ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠩᠬᠡ ᠶᠢᠨ ᠬᠤᠷᠣᠢ ᠲᠠᠢ ᠡᠰᠡᠷᠡᠭ ᠨᠤᠲᠤᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/8/12
                 ᠡᠩᠬᠡ ᠶᠢᠨ ᠬᠤᠷᠣᠢ ᠲᠠᠢ ᠡᠰᠡᠷᠡᠭ ᠨᠤᠲᠤᠭ                                                     ᠪᠠᠶᠠᠭᠤᠳ ᠰᠦᠷ                 ᠡᠰᠡᠷᠡᠭ ᠨᠤᠲᠤᠭ ᠤᠨ ᠠᠩᠬᠠᠨ ᠤ ᠳᠠᠭᠤᠳᠠᠯᠭ᠎ᠠ             ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ︽ᠮᠣᠩᠭᠤᠯ ᠢ ᠨᠣᠮᠤᠳᠬᠠᠨ ᠳᠠᠷᠤᠬᠤ ᠳᠤ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠰᠠᠭᠤᠯᠭᠠᠬᠤ ᠨᠢ ᠨᠢᠭᠡ ᠰᠦᠮ᠎ᠡ ᠪᠠᠷᠢᠬᠤ ᠶᠢ ᠬᠦᠷᠬᠦ ᠦᠭᠡᠢ︾ ᠭᠡᠳᠡᠭ ᠬᠤᠣᠷᠲᠤ ᠪᠣᠳᠤᠯᠭ᠎ᠠ ᠶᠢᠨ ᠤᠷᠢᠳᠠᠯ ᠳᠣᠣᠷ᠎ᠠ ᠴᠢᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠮᠣᠩᠭᠤᠯ ᠨᠤᠲᠤᠭ ᠲᠤ ᠰᠦᠮ᠎ᠡ ᠬᠡᠶᠢᠳ ᠢ ᠶᠡᠬᠡᠪᠡᠷ ᠴᠣᠭᠴᠠᠯᠠᠨ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠪᠦᠷᠢᠨ ᠪᠣᠰᠤ ᠪᠦᠷᠢᠳᠬᠡᠯ ᠢ ᠦᠨᠳᠦᠰᠦᠯᠡᠪᠡᠯ᠂ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠡᠬᠢ ᠪᠣᠯᠲᠠᠯ᠎ᠠ ᠭᠠᠭᠴᠠᠬᠠᠨ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠳᠤ ᠬᠤᠷᠢᠭᠠᠳ ᠰᠦᠮ᠎ᠡ᠂ ᠵᠣᠣ ᠤᠳᠠ ᠴᠢᠭᠤᠯᠭᠠᠨ ᠳᠤ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠰᠦᠮ᠎ᠡ ᠬᠡᠶᠢᠳ᠂ ᠪᠦᠬᠦᠶᠢᠯᠡ ᠮᠣᠩᠭᠤᠯ ᠣᠷᠣᠨ ᠳᠤ ᠬᠤᠶᠠᠷ ᠮᠢᠩᠭ᠎ᠠ ᠭᠠᠷᠤᠢ ᠰᠦᠮ᠎ᠡ ᠬᠡᠶᠢᠳ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ᠲᠡᠭᠦᠨ ᠤ ᠳᠣᠲᠤᠷᠠᠬᠢ ᠨᠢᠭᠡ ᠪᠣᠯᠬᠤ ᠬᠢᠯᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠶᠢ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ ᠲᠠᠶᠢᠵᠢ ᠭᠠᠶᠠᠭᠠᠯᠳᠠᠨ᠂ ᠲᠦᠪᠡᠭᠳᠡ ᠠᠴᠠ ᠢᠷᠡᠭᠰᠡᠨ ᠯᠣᠨᠰᠠᠩᠴᠣᠶᠢᠵᠢᠷ ᠬᠤᠶᠠᠭᠤᠯᠠ ᠨᠡᠶᠢᠯᠡᠵᠦ᠂ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠪᠠᠶᠢᠯᠠ ᠳᠣᠷᠵᠢᠹᠠᠯᠮᠤ ᠶᠢᠨ ᠳᠡᠮᠵᠢᠯᠭᠡ ᠪᠠᠷ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠳᠥᠴᠢ ᠶᠢᠰᠦᠳᠦᠭᠡᠷ ᠣᠨ᠂ ᠴᠠᠭᠠᠨ ᠪᠠᠷᠰ ᠵᠢᠯ ︵ᠨᠡᠶᠢᠲᠡ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ 1710︶ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠤ ᠡᠳᠦᠷ ᠣᠳᠣ ᠶᠢᠨ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ ᠲᠡᠮᠡᠭᠡᠨ ᠬᠦᠵᠦᠭᠦᠦ ᠨᠤᠲᠤᠭ ᠤᠨ ᠴᠠᠭᠠᠨ ᠰᠢᠷᠡᠭᠡᠲᠦ ᠭᠡᠰᠡᠨ ᠭᠠᠵᠠᠷ ᠪᠠᠶᠢᠭᠤᠯᠤᠭᠰᠠᠨ ᠶᠤᠮ᠃         ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠰᠦᠮ᠎ᠡ ᠬᠡᠶᠢᠳ ᠤᠨ ᠵᠠᠷᠤᠯᠭ᠎ᠠ ᠶᠢ ᠲᠤᠰ ᠬᠤᠰᠢᠭᠤᠨ ᠤ ᠬᠤᠰᠢᠭᠤᠨ ᠰᠠᠩ ᠤᠨ ᠳᠡᠮᠵᠢᠯᠭᠡ ᠠᠴᠠ ᠭᠠᠳᠠᠨ᠎ᠠ ᠣᠷᠣᠨ ᠨᠤᠲᠤᠭ ᠤᠨ ᠮᠠᠯᠴᠢᠳ ᠤᠨ ᠡᠷᠭᠦᠴᠡ ᠪᠠᠷᠢᠴᠠ ᠪᠠᠷ ᠰᠢᠢᠳᠪᠦᠷᠢᠯᠡᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠯᠠᠮ᠎ᠠ ᠬᠤᠸᠠᠷᠠᠭ ᠤᠨ ᠢᠷᠡᠯᠲᠡ ᠨᠢ ᠴᠦ ᠲᠤᠰ ᠰᠦᠮ᠎ᠡ ᠶᠢᠨ ᠬᠠᠷᠢᠶᠠᠨ ᠳᠠᠬᠢ ᠨᠤᠲᠤᠭ ᠤᠰᠤᠨ ᠤ ᠮᠠᠯᠴᠢᠳ ᠤᠨ ᠳᠤᠮᠳᠠ ᠠᠴᠠ ᠰᠤᠩᠭᠤᠵᠤ ᠠᠪᠳᠠᠭ ᠪᠠᠶᠢᠨ᠎ᠠ᠃ ᠣᠳᠬᠤᠨ ᠬᠡᠥᠬᠡᠳ ᠨᠢ ᠭᠤᠯᠤᠮᠲᠠ ᠪᠠᠨ ᠰᠠᠬᠢᠵᠤ᠂ ᠥᠭᠡᠷ᠎ᠡ ᠪᠣᠰᠤᠳ ᠨᠢ ᠪᠦᠷ ᠯᠠᠮᠠ ᠪᠣᠯᠳᠠᠭ ︵ᠵᠡᠮᠳᠡᠭ ᠠᠴᠠ ᠪᠣᠰᠤᠳ︶ ᠬᠡᠴᠡᠭᠦᠦ ᠶᠣᠰᠣᠨ ᠨᠡᠶᠢᠲᠡ ᠮᠣᠩᠭᠤᠯ ᠳᠤ ᠲᠠᠷᠬᠠᠭᠰᠠᠨ ᠨᠢ ᠶᠠᠭ ᠰᠠᠶᠢᠬᠠᠨ ᠮᠠᠨᠵᠤ ᠶᠢᠨ ᠲᠥᠷᠥ ᠶᠢᠨ ᠪᠣᠳᠤᠯᠭ᠎ᠠ ᠲᠠᠢ ᠨᠡᠶᠢᠴᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠮᠠᠨᠵᠤ ᠶᠢᠨ ᠨᠣᠶᠠᠷᠬᠠᠯ ᠤᠨ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠵᠢᠯ ᠳᠤ ᠮᠣᠩᠭᠤᠯ ᠨᠤᠲᠤᠭ ᠤᠨ ᠰᠦᠮ᠎ᠡ ᠬᠡᠶᠢᠳ ᠤᠨ ᠯᠠᠮᠠ ᠬᠤᠸᠠᠷᠠᠭ ᠤᠨ ᠲᠤᠭ᠎ᠠ ᠭᠤᠷᠪᠠᠨ ᠵᠠᠭᠤᠨ ᠲᠦᠮᠡ ᠳᠤ ᠬᠦᠷᠦᠭᠰᠡᠨ ᠨᠢ ᠵᠠᠭᠤᠨ ᠲᠦᠮᠡᠨ ᠬᠦᠮᠦᠨ ᠠᠮᠠ ᠲᠠᠢ ᠦᠨᠳᠦᠰᠦᠲᠡᠨ ᠳᠤ ᠠᠪᠴᠤ ᠬᠡᠯᠡᠪᠡᠯ ᠵᠦᠢᠷᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠬᠤᠬᠢᠷᠠᠯ ᠪᠣᠯᠬᠤ ᠶᠤᠮ᠃         ᠶᠡᠭᠡ ᠬᠤᠪᠢᠰᠬᠠᠯ ᠤᠨ ᠰᠢᠭᠤᠷᠭ᠎ᠠ ᠳᠤ ᠮᠠᠨᠵᠤ ᠴᠢᠩ ᠤᠨ ᠵᠠᠰᠠᠭ ᠨᠤᠷᠠᠭᠰᠠᠨ ᠴᠦ ᠮᠠᠨ ᠤ ᠮᠣᠩᠭᠤᠯᠴᠤᠳ ᠲᠤ ᠠᠪᠴᠤ ᠬᠡᠯᠡᠪᠡᠯ ︽ᠴᠢᠨ᠋ᠸ᠎ᠠ ᠶᠢᠨ ᠠᠮᠠᠨ ᠠᠴᠠ ᠭᠠᠷᠤᠭᠠᠳ ᠪᠠᠷᠰ ᠤᠨ ᠠᠮᠠᠨ ᠳᠤ ᠣᠷᠤᠭᠰᠠᠨ︾ ᠶᠠᠪᠤᠳᠠᠯ ᠪᠣᠯᠵᠤ᠂ ᠢᠷᠭᠡᠨ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ︽ᠬᠢᠲᠠᠳ ᠢᠷᠭᠡᠨ ᠢ ᠨᠡᠭᠦᠯᠭᠡᠨ᠂ ᠬᠢᠯᠢ ᠬᠢᠵᠠᠭᠠᠷ ᠢ ᠪᠠᠬᠢᠵᠢᠭᠦᠯᠬᠦ︾ ᠬᠠᠷᠬᠢᠰ ᠳᠡᠭᠡᠷᠡᠩᠭᠦᠢ ᠦᠨᠳᠦᠰᠦᠲᠡᠨ ᠤ ᠳᠠᠷᠤᠯᠠᠯ ᠶᠠᠪᠤᠭᠤᠯᠵᠤ᠂ ᠨᠤᠲᠤᠭ ᠤᠨ ᠨᠣᠶᠠᠳ ᠲᠠᠢ ᠬᠤᠤᠪᠢᠯᠳᠤᠵᠤ᠂ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠨ᠂ ᠮᠣᠩᠭᠤᠯᠴᠤᠳ ᠤᠨ ᠭᠠᠵᠠᠷ ᠨᠤᠲᠤᠭ ᠢ ᠪᠤᠯᠢᠶᠠᠨ᠂ ᠬᠠᠶᠢᠷ᠎ᠠ ᠨᠠᠶᠢᠷ ᠦᠭᠡᠢ ᠦᠨᠳᠦᠰᠦᠲᠡᠨ ᠤ ᠮᠦᠯᠵᠢᠯ ᠶᠠᠪᠤᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃         1926 ᠣᠨ ᠳᠤ ᠪᠠᠷᠠᠭᠤᠨ ᠣᠩᠨᠢᠭᠤᠳ ᠠᠴᠠ ᠭᠠᠭᠴᠠᠬᠠᠨ ᠦᠬᠡᠷ ᠲᠡᠷᠭᠡ ᠲᠠᠢ ᠢᠷᠡᠭᠰᠡᠨ ᠮᠠ ᠵᠧᠨ ᠦ᠋ ᠠᠬ᠎ᠠ ᠳᠡᠭᠦᠦ ᠬᠤᠶᠠᠭᠤᠯᠠ ᠠᠲᠠᠷ ᠬᠠᠭᠠᠯᠪᠦᠷᠢᠯᠠᠬᠤ ᠲᠣᠪᠴᠢᠶ᠎ᠠ ᠲᠠᠢ ᠰᠦᠯᠪᠡᠭᠡᠯᠡᠨ᠂ ᠬᠡᠲᠦᠬᠡᠨ ᠵᠢᠯ ᠤᠨ ᠳᠣᠲᠤᠷ᠎ᠠ ᠲᠡᠮᠡᠭᠡᠨ ᠬᠦᠵᠦᠭᠦᠦ ᠪᠠᠷ ᠰᠠᠭᠤᠷᠢᠨ ᠭᠠᠵᠠᠷ ᠪᠣᠯᠭᠠᠵᠤ ᠬᠦᠯᠵᠢᠭᠡᠳ᠂ ᠲᠡᠮᠡᠭᠡᠨ ᠬᠦᠵᠦᠭᠦᠦ᠂ ᠪᠢᠯᠡᠭᠦᠲᠠᠢ᠂ ᠤᠯᠠᠭᠠᠨ ᠪᠠᠶᠢᠴᠠ᠂ ᠭᠠᠨᠠᠭ᠂ ᠬᠠᠷ᠎ᠠ ᠡᠷᠭᠢ᠂ ᠴᠠᠭᠠᠨ ᠰᠢᠷᠡᠭᠡᠲᠦ᠂ ᠪᠠᠮᠪᠤ ᠶᠢᠨ ᠵᠢᠯᠠᠭ᠎ᠠ ᠵᠡᠷᠭᠡ ᠭᠠᠵᠠᠷ ᠢ ᠬᠦᠴᠦ ᠳᠠᠷᠤᠯᠠᠨ ᠬᠠᠭᠠᠯᠪᠦᠷᠢᠯᠠᠵᠤ ᠶᠡᠭᠡ ᠬᠡᠮᠵᠢᠶᠡᠨ ᠤ ᠳᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠣᠷᠤᠭᠤᠯᠵᠤ ᠠᠪᠴᠢᠷᠠᠭᠰᠠᠨ ᠪᠠᠶᠢᠨ᠎ᠠ᠃ ᠬᠢᠯᠠᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠨᠢ ᠬᠠᠷᠢᠶ᠎ᠠ ᠭᠠᠵᠠᠷ ᠢᠶᠠᠨ ᠬᠢᠲᠠᠳ ᠲᠤ ᠪᠤᠯᠢᠶᠠᠭᠳᠠᠭᠠᠳ ᠠᠷᠭ᠎ᠠ ᠪᠠᠷᠠᠭᠳᠠᠬᠤ ᠳᠤ ᠪᠠᠨ ᠪᠠᠶᠠᠨ ᠠᠭᠤᠯᠠ ᠶᠢᠨ ᠪᠠᠶᠠᠨ ᠡᠩᠭᠡᠷ ᠭᠡᠬᠦ ᠭᠠᠵᠠᠷ ᠲᠤ ᠨᠡᠭᠦᠵᠦ ᠢᠷᠡᠭᠰᠡᠨ ᠪᠠᠶᠢᠨ᠎ᠠ᠃ ᠨᠤᠲᠤᠭ ᠨᠢ ᠪᠤᠯᠢᠶᠠᠭᠳᠠᠵᠤ᠂ ᠰᠦᠮ᠎ᠡ ᠨᠢ ᠨᠡᠭᠦᠭᠰᠡᠨ ᠠᠴᠠ ᠪᠣᠯᠵᠤ᠂ ᠴᠠᠭᠠᠨ ᠰᠢᠷᠡᠭᠡᠲᠦ᠂ ᠬᠠᠷ᠎ᠠ ᠡᠷᠭᠢ ᠶᠢᠨ ᠮᠠᠯᠴᠢᠳ ᠴᠦ ᠠᠷᠭ᠎ᠠ  ᠪᠣᠰᠤ ᠴᠥᠭᠡᠪᠦᠷᠢ ᠬᠡᠳᠦᠨ ᠮᠠᠯ ᠢᠶᠠᠨ ᠲᠠᠭᠤᠵᠤ᠂ ᠭᠡᠷ ᠡᠷᠦᠬᠡ ᠪᠠᠨ ᠲᠡᠭᠡᠭᠡᠵᠦ᠂ ᠦᠯᠵᠡᠶᠢᠮᠦ᠋ᠷᠡᠨ ᠢ ᠥᠭᠰᠥᠨ ᠥᠭᠡᠳᠡᠯᠡᠵᠦ ᠂ ᠠᠲᠠᠷ ᠬᠠᠭᠠᠯᠪᠦᠷᠢᠯᠠᠬᠤ ᠲᠣᠪᠴᠢᠶᠠᠨ ᠤ ᠴᠢᠩᠵᠣᠷᠢᠭᠲᠤ ︵ᠾᠧ ᠽᠢ ᠵᠠᠩ︶ ᠳᠤ ᠴᠤᠯᠤ ᠮᠥᠩᠭᠦᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠳᠡᠭᠡᠷ᠎ᠡ ᠡᠳ᠋ ᠮᠥᠩᠭᠦ ᠦᠭᠴᠦ᠂ ᠣᠳᠣ ᠶᠢᠨ ᠡᠰᠡᠷᠡᠭ ᠨᠤᠲᠤᠭ ᠲᠤ ᠢᠷᠡᠵᠦ᠂ ᠬᠥᠯ ᠲᠣᠭᠲᠠᠬᠤ ᠬᠦᠨᠳᠦᠬᠡᠨ ᠬᠦᠷᠲᠡᠭᠡᠯ ᠬᠦᠷᠲᠡᠪᠡ᠃ ᠤᠤᠭᠠᠯ ᠨᠤᠲᠤᠭ ᠢᠶᠠᠨ ᠠᠯᠳᠠᠵᠤ᠂ ᠴᠠᠭᠠᠴᠢᠨ ᠤ ᠠᠮᠢᠳᠤᠷᠠᠯ ᠡᠳ᠋ᠯᠡᠵᠦ ᠶᠠᠪᠤᠭᠰᠠᠨ ᠮᠠᠯᠴᠢᠳ ᠠᠷᠠᠢ ᠭᠡᠵᠦ ᠠᠮᠢᠳᠤᠷᠠᠵᠤ ᠣᠷᠤᠩᠨᠠᠬᠤ ᠨᠤᠲᠤᠭ ᠲᠠᠢ ᠪᠣᠯᠤᠭᠰᠠᠨ ᠳᠤ ᠪᠠᠨ ᠣᠮ ᠳᠣᠮ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠳᠡᠭᠡᠳᠦ ᠠᠴᠠ ᠪᠠᠨ ᠠᠪᠤᠭᠠᠳ ᠲᠠᠬᠢᠳᠠᠭ ᠬᠢᠯᠠᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠳᠤ ᠪᠠᠨ ᠣᠴᠢᠵᠤ ᠨᠡᠷ᠎ᠡ ᠭᠤᠶᠤᠵᠠᠢ᠃ ᠤᠤᠭᠠᠯ ᠨᠤᠲᠤᠭ ᠢᠶᠠᠨ ᠳᠡᠭᠡᠷᠡᠮ ᠳᠤ ᠪᠤᠯᠢᠶᠠᠭᠳᠠᠵᠤ᠂ ᠡᠯᠡᠵᠦ ᠲᠡᠯᠡᠵᠦ ᠣᠯᠤᠭᠰᠠᠨ ᠨᠤᠲᠤᠭ ᠨᠢ ᠬᠦᠷᠦᠰᠦ ᠶᠢ ᠨᠢ ᠬᠠᠭᠠᠯᠪᠦᠷᠢᠯᠠᠬᠤ ᠠᠨᠵᠢᠰᠤ ᠦᠭᠡᠢ᠂ ᠬᠤᠶᠢᠨ᠎ᠠ ᠠᠴᠠ ᠨᠢ ᠨᠡᠬᠡᠬᠦ ᠳᠡᠭᠡᠷᠡᠮ ᠦᠭᠡᠢ᠂ ᠡᠯᠡᠭᠦᠦ ᠰᠡᠯᠡᠭᠦᠦ ᠠᠮᠢᠳᠤᠷᠠᠵᠤ᠂ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠪᠠᠨ ᠥᠭᠡᠳᠡ ᠡᠰᠡᠷᠡᠭ ᠪᠠᠶᠢᠬᠤ ᠶᠢ ᠪᠡᠯᠭᠡᠳᠡᠵᠦ ︽ᠡᠰᠡᠷᠡᠭ︾ ᠭᠡᠰᠡᠨ ᠨᠡᠷ᠎ᠡ ᠬᠠᠶᠢᠷᠠᠯᠠᠭᠰᠠᠨ‌‍ᠭᠡᠳᠡᠭ᠃         ᠡᠰᠡᠷᠡᠭ ᠤᠨ ᠠᠶᠢᠯ ᠳᠤ ᠠᠩᠬᠠᠯᠠᠨ ᠢᠷᠡᠭᠰᠡᠨ ᠨᠢ ᠠᠷᠪᠠᠭᠠᠳ ᠡᠷᠦᠬᠡ ᠪᠠᠶᠢᠵᠤ᠂ ᠦᠢᠯᠡ ᠪᠠᠨ ᠦᠵᠡᠵᠦ ᠢᠷᠡᠭᠰᠡᠨ ᠮᠠᠯᠴᠢᠳ ᠮᠠᠨᠢ ᠠᠮᠢᠳᠤᠷᠠᠬᠤ ᠶᠢᠨ ᠡᠷᠬᠡ ᠪᠠᠷ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠳᠤ ᠪᠠᠨ ᠳᠡᠮ ᠪᠣᠯᠵᠤ᠂ ᠬᠦᠮᠦᠨ ᠪᠦᠯᠢ ᠠᠷᠪᠢᠨ ᠰᠢᠭ᠋ ᠨᠢ ᠬᠤᠶᠠᠷ ᠲᠠᠰᠤᠯᠭ᠎ᠠ ᠪᠠᠶᠢᠰᠢᠩ᠂ ᠴᠥᠬᠡᠨ ᠰᠢᠭ ᠨᠢ ᠪᠦᠮᠪᠦᠭᠡᠨ ᠭᠡᠷ ᠪᠠᠷᠢᠵᠤ ᠠᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠡᠬᠢᠯᠡᠭᠰᠡᠨ ᠭᠡᠳᠡᠭ᠃ ᠡᠨᠡ ᠠᠷᠪᠠᠭᠠᠳ ᠠᠶᠢᠯ ᠭᠠᠵᠠᠷ ᠬᠤᠳᠠᠯᠳᠤᠨ ᠠᠪᠬᠤ ᠪᠠᠷ ᠠᠶᠢᠯ ᠪᠦᠷᠢ ᠳᠥᠷᠪᠡᠨ ᠴᠠᠭᠠᠨ ᠵᠣᠭᠤᠰ ᠳᠡᠭᠡᠷ᠎ᠡ ᠬᠤᠨᠢ ᠨᠢᠭᠡ ᠪᠡᠯᠡᠭᠯᠡᠵᠦ᠂ ᠠᠷᠠᠢ ᠭᠡᠵᠦ ᠣᠷᠤᠬᠤ ᠭᠡᠷ ᠣᠣᠭᠤᠴᠢᠬᠤ ᠠᠶᠠᠭ᠎ᠠ  ᠲᠠᠢ ᠪᠣᠯᠣᠭᠰᠠᠨ ᠳᠤ ᠪᠠᠨ ᠪᠠᠶᠠᠷᠯᠠᠭᠠᠳ ᠮᠣᠬᠤᠬᠤ ᠦᠭᠡᠢ ᠪᠠᠶᠢᠵᠠᠢ᠃ ᠡᠳᠡᠭᠡᠷ ᠠᠬᠠᠮᠠᠳ ᠤᠨ ᠲᠤᠬᠠᠢ ᠳᠤᠷᠠᠳᠪᠠᠯ᠂ ᠪᠣᠷᠵᠢᠭᠢᠨ ᠣᠪᠣᠭ ᠤᠨ ᠪᠠᠭᠠᠲᠤᠷ᠂ ᠴᠢᠯᠠᠭᠤᠨ ᠣᠪᠣᠭ ᠤᠨ ᠬᠠᠶᠢᠪᠤ᠂ ᠴᠢᠯᠠᠭᠤᠨ ᠣᠪᠣᠭ ᠤᠨ ᠭᠠᠨᠳᠠᠭ᠂ ᠪᠣᠷᠵᠢᠭᠢᠨ ᠣᠪᠣᠭ ᠤᠨ ᠡᠷᠳᠡᠨᠢᠪᠠᠶᠠᠷ᠂ ᠴᠢᠯᠠᠭᠤᠨ ᠣᠪᠣᠭ ᠤᠨ ᠠᠮᠤᠷᠴᠠᠭ᠂ ᠪᠣᠷᠵᠢᠭᠢᠨ ᠣᠪᠤᠭᠲᠠᠨ ᠰᠧᠷᠵᠠᠪ᠂ ᠮᠦᠩᠬᠡᠴᠤᠤᠯ ᠣᠪᠤᠭᠲᠠᠨ ᠬᠠᠶᠢᠷᠤᠪ ︵ᠦᠶᠡᠴᠦᠦᠯ ᠨᠢ ᠬᠠᠶᠢᠷᠤᠪ ᠭᠡᠳᠡᠭ︶᠂ ᠪᠣᠷᠵᠢᠭᠢᠨ ᠣᠪᠤᠭᠲᠠᠨ ᠠᠰᠬᠠᠨ ᠬᠠᠶᠢᠷᠤᠪ᠂ ᠮᠦᠩᠬᠡᠴᠤᠤᠯ ᠣᠪᠤᠭᠲᠠᠨ ᠮᠢᠨᠵᠤᠤᠷ᠂ ᠮᠦᠩᠬᠡᠴᠤᠤᠯ ᠣᠪᠤᠭᠲᠠᠨ ᠵᠦᠷᠦᠢ ᠬᠠᠶᠢᠷᠤᠪ ︵ᠨᠤᠲᠤᠭ ᠤᠨ ᠬᠦᠮᠦᠨ ᠰᠢᠶᠠᠨᠱᠧᠩ ᠬᠠᠶᠢᠷᠤᠪ ᠭᠡᠵᠦ ᠲᠣᠳᠤᠨᠤᠴᠢᠯᠠᠨ ᠳᠠᠭᠤᠳᠠᠳᠠᠭ᠃ ᠪᠠᠰᠠ ᠵᠠᠷᠢᠮ ᠨᠢ ᠳᠦᠯᠡᠢ ᠬᠠᠶᠢᠷᠤᠪ ᠭᠡᠵᠦ ᠳᠠᠭᠤᠳᠠᠳᠠᠭ︶᠂; ᠮᠦᠬᠡᠴᠤᠤᠯ ᠣᠪᠤᠭᠲᠠᠨ ᠬᠠᠪᠴᠢᠭ᠂ ᠪᠠᠶᠠᠭᠤᠳ ᠣᠪᠤᠭᠲᠠᠨ ᠰᠦᠨ ᠯᠠᠨ᠂ ᠰᠦᠨᠦᠷᠦᠪ ᠠᠬ᠎ᠠ ᠳᠡᠭᠦᠦ ᠬᠤᠶᠠᠭᠤᠯᠠ᠂ ᠰᠢᠷᠠᠨᠤᠳ ᠣᠪᠣᠭᠲᠠᠨ ᠠᠯᠲᠠᠨᠭᠡᠷᠡᠯ᠂ ᠨᠠᠰᠤᠨᠲᠣᠭᠲᠠᠬᠤ ᠵᠡᠷᠭᠡ ᠠᠶᠢᠯ ᠤᠳ ᠨᠤᠲᠤᠭ ᠤᠨ ᠳᠠᠭᠠᠭᠠᠮᠠᠯ ᠪᠣᠣ ᠱᠢ ᠶᠢᠨ ᠳᠠᠭᠠᠭᠤᠯᠯᠠᠭ᠎ᠠ ᠳᠣᠣᠷ᠎ᠠ ᠡᠶ᠎ᠡ ᠡᠪᠲᠡᠢ ᠠᠮᠢᠳᠤᠷᠠᠵᠤ ᠪᠠᠶᠢᠯ᠎ᠠ ᠭᠡᠰᠡᠨ᠃ ᠨᠡᠭᠦᠵᠦ ᠢᠷᠡᠭᠰᠡᠨ ᠠᠷᠪᠠᠭᠠᠳ ᠡᠷᠦᠬᠡ ᠲᠤᠯᠭ᠎ᠠ ᠪᠠᠨ ᠪᠣᠰᠬᠠᠵᠤ᠂ ᠨᠤᠲᠤᠭ ᠤᠨ ᠨᠡᠷ᠎ᠡ ᠪᠠᠨ ᠳᠠᠭᠤᠷᠢᠰᠤᠭᠤᠯᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠳᠡᠭᠡᠷᠡᠮ ᠲᠣᠨᠤᠭ᠎ᠠ ᠠᠴᠠ ᠵᠠᠶᠢᠯᠠᠵᠤ ᠳᠡᠷᠪᠡᠭᠰᠡᠨ ᠠᠭᠤᠶᠢᠲᠤ ᠶᠢᠨ ᠰᠦᠮ᠎ᠡ᠂ ᠬᠠᠷ᠎ᠠ ᠡᠷᠭᠢ᠂ ᠫᠤᠤᠴᠢ ᠶᠢᠨ ᠠᠶᠢᠯ ᠵᠡᠷᠭᠡ ᠭᠠᠵᠠᠷ ᠠᠴᠠ ᠣᠩᠭᠤᠳ ᠣᠪᠤᠭᠲᠠᠨ ᠷᠠᠰᠢ᠂᠂ ᠵᠢᠷᠦᠬᠡ ᠠᠬ᠎ᠠ ᠳᠡᠭᠦᠦ ᠬᠤᠶᠠᠭᠤᠯᠠ᠂ ᠶᠧᠰᠢ᠂ ᠵᠠᠮᠰᠣ ᠵᠡᠷᠭᠡ ᠠᠶᠢᠯ ᠬᠤᠶᠢᠨ᠎ᠠ ᠡᠮᠦᠨ᠎ᠡ ᠠᠴᠠ ᠪᠠᠨ ᠨᠡᠭᠦᠳᠡᠯᠯᠡᠵᠦ ᠢᠷᠡᠭᠡᠳ ᠭᠤᠴᠢᠭᠠᠳ ᠡᠷᠦᠬᠡ ᠲᠠᠢ ᠪᠣᠯᠤᠭᠰᠠᠨ ᠭᠡᠳᠡᠭ᠃                 ᠡᠬᠡ ᠬᠡᠯᠡᠨ ᠤ ᠬᠤᠰᠢᠭᠤᠴᠢ ᠲᠤᠭᠴᠢ         ᠡᠯᠡᠷ ᠪᠠᠯᠠᠷ ᠨᠡᠶᠢᠭᠡᠮ ᠤᠨ ᠤᠷᠤᠰᠬᠠᠯ᠂ ᠢᠷᠭᠡᠨ ᠤᠯᠤᠰ ᠤᠨ ᠲᠥᠷᠥ ᠶᠢᠨ ᠪᠣᠳᠤᠯᠭ᠎ᠠ ᠶᠢᠨ ᠭᠠᠢ ᠪᠠᠷ ᠨᠤᠲᠤᠭ ᠠᠴᠠ ᠪᠠᠨ ᠴᠦᠷᠪᠡᠭᠰᠡᠨ ᠮᠠᠯᠴᠢᠳ ᠮᠠᠨᠢ ᠡᠷᠭᠦᠴᠡ ᠪᠠᠷᠢᠴᠠ ᠶᠢᠨ ᠠᠴᠢ ᠪᠠᠷ ᠥᠪᠡᠷ ᠤᠨ ᠭᠡᠬᠦ ᠨᠤᠲᠤᠭ ᠲᠠᠢ ᠪᠣᠯᠤᠭᠰᠠᠨ ᠳᠤ ᠪᠠᠨ ᠪᠠᠶᠠᠷᠯᠠᠭᠠᠳ ᠪᠠᠷᠠᠬᠤ ᠦᠭᠡᠢ ᠪᠠᠶᠢᠵᠠᠢ᠃ ᠡᠬᠡ ᠨᠤᠲᠤᠭ ᠢᠶᠠᠨ ᠪᠤᠯᠢᠶᠠᠭᠳᠠᠵᠤ᠂ ᠡᠰᠡᠷᠡᠭ ᠤᠨ ᠠᠶᠢᠯ ᠳᠤ ᠨᠡᠭᠦᠵᠦ ᠢᠷᠡᠭᠰᠡᠳ ᠤᠨ ᠳᠣᠲᠤᠷ᠎ᠠ ᠰᠤᠷᠪᠤᠯᠵᠢᠲᠤ ᠡᠷᠦᠬᠡ ᠶᠢᠨ ᠬᠤᠶᠢᠴᠢᠰ ᠴᠦ ᠪᠠᠭ᠎ᠠ ᠪᠣᠰᠤ ᠪᠠᠶᠢᠵᠠᠢ᠃ ᠪᠣᠳᠠᠲᠠᠢ ᠮᠠᠲ᠋ᠧᠷᠢᠶᠠᠯ ᠠᠴᠠ ᠰᠡᠳᠦᠪᠯᠡᠪᠡᠯ ᠡᠰᠡᠷᠡᠭ ᠨᠤᠲᠤᠭ ᠤᠨ ᠴᠢᠯᠠᠭᠤᠨ ᠣᠪᠤᠭᠲᠠᠨ ᠤ ᠳᠡᠭᠡᠳᠦᠰ ᠪᠣᠯᠬᠤ ᠲᠤᠳᠤᠪ ᠭᠡᠳᠡᠭ ᠬᠦᠮᠦᠨ 1898 ᠣᠨ ᠳᠤ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠡᠷᠬᠢᠯᠡᠵᠦ ᠪᠠᠶᠢᠵᠠᠢ᠃ ᠲᠤᠳᠤᠪ ᠪᠠᠭᠰᠢ ᠮᠣᠩᠭᠤᠯ᠂ ᠬᠢᠲᠠᠳ᠂ ᠲᠥᠪᠡᠳ᠂ ᠮᠠᠨᠵᠤ᠂ ᠰᠠᠨᠰᠺᠷᠢᠲ ᠬᠡᠯᠡᠨ ᠳᠤ ᠨᠡᠪᠲᠡᠷᠡᠵᠦ᠂ ᠲᠡᠭᠦᠨ ᠤ ᠬᠦᠮᠦᠵᠢᠭᠦᠯᠦᠭᠰᠡᠨ ᠱᠠᠪᠢ ᠨᠠᠷ ᠠᠴᠠ ᠴᠦ ᠮᠠᠰᠢ ᠣᠯᠠᠨ ᠡᠷᠳᠡᠮᠲᠡᠳ ᠮᠡᠷᠭᠡᠳ ᠴᠤᠯᠭᠤᠷᠠᠯ᠎ᠠ ᠭᠡᠳᠡᠭ ᠶᠤᠮ᠃        ᠬᠤᠯᠠ ᠶᠢᠨ ᠬᠠᠷᠠᠴᠠ ᠲᠠᠢ ᠡᠳᠡᠭᠡᠷ ᠬᠦᠮᠦᠰ ᠤᠨ ᠰᠠᠨᠠᠭᠠᠴᠢᠯᠠᠭ᠎ᠠ ᠪᠠᠷ 1937 ᠣᠨ ᠳᠤ ᠡᠰᠡᠷᠡᠭ ᠨᠤᠲᠤᠭ ᠠᠩᠬᠠᠨ ᠤ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠵᠤ᠂ ᠦᠷ᠎ᠡ ᠬᠡᠥᠬᠡᠳ ᠤᠨ ᠢᠶᠠᠨ ᠰᠤᠶᠤᠯ ᠭᠡᠭᠡᠷᠡᠯ ᠤᠨ ᠡᠭᠦᠳᠡ ᠶᠢ ᠨᠡᠭᠡᠭᠡᠭᠰᠡᠨ ᠭᠡᠳᠡᠭ᠃ ᠪᠠᠭᠰᠢ ᠪᠠᠷ ᠲᠤᠰ ᠨᠤᠲᠤᠭ ᠤᠨ ᠮᠦᠩᠬᠡᠴᠤᠤᠯ ᠣᠪᠤᠭᠲᠠᠨ ᠬᠠᠶᠢᠷᠤᠪ ᠠᠵᠢᠯᠯᠠᠵᠤ ᠂ ᠸᠠᠩᠴᠤᠭᠮ᠎ᠠ ︵ᠬᠠᠶᠢᠷᠤᠪ ᠪᠠᠭᠰᠢ ᠶᠢᠨ ᠥᠬᠢᠨ︶᠂ ᠨᠠᠩᠵᠠ ︵ᠥᠬᠢᠨ︶᠂ ᠷᠠᠪᠳᠠᠨᠳᠤᠷᠵᠢ᠂ ᠭᠧᠯᠡᠭᠵᠠᠮᠰᠤ᠂ ᠵᠠᠩᠴᠤᠷᠠᠪᠳᠠᠨ᠂ ᠶᠧᠰᠢ᠂ ᠰᠧᠳᠣᠷᠵᠢ᠂ ᠲᠡᠮᠦᠷᠭᠤᠣᠯᠲᠤ᠂ ᠰᠧᠷᠤᠳᠤ᠂ ᠠᠷᠢᠶᠠᠨᠳᠠᠪᠢ᠂ ᠶᠣᠨᠳᠣᠨᠵᠦ᠋ᠩᠨᠠᠢ ᠵᠡᠷᠭᠡ ᠬᠦᠮᠦᠰ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠩᠬᠠᠨ ᠤ ᠰᠤᠷᠤᠭᠴᠢ ᠪᠠᠷ ᠰᠤᠷᠤᠯᠴᠠᠵᠤ ᠪᠠᠶᠢᠵᠠᠢ᠃        ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠨᠦᠬᠦᠴᠡᠯ ᠲᠤᠩ ᠪᠠᠷᠤᠭᠲᠠᠢ ᠪᠠᠶᠢᠵᠤ᠂ ᠬᠠᠶᠢᠷᠤᠪ ᠪᠠᠭᠰᠢ ᠶᠢᠨ ᠬᠤᠶᠠᠷ ᠲᠠᠰᠤᠯᠭ᠎ᠠ ᠰᠢᠪᠠᠷ ᠭᠡᠷ ᠲᠤ ᠰᠢᠬᠠᠯᠴᠠᠨ ᠰᠠᠭᠤᠵᠤ᠂ ᠦᠨᠡᠰᠦᠨ ᠰᠠᠮᠪᠠᠷ᠎ᠠ ︵ᠮᠣᠳᠣᠨ ᠬᠠᠪᠲᠠᠰᠤ ᠳᠡᠭᠡᠷ᠎ᠡ ᠲᠣᠰᠤ ᠲᠦᠷᠬᠢᠵᠦ᠂ ᠳᠡᠭᠡᠷ᠎ᠡ ᠨᠢ ᠦᠨᠡᠰᠦ ᠦᠷᠦᠭᠡᠳ ᠵᠢᠭᠳᠡ ᠲᠡᠭᠰᠢᠯᠡᠵᠦ᠂ ᠬᠤᠷᠤᠭᠤ ᠪᠣᠶᠤ ᠨᠠᠷᠢᠨ ᠦᠵᠦᠭᠦᠷᠲᠦ ᠮᠣᠳᠣᠨ ᠱᠣᠷᠣ ᠪᠠᠷ ᠪᠢᠴᠢᠵᠦ ᠵᠢᠷᠤᠬᠤ︶ ᠪᠣᠶᠤ ᠡᠬᠡ ᠭᠠᠵᠠᠷ ᠤᠨ ᠡᠯᠡᠰᠦ ᠮᠠᠩᠬᠠᠨ ᠳᠤ ᠪᠤᠷᠭᠠᠰᠤᠨ ᠰᠠᠯᠠᠭ᠎ᠠ ᠪᠠᠷ ᠪᠢᠴᠢᠵᠦ ᠰᠤᠷᠴᠤ ᠪᠠᠶᠢᠭᠰᠠᠨ ᠭᠡᠳᠡᠭ᠃ ᠰᠤᠷᠬᠤ ᠠᠭᠤᠯᠭ᠎ᠠ ᠨᠢ ᠭᠤᠤᠯᠳᠠᠭᠤ 12 ᠴᠠᠭᠠᠨ ᠲᠣᠯᠤᠭᠠᠢ ︵ᠡᠭᠡᠰᠢᠭ ᠳᠣᠯᠤᠭ᠎ᠠ ᠳᠡᠭᠡᠷ᠎ᠡ 12 ᠳᠡᠪᠢᠰᠭᠡᠷ ᠦᠰᠦᠭ ᠢ ᠵᠠᠯᠭᠠᠵᠤ ᠪᠢᠴᠢᠬᠦ ᠶᠢ 12 ᠴᠠᠭᠠᠨ ᠲᠣᠯᠣᠭᠠᠢ ᠭᠡᠳᠡᠭ︶ ᠪᠠ ᠲᠣᠭᠠᠨ ᠤ ᠤᠬᠠᠭᠠᠨ ᠤ ᠳᠦᠭᠦᠮ ᠪᠣᠳᠣᠯᠭ᠎ᠠ ᠶᠢ ᠵᠢᠭᠠᠵᠤ ᠪᠠᠶᠢᠵᠠᠢ᠃        ᠣᠯᠠᠨ ᠰᠢᠯᠲᠠᠭᠠᠨ ᠠᠴᠠ ᠪᠣᠯᠵᠤ᠂ 1945 ᠣᠨ ᠳᠤ ᠶᠠᠮᠤᠨ ᠰᠦᠮ᠎ᠡ ︵ᠣᠳᠣ ᠶᠢᠨ ᠤᠯᠠᠭᠠᠨᠪᠠᠶᠢᠴᠠ︶ ᠳᠤ ᠰᠢᠯᠵᠢᠨ᠂ ᠡᠰᠡᠷᠡᠭ ᠤᠯᠠᠭᠠᠨᠪᠠᠶᠢᠴᠠ ᠬᠤᠶᠠᠷ ᠠᠶᠢᠯ ᠤᠨ ᠬᠡᠥᠬᠡᠳ ᠢ ᠴᠤᠭᠯᠠᠭᠤᠯᠵᠤ᠂ ᠶᠠᠮᠤᠨ ᠰᠦᠮ᠎ᠡ ᠠᠴᠠ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠭᠡᠷ ᠵᠢᠭᠡᠯᠡᠵᠦ᠂ ᠬᠢᠴᠢᠶᠡᠯᠯᠡᠵᠦ ᠪᠠᠶᠢᠪᠠ᠃ ᠪᠢᠴᠢᠭ ᠤᠨ ᠬᠡᠷᠡᠭᠰᠡᠯ ᠤᠨ ᠲᠠᠯ᠎ᠠ ᠪᠠᠷ ᠪᠠᠭ᠎ᠠ ᠳᠡᠭᠡᠭᠰᠢᠯᠡᠯᠲᠡ ᠲᠠᠢ ᠪᠠᠶᠢᠵᠤ᠂ ᠰᠦᠮ᠎ᠡ ᠶᠢᠨ ᠡᠪᠳᠡᠭᠳᠡᠯ ᠠᠴᠠ ᠣᠯᠤᠭᠰᠠᠨ ᠭᠠᠨᠵᠤᠤᠷ ᠳ᠋ᠠᠨᠵᠤᠤᠷ ᠰᠤᠳᠤᠷ ᠤᠨ ᠴᠠᠭᠠᠰᠤ ᠶᠢ ᠤᠰᠤᠨ ᠳᠤ ᠳᠡᠪᠲᠦᠭᠡᠵᠦ᠂ ᠳᠠᠬᠢᠵᠤ ᠱᠠᠭᠠᠯᠤᠭᠠᠳ᠂ ᠲᠤᠭᠤᠯᠭᠠᠨ ᠪᠢᠷ ᠢᠶᠠᠷ ᠪᠢᠴᠢᠳᠡᠭ ᠪᠠᠶᠢᠵᠠᠢ᠃        ᠬᠦᠴᠢᠷ ᠪᠡᠷᠬᠡᠰᠢᠶᠡᠯᠲᠦ ᠣᠨ ᠵᠢᠯ ᠳᠤ ᠡᠬᠡ ᠬᠡᠯᠡ ᠪᠠᠨ ᠤᠯᠠᠮᠵᠢᠯᠠᠵᠤ ᠪᠠᠶᠢᠭᠰᠠᠨ ᠵᠣᠷᠢᠭ ᠰᠠᠨᠠᠭ᠎ᠠ ᠶᠢ ᠪᠢᠰᠢᠷᠡᠬᠦ ᠦᠭᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠃ ᠠᠬᠠᠮᠠᠳ ᠨᠢᠭᠡ ᠦᠶ᠎ᠡ ᠶᠢᠨ ᠴᠢᠷᠮᠠᠶᠢᠯᠭ᠎ᠠ ᠪᠠᠷ ᠰᠤᠶᠤᠯᠵᠢᠨ ᠰᠡᠭᠡᠭᠡᠷᠡᠭᠰᠡᠨ ᠡᠳᠡᠭᠡᠷ ᠬᠦᠮᠦᠰ ᠴᠦ ᠥᠪᠡᠷ ᠤᠨ ᠰᠤᠤᠲᠤ ᠤᠬᠠᠭᠠᠨ᠂ ᠰᠤᠶᠤᠯ ᠪᠣᠯᠪᠠᠰᠤᠷᠠᠯ ᠢᠶᠠᠷ ᠢᠶᠠᠨ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠠᠷᠢᠭᠤᠨ ᠠᠯᠳᠠᠷ ᠢ ᠡᠷᠭᠦᠵᠦ ᠢᠷᠡᠭᠰᠡᠨ ᠶᠤᠮ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠠᠴᠠ ᠴᠤᠯᠭᠤᠷᠠᠵᠤ ᠭᠠᠷᠤᠭᠰᠠᠨ ᠬᠦᠮᠦᠰ ᠢ ᠲᠠᠨᠢᠯᠴᠠᠭᠤᠯᠪᠠᠯ᠄ᠶᠧᠰᠢ ︵1928 —  ︖︶ 1937 ᠣᠨ ᠳᠤ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠳᠤ ᠡᠬᠢᠯᠡᠨ ᠰᠠᠭᠤᠵᠤ᠂ 1939 ᠣᠨ ᠳᠤ ᠪᠡᠶᠢᠰᠡ ᠶᠢᠨ ᠰᠦᠮ᠎ᠡ ︵ᠣᠳᠣ ᠶᠢᠨ ᠯᠢᠨᠳᠦ᠋ᠩ ᠪᠠᠯᠭᠠᠰᠤ︶ ᠶᠢᠨ ᠤᠳᠬ᠎ᠠ ᠮᠠᠨᠳᠤᠬᠤ ᠤᠯᠤᠰ ᠠᠷᠠᠳ ᠤᠨ ᠦᠯᠡᠮᠵᠢ ᠵᠡᠷᠭᠡ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠨ᠂ ᠬᠤᠵᠢᠮ ᠨᠢ ᠥᠪᠥᠷ ᠮᠣᠩᠭᠤᠯ ᠤᠨ ᠣᠢ ᠰᠢᠭᠤᠢ ᠶᠢᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠠᠴᠠ ᠲᠡᠭᠦᠰᠴᠦ᠂ ᠬᠥᠯᠥᠨ ᠪᠣᠶᠢᠷ ᠠᠶᠢᠮᠠᠭ ᠤᠨ ᠠ ᠯᠦᠩ ᠱᠠᠨ ᠣᠢ ᠰᠢᠭᠤᠢ ᠶᠢᠨ ᠲᠣᠪᠴᠢᠶᠠᠨ ᠤ ᠲᠣᠪᠴᠢᠶᠠᠨ ᠳᠠᠷᠤᠭ᠎ᠠ ᠪᠠᠷ ᠠᠵᠢᠯᠯᠠᠵᠤ ᠪᠠᠶᠢᠵᠠᠢ᠃ᠰᠡᠴᠡᠨᠪᠠᠲᠤ ︵1928 — 2010︶ ᠪᠠᠭ᠎ᠠ ᠶᠢᠨ ᠨᠡᠷ᠎ᠡ ᠨᠢ ᠵᠠᠩᠴᠤᠪᠷᠠᠪᠳᠠᠨ ᠭᠡᠳᠡᠭ᠃ 1937 ᠣᠨ ᠳᠤ ᠪᠡᠶᠢᠰᠡ ᠶᠢᠨ ᠰᠦᠮ᠎ᠡ︵ᠣᠳᠣ ᠶᠢᠨ ᠯᠢᠨᠳᠦ᠋ᠩ ᠪᠠᠯᠭᠠᠰᠤ︶ ᠶᠢᠨ ᠤᠳᠬ᠎ᠠ ᠮᠠᠨᠳᠤᠬᠤ ᠤᠯᠤᠰ ᠠᠷᠠᠳ ᠤᠨ ᠦᠯᠡᠮᠵᠢ ᠵᠡᠷᠭᠡ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠳᠠᠪᠰᠢᠨ ᠰᠤᠷᠤᠯᠴᠠᠪᠠ᠃ 1946 ᠣᠨ ᠳᠤ ᠬᠤᠪᠢᠰᠬᠠᠯ ᠳᠤ ᠣᠷᠤᠯᠴᠠᠨ᠂ ᠲᠤᠰ ᠵᠢᠯ ᠳᠤ ᠨᠢ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳᠤ ᠣᠴᠢᠵᠤ ᠰᠤᠷᠤᠯᠴᠠᠪᠠ᠃        ᠲᠡᠷᠡ ᠤᠷᠢᠳ ᠬᠤᠵᠢᠳ ᠰᠣᠮᠤᠨ ᠤ ᠳᠡᠰ ᠤᠨ ᠺᠠᠳ᠋ᠷ᠂ ᠬᠤᠰᠢᠭᠤᠨ ᠤ ᠳᠡᠰ ᠤᠨ ᠺᠠᠳ᠋ᠷ ᠢᠶᠠᠷ ᠠᠵᠢᠯᠯᠠᠵᠤ᠂ 1964 ᠣᠨ ᠳᠤ ᠵᠣᠣ ᠤᠳᠠ ᠠᠶᠢᠮᠠᠭ ᠤᠨ ᠷᠠᠳᠢᠤ᠋ ᠬᠤᠷᠢᠶᠠᠨ ᠤ ᠨᠠᠶᠢᠷᠠᠭᠤᠯᠬᠤ ᠬᠡᠯᠲᠡᠰ ᠤᠨ ᠡᠷᠬᠢᠯᠡᠭᠴᠢ᠂ 1972 ᠣᠨ ᠳᠤ ᠵᠣᠣ ᠤᠳᠠ ᠠᠶᠢᠮᠠᠭ ᠤᠨ ᠬᠦᠩᠭᠡᠨ ᠠᠵᠤ ᠦᠢᠯᠡᠳᠪᠦᠷᠢ ᠶᠢᠨ ᠲᠣᠪᠴᠢᠶᠠᠨ ᠤ ᠠᠯᠪᠠᠨ ᠭᠡᠷ ᠤᠨ ᠡᠷᠬᠢᠯᠡᠭᠴᠢ᠂ ᠤᠯᠤᠰ ᠤᠨ ᠲᠠᠷᠢᠶᠠᠯᠠᠩ ᠮᠠᠯᠵᠢᠯ ᠤᠨ ᠲᠠᠯᠠᠪᠠᠢ ᠶᠢᠨ ᠬᠢᠨᠠᠨ ᠵᠢᠯᠤᠭᠤᠳᠤᠭᠴᠢ ᠵᠡᠷᠭᠡ ᠠᠵᠢᠯ ᠡᠭᠦᠷᠭᠡ ᠶᠢ ᠡᠭᠦᠷᠭᠡᠯᠡᠵᠦ ᠪᠠᠶᠢᠵᠠᠢ᠃        ᠭᠧᠯᠡᠭᠵᠠᠮᠰᠤ ︵1928 — 1997︶ 8 ᠨᠠᠰᠤᠲᠠᠢ ᠳᠤ ᠪᠠᠨ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠵᠤ᠂ 11 ᠨᠠᠰᠤᠨ ᠳᠤ ᠪᠠᠨ ᠪᠡᠶᠢᠰᠡ ᠶᠢᠨ ᠰᠦᠮ᠎ᠡ ᠳᠤ ᠣᠴᠢᠨ᠂ 19 ᠨᠠᠰᠤᠨ ᠳᠤ ᠪᠠᠨ ᠬᠤᠪᠢᠰᠬᠠᠯ ᠳᠤ ᠣᠷᠤᠯᠴᠠᠨ ᠴᠡᠷᠢᠭ ᠲᠤ ᠣᠷᠤᠵᠤ᠂ ᠭᠤᠮᠢᠨᠳᠠᠩ ᠤᠨ ᠳᠡᠷᠰᠯᠡᠭᠦᠴᠦᠳ ᠲᠠᠢ ᠪᠠᠶᠢᠯᠳᠤᠨ ᠶᠠᠪᠤᠵᠠᠢ᠃        ᠴᠡᠷᠢᠭ ᠠᠴᠠ ᠬᠠᠯᠠᠭᠳᠠᠭᠰᠠᠨ ᠤ ᠳᠠᠷᠠᠭ᠎ᠠ ᠰᠢᠯᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠬᠠᠨ ᠠᠭᠤᠯᠠ ᠰᠣᠮᠣᠨ ᠤ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠤᠬᠠᠭᠤᠯᠬᠤ ᠭᠡᠰᠢᠭᠦᠨ᠂ ᠵᠣᠬᠢᠶᠠᠨ ᠪᠠᠶᠢᠭᠤᠯᠬᠤ ᠭᠡᠰᠢᠭᠦᠨ ᠵᠡᠷᠭᠡ ᠡᠭᠦᠷᠭᠡ ᠲᠤᠰᠢᠶᠠᠯ ᠢ ᠡᠭᠦᠷᠭᠡᠯᠡᠵᠦ ᠪᠠᠶᠢᠵᠠᠢ᠃        ᠶᠣᠨᠳᠣᠨᠵᠦ᠋ᠩᠨᠠᠢ ︵1928 —  ︖︶ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠶᠤᠯ ᠮᠡᠳᠡᠯᠭᠡ ᠶᠢᠨ ᠠᠩᠬᠠᠨ ᠤ ᠰᠢᠮ᠎ᠡ ᠶᠢ ᠬᠦᠷᠲᠡᠵᠦ᠂ ᠴᠠᠭᠠᠨ ᠲᠣᠯᠤᠭᠠᠢ ᠪᠠᠨ ᠨᠢᠳᠦᠯᠡᠵᠦ᠂ ᠰᠤᠷᠬᠤ ᠶᠢᠨ ᠪᠠᠬ᠎ᠠ ᠳᠤ ᠬᠦᠲᠦᠯᠦᠭᠳᠡᠵᠦ ᠶᠠᠪᠤᠬᠤ ᠳᠤ  ᠨᠢ ᠠᠵᠤ ᠠᠬᠤᠢ ᠶᠢᠨ ᠬᠦᠴᠢᠷᠳᠡᠯ ᠠᠴᠠ ᠪᠣᠯᠵᠤ ᠳᠣᠷᠭᠤᠨ ᠵᠣᠭᠰᠤᠵᠠᠢ᠃ ᠭᠡᠪᠡᠴᠦ ᠲᠡᠷᠡ ᠰᠤᠷᠬᠤ ᠶᠢᠨ ᠰᠠᠶᠢᠬᠠᠨ ᠳᠤ ᠪᠠᠭ᠋ᠠᠷᠬᠠᠭᠰᠠᠨ ᠳᠤ ᠪᠠᠨ ᠴᠡᠷᠢᠭ ᠤᠨ ᠠᠯᠪᠠᠨ ᠳᠤ ᠣᠴᠢᠭᠰᠠᠨ ᠴᠦ ᠡᠬᠡ ᠬᠡᠯᠡ᠂ ᠡᠷᠳᠡᠮ ᠰᠤᠷᠬᠤ ᠬᠦᠰᠡᠯ ᠢᠶᠠᠨ ᠬᠠᠶᠠᠭ᠎ᠠ ᠦᠭᠡᠢ ᠪᠠᠶᠢᠵᠠᠢ᠃ᠴᠡᠷᠢᠭ ᠤᠨ ᠠᠯᠪᠠᠨ ᠠᠴᠠ ᠬᠠᠯᠠᠭᠳᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠰᠢᠯᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠪᠠᠶᠠᠨᠰᠢᠯᠢ ᠴᠡᠷᠢᠭ ᠤᠨ ᠠᠭᠲᠠ ᠶᠢᠨ ᠲᠠᠯᠠᠪᠠᠢ ᠶᠢᠨ ᠳᠠᠷᠤᠭ᠎ᠠ᠂ ᠭᠤᠷᠤᠬᠠᠨ ᠲᠠᠯᠠᠪᠠᠢ ᠶᠢᠨ ᠳᠠᠷᠤᠭ᠎ᠠ᠂ ᠭᠤᠷᠤᠬᠠᠨ ᠲᠠᠯᠠᠪᠠᠢ ᠶᠢᠨ ᠱᠦᠵᠢ ᠵᠡᠷᠭᠡ ᠠᠵᠢᠯ ᠠᠯᠪᠠ ᠶᠢ ᠡᠭᠦᠷᠭᠡᠯᠡᠵᠦ ᠪᠠᠶᠢᠵᠠᠢ᠃        ᠬᠤᠣᠰᠪᠠᠶᠠᠷ ︵1939 —  ︶ ᠠᠬᠠᠮᠠᠳ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ᠃ 1947 ᠣᠨ ᠳᠤ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠳᠤ ᠦᠰᠦᠭ ᠨᠢᠳᠦᠯᠡᠵᠦ᠂ 1957 ᠣᠨ ᠳᠤ ᠯᠢᠨᠳᠦ᠋ᠩ ᠤᠨ ᠬᠤᠶᠠᠳᠤᠭᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢ ᠲᠡᠭᠦᠰᠬᠡᠵᠦ᠂ ᠲᠤᠰ ᠵᠢᠯ ᠳᠤ ᠪᠠᠨ ᠥᠩᠭᠡ ᠭᠡᠷᠡᠯᠲᠡᠢ ᠪᠠᠷ ᠠᠷᠠᠳ ᠤᠨ ᠴᠢᠯᠦᠭᠡᠯᠡᠬᠦ ᠴᠡᠷᠢᠭ ᠲᠤ ᠡᠯᠰᠡᠭᠳᠡᠪᠡ᠃        ᠴᠡᠷᠢᠭ ᠳᠡᠭᠡᠷ᠎ᠡ ᠪᠠᠨ ᠰᠠᠯᠠᠭᠠᠨ ᠳᠠᠷᠤᠭ᠎ᠠ᠂ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠶᠢᠨ ᠬᠠᠮᠠᠭᠠᠯᠠᠭᠴᠢ ᠶᠢᠨ ᠳᠠᠷᠤᠭ᠎ᠠ ᠵᠡᠷᠭᠡ ᠲᠤᠰᠢᠶᠠᠯ ᠢ ᠬᠠᠷᠢᠭᠤᠴᠠᠵᠤ᠂ 1959 ᠣᠨ ᠳᠤ ᠥᠪᠥᠷ ᠮᠣᠩᠭᠤᠯ ᠤᠨ ᠮᠣᠷᠢᠲᠤ ᠴᠡᠷᠢᠭ ᠲᠥᠪᠡᠳ ᠢ ᠴᠢᠯᠦᠭᠡᠯᠡᠬᠦ ᠳᠠᠶᠢᠨ ᠳᠤ ᠣᠷᠤᠯᠴᠠᠵᠤ ᠰᠢᠷᠬᠠᠲᠤᠭᠠᠳ᠂ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠵᠠᠢ᠃ ᠣᠳᠣ ᠵᠡᠮᠳᠡᠭ ᠴᠡᠷᠢᠭ ᠤᠨ ᠬᠦᠷᠲᠡᠭᠡᠮᠵᠢ ᠬᠦᠷᠲᠡᠵᠦ᠂ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠬᠥᠭᠵᠢᠯ ᠤᠨ ᠲᠥᠯᠥᠭᠡ ᠭᠠᠷᠮᠠᠭᠠᠶᠢᠯᠠᠵᠤ ᠪᠣᠢ᠃        1949 ᠣᠨ ᠳᠤ ᠡᠰᠡᠷᠡᠭ ᠰᠤᠷᠭᠠᠭᠤᠯᠢ ᠨᠢ ᠡᠰᠡᠷᠡᠭ ᠠᠶᠢᠯ ᠳᠤ ᠪᠠᠨ ᠳᠠᠬᠢᠨ ᠪᠠᠶᠢᠭᠤᠯᠤᠭᠳᠠᠵᠤ᠂ ᠤᠭᠳᠤᠮᠵᠢ ᠶᠢᠨ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠭᠡᠷ ᠪᠠᠶᠢᠰᠢᠩ ᠢ ᠵᠢᠭᠡᠯᠡᠵᠦ᠂ ᠵᠠᠰᠠᠨ ᠴᠡᠪᠡᠷᠯᠡᠭᠡᠳ᠂ ᠬᠢᠴᠢᠶᠡᠯ ᠤᠨ ᠲᠠᠩᠬᠢᠮ ᠪᠣᠯᠭᠠᠵᠠᠢ᠃ ᠬᠡᠷᠡᠭᠯᠡᠭᠡᠨ ᠤ ᠲᠠᠯ᠎ᠠ ᠪᠠᠷ ᠰᠢᠪᠠᠷ ᠬᠠᠨᠵᠤ ᠠᠴᠠ ᠰᠢᠪᠠᠷ ᠰᠠᠨᠳᠠᠯᠢ ᠪᠣᠯᠤᠨ ᠬᠤᠪᠢᠷᠠᠵᠤ᠂ ᠵᠢᠭᠠᠨ ᠰᠤᠷᠭᠠᠬᠤ ᠠᠵᠢᠯ ᠢᠶᠠᠨ ᠡᠪᠯᠡᠭᠦᠯᠵᠦ ᠡᠬᠢᠯᠡᠭᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃ᠵᠢᠷᠠᠭᠠᠳ ᠵᠢᠯ ᠤᠨ ᠰᠠᠯᠬᠢ ᠰᠢᠭᠤᠷᠭ᠎ᠠ ᠶᠢ ᠰᠦᠷᠴᠦ᠂ ᠨᠤᠲᠤᠭ ᠤᠨ ᠮᠣᠩᠭᠤᠯᠴᠤᠳ ᠤᠨ ᠰᠣᠶᠤᠯᠵᠢᠨ ᠭᠡᠭᠡᠷᠡᠬᠦ ᠳᠤ ᠰᠠᠭᠤᠷᠢ ᠲᠠᠯᠪᠢᠭᠰᠠᠨ ᠡᠰᠡᠷᠡᠭ ᠰᠤᠷᠭᠠᠭᠤᠯᠢ ᠮᠠᠨᠢ ᠴᠠᠭ ᠲᠥᠷᠥ ᠶᠢᠨ ᠲᠡᠭᠰᠢᠷᠡᠯ᠂ ᠨᠡᠶᠢᠭᠡᠮ ᠨᠡᠶᠢᠲᠡ ᠶᠢᠨ ᠬᠦᠭᠵᠢᠯ ᠤᠨ ᠳᠤᠮᠳᠠ ᠣᠯᠠᠨ ᠳᠠᠬᠢᠨ ᠵᠠᠰᠠᠨ ᠰᠢᠨᠡᠳᠬᠡᠭᠳᠡᠵᠦ᠂ ᠭᠡᠷ ᠪᠠᠷᠢᠯᠭ᠎ᠠ ᠶᠢᠨ ᠲᠠᠯ᠎ᠠ ᠪᠠᠷ ᠴᠣ ᠰᠢᠨ᠎ᠡ ᠳᠣᠯᠤᠭᠠᠨ ᠲᠠᠰᠤᠯᠭ᠎ᠠ ᠸᠠᠭᠠᠷ ᠲᠣᠭᠤᠰᠬᠠᠨ ᠪᠦᠲᠦᠴᠠ ᠲᠠᠢ ᠪᠠᠶᠢᠰᠢᠩ ᠪᠣᠯᠤᠨ ᠪᠠᠷᠢᠭᠳᠠᠵᠤ᠂ ᠡᠷᠭᠢᠨ ᠲᠣᠭᠤᠷᠢᠨ ᠳᠤ ᠪᠠᠨ ᠲᠣᠭᠤᠰᠬᠠᠨ ᠬᠡᠷᠡᠮ ᠲᠠᠢ᠂ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠤᠨ ᠲᠠᠯ᠎ᠠ ᠪᠠᠷ ᠴᠦ ᠮᠦᠨ ᠲᠤᠩ ᠶᠡᠭᠡ ᠳᠠᠪᠰᠢᠯᠲᠠ ᠲᠠᠢ ᠪᠣᠯᠤᠭᠠᠳ ᠪᠠᠶᠢᠯ᠎ᠠ᠃        ᠡᠰᠡᠷᠡᠭ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ ᠰᠤᠷᠤᠭᠴᠢᠳ ᠬᠠᠮᠤᠭ ᠣᠯᠠᠨ ᠳᠤ ᠪᠠᠨ 120 ᠬᠦᠮᠦᠨ ᠳᠤ ᠬᠦᠷᠴᠦ᠂ ᠪᠠᠭᠰᠢ ᠠᠵᠢᠯᠲᠠᠨ 8 ᠬᠦᠮᠦᠨ ᠪᠣᠯᠵᠤ ᠪᠠᠶᠢᠭᠰᠠᠨ᠃ ᠡᠯ᠎ᠡ ᠲᠥᠷᠥᠯ ᠤᠨ ᠬᠢᠴᠢᠶᠡᠯ ᠢ ᠪᠦᠬᠦᠨ ᠢ ᠨᠡᠭᠡᠭᠡᠵᠦ᠂ ᠬᠤᠰᠢᠭᠤ ᠰᠣᠮᠣ ᠬᠡᠪᠴᠢᠶᠡᠨ ᠤ ᠱᠠᠩᠨᠠᠯ ᠬᠦᠬᠢᠭᠦᠯᠦᠯ ᠢ ᠣᠯᠠᠨᠲᠠ ᠲᠣᠰᠴᠤ ᠪᠠᠶᠢᠭᠰᠠᠨ᠃ ᠡᠰᠡᠷᠡᠭ ᠰᠤᠷᠭᠠᠭᠤᠯᠢ ᠶᠢᠨ ᠵᠥᠭᠡᠯᠡᠨ ᠬᠠᠶᠢᠷ᠎ᠠ ᠪᠠᠷ ᠲᠣᠷᠨᠢᠵᠤ᠂ ᠡᠷᠳᠡᠮ ᠰᠤᠶᠤᠯ ᠤᠨ ᠢᠪᠡᠭᠡᠯ ᠢ ᠬᠦᠷᠲᠡᠵᠦ᠂ ᠨᠡᠶᠢᠭᠡᠮ ᠨᠡᠶᠢᠲᠡ ᠳᠤ ᠪᠠᠨ ᠲᠤᠰᠠᠲᠠᠢ᠂ ᠨᠡᠶᠢᠲᠡ ᠣᠯᠠᠨ ᠳᠤ ᠪᠠᠨ ᠬᠦᠷᠢᠶᠡᠯᠡᠯ ᠲᠠᠢ ᠣᠯᠠᠨ ᠣᠯᠠᠨ ᠰᠠᠶᠢᠴᠤᠳ ᠴᠣᠯᠭᠤᠷᠠᠨ ᠭᠠᠷᠤᠭᠰᠠᠨ᠃ ᠡᠳᠡᠭᠡᠷ ᠠᠴᠠ ᠳᠤᠷᠠᠳᠪᠠᠯ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠦᠨᠳᠦᠰᠦᠲᠡᠨ ᠤ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠫᠷᠦᠹᠧᠰᠰᠤᠷ ᠵᠣᠣ ᠢᠦᠢ ᠢᠩ᠂ ᠲᠦᠩᠯᠢᠶᠤᠤ ᠬᠤᠲᠠ ᠶᠢᠨ ᠵᠡᠪᠰᠡᠭᠲᠦ ᠴᠠᠭᠳᠠᠭᠠᠨ ᠤ ᠠᠩᠭᠢ ᠶᠢᠨ ᠽᠠᠨᠮᠤ ᠠᠯᠲᠠᠨᠳᠤᠭᠤᠯᠭ᠎ᠠ᠂ ᠬᠤᠰᠢᠭᠤᠨ ᠳᠡᠰ ᠤᠨ ᠺᠠᠳ᠋ᠷ ᠬᠠᠰᠪᠠᠭᠠᠨ᠎ᠠ᠂ ᠬᠤᠪᠢ ᠶᠢᠨ ᠬᠤᠳᠠᠯᠳᠤᠭ᠎ᠠ ᠪᠠᠷ ᠲᠠᠭᠠᠰᠢᠶᠠᠭᠳᠠᠵᠤ ᠪᠠᠶᠢᠭ᠎ᠠ ᠡᠷᠳᠡᠨᠢᠠ᠋ᠭᠤᠯᠠ ᠵᠡᠷᠭᠡ ᠡᠰᠡᠷᠡᠭ ᠨᠤᠲᠤᠭ ᠤᠨ ᠰᠠᠶᠢᠴᠤᠤᠯ ᠮᠠᠨᠢ ᠡᠬᠡ ᠤᠯᠤᠰ ᠤᠨ ᠭᠠᠵᠠᠷ ᠪᠣᠯᠭᠠᠨ ᠳᠤ ᠲᠠᠷᠬᠠᠵᠤ᠂ ᠥᠪᠡᠷ ᠤᠨ ᠡᠷᠳᠡᠮ ᠴᠢᠳᠠᠪᠦᠷᠢ᠂ ᠤᠷ᠎ᠠ ᠠᠪᠢᠶᠠᠰ ᠢᠶᠠᠷ ᠢᠶᠠᠨ ᠲᠦᠮᠡᠨ ᠤ ᠪᠠᠭ᠋ᠠᠷᠬᠠᠯ ᠢ ᠲᠠᠲᠠᠵᠤ᠂ ᠡᠰᠡᠷᠡᠭ ᠨᠤᠲᠤᠭ ᠤᠨ ᠠᠯᠳᠠᠷ ᠢᠶᠠᠨ ᠲᠦᠮᠡᠨ ᠤ ᠴᠢᠬᠢᠨ᠎ᠡ ᠰᠣᠨᠤᠷᠳᠠᠭᠤᠯᠵᠤ ᠶᠠᠪᠤᠭ᠎ᠠ ᠳ᠋ᠠ︕        ᠡᠬᠡ ᠬᠡᠯᠡᠨ ᠤ ᠢᠪᠴᠦᠦᠷᠡᠯ᠂ ᠦᠷ᠎ᠡ ᠬᠤᠶᠢᠴᠢᠰ ᠤᠨ ᠴᠥᠬᠡᠷᠡᠯ ᠳᠡᠭᠡᠷ᠎ᠡ ︽ᠰᠤᠷᠭᠠᠭᠤᠯᠢ ᠨᠡᠶᠢᠯᠡᠭᠦᠯᠬᠦ︾ ᠶᠡᠭᠡ ᠬᠤᠪᠢᠰᠬᠠᠯ ᠤᠨ ᠤᠷᠤᠰᠬᠠᠯ ᠳᠤ ᠡᠰᠡᠷᠡᠭ ᠰᠤᠷᠭᠠᠭᠤᠯᠢ ᠮᠢᠨᠢ ᠡᠭᠦᠳᠡ ᠪᠠᠨ ᠳᠠᠷᠤᠯ᠎ᠠ᠃ ᠴᠥᠪ ᠤᠨ ᠴᠠᠭ ᠪᠣᠯᠤᠭᠰᠠᠨ ᠲᠠᠪᠢᠭᠠᠳ ᠣᠨ ᠤ ᠭᠠᠴᠢᠭᠳᠠᠯᠲᠤ ᠡᠷᠡᠨ ᠳᠤ ᠬᠢᠴᠢᠶᠡᠯ ᠵᠣᠭᠰᠤᠭᠰᠠᠨ ᠦᠭᠡᠢ᠂ ᠳᠤᠮᠳᠠᠳᠤ ᠶᠢᠨ ᠲᠡᠥᠬᠡ ᠶᠢᠨ ᠳᠡᠪᠴᠡᠩ ᠢ ᠳᠣᠷᠭᠢᠭᠤᠯᠤᠭᠰᠠᠨ ︽ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ︾ ᠤᠨ ᠠᠷᠪᠠᠨ ᠵᠢᠯ ᠳᠤ ᠡᠭᠦᠳᠡ ᠪᠠᠨ ᠬᠠᠭᠠᠭᠰᠠᠨ ᠦᠭᠡᠢ᠂ ᠭᠠᠭᠴᠠᠬᠠᠨ ᠪᠠᠭᠰᠢ ᠪᠠᠶᠢᠭᠰᠠᠨ ᠴᠦ ᠨᠤᠲᠤᠭ ᠤᠨ ᠬᠡᠥᠬᠡᠳ ᠤᠨ ᠢᠶᠠᠨ ᠲᠥᠯᠥᠭᠡ ᠵᠢᠭᠠᠳᠠᠭ ᠢᠶᠠᠨ ᠵᠢᠭᠠᠵᠤ᠂ ᠰᠤᠷᠭᠠᠳᠠᠭ ᠢᠶᠠᠨ ᠰᠤᠷᠭᠠᠵᠤ᠂ ᠥᠪᠡᠷ ᠤᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠪᠠᠨ ᠭᠦᠢᠴᠡᠳᠬᠡᠭᠰᠡᠭᠡᠷ ᠪᠠᠶᠢᠭᠰᠠᠨ ᠡ︕ᠥᠨᠥᠳᠥᠷ ᠪᠣᠯᠬᠤ ᠳᠤ ᠬᠦᠨᠳᠡᠢ ᠭᠡᠷ᠂ ᠬᠤᠭᠤᠰᠤᠨ ᠬᠦᠷᠢᠶ᠎ᠡ ᠠᠶᠢᠯ ᠤᠨ ᠳᠤᠮᠳᠠ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠨᠡᠪᠰᠡᠶᠢᠨ᠎ᠡ᠃ ᠤᠷᠤᠰᠴᠤ ᠥᠩᠭᠡᠷᠡᠭᠰᠡᠨ ᠴᠠᠭ ᠦᠶ᠎ᠡ ᠪᠠᠨ ᠪᠣᠳᠤᠵᠤ ᠰᠠᠭᠤᠭ᠎ᠠ ᠤᠤ︖ ᠤᠩᠰᠢᠯᠭ᠎ᠠ ᠶᠢᠨ ᠰᠠᠶᠢᠬᠠᠨ ᠡᠭᠡᠰᠢᠭ ᠢᠶᠠᠨ ᠴᠢᠩᠨᠠᠵᠤ ᠰᠠᠭᠤᠭ᠎ᠠ ᠤᠤ︖ ᠲᠡᠶᠢᠮᠦ ᠯᠡ ᠨᠠᠮᠵᠢᠭᠤᠨ᠂ ᠲᠡᠶᠢᠮᠦ ᠯᠡ ᠰᠡᠯᠡᠭᠦᠬᠡᠨ᠂᠂᠂᠂                ᠡᠯᠢᠭᠡ ᠪᠦᠲᠦᠨ ᠨᠤᠲᠤᠭ ᠤᠰᠤ        ᠡᠰᠡᠷᠡᠭ ᠤᠨ ᠠᠶᠢᠯ ᠨᠢ ᠪᠠᠶᠠᠨ ᠠᠭᠤᠯᠠ ᠰᠣᠮᠣᠨ ᠤ ᠲᠥᠪ ᠨᠠᠶᠢᠯᠵᠤᠤᠷ ᠭᠠᠴᠠᠭᠠᠨ ᠠᠴᠠ ᠵᠡᠭᠦᠨ ᠬᠤᠶᠢᠰᠢ 13 ᠺᠢᠯᠤᠮᠧᠲᠷ ᠤᠨ ᠵᠠᠢ ᠳᠤ ᠪᠠᠶᠢᠷᠢᠰᠢᠵᠤ᠂ ᠦᠨᠳᠦᠷ ᠰᠦᠷᠯᠢᠭ ᠪᠠᠶᠠᠨ ᠬᠠᠶᠢᠷᠬᠠᠨ ᠢᠶᠠᠷ ᠲᠦᠰᠢᠯᠭᠡ ᠪᠣᠯᠭᠠᠨ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠤᠯᠠᠭᠠᠨᠪᠠᠶᠢᠴᠠ᠂ ᠨᠠᠶᠢᠯᠵᠤᠤᠷ ᠬᠤᠶᠠᠷ ᠠᠶᠢᠯ ᠲᠠᠢ ᠨᠢᠭᠤᠷᠯᠠᠵᠤ᠂ ᠵᠡᠭᠦᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠰᠢᠪᠠᠭᠲᠤ ᠶᠢᠨ ᠠᠶᠢᠯ ᠪᠠ ᠪᠢᠯᠡᠭᠦᠲᠠᠢ ᠪᠠᠯᠭᠠᠰᠤᠨ ᠤ ᠲᠦᠷᠪᠡᠯᠵᠢᠨ ᠬᠡᠷᠡᠮ ᠲᠠᠢ ᠵᠠᠯᠭᠠᠯᠳᠤᠨ᠂ ᠬᠤᠶᠢᠲᠤ ᠲᠠᠯ᠎ᠠ ᠪᠠᠷ ᠢᠶᠠᠨ ᠶᠣᠯᠣ ᠶᠢᠨ ᠠᠷᠤ ᠭᠠᠴᠠᠭ᠎ᠠ᠂ ᠤᠷᠢᠳᠤ ᠲᠠᠯ᠎ᠠ ᠪᠠᠷ ᠢᠶᠠᠨ ᠬᠠᠶᠢᠯᠠᠰᠤ ᠶᠢᠨ ᠠᠶᠢᠯ ᠲᠠᠢ ᠬᠢᠯᠢᠯᠡᠨ᠂ ᠪᠦᠬᠦᠶᠢᠯᠡ ᠨᠤᠲᠤᠭ ᠳᠡᠪᠢᠰᠭᠡᠷ ᠨᠢ 13.6 ᠲᠦᠮᠡᠨ ᠮᠤ᠋ ᠳᠤ ᠬᠦᠷᠴᠦ᠂ ᠡᠭᠦᠨ ᠤ ᠳᠣᠲᠤᠷ᠎ᠠ ᠣᠶᠢᠲᠤ ᠣᠷᠣᠨ 28000 ᠮᠤ᠋ ᠶᠢ ᠡᠵᠡᠯᠡᠵᠦ᠂ ᠦᠬᠡᠷ ᠬᠤᠨᠢ ᠭᠤᠣᠯᠯᠠᠨ ᠲᠡᠵᠢᠭᠡᠵᠦ ᠪᠠᠶᠢᠭ᠎ᠠ ᠴᠤᠯᠤ ᠮᠠᠯᠵᠢᠬᠤ ᠪᠠᠷ ᠤᠨᠳᠤᠷᠤᠯᠭ᠎ᠠ ᠪᠠᠨ ᠪᠣᠯᠭᠠᠵᠤ ᠪᠠᠶᠢᠭ᠎ᠠ ᠠᠶᠢᠯ ᠶᠤᠮ᠃ᠠᠭᠤᠯᠠ ᠲᠠᠢ ᠨᠤᠲᠤᠭ ᠤᠨ ᠪᠠᠶᠠᠯᠢᠭ ᠢᠶᠠᠨ ᠭᠠᠶᠢᠬᠠᠭᠤᠯᠵᠤ᠂ ᠲᠥᠷᠪᠡᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠠᠭᠤᠯᠠ ᠲᠠᠪᠠᠭᠠᠳ ᠢᠶᠠᠷ ᠬᠦᠷᠢᠶᠡᠯᠡᠭᠦᠯᠵᠦ᠂ ᠠᠭᠤᠵᠢᠮ ᠲᠡᠨᠢᠭᠡᠷ ᠪᠠᠶᠠᠨ ᠤ ᠡᠩᠭᠡᠷ ᠤᠨ ᠲᠠᠯ᠎ᠠ ᠳᠤ ᠮᠠᠯ ᠰᠦᠷᠦᠭ ᠢᠶᠠᠨ ᠪᠡᠯᠴᠢᠭᠡᠵᠦ᠂ ᠤᠶᠠᠬᠠᠨ ᠵᠥᠭᠡᠯᠡᠨ ᠤᠯᠠᠭᠠᠨᠪᠠᠶᠢᠴᠠ ᠶᠢᠨ ᠭᠤᠣᠯ ᠪᠠ ᠡᠰᠡᠷᠡᠭ ᠪᠤᠯᠠᠭ ᠤᠨ ᠠᠷᠢᠭᠤᠨ ᠰᠢᠮ᠎ᠡ ᠪᠠᠷ ᠥᠩᠰᠢᠭ ᠲᠠᠯ᠎ᠠ  ᠨᠢ ᠴᠡᠯᠭᠡᠷᠡᠵᠦ᠂ ᠥᠭᠡᠳᠡ ᠬᠡᠶᠢᠮᠦᠷᠢ ᠲᠠᠢ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ᠃        ᠲᠦᠰᠢᠯᠭᠡ ᠪᠣᠯᠤᠭᠰᠠᠨ ᠪᠠᠶᠠᠨ ᠬᠠᠶᠢᠷᠬᠠᠨ᠂ ᠨᠤᠲᠤᠭ ᠤᠨ ᠬᠤᠶᠢᠲᠤ ᠲᠠᠯ᠎ᠠ ᠳᠤ ᠡᠴᠢᠭᠡ ᠶᠢᠨ ᠰᠦᠷ ᠢᠶᠠᠷ ᠰᠦᠮᠪᠦᠷᠯᠡᠵᠦ᠂ ᠨᠠᠷᠠᠰᠤ᠂ ᠤᠯᠢᠶᠠᠰᠤ᠂ ᠬᠤᠯᠤᠰᠤ᠂ ᠴᠠᠷᠠᠰᠤ ᠵᠡᠷᠭᠡ ᠮᠣᠳᠣᠳ ᠢᠶᠠᠷ ᠬᠢᠷ᠎ᠠ ᠵᠢᠯᠠᠭ᠎ᠠ ᠪᠠᠨ ᠴᠢᠮᠡᠵᠦ᠂ ᠥᠳᠬᠡᠨ ᠣᠢ ᠶᠢᠨ ᠠᠯᠠᠭ᠎ᠠ ᠳᠤ ᠨᠢ ᠰᠣᠷᠭᠤᠭ ᠪᠡᠯᠴᠢᠭᠡᠷ ᠬᠠᠯᠢᠭᠤᠷᠠᠵᠤ᠂ ᠬᠠᠶᠢᠯ ᠤᠨ ᠤᠰᠤᠨ᠂ ᠪᠤᠯᠠᠭ ᠱᠠᠩᠲᠠ ᠭᠤᠷᠴᠢᠭᠢᠨᠠᠨ᠂ ᠦᠬᠡᠷ ᠬᠤᠨᠢᠳ ᠤᠨ ᠥᠩᠭᠡᠰᠢᠭ ᠣᠷᠣᠨ ᠪᠠᠶᠢᠵᠠᠢ᠃ ᠪᠠᠶᠠᠨ ᠬᠠᠶᠢᠷᠬᠠᠨ ᠨᠢ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ 13 ᠺᠢᠯᠤᠮᠧᠲᠷ ᠦᠷᠭᠦᠯᠵᠢᠯᠡᠵᠦ᠂ ᠡᠪᠦᠯ ᠪᠣᠯᠬᠤ ᠳᠤ ᠬᠦᠢᠲᠡᠨ ᠤᠷᠤᠰᠬᠠᠯ ᠢ ᠬᠠᠰᠢᠨ᠂ ᠵᠤᠨ ᠪᠣᠯᠬᠤ ᠳᠤ ᠪᠣᠷᠤᠭᠠᠨ ᠤ ᠡᠭᠦᠯᠡᠰ ᠢ ᠲᠠᠯᠠᠯᠳᠠᠭ᠃ ᠭᠤᠣᠯ ᠣᠷᠣᠢ ᠨᠢ ᠳᠠᠯᠠᠢ ᠶᠢᠨ ᠲᠥᠪᠰᠢᠨ ᠠᠴᠠ 1722.3 ᠮᠧᠲᠷ ᠡᠷᠭᠦᠭᠳᠡᠭᠰᠡᠨ ᠪᠣᠯᠬᠤᠷ ᠠᠭᠠᠬᠢᠮ᠎ᠠ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠴᠦ ᠮᠥᠩᠬᠡ ᠣᠷᠭᠢᠯ ᠢᠶᠠᠨ ᠮᠦᠰᠦ ᠴᠠᠰᠤ ᠪᠠᠷ ᠬᠤᠴᠢᠨ ᠂ ᠡᠲᠡᠭᠡᠳ ᠭᠤᠶᠢᠳᠠ ᠦᠵᠡᠮᠵᠢ ᠲᠠᠢ ᠪᠠᠶᠢᠳᠠᠭ ᠶᠤᠮᠰᠠᠨ︕        ᠪᠠᠶᠠᠨ ᠬᠠᠶᠢᠷᠬᠠᠨ ᠨᠢ ᠠᠯᠢ ᠡᠷᠲᠡ ᠠᠴᠠ ᠰᠢᠲᠦᠭᠡᠨᠲᠦ ᠠᠭᠤᠯᠠ ᠪᠠᠶᠢᠵᠤ᠂ ᠬᠡᠪᠲᠡᠭᠡ ᠯᠤᠤ᠂ ᠰᠠᠭᠤᠭ᠎ᠠ ᠪᠠᠷᠰ ᠤᠨ ᠳᠦᠷᠢ ᠲᠠᠢ ᠪᠠᠶᠢᠳᠠᠭ ᠢᠶᠠᠷ᠂ ᠬᠦᠷᠢᠶ᠎ᠡ ᠠᠭᠤᠯᠠ ᠭᠡᠵᠦ ᠨᠡᠷᠡᠯᠡᠨ᠂ ᠬᠠᠭᠠᠨ ᠲᠥᠷᠥ ᠶᠢᠨ ᠡᠷᠬᠢᠮ ᠢᠵᠠᠭᠤᠷᠲᠠᠨ ᠤ ᠬᠡᠭᠦᠷ ᠣᠩᠭᠤᠨ ᠢᠶᠠᠨ ᠣᠷᠣᠰᠢᠭᠤᠯᠳᠠᠭ ᠬᠤᠷᠢᠭᠠᠲᠤ ᠣᠷᠤᠨ ᠪᠠᠶᠢᠭᠰᠠᠨ ᠶᠤᠮ᠃ ᠡᠭᠦᠨ ᠢ 1995 ᠣᠨ ᠤ 5 ᠰᠠᠷ᠎ᠠ ᠳᠤ ᠬᠡᠭᠦᠷ ᠬᠤᠯᠠᠭᠠᠶᠢᠯᠠᠭᠴᠢᠳ ᠤᠨ ᠠᠭᠤᠳᠠᠯᠠᠨ ᠭᠠᠷᠭᠠᠭᠰᠠᠨ ᠣᠩᠭᠤᠨ ᠤ ᠬᠥᠰᠢᠶ᠎ᠡ ᠪᠢᠴᠢᠭ ᠠᠴᠠ ᠦᠵᠡᠵᠦ ᠭᠠᠷᠬᠤ ᠶᠤᠮ᠃ ᠲᠤᠰ ᠬᠥᠰᠢᠶ᠎ᠡ ᠢᠯᠡᠷᠬᠡᠶᠢᠯᠡᠯ ᠢ ᠦᠨᠳᠦᠰᠦᠯᠡᠪᠡᠯ᠂ ᠨᠡᠶᠢᠲᠡ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ 986 ᠣᠨ ᠳᠤ ᠯᠢᠶᠤᠤ ᠤᠯᠤᠰ ᠤᠨ ᠴᠢᠨ ᠸᠠᠩ — ᠬᠠᠨ ᠺᠤᠸᠠᠩ ᠰᠧ ᠪᠠ ᠲᠡᠭᠦᠨ ᠤ ᠬᠠᠲᠤᠨ ᠵᠢᠴᠢ ᠭᠡᠷ ᠤᠭᠰᠠᠭ᠎ᠠ ᠶᠢᠨ ᠬᠢᠨ ᠢ ᠠᠳᠡ ᠣᠷᠤᠰᠢᠭᠤᠯᠤᠭᠰᠠᠨ ᠪᠠᠶᠢᠵᠠᠢ᠃        ᠪᠠᠶᠠᠨ ᠬᠠᠶᠢᠷᠬᠠᠨ ᠤ ᠪᠠᠷᠠᠭᠤᠨ ᠡᠮᠦᠨ᠎ᠡ ᠡᠩᠭᠡᠷ ᠲᠤ ᠰᠦᠮ᠎ᠡ ᠶᠢᠨ ᠬᠦᠨᠳᠡᠢ ᠭᠡᠳᠡᠭ ᠭᠠᠵᠠᠷ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠵᠡᠭᠦᠨ ᠪᠠᠶᠢᠷᠢᠨ ᠤ ᠲᠣᠮᠤᠬᠠᠨ ᠰᠦᠮ᠎ᠡ ᠪᠣᠯᠬᠤ ᠬᠢᠯᠠᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠶᠢᠨ ᠪᠠᠭᠤᠷᠢ ᠪᠠᠶᠢᠳᠠᠭ ᠠᠴᠠ ᠲᠡᠭᠡᠵᠦ ᠨᠡᠷᠡᠯᠡᠭᠰᠡᠨ ᠶᠤᠮ᠃ ᠬᠢᠯᠠᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠨᠢ 1926 ᠣᠨ ᠳᠤ ᠴᠡᠷᠢᠭ ᠤᠨ ᠡᠷᠬᠡᠲᠡᠨ ᠤ ᠶᠡᠭᠡ ᠪᠠᠷ ᠠᠲᠠᠷ ᠬᠠᠭᠠᠯᠪᠦᠷᠢᠯᠠᠭᠰᠠᠨ ᠠᠴᠠ ᠪᠣᠯᠵᠤ᠂ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠪᠤᠯᠢᠶᠠᠭᠳᠠᠵᠤ᠂ ᠲᠡᠮᠡᠭᠡᠨ ᠬᠦᠵᠦᠭᠦᠦ ᠶᠢᠨ ᠴᠠᠭᠠᠨ ᠰᠢᠷᠡᠭᠡᠲᠦ ᠠᠴᠠ ᠨᠡᠭᠦᠵᠦ ᠢᠷᠡᠭᠡᠳ᠂ ᠡᠷᠲᠡᠨ ᠤ ᠣᠩᠭᠤᠨ ᠠᠴᠠ ᠠᠭᠤᠳᠠᠯᠠᠵᠤ ᠭᠠᠷᠭᠠᠭᠰᠠᠨ ᠬᠥᠬᠡ ᠲᠣᠭᠤᠰᠬ᠎ᠠ ᠪᠠᠷ ᠰᠦᠮ᠎ᠡ ᠪᠠᠨ ᠪᠠᠷᠢᠭᠰᠠᠨ ᠭᠡᠳᠡᠭ᠃ ᠠᠯᠲᠠᠨ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠵᠦᠷᠴᠢᠨᠴᠦᠳ ᠲᠤ ᠠᠭᠤᠳᠠᠯᠠᠭᠳᠠᠭᠰᠠᠨ ᠬᠡᠭᠦᠷ ᠣᠩᠭᠤᠨ ᠪᠠ ᠢᠷᠭᠡᠨ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠬᠢᠲᠠᠳ ᠤᠳ ᠲᠤ ᠠᠭᠤᠳᠠᠯᠠᠭᠳᠠᠭᠰᠠᠨ ᠭᠢᠳᠠᠨᠴᠤᠳ ᠤᠨ ᠬᠡᠭᠦᠷ ᠣᠩᠭᠤᠨ ᠤ ᠡᠷᠦᠢ ᠬᠤᠷᠤᠢ ᠦᠭᠡᠢ ᠬᠠᠶᠠᠭᠳᠠᠭᠰᠠᠨ ᠬᠤᠪᠠᠭ᠋ᠠᠢ ᠶᠠᠰᠤ ᠲᠠᠯ᠎ᠠ ᠳᠦᠭᠦᠷᠴᠦ ᠪᠠᠶᠢᠭᠰᠠᠨ ᠢ ᠬᠢᠯᠠᠭᠠᠨᠲᠠᠢ ᠶᠢᠨ ᠰᠦᠮ᠎ᠡ ᠶᠢᠨ ᠯᠠᠮ᠎ᠠ ᠨᠠᠷ ᠲᠡᠭᠦᠵᠦ ᠣᠷᠤᠰᠢᠭᠤᠯᠤᠭᠠᠳ᠂ ᠰᠦᠨᠡᠰᠦ ᠮᠦᠷ ᠢ ᠨᠢ ᠵᠢᠭᠠᠵᠤ᠂ ᠬᠦᠷᠢᠮ ᠦᠢᠯᠡᠳᠦᠭᠡᠳ ᠰᠠᠶ᠋ᠢ ᠲᠤᠭᠤᠰᠬᠠᠨ ᠳᠤ ᠨᠢ ᠭᠠᠷ ᠬᠦᠷᠦᠭᠰᠡᠨ ᠭᠡᠳᠡᠭ᠃ ᠤᠤᠯ ᠤᠨ ᠪᠠᠶᠢᠭᠰᠠᠨ ᠦᠬᠦᠭᠡᠷ ᠤᠨ ᠨᠦᠬᠡ ᠳᠡᠭᠡᠷ᠎ᠡ ᠲᠦᠷᠦᠭᠦᠦ ᠵᠠᠭᠤᠨ ᠤ ᠳᠠᠯᠠ ᠨᠠᠶᠠᠭᠠᠳ ᠣᠨ ᠤ ᠶᠡᠭᠡ ᠪᠠᠷ ᠬᠡᠭᠦᠷ ᠮᠠᠯᠲᠠᠬᠤ ᠬᠠᠤᠯᠢ ᠪᠣᠰᠤ ᠠᠵᠢᠯᠯᠠᠭ᠎ᠠ ᠦᠷᠨᠢᠭᠰᠡᠨ ᠠᠴᠠ ᠣᠳᠣ ᠪᠣᠯᠬᠤ ᠳᠤ ᠭᠠᠵᠠᠷ ᠰᠠᠢ ᠦᠭᠡᠢ ᠠᠭᠤᠳᠠᠯᠠᠭᠳᠠᠭᠰᠠᠨ ᠬᠡᠭᠦᠷ ᠣᠩᠭᠤᠨ ᠤ ᠨᠦᠬᠡ ᠣᠩᠭᠤᠶᠢᠵᠤ᠂ ᠵᠢᠯ ᠤᠨ ᠲᠥᠷᠪᠡᠨ ᠤᠯᠠᠷᠢᠯ ᠳᠤ ᠮᠠᠯ ᠤᠨᠤᠭ᠎ᠠ ᠤᠨᠠᠵᠤ ᠳᠤᠰᠤᠨ᠂ ᠮᠠᠯᠴᠢᠨ ᠲᠦᠮᠡᠨ ᠤ ᠠᠷᠭ᠎ᠠ ᠶᠢ ᠪᠠᠷᠠᠭᠳᠠᠭᠤᠯᠵᠤ ᠪᠣᠢ᠃        ᠪᠠᠶᠠᠨ ᠬᠠᠶᠢᠷᠬᠠᠨ ᠤ ᠡᠮᠦᠨ᠎ᠡ ᠲᠠᠯ᠎ᠠ ᠪᠠᠷ ᠠᠯᠲᠠᠨ ᠤᠯᠤᠰ ᠤᠨ ᠬᠢᠯᠢ ᠶᠢᠨ ᠬᠡᠷᠡᠮ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠦᠨᠳᠡᠯᠢᠲᠦᠨ ᠰᠤᠨᠤᠯᠵᠠᠵᠤ ᠪᠠᠶᠢᠳᠠᠭ᠃ ᠡᠩᠨᠡᠬᠦ ᠮᠢᠩᠭᠠᠳ ᠵᠢᠯ ᠤᠨ ᠲᠡᠥᠬᠡ ᠲᠠᠢ ᠬᠢᠯᠢ ᠶᠢᠨ ᠵᠠᠭᠠᠭ ᠱᠤᠭᠤᠮ ᠢ ᠨᠤᠲᠤᠭ ᠤᠨ ᠮᠠᠯᠴᠢᠳ ︽ᠤᠳᠠᠰᠤᠨ ᠬᠡᠷᠡᠮ︾ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠲᠤᠰ ᠤᠳᠠᠰᠤᠨ ᠬᠡᠷᠡᠮ ᠨᠢ ᠵᠡᠭᠦᠨᠰᠢ ᠬᠦᠯᠦᠨ ᠳᠠᠯᠠᠢ᠂ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠳᠠᠯᠠᠨ ᠬᠠᠷ᠎ᠠ ᠠᠭᠤᠯᠠ ᠬᠦᠷᠴᠦ᠂ ᠶᠡᠷᠦᠩᠬᠡᠢ ᠤᠷᠲᠤ ᠨᠢ 5000 ᠭᠠᠷᠤᠢ ᠭᠠᠵᠠᠷ ᠪᠠᠶᠢᠵᠤ᠂ ᠡᠰᠡᠷᠡᠭ ᠨᠤᠲᠤᠭ ᠤᠨ ᠬᠡᠪᠴᠢᠶᠡᠨ ᠳᠤ ᠬᠤᠷᠢᠭᠠᠳ ᠭᠠᠵᠠᠷ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠳᠠᠭ᠃ ᠤᠳᠠᠰᠤᠨ ᠬᠡᠷᠡᠮ ᠨᠢ ᠮᠣᠩᠭᠤᠯ ᠤᠨ ᠮᠣᠷᠢᠲᠤ ᠴᠡᠷᠢᠭ ᠢ ᠬᠠᠰᠢᠬᠤ ᠶᠢᠨ ᠲᠥᠯᠥᠭᠡ ᠪᠠᠷᠢᠭᠰᠠᠨ ᠠᠯᠲᠠᠨ ᠤᠯᠤᠰ ᠤᠨ ᠬᠢᠯᠢ ᠶᠢᠨ ᠵᠠᠭᠠᠭ ᠪᠦᠭᠡᠳ ᠠᠯᠲᠠᠨ ᠤᠯᠤᠰ ᠤᠨ ᠱᠢᠽᠦ᠋ᠩ ᠬᠠᠭᠠᠨ ᠪᠠ ᠮᠠᠳᠠᠭᠤ ᠬᠠᠭᠠᠨ ᠤ ᠳ᠋ᠠ ᠳ᠋ᠢᠩ ᠪᠣᠶᠤ ᠴᠧᠩ ᠠᠨ ᠤ ᠣᠨ ᠨᠤᠭᠤᠳ ︵1165 — 1201︶ ᠲᠤ ᠪᠠᠶᠢᠭᠤᠯᠵᠠᠢ᠃ ᠬᠤᠶᠢᠭᠤᠷ ᠢᠶᠠᠨ ᠤᠨᠠᠭᠤᠯᠢ ᠰᠤᠪᠠᠭ ᠲᠠᠢ᠂ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠱᠤᠳᠤᠤ ᠳᠠᠯᠠᠩ ᠲᠠᠢ᠂ ᠬᠡᠷᠡᠮ ᠤᠨ ᠳᠡᠭᠡᠭᠦᠷ ᠵᠠᠭᠤᠨ ᠠᠯᠬᠤᠮ ᠪᠦᠷᠢ ᠳᠤ ᠨᠢᠭᠡ ᠬᠠᠷᠠᠭᠤᠯ ᠤᠨ ᠴᠣᠩᠬᠤ ᠲᠠᠢ ᠤᠷᠢᠳᠠᠭᠤᠷ ᠢᠶᠠᠨ ᠭᠠᠵᠠᠷ ᠤᠨ ᠪᠠᠶᠢᠷᠢᠰᠢᠯ ᠢ ᠦᠵᠡᠵᠦ᠂ ᠬᠠᠷᠢᠯᠴᠠᠨ ᠴᠢᠮᠡᠭᠡ ᠠᠪᠤᠯᠴᠠᠬᠤ᠂ ᠨᠢᠭᠤᠭᠳᠠᠬᠤ᠂ ᠬᠤᠷᠭᠤᠳᠠᠬᠤ ᠳᠤv ᠵᠣᠷᠢᠭᠤᠯᠤᠭᠰᠠᠨ ᠲᠤᠰᠬᠠᠢ ᠪᠠᠶᠢᠭᠤᠯᠤᠮᠵᠢ ᠪᠦᠬᠦᠢ ᠪᠠᠬᠢᠯᠡᠯᠲᠡ ᠬᠤᠲᠠ ᠬᠦᠷᠢᠶ᠎ᠡ  ᠲᠠᠢ᠃ ᠡᠨᠡ ᠬᠡᠷᠡᠮ ᠤᠨ ᠭᠠᠳᠠᠷ ᠰᠤᠪᠠᠭ ᠤᠨ ᠣᠷᠣᠮ ᠨᠢ ᠡᠳᠦᠭᠡ 2 — 6 ᠮᠧᠲᠷ ᠦᠷᠭᠡᠨ᠂ 1 ᠮᠧᠲᠷ ᠭᠦᠨ᠂ ᠭᠠᠳᠠᠷ ᠬᠡᠷᠡᠮ ᠤᠨ ᠰᠠᠭᠤᠷᠢ ᠨᠢ 12 — 15 ᠮᠧᠲᠷ ᠦᠷᠭᠡᠨ᠂ 3 — 5 ᠮᠧᠲᠷ ᠦᠨᠳᠦᠷ᠂ ᠳᠣᠲᠣᠷ ᠰᠤᠪᠠᠭ ᠤᠨ ᠦᠷᠭᠡᠨ ᠨᠢ 15 — 20 ᠮᠧᠲᠷ᠂ ᠭᠦᠨ ᠨᠢ 1 ᠮᠧᠲᠷ ᠪᠠᠶᠢᠭ᠎ᠠ ᠠᠴᠠ ᠦᠵᠡᠪᠡᠯ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠶᠠᠮᠠᠷᠬᠠᠨ ᠲᠣᠮᠣ ᠪᠠᠷᠢᠯᠭ᠎ᠠ ᠪᠠᠶᠢᠭᠰᠠᠨ ᠢ ᠮᠡᠳᠡᠵᠦ ᠪᠣᠯᠤᠨ᠎ᠠ᠃ ᠲᠤᠰ ᠬᠡᠷᠡᠮ ᠨᠢ ᠠᠯᠲᠠᠨ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠪᠠᠷᠢᠯᠭ᠎ᠠ ᠶᠢᠨ ᠮᠡᠷᠭᠡᠵᠢᠯ ᠤᠨ ᠬᠢᠷᠢ ᠲᠥᠪᠰᠢᠨ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠬᠤ ᠮᠦᠷᠲᠡᠭᠡᠨ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠵᠦᠷᠴᠢᠨᠴᠦᠳ ᠤᠨ ᠮᠣᠩᠭᠤᠯ ᠮᠣᠷᠢᠲᠤ ᠴᠡᠷᠢᠭ ᠠᠴᠠ ᠬᠢᠷᠢ ᠵᠡᠷᠭᠡ ᠠᠶᠤᠵᠤ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠴᠦ ᠭᠡᠷᠡᠴᠢᠯᠡᠨ᠎ᠡ᠃ ᠤᠳᠠᠰᠤᠨ ᠬᠡᠷᠡᠮ ᠤᠨ ᠳᠠᠭᠠᠷᠢᠵᠤ ᠥᠩᠭᠡᠷᠡᠭᠰᠡᠨ ᠡᠰᠡᠷᠡᠭ ᠨᠤᠲᠤᠭ ᠤᠨ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠳᠠᠪᠠᠭ᠎ᠠ ᠶᠢ ︽ᠬᠡᠷᠡᠮ ᠤᠨ ᠳᠠᠪᠠᠭ᠎ᠠ︾ ᠭᠡᠵᠦ ᠨᠡᠷᠡᠯᠡᠳᠡᠭ᠃        ᠬᠡᠷᠡᠮ ᠤᠨ ᠳᠠᠪᠠᠭ᠎ᠠ ᠶᠢᠨ ᠡᠰᠡᠷᠭᠦ ᠲᠠᠯ᠎ᠠ ᠳᠤ ᠪᠠᠶᠢᠷᠢᠯᠠᠵᠤ ᠪᠠᠶᠢᠭ᠎ᠠ ᠡᠭᠴᠡ ᠪᠣᠰᠤᠭ᠎ᠠ ᠠᠷᠵᠠᠭᠠᠷ ᠪᠠᠷᠵᠠᠭᠠᠷ ᠬᠠᠳᠠ ᠶᠢ ︽ᠪᠢᠷᠠᠭᠤ ᠶᠢᠨ ᠬᠠᠳᠠ︾ ᠭᠡᠳᠡᠭ᠃ ᠬᠠᠭᠠᠨ ᠤ ᠪᠢᠷᠠᠭᠤ ᠶᠢ ᠬᠠᠷᠢᠭᠤᠯᠵᠤ ᠪᠠᠶᠢᠭᠰᠠᠨ ᠨᠤᠲᠤᠭ ᠪᠣᠯᠬᠤᠷ ᠲᠡᠭᠡᠵᠦ ᠨᠡᠷᠡᠯᠡᠭᠰᠡᠨ ᠭᠡᠳᠡᠭ ᠳᠣᠮᠤᠭ ᠪᠠᠶᠢᠭᠰᠠᠨ ᠡ︕ ᠤᠤᠯ ᠨᠢ ᠪᠢᠷᠠᠭᠤ ᠶᠢᠨ ᠬᠠᠳᠠ ᠨᠢ ᠬᠥᠪᠴᠢ ᠣᠢ ᠪᠠᠷ ᠨᠢᠷᠤᠭᠤᠳ ᠢᠶᠠᠨ ᠴᠢᠮᠡᠵᠦ᠂ ᠠᠷᠢᠶᠠᠲᠠᠨ ᠭᠦᠷᠦᠭᠡᠰᠦ ᠲᠣᠭᠯᠠᠯᠳᠤᠭᠰᠠᠨ ᠦᠯᠡᠮᠵᠢ ᠲᠡᠭᠦᠰ ᠣᠷᠣᠨ ᠪᠠᠶᠢᠯ᠎ᠠ ᠭᠡᠯᠴᠡᠳᠡᠭ᠃ 1955 ᠣᠨ ᠤ ᠰᠢᠯᠢᠨ ᠭᠤᠣᠯ ᠠᠴᠠ ᠳᠠᠭᠠᠷᠢᠵᠤ ᠢᠷᠡᠭᠰᠡᠨ ᠶᠡᠭᠡ ᠲᠦᠢᠮᠡᠷ ᠲᠤ ᠬᠡᠳᠦᠨ ᠵᠠᠭᠤᠨ ᠵᠢᠯ ᠤᠨ ᠲᠡᠪᠡᠷᠢ ᠪᠠᠭᠲᠠᠬᠤ ᠦᠭᠡᠢ ᠣᠢ ᠮᠣᠳᠣᠳ ᠤᠨ ᠬᠤᠵᠤᠤᠯ ᠨᠢ ᠬᠦᠷᠲᠡᠯ᠎ᠡ ᠦᠨᠡᠰᠦ ᠪᠣᠯᠵᠤ᠂ ᠡᠭᠦᠨ ᠢᠶᠠᠷ ᠵᠣᠭᠰᠤᠬᠤ ᠦᠭᠡᠢ ᠪᠠᠶᠠᠨ ᠡᠩᠭᠡᠷ ᠤᠨ ᠮᠣᠷᠢ ᠲᠠᠢ ᠬᠦᠮᠦᠨ ᠶᠠᠪᠤᠭᠠᠳ ᠪᠠᠷ᠎ᠠ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠷᠭᠠᠰᠤᠨ ᠣᠢ ᠪᠦᠬᠦᠨ ᠢᠶᠠᠷ ᠢᠶᠠᠨ ᠰᠢᠲᠠᠵᠤ᠂ ᠲᠡᠭᠷᠢ ᠶᠢᠨ ᠣᠷᠣᠨ ᠰᠢᠭ᠋ ᠦᠵᠡᠮᠵᠢᠲᠦ ᠣᠷᠣᠨ ᠬᠠᠯᠴᠠᠭᠠᠢ ᠬᠠᠳᠠ ᠪᠣᠯᠤᠨ ᠬᠤᠴᠤᠷᠠᠭᠰᠠᠨ ᠨᠢ ᠬᠠᠷᠠᠮᠰᠠᠯᠲᠠᠢ ᠳ᠋ᠠ︕ ᠲᠤᠰ ᠤᠳᠠᠭᠠᠨ ᠤ ᠲᠦᠢᠮᠡᠷ ᠲᠤ ᠠᠭᠤᠯᠠ ᠨᠢᠷᠤᠭᠤᠳ ᠨᠢ ᠣᠢ ᠮᠣᠳᠣᠳ ᠢᠶᠠᠨ ᠠᠯᠳᠠᠵᠤ᠂ ᠤᠯᠠᠭᠠᠨ ᠨᠢᠴᠦᠭᠦᠨ ᠪᠣᠯᠤᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠶᠤᠯᠲᠤ ᠲᠦᠢᠮᠡᠷ ᠤᠯᠠᠭᠠᠨᠪᠠᠶᠢᠴᠠ ᠶᠢᠨ ᠠᠶᠢᠯ ᠳᠠᠮᠵᠢᠨ᠂ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠴᠢᠭᠯᠡᠨ᠂ ᠣᠳᠣ ᠶᠢᠨ ᠨᠠᠶᠢᠯᠵᠤᠤᠷ ᠤᠨ ᠬᠠᠷᠢᠶᠠᠨ ᠳᠤ ᠪᠡᠯᠴᠢᠵᠦ ᠪᠠᠶᠢᠭᠰᠠᠨ ᠡᠰᠡᠷᠡᠭ ᠨᠤᠲᠤᠭ ᠤᠨ ᠬᠡᠳᠦᠨ ᠠᠵᠢᠷᠭ᠎ᠠ ᠠᠳᠤᠭᠤ ᠴᠦ ᠲᠤᠶᠢᠮᠡᠷ ᠲᠤ ᠬᠠᠮᠤᠭᠳᠠᠨ ᠰᠦᠢᠳᠴᠦ ᠂ ᠲᠦᠢᠮᠡᠷ ᠤᠨᠲᠠᠷᠠᠭᠠᠬᠤ ᠪᠠᠷ ᠢᠷᠡᠭᠰᠡᠨ ᠨᠤᠲᠤᠭ ᠤᠨ ᠮᠠᠯᠴᠢᠳ ᠴᠦ ᠠᠮᠢ ᠪᠠᠨ ᠠᠯᠳᠠᠭᠰᠠᠨ᠂ ᠵᠡᠮᠳᠡᠭ ᠪᠣᠯᠤᠭᠰᠠᠨ ᠴᠦ ᠴᠥᠬᠡᠨ ᠪᠣᠰᠤ ᠪᠠᠶᠢᠯ᠎ᠠ᠃ ᠪᠢᠷᠠᠭᠤ ᠶᠢᠨ ᠬᠠᠳᠠᠨ ᠤ ᠬᠠᠮᠤᠭ ᠦᠨᠳᠦᠷ ᠠᠰᠬ᠎ᠠ ᠬᠠᠳᠠ ᠶᠢ ︽ᠰᠢᠷ᠎ᠠ ᠬᠠᠳᠠ︾ ᠭᠡᠵᠦ᠂ ᠡᠭᠦᠯᠡ ᠰᠠᠴᠠᠭᠤ ᠰᠡᠬᠦᠶᠢᠨ᠂ ᠦᠯᠡᠳᠡᠵᠦ ᠬᠤᠴᠤᠷᠠᠭᠰᠠᠨ ᠠᠷᠭᠠᠯᠢ ᠤᠭᠠᠯᠵᠠ᠂ ᠶᠠᠩᠭᠢᠷ ᠢᠮᠠᠭᠠᠳ ᠨᠠᠭᠠᠰᠢ ᠴᠠᠭᠠᠰᠢ ᠳᠡᠪᠬᠡᠷᠦᠨ ᠬᠠᠯᠢᠵᠤ ᠪᠠᠶᠢᠭᠰᠠᠨ ᠢ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠣᠨ ᠤ ᠰᠡᠭᠦᠯᠴᠢ ᠪᠠᠷ ᠨᠤᠲᠤᠭ ᠤᠨ ᠮᠠᠯᠴᠢᠳ ᠬᠠᠷᠠᠵᠤ ᠪᠠᠶᠢᠯ᠎ᠠ ᠭᠡᠯᠴᠡᠳᠡᠭ᠃ ᠭᠠᠷᠬᠤ ᠳᠤ ᠬᠢᠯᠪᠠᠷ᠂ ᠪᠠᠭᠤᠬᠤ ᠳᠤ ᠬᠦᠴᠢᠷ ᠲᠡᠷᠡᠬᠦ ᠠᠰᠬ᠎ᠠ ᠬᠠᠳᠠᠨ ᠤ ᠬᠠᠴᠢᠨ ᠭᠠᠶᠢᠬᠠᠮᠰᠢᠭᠲᠤ ᠦᠯᠢᠭᠡᠷ ᠳᠣᠮᠤᠭ ᠲᠤ ᠬᠦᠲᠦᠯᠦᠭᠳᠡᠨ᠂ ᠠᠯᠢᠶ᠎ᠠ ᠨᠠᠰᠤᠨ ᠤ ᠪᠠᠭᠠᠴᠤᠤᠯ ᠬᠠᠷᠢᠯᠴᠠᠨ ᠮᠡᠯᠵᠢᠶ᠎ᠡ ᠲᠠᠯᠪᠢᠵᠤ ᠣᠴᠢᠭᠠᠳ᠂ ᠦᠢᠯᠡ ᠪᠠᠨ ᠪᠠᠷᠠᠵᠤ᠂ ᠦᠰᠦ ᠪᠠᠨ ᠲᠡᠭᠦᠵᠦ ᠲᠦᠩᠭᠡᠵᠦ ᠪᠠᠭᠤᠭᠰᠠᠨ ᠵᠣᠭᠤᠭ ᠥᠨᠥᠳᠦᠷ ᠪᠣᠯᠲᠠᠯ᠎ᠠ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ᠂᠂᠂᠂        ᠰᠢᠷ᠎ᠠ ᠬᠠᠳᠠᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢ ︽ᠰᠡᠨᠵᠢ ᠶᠢᠨ ᠲᠠᠰᠢᠭᠤ︾ ᠭᠡᠳᠡᠭ᠃ ᠡᠬᠡ ᠪᠠᠶᠢᠭᠠᠯᠢ ᠠᠴᠠ ᠪᠦᠲᠦᠬᠦ ᠳᠤ ᠪᠠᠨ ᠲᠡᠮᠡᠭᠡ ᠦᠩᠭᠡᠷᠡᠪᠡᠴᠦ ᠲᠣᠷᠬᠤ ᠦᠭᠡᠢ ᠲᠣᠮᠤᠬᠠᠨ ᠲᠦᠭᠦᠷᠢᠭ ᠨᠦᠬᠡ ᠲᠠᠢ ᠪᠦᠷᠢᠯᠳᠦᠵᠦ᠂ ᠬᠦᠴᠦ ᠴᠢᠳᠠᠯ ᠬᠦᠷᠦᠯᠴᠡᠪᠡᠯ᠂ ︽ᠪᠢᠷᠠᠭᠤ ᠶᠢᠨ ᠬᠠᠳᠠ︾ ᠶᠢ ᠡᠷᠭᠦᠵᠦ ᠠᠪᠬᠤ ᠳᠤ ᠪᠠᠷᠢᠴᠠ ᠪᠣᠯᠤᠮᠠᠷ ︽ᠰᠡᠨᠵᠢ︾ ᠰᠢᠭ ᠬᠠᠷᠠᠭᠳᠠᠳᠠᠭ᠃ᠦᠶ᠎ᠡ ᠦᠶ᠎ᠡ ᠦᠯᠢᠶᠡᠬᠦ ᠰᠠᠯᠬᠢᠨ ᠳᠤ ᠡᠯᠳᠡᠪ ᠶᠠᠩᠵᠤ ᠶᠢᠨ ᠳᠠᠭᠤᠨ ᠰᠣᠨᠤᠰᠲᠠᠨ᠂ ᠡᠴᠢᠨ᠎ᠡ ᠨᠢᠭᠤᠴᠠ ᠶᠢᠨ ᠲᠡᠥᠬᠡ ᠶᠢᠨ ᠰᠣᠪᠢᠩ ᠢ ᠪᠣᠳᠤᠭᠳᠠᠭᠤᠯᠤᠨ᠎ᠠ᠃ ᠨᠤᠲᠤᠭ ᠤᠨ ᠮᠠᠯᠴᠢᠳ ᠴᠦ ᠡᠨᠡᠬᠦ ︽ᠰᠡᠨᠵᠢ ᠶᠢᠨ ᠬᠠᠳᠠ︾ ᠪᠠᠨ ᠲᠤᠤᠯᠢ ᠶᠢᠨ ᠥᠩᠭᠡ ᠪᠣᠳᠤᠭ ᠣᠷᠤᠭᠤᠯᠵᠤ᠂ ᠭᠠᠯᠵᠠᠭᠤ ᠨᠣᠬᠠᠢ ᠪᠣᠶᠤ ᠭᠠᠯᠵᠠᠭᠤ ᠨᠣᠬᠠᠢ ᠳᠤ ᠬᠠᠵᠠᠭᠳᠠᠭᠰᠠᠨ ᠬᠦᠮᠦᠨ ᠮᠠᠯ ᠢ ︽ᠰᠡᠨᠵᠢ ᠶᠢᠨ ᠰᠢᠷᠭᠤᠤᠯ︾ ᠢᠶᠠᠷ ᠰᠢᠷᠭᠤᠭᠤᠯᠪᠠᠯ ᠭᠠᠯᠵᠠᠭᠤ ᠨᠢ ᠠᠷᠢᠯᠤᠨ᠎ᠠ ᠭᠡᠵᠦ ᠬᠠᠭᠤᠴᠢᠯᠠᠳᠠᠭ ᠶᠤᠮ᠃        ︽ᠰᠡᠨᠵᠢ ᠶᠢᠨ ᠰᠢᠷᠭᠤᠤᠯ︾ ᠢᠶᠠᠷ ᠰᠢᠷᠭᠤᠵᠤ᠂ ᠳᠡᠭᠡᠭᠰᠢ ᠮᠠᠴᠤᠭᠠᠳ ᠳᠠᠬᠢᠨ ᠵᠡᠭᠦᠨᠰᠢ ᠮᠣᠷᠤᠶᠢᠪᠠᠯ ︽ᠯᠠᠮᠠ ᠶᠢᠨ ᠠᠭᠤᠢ︾ ᠭᠡᠳᠡᠭ ᠬᠤᠶᠢᠰᠢ ᠬᠠᠷᠠᠭᠰᠠᠨ ᠡᠭᠦᠳᠡ ᠲᠠᠢ ᠬᠠᠳᠠᠨ ᠠᠭᠤᠢ ᠳᠤᠬᠢᠶᠠᠯᠳᠤᠨ᠎ᠠ᠃ ᠠᠭᠤᠢ ᠶᠢᠨ ᠡᠭᠦᠳᠡ ᠨᠢ ᠠᠰᠬ᠎ᠠ ᠬᠠᠳᠠ ᠶᠢ ᠨᠦᠬᠡᠯᠡᠵᠦ᠂ ᠳᠣᠣᠷ᠎ᠠ ᠠᠴᠠ ᠨᠢ ᠳᠡᠭᠡᠭᠰᠢ ᠮᠠᠴᠤᠬᠤ ᠳᠤ ᠪᠡᠯᠡᠳᠬᠡᠭᠰᠡᠨ ᠭᠢᠰᠭᠢᠭᠦᠷ ᠱᠠᠲᠤ ᠲᠠᠢ᠃ ᠬᠠᠳᠠᠨ ᠠᠭᠤᠢ ᠪᠠᠷ ᠳᠣᠲᠤᠭᠰᠢᠯᠠᠪᠠᠯ ᠭᠤᠷᠪᠠᠨ ᠮᠧᠲᠷ ᠣᠷᠴᠢᠮ ᠶᠠᠪᠤᠭᠠᠳ᠂ ᠳᠠᠬᠢᠵᠤ ᠮᠣᠷᠣᠶᠢᠨ ᠵᠡᠭᠦᠨ ᠡᠮᠦᠨᠡᠰᠢ ᠲᠠᠪᠤᠨ ᠮᠧᠲᠷ ᠣᠷᠴᠢᠮ ᠶᠠᠪᠤᠭᠠᠳ ᠠᠭᠤᠢ ᠶᠢᠨ ᠬᠤᠶᠢᠮᠤᠷ ᠲᠤ ᠬᠦᠷᠳᠡᠭ᠃ ᠦᠷᠭᠡᠨ ᠨᠢ ᠬᠤᠶᠠᠷ ᠮᠧᠲᠷ ᠢᠯᠡᠭᠦᠦ᠂ ᠦᠨᠳᠦᠷ ᠨᠢ ᠴᠦ ᠬᠤᠶᠠᠷ ᠮᠧᠲᠷ ᠣᠷᠴᠢᠮ ᠪᠠᠶᠢᠵᠤ᠂ ᠭᠤᠯᠳᠤᠩ ᠬᠡᠯᠪᠡᠷᠢᠲᠠᠢ ᠬᠠᠳᠠ ᠶᠢ ᠨᠦᠬᠡᠯᠡᠵᠦ ᠪᠡᠯᠡᠳᠬᠡᠭᠰᠡᠨ ᠪᠠᠶᠢᠵᠠᠢ᠃ ᠬᠠᠶᠠᠭ᠎ᠠ ᠬᠠᠨ᠎ᠠ ᠨᠢ ᠭᠦᠪ ᠭᠦᠯᠢᠭᠡᠷ᠂ ᠠᠭᠤᠢ ᠶᠢᠨ ᠱᠠᠯᠠ ᠨᠢ ᠲᠡᠪ ᠲᠡᠭᠰᠢᠬᠡᠨ᠃ ᠬᠦᠮᠦᠨ ᠤ ᠬᠦᠴᠦ ᠪᠠᠷ ᠮᠠᠯᠲᠠᠭᠰᠠᠨ ᠭᠡᠬᠦ ᠳᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠮᠡᠷᠭᠡᠵᠢᠯ ᠳᠤ ᠠᠷᠠᠢ ᠳᠣᠬᠢᠷᠠᠬᠤ ᠦᠭᠡᠢ ᠰᠢᠭ᠂ ᠡᠬᠡ ᠪᠠᠶᠢᠭᠠᠯᠢ ᠠᠴᠠ ᠪᠦᠲᠦᠵᠦ ᠭᠡᠬᠦ ᠳᠤ ᠠᠷᠠᠢ ᠢᠲᠡᠭᠡᠮᠡᠷ ᠦᠭᠡᠢ ᠣᠨᠴᠠ ᠶᠢᠨ ᠭᠤᠶᠢᠳᠠ ᠪᠠᠶᠢᠯ᠎ᠠ᠃ ᠠᠩᠬ᠎ᠠ ᠡᠬᠢᠨ ᠳᠤ ᠨᠢ ᠶᠠᠮᠠᠷ ᠬᠦᠮᠦᠨ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠲᠤᠬᠠᠢ ᠰᠣᠷᠪᠤᠯᠵᠢᠯᠠᠬᠤ ᠳᠤ ᠨᠤᠲᠤᠭ ᠤᠨ ᠨᠠᠰᠤᠲᠠᠶᠢᠴᠤᠳ ᠴᠦ ᠮᠡᠳᠡᠬᠦ ᠦᠭᠡᠢ᠂ ᠵᠥᠪᠬᠡᠨ ᠬᠠᠷ᠎ᠠ ᠴᠡᠷᠢᠭ᠂ ᠳᠡᠭᠡᠷᠡᠮ ᠲᠣᠨᠤᠭ᠎ᠠ ᠠᠴᠠ ᠵᠠᠶᠢᠯᠠᠵᠤ᠂ ᠬᠠᠶᠠ ᠨᠢᠭᠡ ᠨᠤᠲᠤᠭ ᠤᠨ ᠮᠠᠯᠴᠢᠳ ᠨᠢᠭᠤᠭᠳᠠᠵᠤ ᠪᠠᠶᠢᠭᠰᠠᠨ ᠪᠠ ︽ᠲᠥᠷᠪᠡᠨ ᠬᠠᠭᠤᠴᠢᠨ ᠢ ᠪᠠᠯᠪᠠᠴᠢᠬᠤ︾ ᠬᠦᠳᠡᠯᠭᠡᠭᠡᠨ ᠤ ᠦᠶ᠎ᠡ ᠪᠠᠷ ᠭᠡᠷ ᠡᠷᠦᠬᠡ ᠳᠤ ᠪᠠᠨ ᠲᠠᠬᠢᠵᠤ ᠪᠠᠶᠢᠭᠰᠠᠨ ᠪᠣᠷᠬᠠᠨ ᠪᠣᠳᠢᠰᠳ᠋ᠸ᠎ᠠ ᠪᠠᠨ ᠠᠭᠤᠢ ᠳᠤ ᠵᠠᠯᠠᠭᠰᠠᠨ ᠲᠤᠬᠠᠢ ᠵᠣᠭᠤᠭ ᠠᠴᠠ ᠬᠡᠰᠡᠭ ᠪᠣᠰᠠᠭ ᠰᠣᠨᠤᠰᠤᠭᠰᠠᠨ ᠡ︕        ︽ᠰᠢᠷ᠎ᠠ ᠬᠠᠳᠠ︾ ᠠᠴᠠ ᠡᠮᠦᠨᠡᠰᠢ ᠪᠠᠷᠠᠯᠠᠪᠠᠯ ᠡᠰᠡᠷᠡᠭ ᠨᠤᠲᠤᠭ ᠤᠨ ᠬᠡᠶᠢᠮᠦᠷᠢ ᠶᠢ ᠳᠠᠯᠠᠯᠤᠭᠰᠠᠨ ︽ᠡᠰᠡᠷᠡᠭ ᠣᠪᠣᠭ᠎ᠠ︾ ᠤᠮᠠᠷᠠᠰᠢ ᠬᠠᠨᠳᠤᠨ ᠬᠠᠨᠠᠷᠠᠨ ᠰᠡᠬᠦᠶᠢᠨ᠎ᠡ᠃ ᠠᠭᠤᠯᠠ ᠳᠠᠪᠠᠭᠠᠳ ᠦᠷᠭᠦᠯᠵᠢᠯᠡᠭᠰᠡᠨ ᠨᠤᠲᠤᠭ ᠤᠨ ᠢᠶᠠᠨ ᠠᠭᠤᠯᠠᠰ ᠤᠨ ᠣᠷᠣᠶᠢᠳ ᠢᠶᠠᠨ ᠪᠠᠷᠠᠯᠠᠬᠤ ᠭᠡᠰᠡᠨ ᠰᠢᠭ ᠢᠶᠠᠨ ᠤᠮᠠᠷᠠᠰᠢ ᠬᠠᠷᠠᠨ ᠪᠣᠰᠴᠤ᠂ ᠪᠠᠶᠠᠨ ᠬᠠᠶᠢᠷᠬᠠᠨ ᠲᠠᠢ ᠪᠠᠨ ᠪᠠᠷ᠎ᠠ ᠪᠠᠷ᠎ᠠ ᠪᠠᠨ ᠬᠠᠷᠠᠯᠴᠠᠨ ᠨᠢᠭᠤᠷᠯᠠᠨ ᠵᠣᠭᠰᠤᠭᠰᠠᠨ ︽ᠡᠰᠡᠷᠡᠭ ᠣᠪᠣᠭ᠎ᠠ︾ ᠪᠠᠨ ᠨᠤᠲᠤᠭ ᠤᠨ ᠮᠠᠯᠴᠢᠳ ᠵᠢᠯ ᠵᠢᠯ ᠤᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠳᠤ ᠪᠢᠯᠢᠭ ᠤᠨ ᠬᠡᠭᠡᠷ ᠤᠨ ᠤᠭᠢᠶᠠᠯᠠᠯᠭ᠎ᠠ ᠶᠢᠨ ᠡᠳᠦᠷ ᠳᠣᠬᠢᠶᠠᠯᠳᠤᠭᠤᠯᠤᠨ ᠲᠠᠬᠢᠳᠠᠭ ᠶᠤᠮ᠃ ᠣᠪᠣᠭᠠᠨ ᠤ ᠪᠠᠨ ᠬᠤᠶᠢᠲᠤ ᠬᠤᠷᠮᠤᠢ ᠳᠤ ᠡᠪᠦᠯ ᠵᠤᠨ ᠦᠭᠡᠢ ᠬᠦᠯᠳᠡᠳᠡᠭ ᠦᠭᠡᠢ ᠬᠠᠷᠠᠵᠠ ᠪᠤᠯᠠᠭ ᠤᠨᠳᠤᠷᠠᠵᠤ ᠪᠠᠶᠢᠳᠠᠭ᠃ ᠡᠨᠡ ᠪᠤᠯᠠᠭ ᠠᠴᠠ ᠡᠬᠢ ᠠᠪᠤᠭᠰᠠᠨ ᠡᠰᠡᠷᠡᠭ ᠭᠤᠣᠯ ᠨᠢ ᠨᠡᠮᠡᠯᠵᠢᠨ ᠤᠷᠤᠰᠤᠭᠰᠠᠭᠠᠷ ᠪᠠᠶᠠᠨ ᠬᠠᠶᠢᠷᠬᠠᠨ ᠠᠴᠠ ᠡᠬᠢ ᠠᠪᠤᠭᠰᠠᠨ ᠤᠯᠠᠭᠠᠨᠪᠠᠶᠢᠴᠠ ᠶᠢᠨ ᠭᠤᠣᠯ ᠲᠠᠢ ᠤᠷᠤᠰᠬᠠᠯ ᠨᠡᠶᠢᠯᠡᠨ ᠦᠶᠡᠯᠵᠡᠨ ᠳᠠᠪᠠᠯᠭᠠᠯᠠᠭᠰᠠᠠᠭᠷ ᠦᠯᠵᠡᠶᠢᠮᠦ᠋ᠷᠡᠨ ᠳᠤ ᠪᠠᠨ ᠴᠢᠳᠬᠤᠨ᠎ᠠ᠃ ᠠᠭᠤᠯᠠ ᠲᠠᠢ᠂ ᠤᠰᠤ ᠲᠠᠢ ᠨᠤᠲᠤᠭ ᠤᠨ ᠲᠣᠷᠭᠠᠨ ᠦᠵᠡᠮᠵᠢ᠃ ᠴᠡᠯ ᠨᠣᠭᠤᠭᠠᠷᠠᠭᠰᠠᠨ ᠭᠤᠣᠯ ᠤᠨ ᠵᠦᠯᠭᠡ ᠲᠠᠢ ᠪᠠᠨ ᠬᠤᠣᠰᠯᠠᠨ ᠲᠦᠮᠡᠨ ᠤ ᠬᠠᠷᠠᠭ᠎ᠠ ᠶᠢ ᠮᠢᠯᠢᠶᠠᠨ᠎ᠠ᠃ ᠪᠠᠶᠠᠨ ᠬᠠᠶᠢᠷᠬᠠᠨ᠂ ᠡᠰᠡᠷᠡᠭ ᠣᠪᠣᠭᠠᠨ ᠤ ᠳᠤᠮᠳᠠ ᠬᠤᠶᠢᠰᠢ ᠤᠷᠤᠭᠰᠢ 33.2 ᠺᠢᠯᠤᠮᠧᠲᠷ ᠤᠷᠲᠤ᠂ 6 ᠺᠢᠯᠤᠮᠧᠲᠷ ᠥᠷᠭᠡᠨ ᠪᠠᠶᠠᠨ ᠡᠩᠭᠡᠷ ᠤᠨ ᠲᠠᠯ᠎ᠠ ᠨᠡᠯᠦᠶᠢᠵᠦ᠂ ᠠᠬᠢ ᠳᠠᠭᠠᠨ᠎ᠠ ᠰᠡᠩᠭᠢᠨᠡᠵᠦ᠂ ᠬᠢᠶᠠᠭ ᠳᠠᠷᠠᠰᠤ ᠬᠠᠯᠢᠭᠤᠷᠠᠳᠠᠭ ᠪᠠᠶᠢᠭᠰᠠᠨ ᠨᠢ ᠠᠭᠤᠷᠬᠠᠢ ᠶᠢᠨ ᠦᠢᠯᠡᠰ ᠤᠨ ᠬᠦᠭᠵᠢᠯᠲᠡ᠂ ᠵᠠᠮ ᠨᠡᠪᠲᠡᠷᠡᠯᠭᠡ ᠶᠢᠨ ᠰᠢᠨᠡᠴᠢᠯᠡᠯᠲᠡ᠂ ᠬᠤᠷ᠎ᠠ ᠲᠤᠨᠤᠳᠠᠰᠤ ᠬᠤᠪᠤᠷᠳᠠᠭᠰᠠᠨ ᠭᠠᠩ ᠭᠠᠴᠢᠭ ᠵᠡᠷᠭᠡ ᠡᠯ᠎ᠡ ᠵᠦᠢᠯ ᠤᠨ ᠰᠢᠯᠲᠠᠭᠠᠨ ᠠᠴᠠ ᠪᠣᠯᠵᠤ᠂ ᠤᠷᠭᠤᠮᠠᠯ ᠡᠪᠡᠰᠦ ᠲᠠᠴᠢᠷᠰᠢᠨ᠂ ᠤᠨᠠᠭᠤᠯᠢ ᠨᠦᠬᠡ ᠪᠠᠷ ᠳᠦᠭᠦᠷᠴᠦ᠂ ᠡᠬᠡ ᠬᠦᠷᠦᠰᠦ ᠨᠢ ᠢᠳᠡᠭᠳᠡᠨ᠂ ᠥᠨᠳᠡᠭᠡᠨ ᠴᠢᠯᠠᠭᠤᠳ ᠯᠡ ᠵᠢᠰᠦ ᠪᠠᠨ ᠭᠠᠶᠢᠬᠠᠭᠤᠯᠤᠨ᠎ᠠ᠃ ᠨᠠᠭᠠᠨ᠎ᠠ ᠴᠠᠭᠠᠨ᠎ᠠ ᠠᠴᠠ ᠮᠠᠰᠢᠨ ᠤ ᠳᠠᠭᠤᠨ ᠬᠦᠷᠴᠢᠭᠢᠨᠡᠨ᠂ ᠬᠠᠶᠢᠷ ᠴᠢᠯᠠᠭᠤ ᠪᠣᠯᠪᠠᠰᠤᠷᠠᠭᠤᠯᠬᠤ᠂ ᠤᠯᠠᠭᠠᠨ ᠰᠢᠷᠤᠢ ᠮᠠᠯᠲᠠᠬᠤ ᠭᠡᠳ ᠣᠯᠠᠨ ᠤᠯᠠᠨ ᠠᠵᠤ ᠠᠬᠤᠶᠢᠯᠠᠯ ᠪᠣᠰᠣᠨ᠎ᠠ᠂᠂᠂᠂               ᠦᠢᠯᠡᠰ ᠬᠠᠷᠠᠭᠠᠯᠠᠭᠰᠠᠨ ᠮᠠᠷᠭᠠᠰᠢ ᠶᠢᠨ ᠪᠠᠭᠤᠴᠠ        ᠡᠯᠢᠭᠡ ᠪᠦᠲᠦᠨ ᠬᠤᠷᠸ᠎ᠠ ᠶᠢᠨ ᠵᠠᠢ ᠳᠤ᠂ ᠡᠰᠡᠷᠡᠭ ᠣᠪᠣᠭᠠᠨ ᠤ ᠬᠡᠶᠢᠮᠦᠷᠢ ᠳᠠᠯᠠᠯᠭ᠎ᠠ ᠳᠤ ᠰᠦᠵᠢᠭᠯᠡᠵᠦ᠂ ᠲᠠᠩᠰᠤᠭ ᠵᠢᠷᠭᠠᠯ ᠢᠶᠠᠨ ᠡᠳ᠋ᠯᠡᠵᠦ ᠶᠠᠪᠤᠭ᠎ᠠ ᠡᠰᠡᠷᠡᠭ ᠨᠤᠲᠤᠭ ᠤᠨ ᠤᠬᠠᠭᠠᠨᠲᠤ ᠲᠦᠮᠡᠨ ᠮᠠᠨᠢ ᠴᠠᠭ ᠲᠥᠷᠥ ᠶᠢᠨ ᠲᠥᠪᠰᠢᠨ ᠠᠮᠤᠭᠤᠯᠠᠩ᠂ ᠨᠡᠶᠢᠭᠡᠮ ᠨᠡᠶᠢᠲᠡ ᠶᠢᠨ ᠬᠦᠭᠵᠢᠯ ᠪᠠᠳᠠᠷᠠᠯ ᠤᠨ ᠡᠷᠡᠨ ᠳᠤ  ᠥᠭᠡᠳᠡ ᠡᠰᠡᠷᠡᠭ ᠠᠮᠢᠳᠤᠷᠠᠯ ᠠᠬᠤᠢ ᠪᠠᠨ ᠡᠷᠭᠦᠵᠦ ᠶᠠᠪᠤᠭ᠎ᠠ ᠳ᠋ᠠ︕        ᠡᠰᠡᠷᠡᠭ ᠨᠤᠲᠤᠭ ᠳᠠᠷᠬᠠᠨ ᠠᠯᠳᠠᠷ ᠢᠶᠠᠨ ᠳᠠᠭᠤᠷᠢᠰᠤᠭᠤᠯᠵᠤ᠂ ᠳᠠᠶᠠᠭᠠᠷ ᠲᠦᠮᠡᠨ ᠳᠤ ᠮᠡᠳᠡᠷᠡᠭᠳᠡᠵᠦ᠂ ᠲᠥᠷᠥ ᠭᠦᠷᠦᠨ ᠤ ᠵᠠᠰᠠᠭ ᠵᠠᠬᠢᠷᠭᠠᠨ ᠳᠤ ᠪᠠᠭᠲᠠᠯᠴᠠᠵᠤ᠂ ᠣᠨ ᠵᠢᠯ ᠤᠨ ᠤᠷᠤᠰᠬᠠᠯ ᠢ ᠲᠤᠭᠤᠯᠵᠤ ᠨᠢᠭᠡᠨᠲᠡ ᠨᠠᠶᠠᠭᠠᠳ ᠵᠢᠯ ᠤᠨ ᠲᠡᠥᠬᠡ ᠲᠠᠢ ᠪᠣᠯᠵᠠᠢ᠃ ᠤᠤᠭᠠᠯ ᠨᠤᠲᠤᠭ ᠤᠨ ᠢᠷᠭᠡᠳ ᠠᠴᠠ ᠭᠠᠳᠠᠨ᠎ᠠ ᠬᠤᠶᠢᠨ᠎ᠠ ᠡᠮᠦᠨ᠎ᠡ ᠠᠴᠠ ᠪᠠᠨ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠨᠤᠲᠤᠭᠰᠢᠭᠰᠠᠨ ᠠᠶᠢᠯ ᠡᠷᠦᠬᠡ ᠲᠠᠢ ᠪᠠᠨ ᠣᠳᠣ ᠪᠣᠯᠬᠤ ᠳᠤ 113 ᠡᠷᠦᠬᠡ᠂ 496 ᠬᠦᠮᠦᠨ ᠠᠮᠠ ᠲᠠᠢ ᠪᠣᠯᠵᠤ ᠬᠦᠭᠵᠢᠭᠰᠡᠨ ᠪᠠᠶᠢᠨ᠎ᠠ᠃        ᠨᠤᠲᠤᠭ ᠤᠰᠤᠨ ᠤ ᠨᠠᠪᠲᠠᠭ ᠰᠠᠪᠲᠠᠭ ᠤᠨ ᠢᠪᠡᠭᠡᠯ ᠢᠶᠠᠷ ᠡᠰᠡᠷᠡᠭ ᠨᠤᠲᠤᠭ ᠤᠨ ᠮᠠᠯᠴᠢᠨ ᠲᠦᠮᠡᠨ ᠥᠭᠡᠳᠡ ᠡᠰᠡᠷᠡᠭ ᠠᠮᠢᠳᠤᠷᠠᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠡᠨᠡ ᠨᠤᠲᠤᠭ ᠠᠴᠠ ᠣᠯᠠᠨ ᠣᠯᠠᠨ ᠰᠤᠤᠲᠤ ᠬᠦᠮᠦᠨ ᠴᠣᠯᠭᠤᠷᠠᠨ ᠭᠠᠷᠤᠭᠰᠠᠨ ᠪᠠᠶᠢᠨ᠎ᠠ᠃ ᠡᠭᠦᠨ ᠳᠤ ᠳᠤᠷᠠᠳᠤᠭᠤᠰᠢᠲᠠᠢ ᠨᠢ ︽ᠣᠲᠠᠴᠢ ᠠᠪᠤᠷᠠᠯᠲᠠᠨ︾ ᠴᠣᠯᠠ ᠲᠠᠢ ᠡᠮᠴᠢ ᠬᠠᠶᠢᠪᠤ᠂ ᠤᠷᠲᠤ ᠶᠢᠨ ᠳᠠᠭᠤᠤ ᠶᠢᠨ ᠳᠠᠷᠬᠠᠨ ᠠᠯᠲᠠᠩᠭᠡᠷᠡᠯ᠂ ᠣᠷᠣᠨ ᠤ ᠳᠡᠰ ᠤᠨ ᠲᠠᠮᠢᠷᠴᠢᠨ ᠵᠠᠩᠭᠢᠶᠠᠲᠤ ᠪᠦᠬᠡ ᠨᠠᠷᠠᠨᠪᠠᠭᠠᠲᠤᠷ᠂ ᠤᠷᠠᠨ ᠳᠠᠷᠬᠠᠨ ᠫᠧᠷᠯᠠᠢ᠂ ᠴᠤᠤᠲᠤ ᠠᠩᠴᠢᠨ ᠰᠠᠶᠢᠨ᠋ᠦ᠌ᠯᠵᠡᠢ ᠵᠡᠷᠭᠡ ᠲᠡᠥᠬᠡᠨ ᠳᠤ ᠠᠯᠳᠠᠷᠲᠠᠢ ᠂ ᠲᠦᠮᠡᠨ ᠳᠤ ᠪᠠᠨ ᠳᠤᠷᠠᠰᠬᠠᠯᠲᠠᠢ ᠬᠦᠮᠦᠰ ᠠᠴᠠ ᠭᠠᠳᠠᠨ᠎ᠠ ᠠᠶᠢᠮᠠᠭ ᠬᠤᠰᠢᠭᠤᠨ ᠤ ᠺᠠᠳ᠋ᠷ᠂ ᠠᠷᠠᠳ ᠤᠨ ᠭᠠᠪᠢᠶᠠᠲᠤ ᠪᠠᠭᠰᠢ᠂ ᠵᠢᠱᠢᠶᠡᠴᠢ ᠮᠠᠯᠴᠢᠨ ᠴᠣᠯᠭᠤᠷᠠᠭᠰᠠᠨ ᠪᠠᠶᠢᠨ᠎ᠠ᠃ ︽ᠳᠡᠯᠡᠬᠡᠢ ᠪᠠᠷᠠᠯᠠᠭᠰᠠᠨ ᠬᠠᠷᠠᠭ᠎ᠠᠳᠡᠯᠭᠡᠷ ᠪᠠᠶᠠᠨ ᠨᠤᠲᠤᠭᠳᠡᠭᠡᠪᠦᠷ ᠴᠠᠭᠠᠨ ᠭᠡᠷᠳᠥᠷᠪᠡᠨ ᠤᠯᠠᠷᠢᠯ ᠤᠨ ᠨᠡᠭᠦᠳᠡᠯ︾ ᠮᠠᠶ᠋ᠢᠭ ᠤᠨ ᠮᠠᠯᠵᠢᠬᠤ ᠰᠤᠶᠤᠯ᠂ ᠴᠠᠭ ᠡᠷᠡᠨ ᠤ ᠬᠤᠪᠢᠷᠠᠯᠲᠠ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠤᠨ ᠲᠠᠴᠢᠷᠳᠠᠯ ᠠᠴᠠ ᠪᠣᠯᠵᠤ ᠦᠨᠢᠳᠡ ᠠᠩᠵᠢᠷᠠᠭᠰᠠᠨ ᠪᠠᠶᠢᠨ᠎ᠠ᠃ ︽ᠪᠢᠳᠡ ᠥᠴᠥᠭᠡᠳᠥᠷ ᠤᠨ ᠮᠦᠷ ᠢ ᠬᠠᠶᠢᠬᠤ ᠪᠢᠰᠢ᠂ ᠬᠠᠷᠢᠨ ᠮᠠᠷᠭᠠᠰᠢ ᠶᠢᠨ ᠵᠠᠮ ᠢᠶᠠᠨ ᠰᠦᠪᠡᠭᠴᠢᠯᠡᠪᠡᠯ ᠵᠣᠬᠢᠨ᠎ᠠ︾ ᠭᠡᠵᠦ ᠵᠣᠷᠢᠭᠲᠠᠢ ᠰᠡᠳᠬᠢᠵᠦ᠂ ᠬᠢᠨᠠᠮᠠᠭᠠᠢ ᠠᠵᠢᠯᠯᠠᠳᠠᠭ ᠰᠢᠯᠢᠳᠡᠭ ᠨᠠᠮ ᠤᠨ ᠡᠭᠦᠷ ᠤᠨ ᠱᠦᠵᠢ᠂ ᠵᠢᠱᠢᠶᠡᠴᠢ ᠠᠷᠠᠳ ᠤᠨ ᠲᠦᠯᠦᠭᠡᠯᠡᠭᠴᠢ ᠤᠤᠭᠠᠨᠭᠡᠷᠡᠯᠲᠦ ᠭᠤᠸᠠᠢ ᠮᠠᠯᠴᠢᠨ ᠲᠦᠮᠡᠨ ᠢᠶᠠᠨ ᠳᠠᠭᠠᠭᠤᠯᠤᠨ᠂ ᠪᠠᠶᠠᠵᠢᠯ ᠤᠨ ᠵᠠᠮ ᠢᠶᠠᠷ ᠰᠢᠭᠤᠷᠬᠠᠶᠢᠯᠠᠨ᠎ᠠ᠃        ᠮᠠᠯᠴᠢᠨ ᠲᠦᠮᠡᠨ ᠤ ᠤᠤᠭᠤᠬᠤ ᠤᠰᠤ ᠶᠢ ᠲᠦᠭᠡᠭᠡᠯ ᠤᠰᠤ ᠪᠠᠷ ᠬᠠᠩᠭᠠᠵᠤ᠂ ᠮᠠᠯ ᠲᠠᠷᠢᠶᠠᠯᠠᠩ ᠢ ᠬᠤᠣᠰᠯᠠᠭᠤᠯᠤᠨ ᠡᠵᠡᠩᠨᠡᠵᠦ᠂ ᠡᠷᠦᠬᠡ ᠪᠦᠷᠢ ︽ᠤᠰᠤ᠂ ᠮᠣᠳᠣ᠂ ᠡᠪᠡᠰᠦ᠂ ᠲᠠᠷᠢᠶ᠎ᠠ᠂ ᠮᠠᠰᠢᠨ︾ ᠲᠠᠪᠤ ᠪᠦᠷᠢᠳᠦᠭᠰᠡᠨ ᠵᠢᠵᠢᠭ ᠡᠪᠡᠰᠦᠨ ᠬᠦᠷᠢᠶ᠎ᠡ ᠲᠠᠢ᠂ ᠬᠦᠮᠦᠨ ᠪᠦᠷᠢ ᠳᠤ ᠪᠦᠷᠢᠨ ᠲᠦᠬᠦᠷ ᠤᠰᠤᠵᠢᠯᠠᠯᠲᠠ ᠶᠢᠨ ᠲᠦᠬᠦᠭᠡᠷᠦᠮᠵᠢ ᠲᠠᠢ ᠤᠰᠤᠨ ᠲᠠᠷᠢᠶ᠎ᠠ ᠲᠠᠢ ᠪᠣᠯᠵᠤ ᠲᠡᠭᠷᠢ ᠶᠢᠨ ᠴᠢᠷᠠᠢ ᠬᠠᠷᠠᠵᠤ ᠠᠮᠢᠳᠤᠷᠠᠳᠠᠭ ᠲᠡᠷᠡᠬᠦa ᠴᠠᠭ ᠡᠷᠡᠨ ᠢ ᠦᠭᠡᠶᠢᠰᠬᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠭᠦᠨ ᠤ ᠵᠡᠷᠭᠡ ᠪᠠᠷ ︽ᠡᠷᠦᠬᠡ ᠬᠤᠯᠪᠤᠭᠠᠯᠠᠨ ᠡᠵᠡᠩᠨᠡᠵᠦ᠂ ᠬᠦᠴᠦ ᠪᠠᠨ ᠬᠠᠮᠲᠤᠳᠬᠠᠨ᠂ ᠬᠠᠮᠲᠤ ᠪᠠᠷ ᠪᠠᠶᠠᠵᠢᠬᠤ︾ ᠲᠥᠰᠥᠪ ᠭᠠᠷᠭᠠᠨ ᠬᠤᠨᠢ ᠦᠬᠡᠷ ᠲᠡᠵᠢᠭᠡᠬᠦ ᠲᠤᠰᠬᠠᠢ ᠬᠤᠷᠰᠢᠶ᠎ᠠ ᠪᠠᠶᠢᠭᠤᠯᠵᠤ᠂ ᠬᠠᠷᠢᠯᠴᠠᠨ ᠳᠡᠮᠵᠢᠵᠦ᠂ ᠬᠠᠮᠲᠤ ᠪᠠᠷ ᠪᠠᠶᠠᠵᠢᠬᠤ ᠨᠠᠮ ᠤᠨ ᠱᠤᠭᠤᠮ ᠲᠠᠢ ᠨᠢᠭᠡᠳᠴᠦ᠂ ᠨᠠᠷᠠ ᠬᠠᠷᠠᠭᠠᠯᠠᠨ ᠴᠢᠷᠮᠠᠶᠢᠵᠤ ᠶᠠᠪᠤᠭ᠎ᠠ ᠳ᠋ᠠ︕
  
ᠢᠷᠡᠯᠲᠡ᠄ ︽ᠦᠯᠵᠡᠶᠢᠮᠦ᠋ᠷᠡᠨ︾ ᠰᠡᠳᠬᠦᠯ ᠠᠴᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠤᠪᠤᠭ᠎ᠠ ᠲᠠᠬᠢᠬᠤ
ᠪᠢᠳᠡᠭᠦᠯᠭᠦ ᠪᠠ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠲᠡᠭᠷᠢ ᠲᠠᠭᠢᠬᠤ
ᠪᠠᠭᠠᠷᠢᠨ ᠮᠤᠩᠭᠤᠯᠴᠥᠳ ᠤᠨ ᠭᠠᠯ ᠲᠠᠭᠢᠯᠭ᠎ᠠ
ᠪᠠᠭᠠᠷᠢᠨ ᠬᠡᠣᠬᠡᠳ ᠤᠨ ᠪᠦᠮᠪᠦᠭᠡ ᠨᠢᠰᠠᠯᠬᠤ ᠨᠠᠭᠠᠳᠤᠮ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05010860号