢᠰᠢ ᠰᠠᠭᠤᠭᠠᠳ ᠪᠠᠶᠢᠪᠠ᠃ ᠶᠠᠭᠠᠬᠢᠵᠦ ᠭᠤᠶᠠᠳᠠᠵᠣ ᠵᠠᠨᠴᠢᠭᠰᠠᠨ ᠴᠦ ᠶᠠᠪᠣᠳᠠᠭ ᠦᠭᠡᠢ ᠬᠦᠬᠡ ᠦᠬᠡᠷ ᠲᠤ ᠠᠷᠭ᠎ᠠ ᠪᠠᠨ ᠪᠠᠷᠠᠭᠰᠠᠨ ᠡᠪᠦᠭᠡ ᠮᠠᠨᠢ ᠦᠬᠡᠷ ᠢᠶᠠᠨ ᠪᠠᠭᠤᠯᠭᠠᠵᠣ ᠲᠡᠷᠭᠡᠨ ᠪᠣᠯᠣ ᠠᠴᠠ ᠪᠠᠨ ᠣᠶᠠᠵᠣ ᠮᠦᠨ ᠲᠡᠨᠳᠡ ᠪᠠᠨ ᠠᠮᠠᠷᠠᠵᠣ ᠦᠨᠵᠢᠬᠦ ᠪᠠᠷ ᠪᠣᠯᠵᠠᠢ᠃ ᠦᠦᠷ ᠤᠨ ᠦᠶ᠎ᠡ ᠪᠠᠷ ᠴᠠᠰᠣ ᠵᠣᠭᠰᠣᠵᠣ ᠰᠢᠭᠤᠷᠭ᠎ᠠ ᠨᠠᠮᠳᠠᠭᠠᠳ ᠪᠠᠶᠢᠬᠤ ᠳᠤ ᠡᠪᠦᠭᠡ ᠮᠢᠨᠢ ᠪᠡᠶ᠎ᠡ ᠲᠠᠷᠣᠭᠰᠠᠨ ᠴᠠᠰᠣ ᠪᠠᠨ ᠭᠦᠪᠢᠵᠦ ᠦᠬᠡᠷ ᠢᠶᠠᠨ ᠬᠦᠯᠦᠭᠡᠳ ᠭᠠᠵᠠᠷ ᠤᠨ ᠲᠦᠯᠦᠪ ᠢ ᠰᠢᠨᠵᠢᠬᠦ ᠳᠤ ᠵᠠᠮ ᠠᠴᠠ ᠪᠠᠨ ᠰᠠᠯᠣᠭᠰᠠᠨ ᠮᠡᠳᠦ ᠨᠢᠭᠡ ᠯᠡ ᠣᠨᠳᠣᠣ ᠪᠠᠶᠢᠪᠠ᠃ ᠦᠵᠡᠰᠡ ᠡ︕ ᠬᠤᠨᠣᠭᠯᠠᠭᠰᠠᠨ ᠭᠠᠵᠠᠷ ᠠᠴᠠ ᠪᠠᠨ ᠣᠷᠣᠭᠰᠢ ᠠᠷᠪᠠᠭᠠᠳ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ ᠡᠮᠦᠨᠡᠰᠢ ᠬᠦᠮᠡᠶᠢᠭᠰᠡᠨ ᠬᠡᠳᠦᠨ ᠵᠠᠭᠤᠨ ᠠᠯᠳᠠ ᠶᠢᠨ ᠡᠭᠴᠡ ᠬᠠᠳᠠ ᠬᠠᠷᠠᠯᠠᠨ ᠪᠠᠶᠢᠪᠠ᠃ ᠬᠦᠬᠡ ᠦᠬᠡᠷ ᠤᠨ ᠢᠶᠠᠨ ᠬᠤᠳᠣᠷᠭ᠎ᠠ ᠰᠠᠭᠤᠨ ᠶᠠᠪᠣᠵᠣ ᠶᠠᠳᠠᠭᠰᠠᠨ ᠰᠢᠯᠳᠠᠭᠠᠨ ᠢ ᠰᠠᠶ᠋ᠢ ᠯᠡ ᠮᠡᠳᠡᠭᠰᠡᠨ ᠡᠪᠦᠭᠡ ᠶᠢᠨ ᠲᠣᠯᠣᠭᠠᠢ ᠳᠦᠩᠭᠢᠨᠡᠭᠡᠳ ᠶᠠᠪᠣᠴᠢᠬᠠᠯ᠎ᠠ ᠁ ᠠᠩᠭᠠᠬᠠᠢ ᠲᠡᠭᠳᠡᠬᠡᠬᠡᠢ ᠮᠡᠳᠦ  ᠠᠮᠠ ᠪᠠᠨ ᠠᠩᠭᠠᠶᠢᠨ ᠡᠪᠦᠭᠡ ᠶᠢᠨ ᠵᠣᠭᠤᠭ ᠢ ᠴᠢᠩᠨᠠᠨ ᠵᠠᠯᠭᠠᠭᠠᠳ ᠵᠠᠯᠭᠠᠭᠠᠳ ᠭᠡᠵᠦ ᠦᠯᠢᠭᠡᠷ ᠤᠨ ᠣᠭᠤᠳᠠᠨ ᠳᠤ ᠣᠷᠣᠳᠠᠭ ᠲᠡᠷᠡ ᠦᠶ᠎ᠡ ᠶᠢᠨ ᠪᠠᠭ᠎ᠠ ᠨᠠᠰᠣ ᠮᠢᠨᠢ ᠦᠨᠢᠳᠡ ᠮᠠᠷᠳᠠᠭᠳᠠᠬᠤ ᠦᠭᠡᠢ᠃ ᠣᠳᠣ ᠡᠷᠬᠢᠴᠡᠭᠦᠯᠦᠨ ᠰᠠᠨᠠᠬᠤᠯ᠎ᠠ ᠡᠪᠦᠭᠡ ᠶᠢᠨ ᠦᠬᠡᠷ ᠲᠤ ᠡᠭᠡᠯᠢᠳᠠᠢ ᠪᠠᠶᠢᠳᠠᠭ ᠨᠢ ᠡᠭᠦᠨ ᠠᠴᠠ ᠪᠣᠯᠣᠭᠰᠠᠨ ᠴᠦ ᠪᠠᠶᠢᠵᠣ ᠮᠡᠳᠡᠨ᠎ᠡ᠃    ᠡᠩᠭᠡᠷ ᠲᠦᠭᠦᠷᠡᠩ ᠴᠠᠭᠠᠨ ᠰᠠᠬᠠᠯ ᠬᠡᠶᠢᠰᠭᠡᠭᠰᠡᠨ ᠡᠪᠦᠭᠡ ᠪᠠᠨ ᠬᠠᠷᠠᠬᠤ ᠪᠣᠯᠭᠠᠨ ᠨᠠᠳᠠ ᠳᠤ ᠲᠣᠮᠤᠭ ᠤᠨ ᠬᠦᠮᠦᠨ ᠪᠣᠶᠣ ᠡᠷᠳᠡᠨ ᠤ ᠪᠠᠭᠠᠳᠣᠷ ᠢᠳᠡᠳᠡᠨ ᠤ ᠲᠦᠷᠢ ᠲᠦᠯᠦᠪ ᠪᠣᠳᠣᠭᠳᠠᠳᠠᠭ᠃ ᠲᠡᠶᠢᠮᠦ ᠯᠡ ᠰᠦᠷᠯᠢᠭ ᠲᠣᠮᠣ ᠪᠡᠶ᠎ᠡ ᠲᠠᠢ᠂ ᠠᠭᠰᠢᠷᠠᠭ᠎ᠠ ᠨᠠᠰᠣᠳᠠᠢ ᠪᠣᠯᠣᠭᠰᠠᠨ ᠪᠠᠶᠢᠳᠠᠯ᠎ᠠ ᠪᠠᠨ ᠠᠯᠬᠤᠵᠤ ᠭᠢᠰᠬᠢᠬᠦ ᠨᠢ ᠬᠦᠩᠭᠡᠨ ᠭᠠᠪᠰᠢᠭᠠᠢ ᠯᠠᠪ ᠪᠠᠳᠣᠳᠠᠢ ᠪᠠᠶᠢᠳᠠᠭ᠃ ᠠᠵᠠᠢ ᠶᠢᠨ ᠦᠶ᠎ᠡ ᠶᠢᠨ ᠠᠬ᠎ᠠ ᠲᠡᠭᠦᠦ ᠭᠤᠷᠪᠠᠭᠤᠯᠠ ᠪᠠᠨ ᠡᠪᠦᠭᠡ ᠶᠢᠨ ᠬᠠᠵᠠᠭᠤ ᠳᠤ ᠠᠨᠢᠷ ᠵᠦᠷᠢᠬᠦ‍ ᠰᠢᠭ ᠲᠣᠬᠠᠢ ᠶᠢᠨ ᠦᠶ᠎ᠡ ᠳᠤ ᠨᠠᠳᠠᠳᠣ ᠰᠠᠨᠠᠭᠳᠠᠳᠠᠭ᠃ ᠨᠡᠩ ᠴᠦ ᠮᠠᠨ ᠤ ᠦᠶ᠎ᠡ ᠳᠤ ᠢᠷᠡᠭᠡᠳ ᠴᠣᠬᠤᠮ ᠴᠦ ᠨᠢᠭᠡ ᠪᠡᠶ᠎ᠡ ᠪᠢᠯᠳᠠᠷ ᠰᠢᠪᠡᠵᠢ ᠪᠣᠯᠵᠣ᠂ ᠣᠷ᠎ᠠ ᠲᠡᠮ ᠣᠬᠠᠭᠠᠨ ᠵᠣᠷᠢᠭ ᠢᠶᠠᠷ ᠪᠦᠷ ᠯᠡ ᠣᠯᠠ ᠪᠠᠨ ᠱᠠᠭᠠᠶᠢᠭᠰᠠᠨ  ᠨᠣᠮᠣᠢ ᠲᠣᠩᠨᠢᠭᠤᠨ ᠪᠣᠯᠣᠭᠰᠠᠨ ᠮᠦᠷᠳᠡᠭᠡᠨ ᠣᠳᠣᠮ ᠵᠠᠯᠭᠠᠭᠰᠠᠨ ᠣᠭᠰᠠᠭ᠎ᠠ ᠲᠦᠷᠦᠯ ᠴᠦ ᠬᠦᠮᠦᠨ ᠪᠦᠯᠢ ᠪᠠᠷ ᠲᠣᠩ ᠴᠣᠭᠡᠬᠡᠷᠡᠵᠠᠢ᠃ ᠡᠨᠡ ᠦᠨᠡᠬᠡᠷ ᠮᠠᠨ ᠤ ᠭᠡᠷ ᠤᠨ ᠦᠦᠬᠡ ᠲᠡᠦᠬᠡ ᠨᠢ ᠴᠦ ᠪᠠᠭᠠᠰᠴᠤ ᠴᠦᠭᠡᠬᠡᠷᠡᠭᠡᠳ ᠪᠠᠶᠢᠭ᠎ᠠ ᠣᠳᠣᠬᠢ ᠮᠣᠩᠭᠤᠯᠴᠣᠳ ᠤᠨ ᠪᠣᠰᠤᠭ᠎ᠠ ᠲᠦᠷᠬᠦ ᠶᠢᠨ ᠰᠢᠨᠵᠢ ᠲᠡᠮᠳᠡᠭ ᠤᠨ ᠲᠦᠯᠦᠭᠡᠯᠡᠭᠴᠢ ᠲᠦᠷᠢ ᠨᠢ ᠪᠣᠯᠪᠠᠣ ᠦᠦ ᠳ᠋ᠠ ᠬᠡᠮᠡᠨ  ᠪᠣᠳᠣᠭᠳᠠᠳᠠᠭ ᠨᠢ ᠡᠪᠦᠭᠡ ᠶᠢᠨ ᠮᠠᠨᠢ ᠪᠠᠭ᠎ᠠ ᠨᠠᠰᠣᠨ ᠠᠴᠠ ᠨᠠᠳᠠ ᠳᠤ ᠦᠭᠭᠦᠭᠰᠡᠨ ᠨᠦᠯᠦᠭᠡ ᠲᠣᠰᠬᠠᠯ ᠠᠴᠠ ᠯᠡ ᠪᠠᠶᠢᠳᠠᠭ ᠶᠣᠮᠰᠠᠨ︕    ᠡᠪᠦᠭᠡ ᠮᠠᠨᠢ ᠠᠶᠢᠯ ᠬᠤᠲᠤᠭᠤᠷ ᠲᠤ ᠪᠠᠨ ᠨᠡᠷ᠎ᠡ ᠲᠠᠢ ᠠᠵᠢᠯᠴᠢ ᠬᠦᠳᠡᠯᠮᠦᠷᠢᠴᠢ ᠮᠠᠯᠴᠢᠨ ᠠᠪᠤ  ᠪᠠᠶᠢᠭᠰᠠᠨ ᠶᠤᠮ᠃ ᠬᠡᠳᠦᠶᠢᠪᠡᠷ ᠦᠰᠦᠭ ᠪᠢᠴᠢᠭ ᠲᠠᠨᠢᠳᠠᠭ ᠦᠭᠡᠢ ᠪᠣᠯᠪᠠᠴᠣ ᠦᠯᠢᠭᠡᠷ ᠲᠡᠦᠬᠡ ᠣᠯᠠᠨ ᠮᠡᠳᠡᠳᠡᠭ᠂ ᠦᠭᠡ ᠵᠣᠭᠤᠭ ᠶᠠᠷᠢᠭᠠᠳ ᠡᠬᠢᠯᠡᠪᠡᠯ ᠲᠡᠶᠢᠮᠦ ᠯᠡ ᠰᠣᠨᠣᠰᠪᠣᠷᠢᠳᠠᠢ ᠠᠮᠳᠠᠳᠠᠢ᠂ ᠲᠣᠮᠳᠠ ᠠᠴᠠ ᠨᠢ ᠬᠦᠮᠦᠰ ᠦᠭᠡ ᠶᠢ ᠨᠢ ᠲᠠᠰᠣᠯᠬᠤ ᠠᠴᠠ ᠪᠠᠨ ᠴᠦ ᠬᠢᠴᠢᠶᠡᠨ ᠬᠠᠶᠢᠷᠠᠯᠠᠳᠠᠭ ᠪᠠᠶᠢᠯ᠎ᠠ᠃ ᠡᠪᠦᠯ ᠤᠨ ᠣᠷᠳᠣ ᠰᠦᠨᠢ ᠤᠳ ᠲᠤ ᠠᠶᠢᠯ ᠰᠠᠭᠠᠬᠠᠯᠳᠠ ᠶᠢᠨ ᠬᠢ ᠮᠠᠨᠢ ᠮᠠᠨ ᠤ ᠳᠤ ᠴᠣᠭᠯᠠᠭᠠᠳ ᠰᠣᠨᠣᠰᠴᠣ ᠲᠣᠭᠤᠯᠣᠭᠰᠠᠨ ᠶᠠᠪᠣᠵᠣ ᠦᠩᠭᠡᠷᠡᠭᠰᠡᠨ ᠦᠭᠡ ᠵᠣᠭᠤᠭ ᠢ ᠨᠢ ᠰᠣᠨᠣᠰᠣᠭᠠᠳ ᠭᠤᠷᠪᠠᠨ ᠨᠣᠬᠠᠢ ᠭᠤᠳᠣᠶᠢᠴᠢᠬᠠᠭᠰᠠᠨ ᠠᠳᠠᠯ᠎ᠠ ᠪᠠᠰᠠ ᠶᠠᠪᠣᠵᠣ ᠦᠭᠬᠦ ᠦᠭᠡᠢ᠂ ᠠᠪᠤ ᠵᠠᠯᠭᠠᠭᠠᠳ ᠭᠡᠳ ᠡᠮᠡᠭᠡ ᠶᠢᠨ ᠴᠢᠨᠠᠭᠰᠠᠨ ᠬᠠᠷ᠎ᠠ ᠴᠠᠢ ᠶᠢ ᠰᠡᠮᠡᠭᠡᠷ ᠰᠡᠮᠡᠭᠡᠷ ᠲᠠᠳᠠᠭᠠᠳ ᠡᠪᠦᠭᠡ ᠶᠢᠨ ᠵᠣᠭᠤᠭ ᠢ ᠭᠠᠵᠠᠷ ᠣᠨᠠᠬᠤ ᠠᠴᠠ ᠴᠦ ᠪᠣᠯᠭᠤᠮᠵᠢᠯᠠᠨ ᠰᠣᠨᠣᠰᠳᠠᠭ ᠢ ᠪᠣᠳᠣᠪᠠᠯ ᠲᠧᠯᠸᠢᠰ᠂  ᠷᠠᠳᠢᠤ᠋  ᠦᠭᠡᠢ ᠲᠡᠷᠡ ᠦᠶ᠎ᠡ ᠡᠪᠦᠭᠡ ᠮᠠᠨᠢ ᠲᠡᠳᠡᠨ ᠳᠤ ᠪᠠᠨ ᠦᠯᠢᠭᠡᠷ ᠤᠨ ᠲᠠᠷᠬᠠᠨ ᠪᠠᠶᠢᠭᠰᠠᠨ ᠮᠦᠷᠲᠡᠭᠡᠨ ᠶᠠᠮᠠᠷ ᠴᠦ ᠬᠡᠯᠡᠭᠡᠳ ᠮᠠᠷᠳᠠᠳᠠᠭ ᠦᠭᠡᠢ ᠴᠡᠭᠡᠵᠢ ᠪᠠᠶᠢᠭᠰᠠᠨ ᠢ ᠭᠠᠶᠢᠬᠠᠮᠠᠷ ᠶᠤᠮ ᠡ︕    ᠠᠵᠠᠢ ᠶᠢᠨ ᠠᠷᠪᠠᠨ ᠬᠤᠶᠠᠷ ᠲᠠᠢ ᠵᠢᠯ ᠳᠤ ᠪᠠᠶᠢᠵᠣ ᠭᠡᠨ᠎ᠡ᠂ ᠪᠣᠮ ᠰᠢᠷᠣᠢ ᠠᠴᠠ ᠭᠤᠷᠪᠠᠨ ᠲᠡᠷᠭᠡ ᠴᠦᠷᠬᠦᠯᠡᠨ ᠬᠦᠲᠦᠯᠦᠭᠰᠡᠨ ᠡᠪᠦᠭᠡ ᠮᠢᠨᠢ᠂ ᠯᠢᠨᠳᠦ᠋ᠡᠭ ᠣᠷᠣᠵᠣ ᠡᠳᠦᠷ ᠲᠣᠳᠣᠮ ᠤᠨ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠬᠦ ᠶᠠᠭᠤᠮ᠎ᠠ ᠬᠤᠳᠠᠯᠳᠣᠨ ᠠᠪᠬᠤ ᠪᠠᠷ ᠠᠷᠭᠠᠯ ᠲᠦᠯᠡᠰᠢ ᠬᠤᠶᠠᠷ ᠲᠡᠷᠭᠡ᠂ ᠠᠷᠠᠰᠣ ᠰᠢᠷᠢ ᠨᠢᠭᠡ ᠲᠡᠷᠭᠡ ᠲᠡᠭᠡᠭᠡᠵᠦ ᠬᠦᠳᠡᠯᠵᠠᠢ᠃ ᠰᠦᠨᠢ ᠲᠣᠮᠳᠠᠯᠠᠵᠣ ᠮᠣᠷᠳᠠᠭᠰᠠᠨ ᠲᠡᠳᠡ ᠮᠠᠨᠢ ᠲᠠᠷᠠᠭᠠᠴᠢ ᠶᠢᠨ ᠡᠳᠦᠷ ᠤᠨ ᠪᠦᠷᠦᠢ ᠪᠠᠷ ᠬᠡᠶᠢᠮᠦᠷᠢᠳᠦ ᠶᠢᠨ ᠲᠠᠪᠠᠭ᠎ᠠ ᠪᠠᠭᠤᠬᠤ ᠳᠤ ᠲᠡᠭᠡᠷᠡᠮ ᠳᠤ ᠲᠣᠨᠣᠭᠳᠠᠵᠠᠢ᠃ ᠲᠣᠯᠣᠭᠠᠢ ᠪᠠᠨ ᠲᠠᠪᠣᠣ ᠪᠦᠰᠡ ᠪᠠᠷ ᠣᠷᠢᠶᠠᠭᠰᠠᠨ ᠭᠤᠷᠪᠠᠨ ᠬᠦᠮᠦᠨ ᠭᠡᠨᠡᠳᠳᠡ ᠲᠠᠪᠠᠭ᠎ᠠ ᠪᠠᠭᠤᠬᠤ ᠶᠢᠨ ᠲᠠᠯᠪᠢᠭᠤᠳᠠ ᠲᠡᠭᠰᠢᠬᠡᠨ ᠲᠣᠯᠢ ᠶᠢᠨ ᠬᠤᠯᠠᠭᠠᠢ ᠵᠠᠪᠢ ᠠᠴᠠ ᠭᠠᠷᠴᠣ ᠢᠷᠡᠭᠡᠳ ᠦᠨᠳᠦᠷ ︽ᠪᠠᠭᠠᠪᠠᠭᠠᠢ︾ ᠰᠢᠭ᠋ ᠪᠦᠳᠦᠭᠦᠨ ᠨᠢᠭᠡ ᠨᠢ ᠮᠠᠭᠤᠬᠠᠨ ᠰᠢᠭ᠋ ᠮᠣᠩᠭᠤᠯ ᠬᠡᠯᠡ ᠪᠠᠷ ︽ᠠᠮᠢ ᠪᠠᠨ ᠬᠠᠶᠢᠷᠠᠯᠠᠪᠠᠯ ᠶᠠᠭᠤᠮ᠎ᠠ ᠪᠠᠨ ᠦᠯᠡᠳᠡᠭᠡᠳ ᠲᠣᠨᠢᠯ︕︾ ᠭᠡᠵᠦ ᠬᠦᠮᠦᠬᠡᠢ ᠵᠠᠭᠤᠨ ᠶᠠᠬᠢᠷ ᠳᠤᠤᠭᠠᠷᠴᠠᠢ᠃ ᠨᠠᠷᠢᠨ ᠭᠤᠰᠢᠭᠤᠷ ᠰᠢᠭ᠋ ᠬᠤᠶᠠᠷ ᠨᠢ ᠶᠠᠩ ᠶᠠᠯᠳᠠᠷ ᠦᠭᠡᠢ ᠢᠷᠡᠵᠦ ᠪᠠᠭᠠᠷᠠᠩ ᠢᠯᠠᠣ ᠬᠦᠪᠡᠭᠡᠳᠡᠵᠦ ᠠᠷᠠᠰᠣ ᠰᠢᠷᠢ ᠪᠠᠨ ᠬᠤᠩᠬᠤᠶᠢᠯᠠᠨ ᠵᠠᠶᠢᠴᠠ ᠭᠠᠷᠭᠠᠵᠣ ᠠᠳᠣᠷᠢᠵᠦ ᠰᠠᠭᠤᠵᠣ ᠪᠠᠶᠢᠭᠰᠠᠨ ᠠᠵᠠᠢ ᠶᠢᠨ ᠮᠠᠨᠢ ᠲᠣᠮᠳᠠᠬᠢ ᠲᠡᠷᠭᠡᠨ ᠤ ᠬᠦᠬᠡ ᠲᠣᠶᠢᠮᠤᠭ ᠤᠨ ᠲᠦᠷᠦ ᠠᠴᠠ ᠰᠢᠭᠦᠷᠦᠨ ᠠᠪᠣᠭᠠᠳ ᠠᠵᠠᠢ ᠶᠢ ᠮᠢᠨᠢ ᠲᠡᠭᠳᠡᠳᠡᠯ᠎ᠡ ᠨᠢ ᠰᠢᠳᠡᠭᠡᠳ ᠵᠠᠮ ᠬᠠᠰᠢᠪᠠ᠃ ︽ᠬᠦᠦ ᠮᠢᠨᠢ ᠬᠢᠴᠢᠶᠡᠵᠦ ᠰᠣᠨᠣᠷ ᠲᠠᠢ ᠶᠠᠪᠤ︕ ᠡᠨᠡ ᠭᠠᠵᠠᠷ ᠬᠡᠴᠡᠭᠦᠦ ᠭᠠᠵᠠᠷ ᠭᠡᠳᠡᠭ ᠶᠤᠮ᠂ ᠶᠠᠭᠠᠬᠢᠵᠦ ᠰᠢᠪᠠᠳᠠᠭᠰᠠᠨ ᠴᠦ ᠪᠦᠷᠦᠢ ᠲᠣᠯᠵᠣ ᠡᠨᠡᠭᠦᠷ ᠦᠩᠭᠡᠷᠡᠬᠦ ᠪᠣᠯᠣᠯ᠎ᠠ᠂ ᠣᠳᠣ ᠨᠢᠭᠡ ᠪᠠᠭ᠎ᠠ ᠦᠨᠳᠡᠶᠢᠪᠡᠯ ᠬᠠᠭᠠᠨ ᠲᠣᠭᠤᠪᠠᠢ ᠶᠢᠨ ᠲᠠᠨᠢᠳᠠᠭ ᠠᠶᠢᠯ ᠳᠤ ᠬᠦᠷᠦᠨ᠎ᠡ᠂ ᠲᠡᠨᠳᠡ ᠬᠦᠷᠦᠭᠡᠳ ᠬᠤᠨᠤᠭ ᠠᠪᠣᠶ᠎ᠠ︾ ᠭᠡᠵᠦ ᠬᠠᠳᠠᠭᠤ ᠢᠷᠭᠠᠢ ᠲᠡᠩᠰᠡ ᠶᠢᠨ ᠭᠠᠷ ᠣᠭᠤᠰᠣᠷ ᠢ ᠣᠷᠢᠶᠠᠵᠣ ᠠᠳᠬᠤᠭᠰᠠᠨ ᠡᠪᠦᠭᠡ ᠶᠢᠨ ᠦᠭᠡ ᠠᠴᠠ ᠭᠠᠷᠣᠭᠰᠠᠨ ᠦᠭᠡᠢ ᠦᠨᠦᠬᠢ ᠬᠡᠴᠡᠭᠦᠦ ᠨᠡᠷᠡᠳᠦ ᠵᠠᠮ ᠪᠦᠭᠯᠡᠪᠡ᠃ ᠬᠤᠯᠠ ᠰᠠᠵᠢᠭᠳᠠᠵᠣ ᠪᠣᠳᠠᠨ ᠤ ᠡᠩᠭᠡᠷ ᠣᠴᠢᠵᠦ  ᠪᠦᠮᠪᠦᠷᠢᠨ ᠣᠶᠢᠴᠢᠭᠰᠠᠨ ᠠᠵᠠᠢ ᠮᠠᠨᠢ ᠭᠠᠷ ᠲᠤ ᠪᠠᠨ ᠠᠳᠬᠤᠭᠰᠠᠨ ᠣᠩ ᠤᠨ ᠪᠢᠯᠠᠭᠤ ᠪᠠᠨ ᠠᠯᠳᠠᠯ ᠦᠭᠡᠢ  ᠲᠡᠪᠬᠡᠷᠡᠨ ᠪᠣᠰᠴᠣ ᠡᠪᠦᠭᠡ ᠶᠢᠨ ᠵᠠᠬ᠎ᠠ ᠳᠤ ᠣᠴᠢᠵᠦ ᠵᠣᠭᠰᠣᠪᠠ᠃ ᠪᠠᠶᠢᠳᠠᠯ ᠲᠣᠶᠢᠯ ᠤᠨ ᠰᠢᠷᠦᠭᠦᠨ ᠲᠦᠭᠰᠢᠭᠦᠷᠢ ᠲᠠᠢ ᠪᠣᠯᠵᠣ ᠦᠨᠦᠬᠢ ︽ᠪᠦᠳᠦᠭᠦᠨ ᠪᠠᠭᠠᠪᠠᠭᠠᠢ︾ ᠡᠪᠦᠭᠡ ᠶᠢᠨ ᠵᠦᠭ ᠠᠭᠠᠵᠢᠮ ᠲᠦᠭᠦᠨ ᠢᠷᠡᠪᠡ  ᠃ ︽ᠲᠠᠱ︾ ᠭᠡᠬᠦ ᠲᠠᠭᠤᠨ ᠳᠤ ᠮᠠᠭᠤᠬᠠᠢ ᠣᠷᠢᠯᠠᠨ ᠦᠨᠦᠬᠢ ︽ᠪᠠᠭᠠᠪᠠᠭᠠᠢ︾ ᠡᠪᠦᠭᠡ ᠶᠢᠨ ᠮᠠᠨᠢ ᠠᠷᠣ ᠳᠤ ᠪᠠᠨ ᠨᠢᠭᠤᠨ ᠠᠳᠬᠤᠭᠰᠠᠨ ᠢᠷᠭᠤᠢ ᠲᠡᠩᠰᠡ ᠶᠢᠨ ᠠᠮᠳᠠ ᠦᠵᠡᠵᠦ ᠬᠤᠶᠢᠰᠢ ᠪᠠᠨ ᠰᠠᠯᠳᠠᠷᠬᠢᠯᠠᠨ ᠰᠠᠪᠠᠵᠣ ᠣᠨᠠᠪᠠ᠃ ᠡᠨᠡ ᠦᠶᠡᠰ ᠠᠷᠠᠰᠣ ᠰᠢᠷᠢ ᠵᠢᠳᠬᠦᠭᠰᠡᠨ ᠬᠦᠬᠡ ᠲᠣᠶᠢᠮᠤᠭ  ᠮᠠᠭᠤᠬᠠᠢ ᠣᠷᠬᠢᠷᠠᠨ ᠲᠣᠶᠢᠯᠠᠨ ᠬᠦᠭᠯᠡᠵᠦ ᠦᠨᠦᠬᠢ ᠦᠬᠡᠷ ᠤᠨ ᠲᠦᠷᠦ ᠠᠳᠬᠤᠵᠣ ᠵᠣᠭᠰᠣᠭᠰᠠᠨ ᠨᠠᠷᠢᠨ ᠭᠤᠵᠣᠭᠤᠷ ᠤᠨ ᠴᠡᠭᠡᠵᠢ ᠦᠭᠡᠳᠡ ᠬᠦᠴᠦᠳᠡᠢ ᠨᠦᠳᠦᠬᠦ ᠳᠤ ᠦᠨᠦᠬᠢ ᠴᠦ ᠪᠢᠳᠡᠭᠦᠦ ᠲᠠᠭᠤ ᠭᠠᠷᠴᠣ ᠬᠤᠯᠠ ᠲᠡᠭᠳᠡᠳᠡᠯ᠎ᠡ ᠬᠡᠳᠦᠨ ᠠᠯᠴᠠᠮ ᠤᠨ ᠴᠠᠭᠠᠨ᠎ᠠ  ᠪᠣᠳᠠᠨ ᠤ ᠲᠣᠮᠳᠠ ᠱᠣᠳᠣᠷᠣᠨ ᠣᠨᠠᠯ᠎ᠠ᠃ ᠡᠪᠦᠭᠡ ᠮᠠᠨᠢ ᠲᠡᠷᠡ ᠦᠶ᠎ᠡ ᠶᠠᠭ ᠯᠡ ᠡᠵᠡᠨ ᠴᠢᠩᠭᠡᠰ ᠤᠨ ᠡᠷᠡᠯᠬᠡᠭ ᠲᠠᠶᠢᠴᠢᠳ ᠮᠡᠳᠦ ᠲᠡᠩᠰᠡ ᠡᠷᠭᠢᠭᠦᠯᠦᠨ ︽ᠬᠠᠯᠬ᠎ᠠ ᠶᠢᠨ ᠬᠦᠦ ᠶᠢ ᠬᠠᠭᠠᠨ ᠤ ᠨᠣᠳᠤᠭ ᠲᠤ ᠲᠣᠨᠣᠳᠠᠭ ᠠᠶᠣᠮᠰᠢᠭ ᠦᠭᠡᠢ ᠰᠠᠮᠠᠭᠤᠨ ᠠᠷᠠᠳ ᠤᠳ︾ ᠬᠡᠮᠡᠨ ᠲᠡᠩᠰᠡ ᠡᠷᠭᠢᠭᠦᠯᠦᠨ ᠲᠠᠭᠠᠷᠢᠨ ᠣᠷᠣᠬᠤ ᠳᠤ ᠨᠦᠭᠦᠭᠡ ᠪᠦᠳᠦᠭᠦᠨ ︽ᠪᠠᠭᠠᠪᠠᠭᠠᠢ︾ ᠶᠢᠨ ᠠᠷᠣ ᠠᠴᠠ ᠱᠣᠩᠭᠤᠨ ᠢᠷᠡᠭᠰᠡᠨ ᠨᠠᠷᠢᠨ ᠭᠤᠵᠣᠭᠤᠷ ︽ᠠᠶᠣ︕ ᠮᠠᠶᠣ︕︾ ᠪᠠᠨ ᠠᠯᠳᠠᠨ ᠪᠦᠭᠰᠡ ᠪᠠᠷ ᠢᠶᠠᠨ ᠡᠷᠭᠢᠵᠦ ᠭᠤᠳ ᠲᠣᠳᠠᠭᠠᠵᠠᠢ᠃ ᠢᠩᠬᠢᠭᠡᠳ ᠯᠡ ᠡᠪᠦᠭᠡ ᠮᠢᠨᠢ᠂ ᠠᠵᠠᠢ ᠲᠠᠢ ᠲᠠᠷᠣᠢ ᠲᠦᠷᠭᠡᠨ ᠦᠬᠡᠷ ᠢᠶᠠᠨ ᠱᠠᠯᠠᠵᠣ ᠬᠠᠨ ᠲᠣᠭᠤᠪᠠᠢ ᠵᠦᠭ ᠬᠤᠷᠳᠣᠯᠠᠨ ᠬᠡᠳᠦᠨ ᠮᠦᠴᠡ ᠦᠩᠭᠡᠷᠡᠳᠡᠯ᠎ᠡ ᠬᠤᠶᠢᠨ᠎ᠠ ᠠᠴᠠ ᠨᠢ ᠴᠢᠮᠡᠭᠡ ᠠᠨᠢᠷ ᠲᠠᠭ ᠪᠠᠶᠢᠬᠤ   ᠪᠠᠷ ︽ᠬᠡᠴᠡᠭᠦᠦ ᠨᠡᠷᠡᠳᠦ︾ ᠤᠳ ᠰᠢᠷᠬ᠎ᠠ ᠳᠤ ᠪᠠᠨ ᠣᠷᠢᠶᠠᠭᠳᠠᠭᠰᠠᠨ ᠪᠠᠶᠢᠵᠣ ᠮᠡᠳᠡᠨ᠎ᠡ ᠭᠡᠵᠦ ᠶᠠᠷᠢᠳᠠᠭ ᠡᠪᠦᠭᠡ ᠶᠢᠨ ᠵᠣᠭᠤᠭ ᠁ ᠢ ᠡᠷᠭᠢᠴᠡᠭᠦᠯᠬᠦ ᠳᠤ ᠲᠡᠷᠡ ᠦᠶ᠎ᠡ ᠳᠤ ᠬᠠᠶᠠ ᠵᠠᠷᠢᠮ ᠳᠤ ᠪᠠᠨ ᠰᠣᠨᠣᠰᠳᠠᠭ ᠰᠠᠮᠪᠠᠯᠨᠣᠷᠪᠣᠣ ᠡᠪᠦᠭᠡ ᠶᠢᠨ ᠬᠤᠭᠤᠷ  ᠤᠨ ᠦᠯᠢᠭᠡᠷ ᠲᠤ ᠭᠠᠷᠳᠠᠭ ︽ᠶᠣᠸᠠᠨᠱᠣᠸᠠᠢ︾ ᠴᠦ ᠪᠣᠯᠪᠠᠣ ᠭᠡᠵᠦ ᠡᠪᠦᠭᠡ ᠪᠠᠨ ᠪᠢᠰᠢᠷᠡᠳᠡᠭ ᠪᠠᠨ ᠣᠳᠣ ᠪᠣᠳᠣᠪᠠᠯ ᠢᠨᠢᠶᠡᠳᠦ ᠬᠦᠷᠦᠮᠡᠷ ᠡ︕    ᠡᠪᠦᠭᠡ ᠳᠤ ᠮᠠᠨᠢ ᠡᠶᠢᠮᠦᠷᠬᠦ ᠦᠬᠡᠷ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠦᠯᠢᠭᠡᠷ ᠲᠡᠣᠬᠡ ᠤᠳ ᠣᠯᠠᠨ  ᠯᠡ ᠪᠠᠶᠢᠳᠠᠭ ᠠᠴᠠ ᠡᠪᠦᠭᠡ ᠮᠢᠨᠢ ᠦᠬᠡᠷ ᠲᠤ ᠬᠠᠶᠢᠷᠠᠳᠠᠢ᠂ ᠦᠬᠡᠷ ᠲᠤ ᠡᠭᠡᠯᠢᠳᠠᠢ ᠪᠠᠶᠢᠭᠰᠠᠨ ᠴᠦ ᠮᠡᠳᠡᠨ᠎ᠡ᠃ ᠪᠠᠭ᠎ᠠ ᠳᠤ ᠪᠠᠨ ᠮᠠᠨᠣᠰ ᠰᠠᠭᠠᠬᠠᠯᠳᠠ ᠶᠢᠨ ᠵᠣᠯᠴᠢᠨ ᠡᠪᠦᠭᠡ ᠶᠢᠨ ᠠᠴᠢ ᠨᠠᠷ ᠲᠠᠢ ᠨᠠᠭᠠᠳᠣᠨ ᠲᠣᠭᠯᠠᠵᠣ ᠨᠠᠮᠣᠰᠣ ᠪᠣᠯᠴᠢᠬᠠᠭᠠᠳ ︽ᠲᠡᠮᠡᠭᠡ ᠲᠡᠮᠡᠭᠡ ᠲᠦᠮᠡᠨ ᠯᠠᠩ᠂ ᠲᠦᠮᠡᠳ ᠤᠨ ᠬᠡᠣᠬᠡᠳ ᠮᠢᠩᠭᠠᠨ ᠯᠠᠩ᠂ ᠮᠠᠭᠤ ᠲᠠᠬᠢᠶᠠᠨ ᠭᠤᠷᠪᠠᠨ ᠮᠣ᠋᠂ ᠮᠣᠩᠭᠤᠯᠵᠢᠨ ᠤ ᠬᠦᠦ ᠠᠭᠠᠨ ᠪᠣᠣᠪᠤ︾ ᠭᠡᠵᠦ ᠬᠠᠰᠬᠢᠷᠣᠨ ᠬᠠᠷᠢᠶᠠᠬᠤ ᠳᠤ ᠲᠡᠳᠡ ᠮᠠᠨ ᠤ ᠦᠭᠡᠳᠡ ︽ᠦᠬᠡᠷ ᠬᠠᠯᠬ᠎ᠠ᠂ ᠦᠬᠡᠷ ᠬᠠᠯᠬ᠎ᠠ︾ ᠬᠡᠮᠡᠨ ᠪᠣᠴᠠᠭᠠᠬᠤ ᠳᠤ ᠪᠢ ᠡᠪᠦᠭᠡ ᠶᠢ ᠮᠢᠨᠢ ᠬᠠᠷᠢᠶᠠᠵᠣ ᠪᠠᠶᠢᠨ᠎ᠠ ᠬᠡᠮᠡᠨ ᠬᠤᠷᠣᠰᠣᠯ ᠪᠣᠴᠠᠯᠳᠠᠭ ᠢ ᠨᠢ ᠣᠳᠣ ᠪᠣᠳᠣᠪᠠᠯ ᠦᠨᠡᠬᠡᠷ ᠡᠯᠢᠭᠡ ᠬᠦᠰᠢᠮᠡᠷ ᠡ︕ᠨᠠᠷᠠ ᠬᠠᠯᠠᠵᠣ  ᠴᠠᠶᠢᠯᠵᠠᠨ ᠪᠦᠷᠢᠭᠰᠡᠨ ᠴᠠᠰᠣᠨ ᠤ  ᠲᠡᠭᠡᠭᠦᠷ ᠬᠠᠪᠣᠷ ᠤᠨ ᠵᠡᠷᠭᠡᠯᠭᠡᠨ ᠠᠯᠢᠶᠠᠯᠠᠨ ᠲᠣᠭᠯᠠᠨ᠎ᠠ᠃ ᠡᠮᠦᠨᠡᠰᠢ ᠪᠠᠷᠠᠯᠠᠬᠤ ᠳᠤ ᠴᠠᠶᠢᠯᠵᠠᠬᠤ ᠴᠠᠰᠣᠨ ᠤ ᠲᠣᠮᠳᠠᠭᠤᠷ ᠣᠭᠠᠯᠵᠠᠯᠠᠨ ᠣᠷᠣᠰᠬᠤ ᠮᠣᠷᠢᠨ ᠣᠰᠣᠨ ᠭᠤᠣᠯ ᠤᠨ ᠮᠦᠯᠢᠭᠡᠷ ᠬᠦᠬᠡ ᠣᠰᠣᠨ ᠡᠪᠦᠭᠡ   ᠶᠢᠨ ᠮᠢᠨᠢ ᠡᠮᠦᠰᠳᠡᠭ ᠡᠮᠡᠭᠡ ᠶᠢᠨ ᠣᠶᠣᠭᠰᠠᠨ ᠥᠭᠡᠳᠡᠩ ᠭᠤᠳᠣᠯ ᠤᠨ ᠬᠡ ᠣᠭᠠᠯᠵᠠ ᠮᠡᠳᠦ ᠲᠣᠨᠣᠯᠵᠠᠨ ᠬᠠᠷᠠᠭᠳᠠᠨ᠎ᠠ᠃    ᠡᠪᠦᠭᠡ ᠡᠮᠡᠭᠡ ᠶᠢᠨ ᠮᠢᠨᠢ ᠣᠩᠭᠤᠨ ᠤ  ᠡᠮᠦᠨᠡᠬᠢ ᠴᠠᠰᠣ ᠲᠠᠬᠢᠯᠭ᠎ᠠ ᠶᠢᠨ ᠭᠠᠯ ᠳᠤ ᠬᠠᠶᠢᠯᠣᠨ ᠰᠡᠪᠡᠷᠡᠭᠡᠳ ᠲᠣᠣᠷ᠎ᠠ ᠠᠴᠠ ᠨᠢ ᠨᠢᠯᠬ᠎ᠠ ᠨᠣᠭᠤᠭ᠎ᠠ ᠬᠠᠪᠣᠷ ᠢ ᠪᠢᠴᠢᠭᠯᠡᠨ ᠰᠡᠷᠪᠡᠭᠡᠨᠡᠨ ᠣᠷᠭᠤᠵᠣ ᠪᠠᠶᠢᠪᠠ᠃ᠮᠢᠨᠦ ᠣᠶᠣᠨ ᠪᠣᠳᠣᠯ ᠢ ᠴᠣᠭᠤᠷᠣᠭᠤᠯᠣᠭᠰᠠᠨ᠂ ᠣᠬᠠᠭᠠᠨ ᠪᠢᠯᠢᠭ ᠢ ᠬᠦᠪᠴᠢᠯᠡᠭᠰᠡᠨ ᠡᠪᠦᠭᠡ ᠡᠮᠡᠭᠡ ᠶᠢᠨ ᠮᠢᠨᠢ ᠦᠯᠢᠭᠡᠷ ᠲᠡᠦᠬᠡ᠂ ᠦᠬᠡᠷ ᠤᠨ ᠰᠦᠷᠦᠭ ᠲᠠᠢ ᠪᠠᠨ ᠦᠨᠢᠳᠡ ᠰᠡᠳᠬᠢᠯ ᠵᠢᠷᠦᠬᠡᠨ ᠳᠤ ᠮᠦᠩᠬᠡᠷᠡᠨ ᠠᠮᠢᠯᠠᠨ ᠪᠠᠶᠢᠭᠰᠠᠭᠠᠷ ᠁
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠤᠯᠠᠭᠠᠠ ᠬᠤᠩ︾ ᠢᠰᠭᠦᠯᠭᠦ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠠ᠊ ᠭᠡ ᠭᠡ ᠶᠢᠨ ᠠᠯᠢᠶ᠎ᠠ ᠰᠢᠯᠦᠭ
ᠮᠣᠩᠭᠤᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢᠶᠠᠨ ᠦᠷ᠎ᠡ ᠬᠡᠥᠬᠡᠳ ᠲᠡᠭᠡᠨ ᠦᠪᠯᠡᠭᠦᠯᠦᠨ ᠰᠤᠷᠭᠠᠬᠤ ᠶᠢ ᠨᠡᠶᠢᠭᠡᠮ ᠁
ᠬᠠᠭᠤᠷᠮᠠᠭ ᠠᠷᠢᠭᠢᠨ ᠠᠴᠠ ᠪᠣᠯᠣᠭᠰᠠᠨ ᠬᠤᠣᠷ ᠬᠦᠨᠦᠬᠡᠯ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号